हावाहुरी पीडितलाई सहयोग गर्न महासंघले बनायो ५० लाखको कोष, चेम्बरले पनि सहयोग गर्ने
काठमाडौं । नेपाल उद्योग वाणिज्य महासंघ र नेपाल चेम्बर अफ कमर्शले बारा र पर्साका हावाहुरी पीडितका सहयोग गर्ने भएका छन् । नेपाल उद्योग वाणिज्य महासंघको सोमबार बसेको आकस्मिक बैठकले हावाहुरी पीडितका लागि ५० लाखको राहत कोष खडा गरेर पीडितलाई राहत वितरण गर्ने निर्णय गरेको छ । प्रभावित क्षेत्रमा खाद्यान्न, त्रिपाल, टेन्ट लगायतका अत्यावश्यक राहत सामाग्री तत्काल वितरण गर्न शुरु गर्ने निर्णय गरेको महासंघका उपाध्यक्ष उमेशलाल श्रेष्ठले बताए । यता, नेपाल चेम्बर अफ कमर्शले हावाहुरी पीडितलाई आवश्यक त्रिपाल, टेन्ट र खाद्यान्न उपलब्ध गराउने भएको छ । चेम्बर अध्यक्ष राजेशकाजी श्रेष्ठले तराईमा परेको विपत्तिप्रति दुःख व्यक्त गर्दै तत्कालै राहत सामाग्री उपलब्ध गराउने निर्णय भएको बताए ।
ओम बैक र एनक्लाउडबीच कार्ड सम्झौता
काठमाडौं । पोखराको ओम डेभलपमेन्ट बैंक र एनक्लाउडबीच एक समझदारीपत्रमा हस्ताक्षर भएको छ । समझदारी पत्रमा बैंकका प्रमुख कार्यकारी अधिकृत विश्वमोहन अधिकारी तथा एनक्लाउडका प्रमुख कार्यकारी अधिकृत दीपेन्द्र नारायण श्रेष्ठले स्थानीय शृङगा यातायात र पोखरा बस व्यवसायी समितिका अधिकारीहरुको उपस्थितिमा हस्ताक्षर गरेका हुन् । यो समझदारी अनुसार स्मार्ट सिटीको अवधारणा अन्तर्गत पोखरा महानगरपालिकाले आगामी २०७६ बैशाख देखी महानगरपालिका भित्र सञ्चालन हुने सार्वजनिक यातायातका साधनहरुमा लागु गर्न गइरहेको इ– टिकेटिङ सिस्टमको लागी आवश्यक हुने यात्रा स्मार्ट कार्ड जारी, वितरण तथा सार्वजनिक सवारीको दैनिक रुपमा हुने आम्दानीको सेटलमेन्टको काम ओम डेभलपमेन्ट बैंक मार्फत हुनेछ । साथै ओम बैंकले प्रथम चरणमा पोखरा महानगरपालिका भित्र चल्ने करीब ८०० सवारी साधनमा टर्मिनल जडान गर्ने र ४ वर्ष भित्रमा ३ लाख स्मार्ट यात्रा कार्ड वितरण गर्ने बताइएको छ । यसअघि एनक्लाउड र पोखरा महानगरपालिका बीच यसै परियोजनाको लागी महानगरपालिका भित्र सञ्चालनमा रहेका यातायात व्यबसायी समितिहरुको प्रतिनिधिको उपस्थितिमा सम्झौता पत्रमा हस्ताक्षर भएको थियो । एनक्लाउडले काठमाण्डौ उपत्यकामा चल्ने साझा यातायातका सवारी साधनमा यो सेवा जडान गरी सफलतापुर्वक सञ्चालन गरिरहेको बताएको छ ।
हावा हुरी प्रभावितका लागि पानी बोक्ने एम्बुलेन्स
काठमाडौं । बारा र पर्सा जिल्लाको हावा हुरी प्रभावित क्षेत्रमा पानी शुद्धीकरणका लागि खानेपानी तथा ढल व्यवस्थापन विभागले पानी परीक्षण घुम्ती सेवा अर्थात् पानी एम्बुलेन्स पठाएको छ । हावाहुरी आँधीले क्षति पुर्याएको बस्तीमा पानीका कारण रोगव्याधिको प्रकोप फैलिन नदिन विभागले पानी शुद्धीकरण गर्ने आधुनिक उपकरण सहितको वाटर एम्बुलेन्स त्यसतर्फ पठाएको हो । पानी शुद्धीकरण गर्ने पियुष, एक्वा ट्याब र ब्लिचिङ पाउडर लगायतका सामाग्रीहरु बोकेर विभाग र खानेपानी डिभिजन कार्यालय ईटहरीबाट वाटर एम्बुलेन्स प्रभावित क्षेत्रमा गएको छ । फोहोरपानीलाई शुद्धीकरण गरी पिउन योग्य बनाउनका लागि वाटर एम्बुलेन्समा प्रविधि जडान गरिएको छ । पानी परीक्षण विशेषज्ञ किशोर पाण्डेको नेतृत्वमा टोली हावाहुरी प्रभावित क्षेत्रमा गएको छ । पानीका कारण रोगव्याधि फैलिने सम्भावना बढी हुने हुँदा सबै किसिमका उपायहरु अपनाईने विशेषज्ञ पाण्डेले बताए ।
मौसमको कारण उडान रोकिए, डिले उडान पनि नहुने
काठमाडौं । सोमबारदेखि मौसमको कारण उडान रोकिए डिले उडान नहुने भएको छ । त्रिभुवन अन्तर्राष्ट्रिय विमानस्थल दिनको १० घण्टासम्म बन्द हुने भएपछि डिले उडान रोकिएको हो । ३ महिनासम्म डिले उडानको सम्भावना नरहेको वायु सेवा संचालक संघका प्रवक्ता घनश्यामराज आचार्याले बताए । सोमबारदेखि हुने मर्मत कार्यले प्रत्येक हवाई कम्पनीको २० प्रतिशत उडान कटौती हुने भएकाले डिले उडान गर्न नसकेको संघले जनाएको छ ।
राष्ट्रपति र प्रधानमन्त्रीबारे अनावश्यक पोष्ट गर्नेलाई छाड्दैनौंः मन्त्री बास्कोटा
काठमाडौं । सञ्चार तथा सूचना प्रविधि मन्त्री गोकुल बास्कोटाले राष्ट्रपति र प्रधानमन्त्रीका बारेमा अनावश्यक पोष्ट गर्नेहरुलाई कारवाही गर्ने बताएका छन् । सूचना प्रविधिका सम्बन्धमा व्यवस्था गर्न बनेको बिधेयकमाथी विकास तथा प्रविधि समितिमा उनले राष्ट्रपति र प्रधानमन्त्रीको सम्बन्धबारे अनावश्यक पोष्ट गर्नेहरुलाई कारवाही गर्ने बताएका हुन् । ‘सम्माननीय राष्ट्रपति र प्रधानमन्त्रीका बारेमा गरिएका पोष्टहरु हामीसँग सुरक्षित छन्, अब त्यस्तालाई छाड्दैनौं’ मन्त्री बास्कोटाले भने । उनले देश टुक्र्याउँछु भन्दै फेसबुक र युट्युबमा भिडियो हाल्नेहरुलाई पनि कारवाही गरिछाड्ने स्पष्ट पारे । ‘कसैले देश टुक्र्याउनकै लागि फेसबुक वा युट्युबमा आव्हान गर्यो भने के गर्ने ? तर अब हामी चुप लागेर बस्दैनौं ।’, मन्त्री बास्कोटाले भने । उनले सामाजिक सञ्जाललाई कानुनद्धारा नियमन नगरिए घर घरमा हाइड्रोजन बम फिटिङ गरे जस्तो हुने दावी पनि गरे ।
सिभिल क्यापिटल र एनएलजी इन्स्योरेन्सबीच संझौता
काठमाडौँ । सिभिल क्यापिटल मार्केट लिमिटेड र एनएलजी इन्स्योरेन्स कम्पनी लिमिटेडबीच संझौता भएको छ । सिभिल क्यापिटलका कर्मचारी र उक्त क्यापिटल मार्फत शेयर कारोबार गर्दै आएका सेवाग्राहीहरुलाई निर्जीवन बीमामा विशेष छुट दिने बारेमा संझौता भएको हो । त्यसैगरी एनएलजीका कर्मचारी र सेवाग्राहीहरुलाई सिभिल क्यापिटल मार्फत शेयर कारोबार गराउने संझौता भएको हो । संझौता पत्रमा सिभिल क्यापिटलका कार्यबाहक प्रमुख कार्यकारी अधिकृत शुसील महर्जन र एनएलजी इन्स्योरेन्सका प्रमुख कार्यकारी अधिकृत सुनिलबहादुर पन्तले हस्ताक्षर गरेका छन् ।
नवलपुरमा स्पर्स लघुवित्तको एक दिने तालिम
काठमाडौं । स्पर्स लघुवित्त वित्तीय संस्थाले एक दिने कृषि तथा पशुपालन सम्वन्धी तालिम सम्पन्न गरेको छ । कार्यक्रमको उद्घाटन गर्दै वित्तीय संस्थाका विजनेश तथा कर्जा विभाग प्रमुख हरिशरण गिरीले सहभागीहरुलाई यस्तो किसिमको तालिमबाट प्राप्त ज्ञानको उपभोग गरी व्यवसायिक कृषि तथा पशुपालनलाई जोड दिई आर्थिक क्रियाकलाप वृद्धि गर्न र आत्मनिर्भर बन्न प्रेरित गरेका थिए । वित्तीय संस्थाका सुक्रौली शाखाका शाखा प्रवन्धक अरविन्द मल्लले सञ्चालन गरेको उक्त कार्यक्रममा वित्तीय संस्थाका विजनेश तथा कर्जा विभागका प्रमुख, वित्तीय संस्थाका अन्य शाखाका शाखा प्रवन्धकहरु र स्थानीय भद्रभलाद्मीहरुको सहभागीता रहेको थियो । वित्तीय संस्थाले हाल २० वटा शाखा मार्फत करिव १५ हजार सदस्यहरुलाई आफ्नो सेवा विस्तार गरेको छ । नवलपुर जिल्लामा अवस्थित सेमरी, सुक्रौली र भूताहा शाखाका करिव ४१ जना ग्राहक सदस्यहरु यस किसिमको तालिमबाट लावान्भित भएका हुन् ।
राजस्व कार्यालयका नासु सबिन सुवेदी १५ हजार घुस लिनासाथ पक्राउ
काठमाडौं । आन्तरिक राजस्व कार्यालय जागती, भक्तपुरका नायव सुब्बा सबिन सुब्बा भ्रष्ट्राचार आरोपमा पक्राउ परेको छन् । सेवाग्राहीसँग १५ हजार गैरकानुनी रकम लिदैं गर्दा सुवेदी पक्राउ परेका हुन् । सुवेदीले स्वास्थ्य चौकी भवन निर्माण सम्पन्न पस्चात नियम अनुसार पाउने रकमका लागि सेवाग्राीसँग रकम माग गरिरहका थिए । सोहि अवस्थामा अख्तियारको टोलीले उनलाई कार्यकक्षबाटै पक्राउ गरेको हो । उनी विरुद्ध भ्रष्ट्राचार निवारण ऐन बमोजिम कारबाहि प्रक्रिया अघि बढाउने तयारी भैरहेको आयोगले जनाएको छ ।
