व्यवसायीले हावाहुरी पीडितको राहत सामग्री निःशुल्क ढुवानी गर्ने
काठमाडौँ । बारा र पर्सामा गत आइतबार साँझ आएको हावाहुरीबाट पीडितका लागि राहत सामग्रीको ढुवानी निःशुल्क गरिने भएको छ ।नेपाल सामान ढुवानी व्यवसायी सङ्घको आज बसेको बैठकले उक्त क्षेत्रमा प्रदान गरिने राहत सामग्री निःशुल्क ढुवानीको व्यवस्था गर्ने निर्णय गरेको हो । सङ्घका अध्यक्ष श्यामकुमार डङ्गोलले राहत सामग्री लैजाने तयारीमा रहेका विभिन्न सङ्घ, संस्था, व्यक्तिलगायत सहयोगी र दातालाई सङ्घसँग समन्वय गर्न आग्रह गरे । उनले राहत सामग्री काठमाडौँदेखि वितरणस्थलसम्म पुर्याउन सहयोग गरिने बताए । सङ्घले हावाहुरीमा परी दिवङ्गत भएकाको आत्माको चिरशान्तिको कामना गर्दै शोक सन्तप्त परिवारजनप्रति समवेदना व्यक्त गरेको छ । एक नेपालीले अर्को नेपालीलाई गाह्रो पर्दा मन खोलेर सहयोग गर्ने संस्कारअनुसार सहयोगी हात अगाडि बढाउन सङ्घले आह्वान गरेको छ । सङ्घको तर्फबाट उपलब्ध गराउन लागिएको निःशुल्क सेवाका लागि नेपाल सामान ढुवानी व्यवसायी सङ्घ, सानो भ¥याङ, काठमाडौँको सम्पर्क नं ०१–४२८६३१२, ४२७१३३१ र ९८४१२८८९६१ मा सम्पर्क गर्न आग्रह गरिएको छ । काठमाडौँ सामान ढुवानी व्यवसायी सङ्घ, ठूलो भर्याङको सम्पर्क नं ०१–४६७१४५८ वा ९८५१०३०३३८ तथा वीरगञ्ज ट्रान्सपोर्ट एशोसिएशन, आदेश नगर वीरगञ्जका सचिव नवराज अधिकारीको सम्पर्क नं ९८४५०३३३६१ मा सम्पर्क गर्न सहयोगदातालाई अनुरोध गरिएको सङ्घका सचिवद्वय पुष्पराज श्रेष्ठ र अरुणकुमार श्रेष्ठद्वारा जारी वक्तव्यमा उल्लेख छ ।
आर्थिक वृद्धिदर ६.२ प्रतिशत हुने एडिबीको प्रक्षेपण, आगामी वर्ष ६.३ प्रतिशत पुग्ने
काठमाडौँ । चालू आर्थिक वर्षमा मुलुकको आर्थिक वृद्धिदर ६.२ प्रतिशत र आगामी आवमा त्यो ६.३ प्रतिशतले बढ्ने प्रक्षेपण गरिएको छ ।एशियाली विकास बैंक (एडिबी) ले आज सार्वजनिक गरेको पछिल्लो विवरणमा अर्थतन्त्रका सूचक सकारात्मक रहेका उल्लेख गर्दै त्यस्तो प्रक्षेपण गरेको हो । सबल आन्तरिक मागको आधारमा आर्थिक परिदृश्य स्थिरतातर्फ उन्मुख रहेका तथा भूकम्पपछिको तीव्र गतिको पुनःनिर्माण एवं प्रदेश र स्थानीय सरकारहरुलाई ठूलो परिमाणमा बजेट विनियोजनले आर्थिक वृद्धिमा मद्दत पुगेको एडिबीको विश्लेषण छ । वित्तीय सङ्घीयताको निर्वाध कार्यान्वयनका चुनौतीहरु समाधान गर्न नसकेको खण्डमा र वित्तीय अनुशासन पालना नभएको अवस्थामा जोखिम उत्पन्न हुनसक्ने भन्दै प्रतिवेदनमा ती चुनौतीलाई सम्बोधन गर्नसके नेपालले लामो अवधिसम्म उच्च र दिगो आर्थिक वृद्धि हासिल गर्नसक्ने सम्भावना रहेको उल्लेख छ । कृषि क्षेत्रको वृद्धि आव २०७४/७५ को २.८ प्रतिशतबाट आव २०७५/७६ मा ४.५ प्रतिशत पुग्न सक्ने तथा उक्त अनुमान मनसुन राम्रो हुँदा धानको उत्पादन अघिल्लो वर्षभन्दा ८.४ प्रतिशतले वृद्धि भई ५५ लाख टन पुग्नेमा आधारित छ । निरन्तर विद्युत् आपूर्ति र लगानीको वातावरणमा सुधारका प्रयत्नका कारण चालू आवमा औद्योगिक क्षेत्र ७.१ प्रतिशतले विस्तार हुने अनुमान गरिएको छ । यसका साथै थोक तथा खुद्रा व्यापार, होटेल र रेस्टुरेन्ट तथा वित्तीय सेवा क्षेत्र ६.४ प्रतिशतले बढ्न सक्नेछ । उच्च आयात र कर प्रणालीमा सुधारका आधारमा प्रारम्भिक रूपमा राजस्व सङ्कलन बढेको, सबल राजस्व वृद्धिका कारण आव २०७५/७६ को पहिलो ६ महिनामा बजेट बचतमा रहेको चालु आवको पहिलो सात महीनामा पुँजीगत खर्च बढेता पनि यसको कार्यान्वयन भने २२.५ प्रतिशत मात्र रहेको बढ्दो व्यापार तथा चालू खाता घाटासँगै नेपालले बाह्य क्षेत्रको अस्थिरताको बढ्दो जोखिमको सामना गर्नु परेका प्रतिवेदनले देखाएको छ । रासस
२.०१ अंकले बढ्यो नेप्से, ५४ करोडको कारोबार
काठमाडौ । साताको चौथो दिन बुधबार पनि नेपाल स्टक एक्सचेञ्ज(नेप्से) परिसूचकमा झिनो अंकले वृद्धि भएको छ । नेप्से परिसूचक २.०१ अंकले बढेको हो । ०.१७ प्रतिशतले बढ्दा नेप्से परिसूचक ११६५.८४ बिन्दुमा पुगेको छ । बुधबार सेयर बजारमा १७० कम्पनीले सेयर कारोबार गरेका छन् । २० लाख २९ हजार १५ कित्ता सेयर खरिद बिक्री हुँदा ५४ करोड ५८ लाख १८ हजार ६ सय १९ रुपैयाँको कारोबार भएको छ । बजार बढेपनि नेप्सको २ समूह मात्र हरिया छन् । बैंक समूह ४.५३ र विकास बैंक ६.११ अंकले बढेका हुन् । होटल समूह १५.८१, जलविद्युत समूह ३.९६, वित्तीय २.०३, निर्जीवन बीमा ६.६१, उत्पादनमूलक समूह ५.१२, अन्य समूह ०.९२, माईक्रोफाईनान्स समूह २.३९ र जीवन बीमा समूह ३.८३ अंकले घटेका छन् । नेपाल ईन्स्योरेन्स कम्पनी लिमिटेडका लगानीकर्ताले ४.६४ प्रतिशतले सबैभन्दा धेरै नाफा आर्जन गरेका छन् भने यूनिर्भसल पावर कम्पनीका लगानीकर्ताले ९.८४ प्रतिशतले सबैभन्दा धेरै घाटा व्यहोरेका छन् ।
पुतली सडकमा सानिमा बैंकको नयाँ शाखा
काठमाडौँ । सानिमा बैंक लिमिटेडले बुधबार काठमाडौंको पुतलीसडकमा शाखा कार्यालयको उद्घाटन गरीे बैंकिङ्ग सेवा बिस्तार गरेको छ । उक्त शाखा कार्यालयको बैंकका अध्यक्ष विनयकुमार श्रेष्ठ तथा ब्रान्ड प्रवद्र्धक वरिष्ठ कलाकारद्वय मदनकृष्ण श्रेष्ठ र हरिवंश आचार्य(मह जोडी) द्वारा संयुक्त उद्घाटन गरियो । समुद्घाटन समारोहमा सानिमा बैंकका अध्यक्ष विनयकुमार श्रेष्ठले स्वागत मन्तव्य व्यक्त गर्दै यस शाखाबाट सम्पूर्ण बैंकिङ्ग सेवा प्रदान गरिनुका साथै शौक्षिक कर्जाको लागि विषेश नीति लिएको बताए । त्यसैगरी, प्रमुख कार्यकारी अधिकृत भुवन दाहालले बैंकका ग्राहक तथा सम्पूर्ण सरोकारवालाहरुलाई निरन्तर सहयोग तथा संरक्षणका लागि कृतज्ञता व्यक्त गर्दै पुतलीसडक शाखाबाट पनि ग्राहकहरुलाई गुणस्तरीय सेवा पुर्याउने प्रतिबद्धता व्यक्त गरे । सानिमा बैंकको उक्त शाखा समेत गरी हालसम्म ७८ वटा शाखा संजाल तथा ७२ वटा एटिएम सेवा रहेको बैंकले जनाएको छ ।
नेपालीको बार्षिक आम्दानी १२१०० डलर ! २२ सय किलोमिटर रेल
काठमाडौं । २५ बर्षपछि अर्थात बि.स. २१०० मा नेपालीहरुको औषत बार्षिक आम्दानी १२१०० डलर पुग्ने महत्वकांक्षी लक्ष्य निर्धारण गरिएको छ । राष्ट्रिय योजना आयोगले तयार पारेको दिर्घकालिन सोँचमा नेपालीहरुको प्रतिव्यक्ति आम्दानी १२ हजार एक सय डलर पुग्ने प्रक्षेपण गरिएको हो नेपाललाई आगामी २५ बर्षभित्र विकसित मुलुक बनाईसक्ने लक्ष्य तय गरिएको दिर्घकालिन सोँचमा १०.५ प्रतिशतको औषत आर्थिक वृद्धि दर हासिल गर्ने भनिएको छ । दिर्घकालिन सोँचमा ३३ हजार राष्ट्रिय तथा प्रादेशिक लोकमार्ग, २ हजार फास्ट ट्रयाक, २ हजार २ सय किलोमिटर रेलमार्ग बनाईसक्ने भनिएको छ । त्यस्तै, शतप्रतिशत नागरिकले ३० मिनेटको दुरी पार गरेपछि सडक सञ्जालमा जोडिने लक्ष्य पनि समावेश गरिएको छ । सो अवधीमा ४० हजार मेगावाट विद्युत उत्पादन गरिसक्ने, वेरोजगारीलाई ३ प्रतिशतमा झार्ने, निरपेक्ष गरिबीको संख्या शुन्यमा झारिसक्ने लक्ष्य तय भएको छ । २५ बर्षपछि नेपालीको औषत आयु ८० वर्ष पुग्नेछ भने मानव विकास ०.७६० अंक ल्याउने लक्ष्य निर्धारण गरिएको छ । राष्ट्रिय योजना आयोगका उपाध्यक्ष प्रा.डा. पुष्पराज कँडेलले दिर्घकालिन सोँचको कार्यान्यवनले नेपाल उच्च आय भएको मुलुकमा स्तरोन्नति हुने बताए । ‘बि.स. २१०० मा नेपाल उच्च आय भएको मुलुकमा रुपमा स्थापीत भैसक्नेछ, हामीले त्यसै अनुसारका कार्ययोजना बनाएका छौं’, उपाध्यक्ष कँडेलले भने । अर्थमन्त्री डा. युवराज खतिवडाले भने आगामी २५ बर्षसम्म दोहोरो आर्थिक वृद्धिदर हासिल गर्न अर्थतन्त्रको चालक के हुने भन्ने प्रश्न गरे । उनले उर्जा, पर्यटन, कृषि, उद्योग, पूर्वाधार वा अन्य कुन क्षेत्रको प्रमुख योगदानमा दोहोरो अंकको आर्थिक वृद्धिदर हासिल हुने हो सो एकिन हुनुपर्ने बताए ।‘दोहोरो अंकको आर्थिक वृद्धिदरको ड्राइभर के हुने हो, त्यसको एकिन हुनु आवश्यक छ’, मन्त्री खतिवडाले भने ।
मोरङको पथरीमा कामना सेवा विकास बैंककोे ८० औंँ शाखा
काठमाडौँ । कामना सेवा विकास बैंक लिमिटेडले मोरङको पथरी शनिस्चरे नगरपालिकाको वडा नं ०१, पथरी बजारमा बुधबार ८०औंँ शाखा कार्यालय स्थापना गरी कारोबार शुभारम्भ गरेको छ । बैंकका संचालक बलराम बराल र प्रमुख कार्यकारी अधिकृत प्रविण बस्नेतको उपस्थितिमा उक्त शाखाको कारोबार शुभारम्भ भएको हो । उक्त अवसरमा प्रमुख कार्यकारी अधिकृत बस्नेतले बैंकको कम शाखा सञ्जाल भएको पूर्वी नेपालमा व्यापार प्रबद्र्धनलाई अझ तीव्रताका साथ अघि बढाउन वृहत शाखा विस्तार गरेको तथा बैंकको भावी रणनीति र कार्यक्रमहरुको बारेमा संÔिप्त जानकारी दिए ।
हावाहुरी पीडितलाई मुक्तिनाथ विकास बैंकको सहयोग
काठमाडौँ । मुक्तिनाथ विकास बैंक लि.ले चैत्र १७ गते राती आएको हावाहुरीबाट प्रभावित क्षेत्र बाराको परवानीपुर गाँउपालिका वडा नं ४, रामटोल दलितवस्तीका पीडितहरुलाई सहयोग गरेको छ । बैकले १४५ घरधुरीका पीडितहरुलाई १०० थान झुल, १०० थान म्याट्रेस तथा १०० थान टेन्ट सहयोग गरेको जनाएको छ ।
मेगा बैंक र महालक्ष्मी लाइफ इन्स्योरेन्सबीच सम्झौता
काठमाडौँ । मेगा बैंक नेपाल लिमिटेड र महालक्ष्मी लाइफ इन्स्योरेन्स लिमिटेडबीच बीमा व्यावसाय विस्तार गर्ने उद्देश्यले बैंकास्योरेन्स सेवा प्रदान गर्ने सम्बन्धी सम्झौता भएको छ । मेगा बैंककी सहायक नायब प्रमुख कार्यकारी अधिकृत रविना देशराज श्रेष्ठ र महालक्ष्मी लाइफ इन्स्योरेन्सका नायब प्रमुख कार्यकारी अधिकृत कमल पन्थीले सम्झौता पत्रमा हस्ताक्षर गरे । सहमतिसँगै मेगा बैंकका ग्राहकहरूले महालक्ष्मी लाइफ इन्स्योरेन्सले प्रदान गर्ने जीवन बीमा सम्वन्धी सम्पूर्ण सेवा तथा सुविधाहरु अब मेगा बैंकका सबै शाखाबाट लिन सक्नेछन् । मेगा बैंकका देशभरका १ सय २ शाखाबाट महालक्ष्मी लाइफ इन्स्योरेन्समा जीवन बिमा गर्नुका साथै प्रिमियम भुक्तानी, दाबी भुक्तानी लगायत सबै सेवा प्राप्त गर्न सक्नेछन् ।
