गरिमा र नेपाल इन्भेष्टमेण्ट बैंकबीच सेवा प्रवाह गर्ने सम्बन्धमा सम्झौता
नेपाल इन्भेष्टमेण्ट बैंकले “गरिमा रेमिट’’सेवा प्रवाह गर्ने सम्बन्धमा सम्झौता भएको छ । गरिमा विकास बैंकका प्रमुख कार्यकारी अधिकृत गोविन्द प्रसाद ढकाल र नेपाल इन्भेष्टमेण्ट बैंकको तर्फबाट प्रमुख कार्यकारी अधिकृत ज्योतिप्रकाश पाण्डेले सम्झौतापत्रमा हस्ताक्षर गरेका हुन् । सो सम्झौता पश्चात हाल देशभर रहेका नेपाल इन्भेष्टमेण्ट बैंकका ७८ वटा शाखा कार्यालय र १२ वटा एक्सटेन्सन काउण्टरबाट गरिमा रेमिट मार्फत रकम भुक्तानी गर्न तथा खातामा जम्मा गर्न सकिनेछ ।
सुनको मुल्य घट्यो, प्रतितोला ५९ हजार ४ सयमा विक्री
काठमाडौं । बुधबार प्रतितोला ५९ हजार ५ सय रुपैयाँमा कारोबार भएको सुन विहिबार प्रतितोला ५९ हजार ४ सय रुपैयाँमा कारोबार भईरहेको छ । विहिबार सुनको मुल्य कमी भएसँगै तेजावी सुनमा पनि प्रतितोला १ सय रुपैयाँ कम भई ५९ हजार १ सयमा बिक्री भईरहेको छ । त्यस्तै चाँदी भने प्रतितोला ७२५ रुपैयाँमा कारोबार भईरहेको नेपाल सुनचाँदी महासंघले जानकारी लिएको छ ।
चाबहिल-साँखु सडकखण्ड धुलो र धुवाँले कुहिरी मण्डल, सर्वसाधारण प्रभावित
साँखु । निर्माणाधीन चाबहिल-साँखु सडकखण्ड दैनिक धुलो र धुवाँले कुहिरी मण्डल बन्ने गरेको छ । यो सडकखण्डमा अहिले पनि कतै नाला बनाउने, कतै सडक बढाउने त कतै ग्राभेल बिछ्याउने काम भइरहेको छ । निर्माण शुरु भएको लामो समय बितिसक्दासमेत यस सडकखण्डले पूर्णता पाउन सकेको छैन । सडको यो दयनीय अवस्थाका कारण सर्वसाधारण त हैरानीमा छन् नै यसको मुख्य चपेटामा ट्राफिक प्रहरी पनि पर्ने गरेका छन् । बिहान उज्यालो भएदेखि सडकमा बसेर मध्यरातसम्म घाँटी सुक्नेगरी सिटी फुक्ने ट्राफिक प्रहरीको दिनचर्या नै हो । त्यहीँमाथि सडकको धुलो र धुँवाले सर्वसाधारण मात्रै होइन, ट्राफिक प्रहरी पनि आजित भएका छन् । बौद्धको सडकको ‘ड्युटी’मा खटिरहेका प्रहरी जवान समीर दाहालको शरीरका कुनै अङ्गले फुर्सद पाएको देखिँदैन । यताउता दौडिँदै हातको इसाराले सवारीसाधनलाई सही बाटोमा लगाउँदै हिँडिरहेको उनी व्यस्त देखिए । दैनिक यसरी नै सडकमा धुवाँधुलो र गाडीका चालकलाई लाइनमा लगाउँदै बित्ने गरेको ट्राफिक प्रहरी बताउँछन् । चाबहिलदेखि साँखुसम्मको सडकखण्डमा जम्मा दुई ठाउँमा कालोपत्र गरेको भेटिन्छ । उक्त सडकखण्डमध्ये चुच्चेपाटीदेखि बौद्धको टुसालसम्म ५०० मिटर र थलीको ओरालोमात्र कालोपत्र भएको छ । बाकीँ पुरै सडक कच्ची छन् । महानगरीय प्रहरी वृत्त बौद्धका ट्राफिक प्रहरी प्रमुख हृदयेश सापकोटा भन्छन्, “बिहानदेखि बेलुकासम्म सडकमा हुन्छौँ । एक घण्टा सडकमा बस्दा धुलोले मान्छे चिनिँदैन । कराउँदाकराउँदै स्वर बस्छ, अझ धुलोबाट हुने रुघाखोकी, दम, एलर्जीलगायत फोक्सोसम्बन्धी रोगको प्रत्यक्ष समस्याबाट दिनानुदिन गुज्रिनुपरेको छ ।” सापकोटाका अनुसार बौद्ध मातहतमा ४२ ट्राफिक प्रहरी कार्यरत छन् । कपनको आंशिक क्षेत्रबाहेक साँखु र बौद्धका ट्राफिक प्रहरी धुलोको मुख्य मारमा परेका छन् । चाबहिल–साँखु सडक चार लेनको बनाउने भन्दै लामो समयदेखि भत्काउने र खन्ने काम भएको छ । सडकभरि माटोको थुप्रो र हिलोको समस्या भनिसाध्य छैन । सडको छिटो काम सकिए पनि ठूलो समस्याबाट मुक्ति मिल्ने बौद्धका ट्राफिक प्रहरी चतेन्द्रराज श्रेष्ठ बताउनुहुन्छ । अहिले जोरपाटीको ओरालोमा त १० मिनेट पनि बस्न सक्ने अवस्था नभएको उहाँले सुनाउनुभयो । विसं २०७२ बाट सडक बनाउने भन्दै बाटो भत्काउन थालेपछि सडक साँघुरा भएका छन् । सडकको क्षमताभन्दा सवारीसाधनको चाप धेरै छ । महानगरीय प्रहरी प्रभाग साँखुमा कार्यरत ट्राफिक प्रहरी बिलकुमार राई भन्छन्, “मास्क लगायो केही समयमै सिटी फुक्नका लागि खोल्नुपर्छ । फिल्टर भएको मास्क भए पनि सवारीसाधनले उडाउने अत्यधिक धुँवाधुलोे सजिलै मुखभित्र छिर्छ ।” समयमै बाटो कालोपत्र भए सबैलाई सजिलो हुने उनको भनाइ छ । धुवाँ र धुलोबाट आक्रान्त भएका ट्राफिक प्रहरी दिनरात नभनी २० घण्टा ड्युटी गर्ने गर्दछन् । कराउँदा घाँटी दुख्ने र स्वर पनि सुक्ने गरेको छ । धुलोका कारण सबैभन्दा बढी बिरामी हुने गरेको ट्राफिक प्रहरी हवल्दार बालकृष्ण पन्त बताउँछन् । दैनिक बिहान बेलुकाको धुलोमा गर्नुपरेको ड्युटीले कपडाको रङ नै परिर्वतन हुन्छ । धुलोका कारण दिनमा दुईपटक कपडा फेर्ने गरेको ट्राफिक प्रहरी बताउँछन् । बन्दै गरेको सडकको बीच भागमै निर्माण साम्रगी राख्नाले पनि सवारी साधनलाई निरन्तर ‘पास’ गराउन समस्या हुन्छ । “ठेकेदारलाई यस विषयमा ध्यानाकर्षण पनि गराएँ तर उनीहरु सुने नसुनेझैँ गर्छन्”, बौद्धका ट्राफिक प्रहरी प्रमुख सापकोटाले भने, “धुलो, धुवाँ र हिलो खाँदै सडकमा काम गरिरहेका छौँ ।” सरकारले ट्राफिकलाई वर्षमा दुई जोर कपडा दिन्छ । सरकारले दिएको कपडा छ महीना टिक्दैन भने एकजोर बुट बढीमा तीन महीना नखप्ने ट्राफिक प्रहरीको गुनासो छ । सरकारले विसं २०७२ मा चाबहिलबाट साँखुसम्म २२ मिटर चौडा चार लेनको सडक बनाउने योजना ल्यायो र काठमाडौँ उपत्यका सडक विस्तार आयोजनाले २०७२ जेठमा सडकखण्डको निर्माणका लागि बोलपत्र आह्वान गरेर असोजमा चार निर्माण व्यवसायीलाई ठेक्का दिएको थियो । कूल लम्बाइ ११ दशमलव ४६ किलोमिटर सडकखण्डमा चार कम्पनीले समयमै निर्माण नसक्ने भएपछि थप एक कम्पनी गरी पाँच ठेकेदार कम्पनीले अहिले धमाधम सडक विस्तार गरिरहेका छन् । काठमाडौँ उपत्यका सडक विस्तार आयोजनाले उक्त सडकखण्ड छिटोभन्दा छिटो निर्माण हुने बताए पनि सडक निर्माणले कहिले पूर्णता पाउँछ भन्ने अझै टुङ्गो छैन । रासस
निर्यात विस्तार गर्दै माउण्ट एभरेष्ट ब्रुअरीः कोरिया, सिङ्गापुर र अमेरिकामा बियर पठाउने गृहकार्य
चितवन । भरतपुर महानगरपालिका–१२ मा रहेको माउण्ट एभरेष्ट ब्रुअरीले उत्पादन गर्दै आएको एभरेष्ट बियरको निर्यात विस्तार गर्ने भएको छ । सो कम्पनीले हाल जापान, बेल्जियम र अष्ट्रेलिया बियर पठाउँदै आएको छ । कम्पनीका प्रमुख प्रबन्धक शान्त श्रेष्ठका अनुसार कोरिया, सिङ्गापुर र अमेरिका बियर पठाउनका लागि गृहकार्य भइरहेको छ । कम्पनीको एभरेष्ट प्रिमियम बियर हाल विदेश पठाइँदै आएको छ । श्रेष्ठका अनुसार अमेरिकामा एभरेष्टको ट्रेड दर्ता भइसकेको छ । कोरिया र अष्ट्रेलियामा पनि दर्ताको प्रक्रिया भइरहेको उनले बताए । ब्रुअरीले १२ वर्षयता जापानमा एभरेष्ट बियर पठाउँदै आएको छ । वार्षिक चार कन्टेनर बियर जापान जाने गरेको उनले बताए । तीन वर्षअघिबाट बेल्जियम र दुई वर्षअघिबाट अष्ट्रेलिया बियर पठाइँदै आएको छ । वार्षिकरूपमा पाँच कन्टेनर बेल्जियम र तीन कन्टेनर अष्ट्रेलिया जाने गरेको श्रेष्ठले बताए । सात वर्षअघि चीन जाने गरेको भए पनि त्यहाँको बजार बढी प्रतिस्पर्धी भएपछि धान्न नसक्दा हाल रोकिएको छ । हाल निर्यात भइरहेका देशमा खपत बढाउने र नयाँ देशमा निर्यात शुरु गर्ने योजनामा कम्पनी रहेको उनले बताए । विश्वको सर्वोच्च शिखर सगरमाथाको नाम रहेको बियर भएकाले विदेशीले विशेष रुचि राखेको उनले बताए । कतिपयले बियर पिएपछि स्टिकर निकालेर राख्ने गरेको उनको भनाइ छ । सरकारले निर्यात गर्दा राजश्वमा छुट दिने गरेको छ । आन्तरिक राजश्व कार्यालय भरतपुरका प्रमुख शुवप्रसाद रिजालका अनुसार बियर निर्यात गर्दा मूल्य अभिवृद्धि कर र अन्तःशुल्क छुट दिने व्यवस्था रहेको छ । रिजालका अनुसार नेपाली बजारमा समेत बिक्री गर्ने यस ब्रुअरीले चालू आवको फागुन मसान्तसम्म रु एक अर्ब १० करोड १६ लाख २७ हजार अन्तःशुल्क बुझाइसकेको छ । माउण्ट एभरेष्ट ब्रुअरीले एभरेष्ट प्रिमियमसँगै गोल्डेन टाइगर स्ट्रङ, राइनो प्रिमियम र राइनो स्ट्रङ बियर उत्पादन गर्दै आएको छ । विसं २०४२ मा अमात्य परिवारले शुरु गरेको यस कम्पनीको पहिलो बियर सानमिगलको ब्राण्ड खोसिएपछि करीब बन्दको अवस्थामा पुगेकामा ब्राण्ड थप गरी निर्यातसमेत गर्न थालेपछि बजार विस्तार गर्न सकेको श्रेष्ठले बताए । कम्पनीमा हाल २२५ ले रोजगारी पाएका छन् । रासस
क्रस बोर्डर ट्रेडिङ प्रक्रिया अघि बढाउँदै धितोपत्र बोर्ड, नेपाली कम्पनीकाे शेयर विदेशमा कारोबार हुने
काठमाडौं । नेपाल धितोपत्र बोर्डले क्रस बोर्डर लिस्टिङ र ट्रेडिङ गर्ने प्रक्रिया अघि बढाएको छ । नेपालमा दर्ता भई कारोबार सञ्चालन गर्दै आएका कम्पनीहरुको शेयर कारोबार विदेशी स्टक एक्सचेञ्ज कम्पनीहरुमा गर्न सक्ने र नेपालको स्टक एक्सचेञ्जले पनि विदेशी कम्पनीहरुको शेयर सूचिकृत गरी कारोबार गर्न सक्ने व्यवस्था गर्न उक्त प्रक्रिया अघि बढाइएको हो । यसका लागि धितोपत्र बोर्डले सुरु गरेको प्रक्रिया निकै अघि बढिसकेको बोर्डका अध्यक्ष रेवतबहादुर कार्कीले जानकारी दिए । शेयरको क्रस बोर्डर कारोबारका लागि नेपालका संस्थाहरुको लेखापरीक्षण अन्तराष्ट्रिय प्रणालीअनुरुपको हुनुपर्ने बताउँदै बोर्डका अध्यक्ष कार्कीले नेपालको लेखा प्रणाली र रिपोटिङ प्रणालीसँग अन्य देशको प्रणाली मेल खाएको अवस्थामा मात्र विदेशी स्टक एक्सचेञ्जमा नेपाली कम्पनीहरु दर्ता हुनसक्ने बताएका हुन् । त्यसरी विदेशी स्टक एक्सचेञ्जमा सूचिकृत भई कारोबार हुन चाहने कम्पनीहरुलाई लेखापरीक्षण अन्तराष्ट्रिय स्तरको बनाउन सकेत उनले सुझाव दिएका छन् । नेपाली कम्पनीहरुको शेयरको सूचीकरण विदेशमा हुनुपर्ने माग विभिन्न उद्योगी एवं उद्योग वाणिज्य महासंघका पदाधिकारीहरुले गर्दै आएका छन् । नेपाल उद्योग परिसंघका अध्यक्ष हरिभक्त शर्माले विभिन्न फोरम तथा मञ्चहरुमा यस्तो व्यवस्था गर्नुपर्ने माग धेरै अघिदेखि गर्दै आएका छन् । यसै सन्दर्भमा कार्कीले नियामकको रुपमा त्यस्तो व्यवस्थाका लागि अघि बढेको जानकारी दिएका हुन् । यद्यपि विद्यमान् कानूनअनुसार नेपाली लगानीकर्ताले विदेशमा लगानी गर्न नपाउने अवस्थामा यसरी विदेशी स्टक एक्सचेञ्जमा हुने सूचीकरणले नेपाली पुँजी विदेशमा लगानी गर्नुअघि त्यो कानूनी व्यवस्था संशोधन गर्नु आवश्यक हुन्छ । यसले नेपाली पुँजी विदेशमा पलायन हुने अवस्था भने सिर्जना गर्नसक्छ ।
लालीगुराँस भयो प्रदेश ३ को उत्कृष्ट सहकारी
काठमाडौँ । प्रदेश नम्बर ३ मा रहेका सहकारी मध्य लालीगुराँस बहुउदेश्यीय सहकारी संस्थाले उत्कृष्ट सहकारी व्यवसाय पुरस्कार-२०७५ प्राप्त गरेको छ । बुधबार ६२ औँ सहकारी दिवसको अवसरमा राजधानीमा आयोजित विषेश कार्यक्रममा लालीगुराँसलाई उत्कृष्ट सहकारी घोषणा गरिएको हो । राष्ट्रिय सहकारी महांसघको उपसमितिले प्रदेश ३ को उत्कृष्ट सरकारीका रुपमा लालीगुराँसलाई छनौट गरेको हो । ललितपुरको चापागाउँ, काठमाडौँको चाबहिल, भक्तपुरको कौशलटार र चितवनमा सदस्य सुबिधा काउण्टर संचालन गरिरहेको लालीगुराँस सहकारीले जनाएको छ ।
हावाहुरी पीडित वारा–पर्साका घाइतेको लागि ७४ जनाले गरे रक्तदान
काठमाडौँ । बारा र पर्सामा भएको हावाहुरीबाट घाईते भएकाहरुको उपचारको लागि रगतको कमी नहोस् भन्दै काठमाडौँको नयाँबानेश्वरमा बुधावार गरिएको रक्तदान कार्यक्रममा ७४ जनाले रक्तदान गरेका छन् । महानगरिय प्रहरी प्रभाग नयाँबानेश्वर लगायतको आयोजनामा आकास्मिक रुपमा गरिएको कार्यक्रममा उत्साहजनक सहभागिता भएको कार्यक्रमका संयोजक बाबुराम आचार्यले बताए । आपतकालीन अवस्थालाई मध्यनजर गर्दै मानवीय सहयोगको रुपमा रक्तदानमा सहभागी हुन संयोजक आचार्यले अपिल गरे अनुसार बानेश्वरका स्थानीय, नेपाल प्रहरी, होस्टल ब्यावसायी संघका प्रतिनिधि, सामुदायिक प्रहरी लगायतले रक्तदान गरेको थिए । कार्यकमका आयोजक महानगरीय प्रहरी नयाँबानेश्वर प्रमुख डीएसपी गोबिन्दराज काफ्लेले मानवीय कार्यमा सहयोग गर्न आग्रह गर्दै रक्तदान कार्यक्रम गरिएको बताए ।
हेटौँडा उपमहानगरको आन्तरिक आय १५ प्रतिशतले वृद्धि
हेटौँडा । प्रदेश नं ३ को हेटौँडा उपमहानगरपालिकाले गत वर्षको तुलनामा १५ प्रतिशतले आन्तरिक आय वृद्धि गरेको पाइएको छ ।उपमहानगरपालिकाको चौथो नगरसभाका अवसरमा प्रस्तुत प्रतिवेदनमा आन्तरिक आयमा वृद्धि भएको पाइएको हो । उक्त वृद्धिदरलाई आधार मान्दा चालू आर्थिक वर्षको अन्त्यसम्ममा उपमहानगरपालिकाले आन्तरिक आयमा गत वर्षको सङ्कलनमा रु १० करोड थप गर्ने देखिएको छ । उपमहानगरले चालू आर्थिक वर्षको हालसम्म रु २२ करोड ६० लाख आम्दानी गर्न सफल भएको छ । आन्तरिक आयमा रु १० करोडले वृद्धि हुने अनुमान गरिएको उपप्रमुख मीना लामाले जानकारी दिइन् । उनका अनुसार आन्तरिक आयमा वृद्धिसँगै नगरको साविक बजेटमा वृद्धि भएर रु एक अर्ब ७७ करोड पुगेको छ । चालू वर्षको अन्त्यसम्ममा उपमहानगरपालिकाको आम्दानी रु एक अर्ब ८७ करोड हुने अनुमान गरिएको उपप्रमुख लामाले बताइन् । उक्त रकम चालू आवमा स्वीकृत भएको रकमभन्दा १५ प्रतिशत अर्थात् रु २४ करोड ६२ लाखले बढी हो । नदीजन्य पदार्थ, विज्ञापनकर, पूर्वाधार मर्मतसम्भार, सार्वजनिक शौचालय, सिमेन्ट निकासी करलगायतका क्षेत्रबाट बढी राजश्व सङ्कलन भएको छ । चालू आवको हालसम्म भौतिक पूर्वाधारका ३८९ योजना सम्झौता भएर सञ्चालनमा आएका छन् । ती मध्ये २०५ योजना सम्पन्न भइसकेका छन् भने १८४ योजना निर्माणाधीन अवस्थामा रहेको उपप्रमुख लामाको भनाइ छ । रासस
