हावाहुरी पीडितलाई स्वावलम्बन लघुवित्तको ४ लाख ६० हजार नगद सहयोग
काठमाडौँ । स्वावलम्बन लघुवत्ति वित्तीय संस्था लि.ले बारा जिल्ला स्थित फेटा गाउँपालिकाको पुरैनिया र भर्वलिया तथा प्रसौनी गाउँपालिकाको खुटुवा जब्दी गाउँमा आएको विनासकारी हावाहुरी पीडित घरपरिवारलाई रु.४ लाख ६० हजार नगद सहयोग गरेको छ । संस्थाले हावाहुरीका पिडितलाई पहिचान गरी थप राहत तथा सहयोग गर्ने बताएको छ । वित्तीय संस्थाले हावाहुरीबाट घर भत्किएर हाल सार्वजनिक स्थानमा बस्दै आएका, घरमा रहेको खाद्यान्न तथा लत्ता, कपडा साथै पशुपंक्षीको समेत नोक्सान भएको प्रारम्भिक तथ्यांकको आधारमा शाखा कार्यालय कलैया, बारा मार्फत उक्त रकम उपलब्ध गराएको हो । संस्थाले संस्थागत सामाजिक उत्तरदायित्व अन्तरगत विभिन्न समयमा आउने प्राकृतिक प्रकोपबाट पिडित घरपरिवारलाई पटक पटक राहत तथा विभिन्न सहयोग कार्यक्रम निरन्तर रुपमा गर्दै आएको प्रबन्धक राजेन्द्र धितालले बताए ।
एसईईपछिका फुर्सदिला विद्यार्थीका लागि ब्रिजकोर्स, आवश्यकता कि फेशन ?
फाइल तस्बिर काठमाडौं । प्रदेश २ बाहेकका अन्य सबै प्रदेशमा एसईईको परीक्षा भर्खरै सकिएको छ । परीक्षा सकिएसँगै ४ लाख भन्दा बढी विद्यार्थी ३ महिनाको लागि फुर्सदिला भएका छन् । परीक्षा सकिएको र परीक्षाको नतिजा आउने समयसम्म फुर्सदिला भएका विद्यार्थीहरुले ब्रिजकोर्स गर्ने योजना बनाइरहेका छन् । कोही साथीको लहैलहैमा त कोही केही सिक्ने आशयको साथ ब्रिजकोर्स कक्षा लिने तयारी गर्दैछन् । परीक्षा र नतिजाबीचको तीन महिना समयको सदुपयोग कसरी गर्ने भन्ने कुरामा अझै पनि धेरै जना अन्योल मै देखिन्छन् । ब्रिजकोर्स नगर्दा आगामी पढाई पो बिग्रिने हो कि भन्ने डर धेरै विद्यार्थीहरुमा छ, यसकारण ईच्छा नभए पनि उनिहरु ब्रिजकोर्स कक्षाहरु लिने गर्छन् । ब्रिज कोर्सलाई आवश्यकता भन्ने कि फेशन, यसबारेमा विभिन्न व्यक्तित्वहरुको मत फरक फरक रहेको छ । के भन्छन् ब्रिजकोर्स संचालकहरु ? ब्रिजकोर्स गर्नु महत्वपूर्ण छ कि छैन, यो विद्यार्थीले छनोट गर्ने बिषयको आधारमा निर्धारण हुन्छ । विभिन्न बिषयमा ब्रिजकोर्स कक्षाहरु संचालन हुने गर्दछन्, जस्तै विज्ञान संकाय, मानविक संकाय र प्राविधिक संकाय । सिटिइभिटी जस्तो प्राविधिक शिक्षा लिनेका लागि भने ब्रिजकोर्स पढ्नु एकदमै आवश्यक रहेको व्हाईट हाउसका प्रमुख कार्यकारी अध्यक्ष रोशन ओझा बताउँछन् । सिटिइभिटीका कलेजहरुमा ४० जनाको लागि मात्र सिट हुने भएकोले पनि ब्रिजकोर्सको आवश्यक रहेको उनी बताउँछन् । त्यस्तै स्टाफ नर्स अध्ययन गर्ने विद्यार्थीहरुले पनि ब्रिजकोर्स अध्ययन गर्न जरुरी छ। कक्षा १० र कक्षा ११ को पाठ्यक्रम हेर्ने हो भने कक्षा ११ मा ५० प्रतिशत नयाँ कोर्स रहेका छन् । कक्षा ११ का कक्षाहरु ६–७ महिनामात्र संचालन हुने र यो समयमा धेरै विद्यार्थीलाई कसरी पास हुने भन्ने कुराले पिरोल्ने भएर पनि अध्ययनलाई सजिलो बनाउन ब्रिजकोर्सको आवश्यक रहेको ओझाको भनाइ छ । फाइल तस्बिर परीक्षा र नतिजाबीचको तीन महिनाको समय हरेक विद्यार्थीको लागि सुनौलो अवसर भएको उनी बताउँछन् । एसईईपछिको खाली समयलाई विद्यार्थीहरुले खेलेरै कटाइरहेका हुन्छन् तर त्यही समयलाई विद्यार्थीहरुले सदुपयोग गर्न सके उनीहरुको भविष्यमा धेरै ठूलो परिवर्तन आउन सक्छ। यसको लागि ब्रिजकोर्स नै गर्नु पर्छ भन्ने नभएको र यस समयमा विद्यार्थीहरुले आफ्नो रुचीको बिषयहरुमा तालिम पनि लिन सक्ने ओझाले बताए। अभिभावक र विधार्थीहरु यसो भन्छन् ? बानेश्वरमा बस्दै आएकी मिना डंगोल भर्खरै एसईई दिएर बसेको छोरालाई केही सिपको कुरा सिकाउने बताउँछिन् । उनलाई लाग्छ यो समय पाठ्यक्रम अध्ययनको भन्दा पनि आफ्नो भित्री लुकेर बसेको क्षमतालाई अध्ययन गर्ने समय हो । त्यस्तै, धोविघाटमा बस्दै आएकी पुष्पा थापाले आफ्नो छोरालाई एसईई पछी कुनै पार्ट टाइम काममा लगाउने बिचार गरेकी छिन् । उनी आफ्नो छोराले काम, पैसा र समयको महत्व बुझोस् भन्ने चाहन्छिन् । समयसँगै धेरै अभिभावकहरु ब्रिज कोर्स जानै पर्छ भन्ने मान्यता राख्दैनन् । काठमाडौंमै जन्मिएर हुर्किएका, भर्खर एसईई परीक्षा सकाएका चिराग लिम्बुले भने यो खाली समयमा आफ्नो पुर्ख्यौली घर तेह्रथुम जाने विचार गरेका छन् । आफुले यस ३ महिनाको बिदामा आफ्नो ठाउँ, संस्कृतिको बारेमा बुझ्ने उनको योजना छ। त्यस्तै, कक्षा ११ मा अध्ययनरत समीक्षा गिरी भने ब्रिजकोर्स कक्षाले आफुलाई धेरै सहयोग गरेको बताउँछिन् । युनाईटेड कलेजमा विज्ञान बिषय पढिरहेकी उनी कक्षा ११ मा आउँदा ब्रिजकोर्स कक्षाले गर्दा अरुले भनेको जस्तो धेरै बोझ महसुस नगरेको बताउँछिन् । के ब्रिजकोर्स जरुरी हो ? जीवन एउटा निरन्तर सिकाईको प्रकृया हो । पढ्ने र सिक्ने कुरा कहिले पनि सकिदैन । त्यसैले पनि ३ महिनामा ब्रिजकोर्स कक्षा गएर त्यही पाठ्यक्रमको बिषयलाई निरन्तर अध्ययन गर्नुभन्दा पनि विद्यार्थीले आफ्नो रुचीको क्षेत्रमा संलग्न हुँदा यो समय अझ बढी अर्थपूर्ण हुन्छ । यसको मतलब पढेको कुरा पनि बिर्सिने गरी अन्य कुरामा ध्यान दिनु पर्छ भन्ने होइन । यो अवधिमा पढाईमा खासै समस्या नभएका विद्यार्थीले दिनको १-२ घण्टा पढाईमा खर्चन सक्छन् । त्यस्तै पढाईमा कमजोर बिधार्थीले बिहान २ घण्टा र साँझ २ घण्टा आफुलाई बिषयगत अध्ययनमा संलग्न गराए पढाई पछि गएर बोझ बन्ने सम्भावना घटेर जान्छ । किशोर अवस्थामा विद्यार्थीहरु आफुलाई नआएको कुराहरु कक्षामा सोध्न अफ्ठयारो मान्छन् र आफुलाई अरुले के भन्ला भन्ने कुराले पनि उनीहरु पछाडि पर्ने गर्छन् । उनीहरुलाई नजानेको कुरा सोध्न कहिले पनि लाज मानु हुँदैन भन्ने कुरा कसैले सिकाएको हुँदैन । समाजले जहिले पनि अरुलाई जित्नुपर्छ मात्र भन्छ, तर आफुले आफुलाई जित्नुपर्छ भन्ने कुरा कहिले पनि सिकाउँदैन। परीक्षामा राम्रो नम्बर/श्रेणी ल्याउनुपर्छ भन्ने छाप हरेक विद्यार्थीको दिमागमा परेको हुन्छ। जिन्दगी सर्टिफिकेटको मार्क्सको भरमा चल्छ भन्ने गलत धारणाबाट हरेक मानिस माथि उठ्न जरुरी छ। त्यसैले एसईई दिएर बसेका भाई बहिनीहरुले अति आवश्यक छ भने मात्र ब्रिजकोर्स कक्षा लिनुहोस् नभए अन्य नयाँ गतिविधीमा संलग्न भई आफुलाई व्यावहारिक रुपले निखार्ने प्रयास गर्नुहोस्।
अल्फा बिटामा ब्रिज कोर्सको तयारी, चैत २४ देखि कक्षा सञ्चालन
काठमाडौँ । नयाँ बानेश्वर स्थित अल्फा बिटाले यसवर्षको पनि ब्रिज कोर्स सञ्चालन गर्दैछ । एसईई दिएर बसेका विधार्थीहरुको लागि चैत २४ गतेदेखि ब्रिज कोर्स सञ्चालन हुने अल्फा बिटाका प्रेसिडेन्ट तथा सिइओ द्विराज शर्माले बताए । साइन्स, म्यानेजमेन्ट, नर्सिङ्ग तथा ए–लेभलका ब्रिज कोर्स कक्षाहरु सञ्चालन हुने प्रेसिडेन्ट तथा सिइओ शर्माले बताए । ब्रिज कोर्समा विभिन्न क्षेत्रमा सफल व्यक्तित्वहरुद्वारा करियर काउन्सिलिङ्ग गरिने छ । यसका साथै अल्फा बिटाले हरेक वर्ष ब्रिज कोर्समा विभिन्न अतिरिक्त क्रियाकलाप तथा व्यावहारिक कक्षाहरुमा ध्यान दिने गरेको जानकारी शमाले जानकारी दिए । गत वर्ष अल्फा बिटाबाट ब्रिज कोर्स कक्षा पढेर सेन्ट जेभियर्स गोदावारीमा नाम निकाल्न सफल आर्शिवाद झाका अभिभावकले भने–’ब्रिजकोर्स सुरु गर्नु अघि र पछिमा मैले आफ्नो बाबुमा धेरै भिन्नता पाएँ । पहिले राम्रो पढ्नुपर्छ, मेहेनत गर्नुपर्छ भन्ने भावना त थियो, तर कसरी राम्रो भन्ने हामीलाई पनि खासै थाहा थिएन ।’ अल्फा बिटामा ब्रिज कोर्स गर्दा, विभिन्न व्यक्तित्वहरुको अनुभव र भोगाई सुन्दा, नेपालका विभिन्न ठाउँहरुबाट आएका विद्यार्थीहरुसँग भेट्दा तथा व्यावहारिक शिक्षाले उत्प्रेरित भएर आफ्नो बाबुमा सकारात्मक सोचको विकास भएको पाएँ–ती अभिभावनले भने । अल्फा बिटा ब्रिज कोर्सबारे बताउँदै शर्माले भने-“अल्फा बिटा ब्रिज कोर्सभनको उत्कृष्ट तयारी कक्षा, सेन्ट जेभियर्स, बुढानिलकण्ठ, एसओएस, ट्रिनिटी, हिमालयन ह्वाईट जस्ता कलेजको नमुना प्रश्नहरुमा आधारित साप्ताहिक परीक्षाका साथै आफ्नो अतिरिक्त क्रियाकलापमा रहेको प्रतिभा प्रस्तुत गर्ने प्लेटफार्म हो । साप्ताहिक परीक्षा, अतिरिक्त क्रियाकलाप, कलेज भ्रमण, अन्तक्रिया र रोबोट, रोबोटिक्सको बारेमा शिक्षा,आत्मनिर्भर हुने गतिविधिहरु जस्तै सामाजिक बोल, व्यक्तित्व विकास र विभिन्न सफल व्यक्तित्वहरुसँगको अन्तरक्रियाले गर्दा यो १० हप्ताको समयमा विद्यार्थीले नौलो एक्सपोजर पाउने कुरा शर्माले जानकारी गराए ।
आरबीआईको नयाँ व्यवस्था : रिपोदर ६ प्रतिशत, ६.२५ प्रतिशतमा स्थायी तरलता सुविधा
मुम्बई । भारतीय रिजर्भ बैंकले बैंकिङ दरहरु घटाएको छ । भारतीय रिजर्भ बैंकको बोर्ड बैठकले यसअघि कायम रहेको रिपो र स्थायी तरलता सुविधा घटाएर नयाँ दर निर्धारण गरेको हो । आरबीआईको व्यवस्था अनुसार अब २ हप्ता अवधिको तरलता समायोजन सुविधा (एलएएफ) ६.२५ प्रतिशतबाट घटाएर ६ प्रतिशत कायम गरिएको छ । त्यस्तै, सीमान्त स्थायी सुविधा (एमएसएफ) लाई यसअघिको ६.२५ प्रतिशतको दर घटाएर ६ प्रतिशत कायम गरेको छ । यी दुवै दरहरु तत्काल लागु हुने पनि आरबीआईले जनाएको छ ।
तीन दिन देशभर मौसम प्रभावित हुने, अधिकांश स्थानमा वर्षाको सम्भावना
काठमाडौँ । पूर्वमा बनेको न्यून चापीय रेखा र स्थानीय वायुकोे प्रभावले आगामी तीन दिनसम्म देशभरि नै बदली रही अधिकांश स्थानमा वर्षाको सम्भावना रहेको मौसम पूर्वानुमान महाशाखाले जनाएको छ । गए रातिदेखि कमजोर रुपमा पूर्वमा बनेको न्यून चापीय रेखा र बङ्गालको खाडीबाट आएको जलवाष्पयुक्त हावा तथा स्थानीय वायुको प्रभावले बदलीसँगै हल्कादेखि मध्यम वर्षा गराउने महाशाखाका मौसमविद् मञ्जु बासीले बताइन् । उक्त प्रणाली क्रमशः विकसित भई आगामी शनिबारसम्म कायम रहने बताइएको छ । काठमाडौँ उपत्यकामा आज दिउँसो केहीबेर मौसम खुल्ला भई घाम लाग्नेछ र अन्य स्थानमा भने तत्काल मौसम सफा हुने अवस्था नरहेको मौसमविद् बासीले जानकारी दिइन् । राति देशको पूर्वी र मध्य भूभागमा आंशिक बदली रही पश्चिमी भू–भागका एक–दुई स्थानमा मेघगर्जनसहित क्षणिक वर्षाको सम्भावना रहेको बताइएको छ । शुक्रबार देशका मध्य भू–भागमा आंशिकदेखि सामान्य बदली रही पश्चिमी क्षेत्रका केही स्थानमा हल्कादेखि मध्यम वर्र्षाको सम्भावना रहेको महाशाखाले जनाएको छ । शुक्रबार देशका अधिकांश भू–भागमा सामान्यदेखि पूर्ण बदली रही केही स्थानमा मेघगर्जनसहित हल्कादेखि मध्यम वर्षाको सम्भावना रहेको औँल्याइएको छ । उच्च हिमाली भूभागहरुका केही स्थानमा मध्यम हिमपातको सम्भावना रहेको महाशाखाले जनाएको छ । महाशाखाको पछिल्लो विवरणअनुसार आज काठमाडौँ उपत्यकाको न्यूनतम तापक्रम १४ दशमलव ८ डिग्री र अधिकमत तापक्रम २६ दशमलव ६ डिग्री सेल्सियस छ । त्यस्तै धनगढीको अधिकमत तापक्रम सबैभन्दा बढी ३५ दशमलव शून्य डिग्री सेल्सियस रहेको छ । रासस
बारामा हावाहुरीबाट पाँच करोडभन्दा बढीको अन्नबाली नष्ट
वीरगञ्ज । आइतबार साँझ बारामा आएको भुमरीसहितको हावाहुरीले गहुँ तथा अन्न बाली नष्ट गर्दा रु पाँच करोडभन्दा बढीको क्षति भएकोे छ । सो शक्तिशाली भुमरीसहितको हावाहुरीले एक हजार ५०५ बिघामा लगाइएको गहुँ, मसुरो मकै फलफूल तथा तरकारी बाली पूर्णरुपमा क्षति पुर्याएको कृषि ज्ञान केन्द्र बाराले जनाएको छ । दुई हजार २३१ बिघा क्षेत्रफलमा लगाएको सो बाली आंशिकरुपमा क्षति हुँदा करीब रु पाँच करोडभन्दा बढीको अन्नबाली नष्ट भएको ज्ञान केन्द्रका प्रमुख जीतेन्द्र यादवले बताए । हावाहुरीले सबैभन्दा बढी प्रभावित पारेको फेटा गाउँपालिका–१ भलुही, भरवलीया, त्रिवेणी वडा नं ५ गमहरिया वडा नं ६ पुरैनियामा मात्रै करीब ५० बिघाभन्दा बढी क्षेत्रफलमा लगाइएको गहुँ खेती पूर्णरुपमा नष्ट गरेको कृषि अधिकृत रामजीवन ठाकुरले बताए । फेटाको भलुही, भरवलीया, बलिरामपुर र फूलबरीया, देवताल गाउँपालिकाको रामपुर्वा, तेलकुवाँ र बेनौली, सुवर्ण गाउँपालिकाको प्रशुरामपुर, हर्दिया, जमुनिया र चरमोहना, गढीमाई गाउँपालिकाको तेलकुवा, परवानीपुर गाउँपालिकाको बुनियाद, रामपुर, टोकनी, लिपनीमाल, चैनपुर र बहुवरी, पचरौता गाउँपालिकाको बेनौली र सखुवाटमा करीब ८०० बिघा क्षेत्रफमा लगाइएको गहुँबाली, २०० बिघा क्षेत्रफलमा लगाइएको मसुरो, ३०० बिघा क्षेत्रफलको मकै तथा २०० बिघा क्षेत्रफलको तरकारी तथा फलफूल खेती पूर्णरुपमा क्षति भएको छ । हावाहुरीबाट आँपका बोटमा रहेका फल (टिकुला) समेत अत्यधिक मात्रामा झरेकाले सो क्षेत्रका किसान मारमा परेका छन् । किसानले आँपको बोटमा मन्जरी लागेकै बेला व्यापारीलाई बेच्ने गरेकाले हावाहुरीले आँपको बोटमा समेत क्षति पुर्याएकाले व्यापारी घाटामा रहेका किसान जाकिर मियाँको गुनासो छ । सो हावाहुरीबाट बारामा रु ३५ लाखभन्दा बढीको चौपाया, पशुपक्षी मरेको अनुमान गरिएको छ । रासस
७ अर्ब निक्षेप बढ्दा कर्जा वृद्धि १७ अर्ब, सीसीडीमा थप चाप पर्नसक्ने
काठमाडौं । डेढ महिनाको अवधिमा वाणिज्य बैंकहरुले ७ अर्ब बचत परिचालन वृद्धि गर्दा १७ अर्ब बराबरको ऋण प्रवाह गरेका छन् । माघ महिनामा देखिएको निक्षेप र कर्जाको असन्तुलको गतिलाई कायमै राख्दै निक्षेप र कर्जाको अवस्था क्रमशः २६८६ अर्ब २४०७ अर्ब पुर्याएको हो । नेपाल बैंकर्स संघको तथ्याङ्क अनुसार फागुन ३ गते बैंकहरुको निक्षेप २६७९ अर्ब र कर्जा ३१९१ प्रवाह गरेका थिए । असार मसान्तको वास्तविक अवस्थाको आधारमा चैतको मध्यसम्म बैंकहरुले अघिल्लो वर्षको तुलनामा २१६ अर्बको निक्षेप संकलन गरीे २९६ अर्ब कर्जा प्रवाह गरेको नेपाल बैंकर्स एशोसियसनको तथ्याङ्कमा उल्लेख छ । यो भनेको करिब ८० अर्बको अन्तर हो । बैंकहरुले सामान्यतया निक्षेपको ८० प्रतिशत मात्रै कर्जा प्रवाह गर्न पाउने व्यवस्था मान्ने हो भने बैंकहरुले २१६ अर्ब निक्षेप परिचालन वृद्धि गर्दा १७२ अर्ब मात्रै ऋण दिन पाउँथे । यो आधारमा बैंकहरुको कर्जा विस्तारमा १२४ अर्बको असन्तुलन देखिएको हो । यस्तो अवस्था आउनुमा बैंकहरुको साउन भदौ, असोज र माघ महिनाका गतिविधि प्रमुख कारक छन् । साउन महिनामा १४ अर्ब निक्षेप घट्दा ४ अर्ब कर्जा बढाएका बैंकहरुले भदौमा ४७ अर्ब निक्षेप संकलन र ५९ अर्ब कर्जा प्रवाह वृद्धि गरेको थिए । असोज महिनामा झन् २१ अर्ब निक्षेप र ७२ अर्ब कर्जा प्रवाह वृद्धि भएको थियो । यही कारणले बजारमा लगानीयोग्य पुँजीको अभाव हुँदा बैंकिङ क्षेत्रको व्याजदर आकाशिएको थियो । राष्ट्र बैंकको ‘करेक्टिभ एक्सन’सँगै कात्तिक, मंसिर र पुस महिनामा बैंकहरुको असन्तुलित कारोबारको अवस्थामा सुधार आए पनि माघ महिनामा सो अवस्था पुन: दोहोरिएको थियो । कात्तिकमा ४३ अर्ब निक्षेप र ३७ अर्ब कर्जा विस्तार हुँदा मंसिरमा ५४ अर्ब र ३१ अर्ब तथा पुसमा ३०/३० अर्बको निक्षेप र कर्जाको आकार विस्तार भएको थियो । नेपाल राष्ट्र बैंकको पछिल्लो तथ्याङ्क अनुसार वाणिज्य बैंकहरुको भारित औसत सीसीडी अनुपात ८०.९५ प्रतिशत थियो । फागुन महिनाका बैंकहरुको अवस्थाले यसमा झन् चाप पर्नसक्ने देखिएको छ ।
प्रधानमन्त्री र सातै प्रदेशका मुख्यमन्त्रीको बैठक, ‘तीन तहकै सरकारका कार्यक्रम नदोहोरिउन्’
काठमाडौँ । प्रधानमन्त्री केपी शर्मा ओली र सातवटै प्रदेशका मुख्यमन्त्रीबीच आगामी आर्थिक वर्षको नीति तथा कार्यक्रम र बजेट तयारीका विषयमा छलफल भएको छ । आज प्रधानमन्त्री निवास बालुवाटारमा भएको संयुक्त बैठकमा प्रधानमन्त्री ओलीले नीति कार्यक्रम र बजेटका विषयमा स्थानीय, प्रदेश र केन्द्र सरकारका कार्यक्रम नदोहोरिउन भनेर सचेत रहनुपर्ने बताए । उनले भने “कार्यक्रमहरु नदोहोरिउन भनेर तिनै तहका सरकारको सहभागितामा राष्ट्रिय समन्वय परिषद्को बैठक आयोजना गर्नुपर्छ । कुनै पनि कार्यक्रम एउटा मात्र निकायले सञ्चालन गर्नुपर्छ ।” बैठकमा सहभागी प्रदेश नं १ का मुख्यमन्त्री शेरधन राईका अनुसार प्रधानमन्त्री ओलीले अन्तरप्रदेश समन्वय परिषद्को अघिल्लो बैठकले निर्णय गरेका २९ बुँदाको कार्यान्वयन तदारुकताका साथ गरिने विश्वास पनि व्यक्त गरे । प्रधानमन्त्री ओलीले आँधीहुरीपीडित बारा र पर्साका बासिन्दालाई राहत र पुनःस्थापनाका लागि सबै प्रदेशलाई सहयोग गर्न पनि आग्रह गरेका थिए । राष्ट्रिय योजना आयोगले तयार गरेको आगामी १५औँ आवधिक योजनाको मस्यौदा आधारपत्रलाई अन्तिमरुप दिन आयोजित राष्ट्रिय विकास परिषद्को बैठकका लागि मुख्यमन्त्रीहरु काठमाडौँमा रहेका छन् । रासस
