हावाहुरी पीडितलाई सहयोगी विकास बैंकको १ लाख ११ हजार सहयोग
काठमाडौँ । सहयोगी विकास बैंकले चैत १७ गते सांझ आएको बिनाशकारी हावाहुरीबाट पीडितहरुलाई एक लाख एघार हजार एक सय एघार रुपैयाँ सहयोग गरेको छ । प्रदेश न. २, मुख्यमन्त्री राहत कोषमा जम्मा हुने गरी सो रकम बराबरको चेक प्रदेश नं. २ का अर्थमन्त्री बिजयकुमार यादबलाई हस्तान्तरण गरिएको बैंकले जनाएको छ ।
मुस्ताङको विद्यालयलाई गण्डकी विकास बैँकले गर्यो ४५ हजार सहयोग
काठमाडौँ । गण्डकी विकास बैँक लिमिटेडले २०७५ साल भदौमा मुस्ताङ जिल्लाको सौरु गाउँमा आएको बाढी पहिरोले क्षति पुर्याएको सौरु आधारभूत विद्यालयको पूर्ननिर्माणमा सहयोग गरेको छ । विद्यालय व्यवस्थापन समितिका अध्यक्ष सोजन हिराचनलाई गण्डकी विकास बैँक लिमिटेड जोमसोम शाखाका शाखा प्रमुख महेश थकालीले एक कार्यक्रमका बिच पैतालीस हजार रुपैयाँको चेक हस्तान्तरण गरेका हुन् । सो अवसरमा विद्यालय व्यवस्थापन समितिका अध्यक्ष हिराचनले सौरु गाउँ थासाङ गाउँपालिकाको गाउँहरु मध्ये अति पिछडिएको र बाटोको हिसाबले पायक नपर्ने भएको हुँदा विकास र सहयोगको लागि कसैको नजर नपरेको र स–साना भाई बहिनीहरुको भविष्य सँग जोडिएको विषय रहेको अवस्थामा गण्डकी विकास बैँकले सहयोग गरेकोमा बैँक परिवार प्रति हार्दिक आभार प्रकट गर्दै धन्यवाद ज्ञापन गरे । बैँकले आगामी दिनहरुमा पनि यस प्रकारका सहयोगलाई निरन्तरता दिदैँ जाने बैँकका प्रमुख कार्यकारी अधिकृत रेशमबहादुर थापाले बताए ।
१८०% प्रतिफलको लक्ष्यसहित नबिल म्युचुअल फण्डको आईपीओ आउँदै, लगानीकर्ताको रोजाइमा पर्ला ?
काठमाडौं । नबिल म्युचुअल फण्डअन्तर्गत नबिल ब्यालेन्स फण्ड–२ को १ अर्ब बढीको आईपीओ बैशाख ५ गतेदेखि सुरु हुने भएको छ । प्रतिकित्ता १० रुपैंया अंकित मूल्य भएको फण्डको १ अर्ब २ करोड रुपैंया बराबरको १० करोड २० लाख इकाईको आईपीओ जारी गर्न नबिलले आइतबार आह्वानपत्र प्रकाशन गरेको छ । उक्त इकाईको निष्कासन छिटोमा बैशाख ९ प्रतिशत र ढिलोमा जेठ ३ गते बन्द हुने जनाइएको छ । नबिल बैंक कोष प्रबन्धक र नबिल इन्भेष्टमेन्ट कोष व्यवस्थापक रहेको नबिल म्युुचुअल फण्डको यो तेस्रो म्युचुअल फण्ड हो । नबिल म्युचुअल फण्डकोे नबिल इक्विटी फण्ड क्रियाशील हाल अवस्थामा छ भने र नबिल व्यालेन्स फण्ड–१ भने गत चैत मसान्तमा परिपक्व भई लगानीकर्तालाई फिर्ता समेत गरिसकिएको छ । पहिलो फण्डको परिपक्वतापछि दोस्रो फण्ड सञ्चालनमा लयउन लागिएको हो जसका लागि नेपाल धितोपत्र बोर्डले गत मंगलबार अन्तिम स्वीकृति दिएको थियो । नबिल इन्भेष्टमेन्टले यो फण्डको सञ्चालनसँगै पहिलो वर्ष नै २१ प्रतिशत प्रतिफलको प्रक्षेपण गरेको छ । १० वर्ष अवधिको यो फण्डले उक्त अवधिमा कुल जम्मा १८९.४४ प्रतिशतसम्म प्रतिफल दिनसक्ने प्रक्षेपण समेत फण्डले गरेको छ । उक्त फण्डको आईपीओ सीआश्वा प्रणाली मार्फत् अरु शेयरका लागि दिइएको आवेदन जसरी नै आफ्नो बैंक तथा वित्तीय संस्थाको कुनै पनि कार्यालय वा मेरो शेयरका प्रयोगकर्ताले अनलाइनमार्फत् आवेदन दिन सक्ने जनाइएको छ । घट्दो बजारमा लगानी गर्लान् ? मुख्यतः शेयर बजारमार्फत् नै पुँजी परिचालन गर्ने उद्देश्यले स्थापित यस्ता फण्डहरुले सूचीकृत कम्पनीहरुको शेयरमै लगानी गरि नाफा आर्जन गर्छन् । शेयर बजारको उचारचढावका कारण यी फण्डहरुको एनएभी र सँगसँगै मूल्यको उतारचढाव समेत देखिन्छ । हाल सञ्चालनमा रहेका १३ ओटा म्युचुअल फण्डका योजनाहरुमध्ये एनएमबि सुलभ फण्डको मूल्य १० रुपैंया ३१ पैसा हुनुबाहेक अरु सबै फण्डहरुको मूल्य १० रुपैंयाभन्दा कम छ । एनआईबिएल प्रगति फण्डको सबैभन्दा कम ७ रुपैंया १ पैसामै एक इकाई किन्न पाइन्छ भने नबिल म्युचुअल फण्ड अन्तर्गतकै एनएमबि इक्विटी फण्डको बजार मूल्य ८.०३ रुपैंया छ । यस्तो अवस्थामा एउटा विवेकशील लगानीकर्ताले १० रुपैंया तिरेर यो इकाई किन किन्ने भन्ने प्रश्न पनि उठ्न सक्छ । यद्यपि नबिल इक्विटी फण्डको पहिलो संस्करणमा लगानीकर्ताले राम्रो प्रतिफल पाइएको इतिहास भने नबिल इन्भेष्टमेन्टसँग छ । यस्तो अवस्थामा बजारमूल्यको पछि नलागी एउटा अनुभवी फण्डलाई आफ्नो स्रोतको लगानीको जिम्मा दिएर प्रतिफल आर्जन गर्ने विकल्प समेत एउटा लगानीकर्तासँग हुन्छ ।
ललितानिवास प्रकरणः सरकारी जग्गामा ठडिए भाटभटेनी र एनआरएनए भवन
काठमाडौं । मुआब्जा दिएर सरकारले अधिग्रहण गरेको बालुवाटारस्थित ललितानिवासले चर्चेको जग्गामा भाटभटेनी सुपरमार्केट र गैरआवासीय नेपाली संघ (एनआरएनए) का भौतिक संरचना निर्माण गरिएको तथ्य खुलेको छ । अख्तियार दुरूपयोग अनुसन्धान आयोग र नेपाल प्रहरीको केन्द्रीय अनुसन्धान ब्युरो स्रोतका अनुसार डिल्लीबजार मालपोत कार्यालयका कर्मचारीसँग मिलेर ललितानिवासका तत्कालीन भोगाधिकारीले भूमाफिया र व्यापारीलाई अनधिकृत रूपमा बिक्री गरेको जग्गामा भाटभटेनी र एनआरएनएले भौतिक संरचना बनाएका हुन्। स्रोतका अनुसार ती दुवै संरचना र त्यससँग जोडिएको जग्गा पुनः सरकारका नाममा ल्याउने तयारी भइरहेको छ । भाटभटेनीका सञ्चालकले राणा परिवारबाट तथा एनआरएनएले जग्गा हडप्ने मुख्य योजनाकार (मतियार) मध्ये रामकुमार सुवेदी, शोभाकान्त ढकाल तथा उनका आफन्तबाट सो जग्गा खरिद गरेका थिए । भाटभटेनीका सञ्चालकहरूका नाममा व्यक्तिगत र संयुक्त गरी करिब ६० रोपनी तथा एनआरएनएका नाममा तीन रोपनी एक आना जग्गा बिक्री गरिएको छ । त्यसबाहेक ललितानिवासका तत्कालीन भोगाधिकारीले अन्य भूमाफिया र मालपोत कार्यालका तत्कालीन कर्मचारीलाई पनि जग्गा बिक्री गरेको पाइएको अनुसन्धानमा संलग्न स्रोतको भनाइ छ। २०७१ फागुन तेस्रो साता प्रधानमन्त्री सुशील कोइरालाले एनआरएन भवन शिलान्यास गरेका थिए । भवन शिलान्यासका क्रममा तत्कालीन एनआरएनका अध्यक्ष शेष घलेले भवनको लागत ३० करोडभन्दा बढी रहेको बताएका थिए । वास परिसरको जग्गामध्ये भाटभटेनीका सञ्चालक मीनबहादुर गुरुङसहितले ६० रोपनी र एनआरएनएले तीन रोपनी एक आना आफ्नो स्वामित्वमा ल्याइसकेका छन् । ललितानिवासले चर्चेको जग्गा हडप्ने योजनामा भक्तपुर जिल्लाका तत्कालीन भूमिसुधार अधिकारी हाल निर्वाचन आयुक्त सुधीर शाहको पनि नाम जोडिएको स्रोत बताउँछ। शाहको परिवारका नाममा ललितानिवासको दुई रोपनी जग्गा खरिद भएको विषय पनि अनुसन्धानको घेरामा छ। ‘ललितानिवास र त्यसले चर्चेको जग्गा पुनः सरकारका नाममा ल्याउने र जग्गा हडप्नेमाथि कारबाही चलाउने गरी अनुसन्धान भइरहेको छ,’ स्रोतले भन्यो, ‘जुनसुकै तह र तप्काका भए पनि सरकारी सम्पत्ति हडप्नेमाथि कारबाही हुन्छ।’ ललितानिवासले चर्चेको जग्गा गैरकानुनी रूपमा व्यक्तिका नाममा रजिस्ट्रेसन गर्न सघाउने मालपोत कार्यालय डिल्लीबजारका तत्कालीन कर्मचारीमाथि आयोगले छानबिन गरिरहेको छ । जग्गा हडप्न मतियार बनेका ढकाल, सुवेदी तथा राणा परिवारबाट जग्गा खरिद गर्ने व्यापारी मीनबहादुर गुरुङलगायतमाथि पनि ब्युरोले अनुसन्धान गरिरहेको छ । आजको नागरिक दैनिकमा समाचार छ ।
पाइपलाइन विस्तार धमाधम, भाडा बचत वार्षिक २ अर्ब
अमलेखगन्ज, बारा । मोतिहारी–अमलेखगन्ज पेट्रोलियम पाइपलाइन विस्तारको काम अन्तिम चरणमा पुगेको छ । आगामी असारसम्म पाइपलाइन बिछ्याउने कार्य सम्पन्न भएपछि ढुवानी भाडा कम हुने र पेट्रोलियम पनि केही सस्तो हुने अनुमान गरिएको छ । हाल पर्सा राष्ट्रिय निकुञ्जको ७ किमि क्षेत्रमा पाइपलाइन बिछ्याउने काम जारी छ। भारत र नेपाल सरकारबीच २०७२ मा सम्झौता भएअनुसार इन्डियन आयल कर्पोरेसनको सहयोगमा मोतिहारीदेखि बाराको अमलेखगन्जसम्म ७० किलोमिटर क्षेत्रमा पाइपलाइन बिछ्याउने काम भइरहेको छ। मोतीहारीदेखि नेपाल सीमासम्म पाइप बिछ्याउने काम सकिएको छ। निकुञ्ज क्षेत्रको रुख कटानमा ढिलाइ हुँदा केही समस्या पनि भइरहेको छ। ‘माघ ३ गतेको मन्त्रिपरिषद्ले रुख काट्न निर्णय गर्यो, त्यसको डेढ महिनापछि काम सुरु भएको हो,’ आयल निगम क्षेत्रीय कार्यालय अमलेखगन्जका प्रमुख प्रदीपकुमार यादवले भने, ‘अहिले निकुञ्ज क्षेत्रमै काम भइरहेको छ।’ ६ हजार ५ सय ६३ रुख काटिँदै छन्। जंगलको ९ किमिमध्ये २ किमि क्षेत्रमा पाइप विस्तार गरी सकिएको छ। काटिएका रुख व्यवस्थापन गर्दै पाइप विस्तार गर्ने काम जारी राखिएको छ। ‘१ करोड ९५ लाख रुपैयाँ हामीले निकुञ्जलाई दिनेछौं,’ उनले भने, ‘जति रुख काटिन्छन्, त्यति नै संख्यामा हुर्काउन आयल निगमले उक्त रकम दिन लागेको हो।’ पाइपलाइन विस्तार गर्न निगमका कार्यकारी निर्देशक सुरेन्द्र पौडेलले नियुक्त भएलगत्तै निकुञ्जको समस्या टुंग्याएका थिए। तेल राख्न अमलेखगन्ज डिपोमा तीनवटा भर्टिकल ट्यांक मर्मत गरिइसकिएको जानकारी यादवले दिए। उनका अनुसार एउटा मर्मत हुँदै छ। जसमा ४९ लाख लिटरको २ वटा र ४१ लाख लिटर अट्ने २ वटा ट्यांक निर्माण गरिएको हो । आजको कान्तिपुर दैनिकमा समाचार छ ।
आरोहीबाट २५ करोड बढी रोयल्टी उठ्यो, ४६ आरोही समूहलाई आरोहण अनुमति
काठमाडौँ । यस वर्षको वसन्त ऋतुको हिमाल आरोहणका लागि हालसम्म ४६ आरोही समूहले आरोहण अनुमति लिएका छन् । छयालीस आरोही समूहका १९३ आरोहीबाट आजसम्म रु २५ करोड ५६ लाख २८ हजार ८३७ रोयल्टी जम्मा भएको पर्यटन विभागले जनाएको छ । सो मध्ये सर्वोच्च शिखर सगरमाथाबाट मात्रै रु २३ करोड ९२ लाख ५७५ रोयल्टी उठेको छ । सगरमाथा आरोहणका लागि १९ आरोही समूहका १९३ आरोही गएका छन् । सगरमाथासहितका हिमाल आरोहणका लागि आरोही धमाधम गन्तव्यतर्फ लागेका विभागले जनाएको छ । कञ्चनजङ्गा र ल्होत्सेका लागि समान चार र अन्नपूर्ण तथा अमादब्लममा समान दुई आरोही समूहले आरोहण अनुमति लिएका छन् । मकालु, नुपुचे र ग्याल्जेनपिकका लागि दुई÷दुई समूहले अनुमति पाएका छन् । विभागको पर्वतरोहरण शाखाका रामेश्वर निरौलाका अनुसार आरोही आउने क्रम जारी रहेकाले यो वर्ष आरोहीको उत्साहजनक सहभागिता रहने अनुमान छ । सन् २०१८ को वसन्त ऋतुमा रु ४१ करोड २८ लाख ८४ हजार ६३८ रोयल्टी जम्मा भएको थियो । सोमध्ये सबैभन्दा धेरै सगरमाथाबाट मात्रै रु ३५ करोड १४ लाख ९८ हजार ३१२ रोयल्टी उठेको थियो । सन् २०१८ को यही मौसम (वसन्त ऋतु) मा सगरमाथासहितका हिमाल आरोहणका लागि १०७ आरोही समूह गएका थिए । तीमध्ये सगरमाथा आरोहणका लागि ३४ समूह गएका थिए । सन् २०१७ को सोही याममा सगरमाथासहितका हिमाल आरोहणका लागि १०८ आरोही दल गएका थिए । सरकारले आरोहणका लागि ४१५ हिमाल खुला गरेको छ । अझै आरोहणयोग्य १३ सयभन्दा बढी हिमाल रहेका बताइन्छ । रासस
त्रिविको थेसिस किनबेचमा प्राध्यापकको संलग्नता, ठगी मुद्दा लगाउने चेतावनी
काठमाडौँ । त्रिभुवन विश्वविद्यालयको आंगिक क्याम्पस शंकरदेवमा थेसिस र प्रोजेक्ट रिपोर्टका नाममा प्राध्यापकले आफूहरूसँग रकम बार्गेनिङ गरेको आरोप विद्यार्थीले लगाएका छन् । क्याम्पसका उपप्राध्यापक जोगिन्दर गोइतले आफैँले थेसिस तयार गरिदिने भन्दै विद्यार्थीसँग रकम मागेपछि अभिभावकले क्याम्पस प्रमुख कृष्णप्रसाद आचार्यसँग गुनासो गरेका छन् । गोइत अकाउन्ट विषयका शिक्षक हुन् । प्राध्यापकहरूले थेसिस र प्रोजेक्ट रिपोर्ट आफैँले तयार गरी प्रतिविद्यार्थी १५ देखि २५ हजारसम्म रकम असुल्ने गरेको विद्यार्थीको भनाइ छ । शिक्षकले बार्गेनिङ गरेको गुनासो अभिभावकले क्याम्पस प्रमुखसँग गरेपछि यस्तो तथ्य बाहिरिएको हो । क्याम्पसका केही स्थायी, करार र आंशिक शिक्षकले समेत विद्यार्थीसँग बार्गेनिङ गरेको पाइएको छ । क्याम्पसवरिपरिका फोटोकपी सेन्टरले समेत शिक्षकसँगको मिलेमतोमा विद्यार्थीलाई थेसिस बेच्ने गरेको आरोप लाग्दै आएको छ । यता, बिबिएस चौथो वर्षमा ५० पूर्णांकको प्रोजेक्ट वर्क र एमबिएस तहमा सय पूर्णांकको थेसिस तयार गर्नुपर्छ । शिक्षकले आफैँले त्यस्तो सामग्री तयार गरेर विद्यार्थीसँग रकम असुल्न थालेपछि क्याम्पसले उनीहरूमाथि ठगी मुद्दा चलाउने चेतावनी दिएको छ । क्याम्पस प्रमुख कृष्णप्रसाद आचार्यले सूचना जारी गरी बिचौलियालाई कारबाही गर्ने चेतावनी दिएका छन् । ‘यस्ता काम दोहोरिन गएमा थेसिस/प्रोजेक्ट रिपोर्टमा चलखेल गर्ने शिक्षकलाई क्याम्पसबाट हटाउने, बढुवा रोक्ने वा त्रिवि सेवाबाट हटाउन सिफारिस गर्ने र ठगीसम्बन्धी मुद्दा चलाउने तथा किन्ने विद्यार्थीलाई क्याम्पसबाट निष्कासन गरिनेछ,’ सूचनामा भनिएको छ । क्याम्पसमा प्रत्येक वर्ष बिबिएसमा करिब सात सय र एमबिएसमा हजार विद्यार्थीले थेसिस तथा प्रोजेक्ट रिपोर्ट बुझाउँछन् । विद्यार्थीको चाप र डिन कार्यालयको बाध्यात्मक नीतिको मौका छोपी केही शिक्षकले नाजायज काम गरेको क्याम्पस प्रमुख आचार्यको भनाइ छ । आजको नयाँ पत्रिका दैनिकमा समाचार छ ।
श्रीकृष्ण क्याम्पस चलाउन महायज्ञ सुरु, पहिलो दिन सवा ३ लाख रुपैयाँ संकलन
नुवाकोट । तारुका श्रीकृष्ण क्याम्पस तथा श्रीकृष्ण माविको लागि जग्गा खरिद तथा भवन निमार्णाथ श्रीमद भागवत सप्ताह महायज्ञ शुरु भएको छ । शनिवार प्रतिनिधिसभा सदस्य हितबहादुर तामाङले महायज्ञको उद्घाटन गरेका छन् । ७ दिनसम्म पंडित उत्तम भट्टद्वरा कथा वाचन हुने महायज्ञमा पहिलो दिन विभिन्न दाताबाट नगद ३ लाख २१ हजार ४ सय ५८ रुपैयाँ संकलन भएको महायज्ञ मुल आयोजक समितिका कोषाध्यक्ष सूर्यमान श्रेष्ठले बताए । कार्यक्रममा क्याम्पस संचालक समितिका पूर्व सदस्य दिलबहादुर भुजेल तथा स्थानिय समाजसेवी पूर्णबहादुर भुजेलद्वरा नगद १ लाख २३ हजार ४ सय ५६ रुपैयाँ, तथा रामचन्द्र अधिकारीद्वरा १ लाख ११ हजार १ सय ११ रुपैयाँ नगद सहयोगको घोषणा गरेका छन । माहायज्ञमा स्थानिय र अन्यबाट करिव १ करोड संकलन हुने अनुमान गरिएको प्रचार प्रसार समिति संयोजक राजेन्द्र न्यौैपानेले बताए । विद्यालय प्राङ्गणमा भएको कार्यक्रमको उद्घाटन गर्दै सांसद तामाङले शिक्षाको विकास विना समाजको विकास संभव नभएको बताए । उनले बिद्यालयको भवन तथा पूर्वाधार निर्माणका लागी सरकारसँग आवश्यक पहल गर्ने बताए । उनले शिक्षा राज्यको दायित्व रहेकाले राज्यले सहयोग गर्नुपर्ने बताए । मुल आयोजक समितिका अध्यक्ष तथा तारकेश्वर गाउँपालिका वाड नं. २ का वडाअध्यक्ष समर बहादुर आलेमगरको अध्यक्षतामा भएको कार्यक्रममा नुवाकोट क्षेत्र नं. २ का सांसद नारायण प्रसाद खतिवडाले विद्यालय जोगाउन र आधुनिक र प्रविधियुक्त शिक्षाको लागी महायज्ञ लगाउनु परेको बताए । सांसद खतिवडाले राज्यको ध्यान गाउँको विकासमा जोड दिए । शनिबार विहान कलस यात्रा सहित सुरु भएको महायज्ञको उदघाटन समारोहमा तारकेश्वर गाउँपालिका अध्यक्ष रमेश वस्ती, उपाध्यक्ष तारादेवी रिमाल, जिल्ला समन्वय समिति नुवाकोटको सदस्य सुविना प्रधान, स्कुल व्यावस्थापन समिती अध्यक्ष ज्ञानबहादुर बख्रेल, क्याम्पस संचालक समिति सदस्य विणारत्न शाक्य, वडा नं. ५ का वडाअध्यक्ष चुडामणी गजुरेललगायतले महायज्ञ सफलताको शुभकामना व्यक्त गरे ।
