नेपाल आईडलका विजेता ओडको पहिलो गीत ‘मिठो बोली’ सार्वजनिक
काठमाडौं । नेपाल आईडल सिजन २ का विजेता सुदुरपश्चिमका रवि ओडको पहिलो गीत ‘मिठो बोली’ बजार आएको छ । सांगीतिक जीवन औपचारिक शुरुवात भएसँगै अभिनयमा रवि ओडलाई एलिशा राईसँग देख्न सकिन्छ । कृष्ण के.सीको शब्दमा रहेको उक्त गीतमा संगीतकार हरी लम्सालले संगीत गरेका हुन् । शिव विकेको कोरियोग्राफी तथा निर्देशनमा उक्त म्युजिक भिडियो तयार भएको हो । नेपाल आईडलका विजेता ओडको यो पहिलो गीतका साथै अभिनय रहेको नयाँ गीत ‘मिठो बोली’ सार्वजनिक भएको छ । भिडियाे हेर्नका लागि तल क्लिक गर्नुहोस् ।
१७.१६ अंकले बढ्यो नेप्से, एनआईसी एशियाका लगानीकर्तालाई सबैभन्दा बढी नाफा
काठमाडौ । साताको पहिलो दिन आईतबार नेप्से परिसूचक १७.१६ अंकले बढेको छ । १.४७ प्रतिशतले बढ्दा नेप्से परिसूचक ११८२.३६ बिन्दुमा पुगेको हो । आईतबार सेयर बजारमा १६८ कम्पनीले सेयर कारोबार गरेका छन् । १८ लाख ८७ हजार ३ सय ७३ कित्ता सेयर खरिद बिक्री हुँदा ५४ करोड ३९ लाख ५५ हजार ६ सय ४२ रुपैयाँको कारोबार भएको छ । बजार बढेको दिन नेप्सको ५ समूह हरिया भए भने बाँकी राताम्मे भएका छन् । बैंक समूह २८.१९, होटल समूह १३, विकास बैंक समूह १४.९९, वित्त समूह १.७८, जीवन बीमा समूह ०.१२, अंकले बढेका छन् । यता, जलविद्युत समूह २.७५, निर्जीवन बीमा समूह १९.२१, उत्पादन मूलक ५.८२ र लघुवित्त समूह ०.९५ अंकले घटेका छन् । एनआईसी एशिया बैंकका लगानीकर्ताले ६.३६ प्रतिशतले सबैभन्दा धेरै नाफा आर्जन गरेका छन् । यस्तै, यूनिर्भसल पावर कम्पनी लिमिटेडका लगानीकर्ताले ९.२५ प्रतिशतले सबैभन्दा धेरै घाटा व्यहोरेका छन् ।
गुणस्तर चिन्ह लिने बढ्दै, ११ थरी वस्तुको आयात र बिक्री वितरणमा अनिवार्य
काठमाडौँ । आफ्ना उत्पादन गुणस्तरीय छ भनेर आम उपभोक्तालाई विश्वास दिलाउन नेपाल गुणस्तर चिन्ह लिन आउने बढ्दै छन् । सरकारले ११ थरी वस्तुको आयात र बिक्री वितरण गर्दा चिन्ह लिन अनिवार्य(बाध्यकारी) गरेको छ । यी बाहेक अरु उत्पादनका स्वेच्छिक रुपमा समेत व्यवसायीले चिन्ह लिने गरेको नापतौल तथा गुणस्तर नियन्त्रण विभागले जनाएको छ । गतवर्ष बाध्यकारी वस्तुमा बाहेक झण्डै दुई सयले चिन्ह लिएका छन् । यी उद्योगले ६० थरी उत्पादनमा चिन्ह लिएको विभागका निर्देशक दिपक ज्ञवालीले बताए । उनका अनुसार बाध्यकारी ११ सामग्रीबाहेक अरु उत्पादनमा व्यवसायीले चाहेको अवस्थामा गुणस्तर चिन्ह लिन सक्छन् । कुनै पनि उद्योगले गुणस्तर चिन्हको माग गर्दै दिएको निवेदनका आधारमा उद्योग र उत्पादनको निरीक्षण तथा परीक्षण पश्चात चिन्ह दिने गरिएको उनले बताए । उनले भने, “चिन्ह दिनु पहिले र पछि पनि उद्योग तथा बजारबाट ती सामग्रीको गुणस्तर परीक्षण भइरहन्छ ।” विगतका केही वर्षयता गुणस्तर चिन्ह लिने उद्योगमा खाद्यान्न उत्पादन गर्ने उद्योग बढिरहेका विभागले जनाएको छ । बजारमा प्रतिष्पर्धा बढिरहँदा आफ्ना उत्पादन गुणस्तरीय भएकाले गुणस्तर चिन्ह पाएको हो भन्ने देखाउन चाहने उद्योग क्रमिक रुपमा बढिरहेका निर्देशक ज्ञवालीले बताए । चिन्ह लिनका लागि उद्योगमा नै परीक्षण गर्ने प्रविधि र दक्षजनशक्ति दुबै चाहिने उनले बताए । गुणस्तर चिन्ह लिइसकेपछि पनि विभागले वर्षेनी बजारबाट र उद्योगमै पुगेर उत्पादनको गुणस्तर हेर्ने गरेको छ । उनले भने, “गुणस्तर चिन्ह लिएका उद्योगलाई पटक-पटक छड्के जाँच गर्ने र गल्ती पाइएमा कारवाही हुने गरेको छ ।” विभागले देशभरमा नापतौल र गुणस्तर कार्यान्वयन गराउँदै आएको छ । रासस
चेक गणतन्त्रको भिसा सेवा अब नेपालमै
काठमाडौँ । मध्य युरोपेली मुलुक चेक गणतन्त्रको यात्रा गर्न चाहने नेपाली नागरिकको सहजतालाई ध्यानमा राखेर भीएफएस ग्लोबलले काठमाडौंमा चेक गणतन्त्र भिसा आवेदन केन्द्र संचालनमा ल्याएको छ । यसअघि चेक गणतन्त्र भिसा आवेदन प्रक्रियाका लागि आवेदकहरु भारतको नयाँ दिल्लीस्थित दूतावासमा जानुपथ्र्यो । नेपालका लागि चेक गणतन्त्रका राजदूत मिलान होभोर्का र नेपालका लागि अवैतनिक महावाणिज्यदूत विष्णुकुमार नयाँ सुविधाको औपचारिक उद्घाटन गरे । चेक गणतन्त्र जाने नेपालीहरुको संख्या निरन्तर बढिरहेको छ । सन् २०१८ मा चेक गणतन्त्रको भिसाका लागि भिसा आवेदन दिने नेपालीको संख्या अघिल्लो वर्षको तुलनामा २६ प्रतिशत बढेको थियो । हरेक वर्ष आवेदनको संख्या बढ्दै गएकोले नेपाली आवेदकको सहजताका लागि भीएफएस ग्लोबलले काठमाडौंमा चेक गणतन्त्रको भिसा सम्बन्धी काम कारबाही सुरु गरेको हो । चेक गणतन्त्रसँगै भीएफएस ग्लोबलले नेपालबाट भिसा प्रक्रिया संचालन गर्ने मुलुकको संख्या २० पुगेको छ । भीएफएस ग्लोबलले सन् २००८ देखि चेक गणतन्त्रको सरकारसँग सहकार्य गर्दै आएको छ । हाल भीएफएस ग्लोबलले २५ मुलुकमा एक सयभन्दा बढी भिसा आवेदन केन्द्रहरु संचालन गरिरहेको छ ।
यूनाइटेड सिमेन्ट्स र धुनिवेशी नगरपालिकाको सहकार्यमा निःशुल्क स्वास्थ शिविर
काठमाडौं । के.एल. दुगड ग्रुप अन्तर्गत यूनाइटेड सिमेन्ट्स प्रा.लि. र धुनिवेशी नगरपालिकाको संयुक्त आयोजना तथा सहकार्यमा एक दिने निःशुल्क स्वास्थ शिविर सम्पन्न भएको छ । टायल घर स्थित बुद्ध भिजन एकेडेमीको प्राङ्गणमा शिविर भएको हो । सो स्वास्थ शिविरमा धुनिवेशी नगरपालिका, धादिङका नगर प्रमुख बालकृष्ण आचार्य तथा उप प्रमुख निरु खरेल लगायत वडा नं. ९ को अध्यक्ष सा“इला राई तथा विभिन्न राजनीतिक पार्टीका प्रतिनीधि साथै प्रहरी प्रशासनको उपस्थिति रहेको थियो । धुनिवेशी नगरपालिका अन्तर्गत विभिन्न ठाउ“बाट लगभग ५ सय ५० भन्दा बदी नागरिक यो शिविरबाट लाभान्वित भएका छन । सो शिविरमा मुख्य रुपमा आ“खा, छाला तथा चर्म रोग तथा स्त्री रोगको औषधी उपचारको व्यवस्था गरिएको थियो । नगर स्वास्थ प्रमुख शिवहरि भट्ट लगायत विभिन्न स्वास्थ संस्थाबाट १५ जना भन्दा बढी स्वास्थकर्मीको उपस्थिति रहेको सो शिविरमा उल्लेख्य रुपमा बिरामीहरुको उपस्थिति रहेको वडा अध्यक्ष राईले बताए । यूनाइटेड सिमेन्ट्सले यस्ता सामाजिक कार्य विगतमा पनि गर्दै आएको र आगामी दिनमा पनि अझ भव्यताका साथ आयोजना गर्ने लक्ष्य रहेको उद्योगका विनोदकुमार न्यौपानेले बताए । अघिल्लो वर्ष पनि सरकारी विद्यालयमा यूनाइटेड सिमेन्ट्सले शैक्षिक सामाग्री हस्तान्तरण गर्नुका साथै एम्बुलेन्स सेवा सञ्चालनका लागि आर्थिक सहयोग गरेको थियो ।
युनाइटेड फाइनान्सको २१ लाख कित्ता शेयर मुत्तुट फाइनान्सले किन्यो, भित्रियो ३९ करोड ९० लाख
काठमाडौँ । युनाईटेड फाईनान्स लिमिटेडमा भारतको कोचीमा प्रधान कार्यालय रहेको मुत्तुट फाईनान्स लिमिटेडको लगानी भित्रिएको छ । कात्तिक ३० गते भएको संयुक्त लगानी सम्झौता अनुसार संस्थागत समुह अन्र्तगत रहने गरी मुत्तुट फाइनान्सले २१ कित्ता शेयरमा लगानी गरेको हो । १९० रुपैययाँका दरले २१ लाख कित्ता शेयरको हुन आउने रकम ३९ करोड ९० लाख रुपैयाँको चेक नेपाल मुत्तुट फाईनान्स लिमिटेडका अध्यक्ष एमजी जर्ज मुत्तुटले लगानी सम्मेलनका क्रममा प्रधानमन्त्री केपी शर्मा ओलीलाई र छुट्टै एक अर्को समारोहमा यूनाईटड फाईनान्स लिमिटेडका अध्यक्ष वसन्तकुमार चौधरीलाई हस्तान्तरण गरेका हुन् । मुत्तुट फाईनान्स लिमिटेडका अध्यक्ष एमजी जर्ज मुत्तुटले युनाईटेड फाईनान्स लिमिटेडसंगको सहकार्य नेपालमा संयुक्त लगानीको शुरुवात मात्र भएको र भविष्यमा बैंकिङ्ग तथा वित्तिय, बिमा, शिक्षा जस्ता अन्य क्षेत्रमा समेत लगानी बढाउन सकिने बताएका छन् । उक्त अवसरमा युनाईटेड फाईनान्स लिमिटेडका अध्यक्ष चौधरीले मुत्तुट ग्रुपले युनाईटेड फाईनान्स लिमिटेडसंग संयुक्त लगानीको सहकार्य गरेकोमा आभार व्यक्त गर्दै आगामी दिनमा मुत्तुट फाईनेन्सको अनुभव र प्रविधिको उपयोग गर्दै नेपालमा सुन कर्जा, रेमीटेन्स लगायत अन्य बैंकिङ्ग सेवाहरु ग्राहकहरुलाई सरल र सहज रुपमा प्रदान गर्ने धारणा व्यक्त गरेको युनाइटेड फाइनान्सका कामु कार्यकारी अधिकृत इश्वर पोखरेलले जानकारी दिए ।
अंग्रेजी शिक्षकको तलबको लागि मासिक दश हजार सहयोग गर्ने वडाध्यक्षको घोषणा
तनहुँ । तनहुँको व्यास नगरपालिका वडा नं. ५ का वडा अध्यक्ष मोहनकुमार श्रेष्ठले आफ्नो तलब बापत आउने रकम आफ्नै वडामा रहेको शुक्र आधारभुत बिधालयलाई मासिक १० हजारको दरले एक बर्ष सम्ममा एक लाख बिस हजार दिने घोषणा गरेका छन् । बिद्यालयको शनिबार सम्पन्न अभिभावक भेलाका क्रममा अध्यक्ष श्रेष्ठले उक्त घोषणा गरेका हुन । वडा अध्यक्ष श्रेष्ठले आफ्नो तलब मध्येबाट मासिक दस हजार रुपैयाको दरले २०७६ सालको शैक्षिक सत्रबाट एक बर्ष सम्म दिने घोषणा गरेका हुन् । श्रेष्ठले अंग्रेजी विषय पढाउने निजी शिक्षक नियुक्तिको लागि उक्त रकम सहयोग गरेको बताएका थिए । सोही अवसरमा श्रेष्ठले बारा र पर्सामा आएको हावाहुरीबाट भएको जनधनको क्षतिबाट पीडित व्यक्ति तथा प्रभावित परिवारलाई आफ्नो एक महिनाको तलब बराबरको १९ हजार ८ सय समेत सहयोग गर्ने घोषणा गरेका छन ।
म्याच फिक्सिङसम्बन्धी कसुरमा ६ बर्षसम्मको कैद, आजीवन प्रतिबन्धकाे व्यवस्था गरिएन
काठमाडौं । म्याच फिक्सिङ गरी अनियमितता गर्नेविरुद्ध कडा सजायसहितको व्यवस्था प्रस्ताव गरिएको छ । सरकारले यसअघिको खेलकुद विकास ऐन २०४८ लाई परिमार्जन गरी ल्याउन लागेको खेलकुद विकास ऐनमा २०७५ मा त्यस्तो व्यवस्था गर्न लागेको हो । यस्तो व्यवस्था देशभित्र हुने खेलकुद प्रतियोगिता र देशबाहिर हुने प्रतियोगिताका हकमा समेत लागु हुने व्यवस्था गरिएको छ । प्रस्तावित ऐनको दफा २३ मा ‘नेपालभित्रै वा नेपालको प्रतिनिधित्व गरी नेपालमा वा विदेशी मुलुकमा कुनै खेलाडीसँग प्रतिस्पर्धा गर्दा कुनै खेल सम्बद्ध खेलाडी वा पदाधिकारीले त्यस्तो खेलको प्रतिस्पर्धाबाट आउने स्वाभाविक परिणामलाई प्रतिकुल हुनेगरी कुनै खेलाडी वा खेलाडीको समूहसँग मिलेमतो गर्न, कसैको प्रलोभनमा पर्न वा कुनै बाजी जिताउने वा हराउने गरी त्यस्तो खेल खेल्न वा खेलाउने कार्य गर्न हुँदैन’ भनिएको छ । त्यसरी म्याच फिक्सिङ गरेको पाइएमा ३ वर्षसम्म कैद र ३० हजार रुपैंयासम्म जरिवाना गर्ने र त्यसरी लेनदेन भएको रकम जफत गर्ने व्यवस्था समेत ऐनमा गरिएको छ । त्यस्तो कसुर यदि नेपालको प्रतिनिधित्व गरी विदेशमा गरेको पाइएमा उसलाई थप ३ वर्ष कैद हुने व्यवस्था समेत ऐनले गरेको छ । त्यसरी कसुर गर्नेलाई फौजदारी अपराध अन्तर्गत मुद्दा दायर हुने र सरकार बादी भई मुद्दा अघि बढ्ने व्यवस्था समेत ऐनमा गरिएको छ । उक्त ऐन मन्त्रीपरिषद्बाट पारित भई संघीय संसदको माथिल्लो सदन राष्ट्रियसभामा प्रक्रियामा रहेको र सो ऐनबारे सामान्य छलफल भएको संघीय संसद सचिवालयले जनाएको छ । ऐनले आन्तरिक र बाह्य रुपमै हुने खेलकुद प्रतियोगितामा हुनसम्ने यस्ता कसुरको लागि फौजदारी कसुरको व्यवस्था गरे पनि त्यो कुन हदसम्मको खेलमा हुने भन्ने स्पष्ट व्याख्या भने ऐनमा गरिएको छैन । कानूनको अभावमा छुटेका थिए यसअघिका आरोपी नेपालका खेलाडीहरुले विभिन्न अन्तराष्ट्रिय फुटबल प्रतियोगितामा आर्थिक प्रलोभनमा परी म्याच फिक्सिङ गरेको आरोपमा तीन वर्षअघि २०७४ असोजमा नेपाल प्रहरीको अपराध अनुसन्धान महाशाखाले तात्कालिन कप्तान सागर थापासहित ६ खेलाडीहरुलाई पक्राउ गरेको थियो । अफगानिस्तान तथा बंगलादेशसँगका अन्तराष्ट्रिय स्पर्धाहरुमा म्याच फिक्सिङ गरी पराजित भएको आरोपमा पक्राउ परेका उनीहरुले त्यो कसुर स्वीकार गरे पनि कानूनको अभावका कारण उनीहरुमाथि कारबाही हुन सकेको थिएन । उनीहरुविरुद्ध त्यसबेला राज्यविप्लवको कसुर गरेको आधारमा मुद्दा चलेको थियो तर उनीहरुको अपराधमा राज्यविप्लवको अवस्था नदेखिएको भन्दै गत जेठमा विशेष अदालतले उनीहरुलाई सफाई दिएको थियो । उनीहरुलाई राष्ट्रिय खेलबाट अवकाश दिइएको थियो भने विश्व फुटबल महासंघ (फिफा)ले उनीहरुविरुद्ध आजीवन प्रतिबन्ध भने लगाएको थियो । यो ऐनमा कडा सजायको व्यवस्था गरिए पनि आजीवन प्रतिवन्धको व्यवस्था भने गरिएको छैन ।
