कोडसेयर साझेदारीको कमाल, पोखराबाटै दुबई हुँदै १४३ देश पुग्न सकिने
राम थापा गण्डकी । फ्लाइ दुबईले आगामी असोज ७ गतेदेखि पोखरा/दुबई सिधा उडान सेवा सुरु गर्दैछ । विश्वव्यापी हवाई ट्रान्जिट हब दुबईसम्मको सिधा उडानले पोखरालाई अन्तर्राष्ट्रिय हवाई सञ्जालमा जोड्ने छ । सञ्चालनमा आएको तीन वर्ष बितिसक्दासमेत पोखरा अन्तर्राष्ट्रिय विमानस्थलबाट नियमित अन्तरदेशीय उडान हुन सकेको थिएन । सन् २०२५ को मार्चमा हिमालय एयरलाइन्सले पहिलोपटक पोखरा–ल्हासा नियमित व्यावसायिक उडान सुरू गरे पनि यात्रु सङ्ख्या न्यून हुँदा उक्त उडान सेवा हाल स्थगन छ । पोखरा–दुबई उडान पोखरा अन्तरराष्ट्रिय विमानस्थलबाट हुन लागेको दोस्रो व्यावसायिक उडान हो । यसअघि चीन, भारत र भुटानका विभिन्न गन्तव्यमा चार्टर उडान भने हुँदै आएको थियो । पोखरा अन्तरराष्ट्रिय विमानस्थलका महाप्रबन्धक जगन्नाथ निरौलाले दुबई–पोखरा–दुबईको उडान तालिका स्वीकृत भएसँगै फ्लाई दुबईले टिकट बुकिङ खुला गरिसकेको बताए । 'पोखराको अन्तरराष्ट्रिय हवाई पहुँच विस्तारमा यो महत्वपूर्ण उपलब्धि हो, यसले सिङ्गो गण्डकी प्रदेश र मुलुकलाई नै प्रत्यक्ष लाभ पुग्छ', उनले भने, 'पोखरादेखि दुबई भएर युरोप, अमेरिकालगायत विभिन्न गन्तव्य मुलुकमा जाने यात्रुलाई धेरै सहजता थपिन्छ, यात्राअवधि छोटिँदा खर्च पनि घट्छ ।' पर्यटकीय राजधानीसमेत रहेको पोखरासहित यहाँका पर्यटकीय क्षेत्रको घुमफिरका लागि विदेशी पर्यटकहरु सिधैँ पोखरा आउन सक्ने महाप्रबन्धक निरौलाले बताए । वैदेशिक राजगोरी, अध्ययन, घुमफिर आदिका लागि अरब मुलुकसहित अन्य देशमा जाने यात्रु तथा सर्वसाधारणका लागि पोखरा–दुबई उडान सेवा लाभदायी हुने देखिएको छ । विश्वकै व्यस्त र महत्वपूर्ण मानिने हवाई ट्रान्जिट हब दुबईमा हुने उडानले अन्तरराष्ट्रिय क्षेत्रमा पोखराको सिधा हवाई पहुँच पुग्ने पोखरा महानगरपालिकाका प्रमुख धनराज आचार्यले बताए । उनका अनुसार फ्लाइ दुबई र इमिरेट्स एयरलाइन्सबीच रणनीतिक कोडसेयर साझेदारीअन्तर्गत पोखरा–दुबई उडान सेवा सञ्चालन हुनेछ । पोखरादेखि अष्ट्रेलिया, युरोप वा अमेरिकी सहरहरुमा पुग्ने यात्रुहरुले एउटै टिकटबाट यात्रा गर्न सक्ने र गन्तव्यसम्म पुग्दा कुनै झण्झट नुहने प्रमुख आचार्यले बताए । इमिरेट्स एयरलाइन्सले दुबई अन्तरराष्ट्रिय विमानस्थलको टर्मिनल ३ लाई आफ्नो प्रमुख हब बनाएर विश्वका छ वटा महादेशका ७६ देशमा रहेका १४३ भन्दाबढी देशहरुमा जोड्दै आएको उनको भनाइ छ । पोखरा अन्तरराष्ट्रिय विमानस्थलका महाप्रबन्धक निरौलाले एयरलाइन्सहरुबीच हुने कोडसेयर साझेदारीले यात्रुको ट्रान्जिटलाई सहज बनाउने बताए । 'पोखरादेखि दुबई हुँदै अन्य देशमा जाने यात्रुहरु एउटै टिकटबाट यात्रा गर्न सक्छन्, लगेज आफैँ सार्नुपर्ने झण्झट पनि हुँदैन', उनले भने, 'दुबईसम्म एउटा विमानले यात्रु बोक्छ, त्यहाँ ट्रान्जिटपछि अर्को विमानले गन्तव्यमा पुर्याउँछ ।' पोखरा–दुबई उडानका लागि गत जेठ २५ गते नेपाल नागरिक उड्डयन प्राधिकरणले फ्लाई दुबईलाई अनुमति दिएको थियो । त्यसअघि फ्लाई दुबईको टोलीले पोखरा अन्तरराष्ट्रिय विमानस्थलको उच्चस्तरीय सुरक्षा, सेफ्टी तथा सञ्चालनसम्बन्धी निरीक्षण गरेको थियो । सरकारले आगामी आव २०८३/८४ को नीति तथा कार्यक्रममा पोखरा अन्तरराष्ट्रिय विमानस्थलमा अन्तरराष्ट्रिय वायुसेवा प्रदायकलाई आकर्षित गर्न कूटनीतिक पहल गर्ने जनाएको केही समयमै फ्लाई दुबईले उडान अनुमति पाएको हो । विमानस्थलका महाप्रबन्धक निरौलाले पोखराबाट उडान सेवा सुरु गर्न एयर अरेबियाले चासो देखाएको बताए । 'पोखराबाट अन्तरराष्ट्रिय उडान सञ्चालनको दिगोपनाका लागि निजी क्षेत्रलगायत सबै पक्षको सकारात्मक सहयोगको खाँचो छ', उनले भने, 'पोखराबाट नियमित अन्तरराष्ट्रिय उडान हुँदा मुलुकको पर्यटन र अर्थतन्त्रमा ठूलो टेवा पुग्छ, सर्वसाधारण यात्रुहरुले सहज सुविधा पाउँछन् ।' पोखरा अन्तरराष्ट्रिय विमानस्थल नेपालको तेस्रो अन्तरराष्ट्रिय हवाई प्रवेशद्वारका रहेको छ । काठमाडौं केन्द्रित रहेको हवाई चापलाई विकेन्द्रीकरणसँगै पर्यटन प्रवर्द्धन र आर्थिक गतिविधिका लागि पोखरा अन्तरराष्ट्रिय विमानस्थलबाट नियमित अन्तरदेशीय उडान हुनुपर्ने आवाज उठ्दै आएको छ । दुबईसँग प्रत्यक्ष हवाई सम्पर्क स्थापित हुँदा मध्यपूर्व, युरोप, अफ्रिका लगायतका ३०० भन्दा बढी सहरहरूसँग पोखराको पहुँच पुग्ने जनाइएको छ । झण्डै २२ अर्ब रुपैयाँ ऋणमा बनेको यस विमानस्थल हाल आन्तरिक उडानमा मात्र सीमित छ । सन् २०२३ को जनवरी १ मा यस विमानस्थलको उद्घाटन गरिएको थियो । स्वदेशी वायुसेवा प्रदायक कम्पनीले पोखरा अन्तरराष्ट्रिय विमानस्थलबाट सङ्घीय राजधानी काठमाडौं, भरतपुर, भैरहवालगायतका गन्तव्यमा आन्तरिक उडान गर्दै आएका छन् । पोखरामा अन्तरराष्ट्रिय विमानस्थल बनाउने ५० वर्षअघिको योजनाले सार्थकता पाए पनि विमानस्थल पूर्ण रूपमा सञ्चालनमा आउन सकेको छैन । अन्तरराष्ट्रिय विमानस्थल बनेपछि ठूलो सङ्ख्यामा विदेशी पर्यटक भित्रने आशमा रहेका पर्यटन व्यवसायी विमानस्थलबाट नियमित अन्तरराष्ट्रिय उडानको पर्खाइमा छन् । पोखरा–दुबई सिधा उडानले पोखरा र सिङ्ग्रो गण्डकी प्रदेशको आर्थिक समृद्धिको ढोका खुल्ने उद्योग वाणिज्य महासङ्घ, गण्डकीका अध्यक्ष नरेश कँडेलले बताए । 'गण्डकी प्रदेशबाट मध्यूपूर्वका देशदेखि युरोप, अमेरिकासम्म रोजगार र अध्ययनका लागि जानेको सङ्ख्या ठूलो छ', उनले भने, 'पोखरा–दुबई उडानले ती यात्रुलाई घर आउन सहज र कम खर्चिलो बन्नेछ, पोखरालगायत आसपासका गन्तव्यमा आउने पर्यटक अब सिधैँ पोखरा आउन पाउँछन् ।' रासस
ट्रम्प र मेलोनीबीचको विवाद के हो ?
काठमाडौं । अमेरिकी राष्ट्रपति डोनाल्ड ट्रम्प र इटालीकी प्रधानमन्त्री जर्जिया मेलोनीबीचको विवादले झन् जटिल रूप लिएको छ । डोनाल्ड ट्रम्पले फेरि एकपटक मेलोनीको आलोचना गरेका हुन् । ट्रम्पले अनुसार अमेरिकाले दशकौंदेखि इटालीको रक्षा गर्दै आएको छ, तर जब परीक्षाको घडी आउँछ, तब उनीहरू अमेरिकाको साथमा हुँदैनन् । डोनाल्ड ट्रम्पले ट्रुथ सोसलमा सोमबार लेखेका छन्, ‘नेटोमा खर्बौं डलर खर्च गरेपछि पनि इटाली र त्यहाँकी प्रधानमन्त्री इरानको आणविक खतरालाई लिएर हाम्रो साथमा उभिने सोचसमेत राख्दैनन् ।’ ‘दशकौंदेखि हामी उनीहरूको रक्षा गर्छौं, तर जब परीक्षाको समय आउँछ, तब उनीहरू हाम्रो र संसारको रक्षाका लागि उपस्थित हुँदैनन् यो राम्रो होइन,’ उनले थपे । ट्रम्प र मेलोनीबिचको यो पछिल्लो विवादलाई बुझ्नका लागि केही समय अगाडिका घटनाक्रम र दुई देशबीचको बदलिँदो भू-राजनीतिक सम्बन्धलाई हेर्नुपर्ने हुन्छ । वैचारिक रूपमा दक्षिणपन्थी विचारधाराका कारण यी दुई नेताबीच पहिले निकटता देखिने गरेको थियो, तर सत्तामा आएपछि मेलोनीले इटालीको राष्ट्रिय स्वार्थ र युरोपेली संघ (ईयू) सँगको सन्तुलित सम्बन्धलाई प्राथमिकतामा राखिन्, जसले ट्रम्पको अपेक्षा अनुसारको ‘पूर्ण समर्थन’ पाउन सकेन । ट्रम्पको लामो समयदेखिको गुनासो भनेकै युरोपेली देशहरूले नेटोमा पर्याप्त रक्षा खर्च नगरेको र अमेरिकाले सुरक्षाको बोझ बोकिरहेको भन्ने हो । यही कारणले उनले पटक–पटक इटाली जस्ता देशहरू संकटको घडीमा आफ्नो साथमा नउभिएको आरोप लगाउँदै आएका छन् । यसपटकको विवादको मुख्य कारक भने ‘फोटो डिप्लोमेसी’ बनेको छ । ट्रम्पले एउटा इटालेली टेलिभिजनमा जी–७ सम्मेलनको प्रसङ्ग कोट्याउँदै मेलोनीले आफूसँग तस्बिर खिचाउन अनुरोध/बिन्ती गरेको दाबी गरेपछि परिस्थिति एकाएक तातियो । यो टिप्पणी मेलोनीका लागि आफ्नो प्रतिष्ठामाथिको प्रहार थियो, जसका कारण उनले तुरुन्तै भिडिओ सन्देश जारी गरी ट्रम्पको दाबी ‘पूर्ण रूपमा मनगढन्ते’ रहेको भन्दै खण्डन गरिन् । यसले दुई नेताको व्यक्तिगत सम्बन्धमा मात्र नभई कूटनीतिक स्तरमै चिसोपना ल्याइदियो, जसको परिणामस्वरुप इटालीका विदेशमन्त्री एन्टोनियो तायानीले आफ्नो नियोजित अमेरिका भ्रमण नै रद्द गरे । विशेषगरी, इरानको आणविक मुद्दा र मध्यपूर्वको रणनीतिमा अमेरिकाले खोजेको जस्तो साथ युरोपेली देशहरूबाट नपाउनु नै ट्रम्पको पछिल्लो आक्रोशको वास्तविक राजनीतिक पृष्ठभूमि रहेको अन्तर्राष्ट्रिय सञ्चारमाध्यमहरूले जनाएका छन् ।
गाडीमा सिट मिलाइदिने १० विचौलिया पक्राउ
काठमाडौं । काठमाडौंको कोटेश्वरबाट प्रहरीले १० जना बिचौलियाहरूलाई पक्राउ गरेको छ । पूर्व जाने गाडीमा सिट मिलाइदिने भन्दै यात्रु तानातान गरेर हैरानी दिएको आरोपमा उनीहरूलाई पक्राउ गरिएको उपत्यका ट्राफिक प्रहरी कार्यालयका एसपी नरेश सुवेदीले जानकारी दिए । धनुषा घर भएका ४० वर्षीय सूर्यबहादुर देवकोटा, दोलखा घर भएका ३२ वर्षीय प्रकाश सिवाकोटी, २६ वर्षीय खड्कबहादुर तामाङ, भक्तपुरका ५५ वर्षीय हरिभजन थापा, ३८ वर्षीय डिल्लीप्रसाद लामिछाने, सिन्धुपाल्चोकका २८ वर्षीय सुरेश तामाङ, सिन्धुलीका २७ वर्षीय तिलक कुमार थापा, डोरकुमार श्रेष्ठ, ओखलढुङ्गाका ४५ वर्षीय नन्दलाल बुढाथोकी र सिन्धुपाल्चोकका ३६ वर्षीय राजेश सापकोटा रहेका छन् । कोटेश्वरबाट जनकपुर र महोत्तरी लगायतका स्थानमा जाने ईभी माइक्रो र सुमोमा उनीहरूले कमिसन लिएर यात्रु चढाउने र यात्रुलाई हैरानी दिने गरेको आरोप छ । उनीहरूलाई थप अनुसन्धान र कारबाहीका लागी जिल्ला प्रहरी परिसर काठमाडौँमा पठाइएको एसपी सुवेदीले बताए ।
डिजो ओटीटीले बढायो दायरा, नेपाली सामग्री विश्व बजारमा
काठमाडौं । नेपालमा डिजिटल मनोरञ्जन क्षेत्रलाई थप सुदृढ बनाउने उद्देश्यसहित ‘डिजो ओटीटी’ले आफ्नो सेवा विस्तारलाई अन्तर्राष्ट्रिय स्तरमा पुर्याएको जनाएको छ । कम्पनीले आधिकारिक रूपमा विश्वव्यापी ओटीटी स्ट्रिमिङ अधिकार प्राप्त गर्दै डिजिटल सामग्री वितरणमा नयाँ उपलब्धि हासिल गरेको हो । डिजिटल प्लेटफर्ममार्फत चलचित्र, वेब सिरिज, टेलिभिजन कार्यक्रम, खेलकुद तथा विविध मनोरञ्जन सामग्री दर्शकमाझ सहज रूपमा उपलब्ध गराउँदै आएको कम्पनीले अब अन्तर्राष्ट्रिय बजारमा समेत आफ्नो उपस्थितिलाई बलियो बनाउने लक्ष्य लिएको जनाएको छ । डिजो ओटीटी ‘डिजहोम डिजिटल प्रा.लि.’ अन्तर्गत सञ्चालनमा रहेको प्लेटफर्म हो। कम्पनीले नेपाल सरकार तथा सञ्चार तथा सूचना प्रविधि मन्त्रालय अन्तर्गत आवश्यक अनुमति प्राप्त गरी कानुनी रूपमा सेवा सञ्चालन गर्दै आएको स्पष्ट पारेको छ । कम्पनीका अनुसार अन्तर्राष्ट्रिय डिजिटल सामग्री वितरणका लागि आवश्यक मापदण्ड पूरा गर्दै यसले नेपाली डिजिटल मनोरञ्जन उद्योगलाई विश्व बजारसँग जोड्ने आधार तयार गरेको छ । आगामी दिनमा अत्याधुनिक प्रविधि, उत्कृष्ट प्रयोगकर्ता अनुभव तथा गुणस्तरीय सामग्रीमार्फत दर्शकलाई विश्वस्तरको सेवा प्रदान गर्ने प्रतिबद्धता कम्पनीले जनाएको छ ।
होटल तथा रिसोर्टलाई आईपीओ ल्याउन सकस, २ वर्षदेखि सेबोनमै अड्किए फाइल
काठमाडौं । होटल र पर्यटन व्यवसाय क्षेत्रसँग सम्बन्धित झण्डै एक दर्जन होटल तथा रिर्सोटहरू सेयर निष्कासनका लागि लामो अवधिदेखि नेपाल धितोपत्र बोर्ड (सेबोन) को अनुमति पर्खिरहेका छन् । एपेक्स हस्पिटालिटी, अकामा होटल, ठमेल प्लाजा होटल एण्ड स्वीट्स (रामाडा एन्कोर), वर्णवास म्युजिएम होटल, नगरकोट रिर्सोट, होटल सव्रिनालगायत झण्डै एक दर्जन होटल तथा रिर्सोट आइपिओ निष्काशनको लागि २/३ वर्षदेखि पर्खिरहेका हुन् । बोर्डले ती होटल तथा रिर्सोटलाई आईपीओ निष्कासनका लागि अनुमति दिनुको साटोमा थप कागजात, पुनः आवेदन तथा कम्प्लाइन्स प्रतिवेदन माग गरेको देखिएको छ । एपेक्स हस्पिटालिटीले प्रतिसेयर २२ लाख ५० हजार कित्ता सेयर निष्कासनको लागि २०८० असार २२ गते आवेदन दिएको थियो । कम्पनीले कम्पनीले २२ करोड ५० लाख रुपैयाँ बराबरको आईपीओ निष्कासन गर्न प्रस्ताव गरेको छ । यसको बिक्री प्रबन्धक हिमालयन क्यापिटल लिमिटेड रहेको छ । बोर्डले २०८२ चैत्रमा पत्रको जवाफ दिँदै कम्पनीसँग थप कागजात तथा कम्प्लायन्स प्रतिवेदन माग गरेको छ । अकामा होटलले २०८१ असार २६ गते ४२ लाख ८५ हजार ८०० कित्ता सेयर निष्कासनको बोर्डमा निवेदन दिएको थियो । होटलले ४२ करोड ८५ लाख ८० हजार रुपैयाँ बराबरको आईपीओ निष्कासनको लागि सानिमा क्यापिटल लिमिटेड बिक्री प्रबन्धक रहेको छ । बोर्डले २०८२ असारमा कम्पनीलाई इस्यु साइज कुल चुक्ता पुँजीको २० प्रतिशत पुर्याउने सम्बन्धमा थप विवरण उपलब्ध गराउन भन्दै जवाफ दिएको देखिन्छ । त्यस्तै, थमेल प्लाजा होटल एन्ड सुइट्सले २२ लाख ५० हजार कित्ता आईपीओ निष्कासनका लागि २०८१ कात्तिक २१ गते आवेदन दिएको थियो । २२ करोड ५० लाख रुपैयाँ बराबरको उक्त आईपीओको बिक्री प्रबन्धक नेपाल एसबिआई मर्चेन्ट बैंकिङ लिमिटेड रहेको छ । नियामक बोर्डले २०८२ चैत्र ८ गते कम्पनीको प्रतिसेयर नेटवर्थ ९० रुपैयाँभन्दा बढी रहेकाले पुनः आवेदन तथा कम्प्लायन्स प्रतिवेदन माग गरिएको देखिन्छ । वर्णवास म्युजियम होटलले ३९ लाख ६० हजार कित्ता सेयर निष्कासनका लागि २०८१ मंसिर १९ गते आवेदन दिएको थियो । ३९ करोड ६० लाख रुपैयाँ बराबरको आईपीओको बिक्री प्रबन्धक हिमालयन क्यापिटल लिमिटेड रहेको छ । कम्पनीलाई बोर्डले इस्यु साइज चुक्ता पुँजीको ३६ प्रतिशत पुर्याउने विषयमा अद्यावधिक विवरण पेश गर्न भनिएको छ । त्यसैगरी, नगरकोट रिसोर्टले १५ लाख कित्ता सेयर निष्कासनका लागि २०८२ साउन १५ गते आवेदन दिएको छ । १५ करोड रुपैयाँ बराबरको आईपीओका लागि एनएमबी क्यापिटल लिमिटेड बिक्री प्रबन्धक रहेको छ । कम्पनीले बोर्डको पत्रअनुसार कम्प्लायन्स प्रतिवेदन पेश गरेको छ । होटल सब्रिनाले ४७ लाख ४ हजार कित्ता सेयर निष्कासनका लागि २०८२ भदौ १६ गते आवेदन दिएको छ । ४७ करोड ४ लाख रुपैयाँ बराबरको आईपीओ निष्काशनको लागि आवेदन दिएको हो । कम्पनीको बिक्री प्रबन्धक एनआईसी एशिया क्यापिटल लिमिटेड रहेको छ । कम्पनीले २०८२ मंसिर ३ गते अद्यावधिक विवरणसहित कम्प्लायन्स प्रतिवेदन बुझाएको छ । स्वर्णिम होटल (होलिडे इन एक्सप्रेस)ले ३८ लाख कित्ता सेयर निष्कासनका लागि २०८२ भदौ १६ गते आवेदन दिएको थियो । ३८ करोड रुपैयाँ बराबरको उक्त आईपीओको बिक्री प्रबन्धक ग्लोबल आइएमई क्यापिटल रहेको छ । कम्पनीले २०८२ भदौ २८ गते कम्प्लायन्स प्रतिवेदन पेश गरेको छ । त्यसैगरी, होटल इच्छाले ३५ लाख कित्ता सेयर निष्कासनको लागि बोर्डमा २०८२ माघ २० गते आवेदन दिएको थियो । ३५ करोड रुपैयाँ बराबरको आईपीओ निष्कासन गर्न प्रस्ताव गरेको छ । उक्त होटलले पनि बोर्डको पत्रअनुसार कम्प्लायन्स प्रतिवेदन पेश गरेको छ । अतिथि रिसोर्ट एन्ड स्पाले १६ लाख २५ हजार कित्ता सेयर निष्कासनको लागि बोर्डमा २०८२ माघ २० गते आवेदन दिएको थियो । १६ करोड २५ लाख रुपैयाँ उक्त आईपीओको बिक्री प्रबन्धक प्रभु क्यापिटल लिमिटेड रहेको छ । त्यसैगरी, एसियन होटलले ४२ लाख कित्तम सेयर निष्कासनको लागि २०८२ माघ २० गते बोर्डमा अनुमति मागेको थियो । कम्पनीले ४२ करोड रुपैयाँ बराबरको सेयर निष्कासनको लागि बोर्डमा अनुमति मागेको हो । उक्त सेयरको बिक्री प्रबन्धकमा मुक्तिनाथ क्यापिटल रहेको छ । उक्त कम्पनीले बोर्डको पत्रअनुसार कम्प्लायन्स प्रतिवेदन पेश गरेको छ । होटल पार्क ल्यान्डले १५ लाख कित्ता सेयर निष्कासनको लागि २०८२ फागुन ५ गते आवेदन दिएको थियो । १५ करोड रुपैयाँ बराबरको उक्त आईपीओको बिक्री प्रबन्धक सिटिजन्स क्यापिटल रहेको छ । बुढानीलकण्ठ हेरिटेजले ४९ लाख ५० हजार कित्ता सेयर निष्कासनका लागि २०८२ चैत्र १६ गते बोर्डमा आवेदन दिएको थियो । ४९ करोड रुपैयाँ बराबरको उक्त आईपीओको लागि बिक्री प्रबन्धक ग्लोबल आईएमई क्यापिटल रहेको छ । यही वर्ष अर्थात २०८३ वैशाख १ गते डोलेश्वर भिलेज रिसोर्ट एन्ड फार्म हाउसले १६ लाख कित्ता आईपीओ निष्कासनको लागि आवेदन दिएको छ । कम्पनीले १६ करोड २० लाख रुपैयाँ बराबरको आईपीओ निष्काशनको लागि बोर्डमा निवेदन दिएको हो । आईपीओ निष्कासनको बिक्री प्रबन्धकमा सिटिजन्स क्यापिटल रहेको छ । केटीएम हस्पिटालिटीले पनि २०८३ वैशाख १ गते १५ लाख ५० हजार रुपैयाँ बराबरको आईपीओ निष्कासनको लागि बोर्डमा अनुमति मागेको छ । १५ करोड ५० लाख रुपैयाँ बराबरको आईपीओको लागि बिक्री प्रबन्धक आरबिबि मर्चेन्ट बैंकिङ रहेको छ।
टक्सार पिखुवा र याम्बालिङ हाइड्रोको सेयर मूल्य १५ प्रतिशतले बढ्यो
काठमाडौं । सोमबार सेयर बजारमा सामान्य अकंको गिरावट आएको छ । नेपाल स्टक एक्सचेन्ज (नेप्से) परिसूचक १.४६ अंकले घटेर २७०० बिन्दुमा झरेको छ । नेप्सेका अनुसार ११६ कम्पनीको सेयर मूल्य बढ्दा १४३ कम्पनीको सेयर मूल्य घटेको छ । १४ कम्पनीको सेयर मूल्यमा भने कुनै परिवर्तन आएको छैन । आज २ कम्पनीको सेयर मूल्यमा सकारात्मक सर्किट लागेको छ । टक्सार पिखुवा र याम्बालिङ हाइड्रोपावरेको सेयर मूल्य १५ प्रतिशतले बढेको छ । सोमबार ३५३ कम्पनीको ८१ लाख कित्ता सेयर किनबेच हुँदा ४ अर्ब ४४ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार सोपन फर्मास्युटिकल्सको भएको छ । सोपनको ३७ करोड रुपैयाँ बराबरको कारोबार भएको छ । साथै एनआरएन इन्फाइस्ट्रक्चरको ३० करोड, १०.२५ प्रतिशत एनबीबीएलको २८ करोड, स्वाबलम्बनको २० करोड र आँखु खोलाको १७ करोड रुपैयाँ बराबरको कारोबार भएको छ ।
रास्वपाको महाधिवेशन एक दिन लम्बिन सक्ने
काठमाडौं । राष्ट्रिय स्वतन्त्र पार्टी (रास्वपा) को प्रथम महाधिवेशन निर्धारित कार्यतालिकाभन्दा पछाडि धकेलिँदै गएपछि महाधिवेशन एक दिनसम्म लम्बिन सक्ने संकेत देखिएको छ । सोमबार बन्दसत्र सुरु हुन ढिलाइ भइरहेका बेला सञ्चारकर्मीसँग कुरा गर्दै पार्टीका प्रवक्ता मनिष झाले महाधिवेशन निर्धारित समयभन्दा एक दिन लम्बिन सक्ने सम्भावना रहेको जानकारी दिए । उनका अनुसार विभिन्न प्राविधिक तथा व्यवस्थापकीय कारणले कार्यक्रम प्रभावित हुन सक्ने विषयमा महाधिवेशनअघि बसेको केन्द्रीय समिति बैठकमै छलफल गरिएको थियो । ‘बन्दसत्र ढिला भएर हामी आत्तिएका छैनौं । यसलाई स्वाभाविक रूपमा लिएका छौं । यस्ता सम्भावनाका कारण महाधिवेशन एक दिन लम्बिन सक्छ भन्ने विषयमा अस्ति केन्द्रीय समितिको बैठकमै चर्चा भएको थियो । त्यसैले हामी मानसिक रूपमा तयार छौं,’ झाले भने । रास्वपाले सार्वजनिक गरेको कार्यतालिकाअनुसार सोमबार बिहान ८ बजेदेखि बन्दसत्र सुरु हुने कार्यक्रम रहे पनि प्रतिनिधि व्यवस्थापन, दाबी–विरोध तथा नेतृत्व चयनसम्बन्धी आन्तरिक छलफलका कारण निर्धारित समयमा कार्यक्रम अगाडि बढ्न सकेको छैन । यसैबीच, महाधिवेशन प्रतिनिधिको संख्या पनि अपेक्षाभन्दा बढेको रास्वपाले जनाएको छ । प्रवक्ता झाले सोमबार बिहानसम्म करिब ४ हजार ३ सय प्रतिनिधि दर्ता भएको जानकारी प्राप्त भएको बताए । प्रतिनिधिको संख्या बढेसँगै व्यवस्थापन र प्रक्रियागत काममा थप समय लागेको उनको भनाइ छ । चितवनको भरतपुरमा जारी रास्वपाको पहिलो महाधिवेशनबाट नयाँ नेतृत्व चयनका साथै भावी राजनीतिक कार्यदिशाबारे महत्वपूर्ण निर्णय हुने अपेक्षा गरिएको छ । महाधिवेशनको कार्यसूची प्रभावित भए पनि नेतृत्व भने प्रक्रिया सम्पन्न गरेर मात्रै कार्यक्रम टुंग्याउने तयारीमा रहेको छ ।
प्रधानमन्त्रीले हात्ती प्रजनन केन्द्रको गरे निरीक्षण
चितवन । प्रधानमन्त्री बालेन्द्र शाहले सौराहास्थित हात्ती प्रजनन तथा तालिम केन्द्र खोरसोरको सोमबार निरीक्षण गरेका छन् । प्रजनन केन्द्रका प्रमुख मणिपुरण चौधरीका अनुसार सपरिवार प्रधानमन्त्री शाह तालिम केन्द्र पुगेका हुन् । खोरसोरस्थित तालिम केन्द्रमा अहिले नौ वटा माउ र सात वटा हात्तीका छावा रहेका छन् । राष्ट्रिय स्वतन्त्र पार्टीका वरिष्ठ नेतासमेत रहेका प्रधानमन्त्री शाह पार्टीको पहिलो राष्ट्रिय महाधिवेशनमा भाग लिने क्रममा चितवनमा छन् ।
