हराएका ५० दुईपाङ्ग्रे सवारी साधन फेला पारी धनीलाई हस्तान्तरण
काठमाडौं । काठमाडौं उपत्यकामा विभिन्न मिति र समयमा चोरी भएका ५० ओटा दुईपाङ्ग्रे सवारी साधन खोजतलास गरी ट्राफिक प्रहरीले शुक्रबार सम्बन्धित धनीलाई हस्तान्तरण गरेको छ । काठमाडौं उपत्यका ट्राफिक प्रहरी कार्यालयमा आयोजित एक कार्यक्रमका बिच कार्यालय प्रमुख प्रहरी वरिष्ठ उपरीक्षक सुरेश प्रसाद काफ्लेले २५ ओटा स्कुटर र २५ ओटा मोटरसाइकल सम्बन्धित धनीहरूलाई हस्तान्तरण गरेका हुन् । काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेश राज सुवेदीका अनुसार चालू आर्थिक वर्षमा खोजतलासका क्रममा ३०३ ओटा सवारी साधनहरू फेला पारी धनीलाई बुझाई सकिएको छ । यस्तै मोटरसाइकल चोरीमा संलग्न रहेको आशङ्कामा ३४ जनालाई पक्राउ गरी थप कारबाहीका लागि जिल्ला प्रहरी परिसरहरूमा पठाइएको छ भने ३ ओटा चारपाङ्ग्रे र २ ओटा मोटरसाइकल कारबाहीका लागि भन्सार कार्यालयमा पठाइएको छ । सडक सञ्जालको विकाससँगै मानिसको जीवनमा दुईपाङ्ग्रे सवारी साधन नै सबैभन्दा लोकप्रिय र प्रभावकारी बनेको बताउँदै प्रवक्ता सुवेदीले यससँग मानिसको सपना, सङ्घर्ष र भावनात्मक सम्बन्ध जोडिने उल्लेख गरे । अर्काको सम्पत्ति र खुसी खोसेर आपराधिक कार्य गर्नेहरूमाथि निर्मम कानुनी कारबाही गरिने र त्यसका लागि प्रहरीले मानवीय जनशक्तिसहित प्रविधिको उच्चतम प्रयोग गरी निगरानी बढाएको उनको भनाइ थियो । उनले व्यक्तिगत सतर्कता, प्रविधिको प्रयोग र भौतिक सुरक्षाको संयोजनबाट नै सवारी साधन चोरी नियन्त्रण गर्न सकिने स्पष्ट पारे । ट्राफिक प्रहरीले सवारी साधन चोरी तथा हराउनबाट जोगाउन सुरक्षित स्थानमा मात्र पार्किङ गर्न, ह्यान्डिल लक, डिस्क लक, जिपिएस र सुरक्षा साइरनहरू जडान गर्न तथा एकान्त स्थानमा पार्किङ नगर्न सर्वसाधारणलाई आग्रह गरेको छ । सवारी साधन हराएमा ट्राफिक प्रहरीको हटलाइन नम्बर १०३, नेपाल प्रहरीको हटलाइन १०० वा नजिकैको प्रहरी कार्यालयमा तत्काल जानकारी गराउन सकिने प्रहरीले जनाएको छ ।
कोप-३१ मा सबै वर्गको सहभागिता सुनिश्चित गर्न सरकार प्रतिबद्ध: मन्त्री चौधरी
काठमाडौं । कृषि, वन तथा पर्यावरणमन्त्री गिता चौधरीले संयुक्त राष्ट्रसंघीय जलवायु परिवर्तनसम्बन्धी पक्ष राष्ट्रहरूको ३१औँ सम्मेलन (कोप-३१) मा युवा, जेन्जी पुस्ता, महिला, आदिवासी जनजाति तथा अपाङ्गता भएका व्यक्तिहरूको समान र अर्थपूर्ण सहभागिता सुनिश्चित गर्ने विषयमा सरकार सचेत रहेको बताएकी छन् । कोप-३१ को तयारी तथा नेपालको सहभागिताका विषयमा नागरिक समाजका प्रतिनिधिहरूसँग भएको छलफलमा मन्त्री चौधरीले जलवायु परिवर्तनसम्बन्धी अन्तर्राष्ट्रिय मञ्चमा सबै वर्ग, समुदाय र समूहको आवाज समेटिनुपर्ने बताइन् । उनले भनिन्, ‘कोप-३१ को तयारी तथा नेपालको सहभागिताका विषयमा नागरिक समाजका प्रतिनिधिहरूसँग भएको छलफलमा मैले जलवायु परिवर्तनसम्बन्धी अन्तर्राष्ट्रिय मञ्चमा सबै वर्ग, समुदाय र समूहको आवाज समेटिनुपर्नेमा जोड दिएँ ।’ छलफलका क्रममा नागरिक समाजका प्रतिनिधिहरूले कोप-३१ मा युवा, जेन्जी पुस्ता, महिला, आदिवासी जनजाति तथा अपाङ्गता भएका व्यक्तिहरूलाई समान रूपमा सहभागी गराउनुपर्ने सुझाव दिएका थिए । जलवायु परिवर्तनको असर प्रत्यक्ष रूपमा भोगिरहेका समुदायको सवाल र आवाजलाई अन्तर्राष्ट्रिय मञ्चमा प्रभावकारी रूपमा उठाउन उनीहरूको अर्थपूर्ण प्रतिनिधित्व आवश्यक रहेको उनीहरूको भनाइ थियो । प्रतिनिधिहरूको सुझावलाई सम्बोधन गर्दै मन्त्री चौधरीले जलवायु परिवर्तनका मुद्दामा सबैको सहभागिता र प्रतिनिधित्व महत्वपूर्ण रहेको उल्लेख गरिन् । कोप-३१ मा नेपालको सहभागितालाई समावेशी बनाउँदै प्रभावित समुदायका सवाललाई प्राथमिकताका साथ उठाउने विषयमा आफू गम्भीर रहेको उनले बताइन् । छलफलमा कोप-३१ मा नेपालको प्राथमिकता, जलवायु न्याय, जलवायु वित्त, हिमाल संरक्षण तथा जलवायु परिवर्तनबाट प्रभावित समुदायका मुद्दालाई अन्तर्राष्ट्रिय तहमा प्रभावकारी रूपमा प्रस्तुत गर्ने विषयमा समेत छलफल भएको थियो ।
पोखरालाई ३० रनले पराजित गर्दै तालिकाको तेस्रो स्थानमा उक्लियो चितवन राइनोज
काठमाडौं । नेपाल प्रिमियर लिग (एनपीएल) मा बलरहरूको उत्कृष्ट प्रदर्शनको मद्दतले चितवन राइनोजले पोखरा एभेन्जर्सलाई ३० रनले पराजित गरेको छ । कीर्तिपुरस्थित टीयू अन्तर्राष्ट्रिय क्रिकेट मैदानमा सम्पन्न खेलमा चितवनले दिएको १५२ रनको लक्ष्य पछ्याएको पोखरा १९ ओभरमा १२१ रनमै अलआउट हुन पुग्यो । यो जितसँगै चार खेलबाट ५ अंक जोड्दै चितवन तालिकाको तेस्रो स्थानमा उक्लेको छ भने लगातार चौथो हार व्यहोरेको पोखरा अंकविहीन रहँदै तालिकाको पुछारमा सीमित बनेको छ । तुलनात्मक रूपमा मध्यम लक्ष्य पछ्याएको पोखराको सुरुवात भने राम्रो हुन सकेन । लगातार तीन हारपछि कुशल भुर्तेलको ठाउँमा चमिका करुणारत्नेलाई नयाँ कप्तान चयन गरेको पोखराले ओपनिङ जोडीमा परिवर्तन गरे पनि त्यसले खासै काम गरेन । ओपनर कुशल भुर्तेल पहिलो ओभरमै मात्र ४ रनमा आउट भए । त्यसपछि युवराज सम्रा (१९ रन) र अर्जुन कुमालले दोस्रो विकेटका लागि ३५ रनको साझेदारी गर्दै पारि सम्हाल्ने प्रयास गरेका थिए । पोखराका लागि अर्जुन कुमालले सर्वाधिक ४५ रन (४४ बल, ३ चौका, १ छक्का) को योगदान दिए पनि अर्को छेउबाट उनलाई अन्य ब्याटरको बलियो साथ मिल्न सकेन । सदिरा समराविक्रमा (४), महेदी हसन (७), किरण ठगुन्ना (१२), अर्जुन घर्ती (१२) र कप्तान करुणारत्ने (२) सस्तैमा समेटिएपछि पोखरा लक्ष्यसम्म पुग्न सकेन । पोखरालाई १२१ रनमै रोक्न चितवनका रिजन ढकालले उत्कृष्ट बलिङ गर्दै ४ ओभरमा २४ रन दिएर ४ विकेट लिए भने कमल सिंह ऐरीले २ ओभरमा १ मेडनसहित ७ रन खर्चेर ३ विकेट चट्काए। त्यस्तै डान मोस्ले, मौसम ढकाल र कुशल मल्लले १–१ विकेट हात पारे । यसअघि टस हारेर पहिले ब्याटिङको निम्तो पाएको चितवन राइनोजले निर्धारित २० ओभरमा ६ विकेट गुमाएर १५१ रनको सम्मानजनक योगफल तयार पारेको थियो । चितवनका लागि ओपनर अर्जुन साउद (३१) र डाविड मालान (२८) ले पहिलो विकेटका लागि ६० रनको दर्बिलो साझेदारी गर्दै टोलीलाई राम्रो सुरुवात दिलाएका थिए । बीचका ओभरहरूमा डान मोस्ले (२) र मार्की खेलाडी कुशल मल्ल (११) सस्तैमा आउट भएपछि टोली केही दबाबमा परेको थियो । तर, रवि बोपारा र कप्तान सिकन्दर राजाले पाँचौँ विकेटका लागि ६० रनको महत्त्वपूर्ण साझेदारी गर्दै टोलीलाई उकासे । बोपाराले २८ बलमा ३५ रन बनाए भने आक्रामक ब्याटिङ गरेका कप्तान राजाले मात्र १६ बलमा २ चौका र ४ छक्काको मद्दतले टोलीका लागि सर्वाधिक ३७ रन जोडे । कमल सिंह ऐरी २ रनमा अविजित रहे। बलिङतर्फ पोखराका नयाँ कप्तान चमिका करुणारत्ने, विपिन खत्री र कुशल भुर्तेलले समान २–२ विकेट लिएका थिए ।
पर्यटकलाई नेपाल चिनाउन ‘भिजिट नेपाल’ अभियान सुरु
काठमाडौं । नेपाललाई विश्व पर्यटन बजारमा नयाँ ढङ्गले चिनाउने उद्देश्य सहित नेपाल सरकार, नेपाल पर्यटन बोर्ड र सामाजिक सञ्जाल प्ल्याटफर्म टिकटकको सहकार्यमा भिजिट नेपाल अभियान औपचारिक रूपमा सुरु गरिएको छ । डिजिटल प्रविधि, सिर्जनात्मक सामग्री र ऐतिहासिक महत्त्वका विषय उजागर गरी नेपालको प्राकृतिक सौन्दर्य, मौलिक संस्कृति, सम्पदा तथा विविध पर्यटकीय अनुभव विश्वभरिका दर्शकमाझ पुर्याउने लक्ष्यसहित शुक्रबारदेखि अभियान सुरु गरिएको हो । नेपाल सरकारको सहकार्यमा पर्यटन बोर्ड र टिकटकले आयोजना गरेको अभियान सुरुवात कार्यक्रममा सूचना तथा सञ्चारमन्त्री डा. विक्रम तिमिल्सिना प्रमुख अतिथि थिए । सन् २०२६ अन्त्यसम्म सञ्चालन हुने अभियानले नेपालको पर्यटन प्रवद्र्धनसँगै स्थानीय सिर्जनाकर्मी, उद्यमी, व्यवसायी तथा समुदायलाई डिजिटल अर्थतन्त्रसँग जोड्ने अपेक्षा गरिएको छ । कार्यक्रममा मन्त्री तिमिल्सिनाले डिजिटल प्ल्याटफर्मले विश्वमा पर्यटकीय गन्तव्य चिनाउने परम्परागत शैलीमा परिवर्तन ल्याएको उल्लेख गर्दै यस्ता माध्यमलाई नेपालको पर्यटन, कला, संस्कृति र उद्यमशीलता प्रवद्र्धनमा उपयोग गर्नुपर्ने बताए । ‘डिजिटल प्ल्याटफर्मले विश्वले गन्तव्यहरू पत्ता लगाउने तरिकामा परिवर्तन ल्याएका छन्, संसारको एउटा कुनाबाट साझा गरिएको कथाले अर्को कुनामा रहेको व्यक्तिलाई नेपाल भ्रमण गर्न प्रेरित गर्न सक्छ,’ उनले भने, ‘हामी टिकटकलाई नेपालको पर्यटन, संस्कृति, सिर्जनशीलता र युवालाई विश्वसँग जोड्ने सम्भावित दीर्घकालीन साझेदारका रूपमा स्वागत गर्छौं ।’ पर्यटन बोर्डका जनसम्पर्क तथा प्रचार विभाग निमित्त निर्देशक सुनिल शर्माले यस सहकार्यलाई नेपालको गन्तव्य प्रवद्र्धन रणनीतिमा नयाँ आयाम थप्ने महत्त्वपूर्ण सुरुवातका रूपमा व्याख्या गरे । अभियान अन्तर्गत युरोप, मध्यपूर्व, दक्षिणपूर्वी एसिया र दक्षिण एसियाबाट आएका नौ जना अन्तर्राष्ट्रिय ट्राभल कन्टेन्ट क्रिएटरले नेपालका विभिन्न पर्यटकीय गन्तव्य भ्रमण गरी आफ्ना अनुभव विश्वव्यापी दर्शकमाझ साझा गरिरहेका छन् । उनीहरू अक्टोबर ३० देखि नोभेम्बर ७ सम्म नेपालमा रहने कार्यक्रम छ । त्यसैगरी अभियान थप प्रभावकारी बनाउन टिकटकमा छुट्टै ‘भिजिट नेपाल’ ह्यासट्याग पेज सञ्चालनमा ल्याइएको छ । पर्यटन बोर्डले नेपाली सेलिब्रेटी तथा स्थानीय कन्टेन्ट क्रिएटरसँग टिकटकको ‘कोलाब’ फिचर मार्फत सहकार्य गर्दै नेपालको मौलिक पहिचान र स्थानीय दृष्टिकोण प्रवद्र्धन गर्ने छ । विभिन्न पर्यटकीय गन्तव्यबाट प्रत्यक्ष प्रसारण (लाइभस्ट्रिम) समेत गरिने छ । टिकटकका मिडल इस्ट, युरेसिया तथा अफ्रिका क्षेत्रका सरकारी सम्बन्ध तथा सार्वजनिक नीति प्रमुख एमिर गेलेनले यस सहकार्यले नेपालको पर्यटकीय सम्भावना विश्वसामु पुर्याउनुका साथै स्थानीय सिर्जनाकर्मी र साना व्यवसायलाई डिजिटल अर्थतन्त्रबाट लाभ लिन सहयोग पुग्ने बताए । यसअघि टिकटक र नेपाल पर्यटन बोर्डको सहकार्यमा तीन सयभन्दा बढी स्थानीय पर्यटन व्यवसायी तथा कन्टेन्ट क्रिएटरहरुलाई डिजिटल स्टोरी टेलिङ तालिम प्रदान गरिएको थियो ।
जग्गा नभएका सामुदायिक विद्यालयलाई लालपुर्जा बाँड्ने तयारीमा सरकार
काठमाडौं । शिक्षा विभागले देशैभरका सामुदायिक विद्यालयहरूको जग्गा व्यवस्थापनको कार्यलाई अभियानकै रूपमा अगाडि बढाउने भएको छ । शिक्षा विभाग (शैक्षिक सूचना व्यवस्थापन शाखा) ले सबै शिक्षा विकास तथा समन्वय एकाइहरूलाई पत्र पठाउँदै सामुदायिक विद्यालयहरूले चर्चेको सम्पूर्ण जग्गाको विवरण अद्यावधिक गरी एकीकृत शैक्षिक सूचना व्यवस्थापन प्रणालीमा प्रविष्ट गर्न निर्देशन दिएको हो । विभागद्वारा जारी गरिएको पत्रअनुसार विद्यालयको नाममा जग्गाधनी प्रमाणपत्र रहेको, सरकारी जग्गा भोगचलनको कागज भएको वा नभएको, सार्वजनिक तथा सामुदायिक निस्सा भएको, भाडामा लिएको वा दिएको, ऐलानी तथा प्रति जग्गा लगायत सबै किसिमका जग्गाको विवरण सङ्कलन गरिनेछ । विद्यालयहरूले इमिसमा लगइन गरी विद्यालय प्रोफाइल अन्तर्गतको व्यवस्थापन तथा अन्यमा गई जग्गाको स्वामित्व, क्षेत्रफल र कानुनी कागजातका विवरणहरू भरी जमिन प्रतिवेदन मार्फत प्रतिवेदन लिन सक्ने विभागले जनाएको छ । विद्यालयको जग्गासम्बन्धी समस्याहरूलाई दीर्घकालीन रूपमा समाधान गर्न र यसको स्वामित्वलाई सुरक्षित बनाउन यो कदम चालिएको बताइएको छ । यसका लागि सम्बन्धित सरोकारवाला निकाय, संस्था र व्यक्तिहरूसँग आवश्यक समन्वय तथा सहजीकरण गर्न भनिएको छ । विद्यालयबाट प्रमाणीकरण भई आएका विवरणहरूको एकमुष्ट जिल्लागत प्रतिवेदन आगामी दुई महिनाभित्र विभागमा पठाइसक्न निर्देशन समेत दिइएको छ । यसरी आएका विवरण अध्ययन गरि सामुदायिक विद्यालयको जग्गा संरक्षणमा आवश्यक कदम चालिने शिक्षा तथा खेलकुदमन्त्री सस्मित पोखरेलले बताए । ‘हामीलाई कतिपय विद्यालयहरूसँग पर्याप्त जग्गा नभएको तथा केही विद्यालयको जग्गा अन्य निकायहरूको नाममा वा नियन्त्रणमा रहेको गुनासोसमेत प्राप्त भएको छ,’ यसबारे थप स्पष्ट पार्दै मन्त्री पोखरेल भन्छन्, ‘विवरण संकलनका क्रममा कुनै विद्यालयको आफ्नै नाममा जग्गा नभएको वा अन्य निकायहरूसँग रहेको पाइएमा आवश्यक परे मन्त्रिपरिषद्बाटै निर्णय गराएर भए पनि विद्यालयहरूलाई जग्गाको पुर्जा नै उपलब्ध गराइनेछ ।’
शिक्षा नियमावली एघारौं संशोधन सहमतिका लागि कानुन मन्त्रालय पठाइदैं
काठमाडौं । शिक्षा तथा खेलकुद मन्त्रालयले शिक्षा नियमावलीको एघारौं संशोधन प्रस्ताव सहमतिका लागि कानुन, न्याय तथा संसदीय मामिला मन्त्रालयमा पठाउने निर्णय गरेको छ । यसअघि सहमतिका लागि अर्थ मन्त्रालय पठाइएको उक्त संशोधन प्रस्ताव त्यहाँबाट प्राप्त भएसँगै शुक्रबार मन्त्रालयले कानुन मन्त्रालयमा पठाउने निर्णय गरेको हो । शिक्षक, विद्यार्थी र समग्र शिक्षा क्षेत्रका सरोकारवालाहरूले उठाउँदै आएका गुनासोहरूलाई सम्बोधन गर्ने लक्ष्यका साथ मन्त्रालयले नियमावली संशोधनको प्रक्रिया अघि बढाएको छ ।
जेनजी आन्दोलनका घाइते बोहोरालाई भेट्न घरमै पुगिन् मन्त्री बादी
काठमाडौं । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सिता बादीले जेनजी आन्दोलनका क्रममा घाइते भएका सन्तोष बोहोरालाई वीरेन्द्रनगरस्थित उनकै निवासमा पुगेर भेट गरेकी छन् । भेटका क्रममा मन्त्री बादीले बोहोराको स्वास्थ्य अवस्था, पारिवारिक परिस्थिति तथा परिवारले भोगिरहेका समस्याबारे जानकारी लिएकी थिइन् । उनले बोहोराकी छोरीको शिक्षालाई निरन्तरता दिन सहयोग गर्ने, श्रीमतीका लागि रोजगारीको अवसर जुटाउन पहल गर्ने तथा परिवारलाई आवश्यक अन्य सहयोग र सेवा सुविधाका लागि सम्बन्धित निकायसँग समन्वय र सहजीकरण गर्ने बताइन् । मन्त्री बादीले घाइते तथा प्रभावित परिवारको पुनस्र्थापना, शिक्षा, रोजगारी र सामाजिक सुरक्षाका विषयमा आवश्यक सहयोगका लागि पहल गरिन् ।
हिमालयन क्यापिटलको १५ प्रतिशत लाभांश पारित
काठमाडौं । हिमालयन क्यापिटल लिमिटेडले सेयरधनीलाई १५ प्रतिशत नगद लाभांश वितरण गर्ने भएको छ । कम्पनीको नवौं वार्षिक साधारण सभाले आर्थिक वर्ष २०८२/८३ का लागि सञ्चालक समितिले प्रस्ताव गरेको करसहित १५ प्रतिशत नगद लाभांश वितरण गर्ने प्रस्ताव पारित गरेको हो । शुक्रबार सम्पन्न सभाले आर्थिक वर्ष २०८२/८३ को सञ्चालक समितिको प्रतिवेदन तथा वार्षिक वित्तीय विवरणसमेत छलफलपछि पारित गरेको छ । सभामा आर्थिक वर्ष २०८२/८३ मा कम्पनीले हासिल गरेका उपलब्धिहरूको समीक्षा गरिएको थियो । साथै संस्थाका भावी योजना तथा रणनीतिबारे छलफल भएको थियो । हिमालयन बैंक लिमिटेडको सहायक कम्पनीका रूपमा रहेको हिमालयन क्यापिटलले मर्चेन्ट बैंकिङअन्तर्गत निक्षेप सदस्य, सेयर रजिस्ट्रार, निष्काशन तथा बिक्री प्रबन्धक, लगानी व्यवस्थापन, कोष व्यवस्थापन, डिपोजिटरी तथा संस्थागत परामर्शलगायतका सेवा प्रदान गर्दै आएको छ ।
