अपराध अनुसन्धान कार्यालयको भवन साढे २० करोडमा एटीबी-आरएमएसलाई ठेक्का
काठमाडौं । काठमाडौं उपत्यका अपराध अनुसन्धान कार्यालयले भवन निर्माणको बाँकी काम २० करोड ६५ लाख ३८ हजार रुपैयाँमा सम्पन्न गर्ने भएको छ । कार्यालयका अनुसार रीतपूर्वक दर्ता भएका बोलपत्रहरूको मूल्याङ्कन गर्दा एटीबी–आरएमएस ज्वाइन्ट भेन्चरले पेस गरेको प्रस्ताव छनोट गरिएको हो । कार्यालयले सार्वजनिक खरिद ऐन, २०६३ को दफा २७ को उपदफा (१) बमोजिम प्रक्रिया अघि बढाउँदै उपदफा (२) को प्रयोजनका लागि मङ्सिर १ गतेसम्मको म्याद राखेर बोलपत्र स्वीकृत गर्ने आशयको सूचना जारी गरेको छ । निर्धारित अवधिभित्र सम्बन्धित पक्षले कानुनबमोजिम आवश्यक प्रक्रिया अघि बढाउन सक्नेछन् । यद्यपि, कार्यालयले जारी गरेको सूचना बोलपत्र स्वीकृत गर्ने आशयको मात्र भएकाले अन्तिम स्वीकृति भइसकेको भने होइन । यसअघि कार्यालयले गत भदौ ३० गते सूचना प्रकाशित गर्दै भवन निर्माणका बाँकी काम सम्पन्न गर्न योग्य तथा इच्छुक निर्माण व्यवसायीबाट बोलपत्र आह्वान गरेको थियो । बोलपत्रमा सहभागी हुन निर्माण व्यवसायीको पछिल्लो आर्थिक वर्षको औसत निर्माण कारोबार कम्तीमा २३ करोड ९० लाख रुपैयाँ हुनुपर्ने सर्त राखिएको थियो । त्यस्तै, समान प्रकृति र आकारको निर्माण कार्यमा कम्तीमा १२ करोड रुपैयाँ बराबरको अनुभव अनिवार्य गरिएको थियो । बोलपत्रसम्बन्धी कागजात खरिदका लागि १० हजार रुपैयाँ दस्तुर तोकिएको थियो भने बोलपत्र पेस गर्दा ४८ लाख रुपैयाँ धरौटी राख्नुपर्ने व्यवस्था गरिएको थियो । टेकुस्थित कार्यालयको भवन निर्माणका बाँकी काम सम्पन्न गर्न छनोट गरिएको निर्माण कम्पनीसँगको सम्झौतापछि निर्माण प्रक्रिया अघि बढ्नेछ ।
बेपत्ता २ हजार ४६५ जनाको विवरण सार्वजनिक, ७ देशका १७१ नागरिक
काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले वर्षौंदेखि बेपत्ता रहेकाहरू सूची सार्वजनिक गरेको छ । प्राधिकरणले नेपालका विभिन्न जिल्लाका २ हजार २९४ जना र विभिन्न ७ देशका १७१ जना गरी कुल २ हजार ४६५ जना बेपत्ता व्यक्तिको विवरण सार्वजनिक गरेको हो । जिल्ला विपद् जोखिम न्यूनीकरण तथा व्यवस्थापन समितिको निर्णयका आधारमा प्राप्त विवरण सूचीमा समावेश गरिएको प्राधिकरणले जनाएको छ । प्राधिकरणका अनुसार रसुवामा सबैभन्दा धेरै १ हजार ५३८ जना बेपत्ता रहेका छन् । त्यसपछि सिन्धुपाल्चोकमा २१९, बर्दियामा ७४, जुम्लामा ६३ तथा कैलाली र सप्तरीमा ५१-५१ जना बेपत्ता छन् । त्यस्तै, दाङमा ३८, रामेछाप र सिन्धुलीमा ३७-३७, काभ्रेपलाञ्चोकमा ३५, नवलपरासी पूर्व र उदयपुरमा १७-१७, बागलुङमा १६, डडेल्धुरामा १५, ललितपुरमा १४, नवलपरासी पश्चिममा ११, महोत्तरीमा ९ र स्याङ्जामा ८ जना बेपत्ता रहेका छन् । यसैगरी, खोटाङ र कालीकोटमा ६-६, भोजपुरमा ४, संखुवासभा र बाजुरामा ३-३ तथा धनकुटा, अछाम, कपिलवस्तु, जाजरकोट र ताप्लेजुङमा २-२ जना बेपत्ता छन् । तेह्रथुममा एक जना बेपत्ता रहेको जनाइएको छ । प्राधिकरणले नेपाली नागरिकसँगै नेपालमा बेपत्ता रहेका विदेशी नागरिकको विवरणसमेत सार्वजनिक गरेको छ । सात देशका नियोगबाट प्राप्त विवरणअनुसार १७१ जना विदेशी नागरिक बेपत्ता छन् । जसअनुसार मलेसिया र युक्रेनका ५४-५४, अस्ट्रेलियाका ३३, रुसका ११, दक्षिण कोरियाका ९, जर्मनीका ८ र इटालीका २ जना बेपत्ता रहेका छन् । विदेशी नागरिकको विवरण सम्बन्धित देशका नेपालस्थित नियोग वा नेपाल हेर्ने गरी तोकिएका नियोगबाट परराष्ट्र मन्त्रालयअन्तर्गतको कन्सुलर सेवा विभागमार्फत प्राप्त भएको प्राधिकरणले जनाएको छ । प्राधिकरणले सार्वजनिक गरेको स्वदेशी बेपत्ता व्यक्तिको विवरण हेर्न सम्बन्धित व्यक्तिले उपलब्ध गराइएको सङ्केत चिह्न स्क्यान गर्न वा वेबसाइटमा जान सक्नेछन् । साथै, सम्बन्धित स्थानीय तह वा जिल्ला प्रशासन कार्यालयमा सम्पर्क गरेर पनि विवरण हेर्न सकिने व्यवस्था गरिएको छ । सार्वजनिक विवरणमा आफ्नो वा परिवारका सदस्यको नाम तथा अन्य विवरण फरक परेको भए त्यसको कारण खुलाएर प्राधिकरणको इमेलमार्फत दाबी पठाउनुपर्नेछ । प्राधिकरणका अनुसार हाल सार्वजनिक गरिएको सूची अन्तिम होइन । सार्वजनिक सूचनामा समेटिन बाँकी अन्य बेपत्ता व्यक्तिको विवरण सम्बन्धित जिल्ला प्रशासन कार्यालयबाट प्राप्त भएपछि थप प्रक्रिया अघि बढाइनेछ । त्यस्तै, बेपत्ता विदेशी नागरिकको हकमा सम्बन्धित नियोगहरूबाट थप विवरण प्राप्त भएपछि पुनः सूचना प्रकाशित गरिने प्राधिकरणले जनाएको छ । बेपत्ताहरूको विवरण हेर्न यहाँ क्लिक गर्नुहोस्ः https://setu.ndrrma.gov.np/admin/missing.php
एनपीएलमा आज लुम्बिनी र काठमाडौं भिड्दै
काठमाडौं । नेपाल प्रिमियर लिग (एनपीएल) अन्तर्गत आज एक खेल हुँदैछ । त्रिवि क्रिकेट मैदानमा साँझ ५ बजे हुने खेलमा काठमाडौं गोर्खाजले अंकतालिकाको शीर्ष स्थानमा रहेको लुम्बिनी लायन्ससँग प्रतिस्पर्धा गर्दैछ । लुम्बिनी ७ अंकसहित अंकतालिकाको शीर्ष स्थानमा छ भने काठमाडौं ४ अंकका साथ चौथो स्थानमा रहेको छ । लुम्बिनी प्रतियोगितामा अहिलेसम्म अपराजित छ । चार खेल खेलेको लुम्बिनीले तीन खेलमा जित हात पारेको छ भने एक खेल वर्षाका कारण रद्द हुँदा अंक बाँडेको छ । काठमाडौंले तीन खेलमध्ये दुईमा जित र एकमा हार बेहोरेको छ । आजको खेल जित्दै लुम्बिनी आफ्नो अपराजित यात्रा कायम राख्न चाहन्छ भने काठमाडौं शीर्ष टोलीलाई पराजित गर्दै अंकतालिकामा आफ्नो स्थान सुधार गर्ने लक्ष्यमा हुनेछ ।
संघीय मन्त्री सिता बादीले भेटिन् कर्णालीका मुख्यमन्त्री शाहीलाई, माग्यो विशेष बजेट
काठमाडौं । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सिता बादी र कर्णाली प्रदेशका मुख्यमन्त्री मङ्गलबहादुर शाहीबीच शुक्रबार मुख्यमन्त्री तथा मन्त्रिपरिषद्को कार्यालयमा भेटवार्ता भएको छ । भेटमा प्रदेशका सामाजिक विकासमन्त्री जितबहादुर मल्लको समेत उपस्थिति रहेको थियो । भेटवार्ताका क्रममा मन्त्री बादीले लैङ्गिक हिंसा, बालविवाह, बालमृत्युदर, कुपोषण, पुड्कोपना, अपाङ्गता भएका व्यक्तिका सवाल तथा महिला उद्यमशीलताको प्रवर्द्धनलगायत विषयलाई प्राथमिकतामा राखेर तीनै तहका सरकारले समन्वय र सहकार्यका साथ काम गर्नुपर्नेमा जोड दिइन् । महिला, बालबालिका तथा सीमान्तकृत समुदायका समस्या समाधानका लागि सङ्घ, प्रदेश र स्थानीय तहबीच साझा जिम्मेवारी र प्रभावकारी समन्वय आवश्यक रहेको उल्लेख गर्दै उनले लक्षित समुदायका आवश्यकता सम्बोधन हुने गरी नीति, कार्यक्रम तथा बजेट केन्द्रित गर्नुपर्ने बताइन् । भेटमा मुख्यमन्त्री शाहीले कर्णाली प्रदेशमा विद्यमान बालमृत्युदर, कुपोषण, पुड्कोपना र बालविवाहजस्ता समस्या न्यूनीकरणका लागि सङ्घीय सरकारले विशेष कार्यक्रम सञ्चालन गर्नुका साथै थप बजेटको व्यवस्था गर्नुपर्ने बताए । किशोरकिशोरीको मानसिक स्वास्थ्यलाई समेत प्राथमिकतामा राख्दै प्रदेशका सामाजिक तथा स्वास्थ्य सूचक सुधारका लागि सङ्घीय सरकारको विशेष पहल आवश्यक रहेको उनको भनाइ थियो । जवाफमा मन्त्री बादीले कर्णाली प्रदेशको समग्र विकास तथा सामाजिक सूचक सुधारका लागि सङ्घीय सरकार प्रदेश सरकारसँग सहकार्य गर्न प्रतिबद्ध रहेको बताइन् । उनले प्रदेशमा बालसुधार गृह स्थापनाका लागि आवश्यक पहल भइरहेको जानकारीसमेत गराइन् । भेटमा प्रदेशका सामाजिक विकासमन्त्री जितबहादुर मल्लले स्वास्थ्य तथा शिक्षा क्षेत्रको सुधारका लागि प्रदेश सरकारले गरिरहेका प्रयासबारे जानकारी गराउँदै सङ्घीय सरकारको निरन्तर सहयोग र सहकार्य आवश्यक रहेको बताए । भेटवार्तामा महिला सशक्तीकरण, बालअधिकार संरक्षण, लैङ्गिक हिंसा न्यूनीकरण, सामाजिक सुरक्षा तथा समावेशी विकासका क्षेत्रमा तीनै तहका सरकारबीच समन्वय र सहकार्यलाई थप प्रभावकारी बनाउने विषयमा छलफल भएको थियो ।
केसी र सरकारबीच ६ बुँदे सहमति, शिक्षामन्त्रीले भने- यो अन्तिम अनशन
काठमाडौं । अनशनरत डा. गोविन्द केसी र नेपाल सरकारबीच ६ बुँदे सहमति भएको छ । सहमतिसँगै डा. केसीले शनिबार राति आफ्नो २५औँ सत्याग्रह अन्त्य गरेका छन् । पटकपटकको छलफलपछि शिक्षा तथा खेलकुदमन्त्री सस्मित पोखरेल शनिबार राति त्रिवि शिक्षण अस्पताल पुगेर सहमतिपत्रमा हस्ताक्षर गर्दै डा. केसीको अनशन तोडाएका हुन् । अनशन अन्त्य भएपछि मन्त्री पोखरेलले यो नै डा. केसीको अन्तिम अनशन हुने विश्वास व्यक्त गरे । उनले सहमतिअनुसार कार्यान्वयन प्रक्रिया अघि बढाइने बताए । ’यो डा. केसीको अन्तिम अनशन हो । उहाँसँग भएका सहमतिअनुसार कार्यान्वयन प्रक्रिया अघि बढ्छ,’ मन्त्री पोखरेलले भने । डा. केसी र सरकारबीच भएको सहमतिपत्रमा डा. केसी, शिक्षा तथा खेलकुदमन्त्री सस्मित पोखरेल, प्रधानमन्त्रीका स्वास्थ्य सल्लाहकार प्रा. डा. जगदीश अग्रवाल, सांसद् पुकार बम र नेपाल मेडिकल एसोसिएसनका अध्यक्ष डा. बद्री रिजालले हस्ताक्षर गरेका छन् ।
मीठा खानेकुरा खुवाएर आज काग तिहार मनाइँदै
काठमाडौं । यमपञ्चक अर्थात् तिहारको पहिलो दिन आज काग पूजा गरिँदैछ । यमराजको दूतका रूपमा मानिने कागलाई मनपर्ने खानेकुरा दिएर आज काग तिहार मनाउने परम्परा छ । बिहान सूर्योदय हुँदा त्रयोदशी तिथि परेको दिन काग तिहार मनाउनुपर्ने भएकाले शास्त्रसम्मत रूपमा आज कागको पूजा गर्नुपर्ने नेपाल पञ्चाङ्ग निर्णायक विकास समितिले जनाएकाे छ । बेलुकी त्रयोदशी तिथि परेको दिन यमदीप दान गर्ने र सूर्योदयका बेला त्रयोदशी तिथि परेको दिन काग तिहार मनाउनुपर्ने छ । यसअनुसार यमदीप दान शुक्रबार बेलुका नै गरिएको थियो । धनवन्तरी जयन्ती भने आज अर्थात् कात्तिक २१ गते शनिबार परेको छ । तिथि घटबढका कारण कात्तिक २२ गते आइतबार कुकुर तिहार र लक्ष्मीपूजा एकै दिन परेको नेपाल पञ्चाङ्ग निर्णायक विकास समितिले जनाएको छ । त्यसैगरी गाईपूजा कात्तिक २३ गते सोमबार परेको छ । गोरुपूजा, हलितिहार, गोवद्र्धनपूजा, बलिपूजा र आत्मपूजा (म्हपूजा) भने कात्तिक २४ गते मंगलबार मनाइने समितिले जनाएको छ । यमपञ्चकको मुख्य पर्व भाइटीका कात्तिक २५ गते बुधबार परेको छ । समितिले भाइटीकाको उत्तम साइत बिहान ११ बजेर ७ मिनेटलाई तोकेको छ । यसैबीच, काग तिहारका अवसरमा काठमाडौंको कागेश्वरी मनोहरा नगरपालिका-१ स्थित कागेश्वरी महादेव मन्दिर र हनुमानढोकास्थित कागेश्वरी मन्दिरमा कागको विशेष पूजाआराधना गरिन्छ । कागले यमराजसमक्ष शुभ समाचार पु¥याओस् भन्ने कामनासहित आज कागलाई पूजा गरेर मनपर्ने खानेकुरा दिने चलन छ । कागलाई दहीभात खुवाएमा उसले यमराजसमक्ष राम्रो सन्देश पुर्याउने धार्मिक विश्वाससमेत रहिआएको छ । लगातार सार्वजनिक बिदा परेकाले तिहारको रौनकसमेत बढेको छ ।
सञ्चारमन्त्री तिमिल्सिना कतार जाने
काठमाडौं । सूचना तथा सञ्चारमन्त्री डा. विक्रम तिमिल्सिना अन्तर्राष्ट्रिय दूरसञ्चार संघ (आईसीटी) को महासम्मेलनमा सहभागी हुन कतारको दोहा जाने भएका छन् । आगामी नोभेम्बर ७ देखि १३ सम्म हुने भ्रमणका क्रममा मन्त्री तिमिल्सिनासँगै सूचना तथा सञ्चार मन्त्रालयका सचिव राजेन्द्रकुमार पौडेललगायत मन्त्रालयका अधिकारीसमेत सहभागी हुने कार्यक्रम रहेको छ । संयुक्त राष्ट्रसंघको सूचना तथा सञ्चार प्रविधिसम्बन्धी विशिष्टीकृत संस्था अन्तर्राष्ट्रिय दूरसञ्चार संघले विश्वव्यापी दूरसञ्चार मापदण्ड निर्धारण, रेडियो फ्रिक्वेन्सी तथा भूउपग्रह कक्षाको अन्तर्राष्ट्रिय समन्वय र डिजिटल कनेक्टिभिटी विस्तारमा महत्वपूर्ण भूमिका निर्वाह गर्दै आएको छ । प्रत्येक चार वर्षमा आयोजना हुने यो महासम्मेलन संस्थाको सर्वोच्च नीति निर्माण गर्ने थलो हो, जसले संघको आगामी कार्यदिशा, रणनीतिक प्राथमिकता र नेतृत्व निर्धारण गर्दछ । महासम्मेलनका क्रममा हुने आईसीटीको उच्च व्यवस्थापन टोली, परिषद्का सदस्य राष्ट्र तथा रेडियो नियमावली बोर्डका सदस्यहरूको निर्वाचनमा नेपालले सहभागिता जनाउँदै मतदान गर्नेसमेत तय भएको छ । यस सहभागिताले अन्तर्राष्ट्रिय दूरसञ्चार नीति तथा निर्णय प्रक्रियामा नेपालको पहुँच र प्रतिनिधित्व सुनिश्चित गर्ने विश्वास लिइएको छ । भ्रमणका क्रममा सञ्चारमन्त्री तिमिल्सिनाले विभिन्न मुलुकका समकक्षी मन्त्रीहरूसँग द्विपक्षीय भेटवार्ता गर्ने कार्यक्रम रहेको छ । उक्त भेटमा सम्बन्धित मुलुकहरूले दूरसञ्चार क्षेत्रको विकासमा हासिल गरेका सफल अभ्यास तथा अनुभव आदानप्रदान गर्नुका साथै प्राविधिक र संस्थागत सहकार्यका अवसरहरूबारे छलफल गरिनेछ । विशेषगरी दूरसञ्चार पूर्वाधार विकास, सेवाको गुणस्तर सुधार, डिजिटल पहुँच विस्तार तथा आधुनिक सञ्चार प्रविधिको उपयोगजस्ता विषयमा अन्तर्राष्ट्रिय अनुभव आदानप्रदान गर्दै नेपालको डिजिटल रूपान्तरण र दूरसञ्चार क्षेत्रको आधुनिकीकरणका लागि अन्तर्राष्ट्रिय सहकार्य विस्तार गर्नु यस भ्रमणको प्रमुख उद्देश्य रहेको छ ।
भोटेकोशी-त्रिशुली बाढी प्रभावितका लागि कांग्रेसले सञ्चालन गर्ने भयो दुई विशेष अभियान
काठमाडौं । नेपाली कांग्रेसले गत भाद्र १० गते भोटेकोशी-त्रिशुली क्षेत्रमा गएको बाढी पहिरोबाट प्रभावित भएका नागरिकको पुनस्र्थापना, पुनर्निर्माण र सार्वजनिक सेवा प्रवाहलाई गति दिन सरकारलाई खबरदारी गर्दै अभियान सञ्चालन गर्ने भएको छ । कांग्रेसका सभापति गगनकुमार थापाको उपस्थितिमा बीपी नगर ललितपुरस्थित पार्टी केन्द्रीय कार्यालयमा बसेको पदाधिकारी, संसदीय दलका नेता तथा रसुवा, धादिङ र नुवाकोटका केन्द्रीय सदस्य, सांसद र जनप्रतिनिधिहरूको बैठकले उक्त निर्णय गरेको हो । सहमहामन्त्री प्रकाश रसाईली स्नेहीद्वारा जारी प्रेस विज्ञप्तिअनुसार पार्टीले प्राकृतिक विपत्तिबाट प्रभावित नागरिकका लागि छठ पर्व लगत्तै तीनवटै जिल्लाका प्रभावित गाउँ तथा बस्तीहरूमै पुगेर प्रत्यक्ष अवलोकन र अन्तरक्रिया गर्ने भएको छ । उक्त निरीक्षणपछि पार्टीले पुनस्र्थापना र पुनर्निर्माणका लागि चाल्नुपर्ने थप कदमहरूको तय गर्ने बताइएको छ ।यसैगरी बाढी प्रभावित परिवारका लागि नेपाली कांग्रेसले ‘न्यानो कपडा अभियान’ र ‘मानसिक स्वास्थ्य परामर्श अभियान’ समेत सञ्चालन गर्ने निर्णय गरेको छ । प्रभावित नागरिकको जीवनलाई सहज बनाउन, पुनःस्थापना सुनिश्चित गर्न र आवश्यक पुनर्निर्माणका लागि सरकारलाई निरन्तर झकझक्याउनुका साथै पार्टीका तर्फबाट सहकार्य, सहयोग र सहजीकरणका कार्यलाई प्रभावकारी रूपमा अघि बढाउन नेपाली कांग्रेस संवेदनशील र प्रतिबद्ध रहेको विज्ञप्तिमा उल्लेख छ ।
