जेनजी आन्दोलनका घाइते बोहोरालाई भेट्न घरमै पुगिन् मन्त्री बादी
काठमाडौं । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सिता बादीले जेनजी आन्दोलनका क्रममा घाइते भएका सन्तोष बोहोरालाई वीरेन्द्रनगरस्थित उनकै निवासमा पुगेर भेट गरेकी छन् । भेटका क्रममा मन्त्री बादीले बोहोराको स्वास्थ्य अवस्था, पारिवारिक परिस्थिति तथा परिवारले भोगिरहेका समस्याबारे जानकारी लिएकी थिइन् । उनले बोहोराकी छोरीको शिक्षालाई निरन्तरता दिन सहयोग गर्ने, श्रीमतीका लागि रोजगारीको अवसर जुटाउन पहल गर्ने तथा परिवारलाई आवश्यक अन्य सहयोग र सेवा सुविधाका लागि सम्बन्धित निकायसँग समन्वय र सहजीकरण गर्ने बताइन् । मन्त्री बादीले घाइते तथा प्रभावित परिवारको पुनस्र्थापना, शिक्षा, रोजगारी र सामाजिक सुरक्षाका विषयमा आवश्यक सहयोगका लागि पहल गरिन् ।
हिमालयन क्यापिटलको १५ प्रतिशत लाभांश पारित
काठमाडौं । हिमालयन क्यापिटल लिमिटेडले सेयरधनीलाई १५ प्रतिशत नगद लाभांश वितरण गर्ने भएको छ । कम्पनीको नवौं वार्षिक साधारण सभाले आर्थिक वर्ष २०८२/८३ का लागि सञ्चालक समितिले प्रस्ताव गरेको करसहित १५ प्रतिशत नगद लाभांश वितरण गर्ने प्रस्ताव पारित गरेको हो । शुक्रबार सम्पन्न सभाले आर्थिक वर्ष २०८२/८३ को सञ्चालक समितिको प्रतिवेदन तथा वार्षिक वित्तीय विवरणसमेत छलफलपछि पारित गरेको छ । सभामा आर्थिक वर्ष २०८२/८३ मा कम्पनीले हासिल गरेका उपलब्धिहरूको समीक्षा गरिएको थियो । साथै संस्थाका भावी योजना तथा रणनीतिबारे छलफल भएको थियो । हिमालयन बैंक लिमिटेडको सहायक कम्पनीका रूपमा रहेको हिमालयन क्यापिटलले मर्चेन्ट बैंकिङअन्तर्गत निक्षेप सदस्य, सेयर रजिस्ट्रार, निष्काशन तथा बिक्री प्रबन्धक, लगानी व्यवस्थापन, कोष व्यवस्थापन, डिपोजिटरी तथा संस्थागत परामर्शलगायतका सेवा प्रदान गर्दै आएको छ ।
चितवनले पोखरालाई दियो १५२ रनको लक्ष्य
काठमाडौं । नेपाल प्रिमियर लिग (एनपीएल)को तेस्रो संस्करणअन्तर्गत शुक्रबार (आज) को दोस्रो खेलमा चितवन राइनोजले पोखरा एभेन्जर्ससामु १५२ रनको लक्ष्य प्रस्तुत गरेको छ । चितवनले निर्धारित २० ओभरमा ६ विकेट गुमाउँदै १५१ रनको योगफल तयार पारेको हो । चितवन टस हारेर ब्याटिङमा उत्रिएको हो । दुबै टिमको यो चौथो खेल हो । जारी प्रतियोगितमा पोखरा जितविहीन रहँदै तालिकाको पुछारमा छ भने चितवन ३ खेलबाट ३ अंकसहित सातौं स्थानमा छ । आजको पहिलो खेलमा सुदूरपश्चिम रोयल्सले कर्णाली याक्सलाई ३९ रनले पराजित गरेको थियो ।
प्रचण्ड भन्छन् : गगनलाई कसैले पक्राउ गर्न सक्दैन
काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले नेपाली कांग्रेसका सभापति गगनकुमार थापालाई पक्राउ गर्न सम्भव नरहेको बताएका छन् । थापा पक्राउ पर्न सक्ने चर्चा भइरहेका बेला प्रचण्डले उनलाई कसैले पक्राउ गर्न नसक्ने टिप्पणी गरेका हुन् । पत्रकारहरूसँग आज कुरा गर्दै प्रचण्डले सरकार संविधान, लोकतन्त्र र गणतन्त्रका आधारभूत मान्यताबाट विचलित हुन खोजेको आरोप लगाए । यस्तो प्रवृत्ति देश र जनताका लागि चिन्ताजनक रहेको उनको भनाइ थियो । पत्रकारहरूले गगन थापा पक्राउ पर्ने चर्चाबारे जिज्ञासा राखेपछि प्रचण्डले भने, ‘जहाँसम्म गगनजीको कुरा गर्नुभयो, गगनजी पक्रन कसैले सक्दैन ।’ यसैबीच, प्रहरी महानिरीक्षक पदबाट दानबहादुर कार्कीलाई हटाइएको विषयमा भने प्रचण्डले टिप्पणी गर्न अस्वीकार गरे । उक्त निर्णयविरुद्ध अदालतमा रिट परेको उल्लेख गर्दै उनले न्यायिक प्रक्रियामा प्रवेश गरिसकेको विषयमा अहिले बोल्न उपयुक्त नहुने बताए ।
मञ्जुश्री फाइनान्सको २० प्रतिशत लाभांश पारित
काठमाडौं । मञ्जुश्री फाइनान्स लिमिटेडले सेयरधनीलाई २० प्रतिशत लाभांश वितरण गर्ने प्रस्ताव पारित गरेको छ । कम्पनीको १९औं वार्षिक साधारण सभाले आर्थिक वर्ष २०८२/८३ को मुनाफाबाट १५ प्रतिशत नगद लाभांश (करसहित) र ५ प्रतिशत बोनस सेयर वितरण गर्ने प्रस्ताव पारित गरेको हो । शुक्रबार सम्पन्न सभाले कम्पनीको प्राथमिक पुँजी वृद्धि गर्ने प्रस्तावसमेत पारित गरेको छ । जसअनुसार ४० करोड रुपैयाँ बराबरको ८.७५ प्रतिशत लाभांश दर कायम भएको अविमोच्य असञ्चित अग्राधिकार सेयर जारी गरिनेछ । यस्तो सेयरमा कम्पनीले मुनाफा भएको वर्षमा मात्र लाभांश वितरण गर्नेछ । उक्त सेयर नेपाल राष्ट्र बैंकलगायत सम्बन्धित नियामक निकायको स्वीकृति प्राप्त भएपछि जारी गरिने कम्पनीले जनाएको छ । त्यस्तै, सभाले आर्थिक वर्ष २०८३/८४ का लागि एनकेटी एसोसिएट्स, चार्टर्ड एकाउन्टेन्ट्सलाई बाह्य लेखापरीक्षक नियुक्त गर्ने प्रस्ताव पनि पारित गरेको छ । सभामा शेयरधनीहरूले कम्पनीको व्यावसायिक प्रगति, संस्थागत सुशासन, वित्तीय अवस्था र आगामी योजनाबारे चासो राखेका थिए । कम्पनीले घोषणा गरेको २० प्रतिशत लाभांशप्रति सेयरधनीहरूले सन्तुष्टि व्यक्त गरेका थिए ।
भारत-बंगलादेशमा ३० अर्बको बिजुली निर्यात गरिने
काठमाडौं । सरकारले चालु आवभित्र ३० अर्ब रुपैँया बराबरको विद्युत भारत–बंगलादेशमा निर्यात गर्ने भएको छ । नेपाल विद्युत प्राधिकरणले चालु आर्थिक वर्षमा विद्युत निर्यातबाट गत वर्षको तुलनामा बढी विद्युत् बेच्ने योजना बनाएको हो । प्राधिकरणकाअनुसार यस वर्ष विद्युत निर्यातबाट ३० अर्ब रुपैयाँको बिजुली निर्यात गर्ने योजना छन् । विद्युत प्राधिकरणका कार्यकारी निर्देशक दीर्घायु कुमार श्रेष्ठले हालसम्म करिब २४/२५ अर्ब रुपैयाँ बराबरको विद्युत निर्यात भइसकेको यो वर्ष ३० अर्बको विद्युत् निर्यात हुने जानकारी दिए । पछिल्ला तीन/चार महिनामा प्रत्येक महिना करिब ५ अर्ब रुपैयाँ बराबरको विद्युत् निर्यात भएको उनले बताए । उनकाअनुसार गत आर्थिक वर्षमा नेपालले करिब २९ अर्ब रुपैयाँ बराबरको विद्युत् निर्यात गरेको थियो । यस वर्ष भोटेकोसी बाडीले केही क्षति पुर्याएपनि वर्षा राम्रो भएकाले नदीमा पानीको बहाव बढेको र त्यसले विद्युत उत्पादनमा समेत सहयोग पु¥याएको श्रेष्ठको भनाइ छ । विद्युत उत्पादन बढ्दा निर्यातको परिमाण र आम्दानीसमेत गत वर्षभन्दा बढ्ने उनको भनाई छ । नेपालले गत वर्ष २९ अर्बको बिजुली बेचेकोमा यसवर्ष ३० अर्ब पु¥याइने उनको भनाई छ । नेपालले देशभित्रको विद्युत् माग पूरा गरी वचत भएको वर्षायामको विद्युत् भारत र बंगलादेशमा निर्यात गर्दै आएको छ । भारततर्फ विद्युत निर्यात दुई माध्यमबाट हुँदै आएको छ । द्विपक्षीय विद्युत विक्री सम्झौताअनुसार भारतको हरियाणा र बिहार राज्यमा विद्युत विक्री गरिन्छ भने बाँकी विद्युत भारतीय ऊर्जा विनिमय बजार (आईएक्स) को डे-अहेड तथा रियल टाइम बजारमा प्रतिष्पर्धी दरमा विक्री हुँदै आएको छ । द्विपक्षीय मध्यकालीन विद्युत बिक्री सम्झौताअनुसार हरियाणा र बिहार राज्यमा जुनदेखि अक्टोबरसम्म विद्युत बिक्री गरिन्छ । यसरी भारतमा हुने विद्युत् व्यापारसँगै बंगलादेशमा समेत नेपालले वर्षायामको अतिरिक्त विद्युत् निर्यात गर्दै आएको छ । तर गत भदौ १० गते रसुवाको भोटेकोशी नदीमा आएको हिमबाढीका कारण त्रिशूली नदीमा आएको बाढीले बंगलादेश निर्यातका लागि स्वीकृति प्राप्त त्रिशूली र चिलिमे जलविद्युत केन्द्रमा क्षति पु¥याएपछि बंगलादेशतर्फको विद्युत निर्यात रोकिएको थियो । बाढीका कारण द्विपक्षीय सम्झौताअनुसार स्वीकृति प्राप्त जलविद्युत केन्द्रमा क्षति पुग्दा भारतको हरियाणा राज्यतर्फको विद्युत निर्यातसमेत आंशिक रूपमा प्रभावित भएको थियो । बाढीबाट प्रभावित आयोजनाको सट्टामा अन्य जलविद्युत केन्द्रबाट उत्पादित विद्युत निर्यात गर्ने व्यवस्था मिलाइएको प्राधिकरण श्रेष्ठले जानकारी दिए । भारतको केन्द्रिय विद्युत प्राधिकरणबाट अन्य आयोजनाको विद्युत बंगलादेशतर्फ निर्यात गर्न स्वीकृति प्राप्त भएपछि केही दिनअघिदेखि पुनः निर्यात शुरु गरिएको कार्यकारी निर्देशक श्रेष्ठले बताए । नयाँ व्यवस्थाअनुसार यसअघि स्वीकृति प्राप्त त्रिशूली, देवीघाट र चिलिमे जलविद्युत केन्द्रको सट्टा सोलु, काबेली-१ र तल्लो मोदी जलविद्युत केन्द्रबाट उत्पादित विद्युत बंगलादेश तथा भारतको हरियाणा राज्यतर्फ निर्यात गर्न स्वीकृति प्राप्त भएको छ भने सोहीअनुसार बिजुली बेच्न थालिसकिएको छ । प्राधिकरणका कार्यकारी निर्देशक श्रेष्ठले बाढीबाट प्रभावित जलविद्युत आयोजनाको उत्पादन तथा प्रसारण संरचनामा क्षति पुगे पनि अन्य आयोजनाबाट विद्युत निर्यातलाई निरन्तरता दिन सक्नु र बंगलादेशतर्फको निर्यात पुनः सुरु हुनु नेपालको विद्युत् व्यापारका लागि ठूलो उपलब्धि भएको बताए । यसले वर्षायाममा उत्पादन हुने अतिरिक्त विद्युतको बजार व्यवस्थापन र क्षेत्रीय विद्युत व्यापार विस्तारमा सहयोग पुग्ने उनको भनाइ छ । श्रेष्ठले भने,‘यस वर्ष अझै निर्यात बढ्ने छ । यसमा प्रकृतिले पनि हामीलाई साथ दिएको छ । वर्षा हुँदा केही असर त भयो नै तर नदीमा पानीको बहाव राम्रो हुन्छ र त्यसले विद्युत उत्पादन बढाउन सहयोग गर्छ । त्यसैले यस वर्ष २९ अर्ब रुपैयाँभन्दा बढीको विद्युत निर्यात हुने हाम्रो अनुमान छ ।’ प्राधिकरण र बंगलादेश पावर डेभलपमेन्ट बोर्ड (बीपीडीबी) बीच २०८१ असोज १७ गते वर्षायामको विद्युत निर्यातसम्बन्धी पाँचवर्षीय सम्झौता भएको थियो । उक्त सम्झौताअनुसार प्रत्येक वर्ष जुन १५ देखि नोभेम्बर १५ सम्म दैनिक ४० मेगावाट विद्युत् बंगलादेशमा निर्यात हुँदै आएको छ । बंगलादेशसँगको सम्झौता र भारततर्फको द्विपक्षीय तथा प्रतिस्पर्धी बजारमा हुने विद्युत विक्रीले नेपालको अतिरिक्त विद्युत व्यवस्थापनमा सहयोग पु¥याउँदै आएको छ । यस वर्ष जलविद्युत उत्पादन अनुकूल रहेकाले भारत र बंगलादेश दुवैतर्फको निर्यात बढ्ने र त्यसबाट विद्युत निर्यात आम्दानीसमेत गत वर्षको तुलनामा वृद्धि हुने प्राधिकरणले जानकारी दिएको छ ।
भायानेटले ल्यायो ‘आजको समस्या, आजै फिक्स’ सेवा
काठमाडौं । इन्टरनेट सेवा प्रदायक कम्पनी भायानेट कम्युनिकेसन्स लिमिटेडले ग्राहकका प्राविधिक समस्या छिटो समाधान गर्ने उद्देश्यले ‘आजको समस्या, आजै फिक्स’ सेवा सुरु गरेको छ । यस सेवाअन्तर्गत साँझ ५ बजेअघि दर्ता गरिएका इन्टरनेटसम्बन्धी प्राविधिक समस्यालाई सोही दिन समाधान गर्ने लक्ष्यसहित प्राथमिकतामा राखिने कम्पनीले जनाएको छ । ग्राहकको समस्याको प्रकृतिअनुसार कम्पनीले रिमोट सपोर्टमार्फत वा आवश्यक परे प्राविधिक टोली ग्राहकको घरमै पठाएर समस्या समाधान गर्नेछ । ग्राहक सेवालाई प्राथमिकता दिँदै आएको भायानेटले नयाँ सेवामार्फत इन्टरनेटमा समस्या आउँदा लामो समयसम्म कुर्नुपर्ने अवस्थालाई कम गर्ने विश्वास लिएको छ । यसबाट ग्राहकले छिटो, सहज र भरपर्दो सेवा अनुभव गर्न सक्ने कम्पनीको अपेक्षा छ । प्राविधिक सहयोगका लागि ग्राहकले भायानेटको सपोर्ट नम्बर ०१–५९७०४४४ मा सम्पर्क गर्न सक्नेछन् । कम्पनीले सेवा प्रयोग गर्दा नियम तथा सर्तहरू लागू हुने जनाएको छ ।
सडकमा जम्मा भएको भीडमाथि चढ्यो ट्रक, ७ जनाको मृत्यु
काठमाडौं । भारतको झारखण्डमा भीषण सडक दुर्घटना हुँदा सात जनाको मृत्यु भएको छ । मृत्यु हुनेमा तीन जना बालबालिका पनि छन् । प्रहरीले शुक्रबार घटनाबारे जानकारी दिएको हो । यसअघि भएको एउटा दुर्घटनालाई लिएर सडकमा मानिसहरूको भीड जम्मा भएका बेला तीव्र गतिमा आएको १८ चक्के ट्रकले उनीहरूलाई किचेको थियो । झारखण्डको खून्टी जिल्लामा बिहीबार राति उक्त दुर्घटना भएको हो । घटनाप्रति झारखण्डका मुख्यमन्त्री हेमन्त सोरेनले दुःख व्यक्त गर्दै मृतकका परिवारजनप्रति समवेदना प्रकट गरेका छन् । समाचार एजेन्सी पीटीआईका अनुसार खून्टीका प्रहरी उपरीक्षक ऋषभ गर्गले बिहीबार राति कर्रा–तोरपा मुख्य सडकमा खाल्डोमा खसेको स्कुटर चालकलाई उद्धार गर्न केही मानिसहरू पुगेको बताएका छन् । उक्त घटनास्थलमा केही महिला र बालबालिकासहित अन्य मानिसहरू पनि जम्मा भएका थिए । उनीहरू दुर्घटनाबारे बुझ्न र उद्धारमा सहयोग गर्न त्यहाँ पुगेका थिए । त्यही क्रममा तोरपातर्फबाट आइरहेको १८ चक्के ट्रकले तीव्र गतिमा मोड काट्ने क्रममा सडकमा जम्मा भएका मानिसहरूलाई किचेको प्रहरी अधिकारीले बताए । उनका अनुसार अँध्यारो भएका कारण ट्रक चालकले सडकमा मानिसहरूको भीड जम्मा भएको नदेखेको हुन सक्ने अनुमान गरिएको छ ।
