४ संस्थापक महाधिवेशन प्रतिनिधि बन्नै छुटे
काठमाडौं । राष्ट्रिय स्वतन्त्र पार्टी (रास्वपा)ले चितवनमा जारी गरेको पहिलो ऐतिहासिक महाधिवेशनमा चार संस्थापक नेताहरू भने महाधिवेशन प्रतिनिधिसमेत बन्न पाएनन् । २०७९ असार ७ मा विधिवत दर्ता भई छोटो समयमै राष्ट्रिय राजनीतिमा प्रभाव जमाएको यस दलको महाधिवेशनमा संस्थापक तहका केही प्रमुख अनुहारहरूको अनुपस्थितिले भने पार्टीभित्रको प्रारम्भिक यात्रामाथि पुनः बहस सिर्जना गरेको छ । महाधिवेशनबाट पार्टीका सबै संस्थापक सदस्यहरूलाई केन्द्रीय समितिमा समेट्ने तयारी भए पनि स्थापनाकालदेखि नै चर्चित रहेका चारजना संस्थापक नेताहरू भने यस पटकको प्रक्रियामा सहभागी हुन सकेका छैनन् । पार्टी गठनदेखि संगठन विस्तार र वैचारिक दस्तावेज निर्माणसम्म सक्रिय भूमिका खेलेका यी नेताहरू अहिले रास्वपाको औपचारिक संरचनाभन्दा बाहिर रहेका छन् । पार्टी छाडेका प्रमुख संस्थापक सदस्यहरूमा पूर्वप्रवक्ता तथा पछि महामन्त्री बनेका मुकुल ढकाल, सहमहामन्त्री एवं पूर्व सांसद सुमना श्रेष्ठ, संस्थापक तहका अर्का नेता सन्तोष परियार र ढाकाकुमार श्रेष्ठ रहेका छन् । पार्टीको प्रारम्भिक संरचना निर्माणदेखि नीति तथा संगठन विस्तारसम्म महत्त्वपूर्ण भूमिका निर्वाह गरेका ढकाल एक समय अध्यक्ष रवि लामिछानेपछिको दोस्रो वरीयतामासमेत रहेका थिए । तर, अनुशासन उल्लंघन गरेको आरोपमा पार्टी नेतृत्वले कारबाही गरेपछि उनी रास्वपाबाट अलग भएका हुन् । त्यसैगरी, श्रेष्ठ पार्टीको सहमहामन्त्री तथा समानुपातिक सांसदको जिम्मेवारीमा रहेकी थिइन् । उनी पार्टीको निर्णय प्रक्रिया, कार्यशैली र आन्तरिक व्यवस्थापनप्रति असन्तुष्टि जनाउँदै केही समयअघि नै पार्टीबाट अलग भएकी हुन्। अलग भएपछि उनी हालसम्म कुनै पनि राजनीतिक दलमा सक्रिय रूपमा आबद्ध भएकी छैनन् । जसले उनको आगामी राजनीतिक यात्राबारे समेत चासो बढाएको छ । अर्का संस्थापक सदस्य सन्तोष परियार भने रास्वपा छोडेर प्रगतिशील लोकतान्त्रिक पार्टीमा प्रवेश गरिसकेका छन् । उनी पनि प्रारम्भिक चरणमा पार्टी निर्माण, संगठन विस्तार र जनसम्पर्क अभियानमा सक्रिय भूमिका निर्वाह गर्ने नेताका रूपमा परिचित थिए । त्यस्तै, पूर्वसांसद ढाकाकुमार श्रेष्ठ पनि यस महाधिवेशनमा प्रतिनिधिको रूपमा देखिने छैनन् । ०७९ को संसदमा समानुपातिक तर्फबाट सांसद बनेका ढाका स्वास्थ्यमन्त्री बन्न २ करोड मागेको आरोपमा पार्टीबाट निकालिएका थिए । उनी पनि पार्टीका संस्थापक सदस्य हुन् ।
सुनिता डंगोल इजरायलमा
काठमाडौ । इजरायलको तेल अभीभमा आयोजना हुने म्युनिसिपल कन्फरेन्सको दशौँ संस्करणमा भाग लिन काठमाडौँ महानगरपालिकाका कार्यवाहक प्रमुख सुनिता डंगोल इजरायल पुगेकी छन् । डंगोलसँगै प्रवक्ता नविन मानन्धर र विपद व्यवस्थापन समितिका संयोजक प्रेम थापा पनि सहभागी छन् । इजरायल सरकार विदेश मन्त्रालयको निमन्त्रणामा उनीहरु शनिवार रातिको उडानबाट कार्यक्रमका लागि प्रस्थान गरेका हुन् । ‘सफल साझेदारी (वीनिङ पार्टनरसिप)’ शीर्षकमा हुने सम्मेलनमा भाग लिन विश्वका १५० भन्दा धेरै सहरका प्रमुख, नगरपालिकाका नेताहरु, सरकारी अधिकारी, सहरी योजनाकार तथा विज्ञहरुको सहभागिता हुनेछ । असार ९, १० र ११ गते गरी ३ दिन चल्ने कार्यक्रममा नेपालबाट काठमाडौँसहित पोखरा महानगरपालिका र जनकपुर नगरपालिकाका प्रमुख तथा प्रतिनिधिहरु सहभागिताका लागि पुगेका छन् । उनीहरु सम्मेलनसँगै आयोजना हुने प्रदर्शनी (एक्पो)मा वृहत् व्यावसायिक भ्रमणमा सहभागी हुनेछन् । सहरी व्यवस्थापनका उन्नत तथा नविन प्रविधिहरू, नविन नगरपालिकाका अभ्यासहरु र स्थानीय शासनका असल तथा सफल मोडलका विषयमा आपसी ज्ञान, सिप र अनुभव आदान प्रदान गर्नु सम्मेलनको मुख्य उद्देश्य हो । यसका लागि विषयगत सम्मेलन र व्यावसायिक सञ्जाल निर्माण सत्रहरु सञ्चालन हुनेछन् । यो कार्यक्रम इजरायलको स्थानीय सरकार महासंघको प्रमुख वार्षिक कार्यक्रम हो । स्थानीय शासनका नेताहरु, सहरी विकास तथा व्यवस्थापनका योजनाकारहरू, नवप्रवर्तनमा काम गर्ने विज्ञहरुका बिचमा हुने छलफलबाट सहरी समस्या समाधानका लागि अत्याधुनिक प्रविधि र उपाय खोजिनेछ । यसका लागि फरक परिवेशका सहरी नेतृत्वमा रहनुभएका मेयरहरू र नगरपालिकाका प्रतिनिधिहरूसँग विचार आदानप्रदान, दिगो सहरी विकास, स्मार्ट सहरहरू, सार्वजनिक सेवा, नविन परियोजनाहरू अन्वेषणका लागि योजना हुन् ।
बाजुरा बस दुर्घटनामा २३ जना घाइते
बाजुरा । साँफे–मार्तडी राजमार्गअन्तर्गत बुढीगङ्गा नगरपालिका–१० रिठा बजार नजिक आज बस दुर्घटना हुँदा २३ जना घाइते भएका छन् । महेन्द्रनगरबाट यात्री लिएर सुपप्र ०१ ००१ ख १३५५ नम्बरको बस ब्रेक फेल भएर बीच सडकमै पल्टिदा उनीहरू घाइते भएका जिल्ला प्रहरी कार्यालयका प्रहरी निरीक्षक नरेशबहादुर शाहीले जानकारी दिए । दुर्घटनाको खबर प्राप्त हुना साथ प्रहरी टोली उद्धारमा खटेको तथा सबै घाइतेलाई जिल्ला अस्पताल पुर्याइएको छ । घाइतेको अवस्था सामान्य छ ।
रास्वपा महाधिवेशनमा शीर्ष नेताहरू भरतपुर जाँदै
काठमाडौं । सत्तारूढ दल राष्ट्रिय स्वतन्त्र पार्टी (रास्वपा)को प्रथम राष्ट्रिय महाधिवेशनलाई सम्बोधन गर्न संसदमा प्रतिनिधित्व गर्ने प्रमुख राजनीतिक दलका शीर्ष तथा वरिष्ठ नेताहरू भरतपुर जाने भएका छन् । महाधिवेशन उद्घाटन सत्रमा विभिन्न दलका नेताहरूले शुभकामना मन्तव्य राख्ने कार्यक्रम तय भएपछि यसलाई रास्वपाको आन्तरिक कार्यक्रम मात्र नभई राष्ट्रिय राजनीतिक महत्त्वको जमघटका रूपमा पनि हेरिएको छ । रास्वपाले आफ्नो पहिलो महाधिवेशनमार्फत संगठनात्मक संरचना निर्माण, नयाँ नेतृत्व चयन तथा आगामी राजनीतिक कार्यदिशा तय गर्ने तयारी गरिरहेका बेला प्रमुख दलहरूको सहभागिताले महाधिवेशनले थप महत्त्व पाएको छ । मुख्य विपक्षी दल नेपाली कांग्रेसका तर्फबाट पार्टी सभापति गगनकुमार थापा महाधिवेशनमा सहभागी हुने भएका छन् । कांग्रेसका सहमहामन्त्री प्रकाश स्नेहीका अनुसार रास्वपाले पठाएको औपचारिक निमन्त्रणाअनुसार सभापति थापाले उद्घाटन सत्रमा उपस्थित भई शुभकामना मन्तव्य दिने कार्यक्रम छ । कांग्रेसले रास्वपाको महाधिवेशनलाई लोकतान्त्रिक अभ्यासको महत्त्वपूर्ण प्रक्रियाका रूपमा लिँदै आफ्नो प्रतिनिधित्व उच्च तहबाट गराउन लागेको जनाएको छ । त्यसैगरी, संसदको तेस्रो ठूलो दल नेकपा एमालेका तर्फबाट पार्टीका वरिष्ठ नेता तथा पूर्व उपमहासचिव प्रदीप ज्ञवाली महाधिवेशनमा सहभागी हुने भएका छन् । एमालेले ज्ञवालीलाई पार्टीको आधिकारिक प्रतिनिधिका रूपमा भरतपुर पठाउने निर्णय गरेको हो ।परराष्ट्रमन्त्रीसमेत भइसकेका ज्ञवालीलाई पार्टीका अनुभवी र वैचारिक नेताका रूपमा चिनिन्छ । यसअघि एमालेको एघारौं महाधिवेशनमा रास्वपाका महामन्त्री कबिन्द्र बुर्लाकोटीले खुला सत्रलाई सम्बाेधन गरेका थिए । संसदको चौथो ठूलो दल नेपाली कम्युनिष्ट पार्टीका तर्फबाट पूर्व उपमहासचिव तथा पूर्वअर्थमन्त्री वर्षमान पुनले महाधिवेशनमा पार्टीको प्रतिनिधित्व गर्ने भएका छन् । माओवादी केन्द्रले पनि रास्वपाको प्रथम महाधिवेशनलाई शुभकामना दिँदै उद्घाटन सत्रमा आफ्नो सहभागिता सुनिश्चित गरेको हो । त्यस्तै, राप्रपाबाट अध्यक्ष राजेन्द्र लिङ्देन जाने कार्यक्रम रहेको रहेको छ । यस्तै, संसदमा प्रतिनिधित्व गर्ने अन्य दलहरूबाट समेत प्रतिनिधिहरू महाधिवेशनमा सहभागी हुने तयारी भइरहेको रास्वपाले जनाएको छ । विभिन्न राजनीतिक दलका नेताहरूको उपस्थितिले उद्घाटन सत्रलाई विशेष बनाउने अपेक्षा गरिएको कोषाध्यक्ष लिमा अधिकारीले जानकारी दिइन् । चितवनको भरतपुरमा सुरु हुन लागेको तीनदिने महाधिवेशनमा देशभरबाट चार हजारभन्दा बढी प्रतिनिधि सहभागी हुँदैछन् । महाधिवेशनले नयाँ नेतृत्व चयन गर्नुका साथै पार्टीको विधान, राजनीतिक प्रतिवेदन, सांगठनिक प्रतिवेदन तथा आगामी कार्यदिशामाथि व्यापक छलफल गर्ने कार्यक्रम रहेको छ ।
ट्युनिसियामाथि जापानको ४–० को सानदार जित, नकआउट यात्रा थप बलियो
काठमाडौं । फिफा विश्वकप २०२६ अन्तर्गत समूह ‘एफ’ को दोस्रो चरणको खेलमा एसियाली पावरहाउस जापानले ट्युनिसियामाथि ४–० को शानदार जित दर्ता गरेको छ । मोन्टेरेस्थित एस्टाडियो बीबीभीएमा भएको विश्वकप इतिहासकै ऐतिहासिक १,००० औं खेलमा जापानले सुरुदेखि नै आक्रामक रणनीति अपनाउँदै ट्युनिसियालाई पूर्ण दबाबमा राख्यो । पहिलो खेलमा नेदरल्यान्ड्ससँग २–२ को रोमाञ्चक बराबरी खेलेको जापानले यस एकपक्षीय जितसँगै स्पष्ट ३ अंक जोडेर नकआउट चरणको यात्रा बलियो बनाएको छ । पहिलो खेलमा स्वेडेनसँग ५–१ को भारी अन्तरले पराजित भएको ट्युनिसियाका लागि यो लगातार दोस्रो हार हो, जसले उसको अघिल्लो चरण प्रवेशको सम्भावनालाई निकै कमजोर बनाएको छ । खेलको चौथो मिनेटमै मिडफिल्डर दाइची कामाडाले उत्कृष्ट गोल गर्दै जापानलाई सुरुवाती अग्रता दिलाएका थिए । त्यसपछि लगातार आक्रमण बुनेको जापानका लागि ३१औं मिनेटमा फरवार्ड अयासे उएडाले दोस्रो गोल थपे । दोस्रो हाफमा पनि ट्युनिसियाको डिफेन्स लाइनलाई व्यस्त राखेको जापानका लागि ६९औं मिनेटमा जुन्या इतोले काउन्टर अट्याकमा प्रहार गर्दै टोलीलाई ३९० को स्थितिमा पुर्याए । खेलको ८३औं मिनेटमा उएडाले व्यक्तिगत दोस्रो तथा टोलीका लागि चौथो गोल गरेपछि जापानले मैदानमा ४–० को शानदार जित सुनिश्चित गर्यो ।
प्रतिनिधिबाट मात्रै उठ्यो २ करोड १० लाख शुल्क
काठमाडौं । सत्तारुढ राष्ट्रिय स्वतन्त्र पार्टी (रास्वपा)को प्रथम महाधिवेशनबाट प्रतिनिधि शुल्कमार्फत मात्रै २ करोड १० लाख ५५ हजार रुपैयाँ संकलन भएको छ । पार्टीकी कोषाध्यक्ष लिमा अधिकारीका अनुसार महाधिवेशनका लागि कुल ४ हजार २ सय ११ प्रतिनिधि दर्ता भएका छन् । प्रत्येक प्रतिनिधिबाट ५ हजार रुपैयाँका दरले महाधिवेशन प्रवेश शुल्क लिइएको उनले जानकारी दिइन् । रास्वपाका महामन्त्री कविन्द्र बुर्लाकोटीले महाधिवेशन सम्पन्न गर्न करिब ४ करोड ५० लाख रुपैयाँ खर्च लाग्ने अनुमान गरिएको बताए । प्रतिनिधि शुल्कबाट उठेको रकम कुल अनुमानित खर्चको झण्डै ४५ प्रतिशत बराबर रहेको पार्टी नेताहरूले बताएका छन् । चितवनको भरतपुरमा जारी प्रथम महाधिवेशनमार्फत रास्वपाले आगामी कार्यकालका लागि नयाँ नेतृत्व चयन गर्दैछ । पार्टीको विधानअनुसार सभापति, उपसभापति, महामन्त्री, सहमहामन्त्रीलगायत पदाधिकारी तथा केन्द्रीय सदस्यहरूको निर्वाचन हुने कार्यक्रम छ । यसैबीच, पार्टीको निर्वाचन आयोगले उम्मेदवारी दर्ताका लागि लाग्ने मनोनयन शुल्क तथा आवश्यक प्रस्तावक–समर्थकको व्यवस्था सार्वजनिक गरेको छ । आयोगका अनुसार सभापति पदका उम्मेदवारले ५१ हजार रुपैयाँ मनोनयन शुल्क बुझाउनुपर्नेछ । अन्य पदाधिकारी पदका उम्मेदवारका लागि ४१ हजार रुपैयाँ र केन्द्रीय सदस्य पदका उम्मेदवारका लागि २१ हजार रुपैयाँ शुल्क निर्धारण गरिएको छ । केन्द्रीय सदस्य र पदाधिकारीको एकल उम्मेदवारी पर्यो भने पनि उम्मेदवारी शुल्क मात्रै ४१ लाख ७ हजार रुपैयाँ उठ्ने निर्वाचन आयोगका एक सदस्यले जानकारी दिए । ती सदस्यका अनुसार सभापति पदमा एकल उम्मेदवारी परेको खण्डमा ५१ हजार रुपैयाँ उठ्ने छ । यस्तै, अन्य पदाधिकारीका पनि सवै पदमा एकल उम्मेदवारी मात्रै आयो भने ७ लाख ३८ हजार रुपैयाँ उम्मेदवारी मनोनयन शुल्क उठ्ने आयोगका ति सदस्यले जानकारी दिए । ती सदस्यका अनुसार सदस्य पदमा पनि एकल उम्मेदवारी आयो भने पनि ३३ लाख १८ हजार रुपैयाँ मनोनयन शुल्क उठ्ने छ । आयोगका अनुसार पार्टीको केन्दीय समितिका सदस्यहरू १५८ जना रहने व्यवस्था गरिएको छ । यस्तै, पदाधिकारीमा एक सभापति सहित १९ जना रहने छन् । सभापति पदमा उम्मेदवारी दिन चाहनेले एक जना प्रस्तावकसहित कम्तीमा ५१ जना समर्थकको समर्थन जुटाउनुपर्ने व्यवस्था गरिएको छ । त्यस्तै, अन्य पदाधिकारी तथा केन्द्रीय सदस्य पदका उम्मेदवारका लागि एक जना प्रस्तावक र २१ जना समर्थक अनिवार्य गरिएको निर्वाचन आयोगले जनाएको छ ।
सुनचाँदीको मूल्य बढ्यो, तोलामा कति ?
काठमाडौं । नेपाली बजारमा आइतबार (आज) सुनचाँदीको मूल्य बढेको छ । शुक्रबार तोलामा १० हजार पाँचसय रुपैयाँ घटेको सुनको मूल्य आज तोलामा ६ सय रुपैयाँ बढेर २ लाख ८७ हजार ३ सय रुपैयाँ पुगेको नेपाल सुनचाँदी व्यवसायी महासंघले जनाएको छ । गत शुक्रबार मूल्यमा व्यापक गिरावट आउँदा सुनको भाउ २ लाख ८६ हजार सातसय रुपैयाँमा झरेको थियो । यसअघि बिहीबार सुनको भाउ तोलाको २ लाख ९७ हजार २ सय रुपैयाँ थियो । त्यसैगरी आज चाँदीको मूल्य पनि बढेको छ । तोलाको ५० रुपैयाँ बढेर चाँदीको भाउ ४ हजार ६ सय ९० रुपैयाँ पुगेको महासंघले जनाएको छ । गत शुक्रबार चाँदी ४ हजार ६४० रुपैयाँमा कारोबार भएको थियो। गत वर्षको माघ १५ गते सुनको भाउ तोलामा २० हजार पाँचसय रुपैयाँ बढेर तीन लाख ३९ हजार तीनसय रुपैयाँ पुगेको थियो । जुन नेपाली बजारमा हालसम्मकै सबैभन्दा उच्च हो ।
प्रधानमन्त्री बालेन भरतपुर पुगे, स्वागतमा पुगे आईजीपी कार्की
काठमाडौं । प्रधानमन्त्री तथा राष्ट्रिय स्वतन्त्र पार्टी (रास्वपा)का वरिष्ठ नेता बालेन शाह रास्वपाको प्रथम महाधिवेशनमा सहभागी हुन चितवन प्रस्थान गरेका छन् उनी आइतबार त्रिभुवन अन्तर्राष्ट्रिय विमानस्थलबाट बुद्ध एयरको विमानमार्फत भरतपुरका लागि प्रस्थान गरेका हुन् । बालेन शाहको स्वागतका लागि नेपाल प्रहरीका महानिरीक्षक दानबहादुर कार्की भरतपुर विमानस्थल पुगेका छन् । रास्वपाको प्रथम महाधिवेशन चितवनमा आयोजना हुँदैछ । महाधिवेशनमा पार्टीका नेता–कार्यकर्ता तथा प्रतिनिधिहरूको सहभागिता रहने कार्यक्रम रहेको छ । बालेन शाहले पनि महाधिवेशनका विभिन्न कार्यक्रममा सहभागी हुने कार्यक्रम रहेको बताइएको छ । उनी भरतपुर विमानस्थलमा सहभागी हुनुअघि विमानस्थलमा सरसफाइ पनि गरिएको छ ।
