कङ्गोमा इबोलाबाट मृत्यु हुनेको सङ्ख्या ९३० पुग्यो
काठमाडौं । कङ्गोमा फैलिएको इबोलाको प्रकोपबाट मृत्यु हुनेको सङ्ख्या कम्तीमा ९३० पुगेको त्यहाँको स्वास्थ्य मन्त्रालयले जनाएको छ । मन्त्रालयका अनुसार शनिबारसम्म देशभर दुई हजार ३४४ जनामा सङ्क्रमण पुष्टि भएको छ । पछिल्लो २४ घण्टामा मात्र ३७ जनाको मृत्यु भएको छ, जुन एकै दिनमा भएको उच्च मृत्युमध्ये एक हो । पूर्वी कङ्गोमा गत मे १५ मा घोषणा गरिएको यो इबोला प्रकोप हालसम्मकै तीव्रगतिमा फैलिएको प्रकोप भएको अधिकारीले बताएका छन् । यसपटक फैलिएको ‘बुन्डिबुग्यो’ प्रजातिको इबोला भाइरस अन्य प्रकारको तुलनामा कम देखिने भए पनि यसविरुद्ध हालसम्म स्वीकृत खोप वा उपचार विधि उपलब्ध छैन । सबैभन्दा बढी प्रभावित इतुरी प्रान्तमा सुरक्षा चुनौतीका कारण रोग नियन्त्रण तथा उपचारका प्रयास प्रभावित भइरहेका छन् । स्वास्थ्य मन्त्रालयका अनुसार प्रकोप घोषणा भएयता स्वास्थ्य केन्द्र र उपचार टोलीमाथि कम्तीमा १२ वटा आक्रमण भएका छन् । यसैबीच, तलब नपाएको विरोधमा केही स्वास्थ्यकर्मीले काम छाडेका छन् । भाइरस सङ्क्रमणका कारण कम्तीमा ३६ जना स्वास्थ्यकर्मीको मृत्यु भइसकेको मन्त्रालयले जनाएको छ । मन्त्रालयका अनुसार हाल ७२४ जना सङ्क्रमित आइसोलेसन तथा अस्पतालमा उपचाररत छन् । प्रभावित क्षेत्रमा रोग नियन्त्रण, सङ्क्रमितको उपचार र निगरानीका प्रयासलाई तीव्र पारिएको जनाइएको छ ।
‘ड्रागन आर्मर ब्याट्री’सहित जीडब्लूएमले ईभी सुरक्षामा नयाँ मापदण्ड
काठमाडौं । विद्युतीय सवारीसाधनको बजार तीव्र रूपमा विस्तार भइरहेका बेला जीडब्लूएमले आफ्नै ब्याट्री प्रविधि ‘ड्रागन आर्मर ब्याट्री’मार्फत ईभी सुरक्षामा नयाँ मापदण्ड स्थापित गर्ने दाबी गरेको छ । विश्वका अधिकांश अटोमोबाइल कम्पनीले तेस्रो पक्षबाट ब्याट्री खरिद गर्ने गरे पनि जीडब्लूएमले आफ्नै भगिनी कम्पनी एसभीओएलटी इनर्जीमार्फत ब्याट्रीको अनुसन्धान, विकास र उत्पादन गर्दै आएको जनाएको छ । कम्पनीका अनुसार आफ्नै ब्याट्री विकास गर्ने भएकाले गुणस्तर, सुरक्षा र विश्वसनीयतामाथि पूर्ण नियन्त्रण कायम गर्न सम्भव भएको छ । नेपालमा हालै सार्वजनिक गरिएको जीडब्लूएम ओरा ५ ईभी एसयूभीमा पनि एसभीओएलटीले विकास गरेको ‘ड्रागन आर्मर ब्याट्री’ प्रयोग गरिएको छ । वर्षौंको अनुसन्धानपछि विकसित गरिएको यो ब्याट्री आगो तथा पानी प्रतिरोधी सुरक्षा प्रणाली, लामो ड्राइभिङ रेन्ज, फास्ट चार्जिङ क्षमता र उच्च कार्यसम्पादनका विशेषतासहित आएको कम्पनीले जनाएको छ। ‘ड्रागन आर्मर’ नाम ब्याट्रीको विशेष आन्तरिक संरचनाबाट प्रेरित भएको कम्पनीको भनाइ छ । ब्याट्रीभित्रका सेलहरू ड्रागनको खप्टाजस्तै तह–तहमा राखिएकाले विशेष ‘डाउनवर्ड भेन्टिङ’ प्रणाली विकास गरिएको छ । कुनै असामान्य अवस्थामा ताप वा आगो उत्पन्न भए पनि त्यसलाई यात्रु बस्ने क्याबिनतर्फ फैलिन नदिई तलतर्फ बाहिर निकाल्ने व्यवस्था गरिएको कम्पनीले जनाएको छ । यसले यात्रुको सुरक्षामा थप सुरक्षा कवचको रूपमा काम गर्ने विश्वास कम्पनीको छ ।
बुधबारदेखि वर्षा घट्ने, आज र भोलि भने भारी वर्षाको जोखिम
काठमाडौं । जल तथा मौसम विज्ञान विभागले बुधबारदेखि वर्षा क्रमशः कम हुँदै जाने जानकारी दिएको छ । विभागले हाल देशभर मनसुनी वायुको प्रभाव रहेको र मनसुनको न्यून चापीय रेखा सरदर स्थानभन्दा उत्तरतर्फ रहेकाले वर्षा भइरहेको जानकारी दिएको छ । विभागका वरिष्ठ मौसमविद् मीनकुमार अर्यालले आज र भोलि देशका विभिन्न स्थानमा वर्षा भए पनि बुधबारदेखि वर्षा क्रमश कम हुँदै जाने जानकारी दिए । उनका अनुसार आज दिउँसो देशका हिमाली भू–भागका केही स्थानमा तथा पहाडी भू–भागका धेरै स्थानमा मेघगर्जन र चट्याङसहित मध्यम वर्षाको सम्भावना छ । कोशी, बागमती, गण्डकी, लुम्बिनी र सुदूरपश्चिम प्रदेशका तराईका धेरै स्थान तथा मधेस प्रदेशका केही स्थानमा मध्यम वर्षा हुन सक्ने विभागको पूर्वानुमान छ । विभागले कोशी र सुदूरपश्चिम प्रदेशका पहाडी तथा तराईका थोरै स्थान वर्षाको सम्भावना छ । बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भू–भागका एक–दुई स्थानमा भारी वर्षाको सम्भावना छ । आज राति मधेस प्रदेश, कोशी, बागमती, गण्डकी र लुम्बिनी प्रदेशका पहाडी तथा तराईका धेरै स्थानमा मेघगर्जन र चट्याङसहित मध्यम वर्षाको सम्भावना छ । त्यस्तै, कर्णाली र सुदूरपश्चिम प्रदेशका पहाडी भू–भागका केही स्थानमा मेघगर्जन र चट्याङसहित मध्यम वर्षा हुने सम्भावना रहेको विभागले जनाएको छ । विभागका अनुसार कोशी, बागमती, गण्डकी र लुम्बिनी प्रदेशका पहाडी तथा तराईका एक–दुई स्थानमा राति पनि भारी वर्षा हुन सक्ने छ । ती क्षेत्रमा बाढीपहिरो, डुबान तथा गेग्रान बहावको जोखिम रहेका क्षेत्रमा आवश्यक सतर्कता अपनाउन आग्रह गरिएको छ ।
विपीको सम्झनामा एक हजार चार सय धावक दौडिने
काठमाडौं । नेपाली कांग्रेसले पार्टीका संस्थापक नेता तथा प्रथम जननिर्वाचित प्रधानमन्त्री विश्वेश्वरप्रसाद कोइरालाको ४४औँ स्मृति दिवसका अवसरमा आयोजना गर्न लागेको ग्रीन रनमा करिब एक हजार चार सय धावक सहभागी हुने भएका छन् । उपसभापति विश्वप्रकाश शर्माका अनुसार साउन ६ गते आयोजना हुने पाँच किलोमिटरको ग्रीन रन जलवायु परिवर्तनप्रति जनचेतना अभिवृद्धि गर्ने उद्देश्यसहित सञ्चालन गर्न लागिएको हो । कांग्रेसका अनुसार दौडमा विभिन्न उमेर समूहका करिब एक हजार चार सय प्रतिस्पर्धीले सहभागिता जनाउनेछन् । ‘जलवायु जनचेतना जगाऔँ, जुटौँ’ भन्ने नारासहित हुने दौड ललितपुरस्थित यूएन पार्कबाट सुरु हुनेछ । ग्रीन रनपछि जावलाखेलमा जलवायु परिवर्तनका चुनौती र समाधानका विषयमा विज्ञहरूको सहभागितामा अन्तरक्रिया कार्यक्रमसमेत आयोजना गरिने कार्यक्रम रहेको छ ।
नेपाल चेम्बर र स्पेनिश चेम्बरबीच एमओयू गर्ने सहमति, व्यापार र लगानीका नयाँ अवसर खोजिने
काठमाडौं । नेपाल चेम्बर अफ कमर्स र स्पेनिश चेम्बर अफ कमर्सले द्विपक्षीय व्यापार, लगानी र निजी क्षेत्रबीचको सहकार्य विस्तार गर्ने विषयमा सहमति जनाएका छन् । दुवै संस्थाले सन् २०२६ को अन्त्य वा २०२७ को प्रारम्भसम्म समझदारीपत्र (एमओयू) मा हस्ताक्षर गर्दै सहकार्यलाई संस्थागत बनाउने तयारी गरेका छन् । नेपाल भ्रमणमा रहेकी स्पेनिश चेम्बर अफ कमर्सकी महानिर्देशक इन्माकुलादा रिएरा इ रेनेसँग चेम्बर भवनमा भएको भेटवार्तामा आर्थिक साझेदारीलाई नयाँ उचाइमा पुर्याउने विषयमा विस्तृत छलफल भएको हो । छलफलका क्रममा नेपालको सुदृढ बन्दै गएको राजनीतिक स्थायित्व र भारत–चीनबीचको रणनीतिक भौगोलिक अवस्थाले विदेशी लगानी तथा व्यापार विस्तारका लागि अनुकूल वातावरण सिर्जना गरेको निष्कर्ष निकालिएको थियो । सहकार्यअन्तर्गत स्पेनिश चेम्बर अफ कमर्सले सन् २०२७ को फेब्रुअरी–मार्चमा आठदेखि नौवटा स्पेनी कम्पनी सहभागी हुने व्यवसायिक प्रतिनिधिमण्डल नेपाल पठाउने तयारी गरेको जनाएको छ । भ्रमणका क्रममा नेपाली र स्पेनी उद्यमीबीच प्रत्यक्ष व्यावसायिक सम्बन्ध विस्तार गर्न तथा नयाँ लगानीका अवसर पहिचान गर्न व्यवसायिक फोरम आयोजना गरिनेछ । दुवै पक्षले व्यापार र लगानी प्रवर्द्धनका लागि सरकारी तहको सहकार्य प्रभावकारी बनाउने, व्यवसायिक भिसा प्रक्रियालाई सहज बनाउने, उच्चस्तरीय भ्रमणलाई प्रोत्साहन गर्ने तथा युरोपेली संघ (ईयू)–भारत व्यापार वार्ताबाट नेपालले लिन सक्ने अवसरबारे पनि छलफल गरेका छन् । बैठकले नवीकरणीय ऊर्जा, जलविद्युत्, सौर्य तथा वायु ऊर्जा, जल व्यवस्थापन, स्मार्ट सिटी, यातायात पूर्वाधार, पर्यटन, आतिथ्य, कृषि तथा खाद्य प्रशोधनलाई सहकार्यका प्राथमिक क्षेत्रका रूपमा अघि बढाउने सहमति गरेको छ । नेपालबाट उच्च गुणस्तरको अर्थोडक्स चिया, अर्गानिक कफी, ठूलो इलाइची, जडीबुटी, सुगन्धित वनस्पति, अत्यावश्यक तेल, पश्मिना, हस्तनिर्मित गलैँचा, हस्तकला सामग्री, हस्तनिर्मित कागज, चाँदीका गरगहना, अर्गानिक मह तथा बाँसजन्य उत्पादन स्पेन निर्यातको राम्रो सम्भावना रहेको छलफलमा उल्लेख गरिएको थियो । त्यसैगरी स्पेनले नवीकरणीय ऊर्जा, सिँचाइ, कृषि तथा स्वास्थ्य उपकरण, पानी प्रशोधन र पर्यटन व्यवस्थापनमा आफ्नो आधुनिक प्रविधि तथा अनुभव नेपालसँग साझेदारी गर्न सक्ने विश्वास व्यक्त गरेको छ । दुवै चेम्बरले म्याड्रिड, बार्सिलोना र काठमाडौंमा आयोजना हुने अन्तर्राष्ट्रिय व्यापार मेलामा सक्रिय सहभागिता जनाउने, डिजिटल व्यापार तथा ई–कमर्समार्फत व्यावसायिक सम्बन्ध विस्तार गर्ने र दक्षिण एसियामा अनुभव भएका स्पेनी कम्पनीलाई नेपालको पूर्वाधार, स्वच्छ ऊर्जा तथा दिगो लगानीका परियोजनामा सहभागी गराउने विषयमा पनि जोड दिएका छन् । भेटवार्ताको अन्त्यमा दुवै पक्षले नियमित व्यवसायिक भ्रमण, निजी क्षेत्रबीचको साझेदारी र संस्थागत सहकार्यलाई अझ सुदृढ बनाउँदै आगामी वर्षहरूमा नेपाल–स्पेन व्यापार तथा लगानीलाई उल्लेखनीय रूपमा विस्तार गर्न सकिने विश्वास व्यक्त गरेका छन् ।
प्रधानमन्त्री बालेनले भने- नआत्तिनुस, पुँजी बजार सुधार हुँदैछ
काठमाडौं । लगातार ओरालो लागेको सेयर बजार, खस्कँदै गएको लगानीकर्ताको मनोबल र बजार सुधारको मागका बीच प्रधानमन्त्री बालेन्द्र शाह (बालेन) ले सोमबार पुँजी बजारका प्रमुख सरोकारवालालाई सिंहदरबारमा बोलाएर एक घण्टा लामो छलफल गरेका छन् । नियामक निकाय, स्टक एक्सचेञ्ज, ब्रोकर र लगानीकर्ता एउटै टेबलमा बसेर भएको छलफलमा बजार सुधारका नीतिगत, संरचनागत र नियामकीय विषयमा खुलेर बहस भएको सहभागीहरूले बताएका छन् । प्रधानमन्त्री तथा मन्त्रिपरिषद्को कार्यालयमा भएको बैठकमा नेपाल धितोपत्र बोर्ड (सेबोन), नेपाल स्टक एक्सचेञ्ज (नेप्से), स्टक ब्रोकर एसोसिएसन, नेपाल उद्योग वाणिज्य महासंघअन्तर्गतको पुँजी बजार समिति तथा निजी क्षेत्रका प्रतिनिधिहरू सहभागी थिए । बैठकपछि नेपाल उद्योग वाणिज्य महासंघका कार्यकारिणी समिति सदस्य तथा सेयर लगानीकर्ता अम्बिका पौडेलले छलफल पुँजी बजारको समग्र विकासमा केन्द्रित रहेको बताए । उनका अनुसार अर्थ मन्त्रालय, नेपाल राष्ट्र बैंक, धितोपत्र बोर्ड र नेप्सेले बजारको विकास तथा विस्तारका लागि गर्नुपर्ने सुधारका विषयमा विस्तृत छलफल भएको थियो । प्रधानमन्त्रीले सबै सुझाव गम्भीरतापूर्वक सुनेको र लगानीकर्ताको मनोबल बढाउने दिशामा प्रधानमन्त्री कार्यालयले आवश्यक पहल गर्ने प्रतिबद्धता व्यक्त गरेको उनले बताए । पौडेलका अनुसार प्रधानमन्त्रीले पुँजी बजारलाई केवल सेयर कारोबारको माध्यमका रूपमा नभई पुँजी परिचालन, रोजगारी सिर्जना र आर्थिक गतिविधि विस्तार गर्ने महत्त्वपूर्ण क्षेत्रका रूपमा व्याख्या गरेका थिए । ‘पुँजी बजार चलायमान भयो भने अर्थतन्त्रका अन्य क्षेत्र पनि चलायमान हुन्छन्,’ प्रधानमन्त्रीको भनाइ उद्धृत गर्दै उनले भने । बैठकमा पछिल्ला दिनमा केही लगानीकर्ता पक्राउ परेका घटनाले बजारमा परेको प्रभावबारे भने औपचारिक छलफल नभएको पौडेलले स्पष्ट पारे । उनका अनुसार छलफलको केन्द्रबिन्दु लगानीकर्ताको मनोबल कसरी बढाउने, पुँजी बजारलाई कसरी थप प्रभावकारी बनाउने र यसमार्फत रोजगारी तथा पुँजी निर्माण कसरी बढाउने भन्ने विषय थियो । नेपाल उद्योग वाणिज्य महासंघअन्तर्गत पुँजी बजार समितिका सभापति प्रियराज रेग्मीले बजार सुधारका लागि विस्तृत कार्ययोजना प्रधानमन्त्रीसमक्ष प्रस्तुत गरेका थिए । रेग्मीका अनुसार बजारमा आपूर्ति पक्ष बढे पनि माग पक्ष कमजोर रहेकाले संस्थागत लगानीकर्ताको भूमिका विस्तार गर्नुपर्ने आवश्यकता औंल्याए । त्यससँगै पुँजीगत लाभकरको व्यवस्था पुनरावलोकन गर्दै नाफा–घाटा समायोजनपछि मात्रै खुद नाफामा कर लगाउने व्यवस्था गर्नुपर्ने माग पनि राखिएको उनले बताए । त्यसैगरी, राष्ट्र बैंकमार्फत ब्रोकरलाई मार्जिन लेन्डिङ सञ्चालन गर्न नियामकीय व्यवस्था मिलाउने, गैरआवासीय नेपाली तथा विदेशी संस्थागत लगानीकर्तालाई सहज रूपमा दोस्रो बजारमा प्रवेश गराउने, नेप्सेलाई पुनर्संरचना गरी प्रविधिमैत्री बनाउने र नयाँ कारोबार उपकरण विकास गर्ने प्रस्ताव पनि बैठकमा पेश गरिएको थियो । धितोपत्र बोर्डका सम्बन्धमा आईपीओ प्रणाली सुधार, योग्य संस्थागत लगानीकर्तामार्फत बुक बिल्डिङ प्रणालीलाई प्रभावकारी बनाउने, हालको १० कित्ते नीतिमा पुनर्विचार गर्ने तथा इन्ट्रा–डे कारोबार सञ्चालन गरेर बजारको भोल्युम र लगानीकर्ताको विश्वास बढाउने विषयमा समेत छलफल भएको रेग्मीले जानकारी दिए । उनका अनुसार प्रधानमन्त्रीले गम्भीरतापूर्वक लिँदै नेपाल राष्ट्र बैंक, धितोपत्र बोर्ड, नेप्से, सीडीएससीलगायत सम्बन्धित निकायसँग पुनः छलफल गरी कार्यान्वयनको प्रक्रियामा अघि बढ्ने प्रतिबद्धता व्यक्त गरे । बजार सुधारका लागि छुट्टै समिति गठन गर्नुभन्दा सम्बन्धित निकायहरूले आ–आफ्नो जिम्मेवारीअनुसार काम अघि बढाउने संकेत पनि प्रधानमन्त्रीले दिए । कर नीतिका विषयमा प्रधानमन्त्रीले अन्तिम निर्णय भइनसकेको संकेत गरे पनि लगानीकर्ताले भने घाटा समायोजनसहितको कर प्रणाली लागू गर्न जोड दिए । रेग्मीका अनुसार प्रधानमन्त्रीले बजार बढाउने वा घटाउनेभन्दा पनि स्वस्थ प्रतिस्पर्धा, सुरक्षित लगानी वातावरण र प्रभावकारी पुँजी परिचालन सुनिश्चित हुनुपर्छ भन्ने धारणा व्यक्त गरे । साथै लगानीकर्तालाई अनावश्यक रूपमा आत्तिनुपर्ने अवस्था नरहेको र सरकारले बजार सुधारका लागि आवश्यक पहल गर्ने विश्वास पनि दिलाए ।
ओएन्डएम नसकिँदासम्म स्थायी भर्नामा कडाइ, प्रधानमन्त्रीको स्वीकृतिबिनै लोकसेवामा माग पठाउन नपाइने
काठमाडौं । सरकारले संगठन तथा व्यवस्थापन (ओएन्डएम) सर्वेक्षणका कारण उत्पन्न हुन सक्ने अतिरिक्त कर्मचारीको व्यवस्थापनलाई प्राथमिकता दिँदै नयाँ स्थायी पदपूर्ति प्रक्रियामा कडाइ गर्ने निर्णय गरेको छ । मुख्य सचिव गोविन्दबहादुर कार्कीको अध्यक्षतामा सोमबार बसेको सचिवस्तरीय बैठकले ओएन्डएम कार्यान्वयनपछि दरबन्दी घट्ने र केही निकायमा कर्मचारी बढी हुन सक्ने अवस्थालाई ध्यानमा राख्दै तत्कालका लागि नयाँ स्थायी पदपूर्तिमा नियन्त्रण गर्ने निर्णय गरेको हो । निर्णयअनुसार अब कुनै पनि मन्त्रालय, विभाग वा सरकारी निकायले प्रधानमन्त्री तथा मन्त्रिपरिषद्को कार्यालयको पूर्वस्वीकृतिबिना स्थायी पदपूर्तिका लागि लोकसेवा आयोगमा माग पठाउन पाउने छैन । ओएन्डएमबाट सिर्जना हुने जनशक्ति व्यवस्थापनको अवस्था स्पष्ट नभएसम्म यो व्यवस्था लागू रहने जनाइएको छ । सरकारले हाल कार्यरत स्थायी कर्मचारीको उचित व्यवस्थापनलाई पहिलो प्राथमिकता दिने नीति लिएको छ । ओएन्डएमपछि कुनै कार्यालय वा निकायमा दरबन्दीभन्दा बढी कर्मचारी भए उनीहरूलाई कामविहीन नराखी आवश्यक स्थानमा परिचालन गरिने निर्णय पनि बैठकले गरेको छ । यसका लागि सम्बन्धित मन्त्रालय वा निकायले पहिलो चरणमा आफ्नै स्वीकृत दरबन्दीभित्र कर्मचारी मिलान गर्ने निर्णय बैठकले गरेको छ । त्यसपछि पनि अतिरिक्त कर्मचारी बाँकी रहेमा संघीय मामिला तथा सामान्य प्रशासन मन्त्रालयको समन्वयमा संघीय कार्यालय, प्रदेश सरकार तथा स्थानीय तहका रिक्त दरबन्दीमा खटाइने व्यवस्था गरिने बैठकको निर्णय रहेको छ ।
एकातिर कालोपत्रेको चमक, अर्कोतिर लेदो र हिलोको सास्ती (फोटो फिचर)
काठमाडौं । कोटेश्वर–सूर्यविनायक ६ लेन सडकको निरन्तरता स्वरूप भक्तपुरको सूर्यविनायकदेखि काभ्रेको धुलिखेलसम्म निर्माणाधीन १६ किलोमिटर सडक विस्तार आयोजनाको काम भइरहेको छ । एकातिर सडक खण्डमा अत्याधुनिक पेभर मेसिनद्वारा तिब्र गतिमा उच्च गुणस्तरको पिच (कालोपत्रे) भइरहेको सुखद् क्षण देखिन्छ भने, अर्कोतिर ढल निर्माणमा भएको ढिलाइ र अव्यवस्थित डाइभर्सनका कारण सामान्य वर्षामा पनि यात्रुहरूले कष्टकर, हिलाम्मे र जोखिमपूर्ण यात्रा गर्नुपरेको तीतो यथार्थ छ । आयोजनाको केही खण्डमा सडक चौडा पार्न खनिएको ठाउँमा उचित ढल निकासको व्यवस्था नहुँदा सामान्य वर्षामा पनि सडक लेदो माटो र हिलोको हिलो नहर जस्तै बनेको छ । तस्बिरमा स्पष्ट देखिन्छ कि पानी ट्यांकर, बस र विशेषगरी दुईपाङ्ग्रे सवारी साधन (मोटरसाइकल र स्कुटर) लेदोयुक्त सडकमा सन्तुलन गुमाउँदै जोखिमपूर्ण तवरले अघि बढ्न बाध्य छन् । कतिपय खण्डमा जमेको हिलो पानीको गहिराइ थाहा नहुँदा दुर्घटनाको त्रास उत्तिकै छ । यस विकराल अवस्थाका बीच सडक विस्तारको अर्को उत्साहजनक पाटो पनि छ । सडकको एक भागमा अत्याधुनिक ‘भिजिली’ एस्फाल्ट पेभर मेसिन र हेभी रोलरहरू प्रयोग गरेर नयाँ कालोपत्रे धमाधम गरिँदैछ । धुलो र हिलोबाट आकुलव्याकुल स्थानीय र यात्रुहरूका लागि यो कालोपत्रे बन्नु नयाँ राहतको शुरुवात जस्तै हो । पिच गरिएको खण्ड निकै फराकिलो र अन्तर्राष्ट्रिय स्तरको देखिएको छ, जसले आयोजना सम्पन्न भएपछि यस भेगको आर्थिक परिदृश्य नै बदल्ने संकेत गर्दछ । अरनिको राजमार्गको यो खण्ड भिरालो र पहाडी भूगोलमा पर्ने भएकाले भूक्षय र पहिरो नियन्त्रणका लागि ठूला कंक्रिट रिटेनिङ पर्खालहरू खडा गरिएका छन् । सडकमुनि निर्माण भइरहेको विशाल कंक्रिट अन्डरपासको प्रगति निकै सन्तोषजनक देखिन्छ । यस अण्डरपासले दुवैतर्फका स्थानीय बासिन्दा र साना सवारी साधनलाई राजमार्गको द्रुत गतिको ट्राफिकमा अवरोध नपुर्याई सुरक्षित क्रसिङको सुविधा दिनेछ । यसैगरी, कामदारहरूले फर्मा र फलामको डण्डी बाँधेर ड्रेनेज च्यानल बनाउन कंक्रिट ढलान गरिरहेका दृश्यहरूले पूर्वाधारको जग मजबुत बनाइँदै गरेको पुष्टि गर्छ । सडक निर्माणका कार्यहरू त धमाधम भइरहेका छन्, तर निर्माण व्यवसायीको कमजोर सवारी व्यवस्थापन र सडक डाइभर्सन योजनाको अभावले गर्दा एकातर्फ पिच हुँदा अर्कातर्फको हिलोले यात्रा नारकीय बनाएको छ । सूर्यविनायक–धुलिखेल सडक राष्ट्रको लाइफलाइन हो । यहाँको हिलो सास्ती क्षणिक होस् र कालोपत्रेको चमक छिट्टै सम्पूर्ण खण्डमा फैलियोस् भन्दै निर्माण कार्यलाई तिब्रता र जनमैत्री व्यवस्थापन दुवै सँगै लैजानुपर्ने सरोकारवालाहरूको माग छ ।
