राष्ट्रिय वाणिज्य बैंकको नाफामा १७५.५२ प्रतिशत उछाल
काठमाडौं । राष्ट्रिय वाणिज्य बैंकको चालु आर्थिक वर्ष २०८३/८४ को पहिलो त्रैमासमा खुद नाफा १७५.५२ प्रतिशत बढेर १ अर्ब ६४ करोड ९६ लाख ३७ हजार रुपैयाँ आर्जन गरेको छ । गत आर्थिक वर्ष २०८२/८३ को पहिलो त्रैमासमा बैंकले ५९ करोड ८७ लाख ३३ हजार रुपैयाँ खुद नाफा आर्जन गरेको थियो । चालु आवको असोजसम्ममा बैंकको खुद ब्याज आम्दानी ३७.४६ प्रतिशत बढेर ४ अर्ब १ करोड ४६ लाख ७२ हजार रुपैयाँ गरेको छ । गत वर्षको सोही अवधिमा बैंकले २ अर्ब ९२ करोड ५ लाख ७२ हजार रुपैयाँ खुद ब्याज आम्दानी गरेको थियो । समीक्षा अवधिमा बैंकले खुद शुल्क तथा कमिशन आम्दानी ४५ करोड ८ लाख ३१ हजार रुपैयाँ, कुल सञ्चालन आम्दानी ४ अर्ब ७५ करोड १८ लाख ८३ हजार रुपैयाँ र सञ्चालन नाफा २ अर्ब ३५ करोड १८ लाख ५० हजार रुपैयाँ रहेको छ । समीक्षा अवधिमा बैंकको वितरणयोग्य नाफा १ अर्ब ३७ करोड २३ लाख ९८ हजार रुपैयाँ रहेको छ । यस आधारमा बैंकको लाभांश क्षमता ३५.११ प्रतिशत रहेको छ । १५ अर्ब ६३ करोड ७३ लाख ७७ हजार रुपैयाँ चुक्ता पुँजी रहेको बैंकको जगेडा कोषमा ४० अर्ब ७२ करोड ७७ लाख १९ हजार रुपैयाँ रहेको छ । असोजसम्ममा बैंकको निक्षेप संकलन ४.१५ प्रतिशत बढेर ७ खर्ब १४ अर्ब ६७ करोड ३१ लाख रुपैयाँ र कर्जा प्रवाह २.५१ प्रतिशत बढेर ३ खर्ब ४० अर्ब ४२ करोड ६६ लाख रुपैयाँ गरेको छ । गत वर्षको सोही अवधिसम्मा बैंकले ६ खर्ब ८६ अर्ब १३ करोड ५६ लाख रुपैयाँ निक्षेप संकलन गरी ३ खर्ब ३२ अर्ब ८ करोड ३४ लाख रुपैयाँ कर्जा लगानी गरेको थियो । समीक्षा अवधिमा बैंकको निक्षेप तथा कर्जा अनुपात (सीडी रेसियो) ४८.७४ प्रतिशत रहेको छ । बैंकको प्रतिसेयर आम्दानी १५.३२ रुपैयाँबाट बढेर ४२.२० रुपैयाँ पुगेको छ । समीक्षा अवधिमा बैंकको खराब कर्जा (एनपीएल) बढेको छ । गत वर्षको असोजमा ३.८३ प्रतिशत रहेको खराब कर्जा चालु आवको असोजमा बढेर ३.८९ प्रतिशत पुगेको छ ।
विराटनगर किङ्सले सुदूरपश्चिम रोयल्सलाई ३५ रनले हरायो
काठमाडौं । नेपाल प्रिमियर लिग (एनपीएल) अन्तर्गत शनिबार भएको ५ ओभरको रोमाञ्चक खेलमा विराटनगर किङ्सले सुदूरपश्चिम रोयल्सलाई ३५ रनले पराजित गर्दै प्रतियोगितामा पहिलो जित दर्ता गरेको छ । वर्षाका कारण मैदान हिलो भएकाले निर्धारित ५ बजेको खेल ढिला गरी राति ९ः१५ मा सुरु भएको थियो । सुरुमा सुदूरपश्चिमका खेलाडीहरू मैदानको अवस्था र विदेशी खेलाडीको असहमतिका कारण टसका लागि तयार नहुँदा अन्योल सिर्जना भए पनि अन्ततः सुदूरपश्चिमका कप्तान दीपेन्द्रसिंह ऐरीले टस जितेर बलिङ रोजेका थिए । पहिले ब्याटिङ गरेको विराटनगरले शेहान जयासूर्याको विष्फोटक ३९ रन (११ बल), आन्द्रे रसेलको अविजित २९ रन (१० बल) र लोकेश बमको २५ रन (१० बल) को मद्दतमा ५ ओभरमा २ विकेट गुमाउँदै १०५ रनको विशाल योगफल तयार पार्यो । जयासूर्याले सुदूरपश्चिमका श्रीलंकन स्पिनर थरिन्दु रत्नायाकेको पहिलो ओभरमै ५ छक्का प्रहार गर्दै टोलीलाई आक्रामक सुरुआत दिलाएका थिए । सुदूरपश्चिमका लागि अभिनाश बोहराले १ विकेट लिए । १०६ रनको लक्ष्य पछ्याएको सुदूरपश्चिम रोयल्सले ५ ओभरमा २ विकेट गुमाएर ७० रन मात्र बनाउन सक्यो। सुदूरपश्चिमका लागि स्कट कुगेलेइनले अविजित २८ रन, सैफ जैब र आरिफ शेखले समान १७-१७ रन बनाए पनि जितका लागि पर्याप्त भएन । टोलीका प्रमुख ब्याटर शेरफान रुथरफोर्ड र कप्तान दीपेन्द्रसिंह ऐरी सुरुवातमै सस्तोमा आउट भएपछि सुदूरपश्चिम समस्यामा परेको थियो । ब्याटिङ, बलिङ (८ रन दिएर १ विकेट) र फिल्डिङमा सर्वोत्कृष्ट प्रदर्शन गरेका आन्द्रे रसेल खेलका मुख्य आकर्षण बनेका थिए। यो जितसँगै विराटनगरले ३ खेलबाट २ अंक जोड्दै अंक तालिकामा खाता खोलेको छ ।
१०.७७ करोड नाफामा सिटिजन्स बैंक, खराब कर्जा पनि घट्यो
काठमाडौं । सिटिजन्स बैंकले चालु आर्थिक वर्ष २०८३/८४ को पहिलो त्रैमासमा १० करोड ७७ लाख ३ हजार रुपैयाँ खुद नाफा आर्जन गरेको छ । गत आर्थिक वर्ष २०८२/८३ को पहिलो त्रैमासमा बैंकले २२ करोड ४ लाख ११ हजार रुपैयाँ खुद नोक्सानी बेहोरेको थियो । चालु आवको असोजसम्ममा बैंकको ब्याज आम्दानी १०.६५ प्रतिशत घटेर ३ अर्ब ६३ करोड ३० लाख ६५ हजार रुपैयाँ गरेको छ । गत वर्षको सोही अवधिमा बैंकले ४ अर्ब ६ करोड ६३ लाख २६ हजार रुपैयाँ खुद ब्याज आम्दानी गरेको थियो । बैंकको खुद ब्याज आम्दानी ७.४९ प्रतिशत घटेर १ अर्ब ५४ करोड १५ लाख १६ हजार रुपैयाँ गरेको छ । गत वर्षको सोही अवधिमा बैंकले १ अर्ब ६६ करोड ६२ लाख ६३ हजार रुपैयाँ खुद ब्याज आम्दानी गरेको थियो । समीक्षा अवधिमा बैंकले खुद शुल्क तथा कमिशन आम्दानी ५.०७ प्रतिशत बढेर ३६ करोड ८८ लाख ३९ हजार रुपैयाँ, खुद व्यापार तथा अन्य सञ्चालन आम्दानी १८.८६ प्रतिशत घटेर १६ करोड ३ लाख ४९ हजार रुपैयाँ, खुद गैर सञ्चालन आम्दानी २४३.४६ प्रतिशत बढेर ४ करोड ३८ लाख ८५ हजार रुपैयाँ रहेको छ । यस्तै, समीक्षा अवधिमा बैंकको ब्याज खर्च १२.८५ प्रतिशत घटेर २ अर्ब ९ करोड १५ लाख ४८ हजार रुपैयाँ, इम्पेरिमेन्ट चार्ज ३७.९३ प्रतिशत घटेर १ अर्ब ७ करोड ८५ लाख २० हजार रुपैयाँ, सञ्चालन खर्च १.६५ प्रतिशत बढेर ८६ करोड ३२ लाख ९९ हजार रुपैयाँ रहेको छ । समीक्षा अवधिमा बैंकको वितरणयोग्य नाफा ४५ करोड ७७ लाख रुपैयाँ ऋणात्मक रहेको छ भने सञ्चित नाफा ४४ करोड ८४ लाख १५ हजार रुपैयाँ रहेको छ । असोजसम्ममा बैंकको निक्षेप संकलन १२.७८ प्रतिशत बढेर २ खर्ब ४२ अर्ब ७३ करोड २७ लाख रुपैयाँ र कर्जा प्रवाह ४.२१ प्रतिशत बढेर १ खर्ब ८३ अर्ब ४९ करोड ५४ लाख रुपैयाँ गरेको छ । गत वर्षको सोही अवधिसम्मा बैंकले २ खर्ब १५ अर्ब २२ करोड ४६ लाख रुपैयाँ निक्षेप संकलन गरी १ खर्ब ७६ अर्ब ८ करोड १ लाख रुपैयाँ कर्जा लगानी गरेको थियो । समीक्षा अवधिमा बैंकको निक्षेप तथा कर्जा अनुपात (सीडी रेसियो) ७५.७२ प्रतिशत रहेको छ । बैंकको प्रतिसेयर आम्दानी १४.१८ रुपैयाँ धनात्मक रहेको छ । जबकि गत वर्षको असोजमा बैंकको प्रतिसेयर आम्दानी ५.९७ रुपैयाँ ऋणात्मक थियो । समीक्षा अवधिमा बैंकले खराब कर्जा (एनपीएल) घटाएको छ । गत वर्षको असोजमा ६.८४ प्रतिशत रहेको खराब कर्जा चालु आवको असोजमा घटेर ५.७८ प्रतिशतमा झारेको छ । बैंकको पुँजी कोष १२.५२ प्रतिशत रहेको छ ।
प्रेस हस्तक्षेपको छानबिन गर्न सरकारलाई रास्वपाको निर्देशन, न्यायालय शुद्धीकरणको मुद्दा संसद्मा लग्ने
काठमाडौं । राष्ट्रिय स्वतन्त्र पार्टी (रास्वपा) को केन्द्रीय कार्यालयमा सभापति रवि लामिछानेको अध्यक्षतामा बसेको सचिवालय बैठकले सञ्चारगृहमा भएको प्रहरी हस्तक्षेप, न्यायपालिकासम्बन्धी विवाद, मधेस प्रदेशको संगठन सुदृढीकरण तथा चीन भ्रमणलगायतका विषयमा विभिन्न महत्त्वपूर्ण निर्णयहरू गरेको छ । बैठकले लोकतान्त्रिक प्रणाली, पूर्ण प्रेस तथा अभिव्यक्ति स्वतन्त्रतामा पार्टीले कहिल्यै सम्झौता नगर्ने स्पष्ट पार्दै २०८३ कात्तिक १३ गते प्रहरी प्रशासनमार्फत सञ्चार क्षेत्रमा भएका गतिविधिहरू संविधान र दलको आदर्शविपरीत रहेको ठहर गरेको छ । सो घटनामा गैरजिम्मेवार आदेश दिने व्यक्तिहरूको अविलम्ब पहिचान र छानबिन गरी कडा कारबाही गर्न रास्वपाले सरकारलाई निर्देशन दिएको छ । यस्तै, कतिपय न्यायाधीशहरूसमेत मुछिएका गम्भीर विचलन र अनुचित साँठगाँठका घटनाहरूले न्यायपालिकाको निष्पक्षता र गरिमामाथि प्रश्न उठाएको भन्दै बैठकले न्यायालयको शुद्धीकरणका लागि संसद्बाटै निर्णायक कदम चाल्न संसदीय दललाई निर्देशित गरेको छ । यसैगरी, मधेस प्रदेशमा पार्टी संगठनलाई सुदृढ बनाउन सहमहामन्त्री हरि ढकाल नेतृत्वको समितिले पेस गरेको ‘मधेस प्रदेश संगठन अडिट प्रतिवेदन, २०८३’ का सिफारिसहरूलाई आवश्यकताका आधारमा प्रभावकारी रूपमा कार्यान्वयनमा लैजाने निर्णय गरिएको छ । साथै, चिनियाँ कम्युनिस्ट पार्टी (सीपीसी) को औपचारिक निमन्त्रणालाई स्वीकार गर्दै द्विपक्षीय सम्बन्ध थप सुदृढ बनाउन महामन्त्री विपिनकुमार आचार्यको नेतृत्वमा रास्वपाको प्रतिनिधिमण्डल कात्तिक अन्तिम साता चीन भ्रमणमा जाने निर्णयसमेत बैठकले गरेको छ ।
५-५ ओभरको खेल खेल्न मानेन सुदूरपश्चिमले, मैदान छाडेर बाहिरिए खेलाडी
काठमाडौं । नेपाल प्रिमियर लिग (एनपीएल) अन्तर्गत सुदूरपश्चिम रोयल्स र विराटनगर किङ्सबीचको खेल अझै सुरु हुन सकेको छैन । वर्षाका कारण प्रभावित बनेको उक्त खेललाई अम्पायरहरूले ५-५ ओभरमा घटाएर खेलाउने निर्णय गर्दै साँझ ७ः२५ बजे टस र ७ः४१ बजेबाट खेल सुरु गर्ने समय तय गरेका थिए । तर, उक्त निर्णयप्रति सुदूरपश्चिम रोयल्सले असहमति जनाएपछि खेल अन्योलमा परेको हो । मैदानमै सुदूरपश्चिम रोयल्सका कप्तान दीपेन्द्रसिंह ऐरी, मुख्य प्रशिक्षक मिसबाह उल हक, नेपाल क्रिकेट संघ (क्यान) का सचिव पारस खड्का तथा अम्पायर र क्युरेटरबीच लामो छलफल भए पनि कुनै निष्कर्ष निस्कन सकेन । छलफल निष्कर्षविहीन बनेपछि कप्तान दीपेन्द्रसिंह ऐरीसहित सुदूरपश्चिमका अन्य खेलाडीहरू मैदान छाडेर बाहिरिएका छन् भने मैदानमा विनोद भण्डारी मात्रै देखिएका छन् । अर्कोतर्फ विराटनगर किङ्सका खेलाडीहरू भने मैदानमै उपस्थित छन् । वर्षा थमिसकेको अवस्थामा पनि खेल नहुने संकेत पाएपछि रंगशालामा उपस्थित समर्थकहरूले मोबाईलको टर्च बालेर विरोध जनाइरहेका छन् ।
पत्रकारमाथिको धरपकड र सञ्चारगृहमा प्रहरी प्रवेशबारे छानबिन गर्न सरकारलाई रास्वपाको निर्देशन
काठमाडौं । राष्ट्रिय स्वतन्त्र पार्टी (रास्वपा) ले पत्रकारहरूमाथि भएको धरपकड र सञ्चारगृहमा प्रहरी प्रवेशको विषयलाई गम्भीरतापूर्वक लिँदै त्यसको निष्पक्ष छानबिन गरी दोषीलाई कारबाही गर्न सरकारलाई स्पष्ट निर्देशन दिएको छ । रास्वपा सचिवालयको बैठकपछि सञ्चारकर्मीहरूसँग कुराकानी गर्दै पार्टीका सभापति रवि लामिछानेले संविधान र प्रजातन्त्रभन्दा माथि कोही पनि नरहेको बताए । उनले भने, ‘संविधानभन्दा माथि र प्रजातन्त्रभन्दा ठूलो कोही छैन । आँच आउने क्रियाकलाप जसले गरे पनि सजायको भागीदार हुनुपर्छ । संविधानलाई नै बेवास्ता गर्ने किसिमले जोसुकै संलग्न भए पनि म होऊँ वा अर्कै कोही कारबाहीको भागीदार हुनुपर्छ । ’ त्यस्तै, पार्टीका प्रवक्ता जगदीश खरेलले रास्वपा प्रेस स्वतन्त्रताको पक्षमा सधैँ दृढ रहेको र यसमाथि कुनै पनि हस्तक्षेप स्वीकार्य नहुने स्पष्ट पारे । ‘पत्रकार तथा सञ्चारकर्मीहरूलाई पक्राउ गर्ने काम किन, कसरी र कसको निर्देशनमा भयो, त्यसको सूक्ष्म छानबिन गरी सत्यतथ्य पत्ता लगाउन र दोषीमाथि परिणाममुखी कारबाही गर्न सरकारलाई निर्देशन दिइएको छ,’ प्रवक्ता खरेलले भने । उनले पत्रकारहरू कुनै दल वा सरकारको नभई राज्यको चौथो अंग भएको उल्लेख गर्दै चौथो अंगमाथिको यस्तो धरपकड रास्वपालाई कदापि मान्य नहुने बताए ।
पुल नहुँदा किसानको उत्पादन बारीमै कुहिने समस्या समाधान गर्ने सुधन गुरुङको प्रतिबद्धता
काठमाडौं । सडक र पुलको अभावमा कृषकले उत्पादन गरेको कृषि उपज बजारसम्म पुर्याउन नसक्दा किसानले वर्षौंदेखि सास्ती खेप्दै आएका छन् । उत्पादन गरेको तरकारीले उचित मूल्य नपाउने र बजारसम्म पुर्‍याउनसमेत कठिनाइ हुने समस्याले कृषकको मेहनत खेर जाने गरेको छ । यस्तै, समस्याबाट पीडित गोरखाको गण्डकी गाउँपालिकाका स्थानीयले गृहमन्त्री सुधन गुरुङसँग आफ्नो समस्या राखेका छन् । मतदाता भेटघाटका क्रममा गोरखाको गण्डकी गाउँपालिका पुगेका गृहमन्त्री गुरुङसँग स्थानीयले पुलको अभावका कारण कृषि उत्पादनको बजारीकरणमा समस्या भइरहेको गुनासो गरेका हुन् । स्थानीयका अनुसार यातायातको सहज पहुँच नहुँदा किसानले उत्पादन गरेका तरकारी समयमै बजारसम्म पुर्याउन कठिन हुने गरेको छ । जसका कारण तरकारीले उचित मूल्य नपाउने र कतिपय अवस्थामा बिक्री हुन नसक्दा बारीमै कुहिएर जाने अवस्था रहेको उनीहरूले बताएका छन् । कृषकले दिनरात मेहनत गरेर उत्पादन गरेको तरकारी बजारसम्म पुर्याउन नसक्नु र उत्पादनको उचित मूल्य नपाउनु आफूहरूका लागि ठूलो समस्या बनेको स्थानीयको गुनासो छ । पुलको अभावले कृषि उत्पादनको बिक्री वितरणमा मात्र नभई स्थानीयको दैनिक आवागमन र समग्र आर्थिक गतिविधिमा समेत असर परेको उनीहरूले बताएका छन् । स्थानीयका समस्या र गुनासा सुनेका गृहमन्त्री गुरुङले ज्यामीरेघाटमा पक्की पुल निर्माणको प्रक्रिया अघि बढिसकेको जानकारी दिए । पुल निर्माणको प्रक्रिया अगाडि बढेकाले अबको केही समयमै स्थानीयले भोग्दै आएको समस्या समाधान हुने उनले प्रतिबद्धता व्यक्त गरे । पक्की पुल निर्माण भएपछि स्थानीयलाई आवतजावत गर्न सहज हुनुका साथै कृषकले उत्पादन गरेका तरकारी तथा अन्य कृषि उपज बजारसम्म पुर्याउन सहज हुने अपेक्षा गरिएको छ । यसबाट कृषकले आफ्नो उत्पादनको उचित मूल्य प्राप्त गर्न र कृषि पेसालाई थप व्यवस्थित बनाउन सहयोग पुग्ने विश्वास गरिएको छ । वर्षौंदेखि पुलको अभावका कारण विभिन्न समस्या भोग्दै आएका स्थानीयले पक्की पुल निर्माणको प्रक्रिया अघि बढेको जानकारीसँगै आफ्नो समस्या समाधान हुने अपेक्षा गरेका छन् ।
सुदूरपश्चिम र विराटनगरबीचको खेल पाँच ओभरको हुने
काठमाडौं । नेपाल प्रिमियर लिग (एनपीएल)को तेस्रो सिजनमा दुईपटकको उपविजेता सुदूरपश्चिम रोयल्स र विराटनगर किंग्सबीचको खेल शनिबार (कात्तिक १४) पाँच ओभरको हुने भएको छ । शनिबार बिहान परेको निरन्तर वर्षाका कारण खेलमा १५ ओभर घटाउँदै पाँच ओभरमा छोट्ट्याइएको हो । पूर्वनिर्धारित तालिकाअनुसार खेल बेलुका ५ बजे सुरु हुनुपर्ने थियो । तर, वर्षाका कारण मैदान भिजेपछि खेल ढिला सुरु गर्न लागिएको हो । अब खेलको टस बेलुका ७ः२५ बजे गरिनेछ । आजै बिहानका निम्ति तय लुम्बिनी लायन्स र चितवनबीचविरुद्धको खेल पनि वर्षाका कारण रद्द भएको थियो । खेलमा सुदूरपश्चिम लगातार दोस्रो जितको खोजीमा छ । टोली हाल दुई खेल खेल्दा समान एक जित र हार व्यहोर्दै पाँचौँ स्थानमा छ । टोलीले लुम्बिनीसँग पहिलो खेल हार्दा पोखरा एभेन्जर्सविरुद्ध ६ विकेटको जित निकालेको थियो । विराटनगर भने पहिलो जितको खोजीमा छ ।
