मुक्तिनाथ विकास बैंकको सीईओमा तारा मानन्धर नियुक्त
काठमाडौं । मुक्तिनाथ विकास बैंकको प्रमुख कार्यकारी अधिकृत (सीईओ) मा तारा मानन्धर नियुक्त भएका छन्। बैंकको सञ्चालक समितिको बिहीबार (वैशाख ३) मा बसेको ३७१ औं बैठकले मानन्धरलाई आगामी ४ वर्षका लागि उक्त पदमा नियुक्त गर्ने निर्णय गरेको हो । मानन्धरको कार्यकाल आगामी २०८३ जेठ १ गतेबाट लागू हुने बैंकले जनाएको छ । हाल बैंकमा कार्यरत सीईओ प्रद्युमन पोखरेलको कार्यकाल २०८३ वैशाख मसान्तमा समाप्त हुने भएपछि बैंकले नयाँ नेतृत्व चयन गरेको हो । मुक्तिनाथ विकास बैंक नेपाल राष्ट्र बैंकबाट ‘ख’ वर्गको इजाजतपत्र प्राप्त राष्ट्रिय स्तरको विकास बैंक हो ।
अब टी-२० दीपेन्द्र र ओडिआई रोहितले सम्हाल्ने, को-को परे टिममा ?
काठमाडौं । नेपाल क्रिकेट संघ (क्यान)ले दुई वटा सिरिज खेल्ने खेलाडीको नाम घाेषणा गरेकाे छ । क्यानले आईसीसी विश्वकप लिग २ अन्तर्गतको त्रिकोणात्मक शृङ्खलाका लागि रोहित पौडेलको नेतृत्वमा टोली घोषणा गरेको छ भने टी-२० का लागि दीपेन्द्र सिंह ऐरीको नेतृत्वमा टीम घोषणा गरेको छ । आईसीसी विश्वकप लिग २ मा रोहितसँगै उपकप्तान दीपेन्द्र सिंह ऐरी, कुशल भुर्तेल, आसिफ शेख, भीम सार्की, आरिफ शेख, बसिर अहमद, गुलशन झा, सोमपाल कामी, सन्दीप लामिछाने, ललित राजवंशी, विनोद भण्डारी, नन्दन यादव, अर्जुन कुमाल र करण केसी रहेका छन् । खेलका लागि हेमन्त धामी, शेर मल्ल, रिजन ढकाल, इशान पाण्डे र देव खनाललाई रिजर्भमा राखिएका छन् । नेपालसहित यूएई र ओमान सहभागी सिरिज आगामी अप्रिल २५ तारिखबाट सुरु हुनेछ । शृङ्खलामा जम्मा ६ खेल हुनेछन् । लिग २ को ढाँचा अनुसार प्रत्येक तीन दुई–दुई पटक आपसमा भिड्ने तालिका छ । यस्तै, यूएईसँगको दुई खेलको टी–२० सिरिजका लागि क्यानले ठूलो फेरबदल गरेको छ । यो सिरिजलाई कप्तान रोहित परेका छैनन् । दीपेन्द्रले याे खेलकाे नेतृत्व गर्नेछन् । सो खेलका लागि दीपेन्द्रसँगै सन्दिप लामिछाने, कुशल भुर्तेल, कुशल मल्ल, सन्दिप जोरा, आरिफ शेख, बसिर अहमद, गुल्शन झा, लोकेश बम, नन्दन यादव, सन्तोष यादव, अर्जुन साउँद, हेमन्त धामी, साहव आलम र शेर मल्ल परेका छन् । खेलको रिजर्भमा प्रतिश जिसी, नारायण जोशी र रसिद खान परेका छन् । नेपालले २० र २१ अप्रिलमा यूएईसँग दुई खेलको टी-२० सिरिज खेल्दैछ । उक्त खेल फ्लडलाइटमा हुने क्यानले जनाएको छ । क्यानले अब एक दिवसिय र टी-२० काे छुट्टै टिम बनाएर खेलाउने तयारी गरेको बुझिन्छ ।
माछापुच्छ्रे बैंकले ल्याउँदै नेपालपे कार्ड, डिस्कभर र आरयूपे कार्ड पनि चल्ने
काठमाडौं । माछापुच्छ्रे बैंक र एनसीएचएलबीच इएफटी कार्ड स्वीचमार्फत नेपालपे कार्डको पेमेन्ट इनेबल गर्न सम्झौता भएको छ । एक औपचारिक कार्यक्रममा माछापुच्छ्रे बैंकको प्रमुख डिजिटल बैंकिङ अधिकृत माधव सुबेदी तथा एनसीएचएलका प्रमुख कार्यकारी अधिकृत नीलेशमान सिंह प्रधानले सम्झौतामा हस्ताक्षर गरे । एनसीएचएलको इएफटी स्वीच नेशनल कार्ड स्वीच (एनपीएस–एनसीएस ) सँग इन्टिग्रेट भइसकेकाले उक्त सम्झौतापश्चात माछापुच्छ्रे बैंकले आफ्नो ग्राहकह?का लागि नेपालपे कार्ड जारी गर्न सक्नेछ । साथै डिस्कभर नेटर्वक अन्तर्गतका अन्तर्राष्ट्रिय कार्डहरू र आरयूपे कार्ड समेत अक्वायर गरी नेपालपे कार्डका कारोबारहरू प्रोसेस गर्न सक्नेछ । पहिलो चरणमा बैंकले आफ्नो १९९ भन्दा वटा एटीएम र ३००० भन्दा वटा पीओएस टर्मिनलमार्फत नेपालपे कार्डको अक्वायरिङ्गका लागि इनेबल गर्नेछ भने क्रमिक रूपमा उक्त कार्ड आफ्नो ग्राहकह?लाई जारी समेत गर्नेछ । एनसीएचएलले हालै नेपालपे कार्डको व्यावसायीक रोलआउट सुरू गरिसकेको छ भने अन्तर्राष्ट्रिय पार्टनर डिस्कभर नेटवकमार्फत नेपालपे कार्ड विश्वव्यापी रूपमा प्रयोग गर्न सकिने भएको छ । नेशनल पेमेन्ट स्विच अन्तर्गत नेपालपे सञ्चालनमा आएसँगै बैंक तथा वित्तीय संस्था, भुक्तानी सेवाप्रदायक र भुक्तानी प्रणाली सञ्चालकले जारी गर्ने नेपालपे कार्डहरू नेपाल तथा विदेशमा रहेका एटीएम र पीओएस टर्मिनलमा समेत प्रयोग गर्न सकिने भएको छ । साथै अन्तर्राष्ट्रिय डिस्कभर कार्ड तथा डिस्कभर पार्टनर कार्डह? पनि नेपालमा प्रयोग गर्न सकिने भएको छ । एनसीएचएलको इएफटी सर्भिसेसमार्फत हाल १० वटा सदस्य बैंक वित्तीय संस्थाह?ले विभिन्न अन्तर्राष्ट्रिय कार्ड स्कीमहरू प्रोसेस गर्दै आइरहेका छन् । हालै इएफटी र नेशनल पेमेन्ट स्वीचबीचको इन्टिग्रेसनसँगै अब नेपालपे कार्ड पनि प्रोसेस गर्न सक्ने भएको हो । इएफटीका अन्य सदस्य बैंक तथा वित्तीय संस्थाहरूले पनि नेपालपे कार्ड अक्वायर तथा इस्यू गर्ने तयारी गरिरहेका छन् । हालसम्म नेपालपेमा ३४ भन्दा बढी बैंक वित्तीय संस्थाहरू आवद्ध भई रोलआउटको विभिन्न चरणमा छन् । नेपालपे कार्ड कार्यान्वयनमा आइसकेको छ र हाल २ वटा कमर्सियल बैंकहरूले कार्ड इस्यू गर्न सुरू गरिसकेका छन् भने तीनवटा कमर्सियल बैंकले अक्वायरिङ्ग पनि गर्दै आइरहेका छन् । नेपालका अग्रणी बैंकहरूमध्येको माछापुच्छ्रे बैंकले हाल १८ लाखभन्दा बढी ग्राहकहलाई सेवा प्रदान गर्दै आइरहेको छ । पछिल्लो समयदेखि बैंक डिजिटलाइजेसनतर्फ केन्द्रित हुँदै आन्तरिक प्रणाली तथा ग्राहक सेवालाई तीव्र रूपमा रूपान्तरण गर्दै आइरहेको छ । देशभर बैंकका १६५ वटा शाखा, १२ विस्तारित काउन्टर, ८८ शाखारहित बैंकिङ सेवा तथा १९९ एटीएम टर्मिनल सञ्चालनमा रहेका छन् । बैंकका हालसम्म ४ लाख भन्दा बढी कार्डहोल्डर ग्राहक रहेका छन् ।
सिटिजन लाइफलाई अन्तर्राष्ट्रिय पहिचान, आईएसओ ९००१ : २०१५ प्रमाणीकरण
काठमाडौं । सिटिजन लाइफ इन्स्योरेन्स कम्पनीले गुणस्तरीय सेवा, प्रभावकारी व्यवस्थापन प्रणाली तथा ग्राहक सन्तुष्टिप्रतिको आफ्नो प्रतिबद्धतालाई थप सुदृढ बनाउँदै आईएसओ ९००१ : २०१५ प्रमाणीकरण प्राप्त गरेको छ । उक्त प्रमाणीकरण युनाइटेड रजिस्ट्रर अफ सिस्टम (यूआरएस) तथा यूकेएएस म्यानेमेन्ट सिस्टममार्फत प्रदान गरिएको हो । यो अन्तर्राष्ट्रिय स्तरको गुणस्तर व्यवस्थापन प्रणाली प्रमाणीकरणले सिटिजन लाइफले आफ्ना सेवा, सञ्चालन प्रक्रिया तथा व्यवस्थापन प्रणालीलाई विश्वस्तरीय मापदण्ड अनुरूप सञ्चालन गरिरहेको पुष्टि गर्दछ । यस प्रमाणीकरणले कम्पनीको कार्यप्रणालीमा पारदर्शिता, दक्षता तथा निरन्तर सुधारको संस्कृतिलाई संस्थागत बनाउँदै ग्राहकहरूलाई अझ भरपर्दो, छिटो, छरितो तथा गुणस्तरीय सेवा प्रदान गर्ने प्रतिबद्धतालाई सुदृढ बनाएको छ । विशेषगरी बीमा दाबी भुक्तानी, ग्राहक सेवा प्रवाह तथा आन्तरिक व्यवस्थापन प्रणालीमा उच्च स्तरको अनुशासन र एकरूपता कायम गर्न यो उपलब्धिले महत्वपूर्ण योगदान पुर्याउने विश्वास कम्पनीले लिएको छ । यस उपलब्धिले कम्पनीको सेवा गुणस्तर र स्थिरतालाई थप सुदृढ बनाउनुका साथै ग्राहक सन्तुष्टि र विश्वास अभिवृद्धि गर्न महत्त्वपूर्ण योगदान पु‍र्याउने कम्पनीले जनाएको छ । यसका अतिरिक्त, नियामक निकायहरूको मापदण्डसँग थप सुसंगतता कायम गर्दै संस्थागत सुशासनलाई मजबुत बनाउने तथा राष्ट्रिय तथा अन्तर्राष्ट्रिय स्तरमा कम्पनीको पहिचान र विश्वसनीयता अझ उचाइमा पुर्याउने विश्वास कम्पनीले लिएको छ।
संसदीय दलको नेता चयन गर्न कांग्रेस सक्रिय, आज सांसदहरूसँग निर्णायक छलफल
काठमाडौं । नेपाली कांग्रेसको संसदीय दलको नेता चयनका लागि गठन गरिएको समितिले प्रतिनिधि सभाका सांसदहरूसँग शुक्रवार (आज) छलफल गर्ने भएको छ । समितिका संयोजक प्रकाश स्नेहीका अनुसार आज अपरान्ह ३ बजे सिंहदरबारस्थित कांग्रेस संसदीय दलको कार्यालयमा पार्टीका सबै सांसदहरूसँग छलफल तय गरिएको छ । संसदीय दलको नेता चयन प्रक्रियालाई अघि बढाउने उद्देश्यले उक्त बैठक आयोजना गरिएको सहमहामन्त्री समेत रहेका स्नेहीले जानकारी दिए । कांग्रेसले दलको नेता निर्वाचन गर्न नसक्दा संवैधानिक परिषदसमेत अपूर्ण रहेको छ ।
कोरियाबाट फर्किएकालाई ‘उद्यमी’ बनाउँदै कोइका, ५० लाखसम्म ऋण दिने
काठमाडौं । दक्षिण कोरियाबाट फर्केका नेपाली कामदारहरूलाई स्वदेशमै उद्यमशील बनाउन र उनीहरूको स्थायी व्यवस्थाका लागि कोरिया अन्तर्राष्ट्रिय सहयोग नियोग (कोइका) ले २.५ मिलियन अमेरिकी डलर (करिब ३७ करोड ३२ लाख रुपैयाँ) सहयोग उपलब्ध गराउने भएको छ । कोइका, कृषि विकास बैंक (एडीबीए) र श्रम, रोजगार तथा सामाजिक सुरक्षा मन्त्रालयको रोहबरमा बिहीबार यससम्बन्धी रणनीतिक वित्तीय सहयोग कार्यक्रमको औपचारिक सुरुवात गरिएको छ । ‘नेपालमा कोरियाबाट फर्केका आप्रवासी कामदारहरूको स्थिर पुनर्मिलनका लागि चरणबद्ध सहयोग प्रणाली सुदृढीकरण’ परियोजना अन्तर्गत यो सम्झौता भएको हो । यस कार्यक्रमले कोरियाबाट फर्केर उद्यम गर्न चाहने र कोइकाको उद्यमी तालिम पूरा गरेका व्यक्तिहरूलाई लक्षित गरेको छ । परियोजनाको कुल बजेट ८ मिलियन (१.२ अर्ब नेपाली रुपैयाँ) अमेरिकी डलर रहेको छ । कोइकाले उपलब्ध गराउने २.५ मिलियन डलर रकम ऋणीहरूको ब्याज अनुदानका लागि मात्र प्रयोग गरिनेछ । कृषि विकास बैंकले ऋण लगानीका लागि करिब १.२ अर्ब नेपाली रुपैयाँ बराबरको पुँजी छुट्याएको छ । यसबाट करिब २०० देखि २५० जना उद्यमीले लाभ पाउने अपेक्षा गरिएको छ । प्रति व्यक्ति औसत ५० लाख रुपैयाँसम्म ऋण प्रवाह हुने प्रक्षेपण गरिएको कोइकाले जनाएको छ । कोइका नेपालका कन्ट्री डाइरेक्टर मुहुन कोङका अनुसार यो कार्यक्रम कोरियामा सिकेको सीप र अनुभवलाई नेपालको आर्थिक विकासमा जोड्न डिजाइन गरिएको हो । तालिम प्राप्त व्यक्तिहरूलाई मात्र ऋणमा पहुँच दिइने भएकाले व्यवसाय सफल हुने सुनिश्चितता रहने उनी बताउँछन् । त्यस्तै, श्रम मन्त्रालयका सहसचिव कृष्ण सापकोटाले यो परियोजनाले सीप विकास र वित्तीय साक्षरतामा सफलता पाएको उल्लेख गर्दै अबको वित्तीय पहुँचले कामदारहरूलाई वास्तविक अर्थमा उद्यमी बनाउने विश्वास व्यक्त गरे । कृषि विकास बैंकका नायब महाप्रबन्धक सुदीप दाहालले बैंक उद्यमशीलता विकास र युवा रोजगारी सिर्जनाका लागि पूर्ण प्रतिबद्ध रहेको र यो कार्यक्रम प्रभावकारी रूपमा कार्यान्वयन गर्ने बताए । कोरियाली सरकारको यो सहयोगले फर्किएका कामदारहरूलाई रोजगारी खोज्नेबाट ‘रोजगारी दिने’ का रूपमा रूपान्तरण गर्ने लक्ष्य राखेको छ । सन् १९९१ देखि नेपालको विकास साझेदार रहेको कोइकाले स्वास्थ्य, शिक्षा, कृषि, र सूचना प्रविधि लगायतका क्षेत्रमा सन् २०२५ सम्म २०० मिलियन डलरभन्दा बढी सहयोग गरिसकेको छ । हालसम्म करिब २ हजार ९२१ स्वयंसेवकले नेपालमा सेवा गरिसकेका छन् भने २ हजार २३० भन्दा बढी नेपाली सरकारी अधिकारीहरूले कोरियामा तालिम प्राप्त गरिसकेका छन् । यो नयाँ वित्तीय साझेदारीले दुई देशबीचको सम्बन्धलाई श्रम आप्रवासनबाट दिगो आर्थिक एकीकरणतर्फ थप उचाइमा पुर्याएको छ ।
कांग्रेसको उच्चस्तरीय रणनीतिक बैठक वैशाख ६ मा बस्ने
काठमाडौं । नेपाली कांग्रेसले सातै प्रदेशका संसदीय दलका नेता तथा पार्टीका तर्फबाट बनेका मुख्यमन्त्रीहरूको संयुक्त बैठक बोलाएको छ । पार्टी प्रवक्ता देवराज चालिसेका अनुसार वैशाख ६ गतेका लागि बैठक तय गरिएको हो । यद्यपि बैठकको समय भने अझै निर्धारण हुन बाँकी रहेको उनले जानकारी दिए । बिहीबार बसेको कार्यसम्पादन समितिको बैठकले उपसभापति विश्वप्रकाश शर्मालाई प्रदेश तथा स्थानीय तहका जनप्रतिनिधिहरूबीच समन्वय गर्ने जिम्मेवारी पनि दिएको छ । कांग्रेसले केन्द्र, प्रदेश र स्थानीय तहबीचको समन्वयलाई थप प्रभावकारी बनाउने उद्देश्यसहित उक्त जिम्मेवारी तोकेको जनाएको छ । पछिल्लो समय सुदूरपश्चिम र गण्डकी प्रदेशमा हालै गरिएको मन्त्रिपरिषद् हेरफेरको विषयमा समेत छलफल भएको थियो । सभापति गगन थापासँग समन्वय नगरी गरीएको उक्त पुनर्गठनलाई नेतृत्वले नोटिसमा राखेकोले सो विषयमा पनि छलफल गर्न उक्त बैठक बोलाइएको एक नेताले जानकारी दिए । प्रवक्ता चालिसेले सरकार पुनर्गठनको विषय मुख्यमन्त्रीहरूको क्षेत्राधिकार भएका बताए ।
बाम एकताका लागि ओलीको ‘ग्रिन सिग्नल’पछि प्रचण्डको भेट, नेताहरुको सक्रियता बढ्यो
काठमाडौं । अहिले कम्युनिष्ट पार्टीहरूको पुनः एकताको विषय चर्चामा छ । विशेषगरी नेकपा एमाले र नेपाली कम्युनिष्ट पार्टी (नेकपा)एकताको विषयलाई नेताहरूले व्यापक रूपमा उठाइरहेका छन् । त्यसका लागि केही शीर्ष नेताहरूको दौडधूप पनि बढेको छ । हाल नेकपा एमालेका अध्यक्ष केपी शर्मा ओली अस्पतालमा छन् । पत्थरीको उपचारपछि बेड रेष्टमा रहेका उनलाई भेट केही दिनअघि नेकपाका नेता नारायणकाजी श्रेष्ठ अस्पतालमै पुगेका थिए । उनले ओलीसँगको भेटमा पार्टी एकताको विषय राखेका थिए । सो छलफलमा ओली सकारात्मक देखिएपछि बिहीबार नेकपाका संयोजक पुष्पकमल दाहाल ‘प्रचण्ड’ नै ओलीलाई भेट अस्पताल पुगेका छन् । नेकपाका एक नेताका अनुसार प्रचण्डले ओलीलाई भेटेर स्वास्थ्य लाभको कामनासँगै पार्टी एकताको विषयमा पनि छलफल गरेका छन् । तीन नेताका अनुसार ओली र प्रचण्डबीच झण्डै ४५ मिनेट कुराकानी भएको थियो । भेटवार्तामा अब कसरी अगाडि बढ्ने, यो विषम परिस्थितिमा पार्टी एकताको विकल्प नरहेको विषयमा पनि घनिभूत ढंगले छलफल भएको र वार्ताका लागि केही नेताहरूलाई नै जिम्मेवारी दिएर अगाडि बढ्नेसम्मको छलफल भएको ती नेताले दाबी गरे । कम्युनिष्ट दल एकताको विषयमा चर्चा भएपछि एमाले र नेकपाका केही नेताहरु सक्रिय भएका छन् । ओली र प्रचण्ड निकट नेताहरूले एकताका लागि पहल गरिरहेका छन् भने एमालेमा ओलीको सार्वजनिक रुपमै आलोचना गर्ने नेताहरु विशेष महाधिवेशनमार्फत ओलीलाई हटाएर नयाँ नेतृत्व ल्याउने तयारी गरिरहेका छन् । विशेष गरेर पूर्वराष्ट्रपति विद्यादेवी भण्डारी अहिले पुनः सक्रिय बनेकी छन् । उनले आफ्नो सम्पर्क कार्यालयमा नेताहरूलाई बोलाएर पार्टीको आगामी रणनीतिको विषयमा दैनिक छलफल गरिरहेकी छन् । एमालेका निवर्तमान उपाध्यक्ष सुरेन्द्र पाण्डेले पनि पार्टी एकताको विषयमा फेसबुकमा टिप्पणी गरेका छन् । उनले प्रश्न गर्दै भनेका छन्, ‘हाम्रा कतिपय कमरेडहरू नेतृत्वमाथि संकट आइलाग्यो भन्दै फेरि पनि ‘बाम एकता’ को दौडधुपमा हुनुहुन्छ, हिजो पद प्राप्तिका लागि एकता गरियो, आज सायद आफ्नो गुम्दो अस्तित्व जोगाउन । तर, पार्टी एकता स्पष्ट विचार र सिद्धान्तका लागि गर्ने कि केही सीमित व्यक्तिको स्वार्थपूर्तिका लागि ?’ उनले नेकपा (एमाले) आफैमा एउटा बलियो र ऐतिहासिक विरासत बोकेको पार्टी भएको उल्लेख गर्दै नेताहरूले तात्कालिक राजनीतिक लाभमात्र हेरेर नहुने उनको भनाइ छ । ‘दीर्घकालसम्म यसलाई कसरी सशक्त र एकताबद्ध राख्ने भन्ने सोच्न जरुरी छ । विचार र निश्चित गन्तव्य बिनाको एकताले अन्ततः पार्टीको मूल्य र मान्यतालाई डाइल्युट मात्र गर्छ । अहिलेको वास्तविक आवश्यकता भनेको पार्टीको पुनार्निर्माण गर्दै क्षमतावान र दक्ष व्यक्तिहरू, विशेषगरी युवाहरूलाई पार्टीमा भित्र्याउनु हो । यसो नगरिए पार्टी झन् साँघुरिँदै जाने निश्चित छ,’ उनले भनेका छन् । उनले विगतमा वैचारिक आधारबिना गरिएको एकताको तीतो परिणाम भोगिसकेको उल्लेख गर्दै भनेका छन्, ‘हिजो मौन बस्नु हाम्रो गल्ती थियो । तर, आज पनि नबोल्नु गम्भीर मूर्खता हुनेछ । नेकपा (एमाले) लाई अब सत्ता र स्वार्थको जोडघटाउ होइन, विधि, सुशासन र परिणाममुखी नेतृत्वसहितको नयाँ मार्गमा अघि बढाउने आँट हामीले गर्नैपर्छ ।’ उनको यस्तो धारणापछि एमालेका महासचिव शंकर पोखरेलले पनि सामाजिक सञ्जालमार्फत नै टिप्पणी गरेका छन् । उनले भनेका छन्, ‘आजभोलि सामाजिक सञ्जालमा मनोगतरुपमा भ्रमपूर्ण एजेन्डा सेटिङ गर्ने र त्यसैलाई आधार बनाएर बहस चलाउने प्रवृत्ति तीव्र रूपमा बढ्दो छ । भाइरल हुने नाममा गम्भीर विषयमा गरिने सस्तो टिकाटिप्पणीले समाजमा भ्रम, अविश्वास र अनावश्यक कटुता मात्र बढाउँछ ।’ उनले कुनै गम्भीर विषय संजालमा देखिएमा तथ्य जाँच्न र आधिकारिक स्रोत सुनेर जिम्मेवार बहसको संस्कार बसाल्न पनि आग्रह गरेका छन् ।
