अब एउटै दिन सेयर किनबेच गर्न पाइने, यस्ता छन् व्यवस्था
काठमाडौं । नेपालको पुँजी बजारमा अन्तरदिवसीय धितोपत्र कारोबार (इन्ट्राडे ट्रेडिङ) सञ्चालन गर्ने तयारी अघि बढेको छ । यसका लागि नेपाल धितोपत्र बोर्डले अन्तरदिवसीय धितोपत्र कारोबारसम्बन्धी नियमावली, २०८३ को प्रारम्भिक मस्यौदा तयार गरी सरोकारवालासँग राय तथा सुझाव माग गरेको छ । पुँजी बजारमा कारोबारको गति, तरलता तथा मूल्य निर्धारण प्रक्रियालाई थप प्रभावकारी बनाउने उद्देश्यले अन्तरदिवसीय कारोबार प्रणाली लागू गर्न लागिएको बोर्डले जनाएको छ । बोर्डले गत असोज ८ गते सार्वजनिक गरेको ‘नेपालमा धितोपत्रको अन्तरदिवसीय कारोबार कार्यान्वयनसम्बन्धी अवधारणापत्र, २०८३’ का आधारमा नियमावलीको मस्यौदा तयार पारेको हो । प्रस्तावित मस्यौदामा अन्तरदिवसीय कारोबार सञ्चालनका लागि नेपाल स्टक एक्सचेन्ज र धितोपत्र दलाल व्यवसायीले बोर्डबाट स्वीकृति लिनुपर्ने व्यवस्था प्रस्ताव गरिएको छ । साथै, तोकिएका मापदण्ड पूरा गरेका सूचीकृत धितोपत्रलाई मात्र यस्तो कारोबारका लागि योग्य मानिने उल्लेख छ । मस्यौदाअनुसार धितोपत्र दलाल व्यवसायीले ग्राहकको पहिचान, वित्तीय क्षमता, जोखिम वहन गर्ने क्षमता तथा कारोबारका लागि उपयुक्तताको मूल्याङ्कन गरेर मात्र अन्तरदिवसीय कारोबारको सुविधा उपलब्ध गराउनुपर्नेछ । कारोबार सुरु गर्नुअघि ग्राहकको आदेश, मार्जिन, जोखिम सीमा र अन्य आवश्यक सर्तसमेत परीक्षण गर्नुपर्ने व्यवस्था प्रस्ताव गरिएको छ । त्यस्तै, अन्तरदिवसीय कारोबार सञ्चालन गर्ने धितोपत्र दलाल व्यवसायीले आवश्यक प्राविधिक प्रणाली, सुरक्षा व्यवस्था तथा वास्तविक समयमै जोखिम नियन्त्रण गर्न सक्ने संयन्त्र स्थापना गर्नुपर्नेछ । ग्राहकले एकै दिन धितोपत्र खरिद वा बिक्री गरी सिर्जना भएको खुला अवस्थालाई सोही दिन विपरीत कारोबार गरेर बन्द गर्नुपर्ने व्यवस्था पनि मस्यौदामा समेटिएको छ । तोकिएको समयभित्र खुला कारोबार बन्द नगरेमा स्वतः बन्द हुने व्यवस्था प्रस्ताव गरिएको छ । यसलाई स्वतः कारोबार बन्द गर्ने प्रक्रिया भनिन्छ । यसका साथै प्रत्येक ग्राहकले तोकिएबमोजिमको मार्जिन कायम राख्नुपर्ने र बजारको उतारचढावअनुसार थप मार्जिन अर्थात् परिवर्तनशील मार्जिन तोक्न सकिने व्यवस्था पनि मस्यौदामा छ । प्रस्तावित नियमावलीमा प्रत्येक ग्राहक, धितोपत्र व्यवसायी, धितोपत्र तथा समग्र बजारका लागि अधिकतम कारोबार सीमा निर्धारण गर्ने व्यवस्था गरिएको छ । जोखिम व्यवस्थापन, आन्तरिक नियन्त्रण तथा गुनासो व्यवस्थापन संयन्त्र स्थापना गर्नु पनि धितोपत्र दलाल व्यवसायीको दायित्व हुने उल्लेख छ । अन्तरदिवसीय कारोबारमा लगानीकर्ताको जोखिम न्यूनीकरण र सचेतना अभिवृद्धिका लागि बोर्ड, धितोपत्र बजार तथा धितोपत्र दलाल व्यवसायीले लगानीकर्ता शिक्षा र सचेतनामूलक कार्यक्रम सञ्चालन गर्नुपर्ने प्रस्ताव गरिएको छ । बोर्डले आवश्यकताअनुसार यस्तो कारोबार प्रणाली चरणबद्ध रूपमा लागू गर्न सक्ने व्यवस्था पनि मस्यौदामा राखिएको छ । बोर्डले प्रस्तावित नियमावलीको प्रारम्भिक मस्यौदामा आगामी मंसिर ४ गतेभित्र राय तथा सुझाव पठाउन सरोकारवाला सबैलाई अनुरोध गरेको छ । मस्यौदामा प्राप्त सुझावका आधारमा नियमावलीलाई अन्तिम रूप दिने प्रक्रिया अघि बढाइनेछ । अन्तरदिवसीय कारोबार प्रणाली कार्यान्वयनमा आएमा लगानीकर्ताले एउटै कारोबार दिनभित्र धितोपत्र खरिद तथा बिक्री गर्न सक्नेछन् । यद्यपि, प्रस्तावित व्यवस्थाअनुसार यस्तो कारोबारमा मार्जिन, अधिकतम कारोबार सीमा र जोखिम नियन्त्रणसम्बन्धी प्रावधान पालना गर्नुपर्नेछ ।
काठमाडौं महानगरले माग्यो ३५ जना न्यायिक सहजकर्ता
काठमाडौं । काठमाडौं महानगरपालिकाले ३५ जना न्यायिक सहजकर्ता (इन्टर्न) मागेको छ । महानगरपालिकाको कानून तथा मानव अधिकार विभागले न्यायिक समितिअन्तर्गत निःशुल्क कानूनी सेवा प्रवाह तथा न्यायिक कार्यमा सहजीकरण गर्ने उद्देश्यले ३५ जना इन्टर्न छनोट गर्न लागेको हो । महानगरपालिकाले इच्छुक तथा योग्य विद्यार्थीलाई आवेदन दिन आह्वान गरेको छ । छनोट भएका विद्यार्थीले महानगरपालिकाको चालु आर्थिक वर्ष २०८३/८४ मा ६ महिनासम्म इन्टर्नका रूपमा काम गर्ने अवसर पाउनेछन् । महानगरपालिकाको न्यायिक समितिअन्तर्गत कानून तथा मानव अधिकार विभाग तथा विभिन्न वडा कार्यालयमा रहेर इन्टर्नहरूले सेवाग्राहीलाई निःशुल्क कानूनी सेवा प्रदान गर्न र न्यायिक प्रक्रियामा सहजीकरण गर्न सहयोग गर्नेछन् । इच्छुक विद्यार्थीले १५ दिनभित्र महानगरपालिकाको अनलाइन आवेदन प्रणालीमार्फत निवेदन पेस गर्न सक्नेछन् । प्राप्त आवेदनमध्येबाट योग्य उम्मेदवारको संक्षिप्त सूची तयार गरी अन्तर्वार्तामार्फत अन्तिम छनोट गरिने महानगरपालिकाले जनाएको छ । छनोट हुने इन्टर्नले पाउने सेवा तथा सुविधासम्बन्धी व्यवस्था महानगरपालिकाको निर्णयअनुसार हुनेछ ।
नेपालीको दोस्रो ठूलो चाड तिहार सुरु, आज धनतेरस
काठमाडौं । नेपालीको दोस्रो ठूलो चाड तिहार आजदेखि सुरु भएको छ । आज नयाँ गरगहना, सुनचाँदीका सिक्का वा धातुका भाँडाकुँडा किनेर घरमा ल्याई पूजा गरी धनतेरस मनाउने परम्परा छ । त्रयोदशीकै दिन मनाइने कागपूजा र धन्वन्तरी जयन्ती भने भोलि शनिबार परेको छ । आइतबार बिहान चतुर्दशी तिथिमा कुकुर पूजा र सोही दिन साँझ लक्ष्मीपूजा गरिनेछ । कात्तिक २५ गते भाइटीका परेको छ । चन्द्रमासअनुसार कात्तिक कृष्णपक्षको त्रयोदशी तिथिदेखि कात्तिक शुक्लपक्षको द्वितीयासम्म पाँच दिन मनाइने यो पर्व यस वर्ष तिथिको घटबढका कारण छ दिनसम्म मनाइने भएको छ । आज सूर्योदय हुँदा द्वादशी तिथि रहे पनि मध्याह्नअघि नै त्रयोदशी तिथि सुरु हुने भएकाले धनतेरस मनाउन लागिएको पण्डित नारायणप्रसाद दुलालले बताएका छन् । उनका अनुसार आज बिहान ११ बजेर १० मिनेटपछि सुरु हुने त्रयोदशी तिथि भोलि शनिबार बिहान १० बजेर ४७ मिनेटसम्म रहनेछ । मिथिला क्षेत्रमा कात्तिक कृष्णपक्षको त्रयोदशी तिथिमा साँझपख दीपमालिका गर्ने चलनसमेत छ । यस दिन धातुका सामान, भाँडाकुँडा, गरगहना, कुचो र धनियाँलगायत सामग्री किन्ने परम्परा पनि छ । धनतेरसलाई लक्षित गरी नेपाल राष्ट्र बैंकले आज पनि सुनचाँदीका सिक्का बिक्री गर्ने भएको छ । बबरमहलस्थित राष्ट्र बैंकको कार्यालयबाट हिजोदेखि सुनचाँदीका सिक्का बिक्री सुरु गरिएको थियो ।
२ लाख विद्यार्थीको फर्जी विवरण भेटिएपछि शिक्षा मन्त्रालयद्वारा छानबिन समिति गठन
काठमाडौं । विद्यालय शिक्षाको एकीकृत शैक्षिक व्यवस्थापन सूचना प्रणाली (आईईएमआईएस) मा धेरै विद्यार्थीको विवरण दोहोरिएको देखिएपछि शिक्षा तथा खेलकुद मन्त्रालयले छानबिन अघि बढाएको छ । प्रणालीमा व्यापक मात्रामा विवरण दोहोरिएको देखिएपछि मन्त्रालयले यसलाई गम्भीरताका साथ लिँदै छानबिनका लागि मन्त्रीस्तरीय निर्णयमार्फत समिति गठन गरेको हो । सत्यतथ्य अध्ययन गरी दोषीमाथि आवश्यक कारबाहीको सिफारिस गर्न आज बिहिबार मन्त्रीस्तरीय निर्णयबाट ५ सदस्यीय अध्ययन तथा अनुगमन समिति गठन गरिएको छ । मन्त्रालयका खेलकुद तथा विद्यालय शिक्षा महाशाखाका सहसचिव शिवकुमार सापकोटाको संयोजकत्वमा गठित समितिमा शिक्षा विभागका निर्देशक भक्तबहादुर गोदार, मन्त्रालयका कम्प्युटर इन्जिनियर विनोद न्यौपाने र कानुन अधिकृत निकिता दाहाल सदस्य रहेका छन् भने विद्यालय शिक्षा शाखाका उपसचिव शिवप्रसाद रेग्मीलाई सदस्य-सचिवको जिम्मेवारी दिइएको छ । अनौपचारिक अध्ययनअनुसार इ-एमआईएस प्रणालीमा २ लाखभन्दा बढी विद्यार्थीका विवरणहरू दोहोरिएका छन् । यसरी प्रणालीमा देखिएको दोहोरो प्रविष्टिका आधारमा राज्य कोषबाट निकासा हुने अनुदान, छात्रवृत्ति, दिवा खाजा, पोषाक, पाठ्यापुस्तक तथा अन्य सेवा-सुविधाको दुरुपयोग भएको हुन सक्ने भन्दै मन्त्रालयले छानबिन अघि बढाएको शिक्षा तथा खेलकुद मन्त्रीले बताए । ‘हामीले यस विषयलाई गम्भीरताका साथ हेरेका छौं । यसरी दोहोरो विवरण भरेर रकम दुरुपयोग भइरहेको देखिन्छ। अब यसबारे थप छानबिन गरेर दोषीलाई कारबाही हुन्छ,’ मन्त्री पोखरेलले भने । गठित समितिले इ-एमआईएस प्रणालीमा यति ठूलो संख्यामा विवरण दोहोरिनुको प्राविधिक कमजोरी वा नियतवश गरिएको बद्मासीबारे विस्तृत अध्ययन गर्नेछ । गलत तथ्याङ्क पेश गरेर राज्य कोषको दुरुपयोग गर्ने विद्यालय, व्यवस्थापक वा जिम्मेवार व्यक्तिलाई हदैसम्मको कारबाहीका लागि मन्त्रालय समक्ष सिफारिस गर्ने स्पष्ट कार्यादेश समितिलाई दिइएको छ । प्रणालीमा रहेका दोहोरो र फर्जी विवरणहरू हटाएर इ-एमआईएसलाई पूर्ण रूपमा पारदर्शी, सुरक्षित र वास्तविक तथ्याङ्कमा आधारित बनाउन मन्त्रालयले यो कदम चालेको बताएको छ ।
देश जोगाउने र पार्टी जोगाउनेमा फरक हुन्छ: प्रधानमन्त्री बालेन
काठमाडौं । प्रधानमन्त्री बालेन्द्र शाह (बालेन) ले देश जोगाउनु र पार्टी जोगाउनु पूर्ण रूपमा फरक विषय भएको बताएका छन् । बिहीबार राति सामाजिक सञ्जाल फेसबुकमार्फत उनले यस्तो धारणा सार्वजनिक गरेका हुन् । फेसबुक स्टाटसमा राजनीतिक दलहरूतर्फ संकेत गर्दै प्रधानमन्त्री शाहले लेखेका छन्, ‘तपाईंहरूको कार्यकर्ता लड्छन्, नेता हाँसेर बस्छन् । हाम्रा नेता लड्छन्, मानवताले आस गर्छन् । ’ अग्रपङ्क्तिका राजनीतिक शैली र जनअपेक्षाबारे टिप्पणी गर्दै उनले थप लेखेका छन्, ‘फरक यति हो, देश जोगाउने र पार्टी जोगाउनेमा फरक हुन्छ । ‘ प्रधानमन्त्रीको यो अभिव्यक्तिलाई अहिले सामाजिक सञ्जालमा निकै चासोका साथ हेरिएको छ ।
मिश्रीले भेटे गगनलाई
काठमाडौं । भारतीय विदेश सचिव विक्रम मिश्रीले कांग्रेस सभापति गगन थापासँग भेट वार्ता गरेका छन् । प्रधानमन्त्री बालेन्द्र शाहको भारत भ्रमणको तयारीका क्रममा नेपाल आएका मिश्रीले कात्तिक १९ मा कांग्रेस सभापति थापासँग भेटवार्ता गरेका हुन् । मिश्री र थापाबीच बिहीबार दिउँसो बत्तिसपुतलीस्थित द्वारिका होटलमा भेटवार्ता भएको हो । कांग्रेसको १५औं महाधिवेशनबाट सभापति निर्वाचित भएपछि थापाले भारतीय उच्च पदस्थ अधिकारीसँग द्विपक्षीय भेटवार्ता गरेको मिस्रीसँग पहिलो हो । सभापति थापासँग भेट्नेअघि मिश्रीले प्रधानमन्त्री बालेन्द्र शाहसँग सिंहदरबारमा भेटवार्ता गरेका थिए । मिश्रीले आजै राष्ट्रिय स्वतन्त्र पार्टीका सभापति रवी लामिछानेसँग पनि भेटवार्ता गरेका थिए । विदेशी सचिव मिश्री आजै स्वदेश फर्किएका छन् ।
त्रिविले भन्यो- कीर्तिपुरको सात सय रोपनी जग्गा फिर्ता आएकोमा दुविधा छैन
काठमाडौं । त्रिभुवन विश्वविद्यालय (त्रिवि) ले कीर्तिपुरस्थित आफ्नो स्वामित्वमा रहेको सात सय रोपनीभन्दा बढी जमिन फिर्ता प्राप्त गरी आफ्नै व्यवस्थापनमा ल्याएको जनाएको छ । विश्वविद्यालयको जग्गा विभिन्न समयमा स्वयं त्रिविको सम्झौता, नेपाल सरकारको निर्देशन तथा सम्झौता बमोजिम र कतिपय संघ-संस्थाहरूले आफूखुसी भोगचलन गर्दै आएका थिए । पटक-पटक ताकेता गर्दा पनि खाली नभएपछि त्रिविले खोजबिन प्रक्रिया अघि बढाएको थियो । त्रिविका अनुसार, यसअघि त्रिविको जग्गा खोजबिनका लागि २०८१ जेठ १७ गते पूर्वसचिव शारदाप्रसाद त्रितालको संयोजकत्वमा गठित समितिले छानबिन गरी सरकारलाई प्रतिवेदन बुझाएको थियो । सोही प्रतिवेदनको आधारमा त्रिवि कार्यकारी परिषद्को निर्णयअनुसार सामान्य प्रशासन महाशाखाले सार्वजनिक सूचना जारी गर्दै अतिक्रमित जग्गा खाली गर्न सम्बन्धित सबै पक्षलाई औपचारिक पत्राचार गरेको थियो । त्रिविका अनुसार उक्त सूचना र पत्राचारपछि सम्बन्धित संघ-संस्थाहरूले जग्गा फिर्ता गर्न, नवीकरणका लागि वा नयाँ सम्झौता गर्न त्रिविसँग सम्पर्क गरेका छन् । अब सम्पूर्ण जमिन त्रिवि स्वयंको पूर्ण व्यवस्थापनमा रहने गरी फिर्ता आएको र ती निकायहरूले उपभोगका क्रममा निर्माण गरेका भौतिक संरचनाहरू क्रमशः हटाउने र व्यवस्थापन गर्ने प्रक्रिया सुरु भइसकेको जनाइएको छ । ‘त्रिविले सूचना प्रकाशन गरी पत्राचार समेत गरे पश्चात माथि उल्लेखित सबै संघ संस्थाहरू मध्ये केहीले फिर्ता लिन, केहीले नवीकरणका लागि, केहीले सम्झौता गर्न त्रिभुवन विश्वविद्यालयलाई पत्राचार गरेकोले उक्त जमिनहरू त्रिवि स्वयंले व्यवस्थापन गर्ने गरी फिर्ता आएकोमा कुनै दुविधा छैन,’ त्रिविले भनेको छ ।
लुटपाटमा संलग्नलाई पक्राउ गर्न प्रहरीले चलायो गोली
काठमाडौं । काठमाडौंको गोकर्णेश्वरमा प्रहरीमाथि धारिलो हतियार प्रहार गरी भाग्न खोज्ने एक जनालाई गोली प्रहार गरी नियन्त्रणमा लिइएको छ । गोकर्णेश्वर नगरपालिका-३ गाम्चामा बिहीबार साँझ करिब साढे ६ बजे प्रहरी वृत्त बौद्धबाट खटिएको टोलीमाथि आक्रमण गरेपछि नियन्त्रणमा लिने क्रममा ३१ वर्षीय सुजन तामाङमाथि गोली प्रहार गरिएको हो । सस्तोमा अमेरिकी डलर तथा सुन साटिदिने भन्दै सर्वसाधारणलाई ठगी र लुटपाट गर्दै आएका तामाङलाई नियन्त्रणमा लिन खोज्दा उनले प्रहरीमाथि नै धारिलो हतियार प्रहार गरेका थिए । स्थिति नियन्त्रणमा लिन प्रहरीले हवाई फायर गर्नुका साथै तामाङको घुँडामुनि गोली प्रहार गरी उनलाई पक्राउ गरेको छ । प्रारम्भिक अनुसन्धानबाट तामाङ लामो समयदेखि डलर ठगी र लुटपाटका घटनामा संलग्न रहँदै आएको खुलेको छ भने घटनाबारे थप अनुसन्धान भइरहेको प्रहरीले जनाएको छ ।
