विराटनगरले काठमाण्डूलाई दियो ८४ रनको सामान्य लक्ष्य
काठमाडौं । नेपाल प्रिमियर लिग (एनपीएल)को तेस्रो संस्करणअन्तर्गत बिहीबार (आज)को दोस्रो खेलमा विराटनगर किंग्सले काठमाण्डू गोर्खाजसामु ८४ रनको सामान्य लक्ष्य प्रस्तुत गरेको छ । विराटनगरले १८.३ ओभरमा सबै विकेट गुमाउँदै ८३ रनको योगफल तयार पार्यो । विराटनगरका लागि रुपेश सिंहले २६, एन्जेलो म्याथ्युजले २२ र बसिर अहमदले १० रन बनाए । विराटनगर विरुद्ध सन्तोष यादवले ३, सहान अर्चाहिगले २ तथा करण केसी, जहान्दाद खान, शहाव आलम र देव साहले १–१ विकेट लिए । विराटनगर ४ खेलबाट ४ अंक बनाई तालिकाको दोस्रो स्थानमा छ भने काठमान्डु २ खेलबाट १ जित निकाली तालिकाको सातौं स्थानमा रहेको छ । विराटनगर टस हारेर ब्याटिङमा आएको हो ।
नेपालमा आउने भयो ‘हसल बाई नेपहप’, टीभीएस एनटर्क टाइटल स्पोन्सर
काठमाडौं । नेपाली हिप–हप संगीतलाई राष्ट्रियस्तरको मञ्च प्रदान गर्ने उद्देश्यसहित भारतीय चर्चित र्याप रियालिटी शो ‘एमटीभी हसल’को नेपाली फ्रेन्चाइज ‘हसल बाई नेपहप’ नेपालमा आउने भएको छ। उक्त कार्यक्रमको टाइटल स्पोन्सरका रूपमा टीभीएस एनटर्क आबद्ध भएको छ। मलिन मिडिया एन्ड इभेन्ट प्रालिले नेपालमा ल्याउन लागेको यो कार्यक्रम ‘टीभीएस एनटर्क प्रिजेन्ट्स हसल बाई नेपहप’का रूपमा प्रस्तुत हुनेछ। कान्तिपुर टेलिभिजनमार्फत प्रसारण हुने कार्यक्रमलाई प्रिमियम र्याप रियालिटी शोका रूपमा विकास गर्ने तयारी गरिएको आयोजकले जनाएको छ। अन्तर्राष्ट्रियस्तरको र्याप रियालिटी शोको अवधारणामा आधारित भए पनि कार्यक्रममा नेपाली कलाकार, उनीहरूका मौलिक कथा, स्थानीय संस्कृति, सामाजिक परिवेश र नेपालको आफ्नै हिप–हप पहिचानलाई प्राथमिकता दिइनेछ। कार्यक्रममा प्रतिस्पर्धा, मेन्टरसिप र सांगीतिक प्रस्तुतिलाई मुख्य आकर्षणका रूपमा समावेश गरिनेछ। स्थापित र्‍यापरदेखि नयाँ पुस्ताका प्रतिभासम्मलाई राष्ट्रियस्तरमा आफ्नो कला, क्षमता र सिर्जनशीलता प्रस्तुत गर्ने अवसर प्रदान गरिने आयोजकको भनाइ छ। नेपाली युवापुस्तामाझ लोकप्रिय बन्दै गएको हिप–हप संस्कृतिलाई थप उचाइमा पुर्याउने उद्देश्यले टीभीएस एनटर्कले टाइटल स्पोन्सरका रूपमा सहकार्य गरेको हो। युवापुस्ताको ऊर्जा, सिर्जनशीलता र आत्मविश्वाससँग जोडिएको यो सहकार्यले नेपाली हिप–हप क्षेत्रलाई थप प्रोत्साहन गर्ने अपेक्षा गरिएको छ। ‘गल्लीदेखि ग्लोरीसम्म’ भन्ने मूल भावनासहित अघि बढ्ने कार्यक्रमले नेपाली हिप–हप प्रतिभालाई ठूलो राष्ट्रिय मञ्च प्रदान गर्नुका साथै नेपाली संगीतका नयाँ सम्भावना उजागर गर्ने विश्वास आयोजकले व्यक्त गरेको छ। कार्यक्रमको प्रसारण मिति र अन्य विस्तृत जानकारी भने चाँडै सार्वजनिक गरिने जनाइएको छ।
गर्भवती महिलालाई स्वास्थ्य परामर्श दिन नेको इन्सुरेन्सको सहकार्यमा शिविर
काठमाडौं । गर्भवती महिलाको स्वास्थ्य सचेतना अभिवृद्धि तथा सुरक्षित मातृत्व सेवामा पहुँच बढाउने उद्देश्यले काठमाडौंमा मातृ स्वास्थ्य प्रवर्द्धन शिविर आयोजना गरिएको छ। काठमाडौं महानगरपालिका–१९ स्थित शहरी स्वास्थ्य प्रवर्द्धन केन्द्रमा आमा सुरक्षा नेपालको आयोजना तथा नेको इन्सुरेन्स लिमिटेडको सहकार्यमा शिविर सम्पन्न भएको हो। कात्तिक १९ गते आयोजित शिविरमा करिब ५० जनाको सहभागिता रहेको थियो। शिविरमा १५ जना गर्भवती महिला, उनीहरूका परिवारका सदस्य तथा महिला स्वास्थ्य स्वयंसेविकाको सहभागिता थियो। सहभागीलाई गर्भावस्थामा अपनाउनुपर्ने स्वास्थ्य सावधानी, पोषण, मानसिक स्वास्थ्य, सुरक्षित शारीरिक गतिविधि तथा गर्भावस्थाका जोखिमका संकेतबारे जानकारी र परामर्श प्रदान गरिएको थियो। कार्यक्रममा निकिता संग्रौलाले गर्भावस्थामा सुरक्षित रूपमा गर्न सकिने योग तथा शारीरिक अभ्यासबारे जानकारी दिएकी थिइन्। उनले गर्भावस्थामा परिवारको सहयोगको महत्वबारे समेत प्रकाश पारेकी थिइन्। त्यस्तै, डा. सुष्मा ढकालले मातृ मानसिक स्वास्थ्य, पोषण तथा गर्भावस्थाका जोखिमका संकेतसम्बन्धी प्राविधिक सत्र सञ्चालन गरेकी थिइन्। उनले गर्भावस्थाका क्रममा देखिने असामान्य लक्षण समयमै पहिचान गरी स्वास्थ्य संस्थाबाट आवश्यक सेवा लिनुपर्नेमा जोड दिएकी थिइन्। शिविरमा सहभागी गर्भवती महिलाले स्त्रीरोग विशेषज्ञबाट व्यक्तिगत स्वास्थ्य परामर्श तथा भ्रूणको मुटुको धड्कन परीक्षण सेवा प्राप्त गरेका थिए। उनीहरूलाई गर्भावस्थामा आवश्यक सामग्रीसहितको मातृत्व किट र मातृत्व पहिचान ब्याजसमेत वितरण गरिएको थियो। कार्यक्रममा गर्भवती महिलाको स्वास्थ्य र सुरक्षित मातृत्वका लागि परिवारको भूमिकाबारे पनि जानकारी दिइएको थियो। गर्भावस्थाका क्रममा श्रीमान् तथा परिवारका सदस्यले भावनात्मक र व्यावहारिक सहयोग गर्नुपर्ने तथा आवश्यक स्वास्थ्य सेवा लिन सहजीकरण गर्नुपर्ने विषयमा सहभागीलाई सचेत गराइएको थियो। नेको इन्सुरेन्स लिमिटेडले संस्थागत सामाजिक उत्तरदायित्वअन्तर्गत स्वास्थ्य तथा समुदाय केन्द्रित कार्यक्रमलाई प्राथमिकता दिँदै आएको जनाएको छ। मातृ स्वास्थ्यमा केन्द्रित यस सहकार्यले गर्भवती महिला तथा उनीहरूका परिवारमा स्वास्थ्य सचेतना बढाउनुका साथै समयमै आवश्यक स्वास्थ्य सेवा लिन प्रोत्साहन गर्ने अपेक्षा गरिएको छ।
बीमा प्राधिकरणका अध्यक्ष थापालाई जीवन बीमा संघले दियो बधाई
काठमाडौं । जीवन बीमा संघ नेपालले नेपाल बीमा प्राधिकरणका नवनियुक्त अध्यक्ष डा. राजन विक्रम थापालाई बधाई तथा सफल कार्यकालको शुभकामना दिएको छ । संघका प्रतिनिधिमण्डलले बिहीबार नवनियुक्त अध्यक्ष थापालाई भेट गरी उनको नियुक्तिप्रति बधाई दिँदै सफल कार्यकालको शुभकामना व्यक्त गरेको हो । भेटका क्रममा संघका प्रतिनिधिहरूले थापाको नेतृत्वमा नेपालको बीमा क्षेत्र थप व्यावसायिक, पारदर्शी र सुशासित बन्ने विश्वास व्यक्त गरेका छन् । साथै, उनको अनुभव र नेतृत्वले बीमा क्षेत्रको नियामकीय व्यवस्थालाई थप प्रभावकारी र समयसापेक्ष बनाउन योगदान पुग्ने अपेक्षा गरेका छन् । सो अवसरमा जीवन बीमा क्षेत्रको वर्तमान अवस्था, चुनौती तथा अवसर, बीमाको पहुँच र दायरा विस्तार, जनविश्वास अभिवृद्धि, बीमा साक्षरता प्रवर्द्धन तथा सेवाको गुणस्तर सुधारलगायतका विषयमा छलफल भएको थियो । संघले बीमा क्षेत्रको विकास र विस्तारका लागि आवश्यक नीतिगत सुधार, व्यावहारिक नियामकीय व्यवस्था तथा संस्थागत क्षमता अभिवृद्धिमा प्राधिकरणसँग निरन्तर सहकार्य गर्ने प्रतिबद्धता जनाएको छ । जवाफमा नवनियुक्त अध्यक्ष थापाले प्राप्त बधाई तथा शुभकामनाप्रति आभार व्यक्त गर्दै बीमा क्षेत्रको समग्र विकास, स्थायित्व, पारदर्शिता र सुशासनका लागि सबै सरोकारवालासँग सहकार्य गरेर अघि बढ्ने प्रतिबद्धता व्यक्त गरेका छन् । संघले थापाको नेतृत्वमा नेपालको बीमा क्षेत्रले नयाँ उचाइ हासिल गर्ने विश्वाससमेत व्यक्त गरेको छ ।
अन्तर्राष्ट्रिय फुटबलबाट रोनाल्डोले लिए सन्यास
काठमाडौं । विश्व फुटबलका सर्वकालीन महान खेलाडीमध्ये एक क्रिस्टियानो रोनाल्डोले अन्तर्राष्ट्रिय फुटबलबाट सन्यासको घोषणा गरेका छन् । पोर्चुगलको राष्ट्रिय टोलीबाट दुई दशकभन्दा लामो समय बिताएका ४१ वर्षीय रोनाल्डोले बिहीबार (आज) सामाजिक सञ्जालमार्फत आफ्नो अन्तर्राष्ट्रिय यात्रामा पूर्णविराम लगाउने निर्णय सार्वजनिक गरेका हुन् । ‘अब यो जिम्मेवारी नयाँ पुस्तालाई हस्तान्तरण गर्ने समय आएको छ । यो सजिलो निर्णय थिएन,’ उनले सामाजिक सञ्जालमा लेखेका छन् । उनले नोभेम्बरको अन्तर्राष्ट्रिय खेलपछि पोर्चुगलको प्रतिष्ठित सात नम्बरको जर्सी पनि फिर्ता गर्ने बताएका छन् । रोनाल्डोको सन्याससँगै विश्व फुटबलले एउटा असाधारण अन्तर्राष्ट्रिय करिअरलाई बिदाइ गर्ने भएको छ । सन् २००३ मा पोर्चुगलको राष्ट्रिय टोलीबाट डेब्यु गरेका उनले २३४ अन्तर्राष्ट्रिय खेल खेल्दै १४६ गोल गरेका छन् । पुरुष अन्तर्राष्ट्रिय फुटबलमा सर्वाधिक खेल र सर्वाधिक गोलको कीर्तिमान उनकै नाममा छ । उनको अन्तर्राष्ट्रिय करिअरको सबैभन्दा अविस्मरणीय उपलब्धि सन् २०१६ को युरोपियन च्याम्पियनसिपको उपाधि हो । फ्रान्सविरुद्धको फाइनलमा चोटका कारण खेलको सुरुआतमै मैदान छाड्नुपरे पनि उनले टचलाइनबाट टोलीलाई निरन्तर हौसला दिएका थिए । पोर्चुगलले उक्त खेल अतिरिक्त समयमा जित्दै पहिलो पटक युरोपियन च्याम्पियन बनेको थियो । त्यसपछि सन् २०१९ र २०२५ मा यूईएफए नेसन्स लिगको उपाधि जित्दा पनि रोनाल्डो टोलीका प्रमुख सदस्य थिए । पाँच पटकका बालोन डी’ओर विजेतासमेत रहेका उनले आफ्नो खेल जीवनमा व्यक्तिगत कीर्तिमानसँगै राष्ट्रिय टोलीलाई पनि ऐतिहासिक सफलता दिलाए । रोनाल्डोको यात्रा गोल र उपाधिमा मात्र सीमित नरही उनको फिटनेस, अनुशासन, प्रतिस्पर्धात्मक स्वभाव र लामो समयसम्म उच्चस्तरको प्रदर्शन गर्ने क्षमताले नयाँ पुस्ताका खेलाडीलाई समेत प्रेरित गरेको छ । अन्तर्राष्ट्रिय फुटबलबाट बिदा लिए पनि उनले क्लब फुटबलबाट भने सन्यास घोषणा गरेका होइनन् । साउदी अरबको अल नासरबाट व्यावसायिक फुटबल खेलिरहेका रोनाल्डोको क्लब करिअर अझै जारी छ ।
एक लाख रुपैयाँ घुससहित भूमि प्रशासन कार्यालयका नायब सुब्बा पक्राउ
काठमाडौं । सर्लाहीको भूमि प्रशासन कार्यालय मलंगवाका नायब सुब्बा निर्मल तिमल्सिना एक लाख रुपैयाँ घुससहित पक्राउ परेका छन् । मोही कायम भएका जग्गा नामसारी गरिदिने भन्दै सेवाग्राहीसँग घुस मागेको उजुरीका आधारमा अख्तियार दुरुपयोग अनुसन्धान आयोगको टोलीले उनलाई नियन्त्रणमा लिएको हो । अख्तियारको कार्यालय बर्दिवासबाट खटिएको टोलीले तिमल्सिनालाई घुसबापत लिइसकेको एक लाख रुपैयाँसहित नियन्त्रणमा लिएको हो । उनलाई बुधबार (कात्तिक १८ गते) भूमि प्रशासन कार्यालय सर्लाहीबाट पक्राउ गरिएको अख्तियारले जनाएको छ । अख्तियारका अनुसार बिहीबार (कात्तिक १९ गते) विशेष अदालतबाट घुस तथा भ्रष्टाचारसम्बन्धी मुद्दामा म्याद थप गरी उनीमाथि थप अनुसन्धान अघि बढाइएको छ । यस घटनाबारे अख्तियारले बिहीबार प्रेस विज्ञप्ति जारी गर्दै जानकारी दिएको हो ।
