रामबागमा केन्द्रीय सदस्य जुटे, च्यासलमा सचिवालय बैठक अझै जारी
काठमाडौं । नेकपा एमालेको केन्द्रीय कमिटी बैठकका लागि अधिकांश केन्द्रीय सदस्य ललितपुरको झम्सिखेलस्थित रामबाग महलमा पुगिसकेका छन् । केन्द्रीय कमिटी बैठक बस्ने तयारी भइरहे पनि पार्टीको केन्द्रीय कार्यालय च्यासलमा जारी सचिवालय बैठक भने अझै टुंगिएको छैन । केन्द्रीय कमिटी बैठकका एजेन्डा तथा पार्टी पुनर्गठन र निर्वाचन समीक्षा कार्यदलको प्रतिवेदनलाई अन्तिम रूप दिने विषयमा सचिवालयमा छलफल जारी रहेको एक एमाले नेताले जानकारी दिए । सचिवालय बैठकले कार्यदलबाट आएका सुझाव तथा प्रतिवेदनमाथि आवश्यक निर्णय गरेपछि मात्रै केन्द्रीय कमिटी बैठकमा प्रस्तुत गर्ने विषय टुंगो लाग्ने ती नेताले बताए । कार्यदलले निर्वाचन समीक्षा र पार्टी पुनर्गठनसँग सम्बन्धित विभिन्न प्रस्तावलाई समेटेर प्रतिवेदन तयार पारे पनि केही विषयमा अध्यक्ष केपी शर्मा ओलीसहित शीर्ष नेताहरूबीच सहमति जुटाउन बाँकी रहेको बताइएको छ । च्यासलमा सचिवालय बैठक लम्बिँदा रामबागमा पुगेका केन्द्रीय सदस्यहरू भने केन्द्रीय कमिटी बैठक सुरु हुने प्रतीक्षामा छन् । आजको बैठकमा पार्टीको पछिल्लो राजनीतिक अवस्था, निर्वाचन परिणामको समीक्षा, संगठन पुनर्गठन तथा आगामी कार्यदिशासहितका विषयमा छलफल हुने तयारी छ । सचिवालय बैठकले टुंग्याउने निर्णय र प्रस्तावकै आधारमा केन्द्रीय कमिटी बैठकका एजेन्डा अन्तिम रूप दिइने भएकाले दुवै बैठकलाई एमालेभित्र महत्त्वपूर्ण रूपमा हेरिएको छ । रामबाग महलमा केन्द्रीय सदस्यहरू जम्मा भइरहे पनि च्यासलको सचिवालय बैठक कहिले सकिन्छ भन्नेमा स्पष्ट समय तय भइसकेको छैन । सचिवालय बैठक सकिएपछि मात्रै केन्द्रीय कमिटी बैठक औपचारिक रूपमा सुरु हुने सम्भावना छ ।
‘बिर्सिने समस्या सबै अल्जाइमर्स होइनन्’
आज विश्व अल्जाइमर्स दिवस । हरेक वर्ष सेप्टेम्बर २१ तारिखका दिन मनाइने यो दिवसको यसवर्षको नारा ‘जति छिटो थाहा पायो, त्यति नै राम्रो’ भन्ने राखिएको छ । रोगको पहिचान समयमै गर्ने र यो रोग हुन बढावा दिने मुख्य कारक तत्त्वलाई समयमै पहिचान गरेर बिर्सिने रोगबाट बच्न आह्वान गरिएको छ । यो दिवस सन् १९९४ देखि मनाउन थालिएको हो । विश्वको तथ्याङ्कअनुसार ६५ वर्षदेखि ७५ वर्षसम्मका पाँच प्रतिशत जनसङ्ख्या, ७५ वर्षदेखि ८५ वर्षसम्मका १३ प्रतिशत र ८५ वर्ष पार गरेका एक तिहाइ व्यक्तिमा अल्जाइमर्स हुने गरेको छ । सामान्य बिर्सने समस्या र अल्जाइमर्सबीचको फरक के हो ? रोग कसरी पहिचान गर्ने र यसको व्यवस्थापन कसरी गर्ने ? नेपालमा यसको अवस्था कस्तो छ ? यिनै विषयमा अन्नपूर्ण न्यूरो अस्पतालमा कार्यरत न्यूरो फिजिसियन डा. प्रतीक पौडेलसँग गरिएको कुराकानीको सम्पादित अंश : सामान्य रूपमा हुने बिर्सने समस्या र अल्जाइमर्सबीच कसरी फरक छुट्याउने ? उमेर बढ्दै जाँदा मानिसले कहिलेकाहीँ नाम, ठाउँ वा कुनै कुरा तत्काल सम्झन नसक्ने हुन सक्छ । केही समयपछि त्यो कुरा सम्झन सकिन्छ भने त्यसलाई सामान्य उमेरसँग सम्बन्धित बिर्साइका रूपमा लिन सकिन्छ । तर अल्जाइमर्समा पहिले राम्रोसँग परिचित रहेका कुरा नै क्रमशः बिर्सिँदै जान्छन् । उदाहरणका लागि, परिचित मानिसको नाम बिर्सने, पहिलेदेखि थाहा भएको बाटो बिर्सेर हराउने, लामो समयदेखि गर्दै आएको खाना पकाउने वा अन्य दैनिक काम गर्ने तरिका बिर्सने जस्ता समस्या देखिन सक्छन् । त्यससँगै चिडचिडापन, अनावश्यक शंका गर्ने बानी तथा आर्थिक कारोबार वा पैसासम्बन्धी सामान्य काम गर्न कठिनाइ पनि देखिन सक्छ । बिर्सने समस्या देखिँदैमा त्यसलाई अल्जाइमर्स मान्नु हुँदैन । बिर्सने समस्या विभिन्न कारणले हुन सक्छ । भास्कुलर डिमेन्सिया, पार्किन्सन्ससँग सम्बन्धित डिमेन्सिया, डिप्रेसन, फ्रन्टोटेम्पोरल डिमेन्सिया, थाइराइडको समस्या वा भिटामिन बी–१२ को कमीले पनि अल्जाइमर्ससँग मिल्दोजुल्दो लक्षण देखाउन सक्छ । त्यसैले बिर्सने समस्या देखिएपछि सबैभन्दा महत्त्वपूर्ण कुरा त्यसको कारण पहिचान गर्नु हो । कतिपय कारण उपचार गरेपछि सुधार गर्न सकिने पनि हुन्छन् । अल्जाइमर्स हुनुको मुख्य कारण के हो ? अल्जाइमर्सको शतप्रतिशत कारण अहिलेसम्म निश्चित भइसकेको छैन । वैज्ञानिक अध्ययनहरूले मस्तिष्कमा केही प्रोटिन असामान्य रूपमा जम्मा हुनु र अल्जाइमर्सबीच सम्बन्ध देखाएका छन् । परिवारमा अल्जाइमर्सको इतिहास हुनु तथा धूम्रपानजस्ता केही जोखिम कारकसँग पनि यसको सम्बन्ध देखिएको छ । तर एउटै कारणले सबै व्यक्तिमा अल्जाइमर्स हुन्छ भन्ने छैन । कुन उमेर समूहमा अल्जाइमर्स बढी देखिन्छ ? अल्जाइमर्स सामान्यतया उमेर बढ्दै गएपछि बढी देखिन्छ । विशेषगरी ५० वर्षपछि यसको जोखिम बढ्दै जान्छ । युवा उमेरमै सुरु हुने अल्जाइमर्स तुलनात्मक रूपमा दुर्लभ हुन्छ । अल्जाइमर्सको निदान कसरी गरिन्छ ? बिरामीमा देखिएका लक्षण, व्यवहारमा आएको परिवर्तन र दैनिक जीवनमा परेको प्रभावको मूल्यांकन गरिन्छ । परिवारका सदस्यबाट पनि बिरामीको व्यवहार र स्मरणशक्तिमा आएको परिवर्तनबारे जानकारी लिन्छौं । आवश्यकताअनुसार एमआरआईलगायतका परीक्षण गरिन्छ । यसले स्ट्रोक, अन्य प्रकारको डिमेन्सिया वा मस्तिष्कसँग सम्बन्धित अन्य समस्या छुट्याउन सहयोग गर्छ । अल्जाइमर्ससँग सम्बन्धित केही प्रोटिन तथा आनुवंशिक परीक्षण पनि गर्न सकिन्छ । तर यी परीक्षण महँगा हुन्छन् र सबै बिरामीमा अनिवार्य हुँदैनन् । धेरै अवस्थामा लक्षण, परिवारको जानकारी र चिकित्सकीय मूल्यांकनका आधारमा नै निदान गर्न सकिन्छ । अल्जाइमर्सको उपचार सम्भव छ कि छैन ? अहिले सुरु भइसकेको अल्जाइमर्सलाई पूर्ण रूपमा निको पार्ने वा रोगलाई उल्टाएर पहिलेको अवस्थामा पुर्याउने औषधी उपलब्ध छैन । केही औषधीले रोगको प्रगति केही सुस्त बनाउन र बिरामीको जीवनस्तर कायम राख्न सहयोग गर्न सक्छन् । तर अल्जाइमर्सको व्यवस्थापनमा औषधीसँगै निरन्तर हेरचाह अत्यन्त महत्त्वपूर्ण हुन्छ । परिवारले अल्जाइमर्स भएका बिरामीको हेरचाह गर्दा के कुरामा ध्यान दिनुपर्छ ? बिरामीले खाना खान, कपडा लगाउन वा दैनिक काम गर्न बिर्सन सक्छन् । कतिपय अवस्थामा घरबाट बाहिर निस्केर हराउने समस्या पनि हुन सक्छ । त्यसैले सुरक्षित वातावरण बनाउनुपर्छ । सम्भव भएसम्म परिचित वातावरण, नियमित दिनचर्या र निरन्तर हेरचाह कायम राख्नु राम्रो हुन्छ । हेरचाह गर्ने व्यक्ति बारम्बार परिवर्तन हुँदा वा वातावरण परिवर्तन हुँदा कतिपय बिरामीमा चिडचिडापन र असहजता बढ्न सक्छ । न्यूरोलोजिस्टसँगै आवश्यकताअनुसार मनोचिकित्सक, मनोवैज्ञानिक र फिजियोथेरापिस्टको सहयोग पनि आवश्यक पर्न सक्छ । बिरामीको परिवार र हेरचाहकर्ताको मानसिक स्वास्थ्यलाई कत्तिको महत्त्व दिनुपर्छ ? अल्जाइमर्स भएका व्यक्तिको लामो समयसम्म हेरचाह गर्दा परिवारका सदस्यमा तनाव, थकान र चिन्ता देखिन सक्छ । त्यसैले बिरामीको मात्र होइन, हेरचाहकर्ताको मानसिक स्वास्थ्यमा पनि ध्यान दिनुपर्छ । नेपालमा अल्जाइमर्सको अवस्था र चुनौती के हो ? नेपालमा प्रमुख चुनौतीमध्ये एक समयमै पहिचान नहुनु हो । कतिपय मानिसले बिर्सने समस्यालाई उमेर बढेपछि हुने सामान्य कुरा भनेर बेवास्ता गर्छन् । परीक्षण तथा विशेषज्ञ सेवामा पहुँच, आर्थिक अवस्था र जनचेतनाको कमीका कारण पनि कतिपय बिरामी ढिलो मात्र चिकित्सककहाँ पुग्ने गरेका छन् । नेपालमा अल्जाइमर्स तथा डिमेन्सियाका बिरामीका लागि समूहगत हेरचाह, काउन्सिलिङ र अन्य सहयोगका पहलहरू विस्तार हुँदै छन् । तर यो क्षेत्र अझै विकासकै चरणमा छ । बिर्सने समस्या देखिएपछि कहिले चिकित्सकलाई देखाउनुपर्छ ? दैनिक जीवनमा असर पार्ने गरी स्मरणशक्तिमा लगातार समस्या देखिन थालेको छ भने चिकित्सकलाई देखाउनुपर्छ । विशेषगरी परिचित मानिस, ठाउँ वा काम बिर्सने, बारम्बार एउटै कुरा सोध्ने, आर्थिक कारोबार गर्न कठिन हुने वा घरबाट बाहिर निस्कँदा बाटो बिर्सिने जस्ता समस्या देखिएमा बेवास्ता गर्नु हुँदैन । किनभने सबै स्मरणशक्तिको समस्या अल्जाइमर्स हुँदैन । थाइराइडको कमी वा भिटामिन बी–१२ को कमीजस्ता उपचार गर्न सकिने अवस्थाले पनि यस्तो समस्या ल्याउन सक्छन् । त्यसैले पहिले सही निदान आवश्यक छ । अल्जाइमरको जोखिम कम गर्न वा मस्तिष्कलाई सक्रिय राख्न के गर्न सकिन्छ ? नियमित शारीरिक गतिविधि र व्यायाम उपयोगी हुन्छ । मस्तिष्कलाई सक्रिय राख्न पढ्ने, लेख्ने तथा आफूलाई रुचि लाग्ने बौद्धिक र सामाजिक गतिविधिमा संलग्न भइरहन सकिन्छ । समग्र स्वास्थ्यको राम्रो हेरचाह पनि महत्त्वपूर्ण हुन्छ । परिवारमा अल्जाइमर्सको बलियो इतिहास भएका व्यक्तिले चिकित्सकसँग सल्लाह गरेर आवश्यक परीक्षण र जोखिम मूल्यांकन गराउन सक्छन् । अन्त्यमा, विश्व अल्जाइमर्स दिवसको अवसरमा आम मानिसलाई तपाईं के सन्देश दिन चाहनुहुन्छ ? अल्जाइमर्सलाई बिर्सने रोग भनेर मात्रै बुझ्नु हुँदैन । स्मरणशक्तिमा आएको परिवर्तनको कारण समयमै पहिचान गर्नु महत्त्वपूर्ण छ । बिर्सने समस्या देखिँदैमा ‘यो त बुढ्यौलीको सामान्य समस्या हो’ भनेर बेवास्ता गर्नु हुँदैन । अल्जाइमर्सको व्यवस्थापनमा औषधी मात्र पर्याप्त हुँदैन । बिरामी, परिवार र हेरचाहकर्तालाई समेटेर निरन्तर हेरचाह, सुरक्षित वातावरण र आवश्यकताअनुसार विभिन्न स्वास्थ्यकर्मीको सहयोग आवश्यक हुन्छ । त्यसैले समस्या देखिएपछि जति छिटो पहिचान र मूल्यांकन गर्यो, त्यति नै राम्रो व्यवस्थापन गर्न सकिन्छ ।
आज सेयर कारोबार नहुने
काठमाडौं । नेपाल स्टक एक्सचेन्ज (नेप्से) ले आज सोमबारको नियमित सेयर कारोबार स्थगित गरेको छ । नेप्सेका अनुसार ७२ वटा कारोबार सदस्य कम्पनीको सर्भर राखिएको डाटा हब प्रालिको डाटा सेन्टरमा असोज ४ गते बिहानदेखि प्राविधिक समस्या आएको थियो । समस्या समाधानका लागि प्रयास भइरहेको भए पनि हालसम्म पूर्ण रूपमा समाधान हुन सकेको छैन । यस्तो अवस्थामा कारोबार सञ्चालन गर्दा नेप्सेको कारोबार प्रणालीमा समेत क्षति पुग्न सक्ने देखिएपछि आजको कारोबार स्थगित गरिएको नेप्सेले जनाएको छ । स्टक ब्रोकर एसोसिएसन अफ नेपालले समेत प्राविधिक समस्या समाधान नभएसम्म आजको नियमित कारोबार सत्र स्थगित गर्न नेप्सेसमक्ष निवेदन दिएको थियो । सोही आधारमा नेप्सेले धितोपत्र सूचीकरण तथा कारोबार नियमावली, २०७५ को नियम २१(१०) अनुसार २०८३ असोज ५ गतेको सम्पूर्ण नियमित कारोबार स्थगित गरेको हो । नेप्सेले कारोबार स्थगित हुँदा लगानीकर्ता तथा सम्बन्धित पक्षमा पर्न गएको असुविधाप्रति क्षमा मागेको छ ।
सुमित प्रधान र मनिष ढकालले हाथवे इन्भेष्टमेन्टको सेयर बिक्री गर्ने
काठमाडौं । हाथवे इन्भेष्टमेन्ट नेपाल लिमिटेडका दुई आधारभूत (संस्थापक) सेयरधनीले आफूले धारण गरेको ५ प्रतिशतभन्दा बढी सेयर बिक्री गर्ने मनसाय सार्वजनिक गरेका छन् । कम्पनीले नेपाल स्टक एक्सचेन्ज (नेप्से) लाई दिएको जानकारीअनुसार संस्थापक सेयरधनी सुमित प्रधान र मनिष ढकाल ले आगामी तीन महिनाभित्र आफ्नो नाममा रहेको सेयर बिक्री गर्ने मनसायसहित कम्पनीमा निवेदन दिएका हुन् । कम्पनीका अनुसार सुमित प्रधानको नाममा ३ लाख ४८ हजार ६८६ कित्ता र मनिष ढकालको नाममा ३ लाख ३७ हजार ६१ कित्ता सेयर रहेको छ । नेपाल धितोपत्र बोर्डले जारी गरेको निर्देशनअनुसार कुनै आधारभूत सेयरधनीले आफूले धारण गरेको ५ प्रतिशत वा सोभन्दा बढी सेयर बिक्री गर्नुअघि कम्तीमा १५ दिनअघि कम्पनीलाई जानकारी गराउनुपर्ने व्यवस्था छ । उक्त व्यवस्थाअनुसार दुवै सेयरधनीको सेयर बिक्री गर्ने मनसायबारे कम्पनीले नेप्सेमार्फत सार्वजनिक जानकारी गराएको जनाएको छ ।
ट्रम्पसँग कुराकानीपछि युक्रेनी राष्ट्रपति जेलेन्स्कीले भने– ‘धेरै कुरा बदलिन सक्छ’
काठमाडौं । युक्रेनका राष्ट्रपति भोलोदिमिर जेलेन्स्कीले आफूले अमेरिकी राष्ट्रपति डोनाल्ड ट्रम्पसँग कुराकानी गरेको र उनीहरू न्यूयोर्कमा भेट्न सहमत भएको बताएका छन् । जेलेन्स्कीले आइतबार राति सामाजिक सञ्जाल एक्समा ट्रम्पसँगको भेटले धेरै कुरा बदल्न सक्ने बताएका हुन् । उनले लेखेका छन्, ‘मैले भर्खरै राष्ट्रपति ट्रम्पसँग कुरा गरेँ। यो महत्त्वपूर्ण कुराकानी थियो र हामीले धेरै विषयमा छलफल ग‍र्यौं । हामी न्यूयोर्कमा भेट्न सहमत भएका छौं र यो भेटले धेरै कुरा बदल्न सक्छ। कुराकानी अघि बढिरहेको छ ।’ ‘मैले राष्ट्रपति ट्रम्पलाई स्टिभ विटकफ र जारेड कुशनरको किएभ भ्रमणका लागि धन्यवाद दिएँ । हामीले आवश्यक विषयमा विस्तृत छलफल ग‍र्यौं र उनीहरूले युक्रेनको अवस्थालाई प्रत्यक्ष रूपमा देखे। शान्तिको प्रयास हाम्रो पहिलो प्राथमिकता हो,’ उनले थपे । जेलेन्स्कीले अमेरिकी टोलीसँग मिलेर काम गरिरहेको र ठूलो कदम चाल्न तयार रहेको पनि जानकारी दिए । उनले लेखेका छन्, ‘मैले अमेरिकी राष्ट्रपतिलाई लिन्डसे ग्राहम विधेयकलाई कानुन बनाइदिएकोमा धन्यवाद दिएँ । हामी सबै शान्ति हुनुपर्छ भन्ने कुरामा सहमत छौं । युक्रेनको साथमा उभिने सबैलाई धन्यवाद ।’ लिन्डसे ग्राहम विधेयक हालै डोनाल्ड ट्रम्पले हस्ताक्षर गरेपछि कानुन बनेको हो । यसअघि उक्त विधेयक अमेरिकी कांग्रेसबाट पारित भएको थियो । यो कानुनले अमेरिकी राष्ट्रपतिलाई रुसबाट कच्चा तेल वा प्राकृतिक ग्यास खरिद गर्ने शीर्ष पाँच देश, जस्तै भारत र चीनमाथि १०० प्रतिशतसम्मको भारी आयात शुल्क (ट्यारिफ) लगाउने अधिकार दिएको छ ।
टियागो ईभी किन्दा अफर, ४.३ लाख डाउनपेमेन्टमै घर लैजान सकिने
काठमाडौं । टाटा मोटर्सको नयाँ टियागो ईभी नेपाली बजारमा विशेष ‘जोयफुल विक’ अफरसहित उपलब्ध भएको छ । नेपालका लागि टाटा मोटर्सको आधिकारिक वितरक सिप्रदी ट्रेडिङ प्रालिले नयाँ टियागो ईभी लक्षित गर्दै सीमित अवधिको यो अभियान सञ्चालन गरेको हो । सेप्टेम्बर १९ देखि २६ सम्म चल्ने अभियानमा ग्राहकले ४.३ लाख रुपैयाँ डाउनपेमेन्टमै नयाँ टियागो ईभी घर लैजान सक्ने कम्पनीले जनाएको छ । कम्पनीका अनुसार ‘एक्सचेन्ज, अपग्रेड, सेलिब्रेट’ भन्ने नारासहित सञ्चालन गरिएको अभियानको उद्देश्य पुरानो गाडी साटेर नयाँ विद्युतीय गाडीमा अपग्रेड गर्न चाहने ग्राहकलाई थप सहज र आकर्षक सुविधा उपलब्ध गराउनु हो । अभियानअन्तर्गत नयाँ टियागो ईभी बुकिङ गर्ने प्रत्येक ग्राहकले आकर्षक उपहार प्राप्त गर्नेछन् । साथै, पुरानो गाडी एक्सचेन्ज गर्दा बेस्ट एभर एक्सचेन्ज भ्यालुएसन को सुविधा पनि दिइने कम्पनीले जनाएको छ । यस अवधिमा गाडी खरिद गर्ने ग्राहकले निःशुल्क एक्सेसरिज, निःशुल्क वार्षिक सवारी कर र निःशुल्क होम चार्जिङ इन्स्टलेसन जस्ता अतिरिक्त सुविधा पनि पाउनेछन् । टाटा टियागो ईभी आधुनिक डिजाइन, सहज विद्युतीय ड्राइभिङ अनुभव र दैनिक प्रयोगका लागि उपयुक्त विशेषताका कारण नेपाली बजारमा लोकप्रिय विद्युतीय मोडलमध्ये एक मानिन्छ । कम्पनीका अनुसार इच्छुक ग्राहकले देशभर रहेका टाटा मोटर्सका आधिकारिक शोरुममा पुगेर टियागो ईभीको टेस्ट ड्राइभ गर्न, विस्तृत जानकारी लिन र उपलब्ध अफरको लाभ उठाउन सक्नेछन् । यो अभियान सेप्टेम्बर २६ सम्म मात्रै सञ्चालन हुनेछ ।
सामाजिक सञ्जालबाट धम्की दिने ‘मनोज मानव’ पक्राउ
काठमाडौं । सामाजिक सञ्जालबाट आधारहीन, भ्रामक तथा धम्कीपूर्ण सामग्री पोस्ट गर्ने एक व्यक्ति पक्राउ परेका छन् । आइतबार प्रहरीले सिरहा लहान नगरपालिका- २४ का मनोज मानव भन्ने मनोज कुमार महतो पक्राउ परेका हुन् । महतोलाई उदयपुरस्थित चतरा पुलपारिको एक होटलमा लुकिछिपी बसेको अवस्थामा जिल्ला प्रहरी कार्यालय उदयपुरको सहयोगमा पक्राउ गरेको हो । महतोले लामो समयदेखि उद्योगी, व्यवसायी, जनप्रतिनिधि, पत्रकार, नेता तथा राष्ट्रसेवक कर्मचारीलगायत विभिन्न व्यक्तिविरुद्ध बदनाम तथा चरित्रहत्या गर्ने गर्ने प्रहरीले उल्लेख गरेको छ । उनले आधारबिनाका सामग्री सामाजिक सञ्जालमा पोस्ट गर्दै आएको सिरहा जिल्ला प्रहरी कार्यालयका प्रवक्ता रमेशबहादुर पालले बताए । उनका अनुसार सामाजिक सद्भाव तथा सार्वजनिक शान्तिमा समेत असर परेको भन्दै परेको जाहेरी परेको थियो । उनीविरुद्ध साइबर अपराध तथा सार्वजनिक शान्ति खलल पार्न नहुने सम्बन्धी कसुरमा मुद्दा दर्ता गरी पक्राउ पुर्जी जारी गरिएको प्रहरीले जनाएको छ। पालका अनुसार महतोले आफूसँग स्वचालित हतियार रहेको र आफू पूर्व जनतान्त्रिकको लडाकु भएको भन्ने गरेका थिए । केही व्यक्तिलाई धम्की दिने गरेको तथा हतियारको फोटो पठाएर आपराधिक लाभसमेत लिएको भन्ने सूचना प्रहरीले प्राप्त गरेको जनाएको छ । महतोमाथि थप अनुसन्धान तथा कानुनी कारबाही भइरहेको जिल्ला प्रहरी कार्यालय सिरहाले जनाएको छ। प्रहरीले उनीबाट भएको भनिएको आपराधिक लाभ तथा धम्कीसम्बन्धी घटनाबाट पीडित भएका व्यक्तिहरूलाई जिल्ला प्रहरी कार्यालय सिरहामा सम्पर्क गर्न अनुरोध गरेको छ।
माछापुच्छ्रे बैंकको वार्षिक साधारण सभा असोज २८ गते पोखरामा
काठमाडौं । माछापुच्छ्रे बैंक लिमिटेडले आर्थिक वर्ष २०८२/८३ को २८औँ वार्षिक साधारण सभा आगामी असोज २८ गते पोखरामा आयोजना गर्ने भएको छ । बैंकले नेपाल स्टक एक्सचेन्ज (नेप्से) लाई दिएको जानकारीअनुसार वार्षिक साधारण सभा असोज २८ गते बिहान ११ बजे कास्कीको पार्दीस्थित होटल पोखरा ग्रान्डमा बस्नेछ । बैंकका अनुसार वार्षिक साधारण सभा तथा संक्षिप्त वार्षिक आर्थिक विवरणसम्बन्धी सूचना असोज ३ गते अन्नपूर्ण पोस्ट राष्ट्रिय दैनिकमा प्रकाशित गरिएको छ । सभामा आर्थिक वर्ष २०८२/८३ का वित्तीय विवरण, सञ्चालक समितिको वार्षिक प्रतिवेदन तथा अन्य नियमित प्रस्तावमाथि छलफल र निर्णय हुने बैंकले जनाएको छ । माछापुच्छ्रे बैंक २०५४ सालमा पोखरामा स्थापना भएको नेपाल राष्ट्र बैंकबाट ‘क’ वर्गको इजाजतपत्रप्राप्त वाणिज्य बैंक हो ।
