नेप्से २.६४ अंकले बढ्यो, क्रेस्ट माइक्रो लाइफको मूल्य १४ प्रतिशत बढ्यो
काठमाडौं । साताको अन्तिम कारोबार दिन शुक्रबार सेयर बजार सामान्य अंकले बढेर बन्द भएको छ । नेपाल स्टक एक्सचेन्ज (नेप्से) परिसूचक २.६४ अंकले बढेर २ हजार ६५५.२२ विन्दुमा पुगेको हो । यस दिन सेन्सेटिभ इन्डेक्स १.१८ अंकले बढेको छ भने फ्लोट इन्डेक्स ०.५३ अंक र सेन्सेटिभ फ्लोट इन्डेक्स ०.६८ अंकले बढेको छ । नेप्से परिसूचक बढे पनि कारोबार रकम भने घटेको छ । बिहीबार ४ अर्ब ७२ करोड रुपैयाँको सेयर कारोबार भएको बजारमा शुक्रबार ३ अर्ब ४६ करोड २० लाख ५९ हजार रुपैयाँको कारोबार भएको छ । यस दिन ३३६ कम्पनीका १ करोड ७ लाख १३ हजार कित्ता सेयर ३३ हजार २१५ पटकको कारोबारमा किनबेच भएका छन् । शुक्रबार क्रेस्ट माइक्रो लाइफ इन्स्योरेन्सको सेयर मूल्य सर्वाधिक १४.०८ प्रतिशतले बढेको छ । त्यस्तै, बेनी हाइड्रोपावर प्रोजेक्टको सेयर मूल्य साढे ५ प्रतिशतभन्दा बढी बढेको छ । यस दिन घोराही सिमेन्ट इन्डस्ट्रीको सेयर मूल्य सर्वाधिक ४.४३ प्रतिशतले घटेको छ । कारोबार रकमका आधारमा घोराही सिमेन्ट इन्डस्ट्री शीर्ष स्थानमा रहेको छ । कम्पनीको २१ करोड ६३ लाख रुपैयाँबराबरको सेयर कारोबार भएको छ । त्यस्तै, श्वेतगंगा हाइड्रोपावर एन्ड कन्स्ट्रक्सनको साढे १२ करोड रुपैयाँभन्दा बढी र रिलायन्स स्पिनिङ मिल्सको करिब १२ करोड रुपैयाँको सेयर कारोबार भएको छ । शुक्रबार कारोबारमा आएका १३ उपसमूहमध्ये १२ वटाको परिसूचक बढेको छ भने एउटा उपसमूहको परिसूचक घटेको छ । यस दिन अन्य उपसमूहको परिसूचक सर्वाधिक ०.८८ प्रतिशतले घटेको छ । बाँकी १२ उपसमूहको परिसूचक भने सामान्य अंकले बढेका छन् ।
जनताले ठालु बन्न नभई धेरै सेवा गर्न मत दिएका हुन् : लामिछाने
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले जनताले ठालु बन्न नभई धेरै सेवा गर्न मत दिएको बताएका छन् । शुक्रबार (आज) चितवनमा आयोजित कार्यक्रममा बोल्दै सभापति लामिछानेले यस्तो बताएका हुन् । उनले भने, ‘जनताले हामीलाई ठालु बन्नका लागि होइन, अझ धेरै सेवा गर्नका लागि मत दिएका हुन् ।’ उनले जनताले दिएको शक्तिलाई जिम्मेवारीमा बदल्नुपर्ने बताए । सभापति लामिछानेले भने, ‘आज जनताले हामीलाई ठूलो शक्ति दिएका छन् तर शक्तिसँगै ठूलो जिम्मेवारी पनि आउँछ । यदि हामी जनविश्वासका आधारमा प्राप्त शक्ति दम्भमा बदल्न थाल्यौं भने त्यो हाम्रो पतनको सुरुवात हुनेछ ।’ उनले एक चुनाव जित्दैमा विशेष प्राणी नबनिने पनि बताए । उनले भने, ‘हामीले कहिल्यै भुल्नु हुँदैन, हामी यही माटोका मान्छे हौँ। एक चुनाव जित्दैमा हामी विशेष प्राणी बनेका छैनौं ।’ घमण्ड, पदको दुरूपयोग र राजनीतिक दबाबको संस्कृतिबाट टाढा हुनुपर्ने उनको भनाइ छ ।
सुदूरपश्चिमले कर्णालीलाई दियो १७७ रनको लक्ष्य
काठमाडौं । सुदूरपश्चिम रोयल्सले नेपाल प्रिमियर लिग (एनपीएल)को तेस्रो संस्करणअन्तर्गत शुक्रबारको पहिलो खेलमा कर्णाली याक्ससामु १७७ रनको लक्ष्य प्रस्तुत गरेको छ । सुदूरपश्चिमले निर्धारित २० ओभरमा ६ विकेट गुमाउँदै १७६ रनको योगफल तयार पारेको हो । सुदूरपश्चिमका लागि सैफ जैबले ३५, विनोद भण्डारीले २७, ब्रान्डन म्याकमुलेनले २४ रन बनाए । त्यस्तै, इशान पाण्डेले २३, थरिन्दु रथनायकेले २२, अविजित रहेका स्कट कुगेलेइन १३, आरिफ शेखले ११ र कप्तान दीपेन्द्र ऐरीले १० रन बनाए । कर्णालीका लागि मार्क वाटले दुई विकेट लिए । त्यसैगरी, नन्दन यादव, हुसेन तलत र सूर्य तामाङले समान एक विकेट लिए । सुदूरपश्चिमले टस हार्दै ब्याटिङमा उत्रिएको थियो । सुदूरपश्चिमको यो जारी एनपीएलमा पाँचौं खेल हो भने कर्णालीको चौंथो खेल हो । सुदूरपश्चिम ४ अंकसहित तालिकाको छैटौं स्थानमा छ भने कर्णाली याक्स पनि ४ अंकसहित तेस्रो स्थानमा छ ।
पर्यटक भिसामा आएर अन्य क्रियाकलाप गरेको आरोपमा १० विदेशी निष्कासित
काठमाडौं । पर्यटक भिसामा नेपाल आएर भिसाको उद्देश्यविपरीत गतिविधि गरेको आरोपमा एक नाबालकसहित १० जना विदेशी नागरिकलाई नेपालबाट निष्कासन गरिएको छ । अध्यागमन विभागले उनीहरूलाई जनही ५० हजार रुपैयाँ जरिवाना गरी तीन वर्षसम्म नेपाल प्रवेश गर्न नपाउने गरी निष्कासन गर्ने निर्णय गरेको हो । विभागका अनुसार मोरङको कानेपोखरी गाउँपालिका–७, बरगाछीस्थित ‘मर्सी डेभलपमेन्ट’ नामक संस्थाले आयोजना गरेको कार्यक्रममा सहभागी हुन आएका उनीहरूले पर्यटक भिसाको सर्तविपरीत गतिविधि गरेका थिए । सोही कसुरमा उनीहरूलाई अध्यागमनसम्बन्धी कानुनअनुसार कारबाही गरिएको विभागले जनाएको छ । निष्कासित हुनेमा अमेरिकाका पाँच, ब्राजिलका दुई र क्यानडाका तीन जना नागरिक छन् । उनीहरूमध्ये एक जना नाबालकसमेत रहेका छन् । नाबालकलाई भने उनका आमाबुवासँगै नेपालबाट प्रस्थान गराउने निर्णय भएको विभागले जनाएको छ ।
३ अर्बमा ग्लोबल आइएमई बैंकको हेड अफिस बन्दै, ३ वर्षमा सम्पन्न गर्ने
काठमाडौं । ग्लोबल आइएमई बैंकले अत्याधुनिक केन्द्रीय कार्यालय भवन (हेड अफिस) निर्माण गर्ने भएको छ । बैंकले काठमाडौंको उत्तरढोकामा करिब ३ अर्ब रुपैयाँ लगानीमा अत्याधुनिक केन्द्रीय कार्यालय भवन निर्माण सुरु गरेको हो । धनतेरसको अवसर पारेर बैंकका अध्यक्ष चन्द्रप्रसाद ढकालले शुक्रबार प्रस्तावित भवनको शिलान्यास तथा जग पूजा गरेका छन् । करिब एक लाख ४५ हजार वर्गफिट निर्माण क्षेत्रफल रहने भवन तीन वर्षभित्र सम्पन्न गर्ने लक्ष्य राखिएको बैंकले जनाएको छ । भवनको संरचना निर्माणदेखि आन्तरिक सजावटसम्मका कामका लागि करिब तीन अर्ब रुपैयाँ खर्च हुने अनुमान गरिएको छ । बैंकका अध्यक्ष ढकालले प्रस्तावित भवन वाणिज्य बैंकहरूमध्ये सबैभन्दा धेरै क्षेत्रफल भएको र सुविधासम्पन्न केन्द्रीय कार्यालयमध्ये एक हुने विश्वास व्यक्त गरेका छन् । काठमाडौंको प्राइम लोकेसनमा निर्माण हुन लागेको भवन भविष्यमा एउटा विशिष्ट पहिचान बोकेको संरचनाका रूपमा स्थापित हुने उनको भनाइ छ । बैंकका प्रमुख कार्यकारी अधिकृत सुरेन्द्रराज रेग्मीले करिब ५९ लाख ग्राहकको विश्वास, माया र शुभेच्छाका कारण ग्लोबल आइएमई बैंक ठूलो बैंकका रूपमा स्थापित भएको बताए । ग्राहक संख्या र बैंकिङ कारोबार विस्तार हुँदै जाँदा केन्द्रीय कार्यालयअन्तर्गतका विभिन्न विभागलाई एउटै भवनबाट सञ्चालन गर्नुपर्ने आवश्यकता महसुस भएको उनले उल्लेख गरे । नयाँ भवन निर्माण सम्पन्न भएपछि बैंकका सम्पूर्ण केन्द्रीयस्तरका विभागलाई एउटै छानामुनि ल्याएर सेवा प्रवाह गर्ने योजना रहेको रेग्मीले जानकारी दिए । उनका अनुसार भवनलाई नेपालमा सञ्चालनमा रहेका वाणिज्य बैंकका केन्द्रीय कार्यालयमध्ये अत्याधुनिक संरचनाका रूपमा विकास गरिनेछ । नयाँ भवनले बैंकका केन्द्रीय विभागबीच समन्वय बढाउनुका साथै प्रशासनिक तथा व्यवस्थापकीय कामलाई थप व्यवस्थित र प्रभावकारी बनाउने अपेक्षा बैंकको छ ।
‘चिरञ्जीवी भवः’को ‘जाले रुमाल’ गीत सार्वजनिक
काठमाडौं । चलचित्र ‘चिरञ्जीवी भवः’को नयाँ गीत ‘जाले रुमाल’ सार्वजनिक भएको छ । निर्माण पक्षले बिहीबार ओएसआर डिजिटलको युट्युब च्यानलमार्फत गीत सार्वजनिक गरेको हो । गीतमा दीपकप्रसाद आचार्यको शब्द, बाबुल गिरीको संगीत तथा रचना रिमाल, रामचन्द्र काफ्ले र बाबुल गिरीको स्वर रहेको छ । लोकलयमा आधारित डान्सिङ शैलीको गीतमा एक युवक र युवतीबीचको सवाल–जवाफ प्रस्तुत गरिएको छ । एकअर्काको रूप र सौन्दर्यबाट आकर्षित भएका उनीहरूबीचको प्रेमभाव गीतमा देखाइएको छ । गीतका मौलिक शब्द र आकर्षक हुकलाइनले यसलाई थप रोचक बनाएको छ । गीतको भिडियोमा विवाहको माहोल प्रस्तुत गरिएको छ । आशीर्वाद क्षेत्री र प्रशंसा रायमाझीको विवाहको सेटअपमा परिवारका सदस्यहरूले गरेको रमाइलो दृश्य समेटिएको छ । भिडियोले चलचित्रका पात्रहरूबीचको पारिवारिक सम्बन्ध र अन्तरसम्बन्धलाई समेत उजागर गरेको छ । ‘चिरञ्जीवी भवः’मा हरिवंश आचार्य, आशीर्वाद क्षेत्री र प्रशंसा रायमाझी मुख्य भूमिकामा छन्। चलचित्रमा हरिवंश आचार्य ‘चिरञ्जीवी बाजे’को भूमिकामा देखिँदैछन्। त्यस्तै, चलचित्रमा करिश्मा मानन्धर, मिश्री थापा, कमलमणि नेपाल, अभय बराल, सुमन कार्की, सुवर्ण थापा, सरोज अर्याल, हरिस निरौला (कक्रोज), गीता अधिकारी र सुस्मिता कुँवरलगायत कलाकारको अभिनय रहेको छ।
पूर्वआईजीपी कार्कीको रिट दर्ता, कात्तिक ३० गते पेसी तोकियो
काठमाडौं । पूर्वआईजीपी दानबहादुर कार्कीले आफूलाई पुनर्बहाली गर्नुपर्ने माग गर्दै सर्वोच्च अदालतमा दायर गरेको रिट दर्ता भएको छ । उक्त रिटउपर कात्तिक ३० गते पेसी तोकिएको सर्वोच्चका सूचना अधिकारी तथा सहायक प्रवक्ता घनश्याम सुवेदीले जानकारी दिए । कार्कीको मुद्दा नम्बर 082-Wo-0494 रहेको छ । सरकारले प्रहरी प्रमुखको जिम्मेवारीबाट हटाएको भन्दै कार्की सर्वोच्च पुगेका हुन् । रिटमा प्रधानमन्त्री तथा मन्त्रिपरिषद्को कार्यालय, गृह मन्त्रालय, नेपाल प्रहरी प्रधान कार्यालय र प्रहरी महानिरीक्षकमा बढुवा गरिएका डा. मनोज केसीलाई विपक्षी बनाइएको छ । आईजीपीलाई अर्को पदमा नियुक्त गरेको बहानामा हटाउने निर्णय वस्तुनिष्ठ, आधारविहीन र बदनियतपूर्ण रहेको निवेदनमा दाबी गरिएको छ । कार्कीले सरकारको उक्त निर्णय बदर गरी आफूलाई प्रहरी महानिरीक्षक पदमा पूर्ववत् कायम राख्न माग गरेका छन् । कार्कीले प्रहरी ऐन २०१२ र प्रहरी नियमावली २०७१ विपरीत आफूलाई पदबाट हटाइएको भन्दै आईजीपी पदमा पुनर्वहालीका लागि र नवनियुक्त महानिरीक्षकलाई कामकाज नगर्न अन्तरिम आदेश माग गर्दै रिट दायर गरेका हुन् । गत बुधबार बसेको मन्त्रिपरिषद बैठकले कार्कीलाई जिम्मेवारीबाट हटाउँदै आईजीपीमा केसीलाई नियुक्त गर्ने निर्णय गरेको थियो । आईजीपीको फुली खोसिएकाहरू को हुन् नवनियुक्त आईजीपी मनोज केसी ? मनोज केसीलाई चिनाएका ६ काण्ड कार्कीले आईजीपी पद गुमाउनुका ५ कारण
डलरको प्रलोभन देखाउँदै चार जिल्लामा ठगी, नक्कली सुन र डलर बरामद
काठमाडौं । डलर देखाएर सर्वसाधारणलाई ठगी तथा लुटपाट गर्दै आएका एक युवकको साथबाट प्रहरीले नक्कली सुन, डलरको आकारमा तयार पारिएका कागजका बन्डल र ठगीमा प्रयोग हुने विभिन्न सामग्री बरामद गरेको छ । प्रहरीले ठगीमा संलग्न रहेको आरोपमा सिन्धुपाल्चोकको बाह्रबिसे गाउँपालिका–३ घर भएका २८ वर्षीय सुजन तामाङलाई बिहीबार पक्राउ गरेको छ । उनको साथबाट एक किलोको नक्कली सुनको ढिक्का, अमेरिकी डलरको आकारमा काटिएका सेता कागजका बन्डल र अन्य सामग्री बरामद गरिएको जिल्ला प्रहरी परिसर काठमाडौंका प्रवक्ता एवं सूचना अधिकारी प्रहरी उपरीक्षक दानबहादुर थापाले जानकारी दिए । प्रहरीका अनुसार तामाङले काठमाडौं, भक्तपुर, ललितपुर र सिन्धुपाल्चोकमा विभिन्न मितिमा डलर देखाएर ठगी तथा लुटपाट गर्दै आएका थिए । उनीविरुद्ध यी जिल्लामा ठगीसम्बन्धी मुद्दासमेत दर्ता भएको प्रारम्भिक अनुसन्धानबाट खुलेको छ । जिल्ला प्रहरी परिसर काठमाडौं र प्रहरी वृत्त बौद्धबाट खटिएको संयुक्त प्रहरी टोलीले उनलाई बुधबार साँझ ६ः४५ बजे गोकर्णेश्वर नगरपालिका–३ गाम्चास्थित सडकबाट नियन्त्रणमा लिन खोजेको थियो । तर, पक्राउ गर्ने क्रममा तामाङले प्रहरीमाथि नै धारिलो चक्कु प्रहार गरेका थिए । चक्कु प्रहारबाट एक प्रहरी घाइते भएका छन् । तामाङले निरन्तर आक्रमणको प्रयास गरेपछि प्रहरीले सुरुमा चेतावनीस्वरूप एक राउण्ड हवाई फायर गरेको थियो । त्यसपछि पनि आक्रमणको प्रयास नरोकिएपछि प्रहरीले घुँडामुनि लक्षित गरी एक राउण्ड गोली चलाएको जनाएको छ । गोली लागेर घाइते भएका तामाङलाई उपचारका लागि ट्रमा सेन्टर पठाइएको छ । प्रहरीले उनको साथबाट ठगीमा प्रयोग गरिएका मोटरसाइकल र नक्कली नम्बर प्लेटसमेत बरामद गरेको छ । त्यस्तै, नेपाली २० रुपैयाँका चार बण्डल र डलरको आकारमा काटेर तयार पारिएका सेता कागजका बण्डल फेला परेका छन् । कागजका बण्डलको माथि र तल पाँच–पाँच अमेरिकी डलर राखिएको अवस्थामा फेला परेको प्रहरीले जनाएको छ । यसका अतिरिक्त एक किलोको नक्कली सुनको ढिक्का र विभिन्न कम्पनीका मोबाइलसमेत बरामद गरिएको छ । प्रहरीले घटनाबारे थप अनुसन्धान गरिरहेको जनाएको छ ।
