पर्यटन बोर्डका सीईओलाई निलम्बनको निर्णय तत्काल कार्यान्वयन नगर्न आदेश
काठमाडौं । नेपाल पर्यटन बोर्डका प्रमुख कार्यकारी अधिकृत (सीईओ) डा. धनञ्जय रेग्मीलाई निलम्बनको निर्णय तत्काल कार्यान्वयन नगर्न सर्वाेच्च अदालतले अल्पकालीन अन्तरिम आदेश दिएको छ । यसअघि संस्कृति, पर्यटन तथा नागरिक उडड्यन मन्त्रालय र बोर्डले सीईओ रेग्मीमाथि छानवीन गर्ने र सो अवधिका लागि निलम्बन गर्ने निर्णय गरेको थियो। सो निर्णयकाविरुद्ध रेग्मी अन्तरिम आदेश माग गर्दै अदालत गएका थिए। न्यायाधीश दीपककुमार कार्कीको इजलासले निलम्बनको निर्णय कार्यान्वयन नगर्न अल्पकालीन आदेश दिँदै कारणसहित दुवै पक्षलाई छलफलमा बोलाएको छ।
वर्षाका कारण हवाई उडान प्रभावित
फाइल फाेटाे काठमाडौं । मंगलबार रातीदेखि काठमाडौं उपत्यकामा परेको वर्षाका कारण हवाई उडान प्रभावित भएको छ । रातिदेखि नै काठमाडौं उपत्यकासहित देशका अधिकांश स्थानमा पानी परिरहेकाले छ । एयरलाइन्स कम्पनीहरुले प्रतिकूल मौसम र कम भिजिबिलिटीका कारण उडानहरु प्रभावित भएको सूचना जारी गरेका छन् । विमानस्थल कार्यालयका अनुसार मौसम खराबका कारण पोखरा र नेपालगन्जको उडानहरु रोकिएका छन् । अन्य गन्तव्यको उडान समेत मौसमका कारण ढिलो भएको छ । हाल देशमा पश्चिमी न्यून चापीय प्रणालीको प्रभाव रहेको छ । उक्त प्रणालीका कारण अहिले देशभर सामान्यदेखि पूर्ण बदली रही अधिकांश स्थानमा हल्का वर्षा र उच्च हिमाली तथा पहाडी भेगमा हिमपात भइरहेको मौसम पूर्वानुमान महाशाखाले जनाएको छ । महाशाखाले आगामी २४ घण्टाका लागि चेतावती तथा परामर्श जारी गर्दै देशभर चिसो बढ्ने क्रममा रहेकाले त्यसबाट बच्न आवश्यक सतर्कता अपनाउन सबैमा अनुरोध गरेको छ । दिउँसो सामान्यदेखि पूर्णतया बदली रही धेरै स्थानमा हल्कादेखि मध्यम वर्षाको सम्भावना छ । उच्च पहाडी तथा हिमाली भू–भागका धेरै स्थानमा हल्कादेखि मध्यम हिमपातको सम्भावना छ । रातिको समयमा पनि हल्कादेखि मध्यम वर्षा र धेरै स्थानमा हल्कादेखि मध्यम हिमपातको सम्भावना छ । महाशाखाको पछिल्लो विवरणमा काठमाडौँको तापक्रम न्यूनतम तीन दशमलव ६ र अधिकतम तापक्रम १५ दशमलव दुई डिग्री सेल्सियस छ ।
काठमाडौंमा वर्षासँगै चन्द्रागिरीमा हिमपात, पर्यटक बढी आउने अनुमान
काठमाडौं । मंगलबार रातीदेखि परेको वर्षासँगै काठमाडौंको चन्द्रागिरिमा हिउँ परेको हो । वर्षासँगै बुधबार बिहान ५ बजेबाट चन्द्रागिरिमा हिमपात परेको हो । काठमाडौँमा वर्षासँगै प्रमुख पर्यटकीय केन्द्र चन्द्रागिरिमा हिमपात सुरु भएको चन्द्रागिरी हिल्स लिमिटेडले जनाएको छ । हिल्सका जेनेरल म्यानेजर अभिषेक बिक्रम शाहले बिहानदेखि चन्द्रागिरीमा बाक्लो हिमपात सुरु भएको जानकारी दिए । उनका अनुसार गत वर्षको तुलनामा आज बाक्लो मात्रामा हिउ परेको छ । ‘गत वर्ष खासै हिउ परेको थिएन । यस वर्ष वर्षासँगै बाक्लो मात्रामा हिउ झरेको छ’, उनले भने, ‘हिउमा खेल्न आउने पर्यटक यस वर्ष बढ्ने अनुमान गरेका छौँ ।’ मौसम पूर्वानुमान महाशाखाका अनुसार हाल देशभर सामान्य देखि पूर्ण बदली रही अधिकांश स्थानहरूमा हल्का वर्षा भइरहेको छ भने उच्च पहाडी तथा हिमाली भूभागमा हल्का हिमपात भइरहेको छ ।
