निगमबाट हटाइएका पौडेल भन्छन्ः कमाएको विश्वाससँगै पलाएको आशा पनि मर्यो
काठमाडौं । नेपाल वायुसेवा निगमका निर्वतमान महाप्रबन्धक डिमप्रकाश पौडेलले निगम सुधारको कार्यायोजना तयारी गर्दा आफूलाई हटाइएको बताएका छन् । मंगलबार सामाजिक सञ्जाल (फेसबुक) मा एक स्टयाटस लेख्दै उनले निगम व्यवस्थापनले कर्मचारी उचालेर आन्दोलन गरी सक्षम नेतृत्वलाई विस्थापित गरिएको आरोप लगाएका हुन । ‘निगम उडान संख्या र यात्रुसेवाको हिसावले १ मा थियो। तर सरकारको त्यत्रो विश्वास निमिट्यान्न पार्नेगरि कर्मचारी उचालेर आन्दोलनको जुन नाटक मन्चन गरियो र सक्षम नेतृत्व लाई बिश्थापित गर्न जे जे झुट फैलाईयो, त्यसैको परिणाम आज निगम बिघटोन्मुख अवस्थामा पुगेको छ । कमाईएको बिश्वास गुमेको छ, पलाएको आशा मरेको छ । अखिर सत्य सत्य नै हुन्छ, झुट झुटनै हुन्छ’, उनले लेखेका छन् । यस्तै, उनले निगम बाहिरबाट आएको नेतृत्वले एक वर्ष भन्दा बढीको अध्ययन पछी सबै भन्दा व्याबहारीक र कार्वान्वयन योग्य बिजनेस प्लान बनाएर निगम सञ्चालक समिित, पर्यटन मन्त्रालय, अर्थ मन्त्रालयको बिश्वास जितेर थप लगानी गर्नुपर्छ भन्ने कुरामा कन्भिन्स गराएको बताएका छन् । उनले सामाजिक सञ्जालमा भनेका छन्, ‘अर्थमन्त्रलय, कर्मचारी संचयकोष, नागरिक लगानी कोष, सरोकारवाला अन्य निकायहरु, सिंगो पर्यटन क्षेत्रमा एउटा नयां उत्साहको सञ्चार भएको थियो । त्यही व्यवसायिक योजनाको लागि अर्थमन्त्रलयले ६ अर्ब ३४ करोड लगानी थप गर्न तयार भएको थियो । ३० अरब बिदेशी लगानी वा सफ्टलोन र १४ अरबको आईपीओ जारी गरेर ४४ अर्ब पैसा उठाउने योजना बनाईएको थियो । कर्मचारीहरुमा अनुशासन पुर्नस्थापित भएको थियो । कोरोना महामारीमा सन्चालन खर्च ३४ % ले कमि ल्याईएको थियो ।’
कोभिड संक्रमण बढेपछि विमानस्थलमा कडाई
काठमाडौं । पछिल्लो समय नेपालमा कोरोना संक्रमितको संख्यामा बृद्धि हुन थालेपछि त्रिभुवन अन्तर्राष्ट्रिय विमानस्थलमा कडाई गरिने भएको छ । विमानस्थल कार्यालयको मंगलबार एक सूचना जारी गर्दै विमानस्थलमा हुने आफन्तको भिड बन्द गर्न भिजिटर पास वितरण बन्द गरिएको जनाएको छ । अति नै जरुरी अवस्थामा बाहेक भी पास बन्द गरिएको सूचना अनुसार उल्लेख गरिएको छ । विमानस्थलमा हवाई यात्रु आवागमनको चाप र विमानस्थलमा थान सिमितताको कारण अति जरुरी बाहेक स्वागत तथा विदाई गर्नका लागि मात्र विमानस्थल नआई दिन पटक/पटक सूचना जारी हुँदा समेत भिडभाडमा कमी आएको छैन् । कोभिड–१९ का विभिन्न भेरिएन्ट उत्परिवर्तन भैरहेकोे र हालै नयाँ भेरिएन्ट ओमिक्रोन सहित छिमेकी देशहरुमा तीव्र रुपमा कोरोना संक्रमण फैलिरहेको , सूचनामा भनिएको छ, ‘कोभिडको नयाँ भेरिएन्टको संक्रमणबाट बच्न विमास्थलमा अनावश्यक भिडभाड नगरि हवाई यात्रा गर्दा अपनाउनुपर्ने स्वास्थ्य सम्बन्धी सम्पूर्ण मापदण्डको पालना गरी हवाई यात्र सुचारु गर्न अनुरोध छ ।’
टान अध्यक्षमा त्रिपक्षीय भिडन्त, कसले मार्ला बाजी ?
काठमाडौं । पर्वतीय पर्यटन व्यवसायीको छाता सङ्गठन ट्रेकिङ एजेन्सिज एशोसियसन अफ नेपाल (टान)को अध्यक्ष पदका लागि तीन व्यवसायी प्रतिस्पर्धी चुनावी दौडमा रहेका छन् । आगामी माघ २८ गतेका लागि तय गरिएको टानको ४३औं साधारणसभा एवं निर्वाचनमा अध्यक्षका तीनै जना प्रत्यासीले उम्मेदवारी घोषणा गरेर चुनावी प्रतिबद्धतापत्रसमेत सार्वजनिक गरिसकेका छन् । साथै उनीहरुले निर्वाचनमा माहोल आफ्नो पक्षमा पार्ट व्यावसायिक दौडधूप र छलफललाई तीव्रता दिएका छन् । टान अध्यक्षका लागि पर्यटन व्यवसायी नीलहरि बाँस्तोला, राजेन्द्रप्रसाद सापकोटा र बोधराज भण्डारी विभिन्न माध्यमबाट उम्मेदवारी घोषणा गर्दै प्रचारप्रसारमा जुटेका छन् । प्रत्यासीमध्ये बाँस्तोला टानका पूर्वउपाध्यक्ष हुन् भने भण्डारी र सापकोटाले टान कार्यसमितिमा रहेर काम गरिसकेका छन् । होटल तथा ट्रेकिङ्ग व्यवसायमा तीनै जना अब्बल गनिन्छन् । पर्यटन क्षेत्रमा लामो अनुभव भएकाले नेतृत्वका लागि तीनै जनालाई उपयुक्त उम्मेदवारका रुपमा हेरिएको छ । तीनै जना पर्यटनमा परिचित अनुहार भएकाले यस पटकको निर्वाचनमा पनि निकै रसाकस्सी हुने विश्लेषण गरिएको छ । टानको अध्यक्ष, पदाधिकारी र सदस्यगरी कूल २५ सदस्यीय कार्यसमितिमध्ये १७ जना निर्वाचित र बाँकी सदस्य मनोनीत गरिनेछ । टान निर्वाचनका लागि मिति घोषणा भएसँगै आकाङ्क्षी उम्मेदवारले आफ्ना प्रतिबद्धतासहित चुनावी प्रतिस्पर्धामा लागेको टानका अध्यक्ष खुम सुवेदीले बताए । कोभिड महामारीको तेस्रो लहरको त्रास रहेकाले पूर्वनिर्धारित कार्यक्रम हुन्छ कि हुँदैन यकिन भएको छैन । यद्यपि, निर्वाचनको माहोल बनाउन उम्मेदवार मैदानमा उत्रिसकेका छन् । टानमा करिब एक हजार ८०० व्यवसायी आवद्ध छन् । टानका पूर्वउपाध्यक्षसमेत रहेका बाँस्तोलाको एशियन हेरिटेज गुप्रअन्तर्गत ट्रेकिङ, ट्राभल्स, होटल, एक्सपोर्ट, इन्पोर्ट, कार्गो, हस्तकला निर्यातलगायत उद्योग व्यवसायमा लगानी छ । यस्तै उनले एशियन हेरिटेज फाउण्डेशन नेपालमार्फत स्वास्थ्य र शिक्षा क्षेत्रमा सामाजिक कार्य गर्दै आएका छन् । विगत २६ वर्षदेखि नेपालको पर्वतीय पर्यटनमा पूर्णरुपमा लागेका बाँस्तोलाले सन् २००२ मा टानको साधारण सदस्य लिएका थिए । सोलुखुम्बु निवासी बाँस्तोलाले पर्वतीय पर्यटनको विस्तारका लागि विभिन्न समितिमा बसेर काम गरेका अनुभव छ । एशियन हेरिटेज फाउण्डेशन नेपालमार्फत भूकम्प, नाकाबन्दी र कोरोनाका समयमा अग्र भागमा रहेर सामाजिक कार्य गर्दै आएका बाँस्तोला सन् २०१३–२०१५ मा टानको कार्यसमिति सदस्य एवं सन् २०१७–२०१९ मा द्वितीय उपाध्यक्ष निर्वाचित भएका थिए । बाँस्तोलाले नेपालको पर्यटन क्षेत्रमा गौरवमय इतिहास बोकेको टानलाई अझै सशक्त व्यावसायिक संस्थाका रुपमा अगाडि बढाउनका लागि आफूले अध्यक्ष पदमा उम्मेदवारी दिएको बताए । उनले नेपालको पर्यटन उद्योगको मुख्य आधार नै पर्वतीय पर्यटन भएकाले कोभिडले थलिएको समग्र पर्यटन व्यवसायलाई पुनरुत्थान गर्न टानको नेतृत्वमा आउन उम्मेदवारी दिएको उल्लेख गरे । अध्यक्षका अर्का प्रतिस्पर्धी व्यवसायी सापकोटाले अध्यक्षमा उम्मेदवारी घोषणा गरिसकेका छन् । आउटडोर हिमालयन ट्रेकका प्रबन्ध निर्देशकसमेत रहेका सापकोटाले ठमेलमा पर्यटकीय होटलसमेत सञ्चालन गरेका छन् । सापकोटा नेपाल पर्यटन बोर्डका पूर्वसञ्चालक समिति सदस्यसमेत छन् । पर्यटन क्षेत्रको प्रवद्र्धनमा प्रभावकारी भूमिका खेल्ने उद्देश्यले टान नेतृत्वमा आउन चाहेको उनले सुनाए । उनले भने, ‘निजी क्षेत्रबाट सञ्चालित टानको धुमिल हुन लागेको अस्तित्वलाई बचाउन र टानको गरिमालाई उँचो बनाउन मेरो भूमिका रहन्छ, निजी क्षेत्रको साझेदारिताका लागि गठित पर्यटन बोर्ड र टानको सहकार्य बढाएर प्रवद्र्धनात्मक कामलाई अघि बढाउन जरुरी छ ।’ सापकोटाले पदयात्री सूचना व्यवस्थापन प्रणाली (टिम्स) लाई प्रभावकारी बनाएर व्यवसायी र मजदुरबीचको भावनात्मक एकता अभिवृद्धि गरिनुपर्ने बताए । सुरूआतमा टिम्सको शुल्क टानसँग सहकार्य गरेर पर्यटन क्षेत्रमा कार्यान्वयन गर्ने र १० प्रतिशत रकम पर्यटन मजदुरको हितमा खर्च गर्ने सम्झौता भएको थियो । सम्झौताअनुरुप काम नभएको व्यवसायीको गुनासो छ । यता पर्यटन क्षेत्रमा लामो अनुभव भएका व्यवसायी भण्डारीले पनि टान नेतृत्वका लागि उम्मेदवारी घोषणा गरेका छन् । स्नोइ होराइजन ट्रेक्स एण्ड एक्स्पीडिसन प्रालिका सञ्चालक भण्डारीले आफ्ना प्रतिबद्धता पनि सामाजिक सञ्चालमार्फत सार्वजनिक गरेका छन् । उनले टान र टानका साधारण सदस्यप्रति उत्तरदायी भएर चुनावी खर्च कम गर्ने र उम्मेदवारी दर्ता शुल्क तथा बढीमा एक पन्ने प्रतिबद्धता पत्रको छपाइ खर्च मात्र हुने बताए । उनले निर्वाचनमा कुनै सदस्यको सदस्यता नवीकरण गरिदिने, फजुल खर्च नगर्ने, भेला र भाषणबाजी नगर्ने बताए । कुनै राजनीतिक दल र नेतासँग टानका विषयमा छलफल, सहमति या सम्झौता नगर्ने प्रतिबद्धता जनाउँदै भण्डारीले पदयात्रा, पर्वतारोहण व्यवसायको प्रवद्र्धन, संरक्षण, विकास र विस्तारका लागि पूर्णरुपमा प्रतिबद्धता जनाए । रासस
