विकास नायकबाट फर्स्ट च्वाइस फुड्सका अध्यक्ष कृष्णप्रसाद पौडेल सम्मानित
काठमाडौं । विकास नायक अवार्ड २०८२ बाट फर्स्ट च्वाइस फुड्सका अध्यक्ष कृष्णप्रसाद पौडेल विकास नायकबाट सम्मानित भएका छन् । विकास मिडियाको २०औँ वार्षिकोत्सवको अवसरमा आयोजना गरेको विकास बहस तथा विकास नायक अवार्ड वितरण कार्यक्रममा पौडेललाई सम्मान गरेको हो । कृषि क्षेत्रमा आधुनिकीकरण, यान्त्रिकीकरण, व्यवसायिकरण उत्पादनको बिक्री प्रबन्ध गरी कृषकको जीवनस्तर सुधारमा टेवा दिएबापत अध्यक्ष पौडेललाई विकास नायक, २०८२ बाट सम्मानित गरिएको हो । आइतबार आयोजना गरिएको कार्यक्रममा अर्थमन्त्री रामेश्वर खनालले पौडेललाई अवार्ड तथा सम्मान पत्र प्रदान गरे । नेपालमा फ्रेन्चफ्राइज उत्पादनको पहिलो उद्योग फर्स्ट च्वाइस फुड्स लिमिटेड खोलेर कृष्ण प्रसाद पौडेलले कृषिमा क्रान्तिको विजारोपण गरेका छन् । नेपाली उद्योगबाटै उत्पादन भएको फ्रेजफ्राइजको स्वाद अमेरिकी र भारतहरुका सहरहरुलाई चखाउन कृष्ण प्रसाद पोडेल सफल भएका छन् । विगतमा करोडौं रुपैयाँको आयात हुने फ्रेन्जफाइज अहिले सीमित परिमाणमात्रै आयात भइरहेको छ । नेपाली होटल तथा रेष्टरेन्ट, सुपरमार्केट र स्टोहरुमा नेपाली फ्रेञ्च फ्राइजको माग ह्वात्तै बढेको छ । ३५ हजार परिवारमा उद्योगी कृष्ण प्रसाद पौडेलको उद्योगसँग जोडिएका छन् । उनले आफ्नो व्यवसायलाई अभियानको रूपमा अगाडि बढाइरहेका छन् । किसानको पसिनाको मूल्य विश्व बजारसम्म पुर्याउने एक अद्वितीय कृषक अभियन्ताको परिचय कृष्ण पौडेलले बनाएका छन् । गुल्मीको सामान्य गाउँमा परिवारमा जन्मिएका कृष्ण देशकै उत्कृष्ट कृषि उद्योगी र विश्व बजारका व्यवसायीसँग प्रतिस्पर्धा गरेर नेपाल र नेपालीको शिर उचो बनाउने र हजारौं किसानको भविष्य बदल्ने अभियानमा लागिरहेका छन् । नेपालमा अवसर छैन भनेर विदेश जाने युवापुस्तालाई उनले नेपालमै भविष्य छ र आत्मनिर्भर बनेर स्वाभिमानका साथ काम गर्न सकिन्छ भन्ने सन्देश पनि दिएका छन् ।
ललितपुर महानगरका मेयर महर्जन विकास नायकबाट सम्मानित
काठमाडौं । विकास नायक अवार्ड २०८२ बाट ललितपुर महानगरपालिकाका मेयर चिरीबाबु महर्जन सम्मानित भएका छन् । विकास मिडियाले आयोजना गरेको विकास बहस तथा विकास नायक अवार्ड वितरण कार्यक्रममा मेयर महर्जनलाई सम्मान गरिएको हो । राजनैतिक संस्कार विकास, नीति निर्माण र सुशासन मार्फत विकासमा योगदान गरेबापत महर्जनलाई विकास नायक, २०८२ बाट सम्मानित गरिएको हो । आइतबार आयोजना गरिएको कार्यक्रममा अर्थमन्त्री रामेश्वर खनालले मेयर महर्जनलाई अवार्ड तथा सम्मान पत्र प्रदान गरे । सांस्कृतिक सम्पदा बोकेको ललितपुरलाई परम्परा, पहिचान र आधुनिकताको सुन्दर सहरका रुपमा विकास गर्ने कामको नेतृत्व महर्जनले गरिरहेका छन् । स्थानीय शासनमा पारदर्शिता, सुशासन र जनमुखी सेवाको सुदृढ अभ्यास गर्दै उनले समावेशी विकास, साझा सहभागिता र दीगो पूर्वाधार निर्माणमा ललितपुरलाई नयाँ ढंगले अगाडि बढाएका छन् । पुराना बस्ती र सम्पदाको संरक्षण, आधुनिक पैदलमार्ग, सुन्दर सडक, सार्वजनिक स्थल व्यवस्थापन तथा ‘स्मार्ट सिटी’ को परिकल्पना अघि सार्दै मेयर महर्जनले प्रविधिमैत्री महानगरको जग बसालेका छन् । साथै अशक्त नगरवासीलाई निःशुल्क स्वास्थ्य सेवा, सेवाग्राहीलाई एकद्वार सेवा प्रणाली र ललितपुरलाई शैक्षिक हबका रुपमा विकास गर्न चिरीबाबले नेतृत्वदायी भूमिका समेत खेलेका छन् । तीन पटक वडाअध्यक्षमा विजयी हाँसिल गरेर जनप्रतिनिधिका रुपमा ह्याट्रिक गरेका चिरीबाबुलाई ललितपुरवासीले दुई पटक नगर प्रमुखका रुपमा जिताएका छन् । जनविश्वास, नगरवासीको भरोसा र अपेक्षालाई सिरोधार्य गर्दै चिरीबाबुले व्यवस्थित कार्यशैली र श्रमप्रेमी स्वभावमार्फत नागरिकको सेवकको रुपमा काम गरिरहेका छन् । मेयर चिरीबाबु महर्जनलाई धेरैले स्थानीय जनप्रतिनिधिको प्रेरणादायी प्रतिकको उदाहरणका रुपमा बुझ्ने गरेका छन् ।
चाँदीमा दक्षता, देशव्यापी पहुँच: टेक्नो जया ज्वेलरीले गर्याे डेढ अर्ब आम्दानी
काठमाडौं । चाँदीका गहना उत्पादन तथा बिक्री वितरणमा टेक्नो जया ज्वेलरी परिचित नाम हो । सन् २००५ मा सञ्चालनमा आएको टेक्नो जया ज्वेलरी सुरुमा घरेलु तथा साना उद्योग विभागमा दर्ता भएको थियो । व्यवसायको आकार र सञ्जाल विस्तारसँगै सन् २०१६ मार्चमा कम्पनीले निजी उद्योग खडा गर्यो । कम्पनीको मोरङको विराटनगरमा आधुनिक उत्पादन प्लान्ट सञ्चालनमा रहेको छ । जहाँ दैनिक ३० हजार ग्रामसम्म चाँदीका विभिन्न प्रकारका गहना तथा अलङ्कार उत्पादन कम्पनीले जनाएको छ । टेक्नो जया ज्वेलरीका हाल देशभर ६ वटा खुद्रा बिक्री केन्द्र सञ्चालनमा छन् । कम्पनीले ग्राहकको पूर्वअर्डर अनुसार गहना तयार पार्ने काम गर्ने मात्र नभई ६ वटा खुद्रा बिक्री केन्द्रमार्फत पनि प्रत्यक्ष बिक्री गर्दै आएको छ । कम्पनीका अनुसार पूर्वी क्षेत्रलाई समेट्ने गरी विराटनगर २ वटा, मध्य क्षेत्रलाई समेट्ने गरी काठमाडौंमा एक र पश्चिम क्षेत्रलाई समेट्ने गरी भैरहवा, पोखरा, नेपालगन्ज एक/एक वटा आउटलेट सञ्चालनमा छन् । आधुनिक र परम्परागत शैलीलाई संयोजन गरी नयाँ-नयाँ गहना डिजाइन गर्ने टेक्नो जया ज्वेलरीले एक वर्षमै डेढ अर्ब रुपैयाँ हाराहारी आम्दानी गरेको छ । कम्पनीले सन् २०२५ मा १ अर्ब ४८ करोड ४० लाख रुपैयाँ सञ्चालन आम्दानी गरेको जनाएको छ । यो आम्दानी अघिल्लो वर्षको तुलनामा ७९ प्रतिशत अर्थात् ६५ करोड ५० लाख रुपैयाँ बढी हो । सन् २०२४ मा कम्पनीले ८२ करोड ९० लाख रुपैयाँ सञ्चालन आम्दानी गरेको थियो । चाँदीको मूल्य वृद्धिका कारण कम्पनीको सञ्चालन आम्दानी पनि बढेको जनाएको छ । ग्राहक संरचनामा गहना उत्पादक व्यवसायीक ग्राहक र खुद्रा ग्राहक दुवै समावेश छन्, तर बिक्रीको ठूलो हिस्सा भने थोक ग्राहकबाट आउने गरेको कम्पनीले जनाएको छ । कच्चा चाँदीलाई प्रशोधित गरी आकर्षक तथा गुणस्तरीय चाँदीका गरगहना उत्पादन गर्दै आएको टेक्नो जया ज्वेलरीले ग्राहकको अर्डर अनुसार गहना तयार गर्नुका साथै खुद्रा बिक्रीका लागि समेत उत्पादन गर्दै आएको छ । कलात्मक गहना उत्पादन गर्दै आएको कम्पनीले चाँदी केवल गहना वा भाँडाकुँडामा मात्र सीमित हुन्छ भन्ने सोचलाई पूर्ण रूपमा तोडिदिएको छ । टेक्नो जया ज्वेलरीको अध्यक्ष देवकिशन मुन्दडा रहेको छ । जसको मार्गदर्शनमा कम्पनी सञ्चालन भइरहेको छ । मुन्दडासँग विभिन्न व्यवसाय र उद्योग क्षेत्रमा चार दशकभन्दा बढीको अनुभव रहेको छ । उनी बाबा भेगिटेबल आयल इन्डस्ट्रिजका निर्देशक पनि हुन्, जसले पाम, सोयाबिन, सनफ्लावर तथा तोरीको तेल उत्पादन गर्छ । साथै, उनी बाबा जुट मिल्स प्रालिका निर्देशक हुन्, जहाँ जुट, बोरा र विभिन्न जुटजन्य सामग्री उत्पादन गरिन्छ । यसका अतिरिक्त, उनी अनुराग अगरबत्ती धूप उद्योगका सञ्चालकको भूमिकामा समेत रहेका छन् । कम्पनीका सञ्चालक नन्द किशोर मुन्दडासँग पनि औद्योगिक क्षेत्रमा चार दशकभन्दा बढीको अनुभव छ । उनी उद्योग र व्यावसायिक क्षेत्रमा आफ्नो दक्षता र अनुभवमार्फत कम्पनीको दीर्घकालीन रणनीति र सञ्चालनमा योगदान पुर्याउँदै आएका छन् । कम्पनीले कच्चा चाँदी दुबईबाट आयात गर्दै आएको छ । यसका अतिरिक्त जिंक र एलोयजस्ता अन्य आवश्यक उपभोग्य सामग्रीहरू भारतबाट आपूर्ति गर्दै आएको जनाएको छ । कच्चा चाँदीको मूल्य अन्तर्राष्ट्रिय माग तथा आपूर्तिको आधारमा निर्धारण हुने भएकाले बजारको उतार-चढावसँग प्रत्यक्ष रूपमा जोडिएको छ । त्यसैगरी, कच्चा चाँदीको मूल्य अमेरिकी डलरसँग सम्बन्धित भएकाले कम्पनीले विदेशी विनिमय दरको उतार-चढावको जोखिमसमेत बेहोर्दै आएको छ । विनिमय दरमा हुने परिवर्तनले आयात लागतमा प्रत्यक्ष असर पार्ने हुँदा कम्पनीको लागत संरचना प्रभावित हुने गरेको कम्पनीले जनाएको छ । साथै घरेलु बजारमा कच्चा चाँदीको बिक्री मूल्य नेपाल सुनचाँदी व्यवसायी महासंघद्वारा निर्धारण गरिने भएकाले कम्पनीले मूल्य निर्धारणमा सीमित लचिलोपन पाउँछ । मूल्यमा आउने अस्थिरताले नाफामा असर गर्ने गरेको कम्पनीले जनाएको छ । कम्पनीले विभिन्न बैंक तथा वित्तीय संस्थाबाट ऋण एक अर्ब रुपैयाँ भन्दा बढी ऋण लिएको छ । पछिल्लो तथ्याङ्क अनुसार कम्पनीले १३ करोड ९६ लाख रुपैयाँ दीर्घकालीन र १ अर्ब २ करोड रुपैयाँ अल्पकालीन गरी कुल १ अर्ब १५ करोड ९० लाख रुपैयाँ बैंकबाट ऋण लिएको जनाएको छ ।
