नाडेप लघुवित्तले डाक्यो १७औं साधारण सभा, मुख्य एजेण्डा के-के छन् ?
काठमाडौं । नाडेप लघुवित्त वित्तीय संस्थाले वार्षिक साधारण सभा आह्वान गरेको छ । लघुवित्त सञ्चालक समितिको माघ १५ गते बसेको बैठकले १७औं वार्षिक साधारण सभा फागुन ११ गते बिराटनगरमा बिहान ११ बजे बोलाएको हो । लघुवित्तको सभाले प्रबन्धपत्र तथा नियमावली संशोधन गर्ने, कुनै एक वा एकभन्दा बढी उपयुक्त वित्तीय संस्थाहरु एकआपसमा गाभ्ने गाभिने वा प्राप्ती गर्ने सम्बन्धमा संचालक समितिलाई अख्तियारी प्रत्यायोजन गर्ने छ । साथै, मिर्मिरे लघुवित्तसँग मर्जरको प्रक्रिया अन्तिम चरणमा पुगेको अवस्थामा मर्जर सम्बन्धि सैद्धान्तिक सहमति प्राप्त गरेका संस्थाका संचालकहरूको तोकिएको कार्यकाल समाप्त भई निर्वाचन गर्नुपर्ने अवस्था भएतापनि मर्जरपश्चात् पुनः निर्वाचन नभएसम्म संचालक पदमा बहाल रहन सक्ने भएकोले मिति २०७६ पुस २८ गते सम्पन्न १३ औं बार्षिक साधारणसभाद्धारा निर्वाचित संचालकहरु मर्जर पश्चात प्रचलित कानून बमोजिम पुनः निर्वाचन नभएसम्मको लागि यथावत बहाल रहने प्रस्ताव पारीत गर्नेछ । सभाले आर्थिक वर्ष २०७९/८०को सञ्चालक समितिको वार्षिक प्रतिवेदन र लेखापरीक्षको प्रतिवेदन पारित गर्नेछ । यस्तै, आर्थिक वर्ष २०८०/८१ को लागि लेखापरीक्षकको नियुक्ति र पारिश्रमीक निर्धारण गर्नेछ । वार्षिक साधारणसभा प्रयोजनका लागि माघ २४ गते सेयरधनी किताब बन्द (बुक क्लोज) गर्ने निर्णय गरेको छ । त्यसैले नेपाल स्टक एक्सचेञ्ज (नेप्से)मा माघ २३ गतेसम्म कायम सेयरधनीहरू मात्रै साधारणसभामा सहभागी हुन सक्ने छन् ।
स्वास्थ्य बीमा बोर्डका निर्देशक डा. बसौलालाई हटाउने सरकारको निर्णय
काठमाडौं । सरकारले स्वास्थ्य बीमा बोर्डका कार्यकारी निर्देशक डा. दामोदर बसौलालाई हटाउने निर्णय गरेको छ । माघ ९ गते बसेको मन्त्रिपरिषद्को बैठकले डा. बसौलालाई कार्यकारी निर्देशकबाट हटाउने निर्णय गरेको हो । स्वास्थ्य तथा जनसंख्या मन्त्री मोहनबहादुर बस्नेतको सिफारिस अनुसार डा. बसौलालाई हटाइएको हो । मन्त्री बस्नेतले सर्वोच्च अदालतको आदेश विपरीत बीमा बोर्डका कार्यकारी निर्देशक डा. दामोदर बसौलालाई हटाउनका लागि पुस २४ गते हटाउनका लागि मन्त्रिपरिषद्मा सिफारिस गरेका थिए ।
बढ्दो बजारमा तीन कम्पनीमा सर्किट, हिमालयन पछि नेपाल रिको सर्वाधिक कारोबार
काठमाडौं । विगत केहि दिनयता सेयर बजार निरन्तर रुपमा बढी रहेको छ । बजारमा नेप्से परिसूचक १४.८८ अंकले बढेर २११९.६१ बिन्दुमा पुगेको छ । जुन अघिल्लो दिनको तुलनामा ०.७० प्रतिशतले बढी हो । बजारमा परिसूचसँगै कारोबार रकममा पनि सुधार देखिएको छ । सोमबारको तुलनामा मंगलबार एकैदिन एक अर्ब बढीको कारोबार भएको छ । सोमबार साढे ४ अर्ब ५६ करोड रुपैयाँ बराबरको कारोबार भएको बजारमा मंगलबार बढेर ५ अर्ब ५४ करोड रुपैयाँ बराबरको सेयर किनबेच भएको छ । सर्वाधिक कारोबार गर्नेको अग्रस्थानमा हिमालय रि इन्स्योरेन्स कायमै छ । इन्स्योरेन्सको एकैदिन ७५ करोड २७ लाख रुपैयाँ बराबरको सेयर कारोबार भएको छ । जसको सेयर मूल्य पनि बढेर प्रतिकित्ता ७०९.६० रुपैयाँ पुगेको छ । त्यस्तै, पुनर्बीमा कम्पनी नेपाल रिको पनि २० करोड ७८ लाख रुपैयाँ बराबरको सेयर कारोबार भएको छ । यससँगै कम्पनी सर्वाधिक कारोबार गर्नेको तेश्रो सूचीमा छ । नेपाल रिको पनि सेयर मूल्य बढेर प्रतिकित्ता ८२६ रुपैयाँ पुगेको छ । सर्वाधिक कारोबार गर्नेको दोश्रो सूचीमा भने न्यादी ग्रुप पावर रहेको छ । जसको २२ करोड २० लाख रुपैयाँ बराबरको सेयर कारोबार भएको छ । बजारमा तीन कम्पनीको सेयरमा सकारात्मक सर्किट लागेको छ । जसमा चन्द्रागिरि हिल्स, समाज लघुवित्त वित्तीय संस्था र रवा इनर्जी डेभलपमेन्ट रहेका छन् । यी तीन वटै कम्पनीको सेयर मूल्य १० प्रतिशतले बढेको छ । बढेको बजारमा पनि बैंकिङ, फाइनान्स, निर्जीवन बीमा र लघुवित्त समूह ओरालो लागेका छन् ।
