सिनर्जी पावरले लाभांश पछि हकप्रद सेयर जारी गर्ने
काठमाडौं । सिनर्जी पावर डेभलपमेन्टले सेयरधनीलाई १०.५२६३ प्रतिशत लाभांश वितरण गर्ने भएको छ । कम्पनीले २०७८ असारसम्मको सञ्चित नाफाबाट सेयरधनीलाई चुक्ता पुँजीको सो मात्राको लाभांश वितरण गर्ने प्रस्ताव गरेको हो । साउन २४ गते बसेको कम्पनी सञ्चालक समितिको बैठकले चुक्ता पुँजीको १० प्रतिशत बोनस र कर प्रयोजनको लागि ०.५२६३ प्रतिशत नगद गरी सो मात्राको लाभांश प्रस्ताव गरेको हो । हाल कम्पनीको चुक्ता पुँजी ७३ करोड ३२ लाख रुपैयाँ रहेको छ । १० प्रतिशत बोनसपछि कम्पनीको चुक्ता पुँजी ८० करोड ६५ लाख रुपैयाँ पुगेको छ । त्यस्तै, कम्पनीले बोनस पश्चात कायम चुक्ता पुँजीको ५० प्रतिशत हकप्रद सेयर जारी गर्ने प्रस्ताव गरेको छ । उक्त प्रस्तावलाई सभाले पारित गरेपश्चात कम्पनीको चुक्ता पुँजी १२ करोड ९ लाख रुपैयाँ पुग्ने छ ।
अब खल्तीबाट टिभिएसको सबै सवारीसाधनको किस्ता शुल्क भुक्तानी गर्न सकिने
काठमाडाैं । खल्ती डिजिटल वालेट ले नेपालका लागि टिभिएसको आधिकारिक बिक्रेता जगदम्बा मोटर्स सँगको सहकार्यमा टिभिएसको सबै सवारी साधनहरुको किस्ता खल्ती बाटै तिर्न सकिने सुविधा ल्याएको छ । डिजिटल कारोबारलाई प्रोत्साहन गर्न तथा कोभिड महामारीका बेला सबै प्रकारको किस्ता सहजै तिर्न सकियोस् भन्ने उद्देश्यले यो सुविधा ल्याईएको हो । खल्ती डिजिटल वालेट र जगदम्बा मोटर्स बीचको सम्झौतामा हस्ताक्षर भए पश्चात ग्राहकहरुले जुनसुकै समयमा टिभिएसको मोटरसाईकल, स्कुटर, टेम्पो जस्ता सबै सवारी साधनहरुको किस्ता खल्तीबाट सिधै तिर्नसक्ने भएका छन् । खल्तीले ग्राहकहरुको सहजताको लागि टिभिएस सोरुममा खल्ती क्यूआरहरु पनि सेट गरेका छ जस मार्फत ग्राहकहरुले युनियन पे सँग आवद्द बैंक तथा डिजिटल वालेटहरुबाट पनि भुक्तानी गर्न सक्नेछन् ।
प्रिमियममा आईपीओ जारी गर्ने सन नेपाल लाइफको प्रस्ताव पारित, सञ्चालकमा कयाल नियुक्त
काठमाडौं । सन नेपाल लाइफ इन्स्योरेन्सको प्रिमियम मूल्यमा आईपीओ जारी गर्ने प्रस्ताव पारित भएको छ । साउन २५ गते सोमबार सम्पन्न कम्पनीको तेस्रो वार्षिक साधारण सभाले सञ्चालक समितिको उक्त प्रस्तावलाई पारित गरेको हो । यससँगै कम्पनीले सर्वसाधारणमा प्रमियम मूल्यमा ६० लाख कित्ता आईपीओ निष्काशन गर्ने भएको छ । इन्स्योरेन्सको साधारण सभा भर्च्युअल माध्यमबाट सम्पन्न भएको थियो । साथै, सभाले आर्थिक वर्ष २०७५/०७६ को वार्षिक प्रतिवेदन, आर्थिक वर्ष २०७५/७६ को लेखापरिक्षण प्रतिवेदन वासलात, नाफा र नोक्सान, हिसाब नगद प्रवाह विवरण र सो सम्बन्धी अनुसूची एनएफआरएस प्रणाली लगायतका विषयमाथि छलफल गरी पारित गरेको छ । यसका साथै, सभाले कम्पनीको स्वतन्त्र विज्ञ सञ्चालकमा नितु कयाललाई नियुक्त गरेको छ । इन्स्योरेन्सले हाल देशभरका २० वटा शाखा कार्यालय तथा १०८ वटा उपशाखा कार्यालयमार्फत जीवन बीमा सेवा दिँदै आएको छ । साथै, आगामी दिनमा स्थानीय स्तरबाट बीमा सेवा प्रवाह गर्दै अघि बढ्ने कम्पनीको लक्ष्य छ ।
