अगस्टमा नेपालमा ८५ हजारभन्दा बढी विदेशी पर्यटक भित्रिए
काठमाडौं । सन् २०२६ को अगस्ट महिनामा नेपालमा ८५ हजार ४४४ जना विदेशी पर्यटक भित्रिएका छन् । यो संख्या गत वर्षको सोही महिनाको तुलनामा केही कम हो । सन् २०२५ को अगस्टमा नेपालमा ८८ हजार ६८० जना अन्तर्राष्ट्रिय पर्यटक आएका थिए । नेपाल पर्यटन बोर्डले अध्यागमन विभागबाट प्राप्त तथ्यांक सार्वजनिक गर्दै अगस्टमा भारतबाट सबैभन्दा धेरै पर्यटक नेपाल आएको जनाएको छ । तथ्यांकअनुसार अगस्टमा भारतबाट २६ हजार ३७३ जना पर्यटक नेपाल आएका छन् । यो कुल पर्यटक आगमनको ३०.८७ प्रतिशत हो । भारतपछि चीनबाट १० हजार ३०४ जना पर्यटक नेपाल आएका छन् । गत वर्षको अगस्टमा चीनबाट ७ हजार ५३३ जना पर्यटक आएकोमा यस वर्ष ३६.७८ प्रतिशत वृद्धि भएको बोर्डले जनाएको छ । त्यस्तै, श्रीलंकाबाट ८ हजार ७१० जना पर्यटक नेपाल आएका छन् । यो संख्या गत वर्षको तुलनामा ४६.२४ प्रतिशत बढी हो । अमेरिकाबाट ६ हजार २९३ जना, बंगलादेशबाट ४ हजार ४८७ जना र बेलायतबाट ३ हजार ४७६ जना पर्यटक नेपाल आएका छन् । क्षेत्रगत रूपमा हेर्दा अगस्टमा दक्षिण एसियाबाट ४१ हजार ४२२ जना पर्यटक नेपाल आएका छन् । अन्य एसियाली मुलुकबाट १८ हजार २७५ जना, युरोपबाट १० हजार ८७५ जना र ओसियानिया क्षेत्रबाट २ हजार ५२९ जना पर्यटक आएका छन् । ओसियानियाबाट आउने पर्यटक संख्या गत वर्षको तुलनामा ३.८६ प्रतिशत बढेको छ । त्यस्तै, अमेरिकी महादेशबाट ७ हजार ४७३ जना पर्यटक नेपाल आएका छन्, जुन गत वर्षको तुलनामा २.४७ प्रतिशत बढी हो । मध्यपूर्वबाट १ हजार १० जना पर्यटक आएका छन् भने यो क्षेत्रमा ६.९९ प्रतिशत वृद्धि भएको छ। अफ्रिकाबाट ३३८ जना पर्यटक नेपाल आएका छन्, जुन गत वर्षको तुलनामा ४.९७ प्रतिशत बढी हो । नेपाल पर्यटन बोर्डका अनुसार अगस्ट २०२६ मा केही प्रमुख बजारबाट पर्यटक आगमन उल्लेख्य रूपमा बढेको छ । रुसबाट ७६९ जना पर्यटक आएका छन्, जुन गत वर्षको तुलनामा ५१.३८ प्रतिशत वृद्धि हो । युक्रेनबाट २१६ जना पर्यटक आएका छन्, जहाँबाट आगमन ८३.०५ प्रतिशत बढेको छ । त्यस्तै, कम्बोडियाबाट ६८ जना पर्यटक आएका छन्। यो संख्या गत वर्षको तुलनामा २७७.७८ प्रतिशत बढी हो । भुटानबाट १ हजार २८८ जना पर्यटक नेपाल आएका छन्, जहाँबाट आगमन ४९.२५ प्रतिशत बढेको छ । मलेसियाबाट १ हजार ६१८ जना र थाइल्यान्डबाट ६८१ जना पर्यटक आएका छन् । यी दुई बजारबाट क्रमशः १३.०७ प्रतिशत र १९.८९ प्रतिशत वृद्धि भएको पर्यटन बोर्डले जनाएको छ ।
कोरलामा बढ्यो चाप, पूर्वाधार र जनशक्ति अभाव
काठमाडौं । चीनसँगको प्रमुख व्यापारिक नाका रसुवागढी बाढीका कारण पूर्ण रूपमा बन्द भएपछि मुस्ताङको कोराला नाकामा व्यापारिक चाप निकै बढेको छ । रसुवागढी नाकाबाट हुने सबै आयात कोरलातर्फ डाइभर्ट हुँदा यस नाकाको व्यस्तता बढेको हो । भन्सार विभागका प्रवक्ता किशोर बर्तौलाका अनुसार बाढीका कारण रसुवागढी नाका बन्द भएको छ भने चीन तर्फबाट तातोपानी नाका समेत आगामी सेप्टेम्बर ३ सम्मका लागि अस्थायी रूपमा बन्द गरिएको छ । दुवै नाका बन्द भएपछि सबै आयात कोराला नाका सरेको उनको भनाइ छ । अहिले मुख्य व्यापारिक केन्द्रका रूपमा कोरला नाका रूपमा विकास भइरहेको प्रवक्ता बर्तौलाले विकासन्युजलाई जानकारी दिए । व्यापारिक चाप बढे पनि कोराला नाकामा नेपालतर्फको भौतिक पूर्वाधार भने अत्यन्तै कमजोर रहेको प्रवक्ता बर्तौलाले बताए । चीनले आफ्नोतर्फ व्यवस्थित संरचना बनाए पनि नेपालतर्फ भन्सारको आफ्नै भवन समेत छैन । हाल एउटै सानो कोठाबाट सबै कर्मचारीले कार्यसम्पादन गरिरहेका छन् । ‘भौगोलिक रूपमा उच्च उचाइमा हुनु आफैमा चुनौती हो, त्यसमाथि व्यवस्थित भवन, कर्मचारी आवास र गोदामको अभाव छ,’ बर्तौलाले भने, ‘अहिले एउटै कोठालाई पार्टेसन गरेर कोचिएर काम गर्नुपर्ने बाध्यता छ । ’ सरकारले त्यहाँ एकीकृत जाँच चौकी बनाउने योजना बनाए पनि हालका लागि अस्थायी संरचनामा लगानी गर्न बजेटको समेत समस्या रहेको उनले जानकारी दिए । भन्सार विभागका अनुसार कोरला नाकामा हाल ९ जना कर्मचारीको भरमा चलिरहेको छ । जसमा १ जना उपसचिव (प्रमुख), २ जना अधिकृत र ६ जना इन्स्पेक्टर खटिएका छन् । चापअनुसार यो जनशक्ति निकै कम हो । सूचना अधिकारी बर्तौलाका अनुसार नाकामा दरबन्दी थप्नका लागि संगठन तथा व्यवस्थापन (ओएण्डएम) सर्वेक्षण हुनुपर्ने र त्यसलाई मन्त्रालयले स्वीकृत गर्नुपर्ने हुन्छ । यो प्रक्रिया पुरा नभई थप जनशक्ति पठाउन र उनीहरूलाई तलब खुवाउन प्रशासनिक रूपमा नमिल्ने उनले बताए । कोभिड-१९ को समयमा मुस्ताङका स्थानीयका लागि मात्र थोरै सामान आयात हुने गरेको यो नाका अहिले देशभरकै लागि व्यापारिक मार्ग बन्न पुगेको छ । रसुवा र तातोपानीको विकल्पका रूपमा कोरलाबाट व्यापारिक सामानहरू भित्रिन थालेका छन् । तर, अक्सिजनको व्यवस्था सहितको आधुनिक भवन र गोदाम नबनेसम्म कर्मचारी र व्यापारी दुवैका लागि यो नाका सहज नहुने प्रवक्ता बर्तौलाको भनाइ छ । हाल तातोपानी नाका सेप्टेम्बर ३ पछि खुल्ने वा नखुल्ने भन्नेबारे चिनियाँ पक्षको अर्को सूचना आएपछि मात्र प्रस्ट हुने उनले जानकारी दिए । पूर्वाधार र जनशक्तिको चरम अभाव यसैगरी, चीनसँगको व्यापारिक कारोबारका लागि मुस्ताङको कोराला नाका मुख्य विकल्पका रूपमा देखा पर्न थालेको भन्सार कार्यालयका सूचना अधिकारी अमिन्द्र सिंह बताउँछन् । रसुवागढी नाका ठप्प बनेको र तातोपानी नाकामा अर्को सूचना नभएसम्मका लागि बन्द गरिएको भन्दै व्यापारीहरूले कोरलालाई प्राथमिकता दिन थालेका उनको भनाइ छ । बढ्दो व्यापारिक सम्भावनासँगै कोरला नाकामा पूर्वाधार र जनशक्तिको भने चरम अभाव देखिएको उनी बताउँछन् । मुस्ताङ भन्सार कार्यालयका सूचना अधिकारी सिंहका अनुसार अहिले कोरला नाकाबाट नियमित रूपमा आयात-निर्यात भइरहेको छ । रसुवा हुँदै आउने गाडीहरू कोरलातर्फ मोडिन थालेकाले आगामी केही दिनमा आयातको परिमाण अझै बढ्ने देखिएको छ । ‘चीन तर्फबाट गाडीहरू छोड्न थालेपछि यहाँको चाप अझै बढ्नेछ,’ सिंहले भने । असीमित चुनौती व्यापारिक चाप बढे पनि भन्सार कार्यालयमा जनशक्तिको अवस्था भने नाजुक छ । हाल यो कार्यालय एक जना प्रमुख, एक जना सीएसबी, दुई जना अधिकृत र तीन जना सुब्बाको भरमा सञ्चालन भइरहेको उनको भनाइ छ । सीमित कर्मचारीले बढ्दो कार्यभार धान्नुपर्ने बाध्यता छ । भन्सार विभागले मौखिक रूपमा जनशक्ति थप्ने आश्वासन दिए पनिवअहिलेसम्म ठोस निर्णय भने भइनसकेको अधिकारी सिंहले जानकारी दिए । एउटै कोठामा तीनवटा कार्यकक्ष कोराला नाकामा भौतिक पूर्वाधारको अवस्था निकै कमजोर रहेको उनको भनाइ छ । उनका अनुसार डेढ महिनाअघि मात्रै कार्यालयका लागि एउटा सानो भवनको व्यवस्था गरिएको भए पनि त्यो पर्याप्त छैन । ‘अहिले एउटा कोठालाई पार्टेसन गरेर तीनवटा कार्यकक्ष निकालिएको छ, जहाँ एउटै डेस्कमा तीन जनासम्म साथीहरूले बसेर काम गर्नुपर्ने अवस्था छ,’ सूचना अधिकारी सिंहले विकासन्युजसँग भने । कार्यालयका अनुसार एकीकृत जाँच चौकी निर्माणका लागि विस्तृत परियोजना प्रतिवेदन (डीपीआर) अध्ययन भइसकेकाले अस्थायी संरचनामा बजेट लगानी गर्न सरकारी निकाय हच्किएका हुन् । जसका कारण तत्कालका लागि व्यापारी र एजेन्टहरूलाई आवश्यक पर्ने न्यूनतम सुविधा समेत व्यवस्थापन गर्न कठिन भइरहेको छ । यस वर्षदेखि कोराला नाकाबाट क्वारेन्टाइनसम्बन्धी वस्तुहरू (जस्तै स्याउ लगायतका कृषिजन्य सामग्री) समेत आयात गर्ने तयारी भइरहेको छ । यसअघि स्थानीय बासिन्दाले केही असहमति जनाएका कारण यो प्रक्रिया अघि बढ्न सकेको थिएन । व्यापारीहरूले यस विषयमा चासो देखाइरहेका छन् भने भन्सार कार्यालयले यसबारे विभाग र स्थानीयसँग समन्वय गरेर अगाडि बढ्ने योजना बनाएको छ । उत्तरी नाकाहरूको विकल्पका रूपमा कोरालाको महत्त्व बढ्दै गए पनि सरकारले समयमै पर्याप्त जनशक्ति र भौतिक पूर्वाधारको व्यवस्था नगरे व्यापार व्यवस्थापनमा ठुलो चुनौती आउने निश्चित देखिएको छ । तातोपानी नाका बन्द चीन सरकारले रसुवागढीमा आएको बाढीपछि तातोपानी नाकासमेत बन्द गरेको छ । तातोपानी भन्सार कार्यालयका सूचना अधिकारी तुलबहादुर पाण्डेका अनुसार चीन सरकारका तर्फबाट भन्सार कार्यालयका नाममा इमेल गरिएको छ । जसमा अर्को सूचना जारी नभएसम्म तातोपानी नाका बन्द रहने उल्लेख छ । यसबारे थप जानकारी प्राप्त नभएको उनले बताए । रसुवागढी बाढीले बगाएसँगै तातोपानी नाकालाई विकल्पका रूपमा हेरिएको थियो । तर, उक्त नाकासमेत बन्द भएपछि नेपाल–चीन व्यापारको विकल्प कोराला बनेको छ । चाडबाडको मुखमा दुवै नाका अवरुद्ध हुँदा त्यसले नेपाली बजारमा भने प्रत्यक्ष असर पुग्ने धेरैको अनुमान छ ।
लगातार ६ दिनको गिरावटपछि बढ्यो नेप्से, पौने ३ अर्बको कारोबार
काठमाडौं । लगातार ६ कारोबार दिन ओरालो लागेको सेयर बजार मंगलबार सामान्य सुधारसहित हरियो बनेको छ । साताको दोस्रो कारोबार दिन नेप्से परिसूचक ९.२४ अंकले बढेर २५२२.६६ विन्दुमा बन्द भएको हो । नेप्से बढे पनि कारोबार रकम भने घटेको छ । सोमबार ३ अर्ब ६४ करोड ८६ लाख रुपैयाँ बराबरको कारोबार भएको बजारमा मंगलबार ३४१ कम्पनीका ७६ लाख १३ हजार कित्ता सेयर किनबेच हुँदा कुल कारोबार रकम २ अर्ब ९० करोड ६९ लाख ४३ हजार रुपैयाँमा सीमित भयो । यस दिन ४८ हजार ३४१ पटक सेयर कारोबार भएको थियो । मंगलबार माथिल्लो मैलुङ खोला जलविद्युत कम्पनीको सेयर मूल्य सबैभन्दा धेरै ७.१५ प्रतिशतले बढ्यो । त्यस्तै, एमबीएल इक्विटी फन्डको इकाइ मूल्य करिब ६ प्रतिशत र इमर्जिङ नेपालको सेयर मूल्य करिब ५ प्रतिशतले उकालो लाग्यो । यता उपकार लघुवित्त वित्तीय संस्थाका लगानीकर्ताले सबैभन्दा धेरै घाटा बेहोरे । कम्पनीको सेयर मूल्य ८.४८ प्रतिशतले घटेको छ । कारोबार रकमका आधारमा मंगलबार सोलु हाइड्रोपावर शीर्ष स्थानमा रह्यो । कम्पनीको १३ करोड ८२ लाख रुपैयाँ बराबरको सेयर कारोबार भयो । शिवम् सिमेन्टको १३ करोड ५० लाख रुपैयाँभन्दा बढी र आँखुखोला जलविद्युत कम्पनीको १० करोड रुपैयाँभन्दा बढीको कारोबार भएको छ । १३ उपसमूहमध्ये मंगलबार १२ उपसमूह हरियो बनेका छन् भने एक उपसमूह मात्रै घटेको छ । जलविद्युत उपसमूह सबैभन्दा धेरै १.०१ प्रतिशतले बढ्दा उत्पादन तथा प्रशोधन उपसमूह १ प्रतिशतले घटेको छ ।
तीन प्रकारका औषधि बजारबाट तत्काल फिर्ता गर्न निर्देशन
काठमाडौं । औषधि व्यवस्था विभागले मापदण्ड पूरा नगरेका विभिन्न तीन प्रकारका औषधि तत्काल बजारबाट फिर्ता गर्न निर्देशन दिएको छ । बजार अनुगमनका क्रममा राष्ट्रिय औषधि प्रयोगशालाबाट परीक्षण गर्दा तोकिएको मापदण्डअनुसार नपाइएका औषधि फिर्ता गर्न सम्बन्धित उद्योग तथा प्रतिनिधिलाई निर्देशन दिइएको विभागले जनाएको छ । विभागले फिर्ता गर्न निर्देशन दिएका औषधिमा ओमिट्रोन सिरप, भोमिसेट सिरप र अल्कल–डी ५०० ट्याब्लेट रहेका छन् । नेसनल हेल्थकेयर प्रालि।, छत्रपाटी, काठमाडौं द्वारा उत्पादित ओमिट्रोन सिरप को ब्याच नम्बर ओएमएल २५०२२ रहेको छ । उक्त औषधि मुखबाट सेवन गर्ने घोलको परीक्षण तथा प्याकेजिङसम्बन्धी तोकिएको आवश्यकतासँग मेल नखाने पाइएको विभागले जनाएको छ । त्यस्तै टाइम फार्मास्युटिकल्स प्रालि।, गैँडाकोट–१०, नवलपरासी द्वारा उत्पादित भोमिसेट सिरप को ब्याच नम्बर भीएमएस–०१९ रहेको छ। उक्त औषधि पनि प्याकेजिङसम्बन्धी तोकिएको मापदण्ड पूरा नगरेको पाइएको छ । भारतको अल्केम हेल्थ साइन्स द्वारा उत्पादित अल्कल–डी ५०० ट्याब्लेट का ब्याच नम्बर २५४४२३५९ र २५४४२३५८ रहेका छन् । उक्त औषधिमा रहेको भिटामिन डीको मात्रा परीक्षण तोकिएको मापदण्डअनुसार नपाइएको विभागले जनाएको छ । यसको आयातकर्ता बालाजी मेडिसिन्स डिस्ट्रीब्युटर्स, पर्सा रहेको छ । विभागले यी औषधिको बिक्री, वितरण तथा प्रयोग नगर्न–नगराउन सम्बन्धित सबैलाई आग्रह गरेको छ । साथै बजारमा रहेका औषधि तत्काल फिर्ता गरी त्यसको विवरण विभागमा पेश गर्न सम्बन्धित उद्योग तथा प्रतिनिधिलाई निर्देशन दिएको छ ।
कन्टिनेन्टल ट्रेडिङद्वारा रसुवा बाढीपीडितका लागि २५ लाख सहयोग
काठमाडौं । रसुवाको भोटेकोशी नदीमा आएको विनाशकारी बाढीबाट प्रभावित नागरिकको राहत, उद्धार र पुनर्स्थापना कार्यमा सहयोग गर्न कन्टिनेन्टल ट्रेडिङ इन्टरप्राइजेज प्रालिले २५ लाख रुपैयाँ सहयोग गरेको छ । कम्पनीका अध्यक्ष सुहृद् घिमिरे, कार्यकारी उपाध्यक्ष रेखा घिमिरे र निर्देशक अदिती घिमिरे सहितको टोलीले अर्थ मन्त्रालय पुगेर अर्थमन्त्री स्वर्णिम वाग्लेलाई प्रधानमन्त्री दैवी प्रकोप उद्धार कोषका लागि २५ लाख रुपैयाँको चेक हस्तान्तरण गरेको हो । हालै भोटेकोशी नदीमा आएको भीषण बाढी र पहिरोका कारण रसुवा, नुवाकोट, धादिङलगायत आसपासका जिल्लामा ठूलो जनधनको क्षति भएको छ । विपद्ले घर, सम्पत्ति तथा भौतिक पूर्वाधारमा व्यापक क्षति पुर्याएको छ भने प्रभावित परिवारलाई तत्काल राहत, उद्धार र पुनर्स्थापनाको आवश्यकता रहेको कम्पनीले जनाएको छ । कम्पनीका अनुसार विपद्को कठिन घडीमा पीडित नागरिकको साथमा उभिने र सरकारको राहत तथा उद्धार अभियानमा सहयोग पुर्याउने उद्देश्यले उक्त रकम प्रधानमन्त्री दैवी प्रकोप उद्धार कोषमा प्रदान गरिएको हो । चेक हस्तान्तरणका क्रममा कम्पनीका प्रतिनिधिहरूले बाढी र पहिरोमा ज्यान गुमाएका नागरिकप्रति श्रद्धाञ्जली व्यक्त गर्दै शोकसन्तप्त परिवारजनप्रति गहिरो समवेदना प्रकट गरेका छन् । साथै घाइतेहरूको शीघ्र स्वास्थ्यलाभको कामना पनि गरेका छन् । कम्पनीले प्राकृतिक विपद्को समयमा पीडित परिवारको दुःखमा साथ दिनु निजी क्षेत्रको सामाजिक उत्तरदायित्व भएको उल्लेख गरेको छ । कम्पनीका प्रतिनिधिले भने, 'विपद्को समयमा पीडित नागरिकको साथमा उभिनु हाम्रो मानवीय र सामाजिक दायित्व हो । राज्य र समाजलाई आवश्यक परेको बेला निजी क्षेत्रले आफ्नो क्षमता अनुसार सहयोग गर्नुपर्छ भन्ने हाम्रो विश्वास छ ।' कन्टिनेन्टल ट्रेडिङ इन्टरप्राइजेजले आगामी दिनमा पनि आवश्यकता र आफ्नो सामर्थ्यअनुसार मानवीय सहायता तथा सामाजिक उत्तरदायित्वका कार्यक्रमलाई निरन्तरता दिने प्रतिबद्धता जनाएको छ ।
बाढीपीडित भोकभोकै छन्, सरकार प्रचारबाजीमा व्यस्त छ : सांसद शर्मा
काठमाडौं । नेपाली कांग्रेसका सांसद युवराज शर्माले बाढी प्रभावित क्षेत्रका नागरिकलाई राहत वितरण र बेपत्ता व्यक्तिको खोजी कार्य प्रभावकारी बनाउन सरकारको ध्यानाकर्षण गराएका छन् । मंगलबार सिंहदरबारमा सञ्चारकर्मीसँग कुरा गर्दै सांसद शर्माले सरकारले सबै पक्षसँग प्रभावकारी समन्वय गर्न नसक्दा देश–विदेशबाट प्राप्त राहत सामग्री प्रभावित नागरिकसम्म पुग्न नसकेको गुनासो आएको बताए । उनले बाढी प्रभावित नागरिक आफ्नै पैसाले समेत आवश्यक सामग्री किन्न नसक्ने अवस्थामा पुगेको भन्दै धेरै ठाउँमा मानिसहरू भोकभोकै बस्नुपरेको दाबी गरे । विपद्को यस्तो अवस्थामा एकअर्कालाई दोषारोपण गर्नुभन्दा खोज, उद्धार र राहत वितरणलाई प्रभावकारी बनाउन सरकार केन्द्रित हुनुपर्ने उनको भनाइ छ । सांसद शर्माले सरकारले घोषणा गरेको एकद्वार राहत प्रणाली प्रभावकारी रूपमा कार्यान्वयन हुन नसकेको पनि बताए । स्थानीय तह, प्रदेश सरकार र संघीय सरकारबीच आवश्यक समन्वय नहुँदा राहत वितरणमा समस्या देखिएको उनको आरोप छ । ‘देश–विदेशबाट सक्दो सहयोग आइरहेको छ। तर सही ठाउँमा राहत नपुग्दा प्रभावित नागरिकले हामी भोकभोकै छौं, आफन्त हराएका छन् र राहत पाएका छैनौं भन्ने गुनासो गरिरहेका छन्,’ उनले भने । उनले स्थानीय र प्रदेश सरकारसँग समन्वय गरेर राहत वितरणलाई व्यवस्थित गर्नुपर्नेमा सरकार चुकेको टिप्पणी गरे । सांसद शर्माले सरकारले परिणाममुखी काम गर्नुपर्ने भन्दै मन्त्रीहरू उद्धार र राहतमा भन्दा प्रचारबाजीमा केन्द्रित भएको आरोप लगाए । ‘प्रचारबाजीमा सरकार लाग्नु भएन, मन्त्रीहरू पनि त्यसमा केन्द्रित हुनु भएन,’ उनले भने ।
शर्मा एण्ड कम्पनी र सञ्जीवनी ग्रुपले संयुक्त रुपमा बाढीपीडितलाई दिए १ करोड ५१ लाख
काठमाडौं । बाढी प्रभावितको उद्धार, राहत तथा पुनःस्थापनाका लागि शर्मा एण्ड कम्पनी र सञ्जीवनी ग्रुपले १ करोड ५१ लाख रुपैयाँ सहयोग गरेका छन् । मंगलबार शर्मा एण्ड कम्पनीका अध्यक्ष रमेश शर्मा, सञ्चालक सौरभ शर्मा तथा सञ्जीवनी ग्रुपका सञ्चालक राजु बस्नेत क्षेत्रीले सहयोग रकम अर्थमन्त्री स्वर्णिम वाग्लेलाई हस्तान्तरण गरेका हुन् । रसुवा, नुवाकोट, धादिङ, गोरखालगायत जिल्लाका तटीय क्षेत्रमा बाढीका कारण ठूलो जनधनको क्षति भएपछि प्रभावित नागरिकको तत्काल उद्धार, राहत तथा पुनःस्थापनामा सहयोग पुर्याउने उद्देश्यले उक्त रकम प्रदान गरिएको कम्पनीहरूले जनाएका छन् । शर्मा एण्ड कम्पनी र सञ्जीवनी ग्रुपले बाढीबाट ज्यान गुमाएका परिवारप्रति समवेदना व्यक्त गर्दै विपद्बाट प्रभावित व्यक्ति तथा समुदायप्रति सहानुभूति प्रकट गरेका छन् । साथै प्रभावित नागरिकको उद्धार, राहत र पुनःस्थापनालाई उच्च प्राथमिकतामा राख्दै आवश्यक सहयोग तथा प्रभावकारी व्यवस्थापन गर्न सरकारसँग आग्रह गरेका छन् ।
त्रिशूली नदीमा भेटियो टिमुरे भन्सारका अधिकृत नकुल शर्माको शव
काठमाडौं । रसुवास्थित टिमुरे भन्सार कार्यालयका अधिकृत नकुल शर्माको शव गोरखास्थित त्रिशूली नदी किनारमा भेटिएको छ । गत बुधबार बिहान भोटेकोशी नदीमा आएको भीषण बाढीमा परी सम्पर्कविहीन भएका शर्माको शव मंगलबार गोरखास्थित त्रिशूली नदी किनारमा भेटिएको हो । बाढीमा परेर बेपत्ता भएका भन्सार कर्मचारीको खोजी तथा पहिचानका लागि परिचालित टोलीले शर्माको शव पहिचान गरेको भन्सार विभागका सूचना अधिकारी किशोर बर्तौलाले जानकारी दिए । उनका अनुसार गोरखामा त्रिशूली नदी किनारमा भेटिएको शव शर्माकै भएको पुष्टि भएपछि परिवारलाई जानकारी गराइएको थियो । भन्सार विभागबाट परिचालित अधिकृत रमेश कुँवर नेतृत्वको खोजतलास तथा पहिचान टोलीले आवश्यक प्रक्रिया पूरा गरी शवको पहिचान गरेको बर्ताैलाले बताए । गत बुधबार बिहान भोटेकोशी नदीमा आएको आकस्मिक तथा भीषण बाढीले टिमुरे आसपासको क्षेत्रमा ठूलो क्षति पु‍र्‍याएको थियो । बाढीका कारण टिमुरे भन्सार कार्यालयका १५ कर्मचारीहरू सम्पर्कविहीन भएका थिए । बाढीपछि भन्सार विभागले बेपत्ता कर्मचारीहरूको खोजी, उद्धार तथा पहिचानका लागि सम्बन्धित निकायसँग समन्वय गर्दै आएको प्रवक्ता बर्तौलाले जानकारी दिए । बाढीको बहावसँगै शवहरू नदीको तल्लो तटीय क्षेत्रमा पुग्न सक्ने भएकाले रसुवासहित नुवाकोट, धादिङ र गोरखातर्फ समेत खोजी अभियानकालागी विभागले कर्मचारीहरू खटाएको थियो । यसै क्रममा गोरखास्थित त्रिशूली नदी किनारमा भेटिएको शवको पहिचान गर्दा अधिकृत शर्माको भएको पुष्टि भएको हो । शर्माको निधनसँगै टिमुरे भन्सार कार्यालयले एक अनुभवी अधिकृत गुमाएको बर्तौलाले जानकारी दिए ।
