सेयर बजारमा २ अर्ब ९४ करोडको कारोबार
काठमाडौं । नेपाल स्टक एक्सचेन्ज (नेप्से) परिसूचक लगातार दोस्रो कारोबार दिन पनि बढेर बन्द भएको छ । बुधबार नेप्से १५.४४ अंकले बढेर २५३८.११ विन्दुमा पुगेको हो । बजार बढेसँगै कारोबार रकममा पनि सामान्य सुधार आएको छ । मंगलबार २ अर्ब ९० करोड रुपैयाँको कारोबार भएको बजारमा बुधबार २ अर्ब ९४ करोड २७ लाख ८१ हजार रुपैयाँ बराबरको सेयर किनबेच भयो । यस दिन ३५४ कम्पनीका ७२ लाख ६८ हजार कित्ता सेयर ३९ हजार ६७३ पटक कारोबार भएका छन् । बुधबार उपकार लघुवित्त वित्तीय संस्थाको सेयर मूल्य सबैभन्दा धेरै ११.८७ प्रतिशतले बढ्यो । माथिल्लो मैलुङ खोला जलविद्युत र आत्मनिर्भर लघुवित्तको सेयर मूल्य पनि १० प्रतिशतभन्दा बढीले उकालो लाग्यो । यता एनएमबी इनर्जी बन्ड ४ प्रतिशत २०९३/९४ को मूल्य सबैभन्दा धेरै ५.८१ प्रतिशतले घटेको छ । कारोबार रकमका आधारमा सानिमा मिडिल तमोर हाइड्रोपावर शीर्ष स्थानमा रह्यो । कम्पनीको १४ करोड १७ लाख रुपैयाँ बराबरको कारोबार भयो । एनआरएन इन्फ्रास्ट्रक्चर एन्ड डेभलपमेन्टको १२ करोड ५० लाख रुपैयाँभन्दा बढी र सोलु हाइड्रोपावरको १२ करोड रुपैयाँभन्दा बढीको कारोबार भएको छ । १३ उपसमूहमध्ये ११ उपसमूह हरियो बनेका छन् भने दुई उपसमूह मात्रै घटेका छन् । जलविद्युत उपसमूह सबैभन्दा धेरै ०.९५ प्रतिशतले बढ्दा म्युचुअल फन्ड र निर्जीवन बीमा उपसमूह सामान्य अंकले घटेका छन् ।
विपत्तिको बीचमा मानवीयता: अस्पतालमा निःशुल्क चिया-कफी बाँड्दै युवाहरू
काठमाडौं । त्रिभुवन विश्वविद्यालय शिक्षण अस्पताल परिसर यतिबेला बाढीमा हराएका आफन्तको खोजी गर्ने, शव पहिचान गर्न आउने र घाइतेका परिवारजनको भीडले भरिएको छ । अस्पतालको भित्ताभरि टाँसिएका फोटो हेर्दै आफ्ना मान्छे खोज्नेहरूको अनुहारमा चिन्ता, आँखामा आशा र मनमा अनेकौं प्रश्न देखिन्छन् । यही पीडाबीच केही सहयोगी हात भने मानवीय सेवामा जुटिएका छन् । उनीहरूले अस्पताल परिसरमा बसेका पीडित र आफन्तलाई निःशुल्क पानी, चिया, कफी, पिउने सामग्री र बिस्कुट वितरण गरिरहेका छन् । आफन्तको खोजीमा थाकेर बसेका, आँखा रसाएका र घण्टौं अस्पताल परिसरमा कुरिरहेका मानिसका लागि एक गिलास पानी वा एक कप चिया नै ठूलो सहारा बनेको छ । अस्पताल परिसरमा देखिएको यो दृश्यले विपत्तिको बीचमा मानवीयताको सुन्दर उदाहरण प्रस्तुत गरेको छ । नख्खीपोटस्थित अनफोल्ड कफीका सहयोगी समूह पनि यही अभियानमा खटिएका छन् । उनीहरू आफ्नो दैनिक काम छाडेर बाढीपीडित र आफन्तको साथ दिन त्रिवि शिक्षण अस्पताल पुगेका हुन् । अनफोल्ड कफी समूहकी चाँदनी राईका अनुसार उनीहरू २० जनाको टोली बनाएर अस्पताल पुगेका छन् । बाढीमा आफन्त गुमाएकाहरूको पीडा महसुस गर्दै उनीहरूको साथमा उभिन आएको उनले बताइन् । ‘विपत्तिको समयमा सहयोग सधैं ठूलो हुनुपर्छ भन्ने छैन । कसैलाई पानी दिनु, भोकाएकालाई बिस्कुट दिनु, थाकेकोलाई एक कप चिया वा कफी दिनु र केही समय उसको कुरा सुनिदिनु पनि ठूलो मानवीय सहयोग हो,’ राईले भनिन् । उनले विपत्तिमा पीडितलाई हात मात्रै होइन, साथ र मन पनि दिनुपर्ने भन्दै समाजमा अझै असल हृदय भएका मानिसहरू रहेको सन्देश दिन आफूहरू अस्पताल आएको बताइन् । बाढीपछि आफन्तको खोजीमा अस्पताल पुगेका सयौं मानिसका बीच यस्ता सहयोगी हातले पीडितको दुःखमा केही राहत र आशा थपिरहेका छन् ।
जी मनि ट्रान्सको बाढीपीडितलाई २२ लाख ८० हजार सहयोग
काठमाडौं । कोरियास्थित रेमिट्यान्स कम्पनी जी मनि ट्रान्सले रसुवाको भोटेकोशी बाढीबाट प्रभावित नागरिकको खोजी, उद्धार, राहत तथा पुनर्स्थापनाका लागि १५ हजार अमेरिकी डलर (करिब २२ लाख ८० हजार रुपैयाँ) सहयोग गरेको छ । कम्पनीले प्रधानमन्त्री दैवी प्रकोप उद्धार कोषमा उक्त रकम जम्मा गर्दै बाढी प्रभावित नागरिक र समुदायको राहत तथा पुनर्स्थापनामा योगदान पुर्याउने उद्देश्यले सहयोग गरिएको जनाएको छ । जी मनि ट्रान्सले विपद्को कठिन घडीमा कोरियामा रहेका नेपालीले आफ्ना परिवारलाई सहज रूपमा आर्थिक सहयोग पठाउन सकून् भन्ने उद्देश्यले कोरियाबाट नेपाल पैसा पठाउँदा लाग्ने सेवा शुल्क पूर्ण रूपमा मिनाहा गरेको पनि जनाएको छ । कम्पनीले बाढीमा ज्यान गुमाएका नागरिकप्रति श्रद्धाञ्जली व्यक्त गर्दै शोकसन्तप्त परिवारजनप्रति गहिरो समवेदना प्रकट गरेको छ । साथै, उद्धार, राहत र पुनर्स्थापना कार्यमा खटिएका सुरक्षाकर्मी, स्वयंसेवक, स्थानीय समुदाय तथा सम्बन्धित निकायप्रति आभार व्यक्त गर्दै विपद्को समयमा प्रभावित नागरिकको साथमा रहने प्रतिबद्धता जनाएको छ ।
सेना परिचालन भयो, तर जनशक्ति परिचालन हुन सकेन : प्रचण्ड
काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले विपद् व्यवस्थापनमा सरकारको समन्वय र सक्रियता कमजोर देखिएको बताएका छन् । प्रतिनिधिसभाको बैठकमा बोल्दै प्रचण्डले बाढीपछि उद्धार तथा राहतका लागि सुरक्षा निकाय परिचालन भए पनि नागरिकस्तरमा आवश्यक जनशक्ति परिचालन गर्न सरकार चुकेको बताए । संघ, प्रदेश र स्थानीय सरकारबीच प्रभावकारी समन्वय हुन नसक्दा विपद्को सामना गर्न कठिन भएको उनको भनाइ छ । उनले विपद्को सुरुवाती अवस्थामा गृहमन्त्रीको सक्रियता देखेपछि सरकार प्रभावकारी रूपमा अघि बढ्ने अपेक्षा गरेको बताए । संकटको समयमा सरकारलाई सहयोग गर्ने विषयमा राजनीतिक दलहरूबीच कुनै मतभेद नरहेको पनि उनले स्पष्ट पारे । तर, त्यसपछि प्रधानमन्त्री र मन्त्रीहरूको सक्रियता अपेक्षाअनुसार प्रभावकारी हुन नसकेको प्रचण्डले टिप्पणी गरे । ‘सेनाले धेरै जोखिम उठाएर उद्धार र राहतमा खेलेको भूमिका देखियो,’ उनले भने, ‘तर महाविपत्तिको सामना गर्न तीनै तहका सरकारबीच आवश्यक समन्वय हुन सकेन ।’ प्रचण्डले विपद्को व्यवस्थापन सुरक्षा निकायको प्रयासबाट मात्रै सम्भव नहुने बताए। उनका अनुसार राज्यका संयन्त्रसँगै स्थानीय समुदाय, राजनीतिक दल, नागरिक समाज र स्वयंसेवकलाई योजनाबद्ध रूपमा परिचालन गर्न आवश्यक छ । ‘सेना परिचालन भयो, जनपरिचालन भएन । जनपरिचालन नहुँदासम्म यो समस्याको वास्तविक समाधान गर्न असम्भवजस्तै हुन्छ,’ उनले भने । सरकारको उद्धार कार्य प्रभावकारी हुन नसकेको भन्दै जनस्तरबाट गुनासो आइरहेको उल्लेख गर्दै प्रचण्डले तत्काल उद्धार, राहत र पुनःस्थापनालाई तीव्र बनाउन सरकारको नेतृत्वदायी भूमिका आवश्यक रहेको बताए ।
सरकारलाई साथ दिन्छौँ, तर गलत काममा मौन बस्दैनौँ : भीष्मराज आङदेम्बे
काठमाडौं । नेपाली कांग्रेसका संसदीय दलका नेता भीष्मराज आङदेम्बेले विपद्का बेला सरकारलाई साथ दिनु भनेको सरकारका हरेक कामको समर्थन गर्नु नभएको बताएका छन् । उनले सरकारले राम्रो काम गर्दा साथ दिने, तर कमजोरी र गलत काममा खबरदारी गर्नु प्रतिपक्षको दायित्व भएको स्पष्ट पारे । प्रतिनिधिसभाको बैठकमा बोल्दै आङदेम्बेले विनाशकारी बाढी आएको एक साता बितिसक्दा पनि खोज तथा उद्धार प्रभावकारी हुन नसकेको भन्दै सरकारको कार्यशैलीमाथि प्रश्न उठाए । ‘सरकारलाई साथ दिन्छौँ’ भन्नुको अर्थ सरकारका गलत कामलाई पनि समर्थन गर्नु नभएको उल्लेख गर्दै उनले भने, ‘बाटो बिराउँछ भने खबरदारी र प्रश्न पनि छ । खास सहयोग यही होइन ररु प्रलयकारी बाढी आएको एक साता बितिसक्यो । सबै ठीकठाक भइरहेको छ, जब ठीकठाक हुँदैन, हामीले मौनता साध्यौँ, खबरदारी गरेनौँ भने कर्तव्यबाट विमुख भएको ठहर्छ। त्यसैले यो पूर्वाग्रह होइन, प्रश्न हो ।’ आङदेम्बेले सरकारलाई कमजोर बनाउन नभई अझ प्रभावकारी बनाउन आफूहरूले प्रश्न गरिरहेको बताए । विपद्को समयमा राजनीतिक प्रचारभन्दा नागरिकको जीवन रक्षा सरकारको पहिलो प्राथमिकता हुनुपर्ने उनको भनाइ थियो । ‘सरकार र सत्तासीन साथीहरूलाई विनम्रतापूर्वक आग्रह गर्न चाहन्छु, यो प्रचार गर्ने समय होइन, प्राण बचाउने समय हो,’ उनले भने, ‘नागरिकको जीवनसँग जोडिएको प्रश्नलाई गालीको विषय होइन, आफैँभित्र समीक्षाको विषय बनाउनुहोस् ।’ उनले विपद्पछिको सबैभन्दा गम्भीर कमजोरी खोज तथा उद्धारमै देखिएको बताए । विशेषगरी सुरुङभित्र फसेका नागरिकको खोजी तथा उद्धारमा भएको ढिलाइप्रति उनले आपत्ति जनाए । सरकारका मन्त्री तथा जिम्मेवार अधिकारीहरू उद्धारको मैदानमा प्रभावकारी रूपमा खटिनुको साटो सामाजिक सञ्जालमा बढी सक्रिय देखिएको आरोप पनि उनले लगाए । ‘मलाई एउटा प्रश्नले घोचिरहेको छ । यदि मन्त्रिपरिषद्का सदस्यकै परिवार वा आफन्त विपद्मा परेका भए, मन्त्रीज्यूले प्राविधिक, विज्ञ र साधन खोजेर उद्धारमा जुट्नुहुन्थ्यो कि माटो खोस्रेको फोटो–भिडियो खिचेर “वाह मन्त्रीजी” भन्दै पोस्ट गरिरहनुहुन्थ्यो ?’ उनले प्रश्न गरे । आङदेम्बेले विपद्को समयमा सरकारको ध्यान प्रचारमा नभई खोज, उद्धार, राहत र नागरिकको जीवन रक्षामा केन्द्रित हुनुपर्ने बताए । उनले फिल्डमा देखिएका कमजोरी तत्काल सच्याएर सरकारलाई थप प्रभावकारी ढंगले परिचालन गर्न आग्रह गरे ।
व्यवसाय विस्तार र कर्जाको गुणस्तर सुधारमा सिटिजन्स बैंकको जोड
काठमाडौं । सिटिजन्स बैंक इन्टरनेसनल लिमिटेडले कोशी प्रदेशमा व्यवसाय विस्तार र कर्जाको गुणस्तर सुधारलाई केन्द्रमा राख्दै विशेष सेमिनार आयोजना गरेको छ । 'एक्सेलेरेटिङ कमर्सियल मोमेन्टमः बिजनेस एक्सपान्सन एन्ड एसेट क्वालिटी इन्हान्समेन्ट इन कोशी प्रदेश' शीर्षकमा आयोजित कार्यक्रममा कोशी प्रदेशका प्रदेश प्रमुख, शाखा प्रबन्धक तथा बैंकका अन्य कर्मचारी सहभागी भएका थिए । सेमिनारमा बैंकका प्रमुख कार्यकारी अधिकृत गणेशराज पोखरेल, नायब प्रमुख कार्यकारी अधिकृत, सहायक प्रमुख कार्यकारी अधिकृत तथा अन्य वरिष्ठ अधिकारीहरूको उपस्थिति रहेको थियो । कार्यक्रममा गत आर्थिक वर्षको कार्यप्रगतिको समीक्षा, चालु आर्थिक वर्षको बजेट, रणनीतिक कार्ययोजना र प्राथमिकताबारे छलफल गरिएको बैंकले जनाएको छ । केन्द्र र प्रदेशबीच समन्वय र सहकार्यलाई अझ प्रभावकारी बनाउने विषयमा पनि अन्तरक्रिया भएको थियो । सिटिजन्स बैंकका कोशी प्रदेशका १० जिल्लामा २८ वटा शाखा सञ्चालनमा छन् । यसअघि बैंकले बागमती प्रदेशमा पनि यस्तै प्रकृतिको रणनीतिक सेमिनार आयोजना गरेको थियो । अब अन्य प्रदेशमा पनि यस्ता कार्यक्रम सञ्चालन गरिने बैंकले जनाएको छ । बैंकका अनुसार आर्थिक वर्ष २०८२/८३ मा कर्जा प्रवाह १.२४ प्रतिशत बढेर १ खर्ब ७७ अर्ब ३३ करोड रुपैयाँ पुगेको छ । निक्षेप संकलन ९.२२ प्रतिशत बढेर २ खर्ब ३३ अर्ब ८१ करोड रुपैयाँ पुगेको छ । त्यस्तै, बैंकको खुद नाफा ६३.०५ प्रतिशतले बढेर २ अर्ब ९ करोड ८६ लाख रुपैयाँ पुगेको छ । बैंकले हालै जेन–जी बचत खाता, फ्रिलान्सर बचत खाता, डिजी बैंक सेवा र मोबाइल बैंकिङमार्फत शेयर आवेदन तथा सीआरएन नम्बर सेवा पनि सञ्चालनमा ल्याएको जनाएको छ । हाल सिटिजन्स बैंकका देशभर ६१ जिल्लामा २०० शाखा, १६९ एटीएम, ३ विस्तारित काउन्टर र ४२ शाखारहित बैंकिङ इकाइ सञ्चालनमा छन् । बैंकले २० लाख ६२ हजारभन्दा बढी ग्राहकलाई बैंकिङ सेवा प्रदान गर्दै आएको छ ।
चन्द्र ढकालको आइएमई मोटर्सको आम्दानी साढे ३ अर्ब, नयाँ गाडी दर्ता रोक्दा व्यवसायमा दबाब
काठमाडौं । आइएमई ग्रुपअन्तर्गत सञ्चालित आइएमई मोटर्स प्रालिले गत आर्थिक वर्ष २०८२/८३ मा ३ अर्ब ५० करोड ४० लाख रुपैयाँ सञ्चालन आम्दानी गरेको छ । यो अघिल्लो आर्थिक वर्षको तुलनामा ७.३२ प्रतिशत अर्थात् २३ करोड ९० लाख रुपैयाँ बढी हो । आर्थिक वर्ष २०८१/८२ मा कम्पनीले ३ अर्ब २६ करोड ५० लाख रुपैयाँ सञ्चालन आम्दानी गरेको थियो । कम्पनीको सञ्चालन आम्दानी पछिल्ला वर्षमा उतारचढावपूर्ण देखिए पनि पछिल्लो दुई आर्थिक वर्षमा भने वृद्धि भएको छ । आर्थिक वर्ष २०८०/८१ मा २ अर्ब ३४ करोड ७० लाख, आव २०७९/८० मा १ अर्ब ७५ करोड १० लाख, आव २०७८/७९ मा ३ अर्ब १४ करोड, आव २०७७/७८ मा २ अर्ब ६३ करोड १० लाख, आव २०७६/७७ मा १ अर्ब ८३ करोड २० लाख र आव २०७५/७६ मा २ अर्ब ९५ करोड ४० लाख रुपैयाँ सञ्चालन आम्दानी गरेको थियो । आइएमई मोटर्स नेपालमा हिन्दुजा ग्रुपअन्तर्गतको व्यावसायिक सवारीसाधन निर्माता कम्पनी अशोक लेल्यान्ड लिमिटेडको आधिकारिक एकमात्र वितरक हो । सन् २०१० मा स्थापना भएको कम्पनीले अशोक लेल्यान्डका बस, हलुका तथा मध्यमस्तरीय व्यावसायिक सवारीसाधन, ट्रक र टिपरलगायतका सवारीसाधन बिक्री तथा वितरण गर्दै आएको छ । कम्पनी सुरुमा एलटी इन्टरप्राइजेज प्राइभेट लिमिटेडका रूपमा स्थापना भएको थियो । त्यतिबेला कम्पनीले डिजिटल टेलिभिजन सेवा प्रदायक डिसहोमको विक्रेता कारोबार गर्दै आएको थियो । सन् २०१५ देखि अशोक लेल्यान्डको आधिकारिक विक्रेताका रूपमा कारोबार सुरु गरेको कम्पनीको नाम सन् २०१७ मा परिवर्तन गरी आइएमई मोटर्स प्रालि राखिएको हो । आइएमई मोटर्सको प्रवर्द्धन मुख्य रूपमा आइएमई ग्रुपसँग आबद्ध व्यक्तिहरूले गरेका छन् । नेपालका वित्तीय क्षेत्रलगायत विभिन्न क्षेत्रमा दुई दशकभन्दा लामो समयदेखि स्थापित आइएमई ग्रुपको व्यावसायिक पृष्ठभूमिले कम्पनीलाई वित्तीय तथा सञ्चालनगत रूपमा सहयोग पुर्याउँदै आएको छ । चन्द्रप्रसाद ढकाल आइएमई ग्ररुपका अध्यक्ष हुन् भने निशान ढकाल आइएमई मोटर्सका कार्यकारी अध्यक्ष हुन् । सरकारले सन् २०२६ मेमा जारी गरेको परिपत्रमार्फत नयाँ व्यावसायिक सवारीसाधन दर्तामा अनिश्चितकालीन रोक लगाएपछि भने कम्पनीको आगामी व्यवसायमा दबाब पर्न सक्ने जोखिम देखिएको छ । व्यावसायिक सवारीसाधनमा केन्द्रित कम्पनी भएकाले दर्तामा लगाइएको रोक लामो समयसम्म कायम रहेमा यसको प्रत्यक्ष असर बिक्री, आम्दानी तथा समग्र व्यावसायिक प्रदर्शनमा पर्न सक्ने देखिएको हो । यद्यपि, रोक लाग्नुअघि आयात गरिएका सवारीसाधनको मौज्दात तथा खोलिएका प्रतीतपत्रले निकट अवधिको कारोबारलाई केही हदसम्म सहयोग गर्ने अपेक्षा गरिएको छ । तर, सन् २०२६ अक्टोबरको अन्त्यतिर प्रमुख चाडपर्वपछि सुरु हुने व्यावसायिक सवारीसाधनको उच्च मागको समयमा समेत दर्तामा रोक कायम रहेमा कम्पनीको व्यवसायमा थप दबाब पर्न सक्ने जनाएको छ । त्यस्तै, भारत स्टेज छ उत्सर्जन मापदण्डको अनिवार्य कार्यान्वयनले प्रतिइकाइ बिक्रीबाट प्राप्त हुने रकम बढाउने भएकाले कम्पनीको कारोबार विस्तारमा सहयोग पुग्ने अपेक्षा गरिएको छ । तर, व्यावसायिक सवारीसाधनको कारोबार विस्तारसँगै कम्पनीलाई थप चालु पुँजी आवश्यक पर्ने भएकाले वित्तीय व्यवस्थापनमा चुनौती थपिन सक्ने देखिन्छ । नेपालमा अशोक लेल्यान्डका व्यावसायिक सवारीसाधनको एकमात्र राष्ट्रिय विक्रेताका रूपमा करिब ११ वर्षको अनुभव भए पनि कम्पनीले बजारमा तीव्र प्रतिस्पर्धाको सामना गरिरहेको छ । टाटा मोटर्स, भारतबेन्ज र आइचरजस्ता स्थापित ब्रान्डका आधिकारिक विक्रेताबाट हुने प्रतिस्पर्धा कम्पनीको व्यवसायका प्रमुख चुनौतीमध्ये रहेका जनाएको छ । साथै, कम्पनीले पाएको विक्रेता अधिकार नवीकरण नहुने जोखिम पनि कायम छ । व्यावसायिक सवारीसाधनको माग स्वभावतः चक्रीय हुने भएकाले पछिल्लो समय आम्दानी तथा नाफामा देखिएको सुधार दीर्घकालसम्म कायम रहने विषयमा समेत जोखिम रहेको छ । बजारमा माग बढ्दा कारोबार र नाफा बढ्ने तथा माग घट्दा त्यसमा गिरावट आउने भएकाले कम्पनीको व्यावसायिक प्रदर्शनमा उतारचढावको सम्भावना रहन्छ । विद्युतीय व्यावसायिक सवारीसाधनको बढ्दो प्रयोग पनि कम्पनीका लागि अर्को चुनौतीका रूपमा देखिएको छ । कम्पनीको विद्युतीय व्यावसायिक सवारीसाधन क्षेत्रमा हालसम्म उल्लेख्य उपस्थिति नरहेकाले आगामी दिनमा विद्युतीय सवारीसाधनको बजार विस्तार हुँदा त्यसको असर कम्पनीको व्यवसायमा पर्न सक्ने देखिन्छ । कम्पनीको तरलता अवस्था पनि दबाबमा रहेको छ । लामो समयसम्म ग्राहकबाट रकम उठाउनुपर्ने अवस्थाका कारण चालु पुँजीमा कम्पनीको निर्भरता उच्च छ । आर्थिक वर्ष २०८२/८३ को मध्य जुलाईसम्म कम्पनीको चालु पुँजीको आवश्यकता सञ्चालन आम्दानीको करिब ७१ प्रतिशत रहेको थियो । उच्च चालु पुँजी आवश्यकताका कारण कम्पनी अल्पकालीन बाह्य वित्तीय स्रोतमा समेत निर्भर रहेको छ । आइएमई मोटर्सले विभिन्न बैंक तथा वित्तीय संस्थाबाट कुल २ अर्ब ४२ करोड ४० लाख रुपैयाँ ऋण लिएको छ । त्यसमध्ये १ अर्ब ३० करोड ९० लाख रुपैयाँ दीर्घकालीन र १ अर्ब ११ करोड ५० लाख रुपैयाँ अल्पकालीन ऋण रहेको छ ।
एभरेष्ट बैंकको बाढीपीडितलाई ३ करोड ११ लाखभन्दा बढी सहयोग
काठमाडौं । एभरेष्ट बैंक लिमिटेडले भोटेकोशी नदीमा आएको बाढीबाट प्रभावित नागरिकको उद्धार, राहत तथा पुनःस्थापनाका लागि ३ करोड ११ लाख रुपैयाँभन्दा बढी सहयोग गरेको छ । बैंकले संस्थागत सामाजिक उत्तरदायित्वअन्तर्गत २ करोड ५१ लाख रुपैयाँ प्रधानमन्त्री दैवी प्रकोप उद्धार कोषमा जम्मा गरेको छ । यस्तै, बैंकका कर्मचारीले ६० लाख ५४ हजार ६०५ रुपैयाँ ३८ पैसा सहयोग गरेका छन् । कर्मचारीको सहयोग रकमसमेत जोड्दा बैंकले सरकारको उद्धार कोषमा कुल ३ करोड ११ लाख ५४ हजार ६०५ रुपैयाँ ३८ पैसा जम्मा गरेको जनाएको छ । नगद सहयोगसँगै बैंकका कर्मचारीले आवश्यक राहत सामग्रीसमेत संकलन गरेका छन् । संकलित राहत सामग्री विपद् प्रभावित क्षेत्रमा पठाउन सम्बन्धित निकायलाई प्रत्यक्ष हस्तान्तरण गरिएको बैंकले जनाएको छ । बैंकले बाढीबाट प्रभावित नागरिकको उद्धार, राहत र पुनःस्थापनामा सहयोग पुर्याउने उद्देश्यले उक्त सहयोग गरेको जनाएको छ ।
