‘भोईस अफ नेपाल’को मुख्य प्रयोजकमा टिभिएस्, ३० वटा एपिसोडकाे लाईभ हुने
काठमाडौं । अन्तराष्ट्रिय टेलीभिजन गायन कार्यक्रम ‘भोईस अफ नेपाल’ को मुख्य प्रायोजकमा टिभिएस अपाचे आरटि रहेको छ । टिभियस मोटर कम्पनीका सबै मोटरसाइकल र स्कूटरहरुको नेपालको लागि आधिकारीक बिक्रेता जगदम्बा मोटरस प्रालिले हालै उक्त कार्यक्रमको मुख्य प्रायोजक बन्ने साझेदारी गरेको हो । मोटरसाईकलको सबैभन्दा ठूलो रेन्ज भएको टिभिएसले आफ्नो उत्कृष्ट मोटरसाइकल रेन्ज अपाचे आरटिआरलाई यस कार्यक्रमसँग आबद्ध गरेको हो । अपाचे आरटिआरको पावर, प्रतिभा र आत्मबिश्वास जस्ता गुणहरू यस् कार्यक्रमका प्रतियोगिहरुमा पनि हुने कम्पनीले जनाएको छ । द भोईस अफहोल्ल्यान्ड, नेदरल्यान्डस्मा मूल सिर्जना र प्रसारण भएको थियो । नेपालमा पहिलो पटक यो कार्यक्रम ‘भोईस अफ नेपाल’नाम गरेर प्रसारण हुनेछ । यस कार्यक्रमले अज्ञात युवा नेपालीप्रतिभा (अकल, युगल, पेशावर र शौकिया) लाई चिनाउने र सम्मानित गर्ने लक्ष्य राखेको छ । प्रतियोगीहरुले जुन गायन शैली आफुलाई सबैभन्दा राम्रो गाउँनऔँछ त्यही शैलीमा गाउँन पाउँछन् । यो कार्यक्रम साउन २०७५ को पहिलो हप्तादेखि चार महिनासम्म लगातार चल्ने छ । पहिलो सिजनमा कुल ३० एपिसोडहरु लाईभ टेलिभिजनमा प्रसारण हुने छन् । जसमा चार राउण्डहरु ब्लाइन्ड अडिसनस्, ब्याटल राउण्डस्, नकआउटस् एण्ड ग्राण्ड फिनाले हुनेछन् । यस कार्यक्रमका अधिकारिक प्रसारण च्यानलहरु कान्तिपुर एचडी र डिशहोम रमाइलो टि.भी एचडी हुन् ।
दुई अर्बको लागतमा गोसाईंकुण्डमा केबलकार बन्दै, चीनले सरकारले लगानी गर्ने
रसुवा । धुञ्चे गोसार्इंकुण्ड केबलकार निर्माणका लागि सम्भाव्यता अध्ययन गराउने प्रदेश सरकारकोे निर्णयबाट रसुवावासी उत्साहित भएका छन् । केबलकार निर्माणका लागि दुई अर्ब रूपैयाँ लागत लाग्ने अनुमान गरिएको छ । रसुवाका-५ वटै गाउँपालिका र केही निजी क्षेत्रको समेत लगानीमा केबलकार निर्माण गर्ने तय भइसकेको र त्यसमा चिनियाँ लगानीकर्ताले पनि लगानी गर्ने प्रतिवद्धता जनाएको स्थानीय अध्ययन तामाङले बताए । गोसार्इंकुण्डमा केबलकार निर्माण गर्ने अवधारण २०६० सालदेखि नै ल्याइए पनि विद्युत्को अभावमा कार्यान्वयनमा आउन सकेको थिएन। चिलिमे जलविद्युत् कम्पनीले रसुवामा पहिलो पटक २२ मेघावाट विद्युत् उत्पादन गरेसँगै गोसार्इंकुण्डमा केबलकार निर्माण गर्ने आवधारणाले मूर्तरुप लिन सक्ने भएको छ । जिन्दगीमा एक पटक पुग्नै पर्ने तीर्थ गोसाईंकुण्डको यात्रा सहज बनाउन प्रदेश नं.३ का सरकारले गरेको निर्णयले अब धुञ्चे-गोसाईंकुण्ड केबलकार निर्माणमा सहज भएको नागरिक समाजले जनाएको छ । केबलकारको निर्माणले प्राकृतिक छटाको अवलोकन गर्दै गोसाईंकुण्ड सरर जान सहज हुनेछ । धुञ्चे गोसार्इंकुण्ड केबलकार निर्माणका लागि प्रारम्भिक प्रतिवेदन तयार भइसकेको, केबलकारको दुरी धुञ्चेबाट गोसार्इंकुण्ड आठ किलोमिटर रहेको, भगवानशंकर गोसाईंबाबाले निलाद्रिपर्वत जाँदा प्रयोग गर्नुभएको मार्गलाई नै अनुशरण गरिएको तथा गोसार्इंकुण्ड गाउँपालिकाकै वडा नं ५ र ६ अन्तर्गत धार्मिक मार्गमा पाँच वर्षभित्र केबलकार निर्माण गरीसक्ने लक्ष्य लिइएको छ । स्याफ्रु-मैलुङ सडक निर्माण भइसकेको र धुञ्चे जोड्ने करीब पाँच किमि सडकको निर्माण प्रक्रिया पनि अगाडि बढिसकेकाले अब बेत्रावतीबाट मोटरद्वारा एक घण्टामा धुञ्चे पुग्ने वातावरण सृजना भएको गोसाईंकुण्ड गाउँपालिकाले जनाएको छ । भगवान शंकर हिँडेको मार्गलाई पहिल्याइ शास्त्रीय विधिअनुरुप धुञ्चे गोसाईंकुण्ड केबलकार निर्माण गर्ने प्रस्तावले सम्पूर्ण लामा गुरुहरुमा उत्साह बढाएको बताउँदै पुरोहित टंकप्रसाद ढकालले भने, “स्थानीय सरकारले लिएको नयाँ नीतिबाट अब लाखौँलाख भक्तजनलाई तीर्थ पुग्न सहज हुनेछ ।” गोसाईकुण्डमा स्नान एवं पूजा गर्नाले आफूले मागेका सबै वर भगवानले दिने, शरीरमा रोग लाग्न नदिने, लागेका रोग हट्ने, घर परिवारमा सुख शान्ति मिल्ने र कामका लागि गएका सबै परिवारको लक्ष्य पूरा भई धन धान्य हुने विश्वास रहिआएकाले जो कोही मानिसले पनि जिन्दगीमा एक पटक भए पनि यो कुण्डमा पुग्नैपर्ने मान्यता रहिआएको पुरोहित ढकालले बताए । धुञ्चे गोसार्इंकुण्ड केबलकारको अवधारणा २०६० सालबाट तत्कालीन समयमा राससले समाचार उत्पादन गरी गोरखा, पत्र र रेडियो नेपालले प्रकाशन प्रशारण गरेको र जनहितकारी कार्यमा यी संस्थाले पुु¥याएको योगदान अविस्मरणीय रहेको रसुवाका नागरिक समाजका अध्यक्ष बाबुलाल तामाङले स्मरण गरेका छन् । धुञ्चे गोसार्इंकुण्ड केबलकार निर्माणले अब भक्तजन मात्रै होइन, पर्यटकसमेत बृद्धि हुने बताउँदै रसुवा-नुवाकोट पर्यटन समाजका अध्यक्ष बलराम (दुर्गानाथ) न्यौपानेले गोसार्इंकुण्डमा पर्यटकको अभिवृद्धि गर्न आफ्नो संस्था निरन्तर अगाडि बढ्ने बताएका छन् । प्रदेश नं. ३ का सरकारले स्याफ्रुवेँशी, लाङटाङ क्याङजेन पर्यटकीय क्षेत्रलाई डा. प्रल्हाद योञ्जन रेडपाण्डा पदमार्ग नामाकरण गरेकोमा लाङटाङवासीले त्यसको पनि स्वागत गरेका छन् । लाङटाङ पुनः निर्माण व्यवस्थापन समितिका अध्यक्ष तेम्बा लामाले अवका दिनमा लाङटाङ क्षेत्रमा पर्यटकको संख्या वृद्धि हुनेमा लाङटाङवासी आशावादी रहेको बताएका छन् । डा योञ्जनका अनुसार, रसुवाको हिमाली क्षेत्रमा रेडपाण्डा भएको पुष्टी १९८७ मा नै भएको थियो । उनको अध्ययनबाट चन्दनबारी तथा लाङटाङ पदमार्गको ठूलो स्याफ्रुको माङ्चे जंगललगायत क्षेत्रमा विश्वमा दुर्लभ मानिएको रेडपाण्डा पाएको पुष्टि गरेपछि संरक्षणका लागि सहभागितामूलक तवरले सबै क्षेत्र अगाडि बढीरहेको लाङटाङ राष्ट्रिय निकुञ्जले जनाएको छ । धुञ्चे गोसार्इंकुण्ड केबलकार निर्माणको काममा लगानीकर्तालाई पूर्णरुपमा सहयोग र समर्थन मिल्ने तथा छिटोभन्दा छिटो निर्माणका लागि आफूले समन्वयकारी भूमिका निर्वाह गरिरहेको जिल्ला समन्वय समितिका प्रमुख कुलप्रसाद भट्टले बताए । रासस
राष्ट्र बैंक नयाँ मौद्रीक नीति तयारीमा जुट्यो, माग्यो सुझाव
काठमाडौं । नेपाल राष्ट्र बैंकले आगामी आर्थिक वर्षको मौद्रीक नीति तयारीका लागि जुटेको छ । मौद्रीक नीति तयारीका लागि केन्द्रीय बैंकले सुझाव मागेको छ । मौद्रिक नीतिमा समावेश गर्न आफ्ना रायसुझावहरु अनुसन्धान विभागमा पठाउन राष्ट्र बैंकले अनुरोध गरेको छ । सरकारले बजेट सार्वजनिक गरिसकेकाले सोही बजेटको धरातलमा टेकेर केन्द्रीय बैंकले मौद्रीक नीति ल्याउने गरेको छ ।
प्रभु बैंकको थप दुई शाखा ईलाम र धनुषामा
काठमाडौं । प्रभु बैंकले थप दुई नयाँ शाखा सञ्चालनमा ल्याएको छ । बैंकले ईलाम जिल्लाको सन्दकपुर र धनुषा जिल्लाको मुखियापट्टी मुसहरमिया शाखा कार्यालय विस्तार गरी सञ्चालनमा ल्याएको हो । बैंकले संघीय संरचना बमोजिम गठित विभिन्न स्थानीय तहमा रहेका सेवाग्राहीहरुलाई सरल र सहज रुपमा बैंकिङ्ग सेवा पुर्याउने उद्देश्यले उक्त स्थानमा नयाँ शाखा खोलेको हो । सन्दकपुर शाखाको उद्घाटन सोही गाउँपालिकाका अध्यक्ष उदयबहादुर राईले गरेका हुन् । त्यस्तै, मुखियापट्टी मुसहरिमिया शाखा कार्यालयको उद्घाट मुखियापट्टी मुसहरमिया गाउँपालिकाका अध्यक्ष मनोज यादवले गरेका हुन् । यी दुई शाखा कार्यालयबाट त्यहाँका स्थानीय तहका सेवाग्राही, सर्वसाधारणहरु, कम्पनी तथा संघ संस्थाहरुले बैंकको सेवा उपभोग गरी लाभान्वित हुने बैंकले बताएको छ । त्यस्तै, दुवै गाउँपालिकको समग्र आर्थिक विकासमा टेवा पुग्ने बैंकको विश्वास छ ।
लाभकर व्यवस्था फिर्ता भएपछि लगानीकर्ता उत्साहित, नेप्से दोहोरो अंकले बढ्यो
काठमाडौं । सरकारले लाभकरकाे नयाँ व्यवस्था फिर्ता गरेपछि सेयर बजारका लगानीकर्ता उत्साहित भएका छन् । जसकारण बुधबारको सेयर बजार दोहोरो अंकले बढेको छ । लगातार दुई दिन पछि खुलेको बजारमा नेप्से परिसूचक १३.९१ अंकले उकालो लागेर १२८२ अंकमा पुगेको छ । दिनभर करिब २ घण्टा खुलेको बजारमा १३८ कम्पनीको २३ करोड ८९ लाख रुपैयाँ बराबरको सेयर किनबेच भएको छ । सबैभन्दा बढी नेपाल इन्भेष्टमेन्ट बैंकको ३ करोड ९२ लाख रुपैयाँ बराबरको सेयर कारोबार भएको छ । अर्थ मन्त्रालयका अधिकारी र लगानीकर्ताबीच बुधबार भएको वार्तामा तत्काल लाभकर नलगाउने सहमति भएको हो । उक्त सहमतिपछि लगत्तै खुलेको बजारमा एकाएक हरियाली छाएको थियो । करिब आधा घण्टामै २३ अंकले उकालो लागेर १२९५ अंकमा पुगेको बजार त्यसपछि घटेर बजार बन्द हुँदा १२८२ अंकमा पुगेको छ । बजारमा अन्य समूह बाहेक कारोबारमा आएका सबै समूह हरिया भएका छन् । ९ समूहमध्ये सबैभन्दा बढी बीमा समूह १४४ अंकले उकालो लागेको छ । सरकारले आइतबारदेखि बोनस र हकप्रद सेयरको आधार मूल्यमा कर लगाउने भएपछि लगानीकर्ता आन्दोलनमा उत्रिएका थिए । उनीहरुले सोमबार र मंगलबारको सेयर कारोबार ठप्प पारेका थिए ।
जनता बैंक र आईमार्कबीच पीओएस् सम्झौता, बिना नगद भुक्तानी गर्न सकिने
काठमाडौं । जनता बैंक नेपाल र आईमार्क प्रालिबीच पीओएस् सेवा सम्बन्धी सम्झौता भएको छ । उक्त सम्झौतामा बैंकका ट्रान्जाक्सन बैंकिङ्ग विभाग प्रमुख निरज शर्मा र आईमार्कका प्रबन्ध निर्देशक रामप्रसाद ढुगांनाले हस्ताक्षर गरेका छन् । उक्त सेवा सञ्चालन पश्चात बैंकका स्वदेश तथा विदेशका ग्राहकहरुले आफ्ना डेविट तथा क्रेडिटकार्ड मार्फत नगद रहित भुक्तानी कारोवार गर्न सक्नेछन् । बैंकले भिसा ईन्टरनेशनलसँग आवद्घभई देशभरी रहेका आफ्ना शाखा सञ्जालमार्फत विभिन्न व्यापारिक संघसंस्था, अस्पताल आदिबाट पीओएस् सेवा सञ्चालनमा ल्याएको हो ।
लिटल प्यारागनको विजेता रुस्वा गुरुङ
काठमाडौं । लिटल प्यारागन नेपाल २०१८ को विजेता आइडियल मोडल स्कूलकी रुस्वा गुरुङ प्रथम विजेता बनेकी छिन् । हालै सम्पन्न भएको लिटल प्यारागन नेपाल २०१८ कक्षा ३ मा अध्ययनरत ८ बर्षिय स्कूल आइडियल मोडल स्कुलकी गुरुङ प्रथम बिजेता बनेकी हुन् । साथै, प्रथम रनरअप कक्षा ४ मा अध्ययनरत जेम्स स्कुलकी सोफिया शाह भइन्, दोश्रो रनरअप कक्षा ४ मा अध्ययनरत काठमाण्डौं प्रज्ञा कुन्जकी रितु मानान्धर भइन् भने, तेश्रो रनरअप काभ्य इङ्गलीसमा अध्ययनरत अरिस भुर्तेल भएका छन् । साथै कार्यक्रममा उत्कृष्ट नाच मेरिसा राईले प्रस्तुत गरिन भने उत्कृष्ट चित्रकला बर्शना श्रेष्ठले प्रस्तुत गरिन् । यस बाहेक अरु थुप्रै विधामा बिजेता घोषणा गरिएको आयोजक परेली मिडियाका तर्फबाट मिसेस नेपाल आइकन २०१७ की बिजेता बर्षा कार्की तथा बिनम थापाले जानकारी दिइन् ।
सूर्या लाइफ इन्स्योरेन्सले १२ प्रतिशत बोनस सेयर दिने, हकप्रद किन्नेले पनि पाउने
काठमाडौं । सूर्या लाइफ इन्स्योरेन्स कम्पनीले सेयरधनीलाई १२ प्रतिशत बोनस सेयर दिने भएको छ । साथै, कम्पनीले कर प्रयोजनको लागि ६३ लाख ८२ हजार ८९५ रुपैयाँ बराबर नगद लाभांश दिने प्रस्ताव गरेको छ । उक्त प्रस्ताव हालै बसेको कम्पनी सञ्चालक समितिको बैठकले चुक्ता पुँजीको सो मात्राको बोनस वितरण गर्ने प्रस्ताव गरेको हो । समितिको प्रस्तावलाई बीमा समितिले स्वीकृत तथा कम्पनीको साधारणसभाले पारित गर्नु पर्ने छ । हाल कम्पनीले ४० प्रतिशत हकप्रद सेयर जारी गरिरहेको छ । सो मात्राको हकप्रद किन्ने आवेदकहरुले पनि १२ प्रतिशत बोनस पाउने कम्पनीले जनाएको छ । कम्पनीको गत वर्षको साधारणसभाले चुक्ता पुँजीको ४० प्रतिशत हकप्रद सेयर निष्कासन गर्ने निर्णय पारित गरेको थियो । कम्पनीको हालकाे चुक्ता पुँजी ७२ करोड १८ लाख रुपैयाँ रहेको छ । यसअघि कम्पनीले १६.८० प्रतिशत बोनस सेयर दिने प्रस्ताव गरेको थियो । तर हाल जारी गरिरहेको ४० प्रतिशत हकप्रद भर्नेले पनि बोनस पाउने भएपछि कम्पनीको बोनस सेयरको दर समायोजन भई घट्न पुगेको कम्पनीले जनाएको छ ।
