सुजुकीकाे दशै तथा तिहार छुट अफर, जापान घुम्ने अवसर
काठमाडौ। भीजी अटोमोबाइल्सबाट बिक्री बितरण हुदै आएको जापानिज कम्पनीबाट उत्पादित सुजुकीले बाइक तथा स्कूटरमा दशै तथा तिहारलाई लक्षित गरी छुट अफर ल्याएको छ। नेपाल भरको कुनैपनि सुजुकी शोरुमबाट बाइक तथा स्कूटर खरीदमा ८ हजार रुपैयाँ छुट र स्कुटर को खरीदमा १० हजार रुपैयाँ छुट दिने कम्पनीले जनाएको छ । बम्पर उपहारमा बाइक तथा स्कूटर खरीद गर्ने १० जना भाग्यशाली ग्राहकले लक्की ड्र मार्फ़त बिजयी भइ जापान जान पाउनेछन्। यो योजना भादौं २० गतेबाट कार्तिक ३० गतेसम्म लागू हुनेछ। देशभरीका कुनै पनि सुजुकी शोरुमबाट बाइक तथा स्कूटर सजिलोसंग खरीद गर्न सक्ने छन्। स्कीम अवधीभर सुजुकी बाइक र स्कूटर गरेर ४ हजार २०० बेच्ने लक्ष्य रहेको भीजीका बजार प्रवन्धक नबराज कोइरालाले जानकारी दिए् ।
बुढीगण्डकी फेरी प्रतिष्पर्धा बिनै चाईना गेजुवालाई
काठमाडौं । सरकारले १ हजार २०० मेगावाट क्षमताको बुढीगण्डकी जलासययुक्त आयोजना पुनः चिनियाँ कम्पनी दिने निर्णय गरेको छ । मन्त्रिपरिषद बैठकले आयोजना बनाउन पुनः चाइना गेजुवा ग्रुप लिमिटेडलाई दिने निर्णय गरेको उर्जामन्त्री बर्षमान पुनले बताए । उनले अाइतबार पत्रकार सम्मेलन गरेर यस्ताे जानकारी दिए । उनले आयोजना पुनः चिनियाँ कम्पनीलाई दिनुमा आफ्नो कुनै हात नरहेको समेत स्पष्ट पारेका छन् । यस अघि तत्कालिन पुष्पकमल दाहाल र उर्जामन्त्री जनार्दन शर्माले बुढीगण्डकी आयोजना चिनियाँ कम्पनीलाई दिने निर्णय गरेका थिए । तर शेरबहादुर देउवाले सो निर्णयलाई उल्टाएर नेपाल आफैंले बनाउने घोषणा गरिदिएका थिए । सरकारले प्रतिष्पर्धा बिनै चिनियाँ कम्पनी गेजुवालाई सुम्पिने निर्णय गरेको हो ।
एक हप्ताभित्रै शैक्षिक प्रमाणपत्र धितो राखेर यसरी लिनुस् ऋण
काठमाडौं । एक हप्तापछि शैक्षिक योग्यताको प्रमाणपत्र धितो राखेर ऋण पाइँदैछ । सरकारले एक हप्ताभित्रै बैंक तथा वित्तिय संस्थाहरुमा शैक्षिक योग्यताको प्रमणपत्र धितो राखेर ५ प्रतिशत ब्याज अनुदानमा ७ लाखसम्म ऋण दिन लागेको हो । सहुलियतपूर्ण कर्जाका लागि ब्याज अनुदानसम्बन्धी एकिकृत कार्यबिधी २०७५, लाई मन्त्रिपरिषद बैठकले भदौ २१ गते पारित गरेको थियो भने अर्थमन्त्रालयले असोज ६ गते सार्वजनिक गरेको थियो । नेपाल राष्ट्र बैंकले सहुलियतपूर्ण कर्जाका लागि ब्याज अनुदानसम्बन्धी एकिकृत कार्यबिधी कार्यान्वयनका लागि केहि दिनभित्रै परिपत्र जारी गर्दैछ । ‘सहुलियतपूर्ण ब्याज अनुदानको कर्जा प्रवाहका लागि ३।४ दिनभित्रै बैंक तथा वित्तिय संस्थाहरुलाई कर्जा प्रवाह गर्न परिपत्र जारी गर्दैछौं, परिपत्र जारी भएको भोलीपल्टैबाट ऋण लिने प्रक्रिया आरम्भ हुन्छ’, राष्ट्र बैंकका डेपुटी गभर्नर चिन्तामणी शिवाकोटीले विकासन्युजसँग भने । सरकारले राष्ट्र बैंकमा अनुदान शोध भर्ना खाता खोलेर एक अर्ब रुपैंयाँ जम्मा गर्नेछ । तयार छन् बैंकहरु नविल बैंकका प्रमुख कार्यकारी अधिकृत अनिल शाहले राष्ट्र बैंकबाट परिपत्र आउने वित्तिकै शैक्षिक प्रमाण पत्र धितो राखे ऋण दिने प्रक्रिया आरम्भ हुने बताए । ‘राष्ट्र बैंकको सर्कुलर आउने वित्तिकै हामी कार्यान्वयनका लागि तयार छौं, स्थानीय तहमा शाखा खोल्ने देखि केन्द्रिय बैंकका हरेक निर्देशन अक्षरस पालना गर्दै आएका छौं, प्रमाणपत्र धितोमा राख्ने लगायतका अन्य सहुलियतपूर्ण कर्जा प्रवाहमा गर्न नविल बैंक तयार छ’, नविल बैंकका प्रमुख कार्यकारी अधिकृत शाहले विकासन्युजसँग भने । उनले सहुलियतपूर्ण कर्जा सम्बन्धी सरकारको नीति कार्यान्वयनका बिषयमा नेपाल बैंकर्स संघ पनि छलफलमै रहेको जानकारी समेत दिए । सेञ्चुरी कमर्सियले बैंकका प्रमुख कार्यकारी अधिकृत तुल्सिराम गौतमले पनि नेपाल राष्ट्र बैंकको परिपत्र आउने वित्तिकै प्रक्रिया पुरा गरेर आउनेहरुलाई ऋण दिने बताए । ‘राष्ट्र बैंकको परिपत्र आएपछि सहुलियतपूर्र्ण कर्जा प्रवाह आरम्भ हुन्छ, प्रक्रिया पुरा गरेर आउनेहरुलाई प्रमाणपत्र धितोमा राखेर ऋण दिन हामी तयार छौं’, सेञ्चुरी कमर्सियल बैंकका प्रमुख कार्यकारी अधिकृत गौतमले भने । यस्तो छ प्रमणपत्र धितोमा राखेर ऋण पाउने प्रक्रिया शैक्षिक प्रमणपत्र धितोमा राखे ऋण पाउन कम्तिमा स्नातक तह उतिर्ण गरेको र ४० बर्ष उमेर ननाघेको हुनुपर्नेछ । शैक्षिक प्रमाणपत्रको सक्कली प्रति र घरेलु तथा साना उद्योग विभाग, समिति, शिप विकास तालिम केन्द्र, प्राबिधिक शिक्षा तथा व्यवसायीक तालिम परिषद लगायतका सरकारी निकायबाट कम्तिमा ७ दिनको शिप विकास तालिम अनिवार्य लिएको वा उक्त कर्जा स्वीकृत भएपछि त्यस्तो संस्थामा तालिम लिएको प्रमाण पेश गर्नु पर्छ । आवेदन दिएको २१ दिनभित्र ऋण दिने वा नदिने भन्ने निर्णय गरिसक्नुपर्नेछ । त्यससँगै कम्पनी दर्ता गरेर स्थायी लेखा नम्बर(प्यान)मा दर्ता हुनुपर्नेछ । ऋण नतिरे के हुन्छ ? ऋण नतिरे पासपोर्ट रोक्का, कर्जा सूचना केन्द्रको कालो सूचिमा राखिने, चल अचल सम्पति बेचबिखनमा रोक, बैंक खाता रोक्का, सामाजिक सुरक्षा भत्ता र अन्य सरकारी सुबिधा पनि कटौती गरिनेछ । यी हुन सहुलियत ब्याजदरमा पाइने अन्य कर्जाहरु महिलाहरुको उद्यमशिलता विकासका लागि शिप सिकाएर सामुहिक जमानीमा ६ प्रतिशत ब्याज अनुदान दिएर १५ लाख रूपैयाँसम्म ऋण दिने कार्यक्रम पनि कार्यान्वयनमा आउँदैछ । यस्तै दलितहरूको उत्थानका तथा सामुहिक उत्पादन प्रणालीमा सहभागीता गराउन ५ प्रतिशत ब्याज अनुदानमा सामुहिक जमानी मार्फत उपलब्ध गराउने भनिएको १० लाख रूपैयाँ ऋण लगायतका अन्य कार्यक्रम पनि कार्यान्वयनमा आउँदैछ ।
कपास विकास समितिको ८३५ बिघा जग्गा अतिक्रमण
बाँके । खजुरास्थित प्रशोधन केन्द्र रहेको कपास विकास समितिको ८२५ बिघा जग्गा अतिक्रमण गरिएको छ । कपास खेती गर्ने गरिएको सो जग्गा २०५८ सालदेखि अतिक्रमण गरिँदै आएको छ ।कपास विकास समितिका निमित्त प्रमुख विजयकुमार जोशीका अनुसार सो जग्गा र भौतिक संरचना फिर्ता नगरिँदा कपास खेती विस्तारमा समस्या भएको छ । “मुलुकमा शान्ति स्थापना भइसक्दा पनि समितिले उक्त जग्गा भोगचलन गर्न पाएको छैन,” उनले भने । सो जग्गामा मुक्त कमैया र अन्य परिवार बस्दै आएका छन् ।समितिलाई सरकारले उपलब्ध गराएको बर्दियाको कुम्भरस्थित ६०० हेक्टर जग्गामध्ये ५५० हेक्टर जग्गा सर्वसाधारणले अतिक्रमण गरी भोगचलन गर्दै आएका छन् । उनीहरुले सो जग्गा आफ्नो स्वामित्वमा हुनुपर्ने माग गर्दै आएका छन् । सरकारले ३८ वर्षअघि १ हजार २०० हेक्टर वन फँडानी गरी समितिलाई कुम्भरमा ६०० हेक्टर कपास खेतीयोग्य जमीन उपलब्ध गराएको हो । ३७८ शेयर सदस्य परिवारले ५५० हेक्टरमा बाली विविधीकरणका माध्यमबाट कपास, धान, गहुँ मकै, मसुरो र तोरी बाली लगाउँदै आएका थिए । बर्दियाको कालिका–४ स्थित कपास फार्मका सानोश्री र जमुनीस्थित समितिको चार बिघा जग्गा र भौतिक संरचनामा सशस्त्र प्रहरीको सीमा सुरक्षा बलले प्रयोग गर्दै आएको जोशीले बताए। जग्गा कब्जा गरेपछि असुरक्षाका कारण समितिले कपास खेती गर्न छाडेको हो । समितिले बाँकेको खासकुस्मा, कचनापुर, कम्दी, बर्दियाको जमुनी र दाङको पूर्वी उत्तरी क्षेत्रमा गरी ३०० बिघामा कपास खेती गर्दै आएको छ । रासस
बक्यौक्ता करमा काठमाडौं महानगरले दियो जरिवाना छुट, १० करोडसम्मको सम्पत्ति कर ९० हजार मात्रै
काठमाडौं । काठमाडौं महानगरपालिकाले म्याद नाघिसकेको बक्यौता घरबहाल करमा जरिवाना छुटको व्यवस्था गरेको छ । महानगरले नयाँ प्रणालीमा सम्पती कर असुली गर्न थालेपछि पुरानो बक्यौता करमा जरिवाना छुट गरेको हो । महानगरले आर्थिक ऐन २०७५ मा सम्पत्ति कर घर र बहाल कर अब प्रति वर्गमिटर अनुसार तिर्नुपर्ने व्यवस्था गरेको छ । महानगरले पहिलो पटक कर निर्धारण गर्ने नयाँ मापदण्ड तयार गरेको हो । महानगर राजस्व विभागका निर्देशक राज्यप्रकाश प्रधानाङगाका अनुसार चालू आर्थिक वर्षको सम्पत्ति कर असोज मसान्तभित्र बुझाए १० प्रतिशत छुट हुनेछ । साथै सम्पत्ति करमा समावेस भएको जग्गामा भूमिकर लाग्ने छैन । नयाँ प्रणालीको कर असुलीमा ठाउँ अनुसारको जग्गा हेरी प्रति आना जग्गाको मूल्य तोकिएको छ । प्रतिआना जग्गाको रकमलाई १०० ले भाग गरी आउने रकमलाई स्थान अनुसार फरक-फरक अंकले गुणन गरिनेछ । यसपछि घरको बनावट अनुसार प्रतिवर्गमिटर गुणन गरी आउने रकम र घरको मूल्यलाई ०.२० ले गुणन गरी आउने योगफललाई पहिलेको जग्गाको मूल्यमा जोडेर प्रतिवर्गमिटर क्षेत्रफलसँग गुणन गरी निकालिने योगको १० प्रतिशत कर तिर्नु पर्नेछ । यस हिसाबले रत्नपार्क, खिचापोखरी, न्युरोड, असन, त्रिपुरेश्वर लगयतको क्षेत्रमा आनाको ५० लाख रुपैयाँ तोकिएको छ । यस्तै दरबारमार्ग, पुतली सडक लगायतको क्षेत्रमा ४० लाख प्रतिआना तोकिएको छ । महानगरले तोकेको कर अनुसार सुरुको १ करोडसम्मको कर १ हजार रूपैयाँ तिर्नु पर्नेछ । त्यसपछिको २ करोडमा १ हजार ५००, ३ करोडमा २ हजार, ४ करोडमा ४ हजार, ५ करोडमा ६ हजार, ६ करोडमा १० हजार, ८ करोडमा ६० हजार र १० करोडसम्मको सम्पतीमा ९० हजार रूपैयाँ कर तिर्नु पर्नेछ । अब महानगरभित्र आठ तलासम्मको घर निर्माण गर्न पाउने ऐनमा व्यवस्था गरिएको निर्देशक प्रधानाङगाले बताए । ‘महानगरभित्र अब हाइराइज बिल्डिङलाई पनि स्वीकृति दिइएको छ । यसको उदेश्य अग्ला बिल्डिङ बनाउने र खाली स्थानको बृद्धि गर्ने रहेको छ, प्रधानाङगाले विकासन्युजसँग भने यो वर्ष गत आर्थिक वर्ष भन्दा बढी कर असुल गर्ने उदेश्य राखेका छौं ।’ यसअघि सरकारले भूकम्पछि २ तला भन्दा माथिका घर बनाउन रोक लगाएको थियो । यसअघि महानगरले बहालकर अन्दाजी मूल्यको १२ प्रतिशत उठाउँदै आएको थियो ।
कस्ता छन् तपाईंको हाकिम ?
काठमाडौं। यदि तपाई कुनै नोकरीमा आवद्ध हुनुहुन्छ भने तपाईको काम गर्ने क्षमता दुई गुणाले वृद्धि भएर जान्छ जब तपाईको कार्यालय प्रमुखले तपाईसँग राम्रो व्यवहार गर्छ। क्वार्टर म्यागेजिनमा प्रकाशित एक अनुसन्धानले अमेरिकाका करिव ७५ प्रतिशत कामदारहरुको डिप्रेसनको मुख्य कारण उनीहरुको हाकिम भएको खुलासा भएको छ। हावर्ड विजनेश स्कुल र स्ट्यानफोर्ड विश्वविद्यालयका शोधकर्ताहरुले गरेको २ सय भन्दा बढी अध्ययनले कामका क्रममा लिइने तनावले स्वास्थ्यलाई नकारात्मक असर पुर्याउने र यो चुरोट भन्दा बढी हानिकारक हुने देखाएको हो। तनावको मुख्य कारण भने खराब प्रवृत्तिको हाकिम रहेको छ। अनुसन्धानमा भनिएको छ की ‘खराब प्रवृत्तिको हाकिमले चुरोट भन्दा बढी हानी गर्छ, तपाई जती दवाव दिइराख्ने हाकिमसँग बसेर काम गर्नुहुन्छ त्यती तपाईको शारिरिक तथा मानसिक स्वास्थ्यमा नकरात्मक असर पर्छ।’ यस्तै केहि कर्मचारिहरु आफुले गर्दै आएको नोकरी जान्छ की भन्ने पिरले समेत तनावमा रहने गरेका अध्ययनले सार्वजनिक गरेको छ। अध्ययनले भनेको छ ‘तपाईको हाकिम राम्रो छ हरेक कुरामा सघाउँछ तपाईसँग सकारात्मक व्यवहार प्रदर्शन गर्छ भने तपाई हरेक काममा सफल बन्न सक्नुहुन्छ तर खराब छ भने तपाईको भविष्यनै खतरामा पर्न सक्छ।’ नराम्राे प्रवृत्तिको हाकिम सधै रिसालु र हिंस्रक हुने जसले सधै ‘मैले यस्तो गरेको त्यस्तो गरेको तिमीहरु यत्ति काम पनि गर्न नसक्ने’ भन्दै झर्कने ‘तिमीहरुसँग अहिले सम्म नोकरी छ आफुलाई भाग्यमानी ठान’ भन्ने तथा ‘एकछिन समेत म यहाँ भएन भने तिमीहरुले सम्पुर्ण कुरा विगार्छौ’ भन्दै कर्मचारीसँग झर्कने गरेका अनुसन्धानमा उल्लेख छ।
एनआईसी एशिया बैंकका लगानीकर्ताले कमाए १३६ रुपैयाँ, किन बढ्दै छ सेयर मूल्य ?
काठमाडौं । एक महिनायता एनआईसी एशिया बैंकको सेयर मूल्य निरन्तर बढ्दै गएको छ । सेयर मूल्य बढेसंगै कारोबार रकममा पनि वृद्धि भएको छ । गत साउन २७ गते प्रतिकित्ता ३०४ रुपैयाँमा सेयर कारोबार भएकोमा असोज ७ सम्म आइपुग्दा बढेर ४४० रुपैयाँ पुगेको छ । एक महिनाको अवधिमा एनआईसी एसियाका लगानीकर्ताले १३६ रुपैयाँ कमाएका छन् । आइतबार मात्रै एनआईसी एसियालेको ७ करोड ४ लाख ६२ हजार रुपैयाँमा १ लाख ६१ हजार ६९३ कित्ता सेयर किनबेच भएको छ । एनआईसी एशियाको व्यवसाय वृद्धिले लगानीकर्ताको विश्वास बढाएको बैंकका सञ्चार अधिकृत सुधीर पाण्डे बताउँछन् । निक्षेप, कर्जा लगानी र वासलातको आकारका आधारमा नेपालको सबैभन्दा ठूलो बैंक एनआईसी एसिया भएको उनको दाबी छ । निक्षेप र लगानीको आकारमा भएको वृद्धिले आगामी दिनमा राम्रो प्रतिफल दिने आधार तयार पारेकाले लगानीकर्ता लोभिएको तर्क पाण्डेको छ । उनका अनुसार बैंकले हालसम्म १ खर्ब ५९ अर्ब रुपैयाँ निक्षेप परिचालन गरी १ खर्ब ३४ अर्ब रुपैया कर्जा लगानी गरेको छ । एनआईसी एशियाले आगामी तीन आर्थिक वर्ष अवधिमा १५ अर्ब रुपैयाँ खुद नाफा गर्ने योजना सार्वजनिक गरेको छ । बैंकले गत आर्थिक वर्षमा १ अर्ब १९ करोड रुपैयाँ मात्र खुद नाफा गरेको थियाे । बैंकले गत वर्ष, चालू आर्थिक वर्ष र आगामी आर्थिक वर्षको नाफाबाट सेयरधनीलाई बोनस सेयर र नगद लाभांश दुबै दिने जानकारी दिएको छ । तीन वर्षको अवधिमा निक्षेप ३ खर्ब ५० अर्ब, कर्जा लगानी २ खर्ब ५८ अर्ब, पुँजी बजारमा लगानी ४६ अर्ब पुर्याउने जनाएको छ । आइतबार सेयर बजार २.६ अंकले बढ्याे सेयर बजार सामान्य बढे पनि ६९ करोड ३६ लाख रुपैयाँ बराबरको सेयर किनबेच भएको छ । बैंकिङ, जलविद्युत, व्यापार र होटल समूहको सेयर मूल्य बढेको छ भने बीमा, लघुवित्त र उत्पादनको घटेको छ । आइतबार साल्ट ट्रेडिङ कर्पोरेशन लिमिटेड र प्रभु बैंकका लगानीकर्ताले पनि कमाएका छन् ।
एमबीबीएस र बीडीएसको सिट सङ्ख्या तोकियो
काठमाडौं। नेपाल मेडिकल काउन्सिलले विभिन्न मेडिकल कलेजका लागि एमबीबीएस र बीडीएस तर्फको सिट संख्या निर्धारण गरेको छ । काउन्सिलले काठमाडौंँ विश्वविद्यालय अन्तर्गत १० मेडिकल कलेजका लागि ८९० सिट संख्या निर्धारण गरेको छ भने त्रिभुवन विश्वविद्यालय अन्तर्गतका सात वटा मेडिकल कलेजका लागि ७६१ सिट तोकेको छ । नेपाल मेडिकल काउन्सिलका प्रवक्ता डा. कृष्ण अधिकारीले दिएको जानकारी अनुसार विराट मेडिकल कलेजले एमबीबीएस तर्फ ७५ सिट पाएको छ । गतवर्ष पनि विराटले ७५ संख्या पाएको थियो । यस्तै कलेज अफ मेडिकल साइन्सेज भरतपुरले यसवर्ष एमबीबीएस तर्फ एकसय सिट पाएको छ । गत वर्ष पनि उक्त मेडिकल कलेजले एकसय सिट नै पाएको थियो । बीडीएसतर्फ यो वर्ष ३५ सिट मात्र पाएको छ । गत वर्ष बीडीएसतर्फ ४० सिट पाएको थियो । काउन्सिलका अनुसार देवदह मेडिकल कलेज रुपन्देहीले एमबीबीएसमा ४० सिट प्राप्त गरेको छ । कान्तिपुर डेन्टल कलेज काठमाडौले बीडीएसतर्फ ५० सिट पाएको छ । यो कलेजले गतवर्ष पनि ५० सिट पाएको थियो । सिनामंगलस्थित काठमाडौं मेडिकल कलेजले एकसय सिट पाएको छ । बीडीएसमा केएमसीले ५० सिट प्राप्त गरेको छ । काठमाडौँ युनिभर्सिटी स्कुल अफ मेडिकल साइन्सेज धुलिखेलले यो वर्ष एमबीबीएसका लागि ७५ सिट पाएको छ । बीडीएसतर्फ भने ५० सिट मात्र पाएको छ । त्यसैगरी, लुम्बिनी मेडिकल कलेजले पाल्पाले एकसय सिट पाएको छ भने मणिपाल मेडिकल कलेज पोखराले पनि ७५ सिट पाएको छ । जोरपाटीस्थिति नेपाल मेडिकल कलेजले एकसय सिट पाएको छ । बीडीएसतर्फ एनएमसीले ५० सिट पाएको छ । नेपालगञ्ज मेडिकल कलेजले एकसय सिट एमबीबीएसतर्फ पाएको छ । विराटनगरस्थित नोबेल मेडिकल कलेजले ९० सिट पाएको छ । गतवर्ष भन्दा यो वर्ष नोबेलको १० सिट कम भएको छ । बीडीएसतर्फ नोबेलले ३० सिट पाएको छ । गत वर्ष बीडीएसमा ३५ सिट पाएको थियो । त्रिभुवन विश्वविद्यालय शिक्षण अस्पताल महाराजगञ्जले ७५, नेसनल मेडिकल कलेज वीरगन्ज, युनिभर्सल मेडिकल कलेज भैरहवा, नेपाली सेना मेडिकल कलेज र चितवन मेडिकल कलेज प्रत्येकले एक÷एकसय सिट पाएका छन् । यस्तै, किस्ट मेडिकल कलेजले ९०, गण्डकी मेडिकल कलेजले ९५ सिट पाएका छन् । यो वर्ष पाटन स्वास्थ्य विज्ञान प्रतिष्ठानले ६५ सिट पाएको छ भने धरानस्थित वीपी कोइराला स्वास्थ्य विज्ञान प्रतिष्ठानले एकसय सिट पाएको छ । काउन्सिलका प्रवक्ता डा. अधिकारीले काउन्सिल तथा विश्वविद्यालयले गरेको अनुगमनबाट सिट संख्या निर्धारण गरिएको जानकारी दिए। श्रोत- मेरो स्टडी
