एभरेष्ट बैंक र दक्षिण कोरियाकाे फिन सर्टबीच रेमिट्यान्स सम्झौंता
काठमाडौं । एभरेष्ट बैंक लिमिटेड र दक्षिण कोरियाली मनिट्रान्स्फर अपरेटर फिनसर्ट आईनकर्पोरेट बीचमा रेमिट्यान्स सम्झौंता भएको छ । उक्त सम्झौंता पत्रमा बैंकका अधिकारी र फिनसर्टका प्रमुख कार्यकारी अधिकृतले हस्ताक्षर गरेका छन् । यस सम्झौता पश्चात दक्षिण कोरियाबाट एभरेष्ट बैंकमा रेमिट्यान्स पठाउन सजिलो हुने छ । क्वाइन सर्ट एउटा रजिस्टर्ड अनलाईन प्रडक्ट हो र यसले फिनसर्टबाट सेवा प्रदान गर्ने छ । जसलाई सजिलै वेभसाइट तथा मोवाइल एप्लीकेशनमा पाउन सकिन्छ । एन्ड्रोइड तथा आईओएस दुबै डिभाइसमा उक्त एपलिकेसन रहेको छ । कुनैपनि रेमिट्यान्स पठाउने मानिसले क्वाइसर्टमा रजिस्टर हुनुपर्ने छ, त्यसपछि क्वाइसर्टले एभरेष्ट बैंकको मार्फत नेपालमा रेमिट्यान्स पठाउने छ ।
गण्डकी विकास बैंकको शाखा लहानमा
काठमाडौं । गण्डकी विकास बैंकले सिराहा जिल्लाको लहानमा नयाँ शाखा विस्तार गरी उद्घाटन गरेको छ । उक्त शाखाको उद्घाटन लहान नगरपालिकाका प्रमुख मुनी साह सुडिले गरेका हुन् । उक्त शाखाबाट निक्षेप संकलन सहज र सरल रुपमा कर्जा प्रवाहको साथमा सम्पूर्ण बैंकिङ सेवा प्रदान गर्ने बैंकका प्रमुख कार्यकारी अधिकृत रेशमबहादुर थापाले बताए । हालसम्म बैंकको ७७ वटा शाखा सञ्चालनमा आएका छन् ।
बाँकेमा एनआईसी एशिया बैंकको २ नयाँ शाखा
काठमाडौं । एनआईसी एशिया बैंकले बाँकेमा २ नयाँ शाखा विस्तार गरेको छ । बैंकले बाँकेको त्रिभुवन चोक र सम्झनाचोकमा शाखा विस्तार गरी सञ्चालनमा ल्याएको हो । उक्त त्रिभुवन चोक शाखाको उद्घाटन बैंकका संचालक राजेन्द्रप्रसाद अर्याल र सम्झनाचोक शाखाको उद्घाटन नेपालगञ्जको नेपाल राष्ट्र बैकका निर्देशक बिमलराज खनालले गरेको हुन् । हालसम्म बैंकले २६१ शाखा कार्यालयहरु, २५३ एटीएम, २५ वटा एक्सटेन्सन काउण्टर एवं १८ वटा शाखा रहित बैंकिङ् ईकाई मार्फत बैंकिङ् सेवा दिँदै आएको छ ।
महेन्द्र राजमार्गकै मोडलमा मेची-महाकाली रेलमार्ग, काकडभिट्टा-बर्दिबास खण्ड प्राथमिकतामा
काठमाडौं । ९४५ किलोमिटर लामो मेची महाकाली रेलमार्ग पनि महेन्द्र राजमार्ग(पूर्व पश्चिम) राजमार्गकै मोडलमा निर्माण हुने भएको छ । अर्थ मन्त्रालयको अगुवाईमा सरकारले मेची महाकाली विद्युतिय रेलमार्गको बिभिन्न खण्डहरुमा लगानीकर्ताहरुको खोजी गरिरहेको छ । केहि समय अघि मात्रै अर्थ मन्त्रालयमा आयोजित रेल ब्रिफिङमा जापान, कोरिया, चीन र भारतले मेची महाकाली रेलमार्गको बिभिन्न खण्डको निर्माणमा चासो देखाएका थिए । त्यस लगत्तै अर्थमन्त्री डा. युवराज खतिवडाले एक महिनाभित्र पूर्व पश्चिम रेलमार्गको कुन खण्डमा कसले लगानी गर्छन भन्ने तथ्य एक महिनाभित्रै सार्वजनिक गरिदिने घोषणा गरेका थिए । रेल विभागका सिनियर डिभिजनल इञ्जिनियर अमन चित्रकारले पनि मेची महाकाली रेलमार्गको निर्माणका लागि दाताहरुको खोजी आरम्भ गर्ने समय भैसकेको बताए । ‘महेन्द्र राजमार्ग पनि खण्ड खण्ड गरेर बिभिन्न देशहरुको सहयोगमा निर्माण भएको थियो, रेलमार्गलाइ पनि त्यसरी नै बनाउन सकिन्छ, अब लगानीकर्ता खोज्ने समय भैसकेको छ’, चित्रकारले भने । भौतिक पूर्वाधार तथा यातायात मन्त्री रघुबिर महासेठले पनि केहि समयभित्रै पूर्वपश्चिम रेलमार्गको काकडभिट्टा बर्दिबास खण्डको निर्माणका लागि दातासँग सम्झौता हुने बताए । मन्त्री महासेठले भने,‘बर्दिबासदेखि काँकडभिट्टा हामी निकट भविष्यमा नै सम्झौता गर्न गैरहेका छौं । २४६ किलोमिटर फाष्ट्र ट्रेनको रुपमा यसलाई विकास गरेर हामीले निकट भविष्यमा एग्रिमेन्ट गर्न गैरहेका छौं । त्यस्तै जयनगर–जनकपुर–बिजलपुरा–बर्दिवास यही डिसेम्बरबाट सकभर सञ्चालन गर्न हामी गैरहेका छौं ।’ हाल बर्दिबासदेखि लालबन्दीसम्मको खण्डमा धमाधम निर्माण कार्य चलिरहेको छ । त्यस्तै लालबन्दिदेखि निजगढसम्मको खण्डमा केहि पुलहरुको टेण्डर निकालिएको छ । मुआब्जा वितरण पनि अघि बढिसकेको छ । काठमाडौं–केरुङ रेलमार्गको प्रि–फिजिवीलिटी सम्पन्न भैसकेको र अब विस्तृत सम्भाव्यता अध्ययनको काम अघि बढाउने पनि उनले स्पष्ट पारे । मन्त्री महासेठले भने,‘त्यस्तै भारतसँग सहमति भए अनुसार वीरगञ्ज–काठमाडौं रेलमार्गको प्रि–फिजिविलीटी सम्पन्न भैसकेको छ । अब छिट्टै डीपीअार बनाउन लागिसकेका छौं । यो छोटो अवधिमा पनि हामीले यी नयाँ–नयाँ कामहरु गरेर ल्याएका छौं ।’
साझा बसकाे टिकट घरबाटै, काउन्टरसम्म धाउनै नपर्ने
काठमाडौं । अबदेखि यात्रुहरूले साझा यातायातका टिकट घरबाटै काट्न सक्ने भएका छन् । बुधबार साझा यातायात र बससेवा डटकमबीच अनलाइन टिकटिङ सम्झौता भएको छ । सम्झौतासँगै अबदेखि यात्रुहरूले साझा यातायातका टिकट अनलाइनबाटै काट्न सक्नेछन् । अनलाइन टिकटिङ सम्बन्धि सम्झौतापत्रमा साझा यातायातका तर्फबाट कार्यकारी सञ्चालक भूषण तुलाधर र दियालो टेक्नोलोजिज प्रा.लि.का तर्फबाट प्रमुख कार्यकारी अधिकृत पि.आर. खनालले हस्ताक्षर गरेका छन् । साझा यातायातले दियालो टेक्नोलोजिजले प्रवद्धन गरेको बससेवा डटकमसँगको सहकार्यमा काठमाडौ उपत्यका बाहिर सञ्चालन हुने आफ्ना सुविधा सम्पन्न डिलक्स् बसहरूमा अनलाइनबाट टिकट काट्न सकिने प्रबन्ध मिलाएको हो । हाल साझा यातायातका बसहरू काठमाडौदेखि रूपन्देहीको भैरहवा र काठमाडौदेखि बाग्लुङका लागि छुट्दै आएका छन् । भैरहवा र बाग्लुंगका लागि साझा यातायातको रात्रिसेवा बुधबारदेखि शुरू भएको हो । सम्झौतापछि साझा यातायातका सञ्चालक तुलाधरले भने ‘लामो रूटमा जाने यात्रुहरू साझा यातायातको सेवाबारे सूचना पाउन र टिकट काट्नकै लागि काउन्टरसम्म धाउन नपरोस् भन्ने उदेश्यले हामीले अनलाइन टिकटिङको प्रबन्ध मिलाएका छौँ र भविष्यमा यात्रुहरूको सुविधाको लागि थप सेवा विस्तार गर्नेछौँ ’। यसैगरी दियालो टेक्नोलोजिजका प्रमुख कार्यकारी अधिकृत पि.आर खनालले भने ‘साझा यातायातसँगको सहकार्यले यातायात क्षेत्रलाई डिजिटलाइज गर्ने हाम्रो अभियानमा ठुलो टेवा पुगेको छ । साझा यातायातसँगको सहकार्यले सार्बजनिक यातायातमा रहेका समस्यालाई प्रविधिको प्रयोगबाट समाधान गर्न महत्वपूर्ण भूमिका खेल्ने हाम्रो विश्वास रहेको छ’ । यात्रुहरूले अबदेखि साझा यातायात डटकम डट एनपी, बससेवा डटकम, इसेवा डटकम डट एनपीबाट सहजै टिकट काट्न सकिनेछ । इसेवा एकाउन्ट भएका यात्रुले सहजै आफ्नो मोबाईल तथा इन्टरनेटबाट टिकट काट्न सक्नेछन् भने इसेवा एकाउन्ट नभएका ग्राहकले नजिकै रहेका इसेवा जोन, पोइन्ट तथा इसेवा अंकित साइबर कम्यूनिकेशनबाट टिकट बुकिङ गर्न सकिनेछ । यसैगरी यात्रुहरूले अधिकांश बैंकका मोबाईल बैंकिङ तथा इन्टरनेट बैकिङ तथा अन्य विभिन्न पेमेन्ट गेटवे मार्फत रकम भुक्तानी गरेर पनि बस टिकट काट्न सक्नेछन् ।
हिमालय ऊर्जा विकासले चैतदेखि १९ मेगावाट बिजुली उत्पादन थाल्ने, यो वर्ष ३ करोड नाफा गर्ने
काठमाडौं । निजी क्षेत्रबाट प्रवद्र्धित हिमालय ऊर्जा विकास कम्पनी लिमिटेले निर्माण गरिरहेको २ जलविद्युत आयोजनाबाट आउदो चैतदेखि १९ मेगावाट बिजुली उत्पादन गर्ने भएको छ । कम्पनीले १२ मेगावाटको उपल्लो खिम्ती र ७ मेगावाटको माथिल्लो खिम्तीबाट बिजुली उत्पादन हुने जानकारी दिएको छ । कम्पनीले साधारण सेयर (आईपीओ ) निष्कासन प्रयोजनका लागि सार्वजनिक गरेको आब्हान पत्रमा आउदो चैतभित्र बिजुली उत्पादन गर्ने प्रतिवद्धता नेपाल विद्युत प्राधिकरणसंग गरेको जानकारी दिएको छ । कम्पनीले आउदो बैंशाखदेखि बिजुली बिक्रीबाट आम्दानी गर्ने समेत जानकारी दिएको छ । आयोजना बनाउन ३ अर्ब १४ करोड ७३ लाख रुपैयाँ लाग्ने कम्पनीको प्रक्षेपण छ । आयोजनाको प्रतिमेगावाट लागत १६ करोड ५६ लाख रुपैयाँ रहेको छ । लागत सस्तो भएकाले वित्तीय रुपमा दुबै आयोजना आकर्षक रहेका छन् । आयोजनाबाट वार्षिक ११ करोड ५९ लाख रुपैयाँ बिजुली उत्पादन हुने अध्ययनले देखाएको छ । आयोजनामा २५ प्रतिशत स्वपुँजी (इक्विटी) र ७५ प्रतिशत कर्जा लगानी छ । चैतबाट बिजुली उत्पादन हुने भएपछि चालु आर्थिक वर्षमा कम्पनीले ३ करोड ३० लाख रुपैयाँ खुद नाफा गर्ने प्रकाशित आब्हान पत्रमा उल्लेख गरिएको छ । आगामी वर्ष नाफा बढेर १६ करोड र आर्थिक वर्ष ०७७/०७८ मा १८ करोड ७० लाख रुपैयाँ खुदनाफा गर्ने कम्पनीले जानकारी दिएको छ । चालू आर्थिक वर्षमा बिजुली बिक्रीबाट १४ करोड, आगामी वर्ष ५७ करोड ५२ लाख र ३ वर्षपछि ५९ करोड २१ लाख आम्दानी हुने कम्पनीले दाबी गरेको छ । । आम्दानी बढेपछि कम्पनीको प्रतिसेयर आम्दानी (ईपीएस) मा वृद्धि भई १८ रुपैयाँ ८९ पैसा पृुग्ने छ ।कम्पनीले कात्तिक ६ गतेदेखि आयोजना प्रभावित स्थानीय बासिन्दालाई ९ करोड ९० लाख रुपैयाँ बराबरको ९ लाख ९० हजार कित्ता आईपीओ निष्कासन गर्न लागेको हो । आईपीओ निष्कासन बन्द छिटोमा कात्तिक २० र ढिलोमा मंसिर ५ गतेसम्म तोकिएको छ । न्युनतम ५० देखि अधिकतम् ४ हजार ९०० कित्तासम्म आवेदन दिन सकिने छ ।जलविद्युत आयोजनाबाट प्रभावित रामेछाप र दोलखा जिल्लाका स्थानीयबासिन्दालाई आईपीओ निष्कासन हुन लागेको हो ।
९ प्रतिशत ब्याज तिर्नुस्, आफ्नै गाडी चढ्नुस्
काठमाडौं । राष्ट्रिय वाणिज्य बैंक लिमिटेडले चाडपर्व उत्सव योजना अन्तर्गत ९ प्रतिशत ब्याजदरमा व्यक्तिगत सवारी प्रयोजनको लागि नयाँ गाडी कर्जा प्रोडक्टको शुरु गरेको छ । गाडीको कोटेशनमा अंकित मुल्यको बढिमा ६५ प्रतिशत वा ५० लाख रुपैयाँमध्ये जुन कम हुन्छ सो रकम कर्जा लगानी गरिने बैंकले जनाएको छ । कर्जा अवधि ५ वर्ष सम्म भएमा ९ प्रतिशत र ५ वर्ष भन्दा बढि कर्जा अवधि भएमा ९.५ प्रतिशत ब्याजदर लागु हुने छ । बढिमा ७ वर्षसम्म कर्जा अवधि दिइने यो योजना २०७५ कार्तिक मसान्तसम्म मात्र लागु हुने छ । निवेदन दिएको ७ कार्य दिन भित्रमा निर्णय दिने यस योजनामा गाडी कर्जा सम्बन्धी अन्य प्रचलित नियमहरु आकर्षित हुने बैंकले जनाएको छ । यो कर्जा बैंकका जुनसुकै शाखाबाट लिन सकिने छ ।
हुण्डाईको नयाँ थ्री एस सेन्टर अब वीरगंजमा
काठमाडौं । नेपालका लागि हुण्डाई गाडिको आधिकारिक विक्रेता लक्ष्मी ईन्टरकन्टिनेन्टल प्रालिलेले वीरगंजमा नयाँ थ्री एस सेन्टर उदघाटन गरेको छ । कम्पनीले आफ्नो डिलर अरचिड्स मोटो कर्पोरेसन प्रा.लिको सहयाेगमा उक्त सेन्टर खोलेको हो । कम्पनीले एकै छानामा सेल्स, सर्भिस र स्पेर पार्ट्सको सुविधा प्रदान गर्ने उद्देश्य उक्त स्थानमा नयाँ सेन्टर खोलेको बताएको छ । वीरगंज र वरपरका क्षेत्रमा रहेको बढ्दो हुण्डाई गाडिको मागलाई मध्यनजरमा राखी सो डिलरसिपको स्थापना गरिेएको हो । उक्त थ्री एस सेन्टरको उद्घाटन बिन्देश्वरप्रसाद साह तथा लक्ष्मी ईन्टरकन्टिनेन्टलका एस्क्यिूटिभ डाइरेक्टर निराकर श्रेष्ठले संयुक्त रुपमा गरेका हुन् । उक्त सेन्टरको सोेरुममा ३ देखि ४ वटा सम्म गाडि डिस्प्ले गरिनेछ, उत्कृष्ट तालिम प्राप्त प्राविधिकहरु, तथा एयर कन्डिसन र वाइफाइ सुविधायुक्त कस्टमर लाउन्ज रहेको छ । यसको उत्कृष्ट सर्भिस सेन्टरमा प्रतिमहिना ३०० वटासम्म गाडिलाई सेवा दिने क्षमता रहेको छ । साथै, यस सेन्टरमा प्रशस्त हुण्डाई जेनुइन्पार्ट्स पनि उपलब्ध हुनेछ । हुण्डाई तालिम केन्द्रबाट विशेष तालिम प्राप्त हुण्डाई कर्मचारीहरुले यस सेन्टर मार्फत ग्राहकहरुलाई उत्कृष्ट सेवा प्रदान गर्नेछन् । लक्ष्मी ईन्टरकन्टिनेन्टलले हालसम्म १४ वटा डिलरसिप स्थापना गरिसकेको छ ।
