राष्ट्र बैंकमा जागिर खानेले राष्ट्रिय वाणिज्य बैंकमा पैसा बुझाउनुपर्ने
काठमाडौं । नेपाल राष्ट्र बैंक र राष्ट्रिय वाणिज्य बैंक लिमिटेड बीच नयां जनशक्तीको लागि विज्ञापन गर्दा दरखास्त शुल्क अनलाइन प्रविधिबाट भुक्तानी गर्ने सम्झौता भएको छ । नेपाल राष्ट्र बैंकका डेपुटी गभर्नर शिवराज श्रेष्ठको उपस्थितीमा नेपाल राष्ट्र बैंकका कार्यकारी निर्देशक पिताम्बर भण्डारी र राष्ट्रिय वाणिज्य बैंकका प्रमुख कार्यकारी अधिकृत किरणकुमार श्रेष्ठले हस्ताक्षर गरेका हुन् । समारोहमा नेपाल राष्ट्र बैंकका डेपुटी गभर्नर शिवराज श्रेष्ठले सरकारी स्वामित्वको ठूलो बैंक संग सहकार्य गर्न पााउदा खुशी लागेको बताए । बैंंकका प्रमुख कार्यकारी अधिकृत किरणकुमार श्रेष्ठले सेवालाई प्रभावकारी ढङ्गबाट कार्यन्वयन गर्दै भविश्यमा राष्ट्र बैंक संग सहकार्य गरी जनतालाई थप सेवाहरु प्रदान गर्न बैंक सदैव तयार रहेको बताए । उक्त सम्झौता भएपश्चात नेपाल राष्ट्र बैंकले निकट भविष्यमा नयां जनशक्ती भर्नाको लागि माग गर्ने विज्ञापनमा आवेदन गर्दा दरखास्त फारम अनलाइन प्रविधि मार्फत भर्नुपर्ने र सो को दरखास्त शुल्क राष्ट्रिय वाणिज्य बैंकको इन्टरनेट बैंकिङ्ग वा मोवाइल बैंकिङ्ग अथवा इसेवा डिजिटल सेवा मार्फत राष्ट्रिय वाणिज्य बैंकमा रहेको नेपाल राष्ट्र बैंकको खातामा सिधै रकम जम्मा हुने छ । बैंकको हाल ७४ जिल्लामा २०७ वटा शाखा कार्यालय, १६५ वटा एटिएम र ९३ वटा शाखा रहित बैंकिङ्ग रहेको छ । उक्त समारोहमा राष्ट्रिय वाणिज्य बैंकका विभागीय प्रमुख देवेशप्रसाद लोहनी, नेपाल राष्ट्र बैंकका तर्फबाट निर्देशक गुरुप्रसाद पौडेल लगायतको उपस्थिती रहेको थियो ।
सीबीआईएल क्यापिटललले संस्थापकलाई हकप्रद सेयर निष्कासन गर्यो, आईपीओ पनि ल्याउदै
काठमाडौं । सिटिजन्स बैंकअन्र्तगतको सीबीआईएल क्यापिटल लिमिटेडले चुत्तापुँजी बढाउन हकप्रद सेयर निष्कासन गर्ने भएको छ । सीबीआईएलको बुधबार बसेको १२ औं वार्षिक साधारणसभाले १७ प्रतिशत हकप्रद सेयर निष्कासनको निर्णय गरेको प्रमुख कार्यकारी अधिकृत (सीईओ) समीरप्रसाद दाहालले बताए । ३५ दिनभित्र हकप्रद सेयर खरिद गर्न समय दिएको उनले जानकारी दिए । हकप्रद निष्कासनपछि संस्थाको चुत्तापुँजी बढेर २० करोड रुपैयाँ पुग्ने छ । क्यापिटलले ३ करोड रुपैयाँको हकप्रद सेयर निष्कासन गरेको हो । संस्थाको चुत्तापुँजी १७ करोड रुपैयाँ छ । कम्पनीले ३ करोड रुपैयाँ बराबरको ३ लाख कित्ता साधारणसेयर (आईपीओ) निष्कासन गर्ने भएको छ । उसले आईपीओ निष्कासन गर्नका लागि नेपाल धितोपत्र बोर्डमा निवेदन दिएको छ । आईपीओ निष्कासन गर्न ढिलाइ भएपछि तत्काल हकप्रद सेयर निष्कासन गरेर चुत्तापुँजी २० करोड रुपैयाँ पर्याउने उनले जानकारी दिए । हकप्रद निष्कासनपछि पनि आईपीओ जारी गर्ने दाहालले बताए ।
सानिमा बैंकले १४ प्रतिशत नगद लाभांश दिने, सेयर मूल्य घट्याे
काठमाडौं । सानिमा बैंक लिमिटेडले सेयरधनीलाई १४ प्रतिशत नगद लाभांश दिने भएको छ । हालै सम्पन्न बैंकको सञ्चालक समितिको बैठकले सेयरधनीलाई सो मात्राको नगद लाभांश दिने प्रस्ताव गरेको छ । उक्त प्रस्तावलाई नेपाल राष्ट्र बैंकले स्वीकृत तथा बैंकको आगामी वार्षिक साधारणसभाले पारित गरेपछि मात्र सेयरधनीले सो मात्राको लाभांश पाउनेछन् । हाल बैंकको चुक्ता पुँजी ८ अर्ब १२ लाख रुपैयाँ रहेको छ । बैंकले नगद लाभांश घोषणा गरेपछि यसको सेयर मूल्य घटेको छ । बुधबार प्रतिकित्ता ३३४ रूपैयाँमा कारोबार भएको यस बैंकको सेयर बिहीबार झरेर ३१७ रूपैयाँमा कारोबार भएको छ । बोनस सेयर नपाउने भएपछि लगानीकर्तामा निरासा देखिएको सेयर मूल्यले संकेत गरेको छ ।
युवराज खतिवडा अर्थमन्त्री भएपछि डुइङ बिजनेश इन्डेक्स खस्कियाे नेपालकाे
अर्थमन्त्रीले पोहोर साल श्वेतपत्रमा हाम्रो अर्थतन्त्र झुर छ भनेर ल्यारेटिभ ब्युल्ट गर्ने क्रममा उल्लेख गर्नुभएको एउटा सुचकांक डुइङ बिजनेश इन्डेक्स पनि थियो (हेर्नुस्स् श्वेतपत्र बुँदा ८)। पोहोर साल हाम्रो वरियता क्रममा स्थान १०५औं थियो। भारत को १००औं थियो। श्रीलंका १११औं थियो। परार साल हाम्रो स्थान १०७औं थियो। भारत १३०औं थियो। श्रीलंका ११०औं थियो। पोहोर साल हाम्रो २ स्थान ले सुधार भएको थियो। यसपाली नयाँ वरियता आएको छ। यस अनुसार हाम्रो वरियताक्रममा स्थान ११०औं छ र भारत ७७ औं, भुटान र श्रीलंका (१००औं स्थानमा, पोहोर भन्दा उल्लेखनीय ११ स्थान सुधार) भन्दा पछाडि परेका छौं। यसपाली हामी झन खस्केका छौं। छिमेकी भारत भने गएको दुई वर्षमा नै १३०औं स्थान बाट ७७ औं मा उक्लेको छ। कुल १९० मुलुकको बरियता गरिएको छ। अर्थमन्त्रीलाई यी बरियताक्रमको बारेमा थाहा पनि थियो, उहाँले पुर्वसरकारले छोडेको अर्थतन्त्रको बारेमा मुल्यांकन गर्दा यो उल्लेख पनि गर्नु भयो। मलाई के आशा थियो भने अब भारतमा जस्तै यो वरियताक्रममा देशलाई माथि पार्न मुलुकमा काम होला। तर एकसेएक भाषणबाज भएको हाम्रो देशमा आफैंले भनेका कुराहरुमा फ्लअेअप नगर्ने चर्को प्रवित्ति छ। उच्च पदमा रहेका अधिकांश व्यक्तिहरु भाषण गर्नु नै शासन गर्नु हो झै गर्छन्। जसले गर्दा भाषण नै हास्यास्पद हुने र दिगो प्रगती हासिल नहुने स्थिति छ । उदाहरणको लागि हामीले सुनेको सडकका खाल्डाखुल्डी वैशाख १५ सम्म पुर्ने, असोजसम्म पानी ल्याउने जस्ता डुइङ डेट भ गए, अब, जहाँ सम्म लाग्छ, पुष सम्म पानी जहाज चढाउने अर्को ड्युइ डेट आउँदैछ। सरकारी आँकडा अनुसार २०७४ साउन देखी माघ सम्म १४ अरब ३४ करोड वैदेशिक लगानी भित्रिएकोमा वर्तमान सरकार आएपछी फागुनदेखि असारसम्म जम्मा ३ अर्ब १७ करोड रुपैयाँमात्र लगानी भित्रिएको थियो। सरकारको मुख्य गोल आफ्ना नागरिकलाई ङ्याकेर कर बढी उठाउने र विभिन्न नाममा आफ्ना मान्छेहरुलाई वितरण गर्ने मात्र हैन। दिगो बिकासका स्रोतहरु पहिल्याउने पनि हो। स्वदेशी विदेशी लगानीको बातावरण नबनाइ यो मुलुक अगाडि बढ्दैन र त्यसका लागि लगानिकर्ताहरुको विश्वास जित्नसक्नुपर्छ। म अहिले उद्योगी व्यवसायीहरुसँग बस्दा उनीहरु कोही पनि उद्योगमन्त्रीसँग खुशी भएको कुरा गर्दैनन् बरु अनपेक्षित महेश बस्नेत राम्रा थिए भन्छन्। यो वर्षको डुइङ बिजनेश इन्डेक्स र्याङिकलेले सरकारलाई आफ्ना अहिलेसम्म का नीति, नेतृत्व र कार्यक्रमहरु समिक्षा गर्न प्रेरणा दिओस भन्ने आशा गरौं।
नेपालतर्फ १९ किलोमिटरमा पेट्रोलियम पाइप विच्छाइयो, ३ महिनामा सकिने
वीरगञ्ज । मोतिहारी–अमलेखगञ्ज पेट्रोलियम पाइपलाइन विस्तार परियोजनाअन्तर्गत हालसम्म नेपालतर्फको १९ किलोमिटर क्षेत्रमा जमीनमुनि पाइप ओछ्याउने काम सम्पन्न भएकोे छ ।परियोजना कार्यालय सिमराका अनुुसार नेपालतर्फको ३९.२ किलोमिटर भू–भागमध्ये अब १७.२ किलोमिटर पाइप ओछ्याउन बाँकी छ । तीव्रगतिमा बाँकी काम भइरहेकाले बढीमा तीन महीनाभित्र काम सम्पन्न भई भारत बिहारको राजधानी पटनाबाट पाइपलाइनमार्फत पेट्रोलियम पदार्थ आउने सो कार्यालय सिमराका इञ्जिनीयर शरदप्रसाद पौडेलले जानकारी दिए। उनका अनुसार अन्य बाधा अवरोध नभए तीन महिनाभित्र नेपालमा पेट्रोलियम पदार्थ आउनेछ । बाँकी रहेको भू–भागमध्ये पर्सा राष्ट्रिय निकुञ्जमा नौ किलोमिटर, नाला, स–साना पुलपुलेसा, नदी, क्रसिङ सडक, गण्डक क्षेत्रमा पाइपलाइन ओछ्याउन बाँकीे छ भने भारतको मोतिहारीदेखि रक्सौलसम्म ३३.७ किमीमध्ये घना बस्ती भएका कारण रक्सौल क्षेत्रमा केही भागमा पाइप ओछ्याउने काम बाँकी छ । नेपालको लाइफलाइनको रुपमा रहेको भारतको मोतिहारीदेखि अमलेखगञ्जसम्म ७० किलोमिटर लम्बाइको सो पाइपलाइन निर्माणका लागि भारत सरकारले३ अर्ब ५० करोड भारतीय लगानी गरेको बताइएको छ । गत चैतको अन्तिम साता भारत भ्रमणको क्रममा प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीले नयाँदिल्लीको हैदरावाद हाउसबाट संयुक्तरूपमा मोतिहारी अमलेखगञ्ज पेट्रोलियम पाइपलाइनको शिलान्यास गरेपछि यसले तीव्रता पाएको हो । पथलैयादेखि अमलेखगञ्जसम्म ८ किमी क्षेत्रमा पर्सा राष्ट्रिय निकुञ्ज भएर पाइपलाइन जाने भएकाले निकुन्जभित्रका ५ हजार रुख काट्नुपर्ने देखिन्छ । यसका लागि सङ्घीय सरकारले स्वीकृति दिइसकेकाले वातावरण मूल्याङ्कन प्रभावबारे सूचना समेत प्रकाशित गरिएको छ । वन तथा वातावरण मन्त्रालयले वातावरण प्रभाव मूल्याङ्कन प्रतिवेदनलाई स्वीकृति दिएपछि रुख काट्ने अनुमति मन्त्रिपरिषद्ले पारित गरेपछि मात्र रुख काट्ने काम अघि बढ्ने पर्सा राष्ट्रिय निकुञ्जका प्रमुख हरिभक्त आचार्यले बताए। पाइपलाइन बिछ्याउने काम सम्पन्न भएपछि पेट्रोलियम पदार्थ भण्डारण गर्न अमलेखगञ्ज आयल निगमको डिपोमा ३ हजार ९०० किलोलिटर क्षमता भएका दुई तथा ४ हजार १०० किलोलिटर क्षमता भएको दुई गरी चार ट्याङ्करको मर्मतसम्भार द्रूतगतिमा भइरहेको छ, जसमध्ये एउटा तयार भइसकेको छ भने तीन ट्याङ्कर बनाउने काम भइरहेको छ । तीन महीनाभित्र निर्माण सकी सञ्चालनमा ल्याउने लक्ष्य लिएको सो पाइपलाइन निर्माण सम्पन्नपछि पटनाबाट प्रतिघण्टा २५० लिटर पेट्रोलियम पदार्थ पाइपलाइनबाट भित्रिने छन् । जमीनमुनि साढे दुई मिटर तल तथा पौने ११ इन्चको माइल स्टिल भन्ने कालो रङ्गको पाइप राखिएकोले खिया लाग्दैन । यो परियोजना सञ्चालमा आएपछि नेपाल–भारतको रक्सौल नाकामा देखिने जामको समस्या हट्नाका साथै पेट्रोलियम पदार्थमा हुने चोरी तथा अनियमितता हटेर अपेक्षा गरिएको छ । रासस
ज्याेति विकास बैंककाे बजार विस्तार अाक्रामक, निक्षेप वृद्धि ८६ प्रतिशत
काठमाडौं । निक्षेप तथा कर्जा विस्तारमा ज्योति विकास बैंक आक्रामक देखिएको छ । बैंकले एक बर्षको अवधिमा निक्षेपमा करिब ८६ प्रतिशतले वृद्धि गरी २१ अर्ब ४ करोड रुपैंया पुर्याएको छ । अघिल्लो बर्ष बैंकको कुल निक्षेप ११ अर्ब ३० करोड रुपैंया थियो । निक्षेपसँगै कर्जा विस्तारमा समेत बैंकले उल्लेख्य प्रगति हासिल गरेको छ । सोही अवधिमा बैंकको कर्जा प्रवाहमा ७८ प्रतिशतले वृद्धि भई १७ अर्ब ७८ करोड रुपैंया पुग्दा कर्जा निक्षेप अनुपात ७६.३९ प्रतिशत कायम भएको छ । बजारमा लगानीयोग्य पुँजीको अभाव भएर बैंकहरुको सीडी रेसियो ८० प्रतिशत पुग्नै लागेको अवस्थामा यो अनुपात तुलनात्मक रुपमा सबल हो । नाफा वृद्धिमा पनि बैंकले आशालाग्दो प्रगति हासिल गरेको छ । गत आर्थिक वर्षको पहिलो त्रैमासको तुलनामा बैंकले नाफामा ४० प्रतिशतले वृद्धि गरी ६ करोड ३३ लाख रुपैंया पुर्याएको छ । बैंकले पुँजी वृद्धिका वावजुद प्रतिशेयर आम्दानीमा पनि अघिल्लो आवको सोही त्रैमासको तुलनामा सुधार गरी रु ९.७८ पुर्याएको छ । निष्क्रिय कर्जा अनुपातमा बैंकले अघिल्लो आवको सोही त्रैमासको अवस्थामा भन्दा ठूलो सुधार ल्याएको छ । बैंकले सो अनुपात ०.८२ बाट झारेर ०.३९ प्रतिशत कायम गर्न सफल भएको छ । सोही मूल्य आम्दानी अनुपात समेत बैंकले २३.२८ बाट घटाएर १४.४२ कायम गर्न सफल भएको छ । बजारमा सँधैजसो कायम रहेको लगानीयोग्य पुँजीको अभावका बीच बैंकको निक्षेप संकलनको यो वृद्धिदर सम्भवत विकास बैंकहरुमा सबैभन्दा बढी हो ।
बीमा बिधेयकमा बीमकका दुई दर्जन असन्तुष्टि, संसोधनका लागि संसदमा लबिङ शुरू
काठमाडौं । प्रस्तावित बीमा ऐन, २०७५ प्रति सराेकारवालाहरूले व्यापक असन्तुष्टि जनाएका छन् । बीमा समितिले मस्यौदा गरेर अर्थमन्त्रालय हुँदै हाल बीमा बिधेयक संसदको अर्थ समितिमा पुगेको छ । समितिले दफावार छलफल गरेपछि बिधेयकलाई संसदबाट पारित गरिनेछ । अर्थसमितिमा पुगेको बिधेयकमा केही संशाेधन माग गर्दै बीमा कम्पनीकाे उच्च व्यवस्थापक तथा लगानीकर्ताले अनौपचारिक रुपले आफ्ना एजेण्डा सम्बोधनका लागि लबिङ पनि थालेको छ । उनीहरू अर्थसमितिका सदस्यहरु मार्फत आफ्ना मागको सम्बोधन गर्ने प्रयास थालेको हुन् । उनीहरुले संसदहरुलाई भेटेर आफ्ना मागका पक्षमा बोलिदिन भनेका छन् । बीमकले प्रत्येक बर्षको चैत मसान्तमा बीमा कम्पनीको लाइसेन्स नविकरण गर्नुपर्ने व्यवस्था खारेज हुनुपर्ने धारणा अघि सारेको छ । त्यस्तै, नियामक निकायले दिएको निर्देशन पालना नगरेमा ५ लाखदेखि १ करोड रुपैंयाँसम्म जरिवाना गर्ने व्यवस्था पनि खारेज हुनुपर्ने जनाएको छ । बीमकले तोकिएको समयमा दावी वापतको दायित्व निर्धारण र फस्र्याेट नगरेमा बिषयको प्रकृति हेरि २ लाखदेखि ५० लाखसम्म जरिवाना हुने व्यवस्था पनि खारेजीकाे माग भएकाे छ । त्यस्तै, बीमकले परिपालन सम्बन्धी प्रतिवेदन पेश नगर्दा एक लाखदेखि ५ लाखसम्म जरिवाना गर्न सकिने व्यवस्था पनि अन्यायपूर्ण भएको स्पष्ट पारेको छ । त्यस्तै, बीमा कम्पनीका सञ्चालकहरुको बैठक भत्ता र अन्य सुबिधा बीमा प्राधिकरणले निर्धारण गरेबमोजिम हुनेछ भन्ने व्यवस्थाको साटो कम्पनीको साधारण सभाले निर्धारण गर्न पाउनुपर्ने अवधारणा राखेको छ । स्वदेशमा कार्यरत बीमकले देशभित्र स्थापित पुनर्बिमकसंग प्राधिकरणले तोकेको प्रतिशतभन्दा कम नहुने गरी अनिवार्य रुपमा पुनर्बीमा गराउनु पर्ने व्यवस्था पनि संसोधन हुनुपर्ने उनीहरूकाे माग छ । नेपालमा ताेकेर यति प्रतिशत पुनर्बीमा गराउनै पर्ने व्यवस्था उचित नहुने उनीको ठहर छ । त्यस्तै त्रैमासिक वा बार्षिक वित्तिय विवरण सो अवधि समाप्त भएको मितिले ३० दिनभित्र पेश गर्नुपर्ने व्यवस्था पनि हटाउनुपर्ने बीमककाे माग छ । त्यस्तो विवरण पेश गर्ने समय कम्पनी ऐनले तोके बमोजिम हुनुपर्ने उनीहरूकाे तर्क छ । कुल बीमा शुल्कको ०.७५ प्रतिशत रकम नियमन शुल्क बुझाउनुपर्ने व्यवस्था संसोधन गरेर ०.५० प्रतिशत मात्रै कायम गर्नुपर्ने बीमककाे निष्कर्ष छ । प्राधिकरणले नियन्त्रणमा लिएको बीमकको व्यबस्थापनको प्रकृयालाई सहयोग पुग्ने गरी प्राधिकरण वा बिशेष व्यबस्थापन समूहको निर्णय कार्यान्वयन गर्ने सिलसिलामा सम्बन्धित बीमकका संचालक तथा पदाधिकारीले गरेको कुनै कार्यका बिरुद्धमा कुनै बीमित, शेयरधनी वा पदाधिकारीले गरेको कुनै कार्यका बिरुद्धमा कुनै बीमित, शेयरधनी वा साहुले कुनै किसिमको मुद्दा मामिला गर्न पाउने छैन भन्ने व्यवस्था खारेज हुनुपर्ने उसको माग छ । बीमा बिधेयकमा बीमा व्यवसाय गर्न रोक लगाएको १ बर्षसम्म पनि खुला गर्न नसक्ने कम्पनीको इजाजत खारेज गर्न सकिने प्रस्ताव गरिएको छ । त्यस्तो समय अवधि ३ बर्ष राख्नु उपयुक्त हुने बीमककाे सुझाव छ । बीमा समितिले स्वायत्तताका लागि शुरू गरेको लबिङमा भने बीमकले कुनै धारणा अघि सारेको देखिन्न ।
माछापुच्छ्रे बैंकको नाफा ३८ प्रतिशतले बढ्यो, ३ महिनामा ३८ करोड ६९ लाख
काठमाडौं । माछापुच्छ्रे बैंकले चालु आर्थिक बर्षको पहिलो त्रैमासमा नाफा झण्डै ३८ प्रतिशत बढाएको छ । बैंकले चालु आर्थिक वर्षको पहिलो ३ महिनामामा ३८ करोड ६९ लाख रुपैयाँ खुदनाफा गरेको छ । गत आवको सोही अवधिमा बैंकको नाफा २८ करोड रुपैयाँ थियो । गत आवको तुलनामा यो आवमा नाफा १० करोड रुपैयाँ बढेको बैंकले बिहीबार सार्वजनिक गरेको वित्तीय विवरणमा उल्लेख छ । ब्याज आम्दानी झण्डै ३ अर्ब रुपैयाँ बढाउँदा नाफामा उत्साहजनक प्रगति देखिएको छ । पहिलो त्रैमासमा बैंकले ८४ करोड २५ लाख रुपैयाँ ब्याज आम्दानी गरेको छ । अघिल्लो वर्षको सोही अवधिमा बैंकको आम्दानी ५६ करोड ९७ लाख रुपैयाँ थियो । समीक्षा अवधिमा बैंकको निष्क्रिय कर्जा ०.४७, निक्षेप लागत ७.९९, आधारदर ११.२१ प्रतिशत रहेको छ । कर्जा निक्षेप अनुपात (सीसीडी रेसियो) ७८.९२ प्रतिशत रहेको बैंकले जानकारी दिएको छ । बैंकको प्रतिसेयर आम्दानी बढेर १८ रुपैयाँ ४६ पैसा पुगेको छ । समीक्षा अवधिमा बैंकले ७७ अर्ब ९८ करोड रुपैयाँ निक्षेप परिचालन गरेको छ । गत आवको सोही अवधिमा ६० अर्ब ३० करोड रुपैयाँ थियो । कर्जा लगानी पनि विस्तार भएको छ । बैंकले ७१ अर्ब ८० करोड रुपैयाँ कर्जा लगानी गरेको छ । अघिल्लो वर्षको सोही अवधिमा ५४ अर्ब ९२ करोड रुपैयाँ लगानी गरेको थियो । नेपाल राष्ट्र बैंकले वाणिज्य बैंकहरुलाई अनिवार्य रुपमा नेपाल वित्तीय प्रतिवेदन मानक (एनएफआरएस) बमोजिम वित्तीय विवरण सार्वजनिक व्यवस्था गरेपछि वाणिज्य बैंकहरुको रिपोर्टहरु ढिलोगरी प्रकाशन हुन थालेका छन् । एनएफआएस प्रणालीअनुसार वित्तीय विवरण बनाउन तुलनात्मक रुपमा गाह्रो हुने र अझ प्रत्येक प्रदेशमा भएका वित्तीय गतिविधिहरुको समेत छुट्टाछुट्टै तथ्याङ्क देखाउनुपर्ने भएपछि बैंकहरुले विवरण सार्वजनिक गर्न ढिलाई गर्ने गरेका हुन् यस्तो अवस्थामा माछापुच्छे यो त्रैमासमै पहिलोपटक उक्त मानकअनुसारको वित्तीय विवरण सार्वजनिक गर्ने बैंक बनेको छ ।
