अमेरिका विद्यार्थी पठाउनेमा नेपाल १० औँ स्थानमा, ३ बर्षयता अमेरिका जाने नेपाली विद्यार्थी बढे
काठमाडौं। उच्च शिक्षा अध्ययनका लागि संयुक्त राज्य अमेरिका जाने नेपाली विद्यार्थीको सङ्ख्या यो वर्ष पनि बढेको एक अध्ययन प्रतिवेदनले देखाएको छ । अन्तर्राष्ट्रिय शैक्षिक आदानप्रदानसम्बन्धी ओपन डोर्स प्रतिवेदनले बितेका तीनवर्षयता अमेरिका पढ्न जाने नेपाली विद्यार्थीको सङ्ख्यामा १५.३ प्रतिशतले वृद्धि भएको जनाएको हो । “लगातार तीन वर्षदेखि अमेरिका अध्ययनार्थ जाने नेपाली विद्यार्थी बढेका छन् जुन अहिले १३ हजार २७० पुगेको छ । अमेरिका विद्यार्थी पठाउने पच्चीस देशमा रहेको नेपाल अहिले १० औँ स्थानमा उक्लिएको छ”, प्रतिवेदनमा भनिएको छ । प्रतिवेदन अनुसार अमेरिकामा उच्च शिक्षा अध्ययन गर्ने विदेशी विद्यार्थीको सङ्ख्या १० लाख नाघेको छ । रासस
मित्याल सामुदायिक सहकारीलाई जापानी कम्पनीले दियाे मिनी एक्साभेटर
काठमाडौं । कोबेल्को कन्सट्रक्सन मेसिनरी कम्पनी लिमिटेड जापान र कोबेल्को कन्सट्रक्सन इक्विप्मेन्ट इन्डिया प्रालिले दुईवटा जापानी कम्पनीहरु तोहोकु कुरोसावा केन्सेत्सु कम्पनी प्रालि र हासिमोतो केन्की कम्पनी लिमिटेडले मित्याल सामुदायिक विकास कृषि बहुउद्देश्यीय सहकारीलाई सहयोग स्वरुप उपलब्ध गराएको एसके३५एसआर-६ मोडलको एउटा कोबेल्को मिनी एक्साभेटर र एउटा हाइड्रोलिक रक ब्रेकर हस्तान्तरण गरेका छन् । ती कम्पनीहरुले नेपालमा परोपकारी कार्यका लागि ती उपकरणहरु निःशुल्क उपलब्ध गराएका हुन् । ताहोकु कुरोसावा केन्सेत्सु कम्पनीका सीईओ मासायुकी सातोले नेपालमा किन्डरगार्टन स्थापना र पानी आपूर्तिसम्बन्धी काम सहयोगको रुपमा गर्दै आएका छन् । नेपाली समाजलाई थप योगदानको उद्देश्यले सातो र उनको कम्पनीले एक थान कोबेल्को मिनी एक्साभेटर एसके३५एसआर–६ प्रदान गरेको हो । मिनी एक्साभेटरका अलाबा हासिमोतो केन्की कम्पनीले सोही एक्साभेटरमा लाग्ने एक थान हाइड्रोलिक रक ब्रेकर पनि निःशुल्क उपलब्ध गराएको छ । कोबेल्को कन्सट्रक्सन मेसिनरी कम्पनीले उक्त मेसिनको ढुवानी र भन्सारसम्बद्ध खर्च बेहोरेको जनाएको छ । उक्त मेसिनको बिक्रीपछिको सेवा पूजा कन्सट्रक्सनले उपलब्ध गराउँछ । यतिबेला नेपालमा सात सयभन्दा बढी कोबेल्को एक्साभेटर सञ्चालनमा छन्, जसलाई पूजा कन्सट्रक्सन नेपाल प्रालिले सहयोग गरेको छ ।
चिनियाँ राष्ट्रपति छिट्टै नेपाल भ्रमणमा आउछन्: राजन भट्टराई
काठमाडौं । चिनियाँ राष्ट्रपति सि जिङ पिङ नेपाल आउने प्रधानमन्त्रीका सल्लाहकार राजन भट्टराईले बताएका छन् । प्रधानमन्त्री केपी शर्मा ओली आगामी सन् २०१९ को जनवरी÷फेब्रुअरीतिर महत्वपूर्ण भ्रमणमा जाने आफूले सूचना पाएको पनि भट्टराईले जानकारी दिए । उनले भने,‘उहाँ महत्वपूर्ण अन्तर्राष्ट्रिय फोरममा सहभागी हुन विदेश भ्रमणमा जानुहुन्छ । त्यस्तै द्धिपक्षीय भ्रमणमा पनि जाने सूचना छ ।’ फरक प्रसँगमा उनले चिनियाँ राष्ट्रपतिको नेपाल भ्रमण नभएको लामो समय भएको सुनाए । भट्टराईले भने,‘हाम्रो तर्फबाट (प्रधानमन्त्री र राष्ट्रपति) दुवैको तर्फबाट चिनीयाँ राष्ट्रपति र उपराष्ट्रपतिलाई नेपाल भ्रमणको निम्तो गैसकेको छ । उहाँहरु आउनुहुन्छ भन्ने हाम्रो विश्वास छ, र आग्रहपनि छ ।’
नुवाकोटमा दीर्घकालीन फोहर व्यवस्थापन स्थल निर्माण, ल्याण्डफिलको काम सुरु गर्दै
काठमाडौँ । दीर्घकालीन फोहर व्यवस्थापन गर्ने स्थायी ल्याण्डफिल निर्माणको काम केन्द्र सरकारले अघि बढाइसकेको काठमाडौँ महानगरपालिकाले बताएको छ । विगत १३ वर्षदेखि काठमाडौँ उपत्यकाको फोहर व्यवस्थापन गर्दै आएको स्थान नुवाकोटको सिसडोल भरिएपछि दीर्घकालीन फोहर राख्ने स्थान निर्माण गर्न लागिएको हो । अहिले केन्द्र सरकारले निर्माण गर्न लागिएको दीर्घकालीन फोहर व्यवस्थापन गर्ने स्थान सिसडोलबाट दुई किलोमिटर पर बञ्चरेडाँडामा रहेको छ । उक्त केन्द्र निर्माणका लागि अहिले बाटो विस्तारको काम भइरहेको छ । काठमाडौँ उपत्यकाको १८ वटा स्थानीय तहको फोहर उक्त स्थानमा दैनिक एक हजार २०० मेट्रिक टन फोहर सिसडोलमा व्यवस्थापन हुँदै आएको छ । जसमा सबैभन्दा बढी कामपाबाट पाँच सय मेट्रिक टन फोहर लगिने गरिएको छ । हरेक दिन उपत्यकाबाट निजी र कामपाको गरी दुई सय गाडी फोहर लगिने गरिएको छ । वर्षाको समय आएपछि बाटो पहिराले पुर्ने र खाल्टो पर्ने हुँदा लामो समयसम्म पनि फोहर उपत्यकामा नै रहने गरेको छ । हाल महानगरमा फोहरमैला व्यवस्थापनमा एक हजार ६ जना कर्मचारीले काम गरिरहेका छन् । रासस
१० लाख रुपैंयाकोे रोटरी अवार्ड आइटी र इनोभेसन क्षेत्रलाई दिइने, मंसिर २८ गतेसम्म आवेदन दिन सकिने
काठमाडौं । यो वर्षको कमला राजभण्डारी रोटरी फर भोकेशनल एक्सीलेन्स अवार्ड आइटी र इनोभेसनको क्षेत्रलाई दिइने भएको छ । प्रत्येक २ वर्षमा दिदैं आएको १० लाख रुपैंयाको सो अवार्डको आवेदन फारम खुलेको हो । नेपालमा सबैभन्दा पहिले २०१० मा स्वास्थ्य क्षेत्रका डा. रामकण्ठ मकाजुलाई प्रदान गरेको थियो । अवार्डका लागि रोटरीले बिहिबारदेखि फारम खुलाएको हो । फारम मंसिर २८ गतेसम्म भर्न सकिनेछ । फारम आइटी र इनोभेसन क्षेत्रमा उल्लेख्य योगदान दिने देशभरका जो सुकै नेपाली नागरिकले भर्न सक्नेछन् ।
समावेशीतालाई मध्यनजर गर्दै राजधानीमा चारदिने राष्ट्र बहस २०७५को आयोजना हुँदै
काठमाडौँ । राजधानीको पुरानो बानेश्वरस्थित साइम कलेजमा राष्ट्र बहस २०७५ आयोजना हुने भएको छ । चार दिनसम्म चल्ने उक्त कार्यक्रम अवधिमा बेलायती संसदीय प्रणालीमा घनिभुत तालिम र बहसहरु हुने कार्यक्रम संयोजक पदम रेग्मीले बताएका छन् । नेपाली भाषामा तर्कसंगत बहस वैचाकिर वादविवादको लागि उचित मञ्च प्रदान गर्ने उद्देश्यका साथ विगत ४ वर्षदेखि निरन्तर रुपमा राष्ट्र बहस प्रतियोगिता सञ्चालन हुँदै आएको छ । प्रतियोगिताको मुख्य लक्ष्य समावेशिताको सिद्धान्त अनुरुप आफ्ना विचारहरु नेपाली भाषामा व्यक्त गर्न सकिने स्थानको निर्माण गर्नु हो । सो प्रतिक्रियामा अधिकतम टोली संख्या ४० हुने २ बहसकर्ताको प्रति टोली रहेको छ नियम रहेको छ । सहभागि समूहलाई कार्तिक ३० गते तालिम दिइनेछ भने मंसीर १ र २ गते समूह चरण छनोट गरिने छ भने मंसीर ३ गते नकआउट चरण हुनुका साथै मंसीर ३ गते नै प्रतियोगिताको फाइनल हुने समेत आयोजक संस्थाले बताएको छ । नेपाली समाजमा बहसको संस्कृतिलाई प्रोत्साहन गर्नको लागि स्तरिय बहसकर्ता, निणार्यक र प्रशिक्षकहरुको निर्माण गर्ने र लोकतान्त्रिक विचारधाराको एक मुल मान्यताको रुपमा रहेको वैचारिक स्वतन्त्रतालाई उत्सवको रुपमा मनाउन हातेमालो गर्ने अभिलाषा यो कार्यक्रमले बोकेको छ । बेलायती संसदीय प्रणाली अन्तर्गत प्रत्यक बहस एक घण्टा समयावधिको हुन्छ जसमा चार दुई सदस्यीय टोली हुन्छन्, जसलाई सरकार र प्रतिपक्ष गरि दुई भागमा बाँडिन्छन् र उनिहरुले दिइएको विषयमा क्रमशः पक्ष र प्रतिपक्षमा बहस गर्ने जानकारी दिएका छन् ।
सूर्योदय लघुवित्तले ४२ प्रतिशत बोनस पछि ५० प्रतिशत हकप्रद जारी गर्ने
काठमाडौं । सूर्योदय लघुवित्त वित्तीय संस्थाले ४२ प्रतिशत बोनस सेयर दिने भएको छ । साथै, बोनस सेयरमा लाग्ने कर प्रयोजनको लागि २.२५ प्रतिशतले हुन आउने १७ लाख एक हजार नगद लाभांश पारित गर्ने संस्थाले बताएको छ । उक्त प्रस्ताव कम्पनीको सञ्चालक समितिको बैठकले गरेको हो । बैठकको प्रस्तावलाई आगामी पुस ७ गते हुने संस्थाको वार्षिक साधारणसभाले पारित गर्ने भएको छ । हाल संस्थाको चुक्ता पुँजी ७ करोड ५३ लाख रुपैयाँ रहेको छ । ४२.७५ प्रतिशत बोनस पछि चुक्ता पुँजी १० करोड ७९ लाख रुपैयाँ कायम हुने छ । उक्त पुँजीमा संस्थाले ५० प्रतिशत हकप्रद सेयर जारी गर्ने प्रस्ताव गरेको छ । सो मात्राको हकप्रद जारी पश्चात संस्थाको चुक्ता पुँजी १६ करोड १८ लाख रुपैयाँ पुग्ने कम्पनीले जनाएको छ । संस्थाले अधिकृत पुँजी बढाएर २५ करोड रुपैयाँ पुर्याउने संस्थाले जनाएको छ । साथै, कम्पनीको जारी पुँजीको ५१ प्रतिशत संस्थापक सेयरधनीहरुको समूहको सेयर स्वामित्व र ४९ प्रतिशत साधारण सेयर सर्वसाधारण समूहको सेयर स्वामित्वमा हुने गरी पुँजी संरचना परिवर्तन गर्ने व्यवस्था रहेको छ । त्यस्तै, उक्त सभाले सञ्चालक समितिमा सर्वसाधारण सेयरधनीहरुको तर्फबाट २ जना सञ्चालकहरुको निर्वाचन गर्ने भएको छ ।
अन्तर्राष्ट्रीय भारतीय व्यापार मेलामा नेपाल सहित १९ राष्ट्रको सहभागिता
काठमाडौं। भारतको नयाँ दिल्लीमा बुधबारदेखि शुरू भएकाे “भारत अन्तर्राष्ट्रीय व्यापार मेला २०१८” मा नेपाल सहित विश्वका १९ राष्ट्रहरुको सहभागिता रहेको थियो । मेलामा विषेशगरी घरेलु सामान, विद्युतीय सामान, जुटजन्य कपडा, कस्मेटिक सामानहरु, इलेक्ट्रिक सामान स्वास्थ्य सम्बन्धि उपकरणहरु, हस्तकलाका सामग्री एवंम गरगहना, पश्मिनाका कपडाहरु आदी प्रदर्शनमा राखिएका छन् । भारतीय व्यापार प्रवर्धन संगठनले आयोजना गरेको उक्त मेलामा साझेदार देशको रुपमा अफगानिस्तान रहेको छ भने फोकस देशमा नेपाल रहेको छ । नोभेम्बर १४ देखि २७ सम्म संचालन हुने उक्त मेलामा भारतका केन्द्रिय वाणिज्य एवं उद्योग राज्य मन्त्री सि.आर चौधरी र केन्द्रिय संस्कृति राज्य मन्त्री महेश शर्माले संयुक्त रुपमा उद्घाटन गरेका थिए । नेपाल, चीन, हङ्कङ्, इरान, म्यानमार, नेदरल्याण्ड, दक्षिण अफ्रिका, दक्षिण कोरिया, थाईल्याण्ड, टर्की, ट्युनिसिया, भेयतनाम, संयुक्त अरब ईमिरेट्स, अफगानिस्तान लगायतका राष्ट्रहको स्टल अन्तराष्ट्रिय पेभिलियमको ९ र १० नं. को हलमा रहेको छ । नेपालबाट खासगरि काष्ठकला सामान, सोभिनियर खुकुरी, धातुबाट बनेका सामान, हस्तकलाका सामानहरु, पश्मिनाका कपडा एवं आर्टका सामान प्रदर्शन र विक्री वितरणमा राखिएको छ । भारतीय अन्तर्राष्ट्रिय ८ सयवटा स्टल रहेको उक्त मेलामा नेपालजस्तो विकासन्मुख राष्ट्रले आफ्नो देशमा उत्पादन भएका सामानहरु प्रदर्शन गर्दा निर्यात व्यापारमा फड्को मार्न सक्ने आशा रहेको छ । नेपाली वस्तु एवं सेवालाई अन्तर्राष्ट्रिय बजारमा पहिचान गराउने उद्देश्यले दिल्लीस्थित नेपाली दुतावासले नेपालबाट कलाकारहरु आमन्त्रण गरी मेलाको दोस्रो दिन आज सांस्कृतिक कार्यक्रम आयोजना गरेको छ ।
