१५ कम्पनीले एकैदिन साधारणसभा बाेलाए, १२ वटा वाणिज्य बैंक पछाडि
काठमाडौं । नेप्सेमा सूचिकृत अधिकांश कम्पनीहरु वार्षिक साधारणसभा गर्ने हतारोमा देखिएका छन् । कम्पनी कानुन अनुसार पुस मसान्तसम्ममा सबै कम्पनीले वार्षिक साधारणसभा (एजीएम) गर्नुपर्छ । पुस मसान्तसम्म साधारणसभा नगर्ने कम्पनीले पुँजीकाे अनुसार बढी कर तिर्नुपर्छ । पुस ९ गते मात्रै १५ वटा कम्पनीहरुले वार्षिक साधारणसभा डाकेका छन् । १५ कम्पनी मध्ये १० कम्पनीले आगामी पुस ३० गते वार्षिक साधारणसभा गर्दैछन् । अन्य पाँच कम्पनीले ३० गते अगाडि नै साधारणसभा बाेलाएका छन् । नेपाल दूरसञ्चार कम्पनीले पुस ३० गते आफ्नो ११औँ वार्षिक साधारणसभा टुँडिखेलस्थित त्रिभुवन आर्मी अफिसर्स क्लवमा गर्ने भएकाे छ । सभामा सेयरधनीलाई प्रतिसेयर ५५ रुपैयाँ नगद लाभांश वितरण गर्ने कम्पनीको प्रस्ताव छ । हिमालयन बैंकले पुस ३० गते माईतीघरको कार्की ब्याङ्क्वेटमा सभा राख्दैछ । बैंकले सेयरधनीलाई चुक्ता पुँजीको ५ प्रतिशत बोनस र १०.७८९५ प्रतिशत नगद लाभांश दिने प्रस्ताव सभामा पेस गर्दैछ । त्यस्तै, सिटिजन्स बैंक इन्टरनेसनलले पुस ३० गते लैनचौर स्थित लैनचौर व्याङ्क्वेटमा साधारणसभा बाेलाएकाे छ । सभामा बैंकले सेयरधनीलाई १.६ प्रतिशत नगद लाभांश र ३.६ प्रतिशत बोनस सेयर वितरण गर्ने प्रस्ताव लैजाँदै छ । नेपाल एसबिआई बैंकले पनि पुस ३० गते वार्षिक साधारणसभा बोलाएको छ । सभाले बैंकको ५ प्रतिशत बोनस र १०.७९ प्रतिशत नगद लाभांश प्रस्तावलाई पारित गर्दैछ । त्यस्तै, मेगा बैंकले पुस ३० गते नै आठौँ वार्षिक साधारणसभाको मिति तोकेको छ । बैंकले चुक्ता पुँजीको ६.८५ प्रतिशत नगद लाभांश र १.००२३३ प्रतिशत बोनस वितरण गर्ने प्रस्तावसहित साधारणसभाको मिति तय गरेको हो । बैंकको सभा सो दिन बिहान ११ बजे राष्ट्रिय सभागृह प्रदर्शनी मार्गमा बस्दै छ । त्यसैगरी, सांग्रिला डेभलपमेन्ट बैंकले पुस ३० गते कालिकास्थानस्थित अमृतभोगमा आफ्नो १४औँ वार्षिक साधारणसभा बाेलाएकाे छ । बैंक सेयरधनीलाई ४ प्रतिशत बोनस र कर प्रयोजनसहित ५.४५ प्रतिशत नगद लाभांश वितरण गर्ने प्रस्तावलाई पारित गर्दै छ । १ प्रतिशत बोनस र कर प्रयोजनको लागि ६.४२ प्रतिशत लाभांश पारित गर्ने एजेण्डा सहित नेपाल कम्यूनिटी डेभलपमेन्ट बैंकले पनि पुस ३० गते साधारणसभा डाकेको छ । बैंककाे एजीएम बिहान ९ बजे रुपन्देहीको मणिग्रस्थित ड्रिमल्याण्ड गोल्ड रिसोर्टमा बस्दै छ । कर्जा सूचना केन्द्र लिमिटेडले ५० प्रतिशत बोनस र २५ प्रतिशत नगद लाभांश वितरण गर्ने प्रस्तावलाई पारित गर्न आगामी पुस ३० गते चौथौँ वार्षिक साधारणसभा डाकेको छ । कम्पनीको आगामी एजीएम सो दिन बिहान ११ बजे दरवारमार्ग स्थित होटल अन्नपूर्णमा बस्दै छ । हाइड्रो इलेक्ट्रीसिटी इन्भेष्टमेन्ट एण्ड डेभलपमेन्ट कम्पनीले आगामी पुस ३० गते साधारणसभा गर्ने निर्णय गरेको छ । उक्त सभा सो दिन बिहान ११ बजे कमलादी स्थित नेपाल प्रज्ञा प्रतिष्ठानको प्रेक्षालयमा बस्दै छ । सभामा कम्पनीले सेयरधनीलाई चुक्ता पुँजीको ३० प्रतिशत बोनस सेयर र कर प्रयोजनको लागि २ करोड १० लाख ५२ हजार ६३१ रुपैयाँ बराबर नगद लाभांश पारित गर्ने प्रस्ताव लैजाँदै छ । साथै, कम्पनीले चुक्ता पुँजी वृद्धि गर्न १०० प्रतिशत हकप्रद सेयर जारी गर्ने प्रस्ताव राखेको छ । त्यसैगरी, नयाँ नेपाल लघुवित्तले दशौँ बार्षिक साधारणसभा पुस ३० गते धुलिखेल ट्रेनिङ सेन्टरमा गर्दैछ । पिपुल्स इन्भेष्टमेन्ट कम्पनीले पुस २९ गते अल्फा हाउस ब्याङ्क्वेटमा साधारणासभा राखेकाे छ । त्यस्तै, जनता बैंक लिमिटेडले पनि आगामी पुस २९ गते नवौँ वार्षिक साधारणसभा डाकेको छ । उक्त सभा बत्तिसपुतलीस्थित अनुपम फुडल्याण्ड एण्ड ब्याङ्केटमा बिहान ११ बजे बस्ने भएको छ ।नेपाल सेवा लघुवित्त वित्तीय संस्थाको पुस २८ गते वार्षिक साधारणसभा बस्दै छ । त्यस्तै, नेपाल बङ्गलादेश बैंकको २४औँ एजीएम आगामी पुस २६ गते बिहान १० बजे राष्ट्रिय सभागृह प्रदर्शनी मार्गमा बस्दै छ । सभाले चुक्ता पुँजीको १०.५३ प्रतिशत नगद लाभांश वितरण गर्ने सामान्य प्रस्तावलाई पारित गर्ने छ । २७ वटा वाणिज्य बैंक मध्ये एनआईसी एशिया बैंक र सानिमा बैंक लिमिटेडले वार्षिक साधारणसभा सम्पन्न गरिसकेका छन् । एनआईसी एशियाले गत पुस ४ गते र सानिमा बैंकले गत मंसिर २७ गते वार्षिक साधारणसभा सम्पन्न गरेका हुन् । अन्य ७ वटा वाणिज्य बैंकहरूले माग ७ सम्म साधारणासभा गर्नेगरी बाेलाएका छन् । १२ वटा बैंक भने साधारणसभा गर्न पछाडि परेका छन् ।
डलरको मूल्य बढ्दा रेमिट्यान्समा उच्च सुधार, बढ्दो आयातले शोधनान्तर स्थिति घाटामा
काठमाडौं । अमेरिकी डलरको मूल्य र सोसँगै बढेको अन्य देशका मुद्राको मूल्यको प्रभावले चालु आर्थिक वर्षको पहिलो चौमासमा नेपालको विप्रेषण आप्रवाहमा उत्साहजनक सुधार देखिएको छ । समीक्षा अवधिमा रेमिट्यान्स आप्रवाह ३६.४ प्रतिशत वृद्धि भई ३१२ अर्ब ३६ करोड पुगेको नेपाल राष्ट्र बैंकले सार्वजनिक गरेको रिपोर्टमा उल्लेख गरिएको छ । अघिल्लो आर्थिक वर्षको सोही समयमा कुल रेमिट्यान्स १.४ प्रतिशतले घटेको थियो । रेमिट्यान्ससँगै चालु आर्थिक वर्षको समीक्षा अवधिमा विदेश जाने नेपालीहरुको संख्यामा उच्च बढोत्तरी भई १ लाख २४ हपार ५ सय १८ जना पुगेको घ । अघिल्लो वर्ष यो संख्या १ लाख भन्दा कममा सीमित थियो । रेमिट्यान्स बढे पनि उक्त अवधिमा शोधनान्तर घाटामा उच्च वृद्धि देखिएको छ । चालु खातामा भएको उच्च वृद्धिका कारण यस्तो अवस्था देखिएको हो । उक्त अवधिमा देशको चालु खाता घाटा ८८ अर्ब ६४ करोड हुँदा कुल शोधनान्तर घाटा ५७ अर्ब ३३ करोड रहेको छ अघिल्लो वर्ष देशको शोधनान्तर स्थिति बचतमा थियो । समीक्षा अवधिमा पुँजीगत ट्रान्सफर ४ अर्ब २२ करोड र प्रत्यक्ष वैदेशिक लगानी ४ अर्ब ९६ करोड हुँदा देशको लगानी खाता भने बचतमा रहेको देखिन्छ । सो अवधिमा देशको कुल विदेशी मुद्रा विनिमय सिञ्चितिमा समेत १.८ प्रतिशतले ह्रास आई १०८२ अर्ब ९१ करोड कायम भएको छ । खाद्य र पेय पदार्थ सस्तियो समीक्षा अवधिमा देशको मुद्रास्फीति ४.२ प्रतिशत रहँदा खाद्य तथा पेय पदार्थको मूल्य घटेको राष्ट्र बैंकको रिपोर्टमा उल्लेख गरिएको छ जसअनुसार दाल तथा गेडागुडीमा १४ प्रतिशत, चिनी र चिनीजन्य पदार्थमा ७.६ प्रतिशत र तरकारीमा ८.७ प्रतिशत मूल्य घटेको देखाइएको छ भने यातायात, फर्निसिङ र घरयासी वस्तुहरुमा ८.४ प्रतिशत, ६.१ प्रतिशत र ८.७ प्रतिशत वृद्धि भएको देखाइएको छ ।
एनआई सी एशिया बैंकको नयाँ शाखा सुनसरीको इटहरीमा
काठमाडौं । एनआईसी एशिया बैंकको नयाँ शाखा कार्यालय इटहरी उद्घाटन भएको छ । इटहरी उप–महानगरपालिका वडा नं ५, सुनसरी स्थित पचरुखी शाखाको एनआईसी एशिया बैंकका प्रमुख बजार व्यवस्थापन अधिकृतसन्तोष कुमार राठीले उद्घाटन गरेका थिए । मुलुकभर २७० शाखा कार्यालयहरु, २८७ एटिएम, ३७ वटा एक्सटेन्सन काउण्टर एवं २० वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गर्दै आएको छ । बैंकको वासलातको आकार रू. २११ अर्ब भन्दा बढि पुगेको छ भने कुल निक्षेप करिब रू. १६९ अर्ब तथा कर्जा रू. १४५ अर्ब रहेको छ । नेपालको हाल सम्म यस बैंकमा ग्राहकको संख्या करिब १४ लाख रहेको छ ।
मुक्तिनाथ विकास बैंक र नेपाल क्यान्सर अस्पतालबीच सेवा सम्बन्धी सहकार्य
काठमाडौं । मुक्तिनाथ विकास बैंक र नेपाल क्यान्सर अस्पताल बीच बैंकका ग्राहकहरुलाई अस्पतालले छुट दिने भएको छ । तोकिएका शुल्कमा विशेष छुट दिने सम्बन्धी मुक्तिनाथ विकास बैंकको तर्फबाट प्रमुख कार्यकारी अधिकृत प्रद्युमन पोखरेल र नेपाल क्यान्सर अस्पतालको तर्फबाट कार्यकारी अध्यक्ष सुदिप श्रेष्ठले सम्झौतापत्रमा हस्ताक्षर गरेका छन् । यस सम्झौता पश्चात मुक्तिनाथ विकास बैंकका भिसा डेबिट कार्ड वाहक ग्राहकहरूले नेपाल क्यान्सर अस्पताल हरिसिद्विमा उपचार गराउँदा विभिन्न तोकिएका सेवाहरुमा १० प्रतिशतसम्म छुट पाउने व्यवस्था रहेको छ ।
गत बर्षकाे तुलनामा चितवन राष्ट्रिय निकुञ्ज आउने पर्यटकमा बृद्धि
काठमाडौं । चितवन राष्ट्रिय निकुञ्ज घुम्न आउने पर्यटकको सङ्ख्या गतवर्षको पाँच महीनाको तुलनामा यस वर्षको सोही अवधिमा बढेको हो । निकुञ्जका सूचना अधिकारी गोपाल घिमिरेका अनुसार चालु आर्थिक वर्षको पाँच महीनामा ७१ हजार ७२० पर्यटक निकुञ्ज प्रवेश गरेका छन् । गत आर्थिक वर्ष २०७४ /७५ को सोही अवधिमा ५३ हजार ८५ जना मात्रै पर्यटक निकुञ्ज प्रवेश गरेका थिए । घिमिरेका अनुसार चालु आर्थिक वर्षको साउनमा ८ हजार ३९४, भदौमा सात हजार ३६३, असोजमा १२ हजार ७९६, कात्तिकमा २६ हजार १६४ र मङ्सिरमा १७ हजार ९७ पर्यटक निकुञ्ज प्रवेश गरेका छन् । यीमध्ये विदेशी ५० हजार ७६४, सार्क मुलुकका सात हजार ३८७ र नेपाली १३ हजार ६५९ जना रहेका छन् । गत आर्थिक वर्षको साउनमा ६ हजार ५२२, भदौमा तीन हजार ८५९, असोजमा ११ हजार ९६९, कात्तिकमा १८ हजार १७१ र मङ्सिरमा १२ हजार ५६४ जना पर्यटक निकुञ्ज प्रवेश गरेका थिए । तीमध्ये विदेशी ४० हजार ५३, सार्क मुलुकका चार हजार ४९६ र नेपाली आठ हजार ५३६ रहेका थिए । सबैभन्दा बढी आर्थिक वर्ष २०७१/७२ मा १ एक लाख ८४ हजार पर्यटकले निकुञ्ज घुमेका थिए । सोही आर्थिक वर्षको वैशाखमा भूकम्प गएपछि, नाकाबन्दी, नारायणगढ–मुग्लिन सडक समस्या लगायतका कारण पर्यटकको सङ्ख्या लगातार घट्दै गएको थियो । गत आर्थिक वर्षमा २०७४/७५ मा एक लाख ५२ हजार ६७१ पर्यटकले निकुञ्ज घुमेका थिए । आव २०७३र७४ मा एक लाख ३९ हजार ९७८ र २०७२/७३ मा ८७ हजार ३९१ पर्यटकले निकुञ्ज घुमेका थिए । यो तथ्याङ्कलाई हेर्दा गत वर्षभन्दा यसवर्ष पर्यटकको सङ्ख्यामा उल्लेख्य वृद्धि भएको छ । यस वर्षको पर्यटक आशालाग्दो देखिएको निकुञ्जका प्रमुख संरक्षण अधिकृत वेदकुमार ढकालले बताएका छन् । निकुञ्जको सौराहा, घटगाई, कसरा पुलगेट र देवनगर, वनकट्टा, लौखानी, अमलटारी, कुजौली क्षेत्रबाट पर्यटक मध्यवर्ती क्षेत्र र निकुञ्ज प्रवेश गर्ने गर्दछन् । अङ्ग्रेजी नयाँ वर्षलाई बुकिङ राम्रो क्षेत्रीय होटल सङ्घ चितवनका अध्यक्ष सुमन घिमिरे विगतका वर्षको तुलनामा यसवर्ष पर्यटक आगमन राम्रो रहेको बताएका छन् । अङ्ग्रेजी नयाँ वर्षको आसपासको समयका लागि ९० प्रतिशतभन्दा बढी होटल बुक भइसकेका छन् । उक्त समयमा होटल शतप्रतिशत भरिभराउ हुने घिमिरेको भनाई रहेको छ । पुस ११ गतेदेखि सौराहामा हात्ती महोत्सव हुनेभएकाले उक्त समयमा पनि पर्यटक आगमन निकै राम्रो हुने अपेक्षा गरिएको बताउँदै जनवरी पर्यटकीय हिसाबले त्यति राम्रो नभए पनि त्यसपछि पर्यटक आगमन क्रमशः बढ्दै जाने अपेक्षा गरिएको जानकारी दिएका छन् । विगतमा भारतीय नाकाबन्दी, भूकम्पका कारण सुस्ताएको पर्यटन व्यवसायमा नारायणगढ–मुग्लिन सडकखण्ड स्तरोन्नति कार्यले सडक यातायात असहज हुँदा पर्यटक आगमन निराशाजनक रहेको थियो तर अवरोध सबै हटेसँगै पर्यटक आगमनमा राम्रो सुधार हुने अपेक्षा व्यवसायीको रहेको छ । घिमिरेले हालसम्म सबैभन्दा बढी आर्थिक वर्ष २०७१/७२ मा चितवन पर्यटक आएकोमा त्योभन्दा बढी पर्यटक यसवर्ष भित्रिने अपेक्षा गरिएको बताउँछन् । अहिलेसम्मको तथ्याङ्क सकारात्मक रहेको भन्दै पर्यटकीय वातावरण नबिग्रिएमा यस आर्थिक वर्ष पर्यटन क्षेत्रका लागि उपलब्धी पूर्ण हुने भनाई व्यक्त गरेका छन् । चितवन आउने पर्यटक सौराहा, जगतपुर, पटिहानी, मेघौलीमा बस्ने गर्दछन् । रासस
साेमबारकाे बजारमा उतारचढाव, नेप्से ६ अंकले घट्दा चार कम्पनीको सेयर मूल्य ९ प्रतिशत बढीले वृद्धि
काठमाडौं । सोमबारको सेयर बजारमा उतारचढाव देखिएको छ । बजार खुलेलगत्तै बढेर १२०७ अंकमा पुगेको नेप्से करिब एक घण्टामा घटेर ११९२ अंकमा झरेको थियो । त्यसपछि पुनः बढेर १२०० अंकमा पुगेको परिसूचक एक बजे घटेर ११९२ अंकमा नै झरेको थियो । पछि पुनः सुस्त गतिले बढेर ११९९ अंकमा पुगेको परिसूचक अन्तत बजार बन्द हुँदा ११९१ अंकमा झरेको छ । समग्रमा सोमबारको नेप्से परिसूचक अघिल्लो दिनको तुलनामा ०.५४ प्रतिशतले घटेर ११९१.७४ अंकमा अडिएको छ । तीब्र उतारचढाव देखिएको सोमबारको बजारमा कारोबार रकममा पनि गिरावट देखिएको छ । अघिल्लो दिन ८७ करोडको कारोबार भएको बजारमा सोमबार जम्मा ७९ करोड ८७ लाख रुपैयाँ बराबरको सेयर किनबेच भएको छ । जुन आइतबारको तुलनामा ८ करोड रुपैयाँ घटी हो । बजारमा कुल १६८ कम्पनीको सेयर कारोबार भएको छ । सो मध्ये एनएमबी बैंक लिमिटेडको ९ करोड ९५ लाख रुपैयाँ बढीको सेयर किनबेच भएको छ । त्यस्तै, प्राइम कमर्सियल बैंकको पनि ८ करोड २६ लाख रुपैयाँ बराबरको प्रमोटर सेयर किनबेच भएको छ । उतारचढाव देखिएको बजारमा पनि विभिन्न ४ कम्पनीको सेयर मूल्य ९ प्रतिशत बढीले वृद्धि भएको छ । सो मध्ये हाथवे फाइनान्स कम्पनी र ग्लोबल आईएमई लघुवित्त वित्तीय संस्थाको सेयर मूल्य १० प्रतिशतले बढेको छ । त्यसैगरी, सिभिल लघुवित्त वित्तीय संस्था र जलविद्युत लगानी तथा विकास बैंकका लगानीकर्ताले क्रमशः ९.९५ प्रतिशत र ९.८७ प्रतिशत कमाएका छन् । सो दिन सबैभन्दा बढी विशाल बजार कम्पनीको सेयर मूल्य प्रतिकित्ता ७.६७ प्रतिशतले घटेको छ । त्यस्तै, मल्टीप्रपोज फाइनान्स कम्पनीको सेयर मूल्य ७.०४ प्रतिशतले घटेको छ । बजारमा कारोबारमा आएका ११ समूह मध्ये अधिकांश समूहको सूचक राताम्मे भएका छन् । विभिन्न ७ समूहको सूचक राताम्मे भएका छन् भने बाँकी ४ समूहको सूचक हरिया देखिएका छन् । जीवन बीमा, फाइनान्स, उत्पादनमूलक र अन्य समूह उकालो लागेका छन् । सो दिन होटल समूह ३२, निर्जीवन बीमा २० र बैंकिङ् समूह १० अंकले घटेका छन् । बाँकी समूह भने एकल अंकले घटेका छन् ।
बिजुली जस्ले उत्पादन गरेपनि भारतले खरिद गर्ने निर्णय गर्नु नेपालको जीतः उर्जामन्त्री पुन
काठमाण्डौ । उर्जा, जलश्रोत तथा सिचाई मन्त्री वर्षमान पुनले भारत सरकारले नेपालको बिजुली जस्ले उत्पादन गरेपनि खरिद गर्ने निर्णय गर्नु नेपालको जीत भएको बताएका छन् । आज आयोजित पत्रकार सम्मेलनमा उर्जा मन्त्री पुनले यस्तो कुरा बताएका हुन् । पत्रकार सम्मेलनमा उनले भने– प्रधानमन्त्री केपी ओलीको भारत भ्रमणका बेला मन्त्रीस्तरीय र सचिवस्तरीय भेटमा यस विषयमा कुरा गरेका थियौँ । अब नेपालमा उत्पादित बिजुली बंगलादेशले पनि किन्न सक्छ–मन्त्री पुनले भने । यसअघि भारतीयको ५० प्रतिशत लगानी भएका आयोजनाको बिजुली मात्र किन्ने भारत सरकारले नियम थियो । भारतले बिजुलीलाई रणनीतिक वस्तुबाट हटाएर व्यापारिक वस्तुमा राखेको छ–मन्त्री पुनले पत्रकार सम्मेलनमा बताए । बंगलादेशले २० बर्षमा ९ हजार मेगावाट बिजुली किन्ने भनेको छ, आफ्नै प्रशारणलाइन मार्फत भारत हुँदै बिमस्टेकमा संलग्न राष्ट्रहरुलाई समेत बिजुली बेच्न सक्छौं–मन्त्री पुनले बताए । बिजुली भारत कै प्रशारण लाइनबाटपनि बेच्न सकिने मन्त्री पुनले बताए । १० वर्षमा १५ हजार मेगावाट बिजुली किन्ने ग्यारेन्टी सरकारले गरेको छ । टेक अर पे को निर्णय गरिएको हुँदा अब उत्पादित बिजुली सरकारले नै किन्छ–मन्त्री पुनले भने । रन अफ द रिभरमा ५५००, जलाशययसक्तमा ५५०० र अर्ध जलाशययुक्त पानीको उपयोग गरी उत्पादन भएको बिजुली किन्ने सुनिश्चितता गरिएको उनले बताए । सके देश मै बेच्छौं, नसके क्षेत्रीय बजारमा पुर्याउँछौ । पत्रकार सम्मेलनमा मन्त्री पुनले इनर्जी बैंकिङको आकार बढाउने स्पष्ट पारे । अर्को प्रशंगमा मन्त्री पुनले सिक्टा सिचाई आयोजना क्षेत्रको माटो परीक्षण गरिइएको बताए । यस कार्यमा अस्टे«लिया र पुल्चोक इञ्जिनियरिङ क्याम्पसका प्राविधिकले माटो परीक्षण गरेको र यस बारेमा अब प्रधामन्त्रीलाई ब्रिफिङ गरिने उनले बताए ।
खाडी मुलुकमा रहेका घरेलु कामदारको संख्या पत्ता लगाउन समितिको निर्देशन, श्रममन्त्री विष्ट र साँसदबीच किन भयो चर्काचर्की ?
काठमाण्डौ । प्रतिनिधि सभा अन्तगरतको उद्योग, बाणिज्य तथा श्रम समितिले विदेशमा रहेका कानूनी र गैर कानूनी घरेलु कामदारको संख्या पत्ता लगाउन निर्देशन दिएको छ । समितिको आज बसेको बैठकमा सभापति बिमल श्रीवास्तवले सरकारलाई यस्तो निर्देशन दिएका हुन् । बैकमा श्रम, रोजगार तथा समाजिक सुरक्षामन्त्री गोकर्ण विष्ट सहभागी रहेका थिए । बैठकमा समितिका सदस्य सांसदहरुले खाडी मुलुकबाट छुट्टीमा आएका घरेलु महिला कामदारहरुलाई फर्कन दिनु पर्ने कुरा उठाएका थिए । तर, मन्त्री विष्टले खाडी मुलुकमा घरेलु कामदार रोकिएको अवस्थामा छुट्टीमा आएको भएपनि जान दिन नसकिने बताएका थिए । मन्त्रीले कुनैपनि हालतमा खाडी मुलुकमा घरेलु महिला कामदारलाई जान नदिने अडान राखेपछि मन्त्री विष्ट र सांसदहरुबीच चर्काचर्की भएको थियो । खाडी मुलुकमा रहेका एक हजार घरेलु महिला कामदार छुट्टीमा नेपाल आएका र अहिले उनीहरु फर्कन पाएका छैनन् । समितिको बैठकमा नेपाल आएकालाई जान दिनु पर्यो, एक पटकलाई खोल्नु पर्यो भनी सांसदहरुले कुरा राखेका थिए । २०७३ सालपछि खाडीमा घरेलु कामदारका रुपमा जान रोकिएको छ । समितिका सभापति श्रीवास्तवले त्यसका लागि खाडी मुलुकमा स्थलगत अध्ययनमा जान निर्देशन दिए । गलत बाटोबाट गएकाहरुलाई फेरि जान दिनु हुन्न भने । जे जसरी गएका भएपनि अलपत्र परेकाहरुलाई भने ल्याउनु पर्ने दायित्व सरकारको हो–सभापति श्रीवास्तवले भने ।
