चितवनमा ७ औं नेपाल फर्मा तथा हेल्थ एक्स्पो हुँदै
काठमाडौं । फागुन १७ गते देखि चितवनमा मरणेपरान्त अंगदानको लागि सामाजिक अभियानसहित ७ औं नेपाल फर्मा र हेल्थ एक्स्पो २०१९ शुरु हुने भएको छ । नेपालको औषधी उत्पादनलाई ध्यानमा राखि एक्स्पोमा २ सय वटा स्टल राख्ने आयोजकको भनाई रहेको छ । उक्त एक्स्पोमा कम्तिमा १ हजारले अंगदान गर्ने अनुमान आयोजक समितिको रहेको छ । चितवनमा हुने उक्त एक्स्पोमा करिब साढे १ करोड खर्च हुने जानकारी दिएका छन् । नेपाल औषधी उत्पादन संघका अध्यक्ष दिपकप्रसाद दाहालले आधारभुत संरक्षण दिने भए ७० प्रतिशत औषधीको उत्पादन गर्न सक्ने बताएका छन् । हाल नेपालमा करिब २० अर्ब औषधी उत्पादन भएपनि २५ अर्बको बाहिरी आयात हुँदै आएको हुँदा नेपाली बजार आयातमूखी बजारको कारण नेपाली बजार अन्योलमा रहेको अध्यक्ष दाहालको भनाई रहेको छ । एक्स्पोमा १० वटा निजि क्षेत्रका अस्पताल, ३०वटा बहुराष्ट्रिय कम्पनी, १ सय २० भारतीय कम्पनी र १० चिनीयाँ कम्पनीको सहभागिता रहने भएको छ । काठमाडौं बाहिर पहिलोपटक हुने उक्त एक्स्पोमा ५० हजार अवलोकनकर्ताहरुले भ्रमण गर्ने अनुमान संघको रहेको छ ।
ओम डेभलपमेन्ट बैंक र पोखरा विश्वविद्यालयबीच सम्झौता
काठमाडाैं । ओम डेभलपमेन्ट बैंक लि. र पोखरा विश्वविद्यालय स्कुल अफ विजनेशबीच सहयोग गर्ने गराउने सम्झौता भएको छ । बैंकको तर्फबाट प्रमुख कार्यकारी अधिकृत विश्वमोहन अधिकारी र पोखरा विश्वविद्यालय स्कुल अफ विजनेशका तर्फकाट डा. रबिन्द्र घिमिरेले सम्झौतापत्रमा हस्ताक्षर गरेका थिए । मानव संसाधन लगायत विद्यार्थीहरुलाई अध्ययन अनुसन्धानमा आवश्यक पर्ने वित्तीय लगायत विविध विषयहरुमा सहयोग गर्ने गराउने सम्झौतापत्रमा हस्ताक्षर भएको छ । उक्त सम्झौता पत्रमा ओम डेभलपमेन्ट बैंकलाई आवश्यक पर्ने जनशक्ति व्यवस्थापनमा पोखरा विश्वबिधालयमा स्तातक तथा स्नातकोत्तर तहमा अध्ययनरत विद्यार्थीहरुलाई प्रात्साहित गर्ने, बैंकद्धारा सञ्चालन गरिने बित्तीय साक्षरता कार्यक्रममा गराउने तथा बैंकद्धारा प्रबाह गरिने सेवा सुविधाका बारेमा बैंकका प्रमुख कार्यकारी अधिकृत विश्वमोहन अधिकारीले जानकारी दिएका छन् ।
डलर सटही सुविधामा ६० प्रतिशतले कटाैती, विदेश जाने कामदारलाई अब २०० डलर मात्र
काठमाडौं । नेपाल राष्ट्र बैंकले डलर सटहीमा कडाई गर्दै पहिले ब्यवस्था भएकाे भन्दा ६० प्रतिशत कममात्र डलर साट्न पाउने ब्यवस्था गरेकाे छ । इ.प्रा. परिपत्र ७/२०७४ लार्इ संशाेधन गर्दै राष्ट्र बैंकले मंगलबार त्यस्ताे व्यवस्था गरेपछि नेपाल सरकारसँग सम्बन्धित निकायबाट श्रम स्वीकृति प्राप्त गरी विदेश जाने नागरिकले २०० डलरसम्म मात्रै साट्न पाउने भएका हुन् । बैंकले मंगलबार सम्बन्धित बैंक तथा वित्तीय संस्थाहरुलाई परिपत्र गर्दै त्यस्तो व्यवस्था गर्न निर्देशन दिएको हो । यसअघि काम गर्न विदेश जानेले ५०० डलरसम्म सटही गर्ने सुविधा थियो । अत्यधिक व्यापार घाटाका कारण भुक्तानी प्रणालीमा असन्तुलन आएर बैदेशिक मुद्राको सञ्चय घट्दै गएपछि राष्ट्र बैंकले सटहीमा कडाई गरिदिएको हो । नेपाल राष्ट्र बैंकका कार्यकारी निर्देशक भिष्मराज ढुङ्गानाले श्रम स्वीकृति लिएर विदेश जाने कामदारलाई डलर सटहीको खासै आवश्यकता नपर्ने र परे पनि १/२ सय डलर भए पनि पुग्ने अवस्थामा बाँकी डलर यतै बेच्ने गरेको पाइएपछि त्यस्तो ब्यवस्था गरेको बताए । ‘ढुकुटीमा पर्याप्त डलर हुँदा हामी उदार भएका थियौं तर अहिले डलर सिञ्चितिमा कमी आउन थालेसँगै कडाई गरेका हौं,’ कार्यकारी निर्देशक ढुङ्गानाले भने ।
स्वदेशी उत्पादनलाई प्राथामिकता दिनु पर्छ: मुख्यमन्त्री पौडेल
चितवन । ३ नम्बर प्रदेशका मुख्यमन्त्री डोरमणि पौडेलले स्वदेशी सामाग्रीहरुलाई प्राथामिकता दिनुपर्ने बताएका छन् । चितवनमा खिचरा महोत्सबको समापन गर्दै मुख्यमन्त्री पौडेलले बाहिरबाट नभई स्थानीय उत्पादनलाई प्राथमिकता दिए मुलुक आत्मनिर्भरता तर्फ जाने बताए । महोत्सवका क्रियाकलाप देशको आर्थिक समृद्धिसंग जोडिनुपर्ने उनको भनाई थियो । मेलाका आर्थिक क्रियाकलापले आर्थिक कारोबार समृद्धिको आधार बनाउन समेत उनले आग्रह गरे । यस्ता महोत्सवले कृषि क्षेत्रलाई प्राथमिकता दिनु पर्ने समेत बताए । उनले भने–‘ केहि बर्ष अगाडि हामी खाद्यान्न बाहिर पठाउँथ्यौं अब हामीले बाहिरबाट ल्याउनु पर्ने भईसकेको छ, अब हामी आत्मनिर्भर बन्नुपर्छ ।’ चितवन पर्यटन, धार्मिक, स्वास्थ तथा कृषिमा समेत उत्कृष्ट भएकोले यसमा नै धेरै सम्भावना खोज्नुपर्ने धारणा राखे । यो महोत्सवले थारु समुदायको सस्कृती झल्काउने देखिएकोले सस्कृति बचाउन सहयोग गर्ने बताए । थारु सस्कृति जोगाउन पूर्बी र पश्चिम क्षेत्रमा थारु संग्रहालय बनाउन प्रदेश सरकारले सहयोग गर्ने समेत जानकारी दिए । कार्यक्रममा मुख्यमन्त्री पौडेलका प्रमुख राजनीतिक सल्लाहकार जेएन थपलियाको समेत सहभागिता रहेको थियो ।
२४ लाख ४६ हजार आर्थिक चलखेल गर्ने लेखापाल शिवहरी ढकाल बिरुद्ध मुद्दा दायर
काठमाडौं । न्याय परिषद सचिवालयका तत्कालीन लेखापाल शिवहरि ढकाल विरुद्ध मुद्दा दायर भएको छ । आर्थिक अनियमितता गरेको भन्दै अख्तियार दुरुपयो अनुसन्धान आयोगले ढकाल बिरुद्ध मुद्दा दायर गरेको हो । ढकालमाथी परिषदमा रहँदा तलबी भरपाईको जोडजम्मामा फरक पारी खर्च लेखेको अरोप लागेको छ । आर्थिक वर्ष २०७२ ०७३ को लेखापरीक्षण हुँदा लेखापरीक्षण प्रतिवेदनमा १६ लाख ४७ हजार राजस्व दाखिला भएको महालेखापरीक्षकको प्रतिवेदन प्राप्त भएको भन्ने उजुरी सम्बन्धमा अनुसन्धान हुँदा २४ लाख ४६ हजार रुपैंया रकम निकासा गरेका थिए । आयोगले ढकालसँग २४ ला ४६ हजार रुपैंया नै माग दाबी गरेको छ । ढकाल हाल खनियावास गाँउपालिकाको कार्यालय, दार्खा, धादिङ्गमा कार्यरत रहेका छन् । उनी बिरुद्ध भ्रष्टाचार निवारण ऐन, २०५९ को दफा १७ बमोजिम विशेष अदालत काठमाडौंमा मुद्दा दायर भएको छ ।
लार्चाको सुख्खा बन्दरगाहको काम ९० प्रतिशत सकियो, वैशाखदेखि सञ्चालन
चौतारा । सिन्धुपाल्चोक भोटेकोशी गाउँपालिकाअन्तर्गत तातोपानीको दश किलोस्थित लार्चामा निर्माण भइरहेको सुख्खा बन्दरगाहको काम ९० प्रतिशत सम्पन्न भइसकेको छ । चीन सरकारको आर्थिक सहयोगमा चिनियाँ रेल्वे कन्स्ट्रक्सन कम्पनी सिआरसिसी फोर्टीन ब्यूरोद्वारा निर्माण भइरहेको बन्दरगाह आगामी २०७६ वैशाख तेस्रो साता अर्थात सन् २०१९ मे १ मा चीन सरकारद्वारा नेपाललाई हस्तान्तरण गरिने कार्यक्रम रहेको इन्टर मोडेल यातायात विकास समितिका निर्देशक लक्ष्मणबहादुर बस्नेतले जानकारी दिए । सुख्खा बन्दरगाहको सम्पूर्ण भवन निर्माण कार्य, जमीन ढलान, रंगरोगन लगायतका काम सम्पन्न भइसकको छ । भोटेकोशी नदीमा निर्माण गरिने ११२ मिटर लामो पक्की पुलको दाँयाबायाँको पिलर तयार भई पुलमाथि फलाम राख्ने काम अन्तिमचरणमा पुगेकाले अबको ३८ दिनभित्र सकिने लक्ष्य रहेको त्यहाँ कार्यरत मिलना शेर्पाले जानकारी दिए । मितेरी पुलस्थित लिपिङमा रहेको साविक भन्सार कार्यलय भन्दा छ किलोमिटरयता रहेको सो बन्दरगाहा सुविधायुक्त अत्याधुनिक हुनेछ । ५०० रोपनी क्षेत्रफल ओगटेको बन्दरगाहामा १५८ वटा ठूलो कन्टेनर राखेर जाँचपास गर्न सकिनेछ । त्यस्तै ६० देखि १०० मेट्रिकटन सामग्री एकै पटक तौलिनेयन्त्र बन्दरगाहमा राखिनेछ । बन्दरगाह परिसरमा भन्सार कार्यालय, पशु तथा कृषि क्वारेन्टाइन, गोदामघर, जाँचपास यार्ड, चेकपोष्ट, बैंक तथा कर्मचारी आवास गृह सहितको संरचना तयार भएको छ । सिआरसिसीले २०७५ वैशाख २० गते एक वर्षमा सक्ने गरी इन्टर मोडेल यातायात विकास समितिसँग दुई अर्ब ३५ करोडमा सम्झौता गरेको थियो । शुरुमा २०६९ पुसमा २६ महीनामा सक्ने गरी एक अर्ब २० करोड ६८ लाखमा निर्माण गर्ने गरी बेइजिङ रियल स्टेट ग्रुपले सम्झौता गरेको थियो । विसं २०७१ र ०७३ को बाढी तथा २०७२ को विनाशकारी भूकम्पले क्षति पुर्याएपछि काम रोकिएको थियो । रासस
खानी खोला हाईड्रोपावरको साधारणसभा फागुन ३ गते, कहिले देखि बुक क्लोज ?
काठमाडौं । खानी खोला हाईड्रोपावर कम्पनी लिमिटेडको छैठौँ वार्षिक साधारणसभा फागुन ३ गते बस्ने भएको छ । उक्त प्रयोजनको लागि आगामी २० गतेदेखि फागुन ३ गतेसम्म बुक क्लोज गर्ने निर्णय गरेको छ । उक्त निर्णय कम्पनी सञ्चालक समितिको बैठकले गरेको हो ।
१८ प्रकारका रोग बिरुद्ध एशियन लाइफले बीमा सुरक्षा प्रदान गर्ने, ५० लाखसम्म उपचार खर्च दिने
काठमाडौँ । एशियन लाईफ इन्स्योरेन्स कम्पनीले क्यान्सर सहित १८ प्रकारका घातक रोगहरुविरुद्ध बीमा सुरक्षा प्रदान गर्न ‘एशियन क्रिटिकल केयर’ पूरक करार सार्वजनिक गरेको छ । यो ऐच्छिक सुविधा (पुरक करार) बाट बीमितले क्यान्सर, हृदयघात, मस्तिष्क घात, किड्नी फेलियर, कोमा लगायतका १८ प्रकारका घातक रोग मध्ये कुनै पनि एक घातक रोग निरुपण भएमा उपचार खर्चवापत एकमुष्ठ ५० लाखसम्म भुक्तानी पाउँछन् । मानव स्वास्थ्यमा कुनै गडबडीको कारण आइपर्ने गम्भीर रोगको उपचारमा जीवनभरीको पसिनाको कमाई निमेषभरमै स्वाहा हुनसक्छ । यस्तो गम्भीर रोगको उपचार खर्चको लागी ‘एशियन क्रिटिकल केयर (घातक रोग लागेमा थप सुविधा दिने बारेको पूरक करार)’ ले बीमितलाई तनावबाट टाढा राख्ने कम्पनीका प्रमुख कार्यकारी अधिृकत राजेशकुमार श्रेष्ठले बताए । मुख्य विशेषताहरु: – १८ वटा घातक रोगविरुद्धको रक्षावरण । – ५० लाख सम्मको एकमुष्ठ बीमा रकम प्राप्त हुने । – बीमा रकम लिन अस्पतालको बील पेश गर्नु नपर्ने । – बीमाङ्क ५० हजारदेखि ५० लाखसम्म । – प्रवेश उमेर १६ वर्षदेखि ६० वर्षसम्म । कम्पनीले २९ वटा शाखा र ७९ वटा उपशाखा गरी १०८ वटा कार्यालयमार्फत् सेवाग्राहीलाई घरदैलोमा बीमा सेवा प्रदान गर्दै आईरहेको छ । कम्पनीको हाल अधिकृत पूँजी ५ अर्ब, चुक्ता पूँजी १ अर्ब २५ करोड ६७ लाख रुपैयाँ रहेको छ भने २०७५ पौष मसान्तसम्म करिब १५ अर्ब रुपैयाँ बराबरको जीवन बीमा कोष रहेको छ ।
