बौद्ध क्षेत्र विकास समितिकाे सहकार्यमा पर्यटक प्रहरी पोष्ट सञ्चालनमा
काठमाडौँ । उपत्यकाको पर्यटकीय गन्तव्य बौद्ध क्षेत्रमा ‘पर्यटक प्रहरी पोष्ट’ शुरु गरिएको छ । पर्यटक प्रहरीले बौद्ध क्षेत्र विकास समितिको सहकार्यमा सोमबारदेखि पोष्ट सञ्चालन गरी काम थालेको छ । उक्त पोष्टमा प्रहरी नायब निरीक्षकको नेतृत्वमा सात पर्यटक प्रहरी खटाएको छ । पर्यटक प्रहरी एकाइ भृकुटीमण्डपका प्रमुख एवं प्रहरी निरीक्षक अमृतबहादुर बस्नेतका अनुसार उपत्यकाका सबै पर्यटकीयस्थलमा पर्यटक प्रहरीको उपस्थित रहने योजनाअनुरुप उक्त पोष्ट स्थापना गरिएको हो । सन् २०२० मा २० लाख पर्यटक भित्र्याउने सरकारको योजनालाई सफल पार्न पर्यटक प्रहरी पोष्टको ठूलो महत्व रहने पर्यटक प्रहरी एकाइ भृकुटीमण्डपले जनाएको छ । ठमेलपछि धेरै पर्यटकले घुम्ने स्थान बौद्ध क्षेत्र हो, त्यसैले उक्त क्षेत्रमा पोष्ट स्थापना गरेका गरेको निरीक्षक बस्नेतले बताए । यसअघि ठमेल, भक्तपुर, नगरकोट, पाटन, वसन्तपुर, पशुपति, स्वयम्भू र एयरपोर्ट क्षेत्रमा पर्यटक प्रहरी पोष्ट स्थापना गरिएको थियो । बौद्ध क्षेत्रमा पर्यटक प्रहरी पोष्ट स्थापना भएसँगै हालसम्म देशभर २६ स्थानमा पर्यटक प्रहरीको उपस्थिति पुगेको छ । हाल देशभर दुई सयभन्दा बढी पर्यटक प्रहरीले पर्यटकलाई सेवा प्रदान गर्दै आएका छन् । रासस
स्विजरल्याण्डमा ओलीको घोषणाः उत्तर/दक्षिणबाट रेल र पानी जहाज आउँछ, ढुक्क भएर लगानी गर्नुस
काठमाडौं । स्विजरल्याण्डको डाभोस पुगेर प्रधानमन्त्री केपी ओलीले नेपालमा भारत तथा चीनबाट रेल र पानी जहाज आउने घोषणा गरेका छन् । उनले नेपाल, भारत र चीन रेल र पानी जहाजबाट जोडिने भएकाले लगानीका लागि नेपाल उर्वभूमि बन्ने दावी पनि गरेका हुन् । ओली ऐन कानुनहरुको आवश्यक संसोधन प्रक्रिया अघि बढाएकाले लगानीको उपयुक्त गन्तव्य बन्ने पनि स्पष्ट पारेका हुन् । विश्व आर्थिक मञ्चको ४९औँ वार्षिक बैठकमा ‘दक्षिण एशियाको रणनीतिक दृष्टिकोण’ विषयक सत्रमा उनले नेपाल नयाँ राजनीतिक चरणमा प्रवेश गरेको तथा यसले वातावरण संरक्षण, दिगो विकास र जनताप्रति समर्पित भएर काम गरिरहेको बताए । प्रधानमन्त्री ओलीले भविष्यका पुस्ताप्रति सन्तुलित, सचेत र जिम्मेवारपूर्ण विकासका प्रयास गरिरहेको बताउँदै राजनीतिक स्थायित्व एवं नीतिगत स्पष्टतासहित वैदेशिक लगानी भित्र्याउन तल्लीन रहेको उल्लेख गरे । नेपालले सामाजिक र आर्थिक रुपमा द्रुत गतिमा परिवर्तन र विकास गरिरहेको जानकारी दिँदै छिमेकीका साथै क्षेत्रीय तथा अन्तर्राष्ट्रिय संस्थासँग सुमधुर सम्बन्ध कायम गर्दै विकास–निर्माणको मार्गमा अग्रसर भएको बताए । नेपालले नयाँ लोकतान्त्रिक गणतन्त्रात्मक शासन पद्धति अङ्गीकार गरी नयाँ संविधानअनुसार नयाँ कानून बनाइरहेको बताउँदै संविधानलाई कार्यान्वयनका निम्ति संरचनागत परिवर्तन गरिरहेको उल्लेख गरे । उनले भने, ‘‘नेपालले अब विकासका लागि धेरै प्रतीक्षा गर्नसक्ने अवस्था छैन ।’’ ‘समृद्ध नेपाल तथा सुखी नेपाली’को लक्ष्य साकार पार्न वर्तमान सरकारले आफ्ना प्रयास आर्थिक विकास तथा सुशासनमा केन्द्रित गरेको जानकारी दिँदै प्रधानमन्त्रीले नेपाली जनताका विकासका आकाङ्क्षा कार्यान्वयन गर्न ध्यान केन्द्रित गरेको बताए । नेपालले नयाँ नीतिका साथ आर्थिक तथा सामाजिक क्षेत्रमा सुधार गरिरहेको उनले उल्लेख गरे । महिला सशक्तीकरण, न्याय तथा समानता, सामाजिक न्यायको प्रवद्र्धनसँगसँगै समाजका सबै क्षेत्रमा सुधार गरिरहेको जानकारी दिँदै प्रधानमन्त्री ओलीले मानव सूचकाङ्कका दृष्टिले पछिपरेका समाजको उन्नयनलाई महत्वका साथ अघि बढाएको बताए । “हामी नयाँ परिस्थितिमा प्रवेश गरेका छौँ जसले हामीलाई आशावादी बनाएको छ, हामीले क्षेत्रीय तथा अन्तर्राष्ट्रिय मामिलामा आफ्नो भूमिका बढाउन सकेसम्म प्रयास गरिहेका छौँ’’, उनले भने । दक्षिण एशिया महान् सभ्यता र विद्वत्वर्ग रहेको क्षेत्र हो भन्दै प्रधानमन्त्री ओलीले सगरमाथादेखि हिन्द महासागरसम्म बहुभौगोलिक एवं जैविक विविधता रहेको उल्लेख गरे । उनले अति उर्वर भूमि र उत्पादनशील जनसङ्ख्या भएको नेपालले आफ्ना नागरिकको जीवनस्तर उकास्न आफ्नो सम्पूर्ण शक्ति र स्रोत परिचालन गरेको जानकारी दिए । उनले क्षेत्रीय सहयोग अभिवृद्धिका निम्ति इमान्दारी, निष्ठा र विश्वास अपरिहार्य भएकामा जोड दिँदै आपसी असमझदारी हटाउँदै क्षेत्रीय सहयोग र व्यापार विस्तारमा नेपालले सक्रिय भूमिका निर्वाह गरिरहेको बताए । नेपालमा लगानीको उपयुक्त वातावरण तयार भएको तथा त्यसका लागि लगानी मैत्री, ऐनकानून जारी भएका बताउँदै अन्तर्राष्ट्रिय लगानीका निम्ति प्रधानमन्त्रीले आह्वान गरे । नेपालले दक्षिण तथा दक्षिण पूर्वी एशियाली राष्ट्रहरुको सङ्गठन (आसियान)सँग व्यापार तथा अन्य सम्बन्ध कायम गरेर क्षेत्रीय व्यापार प्रवद्र्धनलाई उच्च महत्वका साथ कार्यान्वयन गरिरहेको जानकारी दिँदै उनले हालै नेपालले बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)को चौथो शिखर सम्मेलन सफलतापूर्वक आयोजना गरेको स्पष्ट पारे । उनले क्षेत्रीय साझेदारी र समझदारी विकासमा पनि नेपालले उत्तिकै महत्व दिएको उल्लेख गरे । देशको आर्थिक विकासमा सार्वजनिक–निजी साझेदारी महत्वपूर्ण हुने वास्तविकतालाई दृष्टिगत गरी सरकारले दुवै क्षेत्रलाई उच्च महत्व दिएको प्रधानमन्त्रीले बताए । उनले भने, “युवालाई रोजगारी सृजनाका लागि व्यावसायिक प्रशिक्षण र बालबालिकालाई औपचारिक शिक्षामा सहभागी गराइएको छ ।” रोजगारीको खोजीमा धेरै बेरोजगार युवा विदेशिएकाले उनीहरुलाई स्वदेश फर्काउन आफ्नो सरकारले भरमग्दुर प्रयास गरिरहेको बताउँदै उनले उनीहरुको सीपको उपयोग गर्न चाहेको जानकारी पनि दिए । उक्त सत्रमा भारतीय रिजर्भ बैंकका पूर्वगभर्नर रघुराम जी राजन, नर्वेको सिग्भी ब्रेक्के, अफगानिस्तानका प्रमुख कार्यकारी अब्दुल्लाह अब्दुल्लाहले भाग लिएका थिए ।
सिद्धार्थ बैंकको नाफा पौने अर्ब, कस्ता छन् अरु सूचांक ?
काठमाडौं । सिद्धार्थ बैंकले चालु आर्थिक बर्षको ६ महिनामा ८७ करोड नाफा आर्जन गरेको छ । बैंकले पुस मसान्त अवधीमा कमाएको यो नाफा गत आर्थिक बर्षको पुस मसान्तको तुलनामा १६ करोड रुपैंयाँले बढी हो । बैंकले गत आवको पुस मसान्तमा ७१ करोड नाफा कमाएको थियो । सिद्धार्थ बैंकले असोज मसान्तदेखि पुस मसान्त अवधीमा एक खर्बमा रहेको निक्षेपलाई १ खर्ब ६ अर्ब पुर्याएको छ भने कर्जा लगानी ९० अर्बबाट ९७ अर्ब पुर्याएको छ । बैंकको ब्याज आम्दानी ६ अर्ब ८ करोड कायम छ भने ब्याज खर्च ३ अर्ब ७९ करोड रुपैंयाँ गरेको छ । सिद्धार्थले २ अर्ब २८ करोड रुपैंयाँ खुद ब्याज आम्दानी गरेको छ । ८ अर्ब ८८ करोड चुक्ता पुँजी रहेको बैंकको जगेडा कोषमा ५ अर्ब १९ करोड रुपैंया रहेको छ । सिद्धार्थको खराब कर्जा १.६४ प्रतिशत छ भने आधार ब्याजदर १०.५९ प्रतिशत रहेको छ । ७८.७७ प्रतिशत सिसिडी रहेको बैंकको कस्ट अफ फण्ड७.४२ प्रतिशत रहेको छ । बैंकको प्रति सेयर आम्दानी भने २५.३२ रुपैंयाँ रहेको छ ।
काङ्ग्रेसको अवरोधपछि संसद बैठक स्थगित, प्रस्तुत भएन राष्ट्रिय चिकित्सा शिक्षा विधेयक
काठमाडौँ । नेपाली काङ्ग्रेसले आफ्ना नेताहरु गिरिजाप्रसाद कोइराला र सुशील कोइरालाको नाममा स्थापना भएको अस्पतालको विषयमा सरकारले कुनै निर्णय नगरेको भन्दै संसद् बैठक दुई पटकसम्म अवरुद्ध गरेपछि सूचना टाँस गरी आजको बैठक स्थगित भएको छ । प्रतिनिधिसभाको बैठक शुरु हुनासाथ काङ्ग्रेस सांसद उठेपछि सभामुख कृष्णबहादुर महराले नेपाली काङ्ग्रेसका सांसद प्रकाशमान सिंहलाई बोल्न समय दिए । प्रमुख प्रतिपक्षी दलका सांसद सिंहले मन्त्रिपरिषद्मा प्रस्ताव भएका ११ वटा अस्पतालमध्ये नेपाली काङ्ग्रेसका नेताका नाममा रहेका दुई वटा अस्पतालको विषयमा निर्णय नगरेकामा आफूहरुको गम्भीर ध्यानाकर्षण भएको बताए । सांसद सिंहले गिरिजाप्रसाद कोइराला श्वासप्रश्वास अस्पताल र सुशील कोइराला प्रखर क्यान्सर अस्पताललाई सङ्घअन्तर्गत राख्नेगरी निर्णय भएको संसद्मा जानकारी नहुन्जेल काङ्ग्रेसले संसद् चल्न नदिने बताए । त्यस लगत्तै काङ्ग्रेस सांसदहरुले रोस्टम घेराउ गरेका थिए । सभामुख कृष्णबहादुर महराले आफूले सरकारको ध्यानाकर्षण गराइसकेको भन्दै बैठक सञ्चालनमा सघाउन पटक पटक आग्रह गर्दा पनि काङ्ग्रेसका सांसदहरु उठेर बैठक चल्न नदिएपछि सभामुख महराले पहिलो बैठक १५ मिनेटका लागि स्थगित गरे । त्यसपछि प्रतिनिधिसभाको दोस्रो बैठकमा सभामुख महराले बैठकको कार्यसूचीमा रहेको शिक्षा तथा स्वास्थ्य समितिको प्रतिवेदनसहितको राष्ट्रिय चिकित्सा शिक्षा विधेयक २०७५ माथि छलफल गरियोस् भनी प्रस्ताव प्रस्तुत गर्न शिक्षा विज्ञान तथा प्रविधिमन्त्री गिरिराजमणि पोखरेललाई समय दिए । मन्त्री पोखरेललाई समय दिनासाथ काङ्ग्रेसका सांसदहरु उठेर विरोध जनाइरहेपछि सभामुख महराले बैठक १५ मिनेटका लागि पुनः स्थगित गरे । प्रमुख विपक्षी काङ्ग्रेसले सरकारमाथि दुई तिहाइको दम्भ देखाएको आरोप लगाउँदै आफ्ना नेताद्वय गिरिजाप्रसाद कोइराला र सुशील कोइरालाको नाममा खुलेका अस्पताल बन्द गर्न खोजेको भन्दै काङ्ग्रेसले लगातार संसद् अवरुद्ध गरेको थियो । संसद् बैठकबाट बाहिरिँदै गर्दा पूर्वप्रधानमन्त्री एवं नयाँ शक्ति पार्टीका नेता डा बाबुराम भट्टराईले संसद्मा मुठभेडको अवस्था आउन सक्ने देखिएकाले प्रधानमन्त्री नआउन्जेल संसद् बैठक स्थगित गरिनु उपयुक्त हुने प्रतिक्रिया दिए । नेकपाका सांसद योगेश भट्टराईले बैठकमा सभामुखले मन्त्रीलाई विधेयक प्रस्तुत गर्न समय दिइरहँदा प्रमुख प्रतिपक्षी दलले तत्काल अवरोध पुर्याउन नहुने भन्दै प्रतिपक्षी दलको त्यस्तो व्यवहार उचित नभएको टिप्पणी गरे । प्रतिनिधिसभाको अर्को बैठक माघ ११ गते दिउँसो १ बजे बस्नेछ ।
अस्पतालले सञ्चालन गरेको औषधि पसलबाट ६ महिनामा १ करोड नाफा
चितवन । भरतपुर अस्पतालले सञ्चालन गरेको औषधि पसलले गएको छ महिनामा एक करोड ८१ लाख ३० हजार नाफा गरेको छ । अस्पतालले सोही मूल्य बराबरको सहुलियत पनि सेवाग्राहीलाई उपलब्ध गराएको छ । अस्पतालको औषधालय प्रमुख रामहरि ढकालका अनुसार गएको छ महिनामा छ करोड १५ लाख ६० हजार बराबरको औषधि बिक्री गरिएको थियो । अस्पतालले गत आर्थिक वर्षमा नौ करोड ५० लाख २८ हजार बराबरको औषधि बिक्री गरी दुई करोड ६० लाख ८० हजार नाफा गरेको थियो । अस्पतालका मेडिकल सुपरिटेण्डेन्ट डा कृष्ण पौडेलका अनुसार अस्पतालले बोलपत्र आह्वान गरी औषधि खरीद गर्दै आएकाले सेवाग्राहीलाई निजी क्षेत्रको औषधालयभन्दा सस्तो मूल्यमा औषधि उपलब्ध गराउन सकेको हो । उनले भने, “अस्पतालले जति नाफा राख्छ त्यतिनै बराबरको सेवाग्राहीको रकम बचत हुन्छ ।” बाहिरी औषधालयमा भन्दा ३० प्रतिशतसम्म छुटमा अस्पतालले औषधि बिक्री गर्दै आएको छ । बिरामीको चाप बढ्दै गएपछि अन्तरङ्ग विभागमा शल्यक्रिया, सघन उपचार कक्ष र पोष्टअपका लागि औषधालय थप गरिएको छ । अस्पतालले पछिल्लोसहित तीनवटा औषधालय सञ्चालनमा ल्याएको छ । सरकारले तीन वर्षअघि आफ्नै औषधालय सञ्चालन गर्न निर्देशन दिएसँगै भरतपुर अस्पतालले औषधालय सञ्चालन गरेको थियो । छ सय सैयाको उक्त अस्पतालमा दैनिक एक हजार पाँच सयसम्म बिरामी उपचारका लागि आउने गर्छन् । रासस
शुरु भयो कर्मचारी समायोजन, विशिष्ट श्रेणीका ५६ सचिवलाई सरकारले दियो पत्र
काठमाडौँ । सरकारले विशिष्ट श्रेणीका ५६ जना सचिवको समायोजन गरेको छ । ‘कर्मचारी समायोजन अध्यादेश–२०७५’ अनुसार विशिष्ट श्रेणीका ती सचिवको सङ्घमा समायोजन गरिएको सङ्घीय मामिला तथा सामान्य प्रशासन मन्त्रालयका उपसचिव अनिता निरौलाले जानकारी दिइन् । उनका अनुसार ज्येष्ठताका आधारमा ती सचिवलाई मुख्य सचिव लोकदर्शन रेग्मीले समायोजनको पत्र दिएका हुन् । केही दिनअघि मात्र मन्त्रालयले प्रधानमन्त्री तथा मन्त्रिपरिषद् कार्यालयलाई समायोजन रोजेका सचिवको पत्र स्वीकृतिका लागि पठाएको थियो । मन्त्रालयले पठाएको आधारमा मन्त्रिपरिषद्ले ती सचिवको समायोजन पत्र स्वीकृत गरी समायोजन गरेको हो । यसैगरी मन्त्रालयले तीनै तहमा सहसचिवको समायोजनका लागि पत्र तयार पारेको छ । उनका अनुसार समायोजन रोजेका करीब ६०० सहसचिवको समायोजन स्वीकृत गर्न मन्त्रिपरिषद् कार्यालयमा पत्र पठाउन लागिएको छ । मन्त्रिपरिषद्ले स्वीकृत गरेपछि ती सहसचिवलाई मन्त्रालयका सचिव दिनेशकुमार थपलियाले समायोजनको पत्र दिनेछन् । कर्मचारीले गत पुस ११ देखि माघ २ गतेसम्म तीनै तहमा समायोजन रोज्न अनलाइन फाराम भरेका थिए । यसैगरी सङ्घमा मात्र सेवा समूह रहेकाको समायोजनको प्रक्रियासमेत शुरु गरिएको उपसचिव निरौलाले बताइन् । उनका अनुसार सङ्घमा मात्र सेवा समूह रहेका परराष्ट्र, न्याय र महालेखा परीक्षक सेवा समूहको समायोजनको प्रक्रिया प्रारम्भ भएको छ । सरकारले सङ्घमा ४७ हजार ९२०, प्रदेशमा २२ हजार ७५५ र स्थानीय तहमा ६७ हजार ५०३ कर्मचारी समायोजन गर्दैछ ।
राष्ट्र बैंकले बुधबार पुनः पाँच अर्बको रिपो बिक्री गर्दै
काठमाडौँ । नेपाल राष्ट्र बैंकले बुधबार पाँच अर्ब बराबरको रिपो बिक्री गर्ने भएको छ । बैंकले आज एक सूचना प्रकाशित गरी बोलकबोल प्रक्रियाबाट उक्त परिमाणको रिपो बिक्री गर्न लागेको जनाएको छ । बैंकले एक हप्ताका लागि रिपो बिक्री गर्न लागेको हो । यसअघि पनि बैंकले उक्त परिमाणको रिपो बिक्री गर्ने सूचना प्रकाशित गरेको थियो । तर तोकिएबमोजिमको रिपो बिक्री हुन नसकेकाले पुनः बिक्री आह्वान गरिएको बताइएको छ । बैंकले ‘क’, ‘ख’ र ‘ग’ वर्गका बैंक तथा वित्तीय संस्थालाई आफूले तिर्न सक्ने ब्याजसहित बोलकबोल प्रक्रियामा सहभागी हुन आग्रह गरेको छ । रासस
सरकारबाट जटिल रोगको उपचार खर्च कसरी पाउने ? यस्ता छन् प्रकृया
काठमाडौं। नेपालमा जटिल रोग लागेर उपचारको खोजीमा रहेका मानिसहरुको संख्या दिनप्रतिदिन बढ्दै गएको छ। आर्थिक रुपमा सम्पन्न नागरिकहरुले त्यस्ता रोगको सजिलै उपचार गर्न सक्ने अवस्था भएपनि बहुसंख्यक मध्यम तथा न्युन आय भएका नागरिकहरुलाई यस्तो रोगको उपचार नै गर्न नसक्ने अवस्था समेत रहन्छ। यही कुरालाई मध्यनजर गर्दै सरकारले विपन्न वर्गका नागरिकलाई जटिल खालका आठ प्रकारका रोग लागेको खण्डमा उपचार सहयोग बापत एक लाख दिँदै आएको छ । कस्तोलाई विपन्न नागरिक भनेर सरकारले खुलस्त रुपमा तय भने गरेको छैन यद्यपि हुनेखानेले नै विपन्न बनेर यो सेवा पनि लिएको देखिन्छ। मुटु रोग, मृगौला रोग, क्यान्सर, हेड ईन्जुरी, पार्किन्सन्स, अल्जाईमर्स, स्पाइनल ईन्जुरी र सिकेलसेल एनिमिया रोग लागेका बिरामीको उपचारमा सरकारले एक लाख उपचार खर्च प्रदान गर्छ । सरकारले उपलब्ध गराउने सहयोग कसरी पाइन्छ र कहाँ कहाँ पाइन्छ भन्ने कुराको ज्ञानको अभावमा कतिपय नागरिकले यो सुबिधा लिन सकिरहेका छैनन् । यता, सरकारले भने उपचार सहयोगका लागि आर्थिक वर्ष २०७४/०७५ मा २ अर्ब ११ करोड रुपैयाँ बिनियोजना गरेको थियो । तर, आव ०७५/०७६ मा भने १ अर्ब १० करोड, २२ लाख रुपैयाँ बजेट छुट्याइएको छ । यसमध्ये ६ महिनाको अवधिमा अब ६ करोड मात्र बाँकी छ । अहिले स्वास्थ्य मन्त्रालयले १ अर्ब २५ करोड अर्थ मन्त्रालयमा माग गरिएको छ । सरकारबाट सहयोग दिनका लागि ‘विपन्न वर्ग’ हुनपर्छ । सम्बन्धित वडा तथा गाउँ पालिकामा ‘विपन्न भएकाले आर्थिक सहयोग पाउँ’ भनी निवेदन दिनुपर्छ। तोकिएका कडा रोग लागेको नेपाली बिरामीहरु, जसले आफ्नो खर्चले उपचार गर्न सक्दैनन्, ती व्यक्तिहरु सूचीकृत अस्पताल मार्फत सहुलियत प्राप्त गर्न सक्दछन्। बिरामीलाई नगद दिइदैन, विदेशमा गई उपचार गरेका बिरामीलाई उपचार खर्च दिने ब्यवस्था छैन । सहुलियत प्राप्त गर्ने के के चाहिन्छ ? गरीबीको परिचय पत्र वाला बिरामी ब्यक्ति हुनु पर्नेछ । स्थानीय पालिकाले अस्पताललाई उपचार सहुलियताका लागि गरेको सिफारिस पत्र। यस भन्दा पहिला जिल्ला जन स्वास्थ्य मार्फत सिफारिस हुँदै आएको थियो। सहयोग उपलब्ध गराउनका लागि विपन्न नागरिक औषधी उपचार सिफारिस समिति गठन गरिएको हुन्छ । – सम्बन्धित स्थानीय तहको अध्यक्ष वा प्रमुख, अध्यक्ष – सम्बन्धित स्थानीय तहको प्रमुख प्रशासकीय अधिकृत, सदस्य – सम्बन्धित स्थानीय तहको स्वास्थ्य संयोजक, सदस्य सचिव कुन रोगका बिरामीले कुन अस्पतालबाट पाउँछन् सहुलियत ? क्यान्सर रोग १) चिकित्सा विज्ञान राष्ट्रिय प्रतिष्ठान, वीर अस्पताल, काठमाडौं २) त्रिवि शिक्षण अस्पताल, महाराजगंज, काठमाडौं ३) बीपी कोईराला मेमोरियल क्यान्सर अस्पताल, भरतपुर, चितवन ४) भक्तपुर क्यान्सर अस्पताल, भक्तपुर ५) परोपकार प्रसूति तथा स्त्रीरोग अस्पताल, थापाथली, काठमाडौं ६) बीपी कोईराला स्वास्थ्य विज्ञान प्रतिष्ठान, धरान, सुनसरी ७) पाटन स्वास्थ्य विज्ञान प्रतिष्ठान, पाटन अस्पताल, ललितपुर ८) कान्ति बाल अस्पताल, महाराजगंज, काठमाडौं ९) निजामती कर्मचारी अस्पताल, मिनभवन, काठमाडौं १०) क्यान्सर केयर नेपाल, जावलाखेल, ललितपुर तथा मन्त्रालयको छनौटमा पर्ने अन्य निजी तथा गैह्रसरकारी स्वास्थ्य संस्थाहरू । मिर्गाैला रोग १) चिकित्सा विज्ञान राष्ट्रिय प्रतिष्ठान, वीर अस्पताल, काठमाडौं २) त्रिवि शिक्षण अस्पताल, महाराजगंज, काठमाडौं ३) वीपी कोईराला स्वास्थ्य विज्ञान प्रतिष्ठान, धरान, सुनसरी ४) कान्ति बाल अस्पताल, महाराजगञ्ज, काठमाडौं ५) नारायणी उपक्षेत्रीय अस्पताल, वीरगंज, पर्सा ६) कोशी अंचल अस्पताल, विराटनगर, मोरङ ७) जनकपुर अञ्चल अस्पताल, धनुषा ८) मानव अंग प्रत्यारोपण केन्द्र, भक्तपुर ९) राष्ट्रिय मिर्गाैला उपचार केन्द्र, वनस्थली, काठमाडौं १०) नेपालगञ्ज मेडिकल कलेज, कोहलपुर, बाँके ११) नेपाल मेडिकल कलेज जोरपाटी, काठमाडौं १२) यूनिभर्सल कलेज अफ मेडिकल साइन्सेस, पक्लिहवा, रुपन्देही १३) चितवन मेडिकल कलेज, चितवन १४) कलेज अफ मेडिकल साइन्सेस, चितवन १५) मणिपाल मेडिकल कलेज, पोखरा, कास्की १६) बि एण्ड बि अस्पताल, ग्वार्को, ललितपुर १७) नेशनल डायलाइसिस सेन्टर, एकान्तकुना, ललितपुर १८) गोल्डेन अस्पताल, विराटनगर, मोरङ १९) धुलिखेल अस्पताल, काभ्रेपलाञ्चोक २०) गण्डकी मेडिकल कलेज, पोखरा, कास्की २१) आरोग्य स्वास्थ्य प्रतिष्ठान, ललितपुर २२) विराट अस्पताल, विराटनगर, मोरङ २३) पाटन स्वास्थ्य विज्ञान प्रतिष्ठान २४) पश्चिमाञ्चल क्षेत्रीय अस्पताल पोखरा यी रोगको उपचार सुविधा भएका क्षेत्रीय, उपक्षेत्रीय र अञ्चल अस्पताल तथा मन्त्रालयको छनौटमा पर्ने निजी तथा गैह्रसरकारी स्वास्थ्य संस्थाहरू । डायलिसिस : नि:शुल्क संक्रमित बिरामीलाई डायलसिस गरे बापत ४ हजार र असंक्रमित बिरामीको प्रति सेसन २५ सय प्रति सेसन सोध भर्ना भुक्तानी अस्पताललाई गर्ने गरिएको छ। मिर्गाैलाप्रतियारोपण ४ लाख सम्म उपचार सहुलियत दिईन्छ। प्रत्यारोपण पस्चात औषधी सेवानको लागि १ लाख सहुलियत दिईन्छ। प्रत्यारोपण पुर्व अंग ग्रहणकर्ता तथा अंगदाताको प्रयोगशालामा प्ररिक्षणको लागि ५० हजार सम्म प्रदान गरिन्छ। मुटु रोग १) चिकित्सा विज्ञान राष्ट्रिय प्रतिष्ठान, वीर अस्पताल, काठमाडौं २) त्रिवि शिक्षण अस्पताल, महाराजगञ्ज, काठमाडौं ३) शहीद गंगालाल राष्ट्रिय हृदय केन्द्र, बाँसवारी, काठमाडौं ४) वि.पी.कोईराला स्वास्थ्य विज्ञान प्रतिष्ठान, धरान, सुनसरी ५) पाटन स्वास्थ्य विज्ञान प्रतिष्ठान, पाटन अस्पताल, ललितपुर ६) मनमोहन कार्डियोभास्कुलर थोरासिक एण्ड ट्रान्सप्लाण्ट केन्द्र, महाराजगंज, काठमाडौं ७) कान्ति बाल अस्पताल, महाराजगंज, काठमाडौं ८) निजामती कर्मचारी अस्पताल, मिनभवन, काठमाडौं ९) मुटु रोगको उपचार सुविधा भएका क्षेत्रीय, उपक्षेत्रीय, अन्चल अस्पतालहरु तथा मन्त्रालयको छनौटमा पर्ने निजी तथा गैह्रसरकारी स्वास्थ्य संस्थाहरू । पार्किन्सस तथा अल्जाईमर्स रोग १) चिकित्सा विज्ञान राष्ट्रिय प्रतिष्ठान, वीर अस्पताल, काठमाडौं २) त्रिवि शिक्षण अस्पताल, महाराजगञ्ज, काठमाडौं ३) बीपी कोइराला स्वास्थ्य विज्ञान प्रतिष्ठान, धरान, सुनसरी ४) पाटन स्वास्थ्य विज्ञान प्रतिष्ठान, पाटन अस्पताल, ललितपुर । स्पाईनल ईन्जुरी तथा हेड ईन्जुरी रोग १) चिकित्सा विज्ञान राष्ट्रिय प्रतिष्ठान, वीर अस्पताल, काठमाडौं २) त्रिवि शिक्षण अस्पताल, महाराजगञ्ज, काठमाडौं ३) बीपी कोइराला स्वास्थ्य विज्ञान प्रतिष्ठान, धरान, सुनसरी ४) पाटन स्वास्थ्य विज्ञान प्रतिष्ठान, पाटन अस्पताल, ललितपुर । सिकलसेल एनिमिया रोग १) निजामती कर्मचारी अस्पताल, मिनभवन, काठमाडौं २) उपक्षेत्रीय अस्पताल, घोराही, दाङ ३) महाकाली अंचल अस्पताल, महेन्द्रनगर, कञ्चनपुर ४) सेती अंचल अस्पताल, धनगढी, कैलाली ५) भेरी अंचल अस्पताल, नेपालगञ्ज, बाँके ६) लुम्बिनी अञ्चल अस्पताल, वुटवल, रुपन्देही ७) जिल्ला अस्पताल कपिलवस्तु ८) जिल्ला अस्पताल बर्दिया ९) जिल्ला अस्पताल नवलपरासी ।
