बजार ८ अंकले घट्दा तीन कम्पनीको २ करोड बढीको सेयर कारोबार, हेराैँ क-कसकाे ?
काठमाडौं । सोमबारको सेयर बजार ८.८५ अंकले घटेको छ । कारोबार शुरु भएपछि एकैछिन उकालो परिसूचक त्यसपछिको कारोबारमा निरन्तर ओरालो लागेको थियो । अन्ततः बजार बन्द हुँदा नेप्से परिसूचक अघिल्लो दिनको तुलनामा ०.७७ प्रतिशतले घटेर ११४४.२७ अंकमा झरेको छ । बजारमा १६२ कम्पनीको ३६ करोड ४३ लाख रुपैयाँ बराबरको सेयर कारोबार भएको छ । सो मध्ये तीन कम्पनीको २ करोड रुपैयाँ बढीको सेयर कारोबार भएको छ । सोमबार नेपाल बैंक र अपर तामाकोशीको क्रमशः २ करोड ७१ लाख र २ करोड ३५ लाख रुपैयाँ बराबरको सेयर बिक्री भएका छन् । त्यस्तै, प्रभु बैंकको २ करोड १३ लाख रुपैयाँ बराबरको प्रमोटर सेयर किनबेच भएको छ । बजारमा ११ समूह कारोबारमा आएका थिए । सो मध्ये होटल समूह सामान्य अंक ०.३५ ले उकालो लागेको छ भने बाँकी समूहहरु ओरालो लागेका छन् । सबैभन्दा बढी जीवन बीमा समूह ६४ अंकले घटेको छ ।
दुई कम्पनीले एक अर्ब ४ करोडको आईपीओ जारी गर्दै, कसले कहिलेदेखि भर्न पाउने ?
काठमाडौं । बजारमा दुई कम्पनीले एक अर्ब ४ करोड ७४ लाख ४१ हजार २०० रुपैयाँ बराबरको साधारण सेयर(आईपीओ) निष्कासन गर्ने भएका छन् । ग्रीन लाइफ हाइड्रोपावरले १८ करोड र यूनिभर्सल पावर कम्पनीले ८६ करोड ७४ लाख गरी सो मात्राको सेयर बिक्री गर्न लागेका हुन् । ग्रीनलाइफ हाइड्रोपावर कम्पनीले आयोजना प्रभावितको लागि १८ करोड रुपैयाँ बराबरको १८ लाख कित्ता आईपीओ बिक्री गर्ने भएको छ । कम्पनीले यही माघ २२ गतेदेखि आगामी फागुन ७ गतेसम्म साधारण सेयर बिक्री गर्नेछ । दोलखाका स्थानीयबासीले उक्त आईपीओमा न्यूनतम २० कित्ता र अधिकतम ९०० कित्तासम्म आवेदन दिन पाउने छन् । कम्पनीको सेयर निष्कासन तथा बिक्री प्रबन्धकमा काठमाडौं क्यापिटल मार्केट लिमिटेड रहेको छ । कम्पनीले ३० प्रतिशतले हुन आउने ५ लाख ४० हजार कित्ता सेयर गौरीशंकर गाउँपालिका वडानम्बर ७ का बासिन्दाका लागि, गौरीशंकर गाउँपालिका वडानम्बर ५, ६, ८ र ९ का बासिन्दाका लागि ४० प्रतिशतले हुन आउने ७ लाख २० हजार कित्ता र बाँकी रहेको ३० प्रतिशतले हुन आउने ५ लाख ४० हजार कित्ता गौरीशंकर १, २ र ४ का बासिन्दा तथा बिगु गाउँपालिकाको वडा नम्बर ४ का बासिन्दाका लागि सुरक्षित गरेको छ । हाल कम्पनीको चुक्ता पुँजी एक अर्ब ४४ करोड रुपैयाँ रहेको छ । उद्योग प्रभावित क्षेत्रका बासिन्दाहरुलाई १८ करोड र सर्वसाधारण तथा कर्मचारीहरुलाई १८ करोड रुपैयाँ बराबरको सेयर निष्कासनपछि कम्पनीको चुक्ता पुँजी एक अर्ब ८० करोड रुपैयाँ नाघ्ने छ । हाल कम्पनीले दोलखामा ४० मेगावाट क्षमता खानीखोला एक जलविद्युत् आयोजना निर्माण गरिरहेको छ । सो आयोजनाबाट आगामी चैतदेखि विद्युत् उत्पादन शुरु हुने कम्पनीले जनाएको छ । त्यसैगरी, यूनिभर्सल पावरले माघ २५ गतेदेखि अंकित मूल्य १०० रुपैयाँ दरले ८६ लाख ७४ हजार कित्ता सेयरकाे बिक्री खुला गर्न लागेकाे छ । उक्त सेयरमा इच्छुक लगानीकर्ताले न्युनतम ५० कित्तादेखि अधिकतम ५० लाख कित्तासम्मको लागि आवेदन दिन सक्नेछन् । सर्वसाधारणले छिटोमा माघ २९ गते र ढिलोमा फागुन २६ गतेसम्म आवेदन दिन सक्ने कम्पनीले जनाएको छ । साथै, यसअघि कम्पनीले आयोजना प्रभावित क्षेत्रका बासिन्दाका लागि २१ लाख ३५० कित्ता आईपीओ जारी गरी बाँडफाँट गरिसकेको छ । हाल कम्पनीको सेयर बिक्री प्रवन्धकको काम नक्सालस्थित सिद्धार्थ क्यापिटल लिमिटेडले गरिरहेको छ । हाल कम्पनीको चुक्ता पुँजी एक अर्ब १३ करोड रुपैयाँ रहेको छ । आयोजना प्रभावित र सर्वसाधारणलाई गरी कुल ९० करोडको सेयर बाँडफाँड पछि कम्पनीको चुक्ता पुँजी २ अर्ब १० करोड रुपैयाँ नाघ्ने छ ।
सुन्तला बेचेर ३८ करोड आम्दानी, छ हजार ६ सय टन बिक्री
गोरखा । गोरखा जिल्लामा यसवर्ष सुन्तला बिक्रीबाट मात्रै ३८ करोड आम्दानी भित्रिएको छ । अघिल्लो वर्षको तुलनामा यसवर्ष सुन्तला उत्पादनमा वृद्धि भएको कृषि ज्ञान केन्द्र गोरखाले जनाएको छ । जिल्लामा भएको कूल सुन्तला निर्यातमध्ये सबैभन्दा धेरै मनकामना क्षेत्रमा निर्यात भएको प्रधानमन्त्री कृषि आधुनिकीकरण परियोजना सुन्तला तथा फलफूल जोन कार्यक्रम गोरखाका प्रमुख अजय अधिकारीले जानकारी दिए । ‘ताङलिचोकलाई पनि जोेडेर हेर्ने हो भने मनकामना क्षेत्रमा जिल्लाभरिको उत्पादनमध्ये ५५ प्रतिशत सुन्तला उत्पादन तथा बिक्री भएको छ ।’ अधिकारीले भने । जिल्लामा यसवर्ष छ हजार ६०० टन सुन्तला उत्पादन तथा बिक्री भएको उनले बताए । यसवर्ष गोरखामा उत्पादन भएको सुन्तला न्यूततम ५० देखि अधिकतम ८० किलोसम्ममा बिक्री भएको अधिकारीले बताए । उनका अनुसार जिल्लामा यस वर्ष अघिल्लो वर्षभन्दा ३० प्रतिशत सुन्तला उत्पादनमा वृद्धि भएको छ । “अघिल्लो वर्ष चैत महीनामा खडेरी र असिनाले सुन्तला राम्रो हुनसकेको थिएन”, प्रमुख अधिकारीले भने, “तर यस पटक गएको चैत महीनामा पानी राम्रो परेकाले उत्पादनमा वृद्धि भएको हो ।” यस्तै जिल्लामा कृषि जोन घोषणा भई प्रधानमन्त्री कृषि आधुनिकीकरण परियोजना लागू भएका क्षेत्रमा सुन्तला बगैँचा व्यस्थापन, सिँचाइको राम्रो व्यवस्था लगायतका कारणले पनि सुन्तला उत्पादनमा वृद्धि भएको उनको भनाइ छ । खडेरी र पानीको अभावले सुन्तला उत्पादनमा बढी ह्रास आउने भएकाले त्यसतर्फ ध्यान पुर्याउन सके उत्पादनमा वृद्धि गर्न सकिने अधिकारीले बताए । त्यस्तै जिल्लाको देउराली, खेप्लाङ लगायतका क्षेत्रमा पनि व्यावसयिक सुन्तलाखेती गरिँदै आएको छ । जिल्लामा कूल ८६५ हेक्टरभन्दा बढी क्षेत्रफलमा सुन्तलाखेती हुने गरेको छ । रासस
देशभर होमस्टे क्रेज: घलेगाउँ चर्चित बन्दै, काँठ क्षेत्रमा मात्रै ५३ होमस्टे
काठमाडौं । मौलिक घरलाई नै मिनी होटलको रुपमा विकास गरी होमस्टे सञ्चालन गर्ने क्रेज बढ्दै गएको छ । घरैमा पाहुनालाई स्वागत गर्ने गरी बनाएको संरचना देशभर बढ्दै गएको हो । आन्तरिक तथा बाह्य पर्यटकलाई लक्षित गरी विभिन्न गाँउमा होमस्टे सञ्चालन गर्ने परिपाटी बढ्दै गएको छ । होमस्टे सञ्चालनबाट स्थानीय बासिन्दालाई रोगजारीको साथसाथै आम्दानीको राम्रो स्रोत समेत बन्दै गएको छ । स्थानीय स्तरमा रहेका मौलिक ज्ञान सिपको प्रयोग गरेर नै यो व्यवसाय सञ्चालन गर्न सकिने भएकाले यस व्यवसायमा आकर्षण बढ्दै गएको हो । सामुदायिक तथा निजी गरी काठमाडौंमा मात्रै ५३ वटा होमस्टे रहेका छन् । काठमाडौंको काँठ क्षेत्रमा विषेशगरी होमस्टेहरु सञ्चालन भैरहेका छन् । काठमाडौंको शहरी वातावरणबाट फ्रेस हुन् मानिसहरु होमस्टेमा जाने गरेका छन् । उपत्यकामा इचंगु, भ्याली भ्यू, नगरकोट, बज्रयोगिनी, ब्लु माउन्टेन, शेर्पा, हाम्रो घर, कान्तिपुर हेरिटेज, सेसन, बाग्मती नेवारी, नेपाल फ्रेन्ली, नर्थ भ्यू लगायत ५३ भन्दा बढी होमस्टे सञ्चालनमा रहेका छन् । होमस्टेमा वास वस्न आउने पर्यटकबाट मनग्य आम्दानी हुने गरेको मनवानपुरको चित्लाङ होमस्टेका एक सञ्चालक सूर्यदास प्रधानले बताए । उनका अनुसार हाल १ जना पर्यटकबाट १२ सय रुपैयाँ लिने गरेका छन् । तर बाटोको सहजता नहुँदा होमस्टे पुग्न असहज हुने गरेको छ । २५ घर सम्मिलित यस होमस्टे हाल ३० बेड क्षमताको रहेको छ । सिजनमा पर्यटकको चाप धान्न नसकेकोले अझै क्षमता विस्तार गर्न लागिएको प्रधानले बताए । पर्यटन विभागको तथ्याङ्क अनुसार हाल देशमा होमस्टेको संख्या १०५ वटा रहको छ । तर, चालू आर्थिक वर्षदेखि नै स्थानीय तहमा होमस्टे दर्ता गर्न सकिने भएकाले यसको संख्या बढ्दै गैरहेको छ । विभागको अनुसार ललितपुरमा ९, काभ्रेमा ७, भक्तपुरमा ६, रामेछापमा ५, चितवन ३, प्युठान, धादिङ, नुवाकोटमा २–२ वटा होमस्टे रहेका छन् । यसैगरी सप्तरी, उदयपुर, रसुवा, लमजुङ, गोर्खा, मुगु लगायत जिल्लामा होमस्टे सञ्चालमा रहेका छन् । यी होमस्टेबाट दैनिक १ हजार भन्दा बढी व्यक्तिहरुलाई सुविधा दिन सक्नेछ । दुई प्रकारका होमस्टे होमस्टे विषेशगरी २ प्रकारले सञ्चालन भैरहेका छन्ए, उटा सामुदायिक र अर्को निजी । सामुदायिक होमस्टे विषेशगरी समुदायको मानिसहरु मिलेर खोलिएको हुन्छ भने निजी होमस्टेहरु व्यक्तिको लगानीमा खोलिएको छ । हाल देशभर ६६ वटा सामुदायिक होमस्टे र ३९ वटा निजी होमस्टे रहेका छन् । यस्तै, दक्षिणकाली नगरपालिकामा पनि ४ वटा सामुदायिक होमस्टेको सुरुवात भएको छ । एक दिनमा २ सय जनालाई सेवा दिन सक्ने होमस्टेमा फरक स्वादमा स्थानीय परिकार खान पाइने छ । चर्चित बन्दै लमजुङ घलेगाउँ स्मार्ट भिलेजको रुपमा परिचित लम्जुङ घलेगाँउ होमस्टेको एक सफल गाउँ हो । गुरुङ समुदायको बाहुल्यता भएको यस गाँउमा आन्तरिक तथा बाह्य पर्यटटको चहल पहल बढ्दै गएको छ । ३२ घरमा सञ्चालित घलेगाउँ समुद्र सतहदेखि २१ सय मिटरमा अवस्थित रहेको छ । विशेषगरी खशिको सुकुटी, लोकल कुखुरा ढिडो, अग्र्यानिक तरकारी यस ठाउँको विशेषता हो । यस गाउँबाट सुर्योदयको दृष्य हेर्न सकिनुका साथै नजिकबाट हिमाल पनि हेर्न सकिन्छ । घलेगाँउबाट करिब १ घण्टा पैदल बाटो हुँदै पुग्न सकिने अर्को भुजुङ गाँउ निकै रमणीय रहेको छ । परबाट हेर्दा घरमाथी घर खापिएको देखिने यस गाउँमा पनि हामस्टे रहेको छ । भिरमा अडिएको गाँउ तल खोलासम्म टारी खेत र झरना यस स्थानको मुख्य आकर्षण हो । कुन होमस्टे बस्न कस्लाई सम्पर्क गर्ने ? यहाँ क्लिक गर्नुहोस्
५ महिनादेखि १३ करोडको चिनी भन्सारमै थन्कियो, यस्तो छ कारण
वीरगञ्ज । साल्ट ट्रेडिङ कर्पोरेशनले भित्र्याएको करीब १३ करोड मूल्य बराबरका २४ हजार ४५ मेट्रिक टन भारतीय चिनी सुख्खा बन्दरगाहको गोदाममा थन्किएको छ । सरकारले चिनी आयातमा परिणात्मक बन्देज (कोटा सिस्टम) लगाएपछि कर्पोरेशनले भित्र्याएको उक्त परिणामको भारतीय चिनी गोदाममा थन्किएको हो । परिणात्मक बन्देजका कारण पाँच महिना भइसक्दा पनि कर्पोरेशनले चिनी लग्न सकेको छैन । हिन्दूको महान् चाँड दशैँ, तिहार तथा छठ पर्वलाई लक्षित गरी कर्पोरेशनले भारतको गुजरात राज्यस्थित रेणुका सुगर मिलबाट सो परिणामको चिनी आयात गरेको थियो । ढिलो गरी आयात भएकाले सो चिनी भन्सार पास हुन नसक्दा गोदाममै थन्किएकोे छ । विगत लामो समयसम्म गोदाममै थन्किएका कारण चिनी बिग्रदै गएको छ । २०७५ भदौ ३१ गते बसेको मन्त्रिपरिषद्को निर्णयलाई आधारमानी वाणिज्य विभागले चिनीको जाँचपास नगर्न पत्राचार गरेकाले यस्तो स्थिति आएको सुख्खा बन्दरगाह भन्सार कार्यालयले जनाएको छ । कार्यालयका अनुसार साल्ट ट्रेडिङ कर्पोरेशनले आयात गरेको चिनी असोज ६ गते सुख्खा बन्दरगाहमा आएकाले भन्सार पास हुन नसकी गोदाममै थन्किएको छ । सुख्खा बन्दरगाहको गोदाममा राखिएको सो चिनी छाड्ने बारे विभागबाट कुनै पनि पत्र नआएकाले यस बारेमा अहिले केही भन्न नसकिने भन्सार अधिकारीको भनाइ छ । विगत पाँच महीनादेखि भन्सारमै थन्किएको सो चिनी गोदाममा राखेको भाडावापत साल्ट ट्रेडिङ कर्पोरेशनले बन्दरगाह सञ्चालक कम्पनी हिमालयन ट्रर्मिनललाई रु चार करोडभन्दा बढी रकम तिर्नसमेत सकेको छैन । गोदाममा राखे वापतको भाडा दर प्रतिदिन तीन लाख ७६ हजार ६०० रहेकाले हालसम्म कर्पोरेशनले भाडा तिर्न नसकेको गोदाम इञ्चार्ज सुनिलकुमार सिंहले बताए । गत पुस अन्तिम साता बसेको मन्त्रिपरिषद्को बैठकले बन्दरगाहमा थन्किएर बसेको सो परिणामको चिनीका लागि भन्सार जाँचपासमा लगाइएको प्रतिबन्ध फुकुवा गर्ने निर्णय गरेपछि यस सम्बन्धी आवश्यक प्रक्रिया अगाडि बढेको साल्ट ट्रेडिङ कर्पोरेशन लिमिटेड अञ्चल कार्यालय वीरगञ्जका प्रमुख अमोज लामिछानेले बताए । यता साल्ट ट्रेडिङ कर्पोरेशनले सो चिनी आयात गर्न एलसी खोलेको थियो । चिनी आपूर्तीकर्ता गुजरातको रेणुका सुगर मिलले चिनी नेपाल पठाउन रेल्वे बुक गरेको भए पनि बुक गरेको रेल्वे जाम र चापका कारण १५ दिन ढिलो गरी सो चिनी सुख्खा बन्दरगाहमा आइपुगेकोले चिनी गोदाममै थन्किएको हो । विगत पाँच महीनादेखि सो चिनी सुख्खा बन्दरगाहको गोदाममा थन्किएकोले बोरा च्यातिएको, चिनी जथाभावी छरिएको, मजदुरलाई काम गर्न समस्या भएको तथा चिनीका बोरा बिग्रिन थालेपछि चिनी खराब भइरहेको मजुदरको भनाइ छ । चिनी आयातमा ३० प्रतिशत भन्सार शुल्क र १३ प्रतिशत मूल्य अभिवृद्धि कर (भ्याट) लाग्ने गरेको छ । सरकारले चिनीमा भन्सार बढाउँदासमेत भारतबाट चिनी आउने क्रम नरोकिएपछि सरकारले भदौ ३१ गतेदेखि कोटा प्रणाली लगाएको थियो । फलस्वरुप असोज १ गतेदेखि कुनै पनि भन्सार नाकाबाट चिनी नेपाल भित्रिएको छैन । सरकारले चिनी आयातमा रोक लगाएपछि यहाँका उपभोक्ता भारतीय चिनी प्रति केजी ७० का दरले किन्न बाध्य छन् । सुख्खा बन्दरगाहमा रोकिएको चिनी हालसम्म बजारमा आउन नसक्दा भारतबाट तस्करी गरी ल्याएको चिनी महङ्गो दरमा उपभोक्ता किन्ने गरेका छन् । रासस
कृषि विकास बैंकको शाखा ओखलढुंगाको चम्पादेवीमा
काठमाडौं । ओखलढुंङगा जिल्ला चम्पादेवीमा कृषि विकास बैंकको शाखा कार्यालयको विस्तार भएको छ । प्रमुख अतिथी संघिय सांसद यज्ञराज सुनुवार र विशिष्ठ अतिथी कृषि विकास बैंकका उपमहा प्रबन्धक पूर्णप्रसाद आचार्यले संयुक्त रुपमा उक्त कार्यालयको उद्घाटन गरेका हुन् । कार्यक्रमका प्रमुख अतिथी तथा संघिय सांसद यज्ञराज सुनुवारले विकासको मुख्य साधन सरकारी संस्थाहरु भएको सन्र्दभमा कृषि विकास बैंक पनि एक सरकारी बैंक भएको बताए । राजनैतिक दलका प्रतिनिधीहरु, प्रदेश सभासद मोहनबहादुर खड्का, सभासद रामहरी खतिवडा, बालकृष्ण ढुंगेल, चम्पादेवी गाविस.का अध्यक्ष नवराज के.सी., ज्ञानप्रकाश मा.वि.का प्र.अ. काशीराम कार्की, ज्ञानज्योति सा.क्या.का प्र. चोपलाल धमलाहरुले स्थानीय जनताको तिव्र चाहना र आफुहरुको अनुरोध समेतलाई ध्यानमा राखेका बताए । उद्घाटन कार्यक्रमका अध्यक्ष तथा कृषि विकास बैंक क्षेत्रिय कार्यालय राजविराजका निर्देशक चेतनाथ सापकोटाले बैंकले अबका दिनमा चम्पादेवी बासीलाई उपलव्ध गराउन सक्ने बैंकिङ्ग सेवाका बारेमा, बैंकले वित्तीय कारोवारका साथै सामाजिक सामुदायिक कार्यक्रम संचालन गर्ने, देशको आर्थिक विकासमा टेवा पुर्याउने, उद्यमशीलता विकासमा महत्वपूर्ण योगदान गर्न सबै नेपालीहरुको घर आँगनको बैंकको रुपमा कार्य गरेको विषयमा स्पष्ट पारेका छन् । समुदघाटन कार्यक्रममा स्वागत मन्तव्य कृषि विकास बैंक शाखा कार्यालय घोराखोरीका प्रबन्धक गोविन्द घिमिरेले गरेका थिए ।
१५ महिनादेखि नयाँ सहकारीको दर्ता रोकियो, अब कहिले खुल्छ ?
काठमाडौ । २०७४ साल कात्तिक १ गतेबाट रोकिएको नयाँ सहकारीको दर्ता अझै खुलेको छैन । नयाँ नियमावलीको टुङ्गो नलाग्दा १५ महिनादेखि नयाँ सहकारी दर्ता रोकिएको छ । सहकारी विभागका रजिष्टार शिवकुमार कार्की भन्छन्-‘संघीय स्वरुपमा सहकारीको ऐन जारी भएको, तर नियमावली तयार नभएकाले लामो समयसम्म सहकारी दर्ता रोकिएको हो ।’ हालसम्म नेपालमा ३४ हजार ५ सय १२ वटा सहकारी दर्ता भएको सहकारी विभागले जनाएको छ । हजारौ नयाँ सहकारीपनि दर्ता प्रक्रिया कहिले खुल्ला भनेर पर्खाईमा छन् । नियमावली पारित भएपछि स्थानीय तहले नै सहकारीका सन्दर्भमा दर्ता गर्ने अधिकारी पाउने छन् । सो नियमावलीको सन्र्दभमा भूमी व्यवस्था, सहकारी तथा गरिबी निवारण मन्त्रालयमा छलफल भइसकेको छ । के गर्दैछ त सहकारी विभाग ? सहकारी विभागले नेपालमा रहेका सहकारी क्षेत्रमा सुशासन कायम गर्न प्रयास गरिरहेको छ । स्थानीय तहसम्म सहज होस् भनेर प्रादेशिक ऐनको ढाँचा तयार गरेको छ । प्रदेश तथा स्थानीय तहको सन्दर्भमा सरकारी ऐनको सहजताको लागि विभागले नमुना तयार पारेको जनाएको छ । सम्पत्ति शुद्धिकरणमा टेवा पुगोस् भन्ने उद्देश्यले सरकारी विभागले निर्देशिका समेत जारी गर्दै आएको छ । २०७४ सालमा सम्पत्ति शुद्धिकरण निवारण सम्बन्धी सहकारी सङ्घसंस्थालाई निर्देशन स्वरुप हाते पुस्तक प्रकाशन गरेको थियो । यस्तै, २०७५ मा भने सहकारी संस्थाको लेखापरीक्षण निर्देशिका जारी गरेको छ । सरकारले हाल सहकारी मार्फत गरिबी निवारण गर्ने लक्ष्य निर्धारण गरेको छ । सहकारी मार्फत गरिबी निवारणमा टेवा पुग्ने सहकारी विभागले विश्वास लिएको छ । विभागले सरकारी मूल्य मान्यता अनुसार सबै निकाय लागि परेमा सहकारीको लाभ प्रत्येक घरले उठाउन पाउने राय दिंदै आएको सहकारी विभागका रजिष्टार कार्कीले बताए । संघीय कानूनको जारी हुनु अघि नेपालमा सहकारीका ३८ डिभिजन कार्यालयहरु रहेका थिए । अब त्यो खारेजीको प्रकृयामा गएकाले स्थानीय तहले नै सहकारी सुशासनमा आफ्नो भुमिका निर्वाह गर्नुपर्ने रजिष्टकार कार्कीको भनाई छ ।
लक्ष्मी बैंकको नयाँ शाखा हाँडीगाउँ र पेप्सिकोलामा
काठमाडौं । लक्ष्मी बैंकले काठमाडौंको हाँडीगाउँ र पेप्सिकोलामा नयाँ शाखा संचालनमा ल्याएकोे छ । यी शाखाहरु मार्फत ग्राहकहरुको वित्तीय आवश्यकता पुरा गर्न आवश्यक सम्पूर्ण बैंकिङ्ग सेवा प्रदान गर्नुका साथै साना तथा लघु व्यवसायी माझ वित्तीय पहुँच पुर्याउने लक्ष्य राखेको छ । लक्ष्मी बैंकको संजाल ४६ जिल्लामा ९८ शाखा, ३ हस्पिटल सेवा काउन्टर, १०८ एटिएम, २५०० भन्दा बढि रेमिटेन्स् एजेन्ट तथा ५१ शाखा रहित बैंकिङ्ग एजेन्टहरु पुगेको छ । यी शाखाहरुका साथ लक्ष्मी बैंकले आफ्नो सेवा अझ सुदृढ अनि व्यापक बनाउने विश्वास राखेको छ । सन् २०१२ देखि सञ्चालनमा आएको बैंकको सहायक कम्पनी लक्ष्मी लघुवित्त वित्तीय संस्था लिमिटेडले आफ्ना ६२ शाखामार्फत विभिन्न जिल्लाहरुमा हाल कूल रु ३ अर्ब भन्दा माथिको लघुकर्जा सुविधाप्रदान गरेको छ । बैंकको सहायक कम्पनी लक्ष्मी क्यापिटल मार्केट लिमिटेडले सन् २००९ देखि नेपाल धितोपत्रबोर्डबाट इजाजत लिएर विभिन्न बैंकिङ्ग सेवाहरु सञ्चालन गर्नुका साथै बैंकको प्रवद्र्धनमा लक्ष्मी भ्यालु फण्ड १ र लक्ष्मी इक्वििटि फण्ड नाम कम्युचुअल फण्ड योजनाहरु सञ्चालनमा ल्याएको छ । आर्थिक वर्ष २०७४/७५ मा रु. ६७ं.७४ अर्ब निक्षेप र रु.६२ अर्ब कर्जा पुर्याएको यस बैंकको वासलातको आकार रु.८१ अर्ब रहेको छ ।
