एकाएक किन बढ्यो मंगलबारको सेयर बजार ? यस्तो छ कारण
काठमाडौं । सेयर बजारमा लामो समयपछि हरियाली छाएको छ । निरन्तर ओरालो लागिरहेको परिसूचक मंगलबारको एकाएक २२.४४ अंकले बढेर ११२४.९६ अंकमा पुगेको छ । मंगलबार अर्थमन्त्रालयमा बसेको अर्थसमितिको बैठकमा पुँजीबजारको समस्या समाधान सम्बन्धी सकारात्मक कुराहरुमा छलफल भएकाले बजार बढेको इभेष्टर्स फोरमका अध्यक्ष छोटेलाल रौनियारले बताएका छन् । साथै, हाल बढिरहेको बैंक तथा वित्तीय संस्थाहरुको ब्याजदर नियन्त्रण गर्ने सम्बन्धि अर्थमन्त्रालयमा छलफल भइरहेकाले यसको असर बजारमा परेको उनले बताए । बजारमा कुल १६७ कम्पनीको २१ करोड ४५ लाख रुपैयाँ बराबरको सेयर कारोबार भएको छ । सो मध्ये सबैभन्दा बढी अपर तामाकोशी हाइड्रो पावरको एक करोड २७ लाख रुपैयाँ बराबरको सेयर किनबेच भएको छ । जसको सेयर मूल्य प्रतिकित्ता २३२ रुपैयाँ रहेको छ । बजारमा कारोबारमा आएका सबै सूचकमा हरियाली छाएको छ । सबैभन्दा बढी जीवन बीमा समूह २५१ अंकले उकालो लागेको छ । त्यस्तै, निर्जीवन बीमा समूह १५३ अंकले बढेर ५४३७ अंकमा पुगेको छ । उत्पादनमूलक र फाइनान्स समूह सामान्य एकल अंकले उकालो लागेका छन् भने बाँकी समूह दोहोरो अंकले बढेका छन् । मंगलबारका बजारमा अधिकांश लघुवित्त संस्थाको सेयर मूल्यमा वृद्धि भएको छ । सबैभन्दा बढी चौतारी लघुवित्त वित्तीय संस्थाका लगानीकर्ताले ९.९३ प्रतिशत कमाएका छन् । त्यस्तै, कालिका लघुवित्त वित्तीय संस्थाको सेयर मूल्य ९.६९ प्रतिशतले बढेर प्रतिकित्ता ८४९ रुपैयाँ पुगेको छ । त्यसैगरी, नयाँ नेपाल लघुवित्त विकास बैंक ७.५८, डिप्रोक्स लघुवित्त वित्तीय संस्था ७.१४, सामुदायिक लघुवित्त वित्तीय संस्था ६.६७ र ग्लोबल आईएमई लघुवित्त वित्तीय संस्थाको सेयर मूल्य ६.०५ प्रतिशतले बढेको छ । दोहोरो अंकले बढेको बजारमा सबैभन्दा बढी वर्ल्ड मर्चेन्ट बैंकिङ् एण्ड फाइनान्सका लगानीकर्ताले १० प्रतिशत गुमाएका छन् । त्यस्तै, खानीखोला हाइड्रोपावर कम्पनीको सेयर मूल्य ३.७५ प्रतिशतले घटेको छ ।
भाटभटेनीले त्रिवि शिक्षण अस्पतालमा नौ तले भवन बनाउने, १० महिनामा हस्तान्तरण
काठमाडौँ । भाटभटेनी सुपर मार्केटले त्रिभुवन विश्व विद्यालय शिक्षण अस्पतालका लागि ९ तले भवन बनाइदिने भएको छ । यस सम्बन्धमा लिखित सम्झौताको प्रक्रिया अघि बढेको अस्पताल प्रशासनले जनाएको छ । भाटभटेनीले दश वर्ष अघि शिक्षण अस्पतालको आकस्मिक कक्ष निर्माण गरिदिएको थियो । अहिले सोही आकस्मिक कक्ष नजिकै ९ तले भवन निर्माणमा सहयोग गर्न लागेको र यस सम्बन्धमा सुपरमार्केटका सञ्चालक मीन गुरुङसँग कुराकनी भएको अस्पताल प्रशासन बताउँछ । ८–१० दिनमा भवन डिजाइनको अन्तिम चरणको काम अघि बढ्छ-अस्पतालका प्रशासक सूर्य अधिकारीले बताए । सुपरमार्केटले यसअघि निर्माण गरिदिएको आकस्मिक कक्षको लागत १३ करोड थियो । अब बन्ने भवन त्यो भन्दा बढी लागतको हुने बताइएको छ । भाटभटेनी सुपरमार्केटका सञ्चालक गुरुङले अस्पताललाई आकस्मिक कक्ष विस्तार, बिरामी कुरुवा कोठा, हेलिप्याड सहितको भवन निर्माण गर्ने इच्छा देखाएको अस्पताल प्रशासन बताउँछ । गुरुङले दस वर्षअघि आफ्ना स्वर्गीय मातापिता बृषबहादुर गुरुङ र धनमाया गुरुङको स्मृतिमा सो आकस्मिक कक्ष निर्माण गरी सफाइ व्यवस्थापन आफैं गर्दै आएका छन् । अब बनाउन लागिएको भवन १० महिना भित्र निर्माण हुने र अस्पतालमा हस्तान्तरण गर्ने सञ्चालन गुरुङको योजना छ दुई वर्ष अघि नै सुपरमार्केटले यो प्रस्ताव लगेपनि विविध कारणवश यो काम शुरु हुन सकेको थिएन, अब भने निर्माण कार्य शुरु हुने अस्पताल प्रशासनले जनाएको छ ।
उपभोक्ताको लगानीद्धारा तनहुँको म्याग्दे गाउँपालिकामा नाला निर्माण
काठमाडौं । तनहुँको म्याग्दे गाउँपालिका–७ मा उपभोक्ताको शतप्रतिशत लगानीमा पक्की नाला निर्माण शुरु भएको छ । मिन माध्यमिक विद्यालय पछाडिको तर्फको द्वारेखोला पुल्चोकदेखि तिलाटार हुँदै रानीश्वाँरासम्मको १ किमी पक्की नाला उपभोक्ताकै शत प्रतिशत लगानीमा शुरु भएको हो । गण्डकी प्रदेश सरकारले उक्त सडक कालोपत्रे गर्न रु ५० लाख विनियोजन गरेकामा एकतर्फी पक्की नाला निर्माण नगरी सडक कालोपत्रे गर्न नमिल्ने भएपछि स्थानीय जनताले आफैँ रकम उठाएर पक्की नाला निर्माण शुरु गरेको उपभोक्ता समितिका अध्यक्ष विष्णु वाग्लेले जानकारी दिए । नाला निर्माणको लागि स्थानीय उपभोक्ताले रु १५ लाख सङ्कलन गरेका छन् । एक सय घरधुरी रहेको उक्त सडकखण्डमा हरेक घरधुरीले नाला निर्माणको लागि रकम उपलब्ध गराएका छन् । प्रत्येक घरले न्यूनतम रु १० हजारदेखि अधिकतम रु २५ हजारसम्म रकम उपलब्ध गराएको उपभोक्ता समितिका सल्लाहकार डिलबहादुर नेपालीले जानकारी गराएका छन् । । चैत महीनाभित्रमा नाला निर्माण सम्पन्न हुने त्यसपछि सडक कालोपत्रे शुरु गरिने जानकारी दिएका छन् । प्रदेश सरकारको रकमले सडक कालोपत्रे गर्न पनि नपुग्ने भएको र पक्की नाला निर्माण नभई सडक कालोपत्रे गर्न नमिल्ने प्राविधिकको सुझाव पछि स्थानीय उपभोक्ताले नै रकम सङ्कलन गरेर नाला निर्माण शुरु गरेका हुन् । नाला निर्माणका लागि तथा सामान ढुवानी गर्ने, अनुगमन गर्ने, पानी हाल्ने लगायतका काममा स्थानीय आफैँ खटिएको सल्लाहाकार नेपालीले बताए । रासस
चैत मसान्तभित्र स्ववियु निर्वाचन: मन्त्री पोखरेल
प्यूठान । शिक्षा, विज्ञान तथा प्रविधिमन्त्री गिरीराजमणि पोखरेलले २०७५ सालभित्रै स्ववियु निर्वाचन गरिसक्नुपर्नेमा जोड दिएका छन् । नेपाल पत्रकार महासङ्घ प्यूठान जिल्ला शाखाले आज मङ्गलबार नयाँबजार जुम्रीमा आयोजना गरेको पत्रकार भेटघाट कार्यक्रममा उहाँले नयाँ शैक्षिक वर्षका लागि कार्यतालिकामा सुधार गर्न सरकार लागिएकाले यही शैक्षिक वर्षभित्रै स्ववियु निर्वाचन गरेर आगामी शैक्षिक वर्ष सुधारको वर्षको रुपमा अघि बढ्नुपर्ने बताएका हुन् । उक्त कार्यक्रममा ऐन, नीति, नियम निर्माणका साथैे समाजवादउन्मुख शिक्षा प्रणाली बनाइने उनको भनाइ थियो । केही नीति पारित भएको केही निर्माणको क्रममा रहेको उल्लेख गर्दै मन्त्री पोखरेलले शिक्षा क्षेत्रको विकासमा सङ्घ, प्रदेश र स्थानीय सरकारको पनि साझा जिम्मेवारी भएको बताए ।
१६० करोडको लागतमा रविभवनमा खुल्दैछ चार तारे होटल ‘क्राउन इमेरियल’
काठमाडौँ । रविभवनमा क्राउन इमेरियल होटल सञ्चालनमा आउने भएको छ । ५ रोपनी क्षेत्रमा १५ तलाको होटल निर्माण अन्तिम चरणमा रहेको छ । डिलक्स स्तरको होटल क्राउन इमेरियल अप्रिल १६ बाट औपचारिक रुपमा सञ्चालनमा आउने जनरल म्यानेजर भरत जोशीले बताए । हाउजिङको लागि निर्माण गरिएको अपार्टमेन्टलाई नै परिमार्जन गरी होटल सञ्चालन गर्न लागिएको हो । अहिले होटल निर्माण अन्तिम चरणमा रहेको छ, केहि दिनपछि होटल पूर्ण रुपमा तयार हुनेछ, म्यानेजर जोशीले विकासन्यूजसँग भने-अप्रिल १६ तारिखमा होटलको ग्राण्ड ओपनिङ हुनेछ । स्पेन, भारत, जापान, चीनका पर्यटकलाई लक्षित गरी होटल सञ्चालनमा ल्याउन लागिएको हो । होटलले १ सय १० जनालाई रोजगारी प्रदान गर्नेछ । होटलमा किरण श्रेष्ठ, सुधिर मास्के, विश्व साख र हरिकृष्ण डंगोल गरी ४ जनाको मुख्य लगानी रहेको छ । होटल स्थापना र सञ्चालनको लागि आइसीएफसी फाइनान्स वित्तीय सहायता प्रदान गरेको छ । होटलले पर्यटन विभाग, होटल एशोसियसनबाट स्वीकृति लिइसकेको छ । यस्तो छ होटलको बिजनेश प्लान होटलले विशेष गरी कर्पोरेट मार्केट, लेजर ग्रुप र विदेशी पर्यटकलाई टार्गेटमा राखेको छ । म्यानेजर जोशीका अनुसार भारत, चीन, अमेरिका र युरोपेली पर्यटकलाई सेवा दिने तयारी गरेको छ । होटलमा १३० वटा बेड छन् । ५०० जना अट्ने ब्याङ्केट हल रहेको छ । रुफ टफ बार, रुफ टफ रेस्टुरेन्ट भने पछि मात्रै निर्माण गर्ने योजना छ । होटलमा स्वीमिङ पुल, हेल्थ क्लब लगायत अन्य सुविधा रहने छन् । सुलभ दरमै सामाजिक कार्यहरु विवाह, व्रतबन्ध लगायतका कार्यक्रम गर्न सकिने होटल व्यवस्थापनले जनाएको छ । व्यवसाय विस्तारको लागि होटलले स्पेन, भारत र लोकल स्तरमा मार्केटिङ गरिरहेको छ । १३२ वटा पुगे तारे होटल देशभर तारे होटलको संख्या १३२ वटा पुगेको छ । पर्यटन विभाग होटल शाखाका अनुसार उच्च स्तरको सेवा दिने गरी खुलेको तारे स्तरको होटल १३२ पुगेको छ । विभागका अनुसार पाँच तारे स्तरको १२, चार तारे स्तरको ८, तीन तारे स्तरको ३५, दुई तारे स्तरको ४३ र १ तारे स्तरको ३३ वटा होटल रहेका छन् । यस्तै पर्यटक स्तरको होटल संख्या ५१० पुगेको छ । सरकारले सन् २०२० लाई पर्यटन वर्षको रुपमा मनाउने तयारी गरेको छ । जसअनुसार २० लाख पर्यटक भित्र्याउने लक्ष्य समेत राखिएको छ ।
सिभिल बैंकद्वारा बाल विकास समाजलाई सहयोग
काठमाडौं । सिभिल बैंकले बाल विकास समाजलाई रु १ लाख सहयोग गरेका छन् । सिभिल बैंकका चिफ बिजिनेस अफिसर सुजितकुमार शाक्य र बाल विकास समाजका कोषाध्यक्ष सुरेन्द्र ढकाललाई सम्झौता पत्रमा हस्तान्तरण गरेका हुन् । उक्त चेक देशको भविष्य युवा पुस्ताको हातमा रहेको कुरा मनन गर्दै बाल विकास समाजलाई यो सहयोग गरिएको कुरा बैंकका चिफ बिजिनेस अफिसर सुजितकुमार शाक्यको भनाई छ । सिभिल बैंकले पाँचखालमा संचालित ‘समाज कल्याण बाल गृहका तीन अनाथ बालकहरूको कक्षा १०सम्मको सम्पूर्ण खर्च बैंकले विगत ८ वर्ष देखि ब्योहोर्दै आइरहेको छ । यस बाल विकास समाजसँग पनि बैंकले विगत ३ वर्षदेखि निरन्तर रुपमा सहभागिता जनाएको छ ।
सिटिजन्स बैंकले गर्यो आसमान नेपाललाई १ लाख आर्थिक सहयोग
काठमाडौँ । सिटिजन्स बैंक इन्टरनेसनल लिमिटेडले विभिन्न सामाजिक गतिविधि गर्दै आएको आसमान नेपाल नामक गैर सरकारी संस्थालाई आर्थिक सहयोग प्रदान गरेको छ । बैंकको केन्द्रीय कार्यालय नारायणहिटी पथमा आयोजित एक कार्यक्रम बीच एक लाखको चेक आसमान नेपाललाई हस्तान्तरण गरिएको हो । सेन्ट मेरिज स्कूलका भूतपूर्व विद्यार्थीहरूको छाता संगठन आसमान नेपालले करिव २८ वर्ष देखि शिक्षा, स्वास्थ्य, सांस्कृतिक जागरण तथा विकास जस्ता क्षेत्रमा सिमान्तकृत महिलाहरूको सशक्तिकरण तथा बालबालिकाहरूको चौतर्फी विकासका निम्ति विभिन्न परियोजनाहरू संचालन गर्दै आएको छ । यस प्रकारको सहयोगबाट महिलातथाबालबालिकाको सशक्तिकरण, सबलिकरण तथाचौतर्फी विकासमा टेवा पुग्ने विश्वास बैंकले लिएको छ ।
मोबाइल एप एनबीआई शुभारम्भ, वित्तीय साक्षरता र शैक्षिक सामाग्री समावेश
काठमाडौँ । नेशनल बैंकिङ्ग इन्स्टिच्यूट लि.(एनबीआई)ले आफ्नो स्थापनाको दशौं वार्षिकोत्सवको अवसर फागुन ५ गते संस्थागत सामाजिक उत्तरदायित्व अन्तर्गत एनबीआई नामको मोबाईल एपको समेत शुभारम्भ गरिएको छ । सो एपमा नेपालकै पहिलो बित्तीय साक्षरता सम्बन्धी जानकारीमूलक एवम् शैक्षिक सामग्री समावेश गरिएको छ । उक्त एपको समावेश वित्तीय साक्षरता सम्बन्धी भागमा वित्तीय साक्षरताको ज्ञान दिलाउने ई–किताव, सो किताव अध्ययन पश्चात परिक्षाको अवसर, बिभिन्न सफलताका कथाहरु लगायत वित्तीय साक्षरता सम्बन्धी गीत समावेश गरिएको छ । नेपालको हरेक क्षेत्रका बासिन्दाहरु अझ मुख्य रुपमा ग्रामीण क्षेत्रका बासिन्दाहरलाई वित्तीय ज्ञान अभिबृद्धि गरी समस्त आर्थिक कारोबारलाई बैंक तथा वित्तीय संस्था मार्फत गराउन अभिप्रेरित गरी देश विकासमा केही योगदान पुगोस भन्ने उद्धेश्यले यो वित्तीय साक्षरता सम्बन्धी मोवाईल एपको निर्माण गरिएको एनबीआईले जनाएको छ । प्रविधिको उचित सदुपयोग गरी देशका बिभिन्न भागमा छरिएर रहेका बैंक तथा वित्तीय संस्थामा कार्यरत कर्मचारीहरुले आ–आफ्नो क्षेत्रमा वित्तीय साक्षरता सम्बन्धी ज्ञान एवम् जानकारी प्रवाह गर्न सकिने गरी यो वित्तीय साक्षरता सम्बन्धी एपमा पावरप्वाईन्ट प्रस्तुतिकरण समेत समावेश भएको छ । गैर बैंकिङ्ग क्षेत्रमा छरिएर रहेका कोषहरुलाई बैंकिङ्ग प्रणालीमा ल्याउने प्रयोजनको लागि यो वित्तीय साक्षरता सम्बन्धी एपको प्रयोग गरी बैंकिङ्ग सम्बन्धी ज्ञान प्रवाह गर्न सकिने र यसले समग्रमा वित्तीय ज्ञान फैलाउन महत्वपुर्ण योगदान हुने एनबीआईले बिश्वास लिएको छ । यो एप नि:शुल्क रुपमा एन्ड्रोइड भर्सनको गुगल प्ले स्टोरबाट डाउनलोड गरी अफलाईन मोडमा पनि चलाउन सकिने सुबिधा रहेको छ ।
