तनहुँ हाइड्रोले तोड्यो सिएमसीसँगको ठेक्का
काठमाडौँ । नेपाल विद्युत् प्राधिकरणको सहायक कम्पनी तनहुँ हाइड्रो पावर लिमिटेडले इटालीको ठेकेदार सिएमसीसँगको ठेक्का सम्झौता तोडेको छ । तोकिएको समयमा ठेकेदार काम गर्न नआएपछि आयोजनाले ठेक्का सम्झौता तोडेको हो । “हो हामीले ठेक्का सम्झौता तोडिएको भनेर सिएमसीलाई आज पत्राचार गरेका छौँ,” प्रबन्ध–सञ्चालक प्रदीपकुमार थिकेले भने, “तोकिएको समयमा ठेकेदार नआएपछि हामीले ठेक्का सम्झौता तोडिएको पत्र पठाएका हौँ ।” कूल १४० मेगावाट क्षमताको सो आयोजनाका लागि कम्पनीले गत असोज १५ गते निर्माण व्यवसायी छनोट गरेको थियो । आयोजनाको नदी फर्काउने, बाँध लगायतका संरचना निर्माणका लागि सबैभन्दा कम बोलकबोल गर्ने इटालियन कम्पनी सिएमसी छनोट भएको थियो । आयोजनाले ठेकेदार कम्पनीसँग २० अर्ब ६४ करोड ५२ लाखमा खरीद सम्झौता गरेको थियो । सिएमसीसँगको ठेक्का सम्झौता तोडिएपछि नयाँ प्रक्रियाबाट ठेकेदार छनोटको काम अगाडि बढ्ने प्रबन्ध सञ्चालक थिकेले जानकारी दिए । लगानीकर्ता एशियाली विकास बैंक र युरोपियन इन्भेस्ट बैंक लगायतका निकायसँग आवश्यक छलफल र परामर्शपछि उपयुक्त निर्णय लिइने उहाँको भनाइ छ । सिएमसीले रु एक अर्ब ९७ करोड धरौटी राखेको थियो । कार्यसम्पादन करार सम्झौताबमोजिम जमानत जफत गर्ने प्रक्रियासमेत अगाडि बढ्ने बताइएको छ । ठेक्का सम्झौता तोडिएपछि आयोजनाको काम थप एक वर्ष ढिला हुने देखिएको छ । “हामी अहिल्यै यत्ति नै ढिला हुन्छ भनेर भन्ने अवस्थामा छैनौँ, छलफलपछि मात्रै के कति समय थप हुन्छ सो बारेमा निर्णय हुन्छ । हामी छलफलमा नै छौँ,” प्रबन्ध सञ्चालक थिकेले भने । आयोजनाले गत साउन ७ गते बोलपत्रको नतिजा सार्वजनिक गरी छनोट भएका निर्माण कम्पनीलाई कार्यसम्पादन जमानतसहित खरीद सम्झौताका लागि आउन पत्राचार गरेको थियो । दुवै कम्पनीले साउन ८ गते पत्र बुझेका थिए । पत्र बुझेको २८ दिनभित्र कम्पनीले कार्यसम्पादन जमानतसहित खरीद सम्झौताका लागि उपस्थित भएका थिए । खरीद सम्झौता भएको दुई महीनापछि निर्माण शुरु गर्ने र सम्पूर्ण निर्माण डिसेम्बर २०२३ भित्र सक्ने लक्ष्य राखिएको थियो । आयोजनाको कूल लागत अमेरिकी डलर ५० करोड ५० लाख रहेको छ ।
१३२ केभी क्षमताको स्याउले सबस्टेशन सञ्चालनमा, सुदूरपश्चिम प्रदेशमा विद्युत् सहज हुने
काठमाडौँ । डडेलधुराको स्याउलेमा १३२ केभी क्षमताको सबस्टेशन सञ्चालनमा आएको छ । प्रधानमन्त्री केपी शर्मा ओलीले आज अमरगढी नगरपालिका–१ दूधकाँडेमा सरकारको लगानीमा निर्माण भएको १३२/३३ केभी सबस्टेशनको उद्घाटन गर्नुभएपछि सुदूरपश्चिम प्रदेशमा निर्माण हुने विद्युत् आयोजनाको विद्युत् वितरण तथा केन्द्रीय प्रसारण प्रणालीमा जोड्नसमेत सहज भएको छ । सुदूरपश्चिम प्रदेशका पहाडी जिल्लामा आगामी दिनमा निर्माण हुने जलविद्युत् आयोजनाबाट उत्पादन हुने विद्युत् सोही सबस्टेशनमार्फत राष्ट्रिय प्रसारण प्रणालीमा प्रवाह गराउन पूर्वाधार तयार भएको छ । यसले त्यस क्षेत्रको विद्युत् विकासका लागि सहज वातावरण बनेको नेपाल विद्युत् प्राधिकरणले जनाएको छ । दार्चुलास्थित ३० मेगावाट क्षमताको चमेलिया जलविद्युत् आयोजनाको विद्युत् स्याउले सबस्टेशनबाटै डडेलधुरा, बझाङ, दार्जुला, डोटी, वैतडी र अछाममा वितरण हुने गरी व्यवस्था मिलाइएको छ । यसअघि प्राधिकरणले चमेलियाको विद्युत् दार्चुलाको बलाँचबाट १३१ किलोमिटर १३२ केभी प्रसारण लाइनमार्फत कैलालीको अत्तरिया पुर्याई फेरि करीब १०० किलोमिटर ३३ केभी फिडरमार्फत ती जिल्लामा आपूर्ति गर्दै आएको थियो । प्राधिकरणका कार्यकारी निर्देशक कुलमान घिसिङले स्याउले सबस्टेशन सञ्चालनमा आएपछि सुदूपश्चिमका पहाडी जिल्लाहरुमा विद्युत् प्रवाहको गुणस्तरलाई पनि बढाएको बताए । “स्याउले सबस्टेशन निर्माण हुनुभन्दा पहिला अत्तरिया सबस्टेशनबाट पहाडी जिल्लामा ३३ केभी फिडरमार्फत विद्युत् वितरण गरिन्थ्यो, जसले गर्दा कुनै एक ठाउँमा फल्ट भए पनि सबै जिल्ला अन्धकारमा बस्नुपर्ने बाध्यता थियो”, घिसिङले भने, “सो सबस्टेशनबाट विद्युत् आपूर्ति हुन थालेपछि त्यस्तो अवस्था हटेको छ । त्यस क्षेत्रको विद्युत् प्रवाहको गुणस्तर तथा विश्वसनीयता पनि पहिलाभन्दा मजबुत भएको छ ।” कूल ३० मेगावाट क्षमताको चमेलिया र नौगाड जलविद्युत् केन्द्रबाट उत्पादन भएको आठ मेगावाट गरी कूल ३८ मेगावाट विद्युत् मध्येबाट स्याउले सबस्टेशनमार्फत करीब १२ लाख उपभोक्तालाई नियमित र भरपर्दो विद्युत् आपूर्ति गरी बाँकी केन्द्रिय प्रणालीमा प्रवाह भइरहेको उनको भनाइ छ । सबस्टेशन अहिले आफ्नो क्षमताको करीब ३० प्रतिशत मात्रै सञ्चालनमा आएकाले सुदूरपश्चिम प्रदेशका पहाडी जिल्लामा खुल्ने उद्योगलाई पर्याप्त मात्रामा विद्युत् आपूर्ति गर्न सकिने प्राधिकरणले जनाएको छ । यसले सुदूरपश्चिम प्रदेशका पहाडी जिल्लामा विकास तथा आर्थिक समृद्धिका लागि महत्वपूर्ण भूमिका खेल्ने अपेक्षा गरिएको छ । अत्तरिया–डडेलधुरा–दीपायल ३३ केभी प्रसारण लाइनमार्फत डडेलधुरा र डोटीको दीपायलमा भएका ३३/११ केभीका सबस्टेशनमार्फत विद्युत्लाई ११ केभीमा परिणत गरी वितरण हुँदै आएको थियो । प्राधिकरणले डडेलधुराबाट बैतडी हुँदै दार्चुलासम्म र डडेलधुराबाट दीपायल हुँदै अछामसम्म विद्युत् आपूर्ति गर्दै आएको छ । सबस्टेशनको निर्माण आर्थिक वर्ष ०७२/७३ मा शुरु गरिएको थियो । प्रसारण लाइनको निर्माणका लागि २०७२ पुस ८ मा इस्ट इण्डिया उद्योग/वाइबा इन्फ्राटेक जेभीसँग ठेक्का सम्भौता भएको थियो । कम्पनीले ८ असार २०७५ सालमा निर्माण सकी सबस्टेशन सञ्चालनमा ल्याएको हो । जग्गाको मुआब्जा, नेपाल सरकारको ऋणको ब्याज र आयोजनाको प्रशासिनक खर्चसमेत गरी सबस्टेशन ४५ करोडमा निर्माण सम्पन्न भएको प्राधिकरणले जनाएको छ । रासस
जनजागरण पुस्तकालय र रिड नेपालबीच अपांगता समावेसी विपद जोखिम न्यूनिकरण गर्ने सम्झौता
काठमाडौं । नुवाकाेटकाे श्री जनजागरण सामुदायिक पुस्तकालय स्रोत केन्द्र र रिड नेपालबीच नेपालमा अपांगता समावेसी विपद जोखिम न्यूनिकरण प्रवर्धन परियोजनाको सम्झौता भएको छ । मंगलबार स्थानिय जनप्रतिनिधि समुदाय रिड नेपाल र पुस्तकालय व्यवस्थापन समितिको उपस्थितिमा उक्त सम्झौता भएको हो । उक्त परियोजना रिड नेपाल र एएसविको आर्थिक सहयोगमा बन्दै छ । जसको समय अवधि दुुई वर्षको रहेको कार्यक्रममा जनाइएको छ ।
अजोड इन्स्योरेन्स र मेगा बैंक नेपालबीच बीमा सेवा सम्झौता
काठमाडाैं । अजोड इन्स्योरेन्स र मेगा बैंक नेपालबीच सहकार्य गर्दै बीमा सेवा प्रदान गर्ने सम्झौता भएको छ । सम्झौता पत्रमा अजोड इन्स्योरेन्सका प्रमुख कार्यकारी अधिकृत कुमारबहादुर खत्री तथा मेगा बैंकका सहायक नायव प्रमुख कार्यकारी अधिकृत रभिना देशराज श्रेष्ठले हस्ताक्षर गरेका हुन् । सम्झौता बमोजिम बैंकका ग्राहकहरूले अजोड इन्स्योरेन्सले प्रदान गर्ने निर्जीवन बीमा सम्वन्धी सम्पूर्ण सेवा सुविधा बैंकका सबै शाखाबाट लिन सकिने भएको छ ।
आर्थिक रुपान्तरणका लागि ढोका खुल्योः राष्ट्रपति भण्डारी
काठमाडौँ । राष्ट्रपति विद्यादेवी भण्डारीले लामो समयको राजनीतिक सङ्क्रमण र अन्योलतालाई चिर्दै गठन भएको स्थिर सरकारले मुलुकमा सामाजिक, आर्थिक रुपान्तरणको ढोका खोलेको बताएकी छिन् । राष्ट्रपति भण्डारीले राष्ट्रलाई समुन्नत बनाउने यस महत्वपूर्ण अवसरको पूर्ण सदुपयोग गर्न सबै राजनीतिक दल, प्रवुद्ध वर्ग र आम समुदायको एकता, सक्रिय सहयोग र सहकार्यको आवश्यकता रहेको औँल्याइन् । ‘तेस्रो निर्वाचन दिवस–२०७५’ को अवसरमा निर्वाचन आयोगद्वारा आज राजधानीमा आयोजित कार्यक्रमलाई सम्बोधन गर्दै राष्ट्रपति भण्डारीले राजनीतिक सङ्क्रमणको अन्त्य, संविधानको घोषणा र तीनै तहको निर्वाचन सम्पन्न गरी देशलाई निश्चित दिशा प्रदान गर्न राजनीतिक दल, नागरिक समाज र सबै नेपालीको उत्साहपूर्वक सहभागिता स्मरणीय रहेको उल्लेख गरिन् । मुलुकले सङ्घीय लोकतान्त्रिक गणतन्त्रको माध्यमद्वारा सामाजिक न्यायमा आधारित समतामूलक समाजको परिकल्पना गर्दै समाजवाद उन्मुख अर्थतन्त्र निर्माणको लक्ष्य लिएको बताउँदै उनले ‘समृद्ध नेपाल र सुखी नेपाली’को राष्ट्रिय संकल्प, मुलुकको आर्थिक सामाजिक समृद्धिको संवैधानिक मार्गचित्र अनुकूल भएकाले सबै राजनीतिक दल र सम्बद्ध पक्षलाई एकबद्ध भएर अघि बढ्न आग्रह गरिन् । प्रमुख निर्वाचन आयुक्त अयोधीप्रसाद यादवले विसं २०१५ साल फागुन ७ गते आमनिर्वाचन आरम्भ भएको दिनको सम्झनामा निर्वाचन दिवस मनाउन थालिएको जानकारी दिँदै आयोगको कार्य सम्पादनका लागि १० ऐन, आठ नियमावली तथा नीति निर्देशिका र आचारसंहिता रहेको बताए । नेपालको संविधानको सफल कार्यान्यवनका लागि तीन चरणको निर्वाचनपछि ऐतिहासिक सफलता मिलेको बताउँदै उनले नेपाली जनतालाई समृद्ध बनाएर सुखी नेपाली बनाउन मुलुक अग्रसर रहेकोमा खुशी व्यक्त गरे । कार्यक्रममा निर्वाचन आयुक्त इला शर्माले प्रजातन्त्र दिवसका अवसरमा निर्वाचन दिवस मनाउन पाउँदा यसको महत्व अझ बढेको उल्लेख गर्दै निर्वाचन स्वतन्त्र र मर्यादित बनाउन आयोगले रणनीतिक योजना निर्माण गरी सुधारका काम गरिरहेको जानकारी दिए । कार्यक्रममा उपराष्ट्रपति नन्दबहादुर पुन, सभामुख कृष्णबहादुर महरा, राष्ट्रियसभाका अध्यक्ष गणेशप्रसाद तिमिल्सिना, गृहमन्त्री रामबहादुर थापा, पूर्वप्रधानमन्त्री झलनाथ खनाललगायत उच्च पदस्थ कर्मचारी, सुरक्षा प्रमुख, विभिन्न क्षेत्रका विशिष्ट व्यक्ति तथा कूटनीतिक नियोगका प्रतिनिधिहरुको सहभागिता थियो । रासस
शाइन रेसुङ्गा डेभलपमेण्ट बैंकद्धारा प्रदेश ५ नं.काे ट्राफिक प्रहरी कार्यालयलाई सहयोग
काठमाडौं । शाइन रेसुङ्गा डेभलपमेण्ट बैंकद्धारा ५ नं. प्रदेश ट्राफिक प्रहरी कार्यालयलाई सहयोग गरेको छ । बैंकले ११ औं बर्ष प्रवेशकोे अवसरमा सडक दुर्घटना न्युनिकरण गर्न ५ नं. प्रदेश ट्राफिक प्रहरी कार्यलय बुटवललाई सडक स्पीड ब्रेकर तथा कोन हस्तान्तरण गरेको हो । बैंकका संस्थापक अध्यक्ष थानेश्वर पौडेल, सञ्चालक मोहन चापागाई, संस्थापक सञ्चालक श्रीकृष्ण पोखरेल र प्रमुख कार्यकारी अधिकृत प्रकाश पौडेलले ५ नं. प्रदेश ट्राफिक प्रहरी कार्यालय बुटवलका प्रमुख प्रहरी उपरीक्षक गणेश चन्दलाई स्पीड ब्रेकर तथा कोन हस्तान्तरण गरेका हुन् । कार्यक्रममा बोल्दै प्रहरी उपरीक्षक चन्दले बुटवल भैरहवा सडक ६ लेण्डको सडक भएपनि सबै ठाउमा आकाशेपुल नभएकाले ठाउ ठाउमा जेब्रा क्रसिङ्गराख्दा दुर्घटना भईरहेकाले यस्ता स्पीड ब्रेकर दुर्घटना न्युनिकरणका लागि पहिलो उपाय भएको बताए । स्थानीय समाजसेबि तथा पुर्व वडाअध्यक्ष होम बहादुर गलामीले कालिकानगर क्षेत्रमा दुर्घटना बढेपछी सहयोगीहरु खोजी भइरहेको अवस्थामा शाइन रेसुङ्गा डेभलपमेण्ट बैंकले आफै सडक स्पीड ब्रेकर व्यवस्थापनका लागि सहयोग गरेका छन् । सो अवसरमा बैकका प्रमुख कार्यकारी अधिकृत प्रकाश पौडेलले स्थानीय पूँजी, स्थानीय श्रम, स्थानीय विकास, स्थानीय सम्बृद्धि भन्ने मूल नारा अवलम्वन गरेको बैकले स्थानीय क्षेत्रमा सामाजिक उत्तरदायित्व बहन गर्नुपर्छ भनि दुर्घटना न्युनिकरणका लागि स्पीड ब्रेकर हस्तान्तरण गरेको बताए । .
प्रधानमन्त्री ओलीले भने-यही सरकारले पश्चिम सेती निर्माण गर्छ
अमरगढी । प्रधानमन्त्री केपी शर्मा ओलीले पश्चिम सेती जलविद्युत् आयोजना यसै सरकारको पालामा निर्माण हुने बताएका छन् । नेपाल विद्युत् प्राधिकरण स्याउले १३२/३३/१२१ केभी सबस्टेशन उद्घाटन गर्न डडेल्धुरा अमरगढी नगरपालिका–१ दूधकाँडेमा पुग्नुभएका प्रधानमन्त्री ओलीले सुदूरपश्चिम प्रदेशमा विधुतीकरण, सडक यातायात, शिक्षा बेरोजगारजस्ता समस्या समाधान गर्ने बताए । डडेल्धुरासहित सुदूरपश्चिमका विभिन्न जिल्ला भारतसँग जोडिएका क्षेत्रमा पक्की पुल हुने ठाउँमा पक्की पुल बनाउने, सम्भावना भएका ठाउँमा झोलुङ्गे पुल र पक्की तथा झोलुङ्गे पुलको सम्भावना नभएका स्थानमा तुइन विस्थापित गर्दै केबुलकार सञ्चालन गरिने प्रधानमन्त्री ओलीले बताए । उनले भने, “सरकारले बेरोजगारिताको अभियानका लगि केही भत्ता दिनेजस्ता काम गरिरहेका छौँ ।” सो अवसरमा सुदूरपश्चिम प्रदेशका मुख्यमन्त्री त्रिलोचन भट्ट, ऊर्जा जलस्रोत तथा सिँचाइमन्त्री वर्षमान पुन, भौतिक पूर्वाधार तथा निर्माणमन्त्री रघुवीर महासेठ, सुदूरपश्चिम प्रदेशका भौतिक पूर्वाधर विकासमन्त्री पठानसिंह बोहरा र नेपाल विद्युत् प्राधिकरण कार्यकारी निर्देशक कुलमान घिसिङ लगायतको उपस्थिति थियो । रासस
छायाँ सेन्टरको पत्रकार सम्मेलनमा स्थानीयवासीको अवरोध, झण्डै कुटाकुट
काठमाडौ । ठमेलको छायाँ सेन्टरले आयोजना गरेको कार्यक्रममा स्थानीयबासीले चर्को आक्रोश व्यक्त गरेका छन् । सार्वजनीक पोखरी मासेर कम्प्लेक्स बनाएको भन्दै स्थानीयबासीले कार्यक्रम स्थलमै विरोध जनाएका हुन् । करीब ५ जनाको समूहमा आएका स्थानीयबासीले चर्को स्वरमा असहमतिका भाषा प्रयोग गरेका थिए । सोही समूहका एक जनाले भने- पोखरी मासेर छायादेवी बनाउने भए कुनै दिन रानीपोखरी नै मासेर मायादेवी बनाएको पनि सर्वसाधारणले टुलुटुलु हेरेर बस्न बाध्य हुने दिन आउन सक्छ । चरम निराशामा रहेको जस्तो देखीने उनीहरुले आफूहरु माथि भौतिक आक्रमण नै भएपनि विरोध गर्न नछाडने जनाएका थिए । यसरी कार्यक्रममा छाँया सेन्टरका प्रबन्ध निर्देशक महेश श्रेष्ठले आफूहरु कानुनी रुपमा सही रहेको कुरा व्यक्त गरेपश्चात स्थानीयले यस्तो हर्कत देखाएका हुन् । उनीहरुले त्यहाँको पोखरी व्यक्तीगत सम्पती हुनै नसक्ने र सो प्रमाण आफूहरुसँग रहेको भन्दै पुस्तकको समेत प्रदर्शन गरेका थिए । यस किसीमले आफना असहमति राखेपछि सो समूह नारावाजी गर्दै कार्यक्रम स्थलबाट बाहीरीएका थिए । नाराबाजीको आशयपनि छाँयादेवीले सार्वजनिक जग्गा हडप्न नपाउने भन्नेमा नै केन्द्रीत रहेको थियो । यसरी स्थानीयले चर्का स्वरमा हल्ला गरेपछि छाँया सेन्टरका प्रबन्ध निर्देशकले आफूहरुलाई हल्ला र आक्रोशले भन्दापनि अदालती कागजमा दोषी प्रमाणीत नभएकाले बखेडा उत्पन्न गरेर केही फरक नपर्ने मत जाहेर गरे । लगानी खुलासा गर्नबाट तर्कियो छाँया सेन्टर छाँया सेन्टरले आफ्नो सेयर लगानी क कसले, कुन प्रकृयामा कति राखेको जस्ता कुरा पारादर्शी बनाउनबाट तर्किएको पाईन्छ । पत्रकार सम्मेलनमा सो कुराको माग हुदा छाँया कम्प्लेक्सले त्यसको बे वास्ता गरेको थियो ।
