दुई चिनियाँ फर्ममाथि प्रतिबन्ध लगाउने अमेरिकी घोषणा, उत्तर कोरियालाई सहयोग गरेको आरोप
सियोल । संयुक्तराज्य अमेरिकाले दुईवटा चिनियाँ सिपिङ कम्पनीमाथि राष्ट्रसङ्घीय प्रतिबन्धको बेवास्ता गरी उत्तर कोरियालाई सहयोग गरेको आरोपमा प्रतिबन्ध लगाउने घोषणा गरेको छ । उक्त कदमले अमेरिकाको उत्तर कोरियामाथि थप दबाब सिर्जना गर्ने उद्देश्य यथावत रहेको देखिएको छ । अमेरिकी अर्थ मन्त्रालयले चीनका दुई कम्पनीहरु डालियान हाइबो इन्टरनेसनल फ्राइट र लाओनिङ डानझिङ इन्टरनेसनल फर्वार्डिङमाथि प्रतिबन्ध लगाएको जनाएको छ । उत्तर कोरियाबाट उत्पादित कोइला एक जहाजबाट अर्को जहाजमा राखेर अन्तर्राष्ट्रिय बजारमा बिक्री गरेको अमेरिकी आरोप छ । यस्तो धन्धामा अरु एक दर्जन कम्पनी संलग्न रहेको भन्दै सूक्ष्म अनुसन्धान भइरहेको अमेरिकाको अर्थ मन्त्रालयले जनाएको छ । भियतनाममा अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ अनबीचको वार्ता विफल भएपछि पछिल्लो प्रतिबन्ध लगाइएको छ । अमेरिकाले उत्तर कोरियामाथि आणविक हातहतियारको उत्पादन र क्षेप्यास्त्र प्रणाली विकास कार्यक्रम स्थगित गर्न एवं आफूसँग रहेका सबै किसिमका आणविक अस्त्र नष्ट गर्न दबाब दिइरहेको छ । उत्तर कोरियाले भने राष्ट्रसङ्घीय प्रतिबन्धहरु तत्काल फुकुवा हुनुपर्ने शर्त राखेको छ । “संयुक्तराज्य अमेरिका र यसको दृष्टिकोणसँग मिल्दाजुल्दा साझेदारहरु उत्तर कोरियाले आफ्नो आणविक कार्यक्रम पूर्ण रुपमा त्यागोस् भन्ने चाहन्छन्,” अर्थ मन्त्री स्टिभेन मन्चिनले जारी गर्नुभएको वक्तव्यमा उल्लेख छ । सन् २०१७ मा उत्तर कोरियाले आणविक हातहतियार र ब्यालेस्टिक क्षेप्यास्त्रको परीक्षण गरेलगत्तै राष्ट्रसङ्घले उत्तर कोरिया विरुद्ध विभिन्न प्रतिबन्धहरु घोषणा गरिएको छ । उक्त प्रतिबन्धहरुमा उत्तर कोरियाले प्रशोधित पेट्रोलियम पदार्थ आयात गर्न र कोरियाबाट कोइला निर्यात गर्न नपाइने रहेका छन् । अमेरिकी अर्थ मन्त्रालयका अनुसार गत वर्ष कम्तीमा २६३ ट्याँकर प्रशोधित पेट्रोलियम गैरकानुनी किसिमबाट उत्तर कोरिया भित्रिएको थियो । यदि ती ट्याँकर पूरा भरिएको अवस्थामा रहेका भए कोरियाले करिब ३७ लाख ८० हजार ब्यारेल इन्धन आयात गरेको देखिन्छ । राष्ट्रसङ्घले तोकेको भन्दा यो झण्डै ८ गुणा बढी आयात हो । प्रति वर्ष पाँच लाख ब्यारेल तेल मात्र उत्तर कोरियाले आयात गर्न पाउने गरी राष्ट्रसङ्घले सीमा तोकेको छ । रासस/योनहाप
४० मेगावाटको माथिल्लो चमेलिया जलविद्युत आयोजना बन्दै, मंसिरदेखि निर्माण शुरु हुने
काठमाडौँ । अपी पावर कम्पनीले आफ्नो सहायक कम्पनी अपी चमेलिया पावर लिमिटेड मार्फत नयाँ आयाजनाको रुपमा माथिल्लो ४० मेगावाट क्षमताको माथिल्लो चमेलिया जलविद्युत आयोजनाको निर्माण कार्य आगामी आर्थिक वर्षबाट शुरु गर्ने भएको छ । सुदूर पश्चिमाञ्चल क्षेत्रको दुर्गम जिल्लामा अवस्थित यो आयोजना कम्पनीले निर्माण गरेको तेस्रो आयोजना हो । ४० मेगावाटको माथिल्लो चमेलिया जलविद्युत आयोजना आयोजना निर्माणको लागी ७४० करोड लगानी लाग्ने अनुमान गरिएको छ । यसको ३० प्रतिशतले हुने २२२ करोड शेयरधनीको लगानी र बाँकी ५१८ करोड बैंक तथा वित्तीय संस्थाहरुबाट सह वित्तीयकरण मार्फत ऋण लगानी गरिने कम्पनीले जनाएको छ । आयोजनाको निर्माण कार्य २०७६ मंसिरदेखि सुरु गरी ३६ महिनामा सम्पन्न गर्ने लक्ष्य रहेको छ । यो आयोजना सरकारले गर्ने लागेको लगानी सम्मेलनमा समेत नीजि क्षेत्रबाट विकास गरिएको आयोजनामा छनौट समेत भएको छ ।सरकारले लगानी मैत्रीवातावरण बनाउन सकेमा आगामी दिनहरुमा कम्पनीले लगानी योग्य आयोजनाहरु बनाउँदै जाने जनाएको छ ।कम्पनीले निर्माण गर्न लागेको चमेलिया जलविद्युत आयोजनाको शेयर सर्वसाधारण लगानीकर्ताको लागी आव्हान समेत गरेको छ । विद्युत खरिद सम्झौतामा प्राधिकरणका कार्यकारी अधिकृत कुलमान घिसिङ र अपि पावर कम्पनीका तर्फबाट कार्यकारी सञ्चालन सञ्जिव न्यौपानेले हस्ताक्षर गरिसकेका छन् । यसअघि कम्पनीले ८.५ मेवा क्षमताको नौगाड साना जलविद्युत आयोजना निर्माण सम्पन्न गरी विगत २ बर्ष देखि निरन्तर रुपमा राष्ट्रिय प्रणाली विद्युत प्रवाह गर्दै आएको छ । साथै आगमी चैत मसान्तभित्र ८ मेवा क्षमताको माथिल्लो नौगाड साना जलविद्युत आयोजना निर्माण सम्पन्न हुने कम्पनीले जनाएको छ । आयोजना नेपाल सरकार नेपाल विद्युत प्राधिकरणले निर्माण सम्पन्न गरेको अत्तरिया बलाच १३२ के.भि.ट्रान्समिसन लाइनमा जडान गरिनेछ ।
एभरेष्ट बैंकको विशेष योजना, भिसा कार्ड मार्फत भुक्तानी गर्दा १० प्रतिशत नगद फिर्ता
काठमाडौं । एभरेष्ट बैंक लिमिटेडले आफ्ना ग्राहकहरुका लागि विशेष योजना ल्याएको छ । विशेष योजना अन्तरगतबैंकका कार्ड होल्डरहरुले हरेक खरिदमा १० प्रतिशत नगद फिर्ता पाउने छन् । एभरेष्ट बैंकका ग्राहकहरुले रेष्टुरेन्ट, होटल, मल र सुपरमार्केटमा भिसा कार्डमार्फत भुक्तानी गर्दा १० प्रतिशत रकम उनीहरुको खातामा फिर्ता हुन्छ । एभरेष्ट बैंकका ग्राहकहरुको संख्या १० लाख भन्दा बढि रहेको जनाइएको छ । एभरेष्ट बैंकले हाल आफ्ना ९२ वटा शाखाहरु, २८ राजश्व संकलन काउन्टर र ११६ एटिएम मार्फत सेवाहरु प्रदान गर्दै आएको छ ।
ओम समाजले गर्याे पहिलो डेन्टल मोबाइल भ्यानकाे उद्घाटन
काठमाडौं । ओम समाज डेन्टल होमले नेपालमा पहिलो पटक डेन्टल मोबाइल भ्यानबाट दाँतको उपचार सेवाको शुरु गरेको छ । डेन्टल होम चावहिलको आयोजनामा अन्तराष्ट्रिय मुख दिवस २०१९काे अवसरमा साे सम्वन्धी कार्यक्रमका साथै डेन्टल मोबाइल भ्यान उद्घाटन गरेको हो । प्रदेश नं ३ का प्रदेश सदस्य नरोत्तम बैध र कामपा वडा नं. ७ का अध्यक्ष सुद्धकुमार डंगोल लगायत समाजका लब्धप्रतिष्ठित व्यक्तिहरु र डेन्टलका डाक्टर, कार्मचारीको उपस्थिति रहेको उक्त कार्यक्रममा मन्त्री परिषदका पूर्व अध्यक्ष खिलराज रेग्मीको प्रमुख आतिथ्यतामा सम्पन्न भएको हो । कार्यक्रममा बोल्दै मन्त्री परिषदका पर्व अध्यक्ष खिलराज रेग्मी मुलको स्वस्थ्य नै शरिर स्वास्थ्य हो जानकारी दिए । कार्यक्रममा आयोजक डक्टर सुभाष घिमिरेले मुख स्वास्थ्य राख्ने सकेमा ९० प्रतिशत रोग चेट हुने बताउँदै मुखको माध्यमबाट भित्र जाने हुँदा मद्यपान र धुम्रपानबाट टाढा रहनु पर्ने जनाए ।
बैदेशिक लगानीः उद्योग दर्ता १८ प्रतिशत बढेपनि लगानी प्रतिवद्धता रकममा ५८ प्रतिशतले कमी
काठमाडौँ । अर्थतन्त्रको मेरूदण्डका रूपमा रहेको उद्योग क्षेत्रमा बैदेशिक लगानीको प्रतिबद्धता रकममा ५८ प्रतिशतले कमी आएको छ । आर्थिक वर्ष २०७४/०७५ को साउनदेखि चैत सम्मको ८ महिना र चालु आर्थिक वर्षको सोही अवधिको तथ्याङ्कले यस्तो देखाएको हो । लगानी प्रतिबद्धतामा कमी आएपनि उद्योग दर्ताको संख्या भने १८ प्रतिशतले बढेको छ । उद्योग विभागको तथ्याङ्क अनुसार २०७४ साउनदेखि चैत ३ गतेसम्म १९४ वटा उद्योगमा ३ अर्ब ४१ करोडको लगानी प्रतिवद्धता आएको थियो । तर, २०७५ साउनदेखि चैत ३ गतेसम्म २२९ वटा उद्योगमा १५ अर्ब ६४ करोड १० मात्रै लगानी प्रतिवद्धता आएको छ । गत वर्षको तुलनामा यो वर्ष उद्योगमा २२ अर्ब ४० करोड रकम लगानी प्रतिबद्धतामा कमि आएको उद्योग विभागको तथ्याङ्कले देखाउँछ । तथ्याङ्क अनुसार अघिल्लो वर्षको तुलनामा यो वर्ष लगानी प्रतिबद्धता ५८ प्रतिशत कम हो । यता, अघिल्लो वर्षको ८ महिनामा १९४ वटा उद्योग दर्ता भएका थिए भने चालु आर्थिक वर्षको सोही अवधिमा २२९ वटा दर्ता भएका छन् । यसरी तुलना गर्दा यो वर्ष ३५ वटा बढी उद्योग दर्ता भएका छन् । तथ्याङ्क अनुसार अघिल्लो वर्षको तुलनामा चालु आर्थिक वर्षको ८ महिनामा उद्योग दर्ता १८ प्रतिशत बृद्धि भएको देखिन्छ । अहिल्लो वर्षको साउनदेखि चैतसम्म उद्योगहरुमा ७ हजार ५०० जनालाई रोजगारी दिने प्रतिबद्धता थियो भने चालु आर्थिक वर्षको सोही अवधिमा दर्ता भएका उद्योगहरुमा ८ हजार ३११ जनालाई रोजगारी दिने प्रतिबद्धता आएको छ । चालु आर्थिक वर्षको दर्ता भएका उद्योगहरु मध्ये सबैभन्दा बढी सेवामूलक प्रकृतिका छन् । सो प्रकृतिको उद्योगको संख्या ७६ वटा रहेको छ । त्यस्तै, पर्यटन क्षेत्रमा ७१ वटा, उत्पादनमूलक क्षेत्रमा ५५ वटा, कृषि तथा बन पैदावरमा आधारित ९ वटा र सञ्चार क्षेत्रमा ३५ वटा गरी २२९ वटा संख्यामा उद्योग दर्ता भएका छन् । २०७४ साउनदेखि चैतसम्म दर्ता भएका उद्योगहरुमध्ये सबैभन्दा बढी सेवामूलक प्रकृतिका थिए । ती मध्ये उद्योगको संख्या ७१, पर्यटन क्षेत्रमा ६१, उत्पादनमूलक क्षेत्रमा ३९, कृषि तथा बन पैदावरमा आधारित ११, उर्जा क्षेत्रमा ३, सञ्चार क्षेत्रमा ३ र इन्फर्मेसन टेक्नोलोजीको क्षेत्रमा १७ वटा गरी १९४ वटा उद्योग दर्ता भएको थिए । प्रत्यक्ष बैदेशिक लगानी महाशाखाका प्रमुख प्रशान्त बोहोराले अघिल्लो वर्ष हाइड्रोमा लगानी आएको थियो र लगानी बढी देखिएको थियो भने यो वर्ष हाइड्रो दर्ता नभएकोले लगानी प्रतिबद्धतामा कमी देखिएको बताए ।
गोर्खाज फाइनान्सको ब्राण्ड एम्बेसडरमा मेलिना राई, व्यवसाय प्रर्वद्धनमा सहयोग पुग्ने
काठमाडौं । गोर्खाज फाइनान्स लिमिटेडको ब्राण्ड एम्बेसडरमा गायिका मेलिना राई नियुक्त भएकी छिन् । फाइनान्सले नेपाली संगित क्षेत्रका गायिका राईलाई शुक्रबार एक कार्यक्रमकाबीच संस्थाको ब्राण्ड एम्बेसडरमा नियुक्त गर्ने सम्बन्धी एक सम्झौतापत्रमा हस्ताक्षर गरेको हो । उक्त सम्झौतापत्रमा फाइनान्सका प्रमुख कार्यकारी अधिकृत(सीईओ) लालबहादुर थिङ र गायिका राईले हस्ताक्षर गरेका छन् । सो सम्झौतासँगै गायिका राईले अब एक वर्षसम्म संस्थालाई एम्बेसडरको रुपमा सहयोग गर्ने छिन् । कार्यक्रममा संस्थाका अध्यक्ष प्रेमबहादुर खापुङ्गले गायिका राईसँगको सहकार्यले फाइनान्सको व्यापार व्यवसाय प्रवद्र्धनमा तीव्र गतिले फड्को मार्ने तथा संस्थागत सामाजिक उत्तरदायित्वमा पनि टेवा पुग्ने बताएका छन् । त्यस्तै, एम्बेसडर राईले देश तथा विदेशमा आफ्ना सोचहरुसँगै गोर्खाज फाइनान्सको व्यवसाय प्रर्वद्धनमा संस्थालाई सहयोग गर्ने बताएकी छिन् । राष्ट्रिय स्तरको यस संस्थाको चुक्ता पुँजी ८७ करोड रुपैयाँ रहेको छ । गत दोश्रो त्रैमासिकको वित्तीय विवरण अनुसार यस संस्था सबैभन्दा बढी चुक्ता पुँजी र नाफा कमाउनेमा फाइनान्स संस्थाहरु मध्ये दोश्रो हुन सफल रहेको संस्थाले बताएको छ । कार्यक्रममा फाइनान्सका अध्यक्ष प्रेमबहादुर खापुङ्ग, गोर्खा समूहका संयोजक पुरञ्जन राई, फाइनान्सका पूर्व अध्यक्ष महेन्द्रलाल राई तथा संस्थाका कम्पनी सचिव मुकुन्द श्रेष्ठको उपस्थिती रहेको थियो ।
सुनको मूल्य प्रतितोला २ सय रुपैयाँले घट्यो
काठमाडौं । शुक्रबार सुनको मूल्य प्रतितोला २ सय रुपैयाँले घटेको छ । विहिबार प्रतितोला ६० हजार २ सय रुपैयाँमा बिक्री भएको सुन शुक्रबार प्रतितोला ६० हजारमा कारोबार भईरहेको छ । शुक्रबार तेजावी सुन विहिबारको तुलनामा प्रतितोलामा २ सय रुपैयाँ घटेर ५९ हजार ७ सय रुपैयाँमा कारोबार भईरहेको छ । त्यस्तै चाँदी प्रतितोला ७४० रुपैयाँमा कारोबार भईरहेको छ ।
भारतीय भन्सारमा अनलाइन सेवा सञ्चालन, रोकिएका ट्याङ्कर नेपाल भित्रिए
बाँके । भारतीय भन्सारले अनलाइन सेवामा समस्या देखिएको भन्दै रुपैडिहामा रोकेका पेट्रोलियम पदार्थ बोकेका १४० ट्याङ्कर नेपाल भित्रिएका छन् । अनलाइनमा समस्या आएपछि ट्याङ्करसँगै फलफूल र तरकारी बोकेका दर्जन बढी ट्रक पनि दुई दिनसम्म सीमामै रोकिएका थिए । नेपालगन्ज भन्सार कार्यालयका अधिकृत शरदकुमार केसीका अनुसार पेट्रोलियम पदार्थ बोकेका ट्याङ्कर भारतीय भन्सारमा अनलाइन सेवा सञ्चालन भएपछि बिहीबार राति नेपाल भित्रिएको बताए । भारतले भन्सारमा अनलाइन प्रविधि लागू गरेपछि विभिन्न समयमा नाकामा समस्या हुँदै आएको उनले बताए । भारतको बहराइच नजिकै अप्टिकल फाइबरमा समस्या आएर अनलाइन दर्ता नभएपछि ट्याङ्करसँगै अन्य मालबाहक ट्रकहरु रुपैडिहामै रोकिएका थिए । रु १० लाखभन्दा बढी ‘इनभ्वाइस’को सामानलाई भन्सार ‘क्लियर’ गराउन भारतीय भन्सारका डेपुटी कमिस्नरको अनुमति लिनुपर्छ । गए राति मात्रै इन्धन आयात नभएको भए नेपालगञ्ज आसपासको क्षेत्रमा इन्धन अभाव हुनसक्ने देखिएको थियो । नेपाल आयल निगम इन्धन डिपो नेपालगञ्जका प्रमुख अभिषेककुमार ठाकुरले सबै ट्याङ्कर नेपाल भित्रिएकाले इन्धन अभाव नहुने बताए । यो क्षेत्रमा निगमले डिजेल र पेट्रोल गोन्डाबाट, एटीएफ इलहावाद र एलपी ग्यास मथुराबाट आयात गर्दै आएको छ । डिपो प्रमुख ठाकुरका अनुसार निगमको डिपोमा एक हप्तालाई पुग्ने डिजेल र तीन दिनलाई पुग्ने गरी पेट्रोल भण्डारण क्षमता छ । सीमामा एक्सरे मेसिन अलपत्र भन्सार कार्यालयमा सीमाक्षेत्रमा निगरानी राख्न सहयोगी हुने दुई एक्सरे मेसिन एक वर्षदेखि गोदामै थन्किएका छन् । नेपाल प्रवेश गर्ने विन्दुमा सर्वसाधारण आवातजावत गर्दा ल्याउने÷लैजाने हरेक सामानको जाँच गर्ने मेसिन प्रयोगविहीन भएका हुन् । एउटा वाकथ्रु गेट छ भने अर्को लगेज जाँच्ने मेसिन छ । दुवै मेसिन रु एक करोड बढी मूल्यको रहेको भन्सार कर्मचारीले बताएका छन् । ती मेसिन एक वर्षअघि नेपालगञ्ज ल्याइएका थिए । यस्तै प्रकारको मेसिन विराटनगर पनि पठाइएको र त्यहाँ पनि प्रयोग नभएको कर्मचारीको भनाइ छ । नेपालगञ्ज नाका हुँदै अहिले जोकोहीले चाहेमा जस्तोसुकै सामान लयाउन सक्छन् । त्यसलाई रोक्न प्रहरी, प्रशासन र स्वयं भन्सारका लागि उपयोगी हुने मेसिन भने त्यसै थन्किएको छ । भन्सारले मेसिन राख्ने उपयुक्त ठाउँ खोज्दाखोज्दै एक वर्ष बितेको बताएको छ । नेपाल प्रवेश गर्ने गेट नजिक सबैभन्दा उपयुक्त हुने भए पनि त्यहाँ मन्दिरका सटरहरु छन् । उक्त सटरमा मेसिन राख्न उपयुक्त हुने भए पनि मन्दिर सञ्चालक गुठीले भन्सारलाई सटर दिन आनाकानी गरेको छ । त्यस्तै भन्सारकै तल्लो क्षेत्रको विन्दुमा अब मेसिन राख्ने तयारी भइरहेको भन्सार कार्यालयका प्रमुख शान्तिराम निरौलाले बताए । उनले आफू आउनुअघि नै उक्त मेसिन आएको र जतिसक्यो छिटो मेसिन जडान गर्ने जानकारी दिए । रासस
