स्वीटजरल्याण्डले गर्यो करीब १५ अर्ब सहयोगको घोषणा, ‘सामाजिक विकास र उद्यमशीलता बढाउनू’
काठमाडौँ । स्वीटजरल्याण्ड सरकारले नेपालको सामाजिक–आर्थिक विकासमा सघाउन १४ अर्ब ७० करोड उपलब्ध गराउने घोषणा गरेको छ । समावेशी सङ्घीय राज्य निर्माण, रोजगारी तथा आय प्रवद्र्धन, सुरक्षित आप्रवासन, लैङ्गिक समानता, सामाजिक समावेशिता, विपद् जोखिम घटाउनेलगायत कार्यक्रम कार्यान्वयन गर्न उक्त रकम प्रदान गर्ने घोषणा भएको हो । स्विस विकास सहयोग नियोग (एसडिसी) ले नेपालको विकास प्रयासमा साझेदारी गरेको ६०औँ वर्ष प्रवेशका सन्दर्भमा नेपालको औपचारिक भ्रमणमा रहनुभएका एसडिसीका महानिर्देशक म्यानुएल सागरले आज ललितपुरमा सञ्चारकर्मीमाझ सन् २०१८–२०२१ का निम्ति उक्त रकम नेपाललाई उपलब्ध गराइने बताए । “विकासको मूल प्रवाहमा समाहित नभएका तथा पिछडिएका महिलावर्गको आर्थिक–सामाजिक विकास र उद्यमशीलता प्रवद्र्धनमा हाम्रो सहयोग केन्द्रित छ,” २४ वर्षमुनिका नेपालका उत्पादनशील युवा पुस्तालाई नयाँ नेपाल निर्माणमा प्रोत्साहन गर्नुपर्नेमा जोड दिँदै उनले भने । पाँच दिवसीय नेपाल बसाइका क्रममा आफूले स्विस सहयोगमा रामेछापमा सञ्चालित विकासका परियोजनाबारे जानकारी लिएको तथा अर्थमन्त्री, परराष्ट्र सचिव, नेपालको विकासका साझेदारलगायत नेपाल सरकारका वरिष्ठ अधिकारीलाई भेटेर शान्ति, स्थायित्व, मानवअधिकार प्रवद्र्धनका क्षेत्रमा स्विटजरल्याण्डले नेपालसँग साझेदारी गरिरहने जानकारी उनले दिए । नेपालका लागि स्विटरल्याण्डका राजदूत एलिजावेथ फ कपेलरले प्रधानमन्त्री केपी शर्मा ओलीले उद्यमशीलता विकासका निम्ति गर्नुभएको थालनीको सराहना गर्दै त्यसमा स्विटजरल्याण्डले सक्दो सहयोग गर्ने प्रतिबद्धता व्यक्त गरे ।
पानीको स्रोत संरक्षणमा एकजुट भएर जुटौंः खानेपानी मन्त्री मगर
काठमाडौं । खानेपानी मन्त्री बिना मगरले पानीको स्रोत संरक्षण गर्न सबैजना एकजुट भएर अभियान सञ्चालन गर्नुपर्ने बताएका छन् । विश्व पानी दिवसको उपलक्ष्यमा शुक्रबार राजधानीमा आयोजना गरिएको एक कार्यक्रममा सम्बोधन गर्दै खानेपानी मन्त्री मगरले पानीको स्रोत संरक्षणमा सरकार र नागरिकको तर्फबाट अभियान चलाउनु पर्ने बताएकी हुन् । सोसाईटी अफ पब्लिक हेल्थ ईन्जिनियर्स (सोफेन) र खानेपानी तथा ढल व्यवस्थापन विभागले संयुक्त आयोजना गरेको कार्यक्रममा बोल्दै उहाँले पानीको स्रोत संरक्षणमा एकजुट भएर जुट्न आग्रह गरिन् । कार्यक्रमलाई सम्बोधन गर्दै उनले भनिन्, “ अन्नको लागि हामी जिन्दगीभर समय खर्चिन तयार छौं तर मानव जीवनमा नभई नहुने पानीका लागि भने समय दिंदैनौं । प्रकृति र वातावरणसँग पानीको घनिष्ट सम्बन्ध छ । त्यसैले पानीको मुहान जोगाउन सबैजना लागौं ।” खानेपानीमा आम जनताको पहुँच पुर्याउन योजना बनाएर सरकार अघि बढिरहेको उनले स्पष्ट पारिन् । खानेपानीमा सहज पहुँच पुर्याउन, स्रोतको संरक्षण गर्न र वितरण प्रणाली चुस्त बनाउन साझा ऐन निर्माणको तयारी भईरहेको उनले जानकारी दिइन् । पानीका कारण हुने सबै किसिमका सामाजिक विभेद अन्त्य गर्न पनि मन्त्री मगरले सबैलाई सुझाव दिइन् । कार्यक्रममा पूर्व मन्त्री एवं नेकपाका नेता गणेश साहले पिउने पानीमा सरकारले लगानीका लागि ध्यान नदिंदा प्राथमिकतामा नपरेको बताए । ठूल ठूला जलविद्युतका लागि मात्र सरकारको ध्यान गएको बताउँदै पूर्व मन्त्री साहले मानव जीवनमा नभई नहुने पिउने पानीमा भने कत्ति पनि ध्यान नदिएको गुनासो गरे । कार्यक्रममा राष्ट्रिय योजना आयोगका पूर्व उपाध्यक्ष डा। जगदिशचन्द्र पोखरेलले जनसंख्या र आवादीका आधारमा खानेपानीका गुरु योजनाहरु बनाउन सरकारलाई सुझाव दिए ।
कोटेश्वर र बानेश्वरमा ६ महिनाभित्र आकाशे पुल बन्ने, निर्माण जिम्मा प्रकृति/पवन जेभीलाई
काठमाडौं । पैदल यात्रीको उच्च चाप हुने कोटेश्वर चोक र बानेश्वर चोकमा आकाशे पुल निर्माण हुने भएको छ । पैदल यात्री धेरै हुँदा सवारी जाम बढेपछि सो स्थानमा आकाशे पुल निर्माण गर्न लागिएको हो । पुल निर्माणको लागि सडक डिभिजन कार्यालय काठमाडौंले ठेकेदार कम्पनीको छनोट गरिसकेको छ । २ स्थानमा बन्ने आकाशे पुलको लागि डिभिजन कार्यालयले प्रकृति/पवन जेभीलाई जिम्मा दिएको छ । डिभिजनले बिहिबार कम्पनी विरुद्ध ७ दिनको दाबी विरोध सूचना निकालिसकेको छ । सो अवधीमा कम्पनी विरुद्ध कुनै पनि विरोध नपरेमा कामको जिम्मा औपचारिक रुपमा पाउनेछ । कम्पनीसँग १५ दिनभित्रै सम्झौता हुने डिभिजन प्रमुख कैलाशकुमार श्रेष्ठले बताए । उनका अनुसार दुबै स्थानमा ६ महिनाभित्र पुल निर्माण गरिनेछ । यदि सो स्थानमा अन्डरपास निर्माण हुने भएमा पुल एक ठाउँबाट अर्को ठाउँमा सार्न सकिनेछ । बानेश्वर चोकमा बन्ने पुलको लागि ३ करोड ५२ लाख ७ हजार ५ सय १२ र कोटेश्वर चोकमा बन्ने पुलको लागि २ करोड ८९ लाख २४ हजार ९ सय ४५ रुपैंयमा सम्झौता हुनेछ । पुल निर्माणको लागि एक मात्र ठेकेदार कम्पनीले आवेदन दिएको डिभिजन कार्यालयले जनाएको छ । पुल देख्दा केहि आकर्षक भएपनि सामान्य प्रकृतिको हुने प्रमुख श्रेष्ठले बताए । मुभएवल पुल भएकाले असारभित्रै काम सक्ने गरि काम गर्ने डिभिजन कार्यालयको तयारी छ । लगानी सम्मेलन अघि सडकका सबै खाल्डाखुल्डी पुरिने डिभिजन कार्यालयले चैत १५ र १६ गते हुने लगानी सम्मेलन अघि उपत्यकाभित्रको ३२५ किलोमिटर सडकमा रहेको खाल्डाखुल्डी पुर्ने भएको छ । रातीको समयमा खाल्डो पुर्ने काम सुरु गर्ने डिभिजन कार्यालयले तयारी गरेको छ । दिउँसो काम गर्दा यातायातमा असर पर्ने भएकोले १० गते आइतबार रातीबाट काम सुरु गर्नेछ । सम्मेलन अघि नै सडकमा रहेका खाल्डाखुल्डी पुर्ने र रंगरोगन गरिसक्ने डिभिजन प्रमुख श्रेष्ठले बताए । कार्यालयले अहिले चक्रपथमा रहेको २७.३ किलोमिटर सडक मर्मत अन्तिम चरणमा पुर्याएको छ । अब न्युरोड, दरबारमार्ग, अनामनगर, सोह्रखुट्टे, त्रिपुरेश्वर लगायत क्षेत्रमा मर्मतको काम हुनेछ । यसअघि भौतिक पुर्वाधार तथा यातायात मन्त्री रघुविर महासेठले जेठभित्र उपत्यकाको सबै सडक कालोपत्रे गरिसक्ने दाबी गरेका छन् ।
वाईसीओ कम्पनीलाई नेप्सेको निर्देशन- प्राविधिक समस्या छिटो हल गर्नुस्
काठमाडौं । नेपाल स्टक एक्स्चेञ्ज(नेप्से)ले हाल अनलाइन प्रणालीमा आइरहेको प्राविधिक समस्यालाई निराकरण गर्न वाईसीओ प्रा. लि. लाई निर्देशन दिएको छ । भर्खरै सञ्चालनमा आएको उक्त प्रणालीमा बेला बेलामा देखिने समस्याहरुलाई छिटो भन्दा छिटो हटाउन नेप्सेका प्रमुख कार्यकारी अधिकृत चन्द्रसिंह साउदले शुक्रबार एक विज्ञप्तिमार्फत वाईसीओ कम्पनी तथा नेप्सेको आइटी शाखालाई साे निर्देशन दिएका हुन् । साथै, सीईओ साउदले पुँजी बजारमा देखिएका समस्याहरु सिष्टम वा नेटवर्क जससँग सम्बन्धित भएपनि त्यसलाई हटाई सेयर कारोबार प्रभावकारी बनाउन आग्रह गरेका छन् । शुक्रबार नेप्से पदाधिकारी, ब्रोकर कम्पनीहरु तथा वाईसीओ बीच समस्याको समाधान गर्ने छलफल भएको थियो । उक्त छलफल कार्यक्रममा भेन्डर कम्पनी वाईसीओले हाल देखिएका प्रमुख समस्याहरुका विषयमा ब्रोकरहरुसँग जानकारी लिई उक्त समस्याहरु के कसरी कहिलेसम्म समाधान हुन्छ तथा उक्त समस्याहरु पुनः दोहोरिन नदिने प्रतिवद्धता गरेको छ ।
सिन्धु विकास बैंकको शाखा काभ्रेको पनौती बजारमा
काठमाडौँ । सिन्धु विकास बैंक लिमिटेडले काभ्रे जिल्लाको पनौतीबजारमा बैंकको १४ औं शाखा स्थापना गरेको छ । पनौती शाखा नेपाल राष्ट्र बैंकका डेपुटी गर्भनर चिन्तामणि शिवाकोटीले उद्घाटन गरेका हुन् । बैंकका अध्यक्ष राजेन्द्रकुमार श्रेष्ठ तथा प्रमुख कार्यकारी अधिकृत रमेशप्रसाद जोशीले बैंकको हालसम्मको प्रगती तथा भावी कार्यक्रमको बारेमा आफ्नो मन्तव्य राखेका थिए । सो अवसरमा पनौती नगरपालिकाका नगर प्रमुख भीम न्यौपाने, पनौती उद्योग बाणिज्य संघका अध्यक्ष भोला थापाले शुभकामना मन्तव्य ब्यक्त गरेका थिए । बैंकले निकट भविष्यमा नै चितवन तथा मकवानपुर जिल्लाको विभिन्न स्थानहरुमा बैंकको शाखा कार्यालय स्थापना गर्ने जनाएको छ । ०६७ साल भाद्र २२ गतेबाट सिन्धुपाल्चोक जिल्लाको बाह्रविसेमा प्रधान कार्यालय र बनेपामा कर्पोरेट तथा शाखा कार्यालय सहित मेलम्ची, खाँडीचौर, दोलालघाट, मुडे, भकुण्डे, पाँचखाल, चरिकोट, चौतारा, सिपाघाट, सिङ्गटी, जलबिरे र पनौतीगरी कुल १४ शाखा तथा सुकेटे तथा सिलढुङ्गामा सिमित बैंकिङ्ग ईकाई कार्यालय सहित गरी हाल १६ स्थानबाट वित्तिय सेवा प्रदान गरिरहेको बैंकले जनाएको छ ।
वार्षिक रुपमा करिब ४५ हजार क्षयरोग रोगी थपिने
काठमाडौं । नेपालमा प्रत्येक वर्ष ४५ हजार नयाँ क्षयरोग विरामी थपिने गर्दछन्र । विश्व स्वास्थ्य संघका अनुसार नेपालमा हरेक वर्ष ४५ संख्यामा रोगीको मात्रा बढ्दै गएको हुदाँ वार्षिक ६० हजार रहेको क्षयरोग केन्द्रले पत्रकार सम्मेलन मार्फत बताएकाे छ। विश्व क्षयरोग दिवसलाई मध्यनजर गर्दै राष्ट्रिय क्षयरोग केन्द्रको आयोजनाले गरेको कार्यक्रममा सो केन्द्रका निर्देशक डा.भिमसिहं टिन्कारीले ‘समय अवको, क्षयरोग अन्त्यको’ भन्ने नारा सहित जनचेतना कार्यक्रम गर्दै आएको बताए । डा. टिन्कारीले कार्यक्रममा बोल्दै ‘सरकारले क्षयरोगको उपचार पुन रुपले निः शुल्क गरेता पनि सर्वसाधारण नीजि क्षेत्रका अस्पताल जानेर रोगको अन्तिम अवस्थामा मात्र सरकारी अस्पताल आउनेको संख्या तिव्र रहेको छ ’ उनले भने । धुम्रपान तथा मद्यपान सेवनको कारण लाग्ने क्षयरोग, नेपालमा महिलाको तुलनामा पुरुषमा बढी देखा परेको तथ्याङ्गले रहेको छ । आर्थिक वर्षमा राष्ट्रिय क्षयरोग केन्द्रलाई ७० करोड रुपैयाँ बजेट विनियोजन भएको छ । उक्त संस्थामा १० करोड वाहिरी अनुदान छ भने ६० करोड नेपाल सरकारको रहेको छ । विनियोजित रकम क्षयरोग केन्द्रले करिव १३ करोड औषधीमा, ७ करोड भवन निर्माणमा अर्थ गरेको निर्देशक डा. टिन्कारीले जानकारी दिए ।
कर अधिकृत विक विरुद्ध अख्तियारले दायर गर्यो मुद्दा, गैरकानूनी रुपमा १ करोड ८२ लाख आर्जन गरेको अभियोग
काठमाडौँ । अख्तियार दुरुपयोग अनुसन्धान आयोगले एक करोड ८२ लाखभन्दा बढी रकम गैरकानुनी रुपमा आर्जन गरेको अभियोगमा करअधिकृत मानप्रसाद विकविरुद्ध शुक्रबार मुद्दा दायर गरेको छ । भैरहवा भन्सार कार्यालयका तत्कालीन भन्सार अधिकृत विकले पदीय दुरुपयोग गरी गैरकानूनी रुपमा सम्पत्ति आर्जन गरेको भन्दै आयोगले भ्रष्टाचार मुद्दा दायर गरेको हो । विक हाल करदाता सेवा कार्यालय पाँचथर फिदिममा कार्यरत कर अधिकृत पदमा कार्यरत छन् । २०६८ असोज २२ गतेदेखि राजपत्रांकित तृतीय श्रेणीको अधिकृत पदमा नियुक्त भएको र २०६६ चैत १० गतेदेखि राहत शिक्षकका रुपमा कार्यरत रहँदा विकले वैध रुपमा आर्जन गरेको भन्दा बढी रकम देखिएको अख्तियारका प्रवक्ता प्रदीपकुमार कोइरालाले जानकारी दिए । हालसम्म सरकारी सेवामा रहँदा विकले तीन करोड दश लाख चौंतीस हजार सात सय चौबिस रुपैयाँ खर्च तथा लगानी गरेको देखिएको र उनको वैध आय एक करोड २७ लाख ६६ हजार नौ सय ४५ मात्र रहेको देखिएको छ। आयोगले आम्दानीको तुलनामा विकले एक करोड बयासी लाख ६७ हजार सातसय उनासी रुपैयाँको स्रोत नखुलेको पाइएको जनाएको छ । मुद्दामा अख्तियारले स्रोत नखुलेको सम्पत्ति जफत गर्न माग गरेको छ । मुद्दा दायर भएसँगै विक निलम्बनमा परेका छन् ।
नेप्से २८ अंकले घट्दा ८ वाणिज्य बैंकको सेयर मूल्यमा वृद्धि, एनआईसी एशियाको सबैभन्दा बढी
२०७४ चैत १२ देखि २०७५ चैत ७ गतेसम्मको नेप्से चार्ट काठमाडौं । गत वर्षको तुलनामा नेप्से परिसूचक २८ अंकले घटेको छ । २०७४ चैत १२ गते ११६८.६२ अंकमा रहेको नेप्से २०७५ चैत ७ गते ११४०.६० अंकमा अडिएको हो । एक वर्षको अवधिमा नेप्सेको उच्चतम बिन्दु १४३८ र न्युनतम बिन्दु ११०० अंक रहेको छ । गत वैशाख ९ गते नेप्से परिसूचक बढेर उच्चतम १४३८ अंकमा पुगेको थियो । त्यसपछि सामान्य उतारचढाव भई ओरालो लागेको नेप्से गत फागुन १९ गते ११०० अंकमा झरेको हो । जुन एक वर्षयताको न्युनतम बिन्दु हो । दोहोरो अंकको गिरावट देखिएको सेयर बजारमा विभिन्न ८ वटा वाणिज्य बैंकको सेयर मूल्यमा वृद्धि भएको छ । गत वर्षको तुलनामा कुल २८ वटा वाणिज्य बैंक मध्ये जम्मा ८ वटा बैंकको सेयर मूल्य बढेको छ भने बाँकी २० कम्पनीको सेयर मूल्यमा गिरावट देखिएको छ । बजारमा एनआईसी एशिया, प्राइम, सिद्धार्थ, कुमारी, माछापुच्छ्रे, प्रभु, जनता र सिभिल बैंकको २०७५ चैत ७ गतेको सेयर मूल्य २०७४ चैत १२ गतेको तुलनामा ३ रुपैयाँदेखि १०० रुपैयाँसम्मले बढेको छ । सो मध्ये एनआईसी एशिया बैंकको सेयर मूल्य सबैभन्दा बढी रुपैयाँले बढेको छ । गत वर्ष प्रतिकित्ता २९८ रुपैयाँ रहेको संस्थाको सेयर मूल्य बढेर प्रतिकित्ता ३९५ रुपैयाँ पुगेको छ । जुन एक वर्षको तुलनामा प्रतिकित्ता ९७ रुपैयाँ बढी हो । त्यस्तै, गत वर्ष प्राइम कमर्शियल बैंकको सेयर मूल्य २७५ रुपैयाँ रहेको थियो । जसको अहिले ४२ रुपैयाँले मूल्य बढेर प्रतिकित्ता ३१७ रुपैयाँ पुगेको छ । सो मध्ये सिद्धार्थ, कुमारी र माछापुच्छ्रे बैंकको सेयर मूल्यमा सामान्य वृद्धि भएको छ । प्रतिकित्ता २८१ रुपैयाँ रहेको सिद्धार्थ बैंकको सेयर मूल्य बढेर २८५ रुपैयाँ पुगेको छ । कुमारी बैंकको मूल्य २३३ रुपैयाँबाट प्रतिकित्ता २३५ रुपैयाँ पुगेको छ । साथै, माछापुच्छ्रे बैंकको सेयर मूल्य प्रतिकित्ता २१२ रुपैयाँबाट बढेर प्रतिकित्ता २१८ रुपैयाँ रहेको छ । त्यसैगरी, प्रभु, जनता र सिभिल बैंकको सेयर मूल्य क्रमशः प्रतिकित्ता २३१, १७० र १५५ रुपैयाँ रहेको छ । हाल यी तीन वटै बैंकको सेयर मूल्य गत वर्षको तुलनामा क्रमशः प्रतिकित्ता ३१, २१ र १५ रुपैयाँले बढी हो । सेयर मूल्य वृद्धि भएको ८ वाणिज्य बैंक
