ग्लोरी–५८० मोडलको एसयूभी नेपाली बजारमा
काठमाडौँ । नेपाली बजारमा ब्राण्ड डोड्फेड सकोन(डीएफएसके) को ग्लोरी–५८० मोडलको एसयूभी भित्रिएको छ । नेपालको लागि उक्त गाडी कुजु नेपाल प्रालिले भित्र्याएको हो । उक्त गाडीको बिक्री विहीबार देखि नै शुरु भएको छ । डीएफएसकेको ग्लोरी–५८० को कम्प्याक एसयूभीमा १.५ लिटर टर्बोचाज्ड इञ्जिन रहेको छ । जसमा अटोमेटिक सीभीटी ट्रासमिसन रहेको छ । नेपाली बजारमा यी एसयूभीहरु इण्डोनेशियाली प्लान्टबाट उत्पादन भएका हुन् । ग्लोरी–५८० को नेपाली बजारमा लग्जरी भेरियन्ट र म्यानुयल ट्रान्समिसन उपलब्ध रहेको छ । यसको मूल्य ६२ लाख ८० हजार रुपैयाँदेखि ६९ लाख ९९ हजार ५ सय रुपैयाँ राखिएको कम्पनीले जनाएको छ । गाडी बिक्रीपछिको सेवालाई मध्येनजर गर्दै कम्पनीले ललितपुरको जुवागलमा सर्भिस सेन्टर सञ्चालनमा ल्याएको छ ।
बिहीबारको बजार समान्य अंकले बढ्याे, शिवम् सिमेन्टको बढी कारोबार
काठमाडौं । बिहीबारको सेयर बजार सामान्य अंकले बढेको छ । सामान्य अंकले बढेको बजारमा सबैभन्दा बढी शिवम् सिमेन्टको सेयर कारोबार भएको छ । सिमेन्टको एकैदिन २ करोड ६२ लाख ८४ हजार ८१६ रुपैयाँ बराबरको सेयर कारोबार भएको छ । बिहीबार कम्पनीको सेयर मूल्य प्रतिकित्ता ३३३ रुपैयाँ रहेको छ । जुन अघिल्लो दिनको तुलनामा ७ रुपैयाँले घटी हो । बुधबार कम्पनीको सेयर मूल्य प्रतिकित्ता ३४० रुपैयाँ रहेको थियो । त्यस्तै, प्रभु बैंकको एक करोड २३ लाख रुपैयाँ बराबरको सेयर कारोबार भएको छ । बजारमा कुल १६८ कम्पनीको २४ करोड ५९ लाख रुपैयाँ बराबरको सेयर किनबेच भएको छ । समग्रमा बिहिबारकाे नेप्से परिसूचक २.०१ अंकले बढेर ११४४.५३ अंकमा पुगेको छ । जुन अघिल्लो दिनको तुलनामा ०.१८ प्रतिशत बढी हो । बजारमा सबैभन्दा बढी कमाउनेमा सिभिल लघुवित्त रहेका छन् । जसको सेयर मूल्य ५.८८ प्रतिशतले बढेर प्रतिकित्ता ५९४ रुपैयाँ पुगेको छ । सबैभन्दा बढी यूनिभर्सल पावर कम्पनीको सेयर मूल्य ९.६० प्रतिशतले घटेको छ । कम्पनीको सेयर मूल्य प्रतिकित्ता १७९ रुपैयाँ रहेको छ ।
शिवम् सिमेन्टले १५ प्रतिशत नगद लाभांश दिने
काठमाडौं । शिवम् सिमेन्टले गत आर्थिक वर्षको नाफाबाट सेयरधनीलाई चुक्ता पुँजीको १५.७९ प्रतिशत नगद लाभांश सेयर दिने प्रस्ताव गरेको छ । उक्त प्रस्ताव चैत १३ गते बसेको संचालक समितिको बैठकले करसहित सो मात्राको लाभांश दिने प्रस्ताव गरेको हो । हाल कम्पनीको चुक्ता पुँजी ४ अर्ब ४० करोड रुपैयाँ रहेको छ । कम्पनीले गत वर्षकाे नाफाबाट लाभांश वितरण गर्न लागेकाे हाे । कम्पनीकाे साधारणसभा बैशाख ९ गते हुँदैछ ।
५५ अर्बको केबलकार परियोजनामा विदेशी लगानीकर्ता आकर्षित होलान ?
काठमाडौं । मनोरञ्जनको साधनको रुपमा विकास हुँदै गएको केबलकार पछिल्लो समय धार्मिक क्षेत्र केन्द्रित बन्दै गएको छ । मनकामना केबलकारबाट सुरु भएको यातायात अहिले देशभर फैलिने क्रममा रहेको छ । देशमा रहेको धार्मिक क्षेत्रलाई लक्षित गरि केबलकार योजनाहरु अघि बढिरहेको छ । राजधानीमा शुक्रबार र शनिबार हुने लगानी सम्मेलनमा पनि निजी क्षेत्रले केबलकारमा विदेशी लगानी भित्र्याउने योजना बनाएका छन् । ३ कम्पनीले विदेशी लगानी भित्र्याउन आफ्नो योजना अघि बढाएका छन् । यसरी योजना अघि बढाउनेहरुमा आइएमी ग्रुप, मुक्तिनाथ दर्शन प्राली र स्वर्गद्धारी दर्शन प्राली रहेका छन् । केबलकारको महत्वकांक्षी योजनामा मुत्तिलनाथ दर्शन केबलकार परियोजना रहेको छ । उसले ४४१ मिलियन डलरको योजना बनाएको छ । पछिल्लो समय चन्द्रागीरी केबलकारलाई सफल बनाएका आइएमी ग्रुपले २ वटा परियोजना अघि सारेका छन् । ग्रुपले अन्नपुर्ण सिक्लेस केबलकारका लागि ३१ मिलियन डलर र जालपादेवी केबलकारका लागि १६ मिलियन अमेरिकी डलरको शोकेस अघि सारिएको छ । यस्तै अर्को धार्मिक स्थल स्वर्गद्धारी केबलकारको लागि १६ मिलियन डलरको योजना अघि सारिएको छ ।
नेप्से बढेअनुसार सुधार भएन म्युचुअल फण्डको एनएभी
काठमाडौं । माघ मसान्तको तुलनामा फागुन मसान्तमा नेपाल स्टक एक्सचेञ्ज परिसूचक २७.२७ अंकले बढ्यो । माघ मसान्तमा ११२८.१९ अंकमा बन्द भएको परिसूचक फागुन मसान्तमा ११५५.४६ अंक कायम भएको थियो । तर बजारको सकारात्मक वृद्धिका बाबजुद बजारमा सूचिकृत म्युचुअल फण्डहरुको प्रतिइकाई खुद मुल्य भने साे अनुपातमा बढ्न सकेकाे छैन । बजारमा २.४२ अंकले वृद्धि देखिँदा म्युचुअल फण्डको मूल्यमा भने ०.९४ प्रतिशतदेखि २.३१ प्रतिशतसम्ममात्र वृद्धि भएको देखिएको हाे । फागुन मसान्तको वित्तीय अवस्थामा आधारित म्युचुअल फण्डहरुको रिपोर्ट अनुसार वित्तीय विवरण प्रकाशन गरेका १२ ओटा फण्डमध्ये सबैको खुद सम्पत्ति र सँगसँगै प्रतिइकाई खुद मुल्य बढे पनि नेप्से परिसूचकअनुसार बढ्न सकेकाे छैन । त्यसमध्ये सिटिजन्स म्युचुअल फण्डको प्रतिइकाई २४ पैसा (२.३१ प्रतिशत) र सबैभन्दा कम एनएमबि हाइब्रिड फण्ड १ को प्रतिइकाइ १० पैसा (०.९४ प्रतिशत) खुद मुल्य वृद्धि भएकाे हो । ग्लोबल आईएमई क्यापिटलको ग्लोबल आईएमई समुन्नत स्कीम–१ को भने वित्तीय विवरण हालसम्म सार्वजनिक भएको छैन । सामान्यतया म्युचुअल फण्डले जनताको ससाना लगानीलाई उठाएर पुँजी बजारमा लगानी गरेर प्रतिफल बाँड्ने काम गर्छ । यस्ता फण्डहरुका सञ्चालक हाई एक्स्पेरियन्सड प्रोफेशनल हुने भएकोले यसबाट बजारको आरोह अवरोहहरुको जोखिम कम गर्दै प्रतिफल सुनिश्चितताको अपेक्षा गरिन्छ । यद्यपि बजार उच्च रुपमा घटेको अवस्थामा सोही अनुरुप खुद मूल्य घट्दै आएका यस्ता फण्डहरुको बजार सकारात्मक देखिँदा पनि एनएभी बजारभन्दा कम दरमा मात्र बढेकाे हाे ।
‘बिप एप’ सार्वजनिक, १० जना प्रयोगकर्ताले एकैसाथ भिडियो कल गर्न मिल्ने
काठमाडौं । सिजी लाईफसेलले नेपालमै डाटा सेन्टर रहने गरी एक सामाजिक सञ्जाल एप सार्वजनिक गरेको छ । कम्पनीले बिहीबार एक कार्यक्रमको आयोजना गर्दै सूचना सम्प्रेषणमा सहजता ल्याउने लक्ष्यका साथ सिजी ‘बिप एप’ सार्वजनिक गरेको हो । ‘सिजी लाईफसेल’ चौधरी ग्रुप अन्तर्गत सूचना प्रविधि क्षेत्रमा काम गर्ने नयाँ विजनेश भर्टिकल हो । सिजी ग्रुपले नेपालमै उक्त एपका लागि डाटा सेन्टरको स्थापना गर्दै उक्त एप संचालनमा ल्याएको जानकारी दिएको छ । यो एपका लागि नेपालमै यसको डाटा सेन्टर स्थापना गरेका छ । सामाजिक सञ्जाल एप सार्वजनिक कार्यक्रममा सिजी ग्रुपका प्रवन्ध निर्देशक निर्वाण चौधरीले यसले नेपालीको डाटा बाहिर देशमा जानबाट जोगिनुका साथै नेपालको राजश्वमा पनि योगदान पुग्ने बताए । बिप एपबाट सिधै फोनमा पनि कल गर्न सकिने छ । बिप एपबाट भ्वाईस कल, भिडियो कल गर्न र म्यासेज एवम् फाईलको आदान प्रदान गर्न सकिने छ । साथै विनिमय दर, मौसम सम्बन्धी जानकारी र समाचारहरुका बारेमा सजिलै जानकारी प्राप्त गर्न सक्ने कम्पनीले जानकारी दिएको छ । यो एप आईओएस र एन्ड्रोईड दुवै मोवाईल अपरेटिङ सिस्टममा चल्छ । कम्पनीले ल्याएको उक्त एपमा फोनको भाषा परिवर्तन गर्न सकिन्छ भने निःशुल्क गेमहरु अनलाईनमार्फत खेल्न सकिने लगायतका सुविधा रहेका छन् । यस्तै एपमा १० जना प्रयोगकर्ताले एकैसाथ भिडियो कल गर्न सकिने समेत विशेषता रहेको कम्पनीले जनाएको छ ।
आफु हिड्ने बाटोमा छोरीलाई छोड्दै छु, अब तपाईहरुको जिम्मा: निर्देशक झरना थापा
काठमाडौं । अभिनेत्री तथा नव निर्देशक झरना थापाले आफ्नी छोरीलाई चलचित्र क्षेत्रमा ल्याउन सफल भएकी छन् । लामो समय अभिनयपछि निर्देशकका रुपमा दर्शक सामु आएकी झरनाले छोरी सुहाना थापालाई ‘ए मेरो हजुर ३ ’ मा मेगा स्टार अभिनेता अनमोल केसीको जोडी रुपमा पर्दामा उतारेकी छिन् । ४ वर्षको उमेरमा ‘ए मेरो हजुर’ मा बाल कलाकारको रुपमा देखिएकी सुहानालाई हाल नायिकाको रुपमा देखिएको छ । चैत २९ गतेबाट प्रदर्शनमा आउन लागेको ‘ए मेरो हजुर ३’ को दुई गीतबाटै सुहानालाई चलचित्र क्षेत्रले सम्भावना बोकेकी अभिनेत्रीको रुपमा हेरेको छ । ‘फिल्मी ब्लड’ भएका कारण उनको काम राम्रो हुने विश्वास धेरैको छ । बुधवार चलचित्रको ट्रेलर रिलिज र आफ्नो बर्थडे केक काट्दै अभिनेत्री तथा निर्देशक झरनाले छोरी सुहानाको चलचित्र हेरेपछि जो कोहीले तारिफ गर्ने दाबी समेत गरिन् । उनले भनिन्, ‘जसरी म विगतमा यहाँहरुको मन मस्तिष्कमा बस्न सफल भएँ, त्यसरी नै छोरी पनि सफल हुने छिन् । उनले अगाडि भनिन्, ‘म आफू हिँडेको बाटोमा छोरीलाई पनि लिएर आएको छु । आजबाट तपाईंहरु माझ मेरी छोरी सुहानालाई सुम्पिएको छु ।’ चलचित्रको ट्रेलर रिलिज कार्यक्रममा अभिनेता अनमोल, सलोन बस्नेत, सरोज खनाल, रेअर राईलगायत उपस्थित थिए । ट्रेलरमा अनमोललाई सुपरस्टार गायक र एक साधारण युवक गरि दुई अवतारमा देख्न सकिन्छ । चलचित्रले एक स्टार र फ्यानबीचको प्रेमकथा बोकेको निर्देशक झरनाले जानकारी दिइन् ।
नबिल बैंककाे नयाँ योजना, ३.९४% दरमा १५ लाख र ९.९९% मा डेढ करोडसम्म कर्जा
काठमाडौं । नबिल बैंक लिमिटेडले नयाँ कर्जा योजना सार्वजनिक गरेको छ । नबिल नारी अन्तर्गत बैंकले नबिल प्रिमियम नारी बचत खाता र नबिल नारी कर्जाका साथै साना तथा मझौला कार्यक्रमअन्तर्गत महिलाद्वारा सञ्चालित साना व्यवसाय कर्जाको बिहीबार सार्वजनिक गरेको हो । नबिल बैंकले महिला बचत खातामा ४.५ प्रतिशत ब्याजदर दिने भएको छ । उक्त खाता अन्तर्गत क्रेडिट कार्ड, डिमान्ड ड्राफ्ट, लकर लगायतका सुविधा लगायतका सुविधा उपलब्ध हुने बैंकले जनाएकाे छ । कर्जाको ब्याजदर भने १५ लाखको सीमासम्म भए ३.९४ प्रतिशत र सो भन्दा बढी १ रोड ५० लाखसम्म भए ९.९९ प्रतिशतसम्म ब्याजदरमा प्रदान गरिने बताइएको छ । नारी कर्जाको न्यूनतम सीमा भने ५ लाख तोकिएको छ । नबिलले सार्वजनिक गरेको कर्जा योजनामध्ये नबिल नारी कर्जाका लागि आवेदन दिएका आवेदकले ५ कार्यदिनभित्र निर्णय गरिसक्ने बैंकले जनाएको छ । यो ऋण आवेदनका लागि कुनै पनि साझेखारी संस्था भए कम्तीमा ५० प्रतिशत हिस्सा महिलाको भएको र कम्पनी संरचनाको संस्थामा कम्तीमा ५१ प्रतिशत होल्डिङ महिलाको हुनुपर्ने अनिवार्य शर्तको व्यवस्था गरिएको छ । ३.९४ प्रतिशत ब्याजदरको १५ लाखसम्मको कर्जाका लागि भने २१ कार्यदिनसम्म समय लाग्ने बैंकका प्रमुख कार्यकारी अधिकृत अनिल शाहले जानकारी दिए । यो कर्जा परियोजनाको धितोमा आधारित हुनेछ । यसमा सरकारले तोकेको ६ प्रतिशत ब्याज अनुदान उपलब्ध हुने भएकाले यो कर्जा सस्तो हुन गएको हो । बैंकले नायिका प्रियंका कार्कीलाई नबिल नारीका रुपमा प्रस्तुत गर्दै उक्त बचत तथा कर्जा योजना ल्याएको हो । कार्यक्रममा बैंकका प्रमुख कार्यकारी अधिकृत शाहले नबिल बैंकलाई धनाढ्यहरुको मात्रै बैंक नभई आम जनताको बैंक बनाउन यस्ता स-साना बचत तथा कर्जा कार्यक्रम ल्याएको बताए ।
