विदेशी लगानीकर्तालाई प्रधानमन्त्रीको सम्बोधन, ‘भारत र चीन नजिकै छन्, बजारको चिन्ता नगर्नोस्’
काठमाडौँ । राजधानीको होटल सोल्टीमा लगानी सम्मेलन शुरु भएको छ । सम्मेलनको उद्घाटन गर्दै प्रधानमन्त्री केपी शर्मा ओलीले लगानीको लागि नेपाल उत्कृष्ठ गन्तव्य भएको बताए । विदेशी लगानीकर्ता माझ उनले भने–‘चाइना र इण्डियाको बजार खुला रहेकाले यहाँका उत्पादनललाई बजारको समस्या हुँदैन ।’ लगानीको बाताबरण बनाउन कानून निर्माण गरेका छौँ, कर पनि लगानी मैत्री भएको उनले बताए । यहाँ लगानी गर्दा नाफाको हुने ग्यारेन्टी छ, नाफा लैजानपनि पाइन्छ । त्यसका लागि सरकार जुनसुकै सहयोग गर्न तयार छ । प्रधानमन्त्री ओलीले यहाँ उत्पादित समान चीनसम्म पुर्याउनका लागि बाटो बनाइरहेको बताए । त्यसैगरी भारतमा सामान पुर्याउन पानी जहाज चलाउने तयारी गरिरहेकाे समेत ओलीले विदेशी लगानीकर्ता माझ प्रष्ट पारे । एयरपोर्टहरु पनि बन्दैछन् । प्रधानमन्त्री ओलीले भने–हवाई जहाजबाट पनि सामान निर्यात गर्न कुनै समस्या छैन । नेपालमा पूर्वाधार निर्माण भइसकेको छ, लगानीका संभावना अथाह रहेका छन्, त्यसकारण विदेशी लगानीकर्ताहरुले नेपालमा लगानी गर्न हिच्किचाउनु पर्दैन–प्रधानमन्त्री ओलीले भने । त्यसैगरी सम्मेलनमा सहभागी विदेशी लगानीकर्ताहरुलाई स्वागत गर्दे अर्थमन्त्री डा. युवराज खतिवडाले समेत नेपाल लगानीको उत्कृष्ठ गन्तव्य भएको बताए । शनिबार सम्पन्न हुने लगानी सम्मेलनमा विभिन्न ४० देशबाट ६०० भन्दा बढी लगानीकर्ता सहभागी भएका छन् । सभाहलको क्षमता कम भएको र उपस्थित व्यक्तिहरुको संख्या अधिक हुँदा सम्मेलन हल भने अव्यवस्थित देखिएको छ । उपस्थित व्यक्तिहरु उभिएर समेत कार्यक्रममा सहभागी भएका छन् । लगानी सम्मेलनमा नेपाल सरकार लगानी बोर्डले कृषि, जलविद्युत, उद्योग, पर्यटन , यातायात, सहरी पूर्वाधार एवं शिक्षा तथा स्वास्थ्य क्षेत्र सम्बन्धी ५० सरकारी र निजी क्षेत्रका २७ गरी ७७ वटा परियोजनाहरु प्रस्तुत गर्नेछ ।
चालु खर्च ५० प्रतिशत नाघ्यो; दैनिक ७ अर्ब खर्च गर्नुपर्ने बाध्यतामा सरकार
काठमाडौं । संघीय सरकारको बजेटअनुरुप चालु खर्च ५० प्रतिशत नाघेको छ । चालु आर्थिक वर्षको चैत १४ गतेसम्म आइपुग्दा चालु खर्चतर्फ विनियोजन गरिएको ८ खर्ब ४५ अर्ब ४४ करोड ७५ लाख रुपैंयामध्ये ४ खर्ब २७ अर्ब २१ करोड ८२ लाख रुपैंया खर्च भएको महालेखा नियन्त्रकको कार्यालयले जनाएको छ । यो विनियोजित बजेटको ५०.५३ प्रतिशत हो । पुँजीगत र वित्तीय व्यवस्थातर्फको खर्चमा भने सरकारको प्रगति निराशाजनक देखिएको छ । उक्त अवधिमा पुँजीगत खर्च ३१.१८ प्रतिशत र वित्तीय व्यवस्थातर्फको खर्चको प्रगति २८.८८ प्रतिशतमा सीमित रहेको देखिएको हो । बिहीबारसम्म पुँजीगत खर्च ९८ अर्ब ३१ करोड ५८ लाख र वित्तीय खर्च ४४ अर्ब ९७ करोड ६८ लाख रुपैंया खर्च भएको हो । बजेटले पुँजीगततर्फ ३ खर्ब १३ अर्ब ९९ करोड ८२ लाख र वित्तीय व्यवस्थातर्फ १ खर्ब ५५ अर्ब ७१ करोड ६० लाख रुपैंया विनियोजन गरेको थियो । राजश्वतर्फ भने सरकारले हालसम्म ५४.९५ प्रतिशत लक्ष्य हासिल गरेको छ । जम्मा ८ खर्ब ३१ अर्ब ३१ करोड ८० लाख रुपैंया राजश्व लक्ष्य निर्धारण गरेको सरकारले बिहीबारसम्म ४ खर्ब ५६ अर्ब ८० करोड २१ लाख रुपैंया राजश्व संकलन गरेको हो । यसमध्ये ४ खर्ब १२ अर्ब १४ करोड ७३ लाख कर राजश्वबाट र बाँकी ४४ अर्ब ६५ करोड ४९ लाख गैरकरतर्फको राजश्व प्राप्त भएको कार्यालयले जनाएको हो । उक्त आम्दानीमा अनुदान र अन्य अनियमित आम्दानीहरु समावेश नगरिएको समेत महालेखाले स्पष्ठ पारेको छ । अर्थ मन्त्रालयले चालु आर्थिक ६ महिनाको प्रगतिका आधारमा बजेटको ९१।२ प्रतिशत अर्थात् ११ खर्ब ९९ अर्ब १५ करोड खर्च हुने संशोधित अनुमान गरेको छ जसमध्ये चालु खर्चतर्फ ९४.४ प्रतिशतले हुने ७ खर्ब ९८ अर्ब ४४ करोड, पुँजीगततर्फ ८४।५ प्रतिशतले हुने २ खर्ब ६५ अर्ब २६ करोड र वित्तीय व्यवस्थातर्फ ८७ प्रतिशतले हुने १ खर्ब ३५ अर्ब ४४ करोड खर्च हुने अनुमान गरेको हो । सरकारको संशोधित अनुमान अनुसारकै खर्च हुन पनि अब ६ खर्ब २८ अर्ब ६३ करोड ९२ लाख रुपैंया खर्च गर्नुपर्ने भएको छ । आकस्मिक बिदा नभए असार मसान्तसम्म अब ९१ दिन सरकारी कार्यालयहरु खुल्नेछन् । यो अवधिमा सरकारी संशोधित लक्ष्य पुरा गर्न पनि दैनिक ६ अर्ब ९० करोड ८१ लाख खर्च गर्नुपर्नेछ तर बिहीबार भने १ अर्ब ६२ करोड ७१ लाख रुपैंया मात्र खर्च भएको थियो ।
निगमले एयरबस सञ्चालनमा ल्याएसँगै सकियो बोइङ युग
काठमाडौं । नेपाल वायुसेवा निगमले करिब ३० वर्षदेखि नियमित उडानमा प्रयोग गरिरहेको १९० सिट क्षमताको बोइङ बी ७५७ एसीबी सधैंका लागि ग्राउन्डेड भएको छ । मलेसियामा दुई महिना मर्मत गरेर गत माघ २ गते काठमाडौं आइपुगेको यो जहाज विमानस्थलमा थन्किएकै तीन महिना नाघेको छ । काठमाडौं आइपुगेकै दिन विन्ड सेन्सरले काम नगरेपछि थन्किएको जहाज फेरि बनाएर उडाउने हिम्मत नगरेकै कारण निगमका निम्ती उडान इतिहास बनेको बोइङ युग सकिएको छ । निगमले बोइङलाई विस्थापित गरेर चारवटा जहाजसँगै एयरबस युग सुरु गरिसकेको छ । यसअघि निगमले भएकै बोइङको बी ७५७ एसीए जहाज कवाडीमा बेचिसकेको छ । जहाज बीबी एयरवेजले किनेको भए पनि अझै विमानस्थलबाट नहटाएका कारण त्यसको पार्किङ शुल्क भने निगमकै जिम्मेवारीमा छ । आजको अन्नपूर्ण पोस्ट दैनिकमा समाचार छ ।
एकैरातमा १८ टन धुलो सङ्कलन, हरेक रात काठमाडौका सडकमा चल्न थाल्यो ब्रुमर
काठमाडौँ । काठमाडौँका सडकबाट बु्रमर (यान्त्रिक कुचो) ले एकै रातमा १८ टन धुलो सङ्कलन गरेको छ । काठमाडौँ महानगरपालिकाले गत मङ्गलबारदेखि सञ्चालनमा ल्याएको पाँच वटा बु्रमरले पहिलो रात पानीको कारण सडक सफा गर्न नपाए पनि बुधबार राति सडक सफा गरेर उक्त परिणममा धुलो सङ्कलन गरेको हो । फागुन २८ गते इटलीबाट पाँच बु्रमर काठमाडौँ ल्याइएको हो । कामपाका प्रवक्ता ईश्वरमान डङ्गोलका अनुसार बु्रमर सञ्चालनको लागि महानगरले बनाएको पाँच वटा सडक क्षेत्रअनुसार नै सडक सफा गर्दा १८ टन फोहर सङ्कलन भएको हो । कामपाले बनाएको सो सडक क्षेत्रअनुसार हरेक बेलुका ८ देखि बिहान ४ बजेसम्म दैनिक आठ घण्टा काम गर्ने गरी महानगरले मङ्गलबारबाट ब्रुमर सञ्चालन गरेको भएता पनि झरीको कारण बुधबारबाट धुलो सङ्कलन गरिएको हो । काठमाडौँका सडकमा माटो धेरै भएकाले यसलाई कसरी व्यवस्थापन गर्ने भन्ने विषयमा यातायात व्यवस्था विभागसँग छलफल भैरहेकोसमेत प्रवक्ताले जानकारी गराए । कानूनी रुपमा आठ मिटरभन्दा कम चौडाइका सडक मात्र कामपाकोे जिम्मेवारीमा पर्छ । ती ब्रुमर रु १० करोड ८० लाखमा ल्याइएको हो । यसअघि विशिष्ट व्यक्तिको आवतजावत रहेका बेला सडक विभाग र महानगरपालिकाले आपसमा समन्वय गर्दै विभागसँग रहेका दुई ब्रुमरले सडक सफा गरिँदै आएको थियो । कामपासँग यसअघि रहेको एक बु्रमर पनि काम गर्न नमिल्ने अवस्थामा रहेको जनाइएको छ । गत असारमा गरिएको बोलपत्रको आधारमा उक्त यन्त्र ल्याइएको हो । पाँच ब्रुमरमध्ये चार वटा १६ टन क्षमता बराबरका तथा अर्को एउटा छ टन क्षमताको छ । ती ब्रुमरमा दिनमा १० किलोमिटरसम्मको धुलो सङ्कलन गर्न सक्ने क्षमताको रहेको छ । यूरो मापदण्डका भनिएका उक्त ब्रुमरमा अगाडि, बीच र पछाडि भागको दायाँबायाँ गरी प्लाष्टिकका चार ब्रससहित धुलो तान्न सक्ने शक्तिशाली पाइप जडान गरिएको छ । पछिल्लो समय निर्माण कार्य तीव्र रुपमा भई धुलो बढिरहेका अवस्थामा ती ब्रुमरले ठूलो सहयोग पुग्ने विश्वास कामपाले लिएको छ ।
कर्मचारी समायोजन सम्पन्न, २० हजार पदमा लोकसेवा खुल्ने
काठमाडौं । कर्मचारी समायोजनसँगै सरकारले संघ, प्रदेश र स्थानीय गरी तीनै तहमा झन्डै २० हजार पदमा लोकसेवा खुलाउने गृहकार्य अघि बढाएको छ । कुन तहमा कति भर्ना खुल्ने भन्ने संख्या भने सरकारले निक्र्योल गर्न सकेको छैन । संघीय मामिला तथा सामान्य प्रशासनमन्त्री लालबाबु पण्डितले बिहीबार समायोजन प्रक्रिया सम्पन्न भएको घोषणा गर्दै लोकसेवा खुलाउने प्रक्रिया अगाडि बढाइएको जानकारी दिए । उनले चैत अन्तिम सातासम्ममा लोकसेवा खुलाउने कार्यले मूर्त रूप पाउने स्पष्ट पारे । सरकारी पक्ष लामो समयसम्म कर्मचारी समायोजनमा अल्झिँदा लोकसेवाका परीक्षा अवरुद्ध हुँदै आएको थियो । ‘संघीयता कार्यान्वयनको एउटा महत्वपूर्ण चरण पूरा गरेका छौं,’ मन्त्री पण्डितले तीनै तहमा समायोजन भएका कर्मचारीको अन्तिम विवरण सार्वजनिक गर्दै भने, ‘अब सबै पदमा लोकसेवा परीक्षाको बाटो खुला भएको छ ।’ मन्त्री पण्डितका अनुसार तीनवटै तहमा गरी १ लाख ३१ जना कर्मचारीको समायोजन गरिएको छ । जसअनुसार संघमा स्वीकृत ४८ हजार ४०९ दरबन्दीमा ३९ हजार ९६० कर्मचारी समायोजन भएका छन् भने स्थानीय तहमा स्वीकृत ६६ हजार ९०८ दरबन्दी मध्ये ४३ हजार ८०७ र प्रदेशमा स्वीकृत २२ हजार २९७ मध्ये १३ हजार ८२१ कर्मचारी समायोजन भएका छन् । आजको राजधानी दैनिकमा समाचार छ ।
जनकपुर बम विस्फोटः पूर्वराज्यमन्त्री साहसहित ७ जनालाई जन्मकैद
जनकपुर । पाँच जनाको ज्यान जाने गरी ६ वर्षअघि जनकपुरको रामानन्द चोकमा गराइएको बम विस्फोट मुद्दामा जिल्ला अदालत धनुषाले पूर्वराज्यमन्त्री सञ्जय साह (टकला) सहित ७ जनालाई जन्मकैदको फैसला सुनाएको छ । विस्फोटनमा संलग्न र वारदातको योजना बुनेका ७ जनामाथि ज्यान मार्ने र ज्यान मार्ने उद्योग दुवै मुद्दामा अदालतले बिहीबार अपराह्न फैसला सुनाएको हो । न्यायाधीश राजेश कटुवालको इजलासले ५ दिन लामो सुनुवाइपछि प्रतिवादीमध्ये ७ जनालाई जन्मकैद, एकजनालाई १० वर्ष कैद र फरार ४ जनाको हकमा मुद्दालाई मुल्तबी राखेको हो । बम विस्फोटन गर्ने व्यक्तिको नाममा १० हजार रुपैयाँ काठमाडौंबाट आईएमई गरेका सुजित पाण्डेलाई भने अदालतले सफाइ दिएको छ । २०६९ वैशाख १८ गते जनकपुरको रामानन्द चोकमा बम विस्फोटको योजना बुनेको ठहर गर्दै धनुषा अदालतले पूर्वराज्यमन्त्री साह, भूमिगत सशस्त्र संगठनका नाइके मुकेशकुमार चौधरी र राजन मुक्ति भनिने रञ्जित झालाई जन्मकैदको फैसला सुनाएको छ । ज्यान मार्ने उद्योगमा यी तीनैजनालाई १२ वर्षको कैद पनि सुनाइएको छ । विस्फोटनमा प्रत्यक्ष संलग्न रहेका जयप्रकाश चौधरी, सुरेशकुमार कर्ण, मुकेशकुमार कर्ण र रिपेन्द्र झालाई ज्यानसम्बन्धी महलको १/१३-१) र १५ नं. को कसुरमा सोही महलको १३-१) बमोजिम जनही जन्मकैदको फैसला सुनाएको अदालतका स्रेस्तेदार राधाकान्त झाले जानकारी दिए । आजको कान्तिपुर दैनिकमा समाचार छ ।
प्रदेश नं २ मा शुक्रबारको एसइई परीक्षा पनि स्थगित, विज्ञान र सामाजिक विषयको प्रश्नपत्र बाहिरियो
काठमाडौँ । प्रदेश २ मा शुक्रबार हुने सामाजिक विषयको प्रश्नपत्र आउट भएसँगै सामाजिक विषयको परीक्षा स्थगित भएको छ । परीक्षा अगावै प्रश्नपत्र बाहिरिनु एकदमै दुःखद रहेको बताउँदै राष्ट्रिय परीक्षा बोर्डले परीक्षा स्थगित गर्ने निर्णय गरेको हो । यता, राष्ट्रिय परीक्षा बोर्डले एसइई परीक्षाअन्तर्गत विहीबारको अनिवार्य विज्ञान विषयको परीक्षा प्रदेश नम्बर २ मा स्थगित भएको थियो । यस विषयको प्रश्नपत्र परीक्षा आगाडि नै बाहिरिएकाले भन्दै बोर्डको बिहीबार बसेको बैठकले परीक्षा स्थगित गर्ने निर्णय गरेको हो । बोर्डले सूचना जारी गर्दै बिहीबार स्थगित भएको परीक्षा आगामी २२ गते सोही केन्द्रमा नै सञ्चालन हुने जनाएको छ । प्रश्नपत्र सार्वजनिक भएको विषयमा छानविन हुने पनि बोर्डले जनाएको छ । देशभर यही चैत १० गतेदेखि शुरु भएको परीक्षा २१ गतेसम्म चल्नेछ । बोर्डले सातै प्रदेशमा अनिवार्य विषयको फरकफरक प्रश्नपत्र बनाएको थियो ।
पाँच जिल्लाका सिडिओ फेरिए, को कहाँ सरुवा ?
काठमाडौँ । गृह मन्त्रालयले पाँच जिल्लाका प्रमुख जिल्ला अधिकारी (सिडिओ) सरुवा गरेको छ । उपसचिवको दरबन्दी भएका चार र सहसचिवको दरबन्दी भएको एक जिल्लामा सिडिओको हेरफेर भएको हो । गृह मन्त्रालयका अनुसार लमजुङमा मन्त्रालयबाट डा डिजन भट्टराईलाई पठाइएको छ । लमजुङका सिडिओ झंक ढकालको गृह मन्त्रालयमा सरुवा भएको छ । त्यस्तै खोटाङमा अध्यागमन विभागमा कार्यरत विष्णुहरी उपाध्याय, ओखलढुंगामा गणेश आचार्य र हुम्लामा ढोलकराज ढकाललाई सरुवा गरिएको छ । त्यस्तै सहसचिव यज्ञराज बोहरालाई कैलालीको सिडिओमा सरुवा भएको छ । उनी कर्णाली प्रदेशमा कार्यरत थिए । आजको नयाँ पत्रिका दैनिकमा समाचार छ ।
