जुगल हिमाल आरोहण खुला, आरोही आधार शिविरतर्फ
काठमाडौँ । राजधानीबाट नजिक रहेको सिन्धुपाल्चोकको जुगल हिमाल आरोहण पहिलोपटक खुला गरिएको छ । काठमाडौँबाट १४५ किलोमिटर दूरीमा रहेको उक्त हिमाल आरोहण खुलासँगै शुक्रबार आरोही दल त्यसतर्फ पत्रकार सम्मेलनमा जानकारी दिइयो । आरोहण खुला गरिएसँगै जुगल हिमशृङ्खला ग्याल्जेन चुली प्रथम आरोहण तथा अध्ययन गर्न आरोही आधार शिविरतर्फ जाने भएका हुन् । जुगल हिमाल समुद्री सतहबाट छ हजार १५१ मिटर उचाइमा छ । प्रदेश ३ सरकारको उद्योग, पर्यटन वन तथा वातावरण मन्त्रालय र जुगल गाउँपालिकाको कार्यालयले संयुक्तरुपमा आरोहण तथा अध्ययनका लागि सहयोग गर्ने जनाइएको छ । एउटा आरोहणको नेतृत्व सगरमाथा आरोही माया गुरुङ र अर्को माधव सापकोटाले नेतृत्व गर्ने छन् । ग्याल्जेन चुली आरोहण तथा अध्ययनका लागि प्रदेश नं ३ सरकारको मन्त्रिपरिषद् बैठकले चुली आरोहण गर्न सिन्धु पर्यटन परिषद्लाई रु ४० लाख अनुदान सहयोग गर्ने निर्णय गरेको थियो । प्रदेश सरकारका उद्योग, पर्यटन, वन तथा वातावरणमन्त्री अरुण नेपालले प्रदेश नं ३ को आर्थिक समृद्धिसँग जोडिएको काठमाडौँबाट नजिको ‘पिक’ प्रचारप्रसार भएमा पर्यटन क्षेत्रमा सहयोग पुग्ने विश्वास व्यक्त गरे । हालसम्म औपचारिकरुपमा मानव पाइला नपुगेको ग्याल्जेन चुली जुगल हिमशृङ्खलाका ११ वटा मध्येको एक रहेको जुगल गाउँपालिका अध्यक्ष होमनारायण श्रेष्ठले जानकारी दिए । यससँगै अब आरोहणका लागि ४१५ हिमाल भएका छन् । अझै एक हजार ३०० भन्दा बढी हिमाल आरोहणका लागि योग्य रहेको बताइन्छ । सम्भावित जोखिम, पर्यटन प्रवद्र्धनका सम्भाव्यता, रक क्लाइम्बिङ, आइस क्लाइम्बिङसम्बन्धी अध्ययन गर्ने र जुगल हिमाल आरोहणलाई प्रवद्र्धन गर्न भिडियो वृत्तचित्र तयारी गरी राष्ट्रिय तथा अन्तर्राष्ट्रियस्तरमा समेत प्रचारप्रसार गरिने आयोजकले जनाएको छ । रासस
सातामा तीन कम्पनीको एक करोड ४४ लाख कित्ता बोनस सूचिकृत, क-कसको ?
काठमाडौं । यस साता मात्रै नेपाल स्टक एक्स्चेञ्ज(नेप्से)मा कुल एक करोड ४४ लाख ३९ हजार ५१६ कित्ता बोनस सेयर सूचिकृत भएको छ । गत आइतबारदेखि शुक्रबार सम्ममा विभिन्न तीन कम्पनीको सो मात्राको बोनस सूचिकृत भएको हो । सो अवधिमा सिद्धार्थ बैंक, बैंक अफ काठमाण्डू र नेशनल माइक्रोफाइनान्स वित्तीय संस्थाको बोनस सेयर थपिएको हो । सबैभन्दा बढी बैंक अफ काठमाण्डूको कूल ९९ लाख २ हजार ५४ कित्ता बोनस थपिएको छ । त्यस्तै, सिद्धार्थ बैंकको ४२ करोड ३२ लाख १९२ कित्ता र नेशनल माइक्रोफाइनान्सको ३ लाख ५ हजार २७० कित्ता बोनस सेयर नेप्सेमा सूचिकृत भएको हो ।
नेपालको जलविद्युत् दक्षिण एशियाको विकासको आधारः उर्जामन्त्री पुन
काठमाडौँ । ऊर्जा, जलस्रोत तथा सिँचाइमन्त्री वर्षमान पुनले ऊर्जा क्षेत्र नै मुलुकको आर्थिक रुपान्तरणको प्रमुख आधार भएकाले सरकारले यस क्षेत्रलाई प्रमुख प्राथमिकतामा राखेको बताएका छन् । राजधानीमा जारी लगानी सम्मेलनमा ‘आर्थिक समृद्धिका लागि ऊर्जा’ विषयको सत्रलाई सम्बोधन गर्दै उनले सरकारले आगामी दश वर्षमा १५ हजार मेगावट विद्युत् उत्पादन गर्ने र त्यसमा पाँच हजार मेगावाट निर्यात गर्ने लक्ष्य लिएको जानकारी दिए । ऊर्जा क्षेत्रको विकासका लागि मन्त्रालयले नियमित रुपमा नीतिगत सुधार गरी लगानीमैत्री वातावरण बनाएको र ऊर्जा मिश्रणको अवधारणालाई व्यवहारिक रुपमा कार्यान्वयनमा ल्याएको उनले बताए । नेपाली जनताको लगानीमा केही आयोजना निर्माण गर्ने लक्ष्यका साथ सरकारले जनताको जलविद्युत् कार्यक्रम शुरु गरिसकेको जानकारी दिँदै मन्त्री पुनले ठूला आयोजनामा विदेशी लगानी भित्र्याउन सरकार प्रयासरत रहेको बताए । प्रशारण गुरुयोजना तथा ढल्केवर–मुजफ्फरपुर अन्तरदेशीय प्रशारण लाइनजस्ता आयोजना अगाडि बढाइएको र क्षेत्रीय बजारसम्म पुग्नका लागि दिपक्षीय तथा बहुपक्षीय संयन्त्रमार्फत काम भइरहेको पनि उनले स्पष्ट पारे । मन्त्री पुनले नेपालको जलविद्युत् दक्षिण एशियाको विकासका लागि महत्वपूर्ण आधारस्तम्भ भएकाले यसमा वैदेशिक लगानीका लागि आग्रह गरे । सरकारले एकीकृत जलस्रोत नीतिमार्फत जलस्रोतको बहुउपयोगमा जोड दिएको, सम्भाव्य परियोजनालाई सार्थक सहयोग उपलब्ध गराएको तथा नदी बेसिनको अध्ययनसमेत अगाडि बढाएको उनले जानकारी दिए । राष्टि«य योजना आयोगका सदस्य डा कृष्णप्रसाद ओलीले जलवायु परिवर्तनका असर न्यूनीकरण गर्न जलायशयुक्त जलविद्युत् आयोजना निर्माण जरुरी रहेकामा जोड दिए । बाढी नियन्त्रण, खानेपानीको उपलब्धता तथा सिँचाइ सुविधाका लागि समेत ठूला आयोजना जरुरी रहेको भन्दै उनले पछिल्ला दिनमा सरकारले त्यस्ता परियोजनालाई प्रमुख प्राथमिकतामा राखेको बताए । चीन, भारत र बङ्गलादेशसँग ऊर्जा क्षेत्रमा सहकार्य गर्न दिपक्षीय संयन्त्रसमेत खडा गरिएको स्पष्ट पार्दै उनले नेपालको जलविद्युत्लाई क्षेत्रीय बजारमा उपलब्ध गराउन लागिपरेको बताए । ठूला आयोजनालाई तोकिएका समयमै सम्पन्न गर्न नीतिगत सुधार, अनुगमन संयन्त्र जरुरी रहेको भन्दै डा ओलीले पछिल्ला दिनमा ऊर्जा, जलस्रोत तथा सिँचाइ मन्त्रालयले ठोस कार्ययोजनासहित काम गरिरहेको जानकारी दिए । नेपाल विद्युत् प्राधिकरणका कार्यकारी निर्देशक कुलमान घिसिड्ले सरकारले आगामी तीन वर्षमा तीन हजार मोगावट, पाँच वर्षमा पाँच हजार र १० वर्षमा १५ हजार मेगावाट विद्युत् उत्पादन गर्ने लक्ष्य लिइएकाले त्यसलाई व्यवस्थापन गर्न आफूहरू लागिपरेको बताए । वित्तीय लगानीको जोखिम कम गर्न सरकारले ‘हेजिड्ं फण्ड’ सम्बन्धी व्यवस्था गरिसकेकाले वैदेशिक लगानीकर्तालाई समेत सहजरूपमा लगानी गर्ने वातावरण बनेको उहाँको भनाइ थियो । प्राधिकरणले नदी प्रवाहमा आधारित आयोजनाभन्दा जलाशययुक्त र अर्धजलायशयुक्त आयोजनालाई प्राथमिकतामा राखी विद्युत् खरीद सम्झौताको नयाँ मूल्यसूचीसमेत सार्वजनिक गरिसकेको कार्यकारी निर्देशक घिसिडले जानकारी दिए । करीब १६ हजार मेगावट क्षमताका आयोजना विभिन्न चरणमा रहेको जानकारी दिँदै उनले करीब पाँच हजार मेगावट क्षमताका आयोजना निर्माणमा रहेको बताए । बङ्गलादेश पावर डेभलपमेन्ट बोर्डका प्रमुख इञ्जिनीयर मोहबुर रहमानले आफ्नो देशको कूल मागमध्ये १५ प्रतिशत विद्युत् छिमेकी देशबाट आयात गरिरहेको जानकारी दिँदै नेपालसमेत आफूहरुका लागि उपयुक्त स्रोत भएको बताए । नेपालमा जलविद्युत्को पर्याप्त सम्भावना रहेको औँल्याउँदै उनले जलविद्युत्को विकास लागि नेपालसँगै सहकार्य गरेर अघि बढ्न तयार रहेको बताए । बङ्गलादेशले सन् २०४० सम्म नेपालबाट नौ हजार मेगावाट विद्युत् आयात गर्ने लक्ष्य लिएको र माथिल्लो कर्णाली जलविद्युत् आयोजनाबाट तत्काल ५०० मेगावाट विद्युत् खरीद गर्न लागिरहेको जानकारी दिए । सम्मेलनमा पावर चाइनाका महाप्रबन्धक सङ दोङ सेङले एक क्षेत्र एक मार्ग अभियानअन्तर्गत नेपालमा थप लगानी गर्न चाहेको जानकारी दिए । उनले नेपालको ऊर्जा क्षेत्रमा लगानी गर्न चिनियाँ लगानीकर्ता इच्छुक रहेकोसमेत स्पष्ट पारे । यसैगरी भारतको केन्द्रीय विद्युत् नियमन आयोगका सचिव सनोजकुमार झाले नेपाल, बङ्गलादेश र भुटानको विद्युत् विकासका लागि आफ्नो सरकारले प्रमुख प्राथमिकतामा राखी अन्तरदेशीय विद्युत् व्यापारसम्बन्धी गुरुयोजनासमेत तय गरेको बताए । रासस
माथिल्लो त्रिशूली थ्री ‘ए’को बाँधस्थलको परीक्षण सफल, वैशाख १७ गतेदेखि उत्पादन थाल्ने
नुवाकोट । रसुवामा बाँध र नुवाकोटमा विद्युत् उत्पादनगृह रहेको ६० मेगावाट क्षमताको माथिल्लो त्रिशूली थ्री ‘ए’ जलविद्युत् आयोजनाको संरचना निर्माण पूरा भएसँगै विद्युत् उत्पादनका लागि थालिएको परीक्षण सफल हुँदै गएको छ । आगामी वैशाख १७ गतेदेखि विद्युत् उत्पादन थाल्ने लक्ष्य लिएको आयोजनाले यही चैत १ गतेदेखि शुरु गरेको बाँधस्थलको परीक्षण बिहीबार सम्पन्न गरेको आयोजना प्रमुख फणिन्द्रराज जोशीले जानकारी दिए । बाँधस्थलका तीन वटा ढोकाबाट पानी थुनेर डि–सेन्टर (पानी जमाउने पोखरी)मा पठाउने कार्य सफल भएको हो । विसं २०७२ वैशाख १२ मा गएको विनाशकारी भूकम्पका कारण सबैभन्दा बढी क्षति पुगेको उक्त आयोजनाको बाँधस्थल पुनःमर्मत गरेर सञ्चालनमा ल्याइएको थियो । आयोजनाको बाँधस्थलको परीक्षण सफल भएसगैँ तोकिएको समयमा विद्युत् उत्पादन हुने वातावरण निश्चिततातर्फ लम्किएको आयोजनाका उपप्रबन्धक ई सत्यराम ज्याख्वाले बताए । उनले भने, “भूकम्पले क्षति पु¥याएपछि मर्मत गरेर सञ्चालनमा ल्याइएकाले बाँधस्थलको परीक्षण चुनौती थियो, तीन वटा ढोकामार्फत थुनिएको पानीले सहजै डि–सेन्टरमा प्रवेश गरेको छ, यो सुखद पक्ष हो ।” बाँधस्थलको परीक्षण अन्तर्गत थुनिएको बाँध करीब ४८ घण्टासम्म परीक्षण गरिने आयोजनाको निर्माण गरिरहेको चाइना गेजुवा गु्रप अफ कम्पनी (सिजिजिसी)ले जनाएको छ । आयोजनाको सिभिल (भौतिक) संरचना निर्माणपश्चात् करीब ४५ दिनको परीक्षण अवधिको यस समयमा दोस्रो चरणअन्तर्गत अर्को सातादेखि डि–सेन्टर हुँदै सुरुङ मार्गको परीक्षण गर्ने योजना छ । असारसम्ममा निर्माण सम्पन्न गर्ने योजनाका साथ तीव्र गतिमा भइरहेको कार्यअन्तर्गत आयोजनाको समग्र काम हाल ९० प्रतिशतभन्दा बढी पूरा भएको छ ।
लगानी सम्मेलनमा म्यानमारका लगानीकर्ता गरे आफ्नै देशको प्रचार !
काठमाडौँ । राजधानीको होटल सोल्टीमा शुक्रबारदेखि २ दिने लगानी सम्मेलन भइरहेको छ । उक्त सम्मेलनमा विभिन्न विषयमा छलफल भइरहँदा म्यानमारका एक लगानीकर्ताले नेपालमा लगानी प्रतिबद्धता गर्नुको साटो आफ्नै प्रचार मात्र गरेका छन् । म्यानमारको योमा ग्रुप अफ कम्पनीका कार्यकारी अध्यक्ष सर्ज पुनले लगानी सम्मेलनका क्रममा नेपालमा भेला भएका लगानीकर्तालाई उनकै देश म्यानमारमा लगानी गर्न आग्रह गरेका थिए । विदेशी निम्तालुले आफ्नै देशको प्रचार गर्न थालेपछि छलफलका सहजकर्ता प्रदीपकुमार श्रेष्ठले म्यानमारको राम्रो पक्षको प्रचार भन्दा पनि नेपालमा लगानीको बाताबरण बारे धारणा राख्न अनुरोध गरेका थिए । उद्योगमन्त्री मातृका यादवले अध्यक्षता गरेको उद्योग सत्रको छलफल कार्यक्रममा सचिव यामकुमारी खतिवडाले कार्यपत्र प्रस्तुत गरेकी थिइन् ।
संस्थापक सेयर किनबेच ह्वात्तै बढ्यो, बेच्नेलाई बाध्यता र कर छलि, किन्नेलाई अवसर
काठमाडौं । नेपालको सेयर बजारमा संस्थापक सेयर किनबेच ज्यादै कम हुने गरेको थियो । तर, पछिल्लो समय साधारण सेयरको तुलनामा संस्थापक सेयरको खरिद बिक्री उच्च छ । गत चैतको पहिलो दुई सातामा जम्मा १० दिन सेयर कारोबार भयो । त्यसमा ६ दिन सबैभन्दा बढी सेयर कारोबार ती संस्थाको भए जसको संस्थापक सेयर कारोबार बढी भए । दुई सातामा चार बैंक तथा वित्तीय संस्थाको मात्र कुल १९ करोड ४५ लाख रुपैयाँ बढीको संस्थापक सेयर किनबेच भएका छन् । शाइन रेसुङ्गा डेभलपमेन्ट बैंक, ग्लोबल आईएमई बैंक, मुक्तिनाथ विकास बैंक र नेपाल बङ्गलादेश बैंकको गरी सो मात्राको संस्थापक सेयर दोस्रो बजारमा किनबेच भएको हो । चैत ३ गते आइतबार शाइन रेसुङ्गाको ४ करोड ४३ लाख रुपैयाँ बराबरको संस्थापक सेयर किनबेच भएको छ । त्यस्तै, चैत ४, ५ र ७ गते तीनै दिन ग्लोबल आईएमईको संस्थापक सेयर बढी कारोबार भएको थियो । बैंकको लगातार तीन दिनमा कुल ९ करोड ३६ लाख रुपैयाँ बढीको सेयर खरिद बिक्री भएको थियो । त्यसैगरी, चैत ११ र १२ गते क्रमशः मुक्तिनाथ विकास बैंक र नेपाल बङ्गलादेश बैंकको ठूलो मात्रामा संस्थापक सेयर खरिदबिक्री भएका थिए । त्यस्तै, सानिमा विकास बैंकको करिव ५० करोड रुपैयाँ मूल्य पर्ने सवा २७ लाख कित्ता सेयर बढाबढ मूल्यमा लिलामीमा राखिएको छ । आकर्षण कि बाध्यता सरकारी नीतिमा यस्तो छ कि संस्थापक सेयरलाई स्टक मार्केटमा सौताको छोराको रुपमा हेरिन्छ । साधारण सेयर धितो राखेर बजार मूल्यको ६० प्रतिशत कर्जा पाइन्छ भने संस्थापक सेयर धितो राखेर बजार मूल्यको बढीमा २५ प्रतिशत धितो पाइन्छ । धेरै बैंक तथा वित्तीय संस्थाले प्रमोटर सेयर धितोको रुपमा स्वीकार नै गर्दैनन् । संस्थापक सेयर सोही संस्थाका संस्थापकले नकिनेको अवस्थामा मात्र अरुलाई बेच्न पाईन्छ । संस्थापक सेयरको मूल्य सामान्यता साधारण सेयरको मूल्यभन्दा झण्डै आधा हुन्छ । यस्ता धेरै कारणले संस्थापक सेयरको किनबेच नै बढी कठिन हुन्छ । तर पछिल्लो समय किन संस्थापक सेयर कारोबार बढी भएको छ ? नेपाल इन्भेष्टर्स फोरमका अध्यक्ष छोटेलाल रौनियार भन्छन्- ‘एक व्यक्तिको स्वामित्वमा कुनै पनि बैंक तथा वित्तीय संस्थामा १ प्रतिशत वा सोभन्दा बढी सेयर छ भने अर्को संस्थामा प्रवद्धक सेयर लिन नपाईने राष्ट्र बैंकको नियमका कारण दुई वा दुई भन्दा बढी बैंक तथा वित्तीय संस्थामा संस्थापक सेयर धेरै भएका सेयरधनीले सेयर बेचेको हुन सक्छ ।’ बैंक अफ काठमाण्डूका संस्थापक डब्बर बहादुर मल्लले सिभिल बैंकको संस्थापक सेयरमा लगानी गरेको भेटिएपछि राष्ट्र बैंकले दुबैं बैंकलाई मल्लको लाभांश रोक्न निर्देशन दिएको छ । बैंक अफ काठमाण्डूबाट मात्र उनको ३ करोड रुपैयाँ बराबरको लाभांश रोकिएको छ । मल्लले पाउने लाभांश रोक्न राष्ट्र बैंकले निर्देशन दिएपछि बैंकिङ क्षेत्रमा क्रस होल्डिङ भएकाले सेयरधनीहरु आत्तिएर सेयर बेच्न थालेको बैंकिङ क्षेत्रमा चर्चा छ । यस्ता सेयरधनीले नयाँ बैंकको सेयर छोडेर पुरानो बैंकको सेयर होल्ड गरेका छन् । क्रस होल्डिङ हुनेहरुलाई सेयर बेच्नु पर्ने बाध्यता हुँदा नयाँ लगानीकर्ताको लागि भने यतिबेला प्रमोटर सेयर किन्नु लगानीको उचित अवसर पनि हो । राम्रो कम्पनीको साधारण सेयरको मूल्य पनि निकै कम भएको र त्यहि मूल्यलाई आधार मानेर प्रमोटर सेयर झन् सस्तोमा किन्न पाइने भएकाेले चलाख लगानीकर्ता यस्तो सेयरमा आकर्षित भएको पाइन्छ । पहिला अरुको नाममा संस्थापक सेयर लिएका तथा यसअघि नै कारोबार भएको तर नामसारी हुन बाँकी रहेका संस्थापकहरु पनि अहिले नामासारी गर्न आएको नेपाल स्टक एक्सचेञ्जका प्रमुख कार्यकारी अधिकृत(सीईओ) चन्द्रसिंह साउदले बताए । विश्वास पात्रहरुबीच सेयरको मूल्य उच्च भएको बेलामा कारोबार भएपनि पुँजीगत लाभकर छल्नको लागि बजार घटेको बेलामा नामसारी गर्ने गरेको समेत भेटिएको उनले बताए । ‘बढी मूल्य भएको बेलामा बढी पुँजीगत लाभकर लाग्छ, कम मूल्य भएको बेलामा कम कर लाग्छ । मूल्य घटेको बेलामा ठूला कारोबार हुनुको कारण त्यो पनि हुन सक्छ’ सीईओ साउदले विकासन्युजसँग भने ।
‘दोलखा फिल्म सिटी’ लाई पत्याउलान् त विदेशी लगानीकर्ताले ?
काठमाडौं । नेपालमा लगानी सम्मेलन चलिरहँदा चलचित्र क्षेत्रबाट एक मात्र परियोजना ‘दोलखा फिल्म सिटी’ लाई प्रस्तुत गरिंदैछ । भौगोलिक दृष्टी सुन्दर एवम् पर्यटकीय जिल्लाको रुपमा चिनिने दोलखा काठमाडौंबाट १ सय किमि दुरीमा रहेको छ । भीमेश्वर नगरपालिका ९ स्थित डाङडुङेडाँडाको कम्तीमा १८९ वर्गमिटरदेखि ३१४ वर्गमिटर क्षेत्रफलमा फिल्म सिटी बनाउने परियोजना प्रस्तावमा उल्लेख छ । लगानी सम्मेलनमा सरकारी स्तरबाट पारित ५० वटा परियोजनामा ‘दोलखा फिल्म सिटी’ पनि परेको हो । पर्यटकीय क्षेत्र बनाउन ८ वर्षयता ३५ करोड खर्च गरिसकेको सो क्षेत्रमा पर्यटन सँगसँगै फिल्म सिटीको रुपमा दोलखा जिल्लालाई स्थापित गराउन गरिएको छ । लगानी बोर्डले फिल्मसिटी परियोजना प्रस्तावमा दोलखा युनेस्कोको पुरानो सहरहरुको सूचीमा परेको, विभिन्न जातजाति बीचको फरक फरक संस्कृति, परम्पराका साथ भिन्न खालको गाँउ वस्ती रहेको कारण फिल्म सिटी बनाउन सकिने उल्लेख गरिएको छ । फिल्म सिटी क्षेत्रमा पाँचतारे होटेल, क्यासिनो, स्थानीय होटल, पार्क, क्याफे, बार, गिफ्ट सप र रंगमञ्च बनाउने कुरा लगानी बोर्डको प्रस्तावमा उल्लेख छ । प्रस्तावित स्थानमा फिल्म उत्पादन र प्रशोधनका लागि सुविधा सम्पन्न स्टुडियो बनाउन सकिने, सुटिङका लागि आवश्यक सामाग्री उपलब्ध गराउने देखि चलचित्र सम्बन्धी तथ्यांक केन्द्र निर्माण गर्ने कुरा समावेश छ । फिल्म सिटी परियोजनामा ७० लाख डलर बराबरको बैंकिङ्ग ग्यारेन्टी भएको र निजी क्षेत्रका लगानीकर्ताहरुमा अन्तर्राष्ट्रिय स्तरको पर्यटन विकास तथा पूर्वाधारको क्षेत्रबाट ५ वर्षमा काम सक्नेले मात्र आवेदन गर्न सक्ने उल्लेख गरिएको छ ।
अन्तर्राष्ट्रिय विमानस्थलमा गैरआवासीय नेपालीहरुका लागि विशेष अध्यागमन डेस्क स्थापना
काठमाडौं । गैरआवासीय नेपाली संघको निरन्तर अनुरोध पछि नेपाल सरकार अध्यागमन विभागले त्रिभुवन अन्तर्राष्ट्रिय विमानस्थलमा गैरआवासीय नेपालीहरुका लागि विशेष अध्यागमन डेस्क स्थापना गरेको छ । गत साता मात्रै संघका अध्यक्ष भवन भट्टले गृहमन्त्री रामबहादुर थापालाई भेटी डेक्स स्थापना गर्ने काममा आवश्यक सहयोगका लागि अनुरोध गरेका थिए । यस अघि संघका उपाध्यक्ष कुल आचार्य र एनसिसि युकेले अध्यागमन विभागका प्रमुख ईश्वरराज पौडेललाई लण्डनमा यस बारे ध्यानाकर्षण गराउंदै एनआरएन डेस्क खोलि दिन आग्रह गरेका थिए। डेस्कको उद्घाटन कार्यक्रममा बोल्दै संघका अध्यक्ष भवन भट्टले लामो समयदेखिको प्रयासले सार्थकता पाएको बताए । सरकारले गैरआवासीय नेपालीहरुलाई मुलुकका महत्वपूर्ण एजेन्डामा समेत सहभागी गराएको बताउँदै आगामी दिनमा पनि सरकारसंग मिलेर काम गर्ने बताएका छन् । यसरी नै अध्यागमन विभागका महानिर्देशकले विभागले गैरआवासीय नेपालीहरुलाई सहयोग गर्न पाएकोमा खुशी व्यक्त गरेका छन् । कार्यक्रममा अध्यक्ष भट्ट सहित उपाध्यक्ष कुमार पन्त, कूल आचार्य, महासचिव डा.बद्री केसी, प्रवक्ता भूषण घिमिरे लगायतको उपस्थिती रहेको थियो ।
