मेगा क्यापिटल मार्केट्सलाई मर्चेन्ट बैकिङ्ग कारोबार गर्न अनुमति
काठमाडौँ । मेगा बैंक नेपालको पूर्ण स्वामित्वमा रहेको सहायक कम्पनी मेगा क्यापिटल मार्केट्सले मर्चेन्ट बैकिङ्ग व्यवसाय गर्नका लागि अनुमति प्राप्त गरेको छ । मेगा क्यापिटल मार्केट्सले सोमबार नेपाल धितोपत्र बोर्डबाट कारोबारका लागि अनुमतिपत्र प्राप्त गरेको हो । यस कम्पनीको अधिकृत पूँजी ३० करोड रुपैयाँ र चुक्तापूँजी २० करोड रुपैयाँरहेको छ । मेगा क्यापिटल मार्केट्सले पूँजीबजारसँग सम्बन्धित निष्काशन तथा बिक्री प्रबन्ध, धितोपत्र प्रत्याभूति, शेयर रजिष्ट्रेशन, लगानी व्यवस्थापन, संस्थागत परामर्श जस्ता मर्चेन्ट बैंकिङ सेवाहरु आफ्नो त्रिपुरेश्वरस्थित केन्द्रीय कार्यालय, सांकेत कम्प्लेक्सबाट प्रदान गर्ने कम्पनीका सिइओ सुदयकान्त झाले बताए । ग्राहकहरुको सुविधा, लगानी उद्देश्य तथा आवश्यकतालाई ध्यानमा राखि उपयुक्त सेवाहरु पूँजीबजारमा ल्याउनु नै कम्पनीको मूलउद्देश्य रहेको मेगा क्यापिटल मार्केट्सका अध्यक्ष ईश्वरबहादुर गुरुङ्ले बताए । केही दिनपछि औपचारिक कार्यक्रम गरी मेगा क्यापिटल मार्केट्सको विधिवत् रुपमा कारोबार प्रारम्भ गर्ने जानकारी दिएका छन् ।
नबिल बैंकले २ अर्बको ऋणपत्र निष्काशन गर्दै, व्यवस्थापन गर्न लक्ष्मी क्यापिटलसँग संझौता
काठमाडौं । नबिल बैंकले जारी गर्न लागेको ऋणपत्र निष्काशन व्यवस्थापनको लागि लक्ष्मी क्यापिटल मार्केट लिमिटेडसग निष्काशन व्यवस्थापन सम्झौता गरेको छ । उक्त सम्झौता बमोजिम बैंकले निष्काशन गर्न लागेको २ अर्ब बराबरको(२०,००,००० एकाइ ऋणपत्र प्रति एकाइ रु १,००० का दरले) ऋणपत्रको सार्वजनिक निष्काशन तथा व्यक्तिगत तवरमा विक्री कार्यको व्यवस्थापन लक्ष्मी क्यापिटलले गर्नेछ । सो सम्झौतामा बैंकको तर्फबाट बैंकका प्रमुख कार्यकारी अधिकृत अनिलकेशरी शाह तथा लक्ष्मी क्यापिटलका तर्फबाट लक्ष्मी क्यापिटलका प्रमुख कार्यकारी अधिकृत राजिव सापकोटाले हस्ताक्षर गरेका छन् ।
यी हुन् नेपालका १० ठूला कम्पनी, पुराना व्यवसायिक घरानालाई विस्थापित गर्दै नयाँ कम्पनी
काठमाडौं । कारोबार रकमका आधारमा नेपालका १० ठूला कम्पनी कुन कुन हुन सक्छन् ? व्यवसायिक क्षेत्रमा धेरैको चासो हुने गरेको छ । व्यवसायिक दुनियाँमा टप टेनको प्रतिस्पर्धामा को भित्र छिरे र को बाहिरन बाध्य भए ? धेरै रोचक विषय हुने गर्छ । प्रतिस्पर्धाको पहिलो स्थानमा नेपाल आयल निगम लिमिटेड छ । यस कम्पनीले गत आर्थिक वर्षमा १ खर्ब ९५ अर्ब ९० करोड रुपैयाँको व्यापार गरेको छ । निगम पहिलो भएको यस पटक मात्र होइन, विगतमा पनि हरेक वर्ष पहिलो थियो । र, कम्तिमा आगामी एक दशकसम्म निगम नै पहिलो रहिरहने छ । तर, निगम पहिलो हुनुको अर्थ छैन । किनकी पेट्रोलियम पदार्थको व्यापारमा ऊ एक्लो छ । सरकारले पेट्रोलियम पदार्थको आयात गर्न निगमलाई मात्र लाईसेन्स दिएको छ । निगमले पेट्रोल, डिजेल, मट्टितेल, हवाई इन्धन, खाना पकाउने एजपीजी ग्यास लगायत पेट्रोलियम पदार्थको आयात गर्दै आएको छ । नेपालमा मात्र होइन, पेट्रोलिम पदार्थको बजार विश्वमा नै ठूलो छ । यो व्यवसायमा नाफा र प्रतिष्ठा दुबै छ । विश्वका धनाढ्यहरुको सूचिमा पेट्रोलिम पदार्थको व्यापार गर्नेहरु संख्या धेरै हुने गरेको छ । तर, नेपाली व्यवसायीहरु यो क्षेत्रको व्यापारमा प्रवेश गर्न सकेका छैनन् । कारोबार रकमका आधारमा एनसेल प्रालि दोस्रो स्थानमा छ । यस कम्पनीले गत आर्थिक वर्ष २०७४/७५ मा ६४ अर्ब ३९ करोड रुपैयाँ कारोबार गरेको छ । यो कम्पनीले ५ वर्षअघि नेपाल दूरसंचार कम्पनी लिमिटेड (नेपाल टेलिकम)लाई तेस्रो स्थानमा पार्दै दोस्रो स्थान हासिल गरेको हो । एनसेल विदेशी लगानी भएको कम्पनी हो । कानुनी रुपमा २० प्रतिशत लगानी नेपालीको देखिए पनि बास्तविक रुपमा सबै लगानी विदेशीको भएको सरकारी अधिकारीहरु बताउँछन् । एनसेल नेपालमा सर्वाधिक नाफा आर्जन गर्ने कम्पनी हो । १० करोड चुक्ता पुँजी भएको यस कम्पनीले एक वर्षमा २९ अर्ब रुपैयाँसम्म खुद नाफा आर्जन गरेको देखिन्छ, जुन रकम सरकारलाई कर तिरेपछि लगानीकर्ताले लिन पाउने पैसा हो । एनसेलले दोस्रो स्थान अझै धेरै वर्ष सुरक्षित राख्ने देखिन्छ । किनकी तेस्रो स्थानमा रहेको दूरसंचार कम्पनीको कारोबार करिव २७ अर्ब रुपैयाँ कम छ । साथै, एनसेलले व्यापार विस्तार गर्दै लगेको छ भने दूरसंचारको व्यवसायिक यात्रा अधोगतिमा छ । आर्थिक वर्ष २०७३/७४ को तुलनामा एनसेलले ५ अर्ब रुपैयाँ कारोबार बढाएको छ । तर, दूरसंचार कम्पनीको कारोबार आर्थिक वर्ष २०७३/७४ तुलनामा २०७४/७५ मा करिव साढे ४ अर्ब रुपैयाँ घटेको छ । टेलिकमले गत वर्ष ३७ अर्ब ६५ करोडको कारोबार गरेको छ । नेपाल दूरसंचार कम्पनीले भविष्यामा तेस्रो स्थान पनि गुमाउने सम्भावना बढी देखिन्छ । किनकी यस कम्पनीलाई दुईटा रोग लागेको छ, राजनीतिकरण र भ्रष्टाचार । ९५ प्रतिशत सेयर सरकारको भएको यस कम्पनीको नेतृत्वले राजनीतिक नियुक्ती पाउँछ । क्षमताको आधारमा भन्दा राजनीतिक निकटता भएकोले व्यक्तिले यस कम्पनीको कार्यकारी प्रमुख पद पाउँछ । त्यसैको परिणाम हो विदेशी व्यवस्थापन भएको एनसेलले सञ्चार क्षेत्रको बजार हिस्सा बढाउँदै लग्दा सरकारी व्यवस्थापन रहेको दूरसंचार कम्पनीले बजार हिस्सा गुमाउँदै गएको छ, जबकी बजार, सेवा र प्रविधि एउटै हो । निकट भविश्यमा तेस्रो स्थान जगदम्बा स्टील्स प्रालिले लिनसक्छ । जगदम्बा स्टील्स नेपालको सबैभन्दा ठूलो स्टील उद्योग हो र हरेक वर्ष उकालो चढिरहेको छ । यस कम्पनीले गत वर्ष ३५ अर्ब ५ करोडको कारोबार गरेर चौथो स्थान हासिल गरेको छ । जगदम्बा स्टील्स शंकर ग्रुपले प्रवद्र्धन गरेको कम्पनी हो । आक्रामक रुपमा लगानी विस्तार गरेको ग्रुपका दुई वटा कम्पनी टप टेनमा परेका छन् । ९ औं स्थानमा श्री जगदम्बा इन्टरप्राइजेज प्रालि छ । यस कम्पनीले गत वर्ष १६ अर्ब ७९ करोड रुपैयाँको कारोबार गरेको छ । गत वर्ष ३३ अर्ब ४१ करोड रुपैयाँको कारोबार गरेर पाँचौ स्थानमा रहेको छ सूर्य नेपाल प्रालि । कारोबार रकमका आधारमा पाँचौं नम्बरमा रहेपनि सरकारलाई सबैभन्दा बढी कर तिर्ने कम्पनी हो यो । यस कम्पनीको मुख्य उत्पादन चुरोट हो भने पछिल्लो समय सलाई, धुपबत्ती पनि उत्पादन गर्दै आएको छ । साथै, यस कम्पनीले तयारी पोसाकको व्यापार गर्छ । भ्याट, अन्तशुल्क र आयकर सबै जोडेर सबैभन्दा बढी कर तिर्ने कम्पनी सूर्य नेपाल भएको ठूला करदाता कार्यालयका प्रमुख धनीराम शर्माले बताए । सूर्य नेपाल विदेशी लगानी भएको कम्पनी हो । छैटौ नम्बरमा रहेको सिप्रदी ट्रेडिङ प्रालिले गत वर्ष २९ अर्ब ९३ करोड रुपैयाँको कारोबार गरेको छ । टाटा मोटर्सको आधिकारिक बिक्रेता सिप्रदी टेड्रिङ सरकारलाई सबैभन्दा बढी भ्याट बुझाउने कम्पनी हो भने यसको लगानीकर्ता सिद्धार्थ राणा सबैभन्दा बढी आयकर तिर्ने व्यक्तिको तर्फबाट ५ पटक सरकारबाट सम्मानित भएका छन् । राणाको लगानी रहेको अन्य कम्पनीहरु पनि छन् । सबै कम्पनीको कारोबार ५० अर्ब रुपैयाँ भन्दा बढी भएको राणाले एउटा सार्वजनिक कार्यक्रममा बताएका थिए । सातौ नम्बरमा गोर्खा ब्रुअरी प्रालि छ, जसले गत आर्थिक वर्षमा २३ अर्ब १३ करोड रुपैयाँको कारोबार गरेको छ । वियर उत्पादन गर्ने यस कम्पनीमा विदेशी लगानी छ । यसमा खेतान समूहको थोरै सेयर लगानी छ । आर्थिक संकटमा परेपछि राजेन्द्र खेतानले गोर्खा ब्रुअरीको सेयर बेच्दै आएका छन् । बजाज ब्राण्डको मोटरसाईकल बिक्री गर्ने हंसराज हुलासचन्द एण्ड कम्पनी प्रालिले गत वर्ष २० अर्ब ८१ करोड कारोबार गरेर ८औं स्थान लिएको छ । शेखर गोल्छाले नेतृत्व गरेको यो कम्पनी पहिलो पटक टप टेनमा उक्लिएको हो । यसले स्पेयर पार्ट, लुब्रिकेन्टको पनि व्यापार गर्दै आएको छ । १० औं स्थानमा अग्नी इन्कर्पोरेटेड प्रालि छ । यस कम्पनीले गत वर्ष १६ अर्ब २७ करोड कारोबार गरेको छ । कम्पनीले महिन्द्रा ब्राण्डको कार, जिप, मोटरसाईकल बिक्री वितरण गर्दै आएको छ । यसअघि टपटेनमा रहेको भाटभटेनी १२ औं स्थानमा झरेको छ । त्यस्तै यसअघि टप टेनमा रहेको स्याकर ट्रेडिङ कम्पनी १३ औं स्थानमा झरेको छ । जेजीआई डिस्ट्रीव्यूशन प्रालि, लक्ष्मी इन्टर कन्टिनेन्टल र आरती स्ट्राइप टप टेन नजिक पुगेका छन् । प्रतिस्पर्धामा रहेका कम्पनीहरुबीच कारोबार रकम अन्तरको अंकले दौडको दुरी छुट्याउँछ । आयल निगम पहिलो र एनसेल दोस्रो अझै धेरै वर्ष रहिरहने देखिन्छ भने तेस्रोदेखि तलको पोजिसनमा प्रतिस्पर्धा नजिक नजिक छ । चौधरी ग्रुप, ज्योति ग्रुप, बैद्य ग्रुप, दुगड ग्रुप, पञ्चकन्य ग्रुप लगायत पुराना व्यवसायिक घरानाका कुनै पनि कम्पनी टप टेनमा परेका छैनन् । एनसेल, जगदम्बा, सिप्रदी, अग्नी, भाटभटेनि, लक्ष्मी इन्टरकन्टिनेन्टल, शिवम् सिमेन्ट, राजेश हार्डवेयर जस्ता कम्पनीहरुले पुराना र स्थापित कम्पनीहरुलाई टपेर अगाडि बढिरहेका छन् । विश्व बजारमा जस्तै नेपालमा पनि पेट्रोलिमय पदार्थको कारोबार, प्रविधिमा आधारित कारोबार र अटोमोवाईल क्षेत्रमा आधारित कारोबार अगाडि आएका छन् । नेपालमा औद्योगिक क्षेत्र कमजोर भनिए पनि जगदम्बा स्टील्स, सूर्य नेपाल, गोर्खा ब्रुअरी, डावर नेपाल, शिवम् सिमेन्ट, हुलास स्टीलसहितका कम्पनीको कारोबार निकै ठूलो देखिन्छ । व्यापारको तुलनामा उद्योगमा कम नाफा भएकोले पछिल्लो समय व्यापारमा लगानीकर्ताहरु आकर्षित भएका छन् । सेवा क्षेत्रमा दुई टेलिकम कम्पनी माथि भएपनि पर्यटन, शिक्षा, स्वास्थ्यका क्षेत्रबाट टपटेनको प्रतिष्पर्धामा कोही पनि छैनन् । वासलात ठूला भए पनि वित्तीय क्षेत्रलाई यसमा समावेश गरिएको छैन ।
कोलोरेक्टल क्यान्सरबारे नर्भिक हस्पिटलले गर्यो जनचेतनामूलक कार्यक्रम
काठमाडौं । रोटरी क्लब चन्द्रागिरीसँगको सहकार्यमा नर्भिक इन्टरनेशनल हस्पिटलले कोलोरेक्टल क्यान्सर सम्बन्धी जनचेतनामूलक कार्यक्रम सम्पन्न गरेको छ । मार्च महिनालाई कोलोरेक्टल अर्थात् ठूलो आन्द्रा र मलासयको अर्बुदरोग(क्यान्सर)बारे जनचेतना अभिवृद्धि गर्ने÷गराउने महिनाका रुपमा लिइन्छ । सोही अवसरमा जनचेतनामूलक कार्यक्रम सम्पन्न गरेको अस्पतालले जनाएको छ । ठूलो आन्द्रा र मलाशयको अर्बुदरोग मानिसलाई हुने अर्बुदरोगहरु मध्ये तेस्रो ठूलो र भयानक रोगमा पर्दछ । विश्व तथ्यांकलाई हेर्ने हो भने हरेक वर्ष यस रोगका १८ लाख नयाँ विरामीहरू देखापर्ने गर्छन् भने तिनीहरु मध्ये झण्डै ५० प्रतिशत अर्थात् नौ लाख जतिले ज्यान गुमाउने गर्दछन् । हालैका वर्षहरूमा नेपालमा समेत यस रोगका रोगीहरू प्रशस्तै भेटिन थालेका छन् । नर्भिक हस्पिटलका कोलोरेक्टल तथा जनरल सर्जन डा. सत्यदीप भट्टाचार्यका अनुसार ठूलो आन्द्रा तथा मलाशय (कोलन र रेक्टम)को क्यान्सरबारे आवश्यक जनचेचना सबैमा हुने हो भने, नियमित जाँच/परीक्षण गराउने हो भने, स्वस्थकर भोजनका साथ स्वस्थकर आहार–व्यवहार अपनाउँदै नियमित शारीरिक व्यायाम गर्ने हो भने यस रोगलाई सजिलै रोकथाम गर्न सकिन्छ । हस्पिटलले गरेको कार्यक्रममा नर्भिकका पेटरोग विशेषज्ञ डा. वरुण शाहले ठूलो आन्द्रा र मलाशयका तमाम रोगहरुको निदानमा कोलोनोस्कोपीको महत्वबारे प्रकाश पारेका थिए । रोग समयमै पत्ता लागेमा ठूलो आन्द्रा र मलाशयका सबै खाले क्यान्सर रोगको शल्यक्रियात्मक उपचार सहज हुन सक्ने चिकित्सकहरु बताउँछन् । शल्यक्रियाका साथसाथै रेडियसन थेरापी तथा किमोथेरापी पनि साथसाथै चलाउनुपर्ने हुन्छ । रोग समयमै पत्ता नलागी ढिलो हुँदा सफल उपचार हुने दर ५० प्रतिशत मात्रै वा सोभन्दा पनि कम हुने बताइएको छ । कुनैपनि व्यक्तिमा ठूलो आन्द्रा/मलाशयको अर्वुदरोग (क्यान्सर) हुने जोखिम उमेरसँगै बढ्दै जान्छ । सबै महिला तथा पुरुष जो ४५ वर्ष कटिसकेका छन्, तिनलाई ठूलो आन्द्रा र मलाशयको अर्वुदरोग हुनसक्ने जोखिम समान रुपमा बढेर जान्छ । तसर्थ उमेर पुगेका हरेक महिला तथा पुरुषले नियमित रुपमा रोग परीक्षण/जाँच गराउनु अत्यावश्यक हुने नर्भिक हस्पिटलले जनाएको छ ।
हावाहुरीबाट भएको जनधनको क्षतिप्रति घरेलु तथा साना उद्योग महासंघ दुःखी
काठमाडौं । आइतबार साँझ बारा र पर्सा जिल्लामा हावाहुरीबाट भएको ठूलो जनधनको क्षतिप्रति नेपाल घरेलु तथा साना उद्योग महासंघले गहिरो दुःख व्यक्त गरेको छ । दैवी विपत्ति आइलागेको सो क्षेत्रमा हावाहुरीबाट ठूलो मात्रामा मानवीय क्षति पुग्नुका साथै घरपालुवा चौपाया तथा घर टहरा, भौतिक पूर्वाधारहरु समेत तहसनहस हुन पुगेको भन्दै महासंघले सर्वसाधारणको जीवनयापनमा परेको ठूलो कठिनाईलाई मध्यनजर गर्दै तत्काल प्रभावकारी उद्धारका लागि सम्बन्धित निकाय समक्ष महासंघले आग्रह गरेको छ । हावाहुरीबाट पीडित क्षेत्रमा सञ्चालित लघु, घरेलु तथा साना उद्योगहरुमा समेत क्षति पुग्न गएको सन्दर्भमा महासंघका जिल्ला शाखा, सम्बन्धित पालिका संघ र प्रदेश संघहरुले समेत पिडित परिवार तथा क्षतिग्रस्त भएका उद्योग व्यवसायीको संरचनाको उद्धार तथा पुनः सञ्चालनका लागि हरसम्भव सहयोग गर्न सम्बन्धित सबैलाई महासंघका अध्यक्ष श्याम प्रसाद गिरीले आग्रह गरे ।
कृषि विकास बैंकको सञ्चालकमा ३ जना निर्वाचित
काठमाडौँ । कृषि विकास बैंक लिमिटेडमा ३ जना सञ्चालन निर्वाचित भएका छन् । शुक्रबार सम्पन्न १२ औँ वार्षिक साधारण सभाले सञ्चालन निर्वाचित गरेको हो । साधारण सभाले भरतपुरका सञ्जीव पौडेल, पोखराका हरिप्रसाद पराजुली र काभ्रे खोपासीका विनोदकुमार गुरागाईँलाई निर्वाचित गरेको हो । सञ्चालकहरुले कार्यभार सम्हालेको र यसअघिका सञ्चालक मनोज बस्नेत र घनश्याम अवस्थीको पदावधि सकिएको कम्पनी सचिव निर्मलप्रसाद उपाध्यायले जनाएका छन् ।
३ नम्बर र सुदूरपश्चिम प्रदेश सरकारले एक–एक करोड दिने, ‘विपदमा यो वा त्यो प्रदेश नभनी सहयोग गरौँ’
हेटौंडा । ३ नम्बर प्रदेश सरकारले बारा र पर्सा हावाहुरी पिडितलाई १ करोड सहयोग गर्ने घोषणा गरेको छ । प्रदेशका मुख्यमन्त्री डोरमणि पौडेलको अध्यक्षतामा मंगलबार बसेको बैठकले गत १७ गते राती आएको हावाहुरीका कारण घरबार बिहिन जनताको आवास निर्माणका लागि राहत स्वरुप १ करोड सहयोग गर्ने निर्णय गरेको हो । बैठकले २ नम्बर प्रदेश सरकार मार्फत पीडितलाइ राहत रकम पठाउने निर्णय गरेको सरकारका प्रवक्ता आर्थिक मामिला तथा योजना मन्त्री कैलाश ढुंगेलले जानकारी दिए । सोमबार मुख्यमन्त्री पौडेलसहित आन्तरिक मामिला तथा कानुन मन्त्री शालिकराम जम्कट्टेल, सामाजिक विकास मन्त्रीसहितको टोली प्रभावित क्षेत्रको निरिक्षण गरेर फर्केको थियो । निरिक्षण कै क्रममा मुख्यमन्त्री पौडेलले प्रदेश सरकारले सहयोग गर्ने घोषणा गरेका थिए । प्रभावित क्षेत्रको निरिक्षण पश्चात बाराको कलैया अस्पताल र वीरगंजको नेशनल मेडिकलमा गएर घाईतेहरुको अवस्थाको जानकारी लिएका थिए । प्रारम्भिक रुपमा एक करोड सहयोग गरेपनि अन्य विभिन्न खाले सहयोग पनि जारी रहने मुख्यमन्त्री पौडेलले जानकारी दिए । यस्तो विपदको घडिमा यो वा त्यो प्रदेश नभनी सहयोग गर्नुपर्ने उनको भनाई थियो । साथै मुख्यमन्त्री पौडेलले घटनाप्रति दुःख ब्यक्त गर्दै मृतकप्रति श्रद्धान्जली तथा आफन्तजनप्रति समवेदना र घाइतेको शिघ्र स्वास्थ्यलाभको कामना समेत व्यक्त गरे । यता, सुदूरपश्चिम प्रदेश सरकारले प्रदेश २ को बारा र पर्साका हावाहुरी प्रभावितहरुका लागि एक करोड सहयोग गर्ने घोषणा गरेको छ । मन्त्रिपरिषद् बैठकले हावाहुरीबाट विस्थापित भएका पीडितहरुका लागि एक करोड रकम सहयोग गर्ने निर्णय गरेको आन्तरिक मामिला तथा कानूनमन्त्री प्रकाशबहादुर शाहले जानकारी दिए ।
सिविआईएल क्यापिटलको अध्यक्षमा बोधराज देवकोटा नियुक्त
काठमाडौं । सिटिजन्स बैंकको सहायक कम्पनी सिविआईएल क्यापिटलमा बोधराज देवकोटा अध्यक्षमा नियुक्त भएका छन् । संस्थाको अध्यक्ष रहेका गणेशराज पोखरेल मुख्य कम्पनी सिटिजन्स बैंकको प्रमुख कार्यकारी अधिकृत पदमा नियुक्त भएसँगै संचालक समितिको बैठकले बोधराज देवकोटालाई अध्यक्ष पदमा नियुक्ति गरेको हो । नेपाल धितोपत्र बोर्डबाट धितोपत्र निष्काशन तथा विक्री प्रबन्धक, धितोपत्र प्रत्याभूति कर्ता, शेयर रजिष्ट्रार तथा लगानी व्यवस्थापनको साथै डिम्याट खाता खोल्ने, शेयरहरु अभौतिकीकरण गर्ने, सामुहिक लगानी कोषको प्रर्वद्धन गर्ने जस्ता लगानीकर्तासँग प्रत्यक्ष सरोकारका कामहरु गर्ने अनुमति सिविआईएल क्यापिटलले लिएको छ । काठमाडौं डिल्लीबजार स्थित बाटुलेघरमा संस्थाको रजिष्ट्रर कार्यालय रहेको सो संस्थाले मर्चेन्ट बैंकिङ्ग सम्बन्धी सेवा प्रदान गर्दै आएको छ । सो कम्पनीमा कर्मचारी संचय कोष, नागरिक लगानी कोष तथा प्रतिष्ठित उद्योगी व्यापारीहरुको सह लगानी रहेको छ ।
