हिमाली क्षेत्रमा ‘फेक रेस्क्यु’ : दोषीमाथि कारबाही नहुँदा पर्यटकको बुकिङ रद्द बढ्दो
काठमाडौँ । डेढ महिनाअघि पर्यटन व्यवसायी मोहन लम्सालको कम्पनीमा बेलायतका १६ जनाको टोलीले ट्रेकिङका लागि बुकिङ गर्योर् । तर, एक साता नबित्दै रद्द गरेर तीनजना मात्र आउने जानकारी बेलायती एजेन्टले दिए । अर्को ८ जनाको समूहले पनि विभिन्न हिमाल आरोहणका लागि बुकिङ गरेको थियो । फेरि पनि साता नबित्दै तीनजनाले रद्द गराए । त्यसयता बुकिङमा जति उत्साह देखिएको छ, धमाधम रद्द गर्नेको मात्रा पनि उस्तै रहेको लम्सालको अनुभव छ । यसो हुनुको कारण रहेछ, विदेशी सञ्चारमाध्यमले नेपालमा ‘फेक रेस्क्यु’ बारेका समाचार लेखिदिनु । यता दोषीमाथि कारबाही नहुनु । अघिल्लो सिजनमा भएको ‘फेक रेस्क्यु’बारे अध्ययन गर्न गठित समितिले दिएको रिपोर्टमा औँल्याइएका दोषीमाथि कारबाही भएको छैन । विदेशी सञ्चारमाध्यमले पनि यसबारे बारम्बार समाचार लेखिदिनाले पर्यटकमा नेपालप्रति नकारात्मक छाप परेको व्यवसायी बताउँछन् । लम्साललाई पनि विदेशी एजेन्टले यस्तै जानकारी दिने गरेका छन् । ‘विदेशी भाषामा नेपालको फेक रेस्क्युबारे समाचार आइरहेका छन्,’ उनले भने, ‘त्यसमाथि समितिले दोषी औँल्याएकाहरूमाथि कारबाही नहुँदा पर्यटकमा नेपालप्रति अविश्वास बढेको देखिन्छ ।’ आजको नयाँ पत्रिका दैनिकमा समाचार छ ।
रोकिएन विमानस्थलबाट सुन तस्करी, ६ किलो सुनसहित ४ भारतीय नागरिक पक्राउ
काठमाडौं । प्रहरीले विमानस्थलबाट हुँदै आएको सुन तस्करी रोकिएको भन्दै आए पनि त्रिभुवन अन्तर्राष्ट्रिय विमानस्थलबाट २ करोड ९६ लाख रुपैयाँ मूल्यबराबरको करिब ६ किलो सुन बरामद गरेको छ । बिहीबार साँझ थाई एयरलाइन्सको विमानमार्फत बैंकक हुँदै काठमाडौं ओर्लिएका चार जना भारतीय नागरिकलाई करिब ६ किलो सुनसहित पक्राउ गरिएको हो । पक्राउ पर्नेमा एक पुरुष र तीन महिला छन् । उनीहरूलाई विमानस्थलको चेकजाँचबाट बाहिरिसकेपछि प्रहरीले पक्राउ गरेको हो । त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख वरिष्ठ प्रहरी उपरीक्षक (एसएसपी) सन्दीप भण्डारीले चार जना भारतीयसहित ५ किलो ८ सय १४ दशमलव ६५ ग्राम सुन नियन्त्रणमा लिइएको जानकारी दिए । ‘विशेष सूचनाका आधारमा हामीले विमानस्थलबाट बाहिरिँदै गर्दा सुनसहित चार भारतीयलाई पक्राउ गरेका हौं । पक्राउ परेका सबैलाई अनुसन्धानका लागि पठाएका छौं,’ एसएसपी भण्डारीले भने । पक्राउ पर्नेहरूमा जतिन जैन, सुनिता जैन, बबिता गर्ज र सरिता जैन छन् । जतिनबाहेक अरू सबै महिला हुन् । उनीहरूलाई प्रहरीले विमानस्थल गेटनजिक बनेको नयाँ भवनको पार्किङ क्षेत्रबाट पक्राउ गरेको हो । एसएसपी भण्डारीका अनुसार बरामद सुन गहनाका रूपमा भिœयाइएको देखिएको छ । प्रहरीले विभिन्न धातुमा बेलेर ल्याएको सुन सक्कली हो वा नक्कली ठम्याउन नसकेपछि बिहीबार राति नै चेकजाँचका लागि भन्सार विभाग पठाएको थियो । त्यसपछि चेकजाँचका क्रममा विभागले सुन सक्कली नै भएको प्रमाणित गरेको हो । सुनलाई बाला, सिक्री जस्ता गहना बनाएर मेटल कभर गरेर ल्याइएको थियो । यसअघि समेत पटक–पटक विमानस्थलबाट सुन तस्करी हुँदै आएको पाइएको छ । यसअघि चर्चामा रहेको ३८ क्विन्टल सुनसमेत विमानस्थल हुँदै भित्रिएको थियो । सो सुन काण्डबारे अझै पनि वास्तविकता पत्ता लाग्न सकेको छैन । खाडी तथा मध्यपूर्वका राष्ट्रबाट सुन तस्करी गरी भारत पु¥याउन नेपालको बाटो प्रयोग गर्ने गरिएको छ । पछिल्लो समय सडक यातायातमार्फत चीनको बाटो हुँदै समेत नेपालमा सुन भित्रिने गरेको छ । तस्करहरूले एकपछि अर्को गर्दै विभिन्न तरिका अपनाएर सुन तस्करी गर्दै आएको प्रहरीले बताउने गरेको छ । प्रहरीले सार्वजनिक यातायात र निजी सवारीबाट समेत लुकाइछिपाइ ल्याइनेसुन नियन्त्रणमा लिँदै आएको छ । आजको राजधानी दैनिकमा समाचार छ ।
हावाहुरीले भत्काएकाे घर सेनाले बर्षाअघि नै बनाइदिने, ९० प्रतिशत सरकारी अनुदान
काठमाडौं । आइतबार राती आएको हावा हुरीबाट क्षतिग्रस्त भएका घरहरुको पुनर्निमाण सरकारले गरिदिने भएको छ । बिहीबार बसेकाे मन्त्रीपरिषद् बैठकले त्यस्ताे निर्णय गरेकाे सरकारका प्रवक्ता एवं सूचना तथा सञ्चारमन्त्री गोकुल बास्कोटाले जानकारी दिए । त्यसका लागि सरकारले बारा र पर्सा जिल्लाका प्रमुख जिल्लाअधिकारी, नेपाली सेनाका प्रतिनिधि, शहरी विकास मन्त्रालयका प्रतिनिधि सहितकाे ५ सदस्यीय समिति गठन गरेकाे छ । उक्त आवासकाे निर्माण जनता आवास कार्यक्रम अन्तर्गत गरिने र त्यसकाे जिम्मा नेपाली सेनालाई दिइएको समेत मन्त्री बास्कोटाले जानकारी दिए । आइतबारको हावाहुरीका कारण २९ जनाको मृत्यु भएको थियो भने करिब ५०० घरहरु आंशिक वा पूर्ण क्षति भएका थिए । हाबाहुरीबाट करिब १५ कराेडकाे क्षाति भएकाे प्रारम्भिक अनुमान गरिएकाे छ । कसरी पाउँछन् पीडितले राहत ? सरकारले २ वर्ष अघि ल्याएको जनता आवास कार्यक्रमअन्तर्गत पहिलेदेखि नै बसोबार गर्दै आएका र आफ्नो नाममा जग्गा धनी पूर्जा भई नियमित तिरो तिर्दै आएका पीडितलाई क्षतिको अवस्था हेरेर सरकारले विभिन्न अंक दिने र लाभग्राही छनौट गर्ने प्रावधान राखिएको छ । यद्यपि यसअघि सिमेन्ट प्रयोग गरेर बनाइएको घर, कर्कट जस्तापाता वा ढलान गरिएको घर र आफ्नो जग्गा पुर्जा नभई सरकारी जग्गा वा ताल पोखरी नजिक बसेकालाई भने त्यस्तो कार्यक्रममा समाबेश गर्न नसकिने प्रावधान राखिएको छ । यस्तो कार्यक्रम अन्तर्गतका आवासमा लाभग्राहीले श्रमदान वा नगद जिन्सीको रुपमा कम्तीमा १० प्रतिशत लागत सहभागिता व्यहोर्नुपर्ने प्रावधान समेत तोकिएको छ ।
नेपाल बार एशोसिएशनको अध्यक्षमा चण्डेश्वर श्रेष्ठ निर्वाचित
काठमाडौँ । कानून व्यवसायीको छाता सङ्गठन नेपाल बार एशोसिएशनको अध्यक्षमा चण्डेश्वर श्रेष्ठ निर्वाचित भएका छन् । आज सम्पन्न मतगणनामा अध्यक्षका अर्का उम्मेदवार सुनिलकुमार पोखरेललाई पराजित गर्दै श्रेष्ठ निर्वाचित भएको प्रमुख निर्वाचन अधिकृत दामोदर खड्काले जानकारी दिए । श्रेष्ठ प्रगतिशील, पेशागत तथा समावेशी समूह र पोखरेल वृहत् लोकतान्त्रिक समूहका अध्यक्षका उम्मेदवार बनेका थिए । यही चैत १९ गतेदेखि भएको मतगणना आज सकिएको हो । काठमाडौँ जिल्ला बार र उच्च अदालत बार एशोसिशनको मतगणना भएको थियो । मत परिणाम अनुसार श्रेष्ठले ४०२२ मत प्राप्त गर्दै विजयी भए भने पोखरेल ३८७३ मत सहित पराजीत भए । मत परिणाम अनुसार महासचिवमा पोखरेल प्यानलबाट विजयी भए भने बाँकी अधिकांश पदमा श्रेष्ठ समूहका उम्मेदवार निर्वाचित भएका छन् । त्यसैगरी उपाध्यक्षहरूमा प्रदेश १ मानबहादुर रुम्दाली, प्रदेश २ रामचन्द्र सिंह, प्रदेश ३ ईश्वरीप्रसाद भट्टराई, गण्डकी प्रदेशः सुरेन्द्र थापा मगर, प्रदेश ५ सुनिलकुमार श्रेष्ठ, कर्णाली प्रदेश मिनबहादुर महत र सुदूरपश्चिम प्रदेशः उमेशप्रसाद बिष्ट निर्वाचित भएका छन् । खुला क्षेत्रतर्फ रक्षा बस्याल र महासचिवमा महासचिव लिलामणि पौडेल वियजी हुँदा कोषाध्यक्षमा कोषाध्यक्ष रुद्रप्रसाद पोख्रेल विजयी भएका छन् । सदस्य (दलित): मोहन साशंकर सदस्य(मधेशी/मुश्लीम) उपत्यका वाहिर: पंचनारायण मण्डल सदस्य(मधेशी/मुश्लीम) खुल्ला:मनोज चौधरी सदस्य(आदिवासी/ जनजाती) उपत्यका बाहिर: विना कुमारी सिंह (चौंधरी) सदस्य(आदिवासी÷जनजाती) खुला: बद्री नारायण नगरकोटी सदस्य महिला उपत्यका बाहिर: कल्पना कुमारी भण्डारी सदस्य महिला खुला : अन्जु कायस्थ सदस्य खुला उपत्यका बाहिर: डा. शिवराज पण्डित खुलातर्फ सदस्य गंगा सागर खत्री भिमसेन वन्जारा भुवन प्रसाद निरौला प्रकाश महर्जन बाल कृष्ण गैरे खिमानन्द अधिकारी
अब अत्यावश्यक यी सेवामा हड्ताल गर्न पाइदैनः सञ्चारमन्त्री बास्कोटा
काठमाडौँ । अत्यावश्यक सेवामा हडताल तथा कुनै पनि प्रकारको अवरोध गर्न नपाइने भएको छ । सरकारले अत्यावश्यक सेवामा अवरोध गर्न नपाउने निर्णय गरी सो को जानकारी राजपत्रमार्फत गराउने भएको हो । सार्वजनिक हितका लागि अत्यावश्यक सेवामा हडताल गर्न निषेध गरिएको सूचना नेपाल राजपत्रमा प्रकाशित गर्ने निर्णय भएको सञ्चार तथा सूचना प्रविधिमन्त्री गोकुलप्रसाद बाँस्कोटाले जानकारी दिए । मन्त्रिपरिषद्को यही चैत १४ गतेको बैठकको निर्णय सार्वजनिक गर्न आज मन्त्रालयमा आयोजित पत्रकार सम्मेलनमा सो निर्णय गरेको उनले जानकारी दिए । मन्त्रिपरिषद्का निर्णयअनुसार टेलिफोन, जल, स्थल वा हवाई यातायात, रेलमार्ग, सञ्चार क्षेत्र, खानेपानी वितरण तथा सञ्चालन, पर्यटन, होटल, पेट्रोलियम पदार्थ, एलपी ग्यास, अस्पताल, एम्बुलेन्स, औषधि उत्पादन फोहरमैला व्यवस्थापन विद्युत्, दैनिक खाद्य वस्तु, बैंक बीमालगायतका क्षेत्रमा हडताल गर्न पाइने छैन । सो सम्बन्धी व्यवस्थासहितको सूचना छिट्टै राजपत्रमा प्रकाशित हुनेछ । सरकारले प्रत्येक ६÷६ महिनामा अत्यावश्यक क्षेत्र तोेकेर हडताल गर्न पाइने घोषणा गर्नसक्ने व्यवस्था छ । ती क्षेत्रमा कुनै समस्या देखिएको अवस्थामा सरकारले आवश्यक सहजीकरण गर्ने समेतमन्त्री बाँस्कोटाको भनाइ छ । हडताल निषेध गर्दा मजदूरको अधिकार समेत खोसिइला नी भन्ने सञ्चारकर्मीको जिज्ञासामा मन्त्री बाँस्कोटाले भन्नुभयो, “एकाध स्थानमा समस्या आउन सक्छन् । तर त्यसले समग्रतामा नै समस्या आउँछ भन्न मिल्दैन । अत्यावश्यक सेवामा अवरोध गर्न मिल्दैन ।” यस्तै सवारी साधनको सडक उपभोग दस्तुरमा वृद्धि गरिएको छ । ठूला बस, ट्रक, साना तथा हलुका सवारी साधन र मोटरसाइकलको सडक उपभोग गरेवापतको उपभोग दस्तुरमा वृद्धि गरी त्यसको सूचना समेत राजपत्रमा प्रकाशित गरिनेछ । यस्तै सरकारले युनाइटेड सिमेन्टसको धादिङ नौबिसेस्थित सिमेन्ट काराखानास्थलसम्म जानेआउने औद्योगिक पहुँचमार्ग निर्माण तथा सञ्चालन गर्नका लागि धुनबेँसी–९ मा रहेको रहेको पोखरी डाँडा सामुदायिक वनको शून्य दशमलव १७ हेक्टर वन क्षेत्र प्रयोग गर्न स्वीकृति प्रदान गरिएको छ ।
विज्ञ अर्थमन्त्रीको बजेट टिमः पुडासैनीलाई मस्यौदा, रायालाई नीतिको जिम्मा
काठमाडौं । अर्थ मन्त्रालयले बजेट निर्माणको आन्तरिक प्रक्रिया अघि बढाएको छ । अर्थ मन्त्री डा. युवराज खतिवडाले यस अघि नै कानुनले निर्दिष्ट गरेका राजश्व परामर्श लगायतका समिति गठन गरिसकेका थिए । कानुनतः गठित समितिहरुले धमाधम काम गरिरहेका बेला अर्थमन्त्री डा. खतिवडाले बिहिबार आन्तरिक तयारी अघि बढाएका हुन् । मन्त्री खतिवडाले बजेट निर्माणको गृह कार्यका लागि दुई जना सहसचिवलाई आन्तरिक नेतृत्व सुम्पिएका छन् । बजेटको मस्यौदा लेख्ने जिम्मेवारी बजेट तथा कार्यक्रम महाशाखा प्रमुख हरिशरण पुडासैनीलाई दिईएको छ । त्यस्तै, नीतिगत सुधारका लागि आवश्यक सुझाव लिने जिम्मेवारी भने वित्तिय क्षेत्र व्यवस्थापन तथा संस्थान समन्वय महाशाखा प्रमुख तोयम रायालाई तोकिएको छ । ‘दुई जना सहसचिवको नेतृत्वमा बजेटको मस्यौदा समिति र नितीगत समिति गठन गरिएको छ, यी समितिहरुले बजेट निर्माणको आन्तरिक गृहकार्य गर्नेछन’, अर्थमन्त्रालय श्रोतले भन्यो । पुडासैनी र राया नेतृत्वमा बनेको समितिमा अन्य केहि सह सचिवलाई समेत समावेश गरिएको छ । अब यहि टिमले बजेटको मेरुदण्ड तयार पारेर अर्थमन्त्रीलाई बुझाउनेछ । अर्थमन्त्रालयका प्रवक्ता उत्तर कुमार खत्रीले पनि बजेट निर्माणको आन्तरिक गृहकार्यका लागि अर्थमन्त्रीले कोर टिम तयार गरेको बताए ।‘यो औपचारिक समिति होेइन तर अर्थमन्त्रीज्यूले बजेटको तयारीका लागि कोर टिम तयार पार्नु भएको छ, यहि टिमले मस्यौदा लेख्ने, बुँदा टिपोट गर्ने लगायतका काम गर्नेछ’, अर्थका प्रवक्ता खत्रीले भने । सर्व साधारणलाई अर्थमन्त्रालय प्रवेशमा कडाई बजेट निर्माणको आन्तरिक गृहकार्यमा जुटेको अर्थ मन्त्रालयले सर्वसाधारणलाई प्रवेशमा कडाई गरेको छ । अर्थमन्त्राय प्रवेश गर्ने सबै गेटमा प्रहरी तैनाथ गरिएको छ । केहि ढोकाहरुमा लकिङ सिस्टम जडान समेत गरिएको छ । सर्व साधारणलाई कुन प्रयोजनका लागि मन्त्रालय आएको हो त्यसको विस्तृत विवरण फाइलमा टिपाएपछि मात्रै मन्त्रालय प्रवेश गर्न पाउने व्यवस्था लागु गरिएको छ । त्यसका लागि अर्थमन्त्रालयका मुल गेटलाई मात्रै प्रयोग गर्न पाइन्छ ।
नेपाल-भारत फ्रेन्चाइज लगानी एक्स्पो जेठ १ र २ गते हुने
काठमाडौं । नेपाल-भारत फ्रन्चाइज लगानी एक्स्पो काठमाडौंमा हुने भएको छ । राजधानीको होटल याक एण्ड यतिमा जेठ १ र २ गते एक्पो हुने भएको हो । राष्ट्रिय तथा अन्तर्राष्ट्रिय उद्योगका ब्राण्डहरुले प्रर्दशन गर्ने मेलामा उच्च व्यवसायिक व्यक्तिहरुको सहभागिता हुनेछ । एक्स्पोमा नेपालमा काम गर्न चाहाने मल्टिनेश्नल कम्पनीहरुले लगानी गर्ने अवसर प्राप्त गर्नेछन् । कार्यक्रमबारे जानकारी दिदैं नेपाल उद्योग वाणिज्य संघकी अध्यक्ष भवानी राणाले नेपालमा जोइन्ट भेन्चरको रुपमा काम गर्न चाहने व्यक्तिहरुका लागि अवसर प्राप्त गर्ने बताइन् । कार्यक्रममा २५० जना व्यवसायी, रिटेल, शिक्षा, फुड, बिभरेज, रियल एस्टेट, टेक्नोलोजी लगायतका १ हजार फ्रेन्चाइजका व्यवसायीहरु सहभागी हुनेछन् ।
ह्याम्स हस्पिटलको सेयरमा किचलो, एसविआई र सानिमा बैंकको १०० करोड लगानी जोखिममा
काठमाडौं । अन्तर्राष्ट्रिय स्तरको सेवा सुविधा दिने लक्ष्यसहित खुलेको ह्याम्स हस्पिटलको सेयर स्वामित्व विवाद भएको छ । मुख्य प्रवद्र्धक तथा हस्पिटलका अध्यक्ष रामशरण भण्डारीले ख्याति कमाएका डाक्टरहरुलाई हस्पिटल भित्र्याउनु पूर्व कम्पनीको सेयर दिने कागज गरेपनि अहिले आएर सेयर दिन आनाकानी गरेपछि हस्पिटलमा किचलो बढेको हो । धुम्बाराहीमा स्थापना भएको यो हस्पिटलमा डा. भगवान कोइराला, डा. अर्जुन कार्की, डा. भोला रिजाल, डा. भास्करराज पन्त, डा. प्रकाश सायमी, डा. प्रकाश विष्ट लगायत ख्याति कमाएका डाक्टरहरु छन् । अध्यक्ष तथा प्रमुख कार्यकारी अधिकृत रहेका भण्डारीले डाक्टरहरुलाई निश्चित सेयर दिने भन्दै आन्तरिक कागज गरेको, उनीहरुसँग पैसा पनि लिएको तर सेयर नदिएकोले विवाद बल्झिएको हो । तीन वटा बैंकबाट करिब सवा अर्ब रुपैयाँ ऋण लिएपछि भण्डारीले डाक्टरहरुलाई पैसा फिर्ता दिन खोजेका छन् । हस्पिटललाई नेपाल एसविआई बैंकले ८० करोड, सानिमा बैंकले २० करोड र सिद्धार्थ बैंकले १२ करोड रुपैयाँ कर्जा दिएका छन् । बैंकले कर्जा दिएपछि भण्डारीहरुले पहिला लिएको पैसा फिर्ता गर्ने र सेयर नदिने भनेपछि विवाद भएको नाम उल्लेख नगर्ने सर्तमा एक डाक्टरले बताए । डाक्टरहरु भने पैसा फिर्ता नलिई सेयर नै लिने अडानमा छन् । मेडिकल इक्वीप्टमेन्टको व्यापार गर्दै व्यवसायमा सफलता हासिल गरेको भण्डारीले डाक्टरहरुलाई धोका दिएपछि उनी विवादमा तानिएका छन् । अध्यक्ष भण्डारीले त्यस्तो विवाद नभएको बताए । ‘सेयरधनी धेरै जना छौं । मेरो लेबलमा स्वामित्व सम्बन्धि विवादको कुरा आएको छैन’ उनले विकासन्यूजसँग भने । स्रोतका अनुसार हाल कम्पनीको चुक्ता पुँजी २२ करोड ५३ लाख रुपैयाँ छ । मुख्य लगानीकर्ता रामशरण भण्डारी र उनका आफन्त हुन् । रामशरण भण्डारीको १० करोड १८ लाख ६५ हजार ८०० रुपैयाँ बराबरको सेयर छ । दलबहादुर भण्डारीको ३१ लाख ५० हजार, प्रेमबहादुर भण्डारीको ३ करोड, रामकृष्ण भण्डारीको २ करोड ५० लाख रुपैयाँ सेयर लगानी रहेको छ । ह्याम्स होल्डिङ प्रालिको ३ करोड ४७ लाख १६ हजार ३०० रुपैयाँ लगानी छ । त्यस्तै, आमोदनाथ प्याकुरेलको स्वामित्वमा ९ लाख ८० हजार ६००, सिन्धिमा घिमिरेको ११ लाख ६५ हजार ६००, गोविन्दप्रसाद शर्माको १ लाख ६३ हजार ३०० रुपैयाँ सेयर लगानी छ ।
