चैत्र २९ गते बुढामगर दम्पतिले नाचघरमा गर्ने भए ‘युगल साँझ’
काठमाडौं । चैत्र २९ गते लोक गायक बुढामगरका दम्पत्तिले नाचघरमा ‘युगल साँझ’ को आयोजना गरेका छन् । चर्चित लोक गायक एवम् वरिष्ठ बाद्यवादक खर्कबहादुर बुढा मगर र उनकी धर्मपत्नी लिलावती बुढामगरले यही २९ गते काठमाडौंको जमलस्थित् राष्ट्रिय नाचघरमा ‘युगल साँझ’ को आयोजना गर्ने भएका छन् । उपराष्ट्रपति नन्दबहादुर पुनको प्रमुख आतिथ्यमा हुने उक्त कार्याक्रममा साँझ सम्म तयारी हुने बुढामगरले बताए । उनका अनुसार दिउँसो २ बजेदेखि शुरु हुनेछ । त्यस दिन साँझ सभ्य र भव्य रुपमा सम्पन्न हुने दम्पत्तिले विश्वास दिलाए । उक्त कार्यक्रममा कम्तिमा १२ वटा गीत प्रस्तुत गर्ने पनि गायक बुढामगरले जानकारी दिए । उनले भने,‘विशेषगरि सल्यानमा नाचिने पैंसेरुँ, सोरठी र टप्पा नाँच पनि हामी प्रस्तुत गर्छौं । यी पौराणिक, मौलिक नाचको प्रस्तुतीका लागि सल्यानबाटै स्थानीय कलाकारहरु आउनु हुनेछ । यसबाट सल्यानकोमात्र नभई सम्पूर्ण कर्णालीको संस्कृतिको एउटा पाटोलाई झल्काउने छ ।’ आफ्नो सांगितिक यात्राको दौरानमा करिब २०० वटा लोकगीतहरु यो जोडिले रेकर्ड गरिसकेको छ । उनीहरुका व्यवसायिकभन्दा मौलिक र स्थानीय लोकगीतहरु रहेका छन् । खर्क बहादुर बुढा मगर गायकमात्र नभएर नेपालकै अब्बल बाद्यवादक हुन् । उनको ३१ वर्षे सांगितिक यात्रामा करिब २५००० (पच्चिस हजार) भन्दा बढी नेपाली लोकगीत तथा संगीतमा मादलका तालहरु रेकर्ड गराएका छन् । उक्त युगल साँझको दिन मादलको मात्रै एउटा सोलो प्रदर्शन उनीलगायतको समुहले गर्नेछ । मादल वादकको इतिहास हेर्ने हो भने खर्क बहादुर बुढालाई “मादल सम्राट” को उपाधिले विभुषित गर्दा उनको यसप्रतिको साधना र लगावको सम्मान हुने सल्यान सरोकार समाजको भनाई छ । उक्त ‘युगल साँझ’ कार्यक्रमलाई सम्पन्न गर्नको लागि सल्यानका १० वटै स्थानिय सरकार, कर्णाली प्रदेशको पर्यटन मन्त्रालय, पर्यटन बोर्ड, बैंकहरुको विशेष आर्थिक सहयोग रहेको पनि समाजले स्पष्ट पारेको छ । त्यस्तै, अन्य गैर–सरकारी संघ–संस्था र थुप्रै शुभचिन्तकहरुले साथ सहयोगको आश्वासन दिएको पनि समाजले जनाएको छ । कार्यक्रमबाट बचत भएको रकम संस्थाको अक्षयकोष निर्माणको लागि जम्मा हुने सल्यान सरोकार समाज परिवार अध्यक्ष संघर्ष सदिक्षा घर्तीले जानकारी दिईन् । उक्त कोषबाट आउने वार्षिक ब्याजले सल्यानबाट आउने विभिन्न समस्यामा परेका व्यक्तिहरुलाई विगतमाझैं आउने दिनमा पनि सक्दो आर्थिक सहयोग गरिने उनले बताईन् । कार्यक्रम समाजका महासचिव फौद बहादुर बस्नेत, सचिव तुलसी भण्डारी, पर्यटन व्यवसायी भीम भारती र सल्यान युवा सञ्जाल काठमाडौंका सुदर्शन बुढाथोथकीको पनि सहभागिता रहेको थियो । उक्त युगल साँझमा सहभागी हुनेहरुको लागि पाँच सय र हजार रुपैयाँको टिकट शुल्क निर्धारण गरिएको पनि समाजले जनाएको छ । उक्त युगल साँझको आयोजक नै सल्यान सरोकार समाज रहेको छ ।
सनराइज बैंकको नयाँ वर्षको क्यालेन्डर विमोचन
काठमाडौं । सनराइज बैंकको नयाँ वर्ष २०७६ को क्यालेन्डरको विमोचन भएको छ । औपचारिक समारोहका बीच बैंकको केन्द्रीय कार्यालय, गैरिधारामा क्यालेन्डरको विमोचन गरेको हो । विमोचन समारोहमा बैंकका संचालक समितिका सदस्यहरु ई.बच्छराज तातेड, शारदा शर्मा पुडासैनी, दीपक नेपाल, ओमकृष्ण जोशी तथा प्रमुख कार्यकारी अधिकृत रत्नराज बज्राचार्यद्धारा बालबालिकाहरुलाई प्रोत्साहन स्वरुप नगद तथा खाद्य सामाग्रीहरु प्रदान गरेको छ । बैंकले अन्नपूर्ण पोष्ट दैनिकको अंकुर र नागरिक दैनिकको जुनकिरी पृष्ठमा १ वर्ष भित्र प्रकाशित विभिन्न विद्यालयमा अध्ययनरत कक्षा १ देखि कक्षा ५ सम्मका बालबालिकाहरुका चित्रहरूलाई आफ्नो क्यालेन्डरमा समावेश गर्दै आएको छ । स–साना बालबालिकाहरुले आफ्ना मानसपटलमा रहेका सोच, जिज्ञासा तथा रचनाहरुलाई चित्रकारीताको माध्यमबाट अभिव्यक्त गरेकोमा बालबालिकाकोे प्रतिभालाई अझै प्रस्फुटन र प्रोत्साहन गर्ने उद्देश्यले बैंकले उक्त चित्रहरूलाई समावेश गरेको हो ।
हावाहुरी पीडितलाई प्रदेश नं १ को सरकारले एक करोड आर्थिक सहयोग गर्ने
विराटनगर । बारा र पर्साका हावाहुरी पीडितका लागि प्रदेश नं १ को सरकारले रु एक करोड आर्थिक सहयोग गर्ने भएको छ । प्रदेश नं-१ मन्त्रिपरिषद्को विहीबार बसेको बैठकले सो राहत दिने निर्णय गरेको मुख्यमन्त्रीका प्रेस सल्लाहकार ध्रुव सुवेदीले जानकारी दिए ।जिल्लासभा र जिल्ला समन्वय समितिका सदस्यको सुविधा सम्बन्धी ऐन, २०७५ लाई संशोधन गर्न बनेको विधेयक पनि प्रदेशसभामा पेश गर्न बैठकले स्वीकृति दिएको छ । बैठकले वृहत्तर विराट विकास क्षेत्र सम्बन्धमा व्यवस्था गर्न बनेको विधेयक, २०७५ को तर्जुमा गर्न सैद्धान्तिक सहमति प्रदान गरेको, दोस्रो पिण्डेश्वर अर्ध महाकुम्भ मेला व्यवस्थापन मूल सहयोगसमिति प्रदेश सरकारका प्रवक्ता एवं आन्तरिक मामिला तथा कानूनमन्त्री हिक्मतकुमार कार्कीको संयोजकत्वमा गठन गरेको र मेलाका लागि रु ५० लाख सहयोग गर्ने निर्णय गरेको छ । प्रदेश प्रहरीको गठन, सेवा शर्त र सञ्चालन सम्बन्धमा व्यवस्था गर्न बनेको विधेयक, २०७५ को तर्जुमा गर्न सैद्धान्तिक स्वीकृति प्रदान भएको, सङ्घ संस्थालाई प्रदान गरिने अनुदान सम्बन्धी कार्यविधि, २०७५ लाई स्वीकृति भएको, चैते धान विशेष सहयोग कार्यक्रम कार्यविधि, २०७५ स्वीकृत प्रदान भएको र चैत १७ गते बारा र पर्सामा भएको हावाहुरीका कारण भएको जनधनको क्षतिप्रति गहिरो दुःख व्यक्त गर्दै मृतकप्रति हार्दिक श्रद्धाञ्जलि अर्पण गरी घाइतेको शीघ्र स्वास्थ्यको कामना पनि बैठकले गरेको छ । बैठकले गाउँ तथा नगर सभाका सदस्यको सुविधा सम्बन्धी ऐन, २०७५ लाई संशोधन गर्न बनेको विधेयक प्रदेशसभामा पेश गर्न स्वीकृति प्रदान गरेको छ । रासस
जाजरकोटको शिवालयमा पनि सिभिल बैंकको शाखा
काठमाडौँ । सिभिल बैंक लिमिटेडले जाजरकोट जिल्लाको शिवालय गाँउपालिकामा शाखा स्थापना गरेको छ । सो शाखाको उद्घाटन कर्णाली प्रदेश सभा सदस्य करबीर शाहीले गरे । उक्त शाखाको उद्घाटन समारोहमा प्रमुख अतिथि तथा कर्णाली प्रदेश सभा सदस्य कर बीर शाही, सिभिल बैंकका प्रमुख माईक्रो बंैकिङ युवराज गुरागाईं, जाजरकोट जिल्ला समन्वय समितिका प्रमुख मनबहादुर रावल, शिवालय गाउँपालिकाका अध्यक्ष नरेन्द्रकुमार शाही, शिवालय गाउँपालिकाका उपाध्यक्ष कुमारी थापा, शिवालय गाउँपालिकाका प्रमुख प्रशासकीय अधिकृत धनीराम शर्मा लगायतको उपस्थिति रहेको थियो । उद्घाटन कार्यक्रमका प्रमुख अतिथि तथा कर्णाली प्रदेश शाहीले ग्रामीण भेगमा बैंकको शाखा बिस्तार हुँदा बित्तीय साक्षरताको अभिबृद्धी हुने र यसरी नै सबैको सहयोग मिलेमा देशमा आर्थिक सम्बृद्धी आउने बताए । उक्त कार्यक्रममा सिभिल बैंकका यूवराज गुरागाईंले ग्रामीण भेगको आर्थिक विकासको लागि बैंक अपरिहार्य रहेको बताए ।
नेपाल बैङ्कको नयाँ शाखा तुलसीपुरमा
काठमाडौं । नेपाल बैङ्कको नयाँ शाखा तुलसीपुरमा विस्तार भएको छ । नेपाल बैङ्कले प्रदेश नम्बर ५ ,दाङ जिल्ला तुलसीपुर उप महानगरपालिका वडा नं ६ घोराहीरोड्मा शाखा स्थापना गरेको हो । राप्ती अन्चलको प्रमुख आर्थिक केन्द्रको रुपमा रहेको उपमहानगरमा स्थापित यस शाखाबाट सहुलियतपूर्ण तथा अन्य व्यावसायिक कर्जा ,निक्षेप तथा रेमिटान्स लगायत सम्पूर्ण आधुनिक बैङ्किंग सेवा र सुविधाहरु उपलव्ध हुनेछ । वि.सं.१९९४ सालमा देशको अग्रणी बैङ्कको रुपमा स्थापित नेपाल बैङ्कले देशका ६१ जिल्लामा १६१ शाखा १२ वटा एक्सटेन्सन काउन्टर ७९ वटा एटिएम आउटलेट् मार्फत १५ लाख बढी ग्राहकलाई प्रत्यक्ष बैङ्किग सेवा पुर्यारहेको छ ।
तनहुँको मार्कीचोकमा १३२/३३ केभी सबस्टेसन सञ्चालन, लागत ६० करोड रुपैयाँ
काठमाडौँ । तनहुँको मार्कीचोकमा निर्माण भएको १३२/३३ केभी सबस्टेसन संचालनमा आएको छ । नेपाल विद्युत प्राधिकरणले सबस्टेसनको निर्माण सम्पन्न गरी विहीबारबाट संचालन(चार्ज) मा ल्याएको हो । सबस्टेसन संचालनमा आएसँगै मध्यमस्र्याङदी-डुम्रे-दमौली-१३२ केभी प्रसारण लाइन आयोजनाको निर्माण पनि सकिएको छ । मध्यमस्र्याङदी –दमौली– मस्र्याङदी १३२ केभी डबल सर्किट प्रसारण लाइन यस अघि नै संचालनमा आइसकेको छ । मार्कीचोक सबस्टेसन संचालनमा आएसँगै गोरखामा रहेको भोल्टेज ड्रप, पटकपटक लाइन ट्रिप हुने, भोल्टेज नहुने लगायतका समस्यामा कमी आउने प्राधिकरणका कार्यकारी निर्देशक कुलमान घिसिङले बताए । ‘दमौली-डुम्रे -आँबुखैरेनी हुँदै ३३ केभी लाइनबाट गोरखामा विद्युत् आपूर्ति भइरहेको थियो, लामो दुरीबाट विद्युत आपूर्ति हुँदा धेरै समस्या थियो, अब मार्कीचोक सबस्टेसनबाट आँबूखैरेनी हुँदै गोरखातर्फ विद्युत् जान्छ, जसबाट ३३ केभी लाइनको दुरी कम हुँदा प्रणालीको चुहावट चुहावट घट्ने, भोल्टेज ड्रप तथा ट्रिपिङमा सुधार आई विद्युत आपूर्ति भरपर्दो हुने छ’, उनले भने । ‘मार्कीचोक सबस्टेसनबाट १३२ केभी लाइनलाई मार्फत प्रवाह हुने विद्युतलाई निर्माणाधीन मस्र्याङदी-मातातीर्थ २२० केभी प्रसारण लाइन आयोजनाको १३२/२२० केभी सबस्टेसनमार्फत २२० केभीमा स्टेप अप गरी काठमाडौंमा विद्युत ल्याउन पनि सकिन्छ ।’ मस्र्याङदी-मातातीर्थ २२० केभी प्रसारण लाइन आयोजनाले अहिले मार्कीचोकमै १३२/२२० केभीको सबस्टेसन निर्माण गरिरहेको छ । मध्यमस्र्याङदी-डुम्रे-दमौली-१३२ केभी प्रसारण लाइन आयोजनाका प्रमुख शुभारम्भ विक्रम शाहका अनुसार, अब मध्यमस्र्याङदी र दमौलीबाट आउने १३२ केभी प्रसारण लाइनलाई मार्कीचोक सबस्टेसनमा प्रवेश गराई (लुप इन) १३२ केभी डबल सर्किट प्रसारण लाइनमार्फत तल्लो मस्र्याङदीतर्फ पनि निकाल्न (लुप आउट) गर्न सकिने छ । आयोजनाले मार्कीचोकमा सबस्टेसन निर्माण गर्ने, मध्यमस्र्याङदी तथा दमौली सबस्टसनमा क्रमशः १ र २ वटा बे र तल्लो मस्र्याङदीमा जिआइएस बे विस्तार गर्न चिनियाँ कम्पनी पिङगाओ ग्रुपसँग आर्थिक वर्ष २०६९/७०मा ठेक्का सम्झौता गरेको थियो । नेपाल सरकार तथा प्राधिकरणको लगानी र एसियाली विकास बैकको सहुलियतपूर्ण ऋण रहेको आयोजनाको अनुमानित लागत ६० करोड रुपैयाँ थियो । अनुमानित लागतभित्रै निर्माण सम्पन्न भएको प्रमुख शाहले बताए । प्राधिकरणले विद्युतको पहुँच बढाउन गुणस्तरीय तथा विश्वसनीय विद्युत् आपूर्तिका लागि मुलुकभर नै नयाँ सबस्टेसनको निर्माण र वितरण प्रणाली सुदृढीकरण तथा विस्तारलाई अभियान कै रुपमा चलाइरहेको छ । मुलुकबाट लोडसेडिङ अन्त्य गरेपछि विद्युत आपूर्तिलाई नियमित, भरपर्दो र गुणस्तरीय बनाउन चालु आर्थिक वर्षमा ३० वटा ग्रिड र २० वटा वितरण सबस्टेसनको निर्माण र स्तरोन्नती गरिसक्ने प्राधिकरणको योजना छ । चालु आवभित्रै ६ सय सर्किट किलोमिटर प्रसारण र ८ हजार सर्किट किलोमिटर वितरण लाइन निर्माण सम्पन्न हुने छन् । सरकारले सञ्चालनमा रहेका र आगामी दिनमा खुल्ने औद्योगिक क्षेत्र तथा करिडोरका लागि नियमित विद्युत आपूर्तिका लागि उच्च क्षमताका प्रसारण लाइन बनाउने नीति लिएको छ । यसका लागि प्राधिकरणले सबस्टेसनको क्षमता स्तरोन्नति तथा सुदृढीकरण गर्ने, नयाँ प्रसारण लाइन तथा सबस्टेसन बनाउने लगायतका काम गरिरहेको छ ।
प्रेम कथानक चलचित्र ‘लभ स्टेशन’ प्रदर्शन
काठमाडौं । प्रेम कथानक चलचित्र ‘लभ स्टेशन’ प्रदर्शन भएको छ । अघिल्लो साता दुई वा सोभन्दा बढी चलचित्र प्रदर्शन भईरहँदा ‘लभ स्टेशन’ हलमा एक्लै प्रदर्शन भईरहेको छ । उज्ज्वल घिमिरेको निर्देशनमा रहेको सो चलचित्रमा प्रदीप खड्का र जसिता गुरुङको प्रमुख अभिनय रहेको छ । गत वर्ष प्रदर्शन भएको ‘लिलिबिलि’ को उक्त जोडीलाई मन पराएसँगै ‘लभ स्टेशन’मा पूर्ण देखिएका हुन् । चलचित्र निर्माणमा शाही गरेका हुन् । रमेश बुढाथोकी, प्रकाश शाह, रेशु भट्टाई, बिनोदकुमार पौड्याल, प्रिया रिजाल लगायतको पनि अभिनय रहेको चलचित्रलाई आलोक शुक्लाले खिचेका हुन् । ‘लभ स्टेशन’ मा शम्भुजीत बाँस्कोटा, दीपक शर्मा, राजनराज शिवाकोटी र एलिश कार्कीको संगीत छ । जसमा आलोक शुक्लाको छायाँकन रहेको हो ।
उद्योग वाणिज्य संघ नुवाकोटमा काङ्ग्रेस र नेकपाबीच लडाई, ताराबहादुर कार्की र रमेश श्रेष्ठ भिड्दै
विदुर/आजदेखि सुरु भएको नुवाकोट उद्योग वाणिज्य सङ्घको निर्वाचनमा राजनीतिक दलहरूकै चलखेल तीव्र भइरहेको छ । शत्तामा रहेको नेकपा र प्रतिपक्ष नेपाली काङ्ग्रेसले व्यावसायीको निर्वाचनमा अस्तित्वको लडाई लडिरहेका छन् । ०६९ सालपछि नेतृत्व गर्नेले सङ्घको गरिमालाई घटाउँदै दलहरूको पोल्टामा सङ्घलाई लगेर बुझाइदियो । अहिले सङ्घ व्यावसायिक एजेण्डाविहीन राजननीतिक दलको छायाँमा देखिन्छ । सङ्घका हरेक गतिविधि जिल्लाको उद्योगी–व्यवसायी हितमा भन्दा पनि राजनीतिक दलको फाइदा–बेफाइदामा गएर टुङ्गिरहेको छ । यस पटकको अधिवेशनमा सङ्घको नेतृत्व सर्वसम्मत गर्न वर्तमान कार्यसमितिले लिखित निर्णय गरी दुई पेजको नेपाली कागजमा आगामी कार्यसमितिको खाका कोरे पनि जिम्मेवार व्यक्तिहरूले तदारुकता नदेखाउँदा कार्यान्वयन हुन सकेन । आखिर निर्वाचन हुने नै भयो । फेरि पनि व्यवसायी दलको नाममा विभाजित भएका छन् । एकपटक फेरि नुवाकोटका उद्योगी–व्यवसायीले हारेका छन् । दलको इसारामा नुवाकोट उद्योग वाणिज्य सङ्घको निर्वाचनको लागि टिम बनेको छ । नेकपा र नेपाली काङ्ग्रेस समर्थित व्यवसायीबीच चुनावी प्रतिस्पर्धा भइरहेको छ । सङ्घको निर्वाचन प्रयोजनका लागि नेकपा पार्टीको समर्थनमा रमेश श्रेष्ठ र नेपाली काङ्ग्रेसको समर्थनमा ताराबहादुर कार्कीको प्यालन चुनावी प्रतिस्पर्धामा उत्रिएका छन् । व्यावसायिक संस्थामा राजनीतिक दलको आधारमा प्रतिस्पर्धा हुँदा सकारात्मक सन्देश नदिने भन्दै सहमतिका आधारमा नेतृत्व चयनको आम व्यवसायीको प्रयास सफल नभएपछि प्रतिस्पर्धाबाट पदाधिकारी छनोट हुन लागेको छ । अध्यक्षसहित सम्पूर्ण पदमा सत्तानिकट नेकपाबाट युवा व्यवसायी रमेश श्रेष्ठको प्यानल र काङ्ग्रेसले अनुभवी सङ्घका वर्तमान अध्यक्ष ताराबहादुर कार्कीको प्यानल तयार गरी मैदानमा उतारेको छ । सङ्घको दशौँ अधिवेशनले नुवाकोट उद्योग वाणिज्य सङ्घमा ८ पदाधिकारीसहित २२ सदस्यीयकार्य समितिको चयन निर्वाचनद्वारा गर्नेछ । वरिष्ठ उपाध्यक्षमा कार्की प्यानलबाट अहिलेका कोषाध्यक्ष गीता अमात्य र श्रेष्ठ प्यानलबाट सङ्घका पूर्वसचिव एवम् युवा इन्जिनियर रामकृष्ण राजभण्डारीबीच प्रतिस्पर्धा हुनेछ । यस्तै, प्रथम उपाध्यक्षमा कार्की प्यानलबाट सङ्घका वर्तमान उपाध्यक्ष राजेन्द्र श्रेष्ठ र श्रेष्ठ प्यानलबाट सङ्घका वर्तमान कार्यसमितिका सदस्य उसनमान श्रेष्ठबीच प्रतिस्पर्धा हुनेछ । द्वितीय उपाध्यक्षमा कार्की प्यानलबाट वर्तमान कार्यसमितिका प्रवक्ता सन्तोष उप्रेती र श्रेष्ठ प्यानलबाट वर्तमान कार्यसमितिका सदस्य लिडर श्रेष्ठबीच कडा प्रतिस्पर्धा हुनेछ । त्यसैगरी श्रेष्ठ प्यानलबाट महासचिवमा वर्तमान कार्यसमितिका महासचिव दीपक कायस्थ र कार्की प्यानलबाट सङ्घका पूर्वसचिव कृष्ण अधिकारीबीचमा प्रतिस्पर्धा हुनेछ । यस्तै, सचिवमा कार्की प्यानलका वर्तमान कार्यसमितिका सदस्य उपेन्द्र बुढाथोकी र श्रेष्ठ प्यानलबाट वर्तमान कार्यसमितिका सदस्य राजु बोगटीबीच कडा प्रतिस्पर्धा हुनेछ । सङ्घको अर्को महत्वपूर्ण पद कोषाध्यक्षमा कार्कीको टिमबाट सङ्घका वर्तमान कार्यसमितिका सदस्य दिनेश श्रेष्ठ र श्रेष्ठको टिमबाट राजाराम अधिकारीबीच प्रतिस्पर्धा हुनेछ । प्रवक्तामा कार्की टिमबाट सङ्घका वर्तमान कार्यसमितिका सदस्य सविनराज भण्डारी र श्रेष्ठ प्यानलबाट सङ्घका पूर्वकोषाध्यक्ष श्यामसुन्दर श्रेष्ठबीच प्रतिस्पर्धा हुनेछ । तीन महिला सदस्य पदमा श्रेष्ठ प्यानलको लक्ष्मीकुमारी प्रधान, विष्णुमाया डङ्गोल र शर्मिला अर्यालले र कार्की प्यानलको लिस्ना प्रधान श्रेष्ठ, ज्ञानुमाया गिरी र अञ्जली राजभण्डारीबीच प्रतिस्पर्धा हुँदै छ । त्यसैगरी दुई वस्तुगत सदस्यको लागि श्रेष्ठ प्यानलबाट बुद्धिसागर रिजाल र प्रकाश भण्डारीको कार्की प्यानलका ध्रुवकुमार रावल र उत्तम ढकालसँग प्रतिस्पर्धा हुनेछ । नौजना खुला सदस्य पदका लागि श्रेष्ठ प्यानलबाट पवन नेपाल, सञ्जीव थपलिया, रामधन ढकाल, दीपक तिमल्सिना, नारायण पौडेल, ईश्वर पौडेल, सेल्बोन तामाङ, श्यामकुमार कुँवर र विनयप्रसाद लामिछानेले कार्की प्यानलका विष्णु प्याकुरेल, उद्धवराज पन्थ, निरोजकुमार खड्गी, सरोज श्रेष्ठ, सुमन भण्डारी, मधुसुदन थपलिया, गगन लामा, सुजित जोशी र मेघनाथ घिमिरेसँग प्रतिस्पर्धा हुँदै छ । सङ्घको १६औँ वार्षिक साधारणसभा तथा दशौँ अधिवेशनको उद्घाटन भोलि शुक्रबार नेपाल उद्योग वाणिज्य महासङ्घको अध्यक्ष भवानी राणाले गर्ने जानकारी सङ्घले दिएको छ ।
