अर्थमन्त्रालयमा चौमासिक समीक्षा, यथाशीघ्र काम सम्पन्न गर्न अर्थमन्त्रीको निर्देशन
काठमाडौँ । आर्थिक बर्ष २०७५/७६ को दोस्रो चौमासिक प्रगति समीक्षा एवं मन्त्रालय स्तरीय विकास समस्या समाधान समितिको बैठक आइतबार अर्थमन्त्री डा. युवराज खतिवडाको अध्यक्षतामा बसेको छ । बैठकमा अर्थ मन्त्रालय र मातहतका निकायहरुबाट सम्पादन हुने कार्यहरुलाई यथाशीघ्र सम्पन्न गर्न अर्थमन्त्री डा. खतिवडाले निर्देशन दिए । बजेट कार्यान्वयनलाई उपलब्धीमूलक बनाउन तर्जुमा गर्नु पर्ने र संशोधन गर्नुपर्ने बाँकी कानूनहरुको शीघ्र तर्जुमा गर्ने, राजस्व परिचालनमा बिलिङ्ग कार्यान्वयन र बजार अनुगमनलाई थप तिव्रता दिने, नेपाल सरकारको नीति तथा कार्यक्रम र बजेट कार्यान्वयन कार्ययोजना बमोजिमका कार्यहरुको समयमा कार्यान्वयन गर्न जिम्मेवार भई कार्यसम्पादन गर्न समेत निर्देशन दिए । अन्तर प्रदेश परिषद एवम् अन्तर सरकारी वित्त परिषदको निर्णय कार्यान्वयन गर्न र आगामी आर्थिक बर्षको बजेट तर्जुमामा वित्तीय संघीयता प्रभावकारी कार्यान्वयन गर्न समेत निर्देशन उनले निर्देशन दिए । उक्त बैठकमा राष्ट्रिय योजना आयोगका माननीय उपाध्यक्ष कँडेलले आर्थिक बर्षको बाँकी अवधिमा लक्ष्य अनुरुप कार्य सम्पादन गर्न जोड दिदै अर्थ मन्त्रालय र राष्ट्रिय योजना आयोगको वीचमा आगामी बजेट तर्जुमामा प्रभावकारी सहकार्य गर्नुपर्ने बताए । अर्थ सचिव डा. राजन खनाल, सचिव (राजस्व) लालशंकर घिमिरे, गभर्नर डा निरञ्जीवी नेपाल र महालेखा नियन्त्रक सूर्यप्रसाद गौतम समेतको उपस्थिति रहेको सो कार्यक्रममा महाशाखा प्रमुख, विभागीय प्रमुख, नियामक निकायमका प्रमुख र आयोजना प्रमुखहरुले आ–आफ्नो निकायको प्रगति अवस्था र कार्यान्वयनको क्रममा देखा परेका समस्याको बारेमा संक्षिप्त प्रस्तुति गर्नुका साथै चालु आव २०७५/७६ को नीति तथा कार्यक्रम र बजेट बक्तब्यमा उल्लेखित कार्यक्रमहरुको बाँकी अवधिमा कार्यसम्पादन गर्ने प्रतिवद्धता ब्यक्त गरेका थिए । बैठकमा अर्थ मन्त्रालयका सहसचिव उत्तरकुमार खत्रीले गत एक बर्षको अवधिमा अर्थ मन्त्रालय र अन्तर्गत भएका उपलब्धीका बारेमा प्रस्तुत गरे । अर्थ मन्त्रालयले विगत एक बर्षमा कानून निर्माण, वित्तीय संघीयता कार्यान्वयन, वित्तीय क्षेत्र ब्यवस्थापन र राजस्व प्रशासनमा सुधार लगायतमा ठोस प्रगति हासिल गरेको जानकारी दिए । बैठकमा समग्र बजेट खर्च स्थिति, अर्थ मन्त्रालयको खर्च स्थिति, बार्षिक लक्ष्य र प्रगति विवरण, आयोजना र कार्यक्रम कार्यान्वयनमा देखिएको केही तथ्य र प्रगति बारे संक्षिप्त प्रस्तुति भएको थियो । अर्थ मन्त्रालय र मातहतका निकायले चालु आर्थिक बर्ष २०७५/७६ को नीति तथा कार्यक्रम र बजेट बक्तब्यमा उल्लेखित कार्यक्रमहरुको कार्ययोजना बमोजिमको प्रथम आठ महिनामा प्रगति अवस्थाको विवरण समेत प्रस्तुत भएको थियो ।
सिद्धार्थ बैंकको दमौली शाखा औपचारिक स्थानान्तरण उद्घाटन
काठमाडौं । सिद्धार्थ बैंकले दमौली शाखाको औपचारिक स्थानान्तरण उद्घाटन भएको छ । बैंकको दमौली शाखाको उद्घाटन व्यास नगरपालिकाका मेयर बैकुण्ठनाथ न्यौपाने र उद्योग वाणिज्य महासंघ नेपालका केन्द्रीय सदस्य देवकुमार श्रेष्ठबाट संयुक्त रूपमा भएका हुन्र । बैंकले सो शाखा दमौली वडा नं २ सफा सडकबाट हालै दमौली व्यास नगरपालिका वडा नं ३ मा स्थानान्तरण गरेको हो । ग्राहकवर्ग र सरोकार वालाहरुको मन जित्न र थप सुविधा पुर्याउन बैंकले विभिन्न बचत खाता सञ्चालनमा ल्याउनुका साथसाथै विभिन्न सहुलियतपूर्ण कर्जाप्रदान गर्दै आइरहेको छ । यसैगरी बैंकिङ्ग प्रणालीलाई थप प्रविधि मैत्री बनाउन सिद्धार्थ बैंकले इन्टरनेटको माध्यमबाट आफ्नो रोजाइको बचत खाताखोल्न सकिने सुविधा ल्याएको छ जसले गर्दा ग्राहकहरुलाई थप सुविधा पुग्ने बैंकले जनाएको छ । बैंकले देशभर १४९ वटा शाखा (४ एक्स्टेन्सन् काउन्टर सहित), १सय शाखारहित बैंकिङ्ग सेवा, १६० एटिएम र १२ सयभन्दा बढी पिओएस् मेसिन मार्फत् उच्चस्तरिय बैैकिङ्ग सेवा प्रदान गर्दै आएको छ ।
नेशनल माइक्रोफाइनान्स वित्तिय संस्थाद्धारा हावाहुरी प्रभावितलाई राहत प्रदान
काठमाडौं । नेशनल माइक्रोफाइनान्स वित्तिय संस्था शाखाकार्यालय मोतिसरले विनाशकारी हावाहुरीबाट प्रभावित संस्थामा आवद्ध सदस्यहरुलाई रहत प्रदान गरेको छ । कलैया उमनपा वडा नं १८ मोतिसर स्थित नेशनल माइक्रोफाइनान्स वित्तिय संस्था शाखाकार्यालय मोतिसरमा आवद्ध सदस्यहरुलाई राहतवितरण गरेका हुन् । संस्थाको प्रमुख कार्यकारी अधिकृत रामबहादुर यादव र सभापतिमा वडा नं १८ का वडाध्यक्ष अम्बिकाप्रसाद यादव,अतिथीहरुमा समाजसेवी, विभिन्न पार्टी प्रतिनिधी, बुद्धिजीवी नेशनल माइक्रोफाइनान्सको शाखाकार्यालय सिम्रौनगढको शाखा प्रमुख जयप्रकाश मंडल, शाखाकार्यालय पोखरीयाको शाखा प्रमुख अजयशंकर साह, पत्रकारहरु, सुरक्षाकर्मीहरु र ग्राहक सदस्य तथा अभिभावक गरि करीब ४०० जनाको उपस्थिती रहेको थियो । राहतवितरण कार्यक्रमको प्रमुख अतिथि रामबहादुर यादवले संस्थाले आफ्नो समाजिक उत्तरदायित्व अन्तर्गत संस्थामा आवद्ध भएका ग्राहक सदस्यहरुलाई हवाहुरीबाट भएको पिडामा मलम लगाउने काम गरेको साथै संस्थाले आफ्नाग्राहक सदस्यहरुलाई कर्जा बचत मात्रनभई समाजिक उत्तरदायित्व अन्तर्गत ग्राहकको हकहितमा पहिचान बनाएको जानकारी दिए । राहतवितरण कार्यक्रमको सभापति वडाध्यक्ष अम्बिकाप्रसाद यादवले संस्थाले पिडामा भएका सदस्यहरुलाई यस्तो सहयोगले संस्थाप्रति सर्वसधारणको भरोसा तथाविश्वाश बढने भनेर मन्तव्य राखे । राहत वितरण कार्यक्रमको सुरुवात प्रमुख अतिथि यादवले शुरु गरेका हुन् । कार्यक्रममा कुल १८० जना ग्राहक सदस्यहरुलाई जनही चामल १ बोरा, चिउरा २ किलो, दाल १ किलो, चिनी १ किलो, नुन १ किलो, तेल १ लिटर, मशाला १प्याकेट, झुल १ थान र तन्ना १ थान समाग्रीहरु वितरण गरिएको थियो ।
काठमाडौंका स्कूलले ४ हजार ३७४ रुपैंया मात्र भर्ना शुल्क लिन पाउने, निजी स्कुलहरु लाखौं असुल्दै
काठमाडौं । संस्थागत विद्यालयले एकजना विद्यार्थीबाट भर्ना शुल्क अधिकतम ४ हजार ३७४ रुपैंया मात्र लिन पाउने भएका छन् । काठमाडौं महानगरपालिका शिक्षा विभागले निर्धारण गरेको शुल्कको संरचना अनुसार भर्नाको नाममा ‘क’ वर्गका विद्यालयहरुले कक्षा ९ र १० कक्षाका विद्यार्थीहरुलाई उक्त परिमाणमा शुल्क लिन पाउन भएका हुन् । ‘ख’, ‘ग’ र ‘घ’ वर्गका विद्यालय तथा सो तहभन्दा कम तहका विद्यार्थीहरुलाई तह र विद्यालयको स्तर अनुसार शुल्क निर्धारण गरिदिएको छ । निर्धारित शुल्क अनुसार ‘घ’ वर्गका विद्यालयले आधारभूत तह अन्तर्गत कक्षा १ देखि ५ सम्मका विद्यार्थीलाई भने १६३० रुपैंया सम्म मात्र भर्ना शुल्क लिन पाउँछन् । त्यस्तै, आधारभूत तह अन्तर्गत ६ देखि ८ कक्षाका विद्यार्थीलाई १९०१ रुपैंया र माध्यामिक तहअन्तर्गत कक्षा ९ र १० काम विद्यार्थीलाई २५३७ रुपैंया मात्र त्यस्तो शुल्क लिन पाउँछन् । त्यस्तै, ‘ग’ वर्गका विद्यालयहरुले कक्षा १ देखि ५ सम्मको लागि २०२४ रुपैंया, कक्षा ६ देखि ८ सम्मका लागि २३५१ रुपैंया र कक्षा ९ र १० का लागि ३१४९ रुपैंया लिन पाउनेगरी शुल्क निर्धारण गरिएको छ । ‘ख’ वर्गका विद्यालयहरुको शुल्क भने कक्षा १ देखि ५ सम्मको लागि २४१८ रुपैंया, कक्षा ६ देखि ८ सम्मका लागि २८०१ रुपैंया र कक्षा ९ र १० का लागि ३७६२ रुपैंया तोकिएको छ । सबैभन्दा उत्कृष्ठ शिक्षण गुणस्तर भएको मानिने ‘क’ वर्गका विद्यालयका विद्यार्थीका लागि भने भर्ना शुल्कबापत कक्षा १ देखि ५, कक्षा ६ देखि ८ र कक्षा ९ र १० का लागि क्रमशः २८१२, ३२५१ र ४३७४ रुपैंया अधिकतम शुल्क लिन पाउनेगरी शुल्क निर्धारण गरेको विभागले जनाएको छ । २०७४ सालको तुलनामा २०७५ सालमा ३८ प्रतिसत शुल्क बढाईएको पाईएको छ। विभागले कक्षाकोठा, डेक्स बेञ्च, शौचालय, खानेपानी, पुस्तकालय, खेलमैदान, कक्षा शिक्षक अनुपात, प्राथमिक उपचारसम्बन्धी व्यवस्था, छात्रवृत्ति, प्रयोगशाला कम्युटर ल्याव, सभाहल, सेवा कक्ष, अतिरिक्त क्रियाकलाप, शिक्षकहरुको तलब, आक्दानी खर्चको लेखाप्रणाली र पारदर्शिता जस्ता ५४ ओटा मापदण्ड निर्धारण गरी सोही मापदण्डको भारित औसत अंकका आधारमा विद्यालय वर्गीकरण गरिने प्रावधान राखेको छ। विद्यालयले तोकेको सेवा सुविधा उपलब्ध रहेको वा नरहेको उल्लेख गरेको आधारमा शुल्क अनुगमन तथा विद्यालय वर्गीकरण समितिले छानविन वा अनुगमन गरी अंक निर्धारणका लागि सिफारिस गर्ने व्यवस्था गरिएको छ । भर्ना शुल्क १ महिनाको मासिक शुल्क विभागले विद्यालयले लिन पाउने भर्ना शुल्क, मासिक शुल्क र वार्षिक शुल्क तोकेको भएता पनि पुस्तकालय शुल्क, प्रयोगशाला शुल्क, त्रैमासिक परीक्षा शुल्क लगायतका नाममा विद्यालयहरुले अभिभावकमाथि लाखौं ठगी गर्दै आएका छन्। विद्यालयको मासिक शुल्क भने बढीमा भर्ना शुल्क बराबर नै लिन पाउने, परिक्षा शुल्क मासिक शुल्कको ५० प्रतिसत तोकिएको विभागले जनाएको छ । यद्यपि पाठ्यपुस्तक, विद्यालय पोसाक लगायतका विषयमा विभागले केही कडाई गर्दै मातहतका विद्यालयहरुलाई सर्कुलर गरे पनि त्यसको परिपालना भएको पाइएको छैन । विद्यालयको अनुगमन र कारबाहीको अवस्थाको बारेमा भने काठमाडौं विभागले कुनै जानकारी दिएन ।
चैत २७ गतेदेखि ललित अन्तर्राष्ट्रिय ब्यापार मेला हुने, ‘लगानी भित्र्याउन केन्द्रित’
काठमाडौं । ललितपुर उद्योग वाणिज्य संघको आयोजनामा चैत्र २७ गते देखि बैशाख १ गतसम्म ललित अन्तर्राष्ट्रिय व्यापार मेला हुने भएको छ । मेलाको उद्घाटन उपराष्ट्रपति नन्दबहादुर पुनले गर्ने छन् । ललितपुरमा उत्पादित सामग्रीको अन्तर्राष्ट्रिय स्तरमा बजार विस्तार गर्न र विभिन्न देशमा उत्पादित सामग्रीको बजारको रुपमा ललितपुरलाई विकसित गर्न मेला आयोजना गरेको संघले जानकारी दिएको छ । संघका अध्यक्ष कृष्णलाल महर्जनले राजधानीसँगै जोडिएको जिल्ला भएपनि ललितपुरको विकासमा राज्यको ध्यान अपेक्षाकृत रुपले परेको छैन । ललितपुरको आफ्नै सामथ्र्य र सम्भावना छन् । तिनै सम्भावनालाई मूर्तरुप दिने सम्बन्धमा ध्यानाकर्षण गर्न पनि यस मेला आयोजना गरेको बताए । ललितपुरमा लगानी भित्र्याउने र लगानीका सम्भावना पहिल्याउन दिशामा मेला केन्द्रित हुने महर्जनले बताए । मेलामा करिब १ सय वटा स्टलहरु रहने छ । भारत, पाकिस्तान, बंगलादेश, चीन लगायत विभिन्न देशको ३० वटा स्टल रहने छ । नेपालमा उत्पादन हुने हस्तकलाका विविध सामग्रीको स्टल रहने छ । विभिन्न सांस्कृतिक झाँक्रीसहित संस्कृतिको आनन्द र मनोरम वातावरणमा क्रेता र बिक्रेता प्रत्यक्ष भेटघाट हुने अवसर पनि मेलाले सिर्जना गर्नेछ । मेलामा दर्शकहरुले अत्याधिक रुचाएको बुकिबुकीको विशेष प्रस्तुती रहने छ । मेलाले सरकारले सन् २०२० सम्ममा २० लाख पर्यटन भित्र्याउने लक्ष्यलाई पनि टेवा पुर्याउने संघले जनाएको छ । मेलामा करिब ५ करोड रुपैयाको कारोबार हुने अनुमान आयोजकले गरेका छ । करिब ५ लाखले मेलाको अवलोकन गर्ने अनुमान गरिएको छ ।
कोशी करिडोर प्रसारण लाइनमा धरान उपमहानगरको अवरोध हट्यो, निर्माण सुचारु
काठमाडौं । सुनसरीको धरान उपमहानगरपालिकाले कोशी करिडोर २२० केभी प्रसारण लाइन आयोजना निर्माणमा गर्दै आएको अवरोध हटेको छ । उपमहानगरपालिकाले गत मंसिरबाट गर्दै आएको अवरोध हटेपछि बिहीबारबाट विष्णुपादुका क्षेत्रमा प्रसारण लाइन निर्माणको काम सुचारु भएको छ । आयोजनाको प्रस्तावित रुटबाटै प्रसारण लाइन निर्माण गर्न उपमहानगरपालिका सहमत भएपछि काम सुरु गरिएको आयोजना प्रमुख राजन ढकालले जानकारी दिए । ‘१७ वटा टावर निर्माणमा अवरोध थियो, पटकपटक भएको छलफलबाट वडाध्यक्ष लगायत प्रस्तावित रुटबाटै प्रसारण लाइन लैजान दिन तयार भएपछि निर्माण शुरु गरिएको छ, प्रभावलाई न्यूनिकरण गर्न आयोजनाले स्थानीय रुपमा गर्न सक्ने सामुदायिक विकासका कार्यक्रमहरु संचालन गरिने छ’,उनले भने । समस्या समाधानका लागि १ नम्बर प्रदेशका मुख्य मन्त्री शेरधन राईले पहल गरेका थिए । उनले उपमहानगरपालिका प्रमुख, वडाध्यक्ष, त्यस क्षेत्रका संघ तथा प्रदेशका सांसद लगायतसँग पटकपटक छलफल गरेका थिए । उनले प्रसारण लाइन रहने क्षेत्रको स्थलगत निरीक्षणसमेत गरेका थिए । धरान उपमहानगरपालिकाका कार्यवाहक प्रमुख मञ्जु भण्डारी सुवेदीले गत मंसिर २८ गते प्रस्तावित रुटबाट प्रसारण लाइनको निर्माण गरिएमा उपमहानगरपालिका–२० को विष्णुपादुका क्षेत्रमा स्थापित, निर्माणाधीन र पहिचान भएका पर्यटकीय स्थलहरुलाई प्रत्यक्ष÷अप्रत्यक्ष रुपमा नकारात्मक असर पर्ने भन्दै त्यसलाई करिब २ सय मिटर पश्चिमबाट लैजान नेपाल विद्युत प्राधिकरणलाई लिखित रुपमै आग्रह गरेकी थिइन् । त्यसपछि आयोजनाको निर्माण रोकिएको थियो । प्राधिकरणले उपमहानगरपालिकाले भनेजस्तो कुनै प्रसारण लाइनल असर कुनै असर नपर्ने, निर्माण ढिलाइ भएमा प्रसारण लाईनको निर्माणमा ढिलाई भएमा हाल निर्माणाधीन अवस्थामा रहेका जलविद्युत आयोजनाहरु वाट उत्पादन हुने अनुमानित ५५० मेगावाट विद्युत खेर जाने अवस्था आउने, यसबाट राष्ट्रलाई क्षति पुग्ने, प्रवद्र्वकहरुलाई क्षतिपुर्ति लगायतको अवस्था रहेको भन्दै रुट परिवर्तन गर्न अस्विकार गर्दै आएको थियो । उपमहानगरपालिकाले उठाएका विषयलाई प्रसारण लाइनले कुनै असर नगर्ने, असर पर्ने केही क्षेत्रहरुलाई लाईनको चेक सर्भे गर्ने क्रममा संबोधन गरिसकिएको र सम्पूर्ण प्रकृया पूरा गरी निर्माण भइरहेको आयोजनाको रुट सार्न नसकिने अडान प्राधिकरणका कार्यकारी निर्देशक कुलमान घिसिङले राख्दै आएका थिए । गत पुसमा १ नम्बर प्रदेशका मुख्यमन्त्री शेरधन राईको उपस्थितिमा धरानमा भएको सरोकारवालाको भेलाले समस्या पहिचान गरी र समाधानका उपाय खोज्न कार्यदल गठन गरिएको थियो । सुनसरीका प्रमुख जिल्ला अधिकारी प्रेमप्रकाश उप्रेतीको संयोजकत्वमा गठित कार्यदलमा कार्यदलमा वडाध्यक्ष, आयोजना प्रमुख, उपमहानगरपालिका इन्जिनियर, सरोकार समिति,ठेकेदार तथा परामर्शदाता कम्पनी, स्थानीय राजनीतिक दलबाट एक÷एक जना प्रतिनिधि थिए । कार्यदलले रुट परिवर्तन गर्न नसकिने प्रतिवेदन दिएको थियो । तर, यसमा राजनीतिक दल र सरोकार समितिका प्रतिनिधिले हस्ताक्षर गरेका थिएनन् । प्राधिकरणले अहिले प्रसारण लाइनको रुट भेडेटार–छोटी, मोरङ–सर्दू जलाधार क्षेत्र–तमाखाम–सालबोटे–चिण्डे डाँडा–भञ्ज्याङ–गोर्खा मेमोरियल पार्क–जलकन्या सामुदायिक वन हुँदै लैजाने प्रस्ताव गरिएको छ । अब सोही रुट हुँदै प्रसारण लाइनको निर्माण हुनेछ । नेपाल सरकार, प्राधिकरण र भारतीय एक्जिम बैंकको सहुलियतपूर्ण ऋणमा एक नम्बर प्रदेशमा भोजपुर, संखुवासभा, तेह्रथुम र ताप्लेजुङमा निर्माण हुने जलविद्युत आयोजनाको विद्युत राष्ट्रिय प्रसारण लाइनमा जोड्न कोसी करिडोरको निर्माण गर्न लागिएको हो । प्राधिकरणले निजी क्षेत्रका २८ आयोजनाको ५१६ मेगावाट विद्युत यही प्रसारण लाइनमा जोड्ने गरी विद्युत खरिद सम्झौता (पीपीए) गरिसकेको छ । ती आयोजना निर्माणको विभिन्न चरणमा छन् । प्राधिकरणले प्रसारण लाइन निर्माण गर्न नसकेमा ती आयोजनाबाट उत्पादित विद्युत खेर जाने अवस्था छ । करिडोरको पहिलो प्याकेजमा इनरुवा–वसन्तपुर–वानेश्वर–तुम्लिङटार १०५ किलोमिटर २२० केभी डबल सर्किट प्रसारण लाइन निर्माण जुन २०१९मा सक्ने लक्ष्यका साथ काम भइरहेको छ । ३२० वटा टावरमध्ये २१० वटाको जग हालिएको र ९० वटा खडा गरिसकिएको आयोजना प्रमुख ढकालले जानकारी दिए । अब केही दिनमै टार तान्न पनि सुरु हुने उनले बताए । यसको अनुमानित लागत ३ करोड ७५ लाख अमेरिकी डलर छ । दोस्रो प्याकेजको इनरुवा, वसन्तपुर, वानेश्वर र तुम्लिङटारमा २२० केभीको सब स्टेसन निर्माण फेबु्रअरी २०२०मा सक्ने लक्ष्यका साथ काम भइरहेको छ । यो प्याकेजको अनुमानित लागत २ करोड ५३ लाख डलर छ । तेस्रो प्याकेजमा वसन्तपुर–ढुंगेसाँघु (ताप्लेजुङ) ३३ किलोमिटर प्रसारण लाइन निर्माणका लागि ठेक्का सम्झौता भई काम सुरु भइसकेको छ । २ करोड २० लाख डलर अनुमानित लागत रहेको आयोजनाको काम डिसेम्बर २०२० मा सक्ने लक्ष्य राखिएको छ ।
रिद्धिसिद्धि सिमेन्ट बजारमा, ल्याब टेस्ट र गुणस्तर मापन रोबोटबाट !
काठमाडौं । शंकर ग्रुप तथा अम्बे ग्रुप संयुक्त सहकार्यमा हेटौँडामा उत्पादित रिद्धिसिद्धि सिमेन्ट आइतबारदेखि बजारमा आएको छ । उद्योग व्यवस्थापनले राजधानीमा पत्रकार सम्मेलन गरी सिमेन्ट बजारमा ल्याइएको जानकारी गराएको हो । सो सिमेन्ट उत्पादनमा रोबोटले ल्याब टेस्ट र गुणस्तरको मापन गर्दछ । लेजर सिल प्याकेजिङ तथा रोबो ल्याव सिस्टमसहित उत्पादित ओपीसी सिमेन्ट सार्वजनिक गरिएको हो । शंकर ग्रुप अध्यक्ष शंकरलाल अग्रवाल तथा अम्बे ग्रुपका अध्यक्ष शोभाकरहरी न्यौपानेले उक्त सिमेन्ट सार्वजनिक गरेका हुन् । अन्य सिमेन्टको तुलनामा रिद्धिसिद्धि सिमेन्ट उत्कृष्ट र फरक भएको सिमेन्टका निर्देशक आनन्द नेपालले जानकारी दिए । अन्य सिमेन्टको जस्तै बजार सुहाँउदो मूल्य कायम गरिएको उनले बताए । हेटौँडामा प्लान्ट, दैनिक ३ सय टन उत्पादन हेटौँडा उपमहानगरपालिकाको रातामाटेमा ४० बिघा क्षेत्रफलमा कम्पनीले प्लान्ट स्थापना गरेको छ । निबुवाटार र राक्सीराङका खानीबाट चुनढुङ्गा ल्याउने जानकारी दिएको छ । कम्पनीले दैनिक ३ सय टन सिमेन्ट उत्पादन गर्ने छ । अम्बे ग्रुपका अध्यक्ष न्यौपानेले १० अर्ब स्वदेशी लगानीमा उक्त कम्पनी स्थापना गरिएको बताए ।
उचालिँदै बजार परिसूचक, शेयर बजारले गति लिन लागेकाे हो ?
काठमाडौं । मार्च २४ तारिख शेयर बजार परिसूचक नेप्से ११३४ विन्दुमा कायम थियो । त्यसपछिको १० दिनको कारोबारमा नेप्से परिसूचकले झिनो गिरावटको अवस्थाबाहेक पछाडि फर्केर हेर्नु परेको छैन । यो दश कारोबार दिनमा नेप्से परिसूचकले करिब ४८ अंकको वृद्धि हासिल गर्न सफल भएको छ । उक्त वृद्धिमा मंगलबारकाे १४ अंक र आजकाे १७ अंककाे वृद्धि महत्वपूर्ण रहे पनि अन्य दिनहरुमा समेत आशलाग्दाे रुपमा बजार बढ्दै गएकाे छ । याे अवधिमा बजार ४८ अंकले बढेको मात्रै छैन, कारोबार रकममा पनि उल्लेख्य सुधार आएको छ । आइतबार पनि कुल कारोबार ५४ करोड नाघ्यो, गत हप्ता बिहीबार ४२ करोड, बुधबार ५४ करोड, मंगलबार ५० करोड कारोबार भएको थियो । अघिल्लो साता मात्रै कुल कारोबार मात्रै २ अर्ब ८ कराेड पुगेको थियो । शेयर बजारमा परिसूचकलाई मात्रै प्रमुख मानिँदैन, कारोबारको आकार, माग र आपुर्तिको पक्षलाई अर्को प्रमुख सूचकको रुपमा लिइन्छ भलै सूचकको वृद्धि र गिरावटमा धेरैको ध्यान केन्द्रित किन नहोस् । त्यसो त परिसूचकको गिरावटसँग पोर्टफोलियोको आकारको प्रत्यक्ष सरोकार हुने भएकोले इन्डेक्स बढ्दा खुसी र घट्दा निराश हुनेको संख्या धेरै हुन्छ, तर एउटा विवेकशील लगानीकर्ता वा स्पेकुलेटरले कारोबारलाई पनि महत्वपूर्ण सूचकको रुपमा लिन्छ । बिक्रीको चापले सामान्यतया बजारलाई तलतिर झार्छ भने खरिदमा हुने चापले यसलाई माथितिर तान्छ । यसरी बजार बढ्दै गएको छ र कारोबार पनि बढ्दै गएको छ भने अझै बजार चलायमान छ वा बजारले त्यो गतिलाई अझै पछ्याउँछ भन्ने अर्थ लाग्छ । त्यसको ठीक उल्टो घट्दो बजारमा कारोबार कम छ, यसले थप गिरावटको संकेत गर्छ । अहिले बजारको अवस्थाले शेयर बजारले सुधारात्मक गति समातेको संकेत गरेको छ । किन बढ्यो शेयर बजार ? सरकारले शेयर बजारमा गरेको सुधारको प्रतिवद्धता र नियामकहरुले त्यसका लागि गरेको प्रयास, लगानी सम्मेलनसँगै राष्ट्रिय तथा अन्तराष्ट्रिय लगानीकर्ताको संरक्षणका लागि सरकारले गरेको प्रतिवद्धता, पुँजी बजारमा थपिँदै गरेको नयाँनयाँ आयामहरु जस्तै मार्जिन लेन्डिङ, ब्रोकरको शाखा विस्तारका लागि भएका प्रयास, शेयरको क्रसबोर्डर लिस्टिङ र ट्रेडिङका प्रयासहरु तथा अन्य आधारभूत प्रयासहरुको कारणले लगानीकर्ताहरुमा बजारको दीगोपनप्रति केही हदसम्म विश्वास जाग्दै गएको विश्लेषण बजारमा गर्न थालिएको छ । अर्को महत्वपूर्ण पक्ष के हो भने, बजारको पछिल्लो गिरावटमा तुलनात्मक रुपमा कम शेयरमूल्य भएका र धेरै शेयर हिस्सा भएका बैंक तथा वित्तीय संस्थाहरुका शेयरको उछालको हिस्सा महत्वपूर्ण छ । आइतबारको शेयर बजारमा पनि मुख्यतः वाणिज्य बैंक र विकास बैंक समूहकै प्रमुख योगदान छ । यसैल पनि बजारको पछिल्लो वृद्धिलाई सस्टेनेबल ग्रोथको रुपमा परिभाषित गर्न थालिएको हो । यद्यपि नेपाली शेयर बजारमा ठूला स्पेकुलेटरहरु हाबी भएको र प्रोफिट बुकिङमा हतारिने लगानीकर्ताको जमात पनि ठूलो भएकोले शेयर किन्ने वा बेच्ने निश्कर्षमा पुग्नु अघि बजारको अध्ययन र सम्बन्धित कम्पनीको आधारभूत पक्ष र प्राविधिक पक्षको विश्लेषण आवश्यक हुन्छ ।
