सामुदायिक लघुवित्तको पाँचौ बार्षिक साधारण सभा, ६ जना सञ्चालक निर्वाचित
काठमाडौँ । सामुदायिक लघुबित्त बित्तीय संस्था लिमिटेड, बनेपा, काभ्रेपलाञ्चोकको पाँचौ बार्षिक साधारण सभा आइतबार सम्पन्न भएको छ । साधारण सभाले आब २०७४/७५ को बार्षिक लेखा परीक्षण विवरण प्रतिवेदन पारित, आब २०७५÷०७६ का लागि बाह्य लेखापरीक्षक नियुक्ति तथा संस्थाको सञ्चालक समितिमा प्रतिनिधित्व गर्ने संस्थापक शेयरधनीहरुको तर्फबाट ४ जना र सर्वसाधारण शेयरधनीहरुको तर्फबाट २ जना संचालकको लागि निर्वाचन भएको छ । संस्थाले हालसम्म शेयरधनीहरुलाई लाभांश तथा बोनस शेयर वितरण गरेको छैन, यद्यपी आगामी बार्षिक साधारण सभामा संस्थाको मूनाफाबाट उपयुक्त प्रतिशतमा लाभांश तथा बोनस शेयर वितरणको प्रस्ताव ल्याउन सकिने बारे छलफल भएको थियो । आब २०७४/७५ मा संस्थाको खुद नाफा १ करोड ५५ लाख ७० हजार ८ सय अन्ठाउन्न रुपैंया रहेको छ । संस्थाको हाल चुक्ता पूँजी १० करोड पुगेको जनाइएको छ ।
ज्योति लाईफमा बीमा गराएकालाई ग्राण्डी अस्पतालमा विशेष छुट
काठमाडौँ । ज्योति लाइफ इन्स्योरेन्स र ग्राण्डी अन्तर्राष्ट्रिय अस्पतालबीच संझौता भएको छ । आफ्नो ग्राहकहरुलाई बीमा सेवाका अतिरिक्त अन्य सेवा सुविधा विस्तार गर्ने क्रममा ग्राण्डी अन्तराष्ट्रिय अस्पताल धापासी काठमाण्डौसंग स्वास्थ्य सेवामा साझेदारी गर्ने सम्बन्धमा सम्झौता सम्पन्न गरेको भएको हो । उक्त सम्झौतामा ज्योति लाईफ इन्स्योरेन्समा आबद्ध निश्चत मापदण्ड पूरा गरेका ग्राहक, अभिकर्ता, कर्मचारी तथा शेयरधनीहरुलाई विशेष कार्ड जारी गरिने र उक्त कार्डबाहक तथा निजका परिवारका सदस्यहरुले ग्राण्डी अस्पतालबाट उपलब्ध हुने उच्च स्तरीय स्वास्थ्य उपचार सेवामा विशेष छुट प्राप्त गर्ने छन् । सम्झौता पत्रमा ज्योति लाईफ इन्स्योरेन्स कम्पनीका कार्यकारी उप–प्रमूख प्रकाशबिक्रम खत्री र अस्पतालका बजार तथा व्यवसाय विकास प्रमुख दिनेश पौड्यालले हस्ताक्षर गरेका छन् ।
सैनिक सन्तति प्राविधिक शिक्षण सहुलियत कर्जा कार्यान्वयनमा, प्रभु बैंकले २५ लाख सम्म दिने
काठमाडौँ । सैनिक कल्याणकारी कोष र प्रभु बैंकबीच सम्पन्न सम्झौता बमोजिम सैनिक सन्तति प्राविधिक शिक्षण सहुलियत कर्जा, २०७५ औपचारिक रुपमा कार्यान्वयनमा आएको छ । आइतबार जंगी अड्डामा आयोजित एक कार्यक्रममा प्रधानसेनापति पुर्णचन्द्र थापा र प्रभु बैंक लि.का प्रमुख कार्यकारी अधिकृत अशोक शेरचनले सैनिक सन्ततीलाई प्रभु बैंकद्धारा स्वीकृत प्राविधक शिक्षण सहुलियत कर्जाको चेक संयुक्त रुपमा हस्तान्तरण गरी सहुलियत कर्जा कार्यान्वयनको शुभारम्भ गरेका हुन् । नेपाल सैनिकद्धारा सञ्चालित सैनिक सन्तती प्राविधिक शिक्षण सहुलियत कर्जा, २०७५ कार्यान्वयनका लागि सैनिक कल्याणकारी कोष र प्रभु बैंकबीच यसअघि नै सम्झौता भएको थियो । सम्झौता अनुसार सैनिक कल्याणकारी कोषको सिफारिसमा बहालवाला तथा अवकास प्राप्त सैनिकहरुका छोराछोरीहरुलाई स्वदेश तथा विदेशमा प्राविधिक विषय अन्तर्गत चिकित्साशास्त्र, ईन्जिनियरिङ्ग, सूचनाप्रविधि, कृषि र पशु विज्ञानतथावनविज्ञान संकायमा स्नातक वा सो भन्दा माथिल्लो तहको शिक्षा हासिल गर्नका लागि प्रभु बैंकले आवश्यक प्रक्रिया पूरा गरी शैक्षिक कर्जा सुविधा उपलब्ध गराउने भएको हो । सम्झौता बमोजिम यो शैक्षिक कर्जा सुविधा रकम सहुलियतपूर्ण ब्याजदरमा अधिकतम् रु. २५ लाख सम्मको हुनेछ । शैक्षिककर्जा सुविधा प्रभु बैंक लि.को बबरमहलस्थित मुख्य शाखा कार्यालय लगायत यो कर्जा सुविधा उपभोग गर्न चाहने सैनिक सन्ततीहरुलाई पायक पर्ने बैंकको जुनसुकै शाखा कार्यालयबाट झण्झटरहित तबरले प्राथमिकताका साथ उपलब्ध हुनेछ ।
नेप्से परिसूचक झण्डै दोहोरो अंकले बृद्धि, कारोबार रकमपनि बढ्यो
काठमाडौ । साताको पहिलो दिन दोहोरो अंकले बढेको नेप्से परिसूचक दोस्रो दिन सोमबार पनि उकालो लागेको छ । सोमबार नेप्से परिसूचक ९.३२ अंकले बढेको हो । ०.७९ प्रतिशतले बढ्दा नेप्से परिसूचक ११९१.६८ बिन्दुमा पुगेको छ । सेयर बजारमा १७० कम्पनीले सेयर कारोबार गरेका छन् । २९ लाख ५१ हजार ४ सय ७८ कित्ता सेयर खरिद बिक्री हुँदा ९० करोड ६९ लाख ३६ हजार ७ सय ६३ रुपैयाँको कारोबार भएको छ । बजार बढेको दिन नेप्सको ८ समूह हरिया देखिए भने २ समूह राताम्मे भए । बैंक समूह ४.९८, विकास बैंक समूह १.८३, जलविद्युत समूह ०.६९, वित्त समूह १.२७, निर्जीवन बीमा समूह १५३.७, उत्पादनमूलक समूह ०.३१, लघुवित्त समूह ३६.५१ र जीवन बीमा समूह १६७.५ अंकले बढेका छन् । होटल समूह ५.५ र अन्य समूह २.५६ अंकले घटेका छन् । सम्मीट माइक्रो फाइनान्स डेभलपमेण्ट बैंकका लगानीकर्ताले ९.८४ प्रतिशतले सबैभन्दा धेरै नाफा आर्जन गरे भने राधी विद्युत कम्पनी लिमिटेडका लगानीकर्ताले ४.५७ प्रतिशतले सबैभन्दा धेरै घाटा व्यहोरेका छन् ।
कामना सेवाका ग्राहकलाई साहारा हस्पिटलमा विशेष छुट
काठमाडौँ । कामना सेवा विकास बैंक लिमिटेड र साहारा हस्पिटल प्रा. लि पोखराबीच विशेष छुट पाउने गरी सम्झौता पत्रमा हस्ताक्षर भएको छ । सम्झौता अनुसार अब यस बैंकका सम्पूर्ण खातावाला, कर्मचारी साथै उनीहरुका परिवारका अन्य सदस्यहरुले साहारा हस्पिटल प्रालिमा उपचार गराउँदा तथा औषधी खरिद गर्दा विशेष छुट पाउने छन् । सम्झौतासँगै बैंकको व्यवसाय प्रवद्र्धनमा सहयोग पुग्नुका साथै ग्राहकहरु लाभान्वित हुने बैंकले जनाएको छ । सम्झौता पत्रमा कामना सेवा विकास बैंकको तर्फबाट डिपोजिट एण्ड ट्रान्जेक्सन बैकिङ्गका प्रमुखसुवास भट्टराई र साहारा हस्पिटल प्रालिको तर्फबाट संचालक समितिका अध्यक्ष डा. गिरीधारी शर्माले हस्ताक्षर गरेका छन् ।
सिटिजन्स बैंकको नायब प्रमुख कार्यकारी अधिकृतमा बोधराज देवकोटा नियुक्त
काठमाडौँ । सिटिजन्स बैंक इन्टरनेशनल लिमिटेडको नायब प्रमुख कार्यकारी अधिकृतमा बोधराज देवकोटा नियुक्त भएका छन् । आइतबार बसेको सञ्चालक समितिको बैठकले हाल सहायक प्रमुख कार्यकारी अधिकृतको रूपमा कार्य सम्पादन गर्दै आएका देवकोटालाई २०७६ साल बैशाख १ गते बाट लागु हुने गरी नायब प्रमुख कार्यकारी अधिकृतमा नियुक्त गर्ने निर्णय गरेको हो । बैंकको प्रमुख कार्यकारी अधिकृत पदमा हालै गणेशराज पोखरेल नियुक्त भएपछि नायव प्रमुख कार्यकारी अधिकृत पद रिक्त भएको थियो । नव नियुक्त नायब प्रमुख कार्यकारी अधिकृत देवकोटाले स्थापनाकाल देखि नै बैंकसंग आबद्ध भई विभिन्न पदमा रही नेतृत्वदायी भूमिका निर्वाह गर्दै आएका छन् । बैंकिङ क्षेत्रमा एक अनुभवी बैंकरका रूपमा परिचित देवकोटाले काठमाडौँ विश्व विद्यालयबाट वित्त व्यवस्थापनमा एमफिल तथा त्रिभुवन विश्व विद्यालयबाट वित्त व्यवस्थापन विषयमा स्नातकोत्तर गरेका छन् । यस बैंकमा आबद्ध हुनु अघि उनले नेपाल बैंक लिमिटेडमा महत्वपूर्ण ओहदामा रही आफ्नो कार्यकुशलता प्रदर्शन गरिसकेका छन् । उनीसँग बैंकिङ क्षेत्रमा २३ वर्षको अनुभव छ ।
पाँच ओटा बैंकहरुको निक्षेप घट्यो, धेरै निक्षेप घटाउनेमा ‘ठूला बैंकहरु’ नै अगाडि
काठमाडौं । सबैभन्दा धेरै निक्षेप उठाउने दुई वाणिज्य बैंकहरुको निक्षेप घटेको छ । सरकारी लगानीको राष्ट्रिय वाणिज्य बैंक र निजी क्षेत्रको एनआईशी एशिया बैंकको निक्षेप फागुन महिनामा क्रमशः ३ अर्ब र सवा ६ अर्ब रुपैंयाले घटेको हो । माघ मसान्तमा १ खर्ब ८१ अर्ब रुपैंया रहेको राष्ट्रिय वाणिज्य बैंकको निक्षेप घटेसँगै निक्षेप आकार १७८ अर्बमा झर्दा एनआईशी एशियाको निक्षेप १ अर्ब ७६ करोड रुपैंयाबाट करिब १ अर्ब ७० करोड रुपैंयामा झरेको हो । निक्षेपको गिरावटका बाबजुद पनि ती बैंकहरु निक्षेप संकलन गर्ने वाणिज्य बैंकहरुको सूचीमा पहिलो र दोस्रो नम्बरमै छन् । ती बैंकहरुबाहेक सञ्चालनमा रहेका २८ वाणिज्य बैंकहरुमध्य अन्य ३ वाणिज्य बैंकहरुले फागुन महिनामा निक्षेपको आकार घटेको छ ।े नेपाल एसबीआई बैंक, एभरेष्ट बैंक र मेगा बैंकको समेत उक्त अवधिमा निक्षेपको आकार घटेको छ । नेपाल राष्ट्र बैंकको फागुन मसान्तको वित्तीय अवस्थामा आधारित तथ्याङ्क अनुसार बाँकी २३ बैंकहरुमध्ये २२ बैंकहरुको निक्षेप बढेको भए पनि सानिमा बैंकको निक्षेपमा भने कुनैपनि वृद्धि नभएको देखाइएको छ । नेपाल एसबीआई बैंकको २ अर्ब ४३ करोड, एभरेष्ट बैंकको ७३ करोड र मेगा बैंकको ३५ करोड रुपैंयाले निक्षेप घट्न पुगेको हो । निक्षेप बढाउने बैंकहरुमा भने सिद्धार्थ बैंक सबैभन्दा अघि देखिएको छ । सिद्धार्थले एक महिनामा ३ अर्ब २२ करोडले निक्षेप बढाएको छ भने त्यसपछि हिमालयन बैंकले २ अर्ब ८२ करोड, एनएमबि बैंकले २ अर्ब ५८ करोड, लक्ष्मी बैंकले २ अर्ब ५४ करोड, प्राइमले २ अर्ब १८ करोड, स्ट्यान्डर्ड चार्टर्ड बैंकले २ अर्ब ११ करोडले निक्षेप घटेको छ । त्यसैगरी कुमारी बैंकले १ अर्ब ५१ करोड तथा नेपाल इन्भेष्टमेन्ट बैंकले १ अर्ब ३५ करोड निक्षेप बढाउँदा बाँकी १२ ओटा बैंकहरुको भने १ अर्ब रुपैंयाभन्दा कममात्र निक्षेप बढेको छ । फागुन महिनामा निक्षेप घटेका सबै बैंकहरुले माघ महिनामा भने निक्षेप बढाएका थिए भने माघमा निक्षेप घटाएका वाणिज्य बैंकहरुको ९ वाणिज्य बैंकहरुको निक्षेप घटेकोमा सबै बैंकहरुले फागुन महिनामा निक्षेको आकारमा सुधार गरेका थिए ।
सरकार आर्थिक क्रान्तिका लागि जस्तो सुकै कदम चाल्न तयार छः प्रधानमन्त्री
काठमाडौँ । प्रधानमन्त्री केपी शर्मा ओलीले मुलुकमा आर्थिक क्रान्ति गर्नका लागि जस्तो सुकै कदम चाल्न सरकार तयार गरेको बताएका छन् । उनले भने-‘देशमा औद्योगिक वाताबरण बनाउन ऐन कानून संसोधन/परिमार्जन गर्न सरकार तयार छ ।’ नेपाल उद्योग परिसंघको १६ औँ साधारण सभालाई सोमबार राजधानीमा संबोधन गर्दै प्रधानमन्त्री ओलीले यस्तो कुरा बताएका हुन् । उद्योग क्षेत्रको प्रवद्र्धन र आर्थिक क्रान्तिलाई अघि बढाउने सवालमा नेपाल उद्योग परिसंघ, नेपाल उद्योग बाणिज्य महासंघ जस्ता निजी क्षेत्रका संघसंस्थासँग सहकार्य गर्न सरकार तयार रहेको उनले बताए । देशले अभाव र समस्य झेल्दै आएका बताउँदै विगतमा जनता निराश भएपनि अब आशावादी बन्दै गएको उनको भनाई थियो । मुलुकको संविधान, कानून, नियम बदल्न सकिने बताउँदै उनले भने–मुलुकमा विकासको लहर सिर्जना गर्न निजी क्षेत्रपनि उत्साहित भएर अघि बढ्नु पर्छ । आगामी ४ वर्षमा आर्थिक क्रान्तिको माध्यमबाट मुलुकका नागरिकलाई निरपेक्ष गरीबी रेखाबाट माथि उकास्ने उनले बताए । उक्त कार्यक्रममा अर्थमन्त्री डा. युवराज खतिवडाले निजी क्षेत्रका संघसंस्थाहरुलाई एक हुन आह्वान गरे । भर्खरै सकिएको लगानी सम्मेलनबाट सरकार उत्साहित भएको बताउँदै अर्थमन्त्री खतिवडाले अब काम गर्ने बेला आएको बताए । कार्यक्रममा उद्योगी तथा सांसद विनोद चौधरीले आर्थिक क्षेत्रलाई अगाडि बढाउन सबै क्षेत्र सकारात्मक हुँदा समेत सरकारले सोचेजति काम गर्न नसकेको बताए । परिसंघका अध्यक्ष हरिभक्त शर्माको अध्यक्षतामा साधारण सभा उद्घाटन भएको हो । सो अवसरमा अध्यक्ष शर्माले अहिलेको सरकराले पनि काम गरेन भने देश पछाडि पर्ने बताए । उनले भने-देशलाई अघि बढाउका लागि उद्योगीहरुले अबिभावक खोजि रहेका थिए, अहिले देशमा स्थिर सरकार बनेको छ, यो सरकारले पनि काम गर्न सकेन भने देश पछि पर्छ । अध्यक्ष शर्माले मेरो बुवाको पालाको कानुन खारेज गरेर नयाँ कानुन बनाउन आवश्यक छ रहेको बताए । बिश्व बजारसग प्रतिस्पर्धा गर्न प्रविधि चाहिएको छ । सबै मिलेर काम गर्यौँ भने मुलुक बन्न धेरै समय लाग्दैन-उनले भने ।
