टोयोटा र सफ्टबैंकले अमेरिकी कम्पनी उबेरमा एक अर्ब लगानी गर्ने, चालकबिहीन कार बनाउँदै
टोकियो । जापानको प्रमुख कार निर्माता कम्पनी टोयोटा र सफ्टबैंक भिजन फन्डले अमेरिकी सवारी कम्पनी उबेरमा एक अर्ब अमेरिकी डलर लगानी गर्ने शुक्रबार घोषणा गरेका छन् । टोयोटाले यसअघि नै उबेरमा ५० करोड डलर लगानी गरिसकेको छ । गुगलको स्वामित्वमा रहेको वाइमो र अरु प्रमुख कार निर्माता कम्पनीहरुले पनि चालकबिहीन कार निर्माणलाई तिब्रता दिएका छन् । पछिल्लो लगानी उबेरको स्वामित्वमा रहेको एडभान्स्ड टेक्नोलोजिज ग्रुपमा हुनेछ । यस समूहले स्वचालित र चालकबिहीन कार निर्माणको आधार तयार गर्नेछ, कम्पनीद्वारा जारी विज्ञप्तिमा उल्लेख छ । कूल एक अर्ब डलर लगानीमध्ये कारका पार्टपूर्जा निर्माता डेन्सो सहित टोयोटाका तर्फबाट ६६ करोड ७० लाख डलर र सफ्टबैंकका तर्फबाट ३३ करोड ३० लाख लगानी हुनेछ । उबेरमा यसअघि नै सफ्टबैंकको १६ प्रतिशत लगानी रहेको छ । उबेरका प्रमुख कार्यकारी डारा खोस्रोशाशीले चालकबिहिन कारले यातायात क्षेत्रलाई रुपान्तरण गर्ने बताउँदै यसबाट हाम्रा सडकहरु बढी सुरक्षित र शहरहरु बस्नयोग्य हुने दाबी गरे । गत साता उबेरले प्रारम्भिक शेयर जारी गर्नेसम्बन्धी कागजात अमेरिकी सेक्युरिटिज एन्ड एक्सचेन्ज आयोगमा बुझाइसकेको छ । उबेरले आयोग समक्ष बुझाएको कागजातमा छ वटा महादेशमा झण्डै प्रतिदिन एक करोड ४० लाख पटक उबेरका सबारी साधन प्रयोग हुने र सन् २०१० यतामात्र १० अर्बभन्दा बढी मानिसले कार प्रयोग गरेको उल्लेख छ । रासस/एएफपी
बैँकले उत्पादनशील क्षेत्रमा लगानी गर्नुपर्छः अर्थमन्त्री
विराटनगर । अर्थमन्त्री डा. युवराज खतिवडाले विकासका साझेदार बैंकले व्यवसायिक र सामाजिक उत्तरदायित्व बहन गर्नु पर्ने बताएका छन् । नेपाल बैंक लिमिटेड प्रादेशिक कार्यालय प्रदेश नं-१ द्वारा आज आयोजित कृषिलगायत सहुलियत कर्जा वितरण समारोहमा ऋणीलाई ऋण वितरण गर्दै उनले उत्पादनशील र पूँजी निर्माण हुने क्षेत्रमा बैँकले लगानी गर्नुपर्छ भने । ‘‘बैंकले आफ्नो कारोबार बढाउनुपर्छ र यसैबाट पूँजीको चलायमान हुन्छ’’, मन्त्री खतिवडाले भने ‘‘व्यवसायी र बैंक दुबै सँगै अगाडि बढ्नसके सफलता प्राप्त गर्न सकिन्छ ।’’ उनले समयको प्रतिस्पर्धामा नेपाल बैंक लिमिटेडलाई लैजानुपर्ने सुझाव दिए । बैंक सञ्चालक समितिका अध्यक्ष वासुदेव अधिकारीले रोजगार तथा आयमूलक व्यवासाय सञ्चालन गर्नेलाई बैंकले सक्दो सहयोग गर्ने प्रतिबद्धता व्यक्त गरे । ऋणि सुधा पासवान र विनोद अधिकारीले बैंकको लगानीबाट हाम्रो व्यवसाय दिनप्रतिदिन मौलाउँदै गएकोमा खुशी व्यक्त गरिन् । कार्यक्रममा महिला उद्यमशीलता, कृषि तथा पशुपक्षी व्यवसाय गर्ने नौ जनालाई रु १० लाखदेखि रु १५ लाखसम्मको कर्जा वितरण गरियो ।
सरकार र निजी क्षेत्र मिलेर देशलाई आर्थिक समृद्धिमा लानु पर्छः उद्योगमन्त्री
काठमाडौं । उद्योग, वाणिज्य तथा आपूर्ति मन्त्री मातृका यादवले शुक्रबार पश्मिना उद्योग संघको १८ औं साधारण सभाको उद्घाद्टन गरेका छन् । सो अवसरमा उनले उत्पादन नै कम भएको देशमा ‘निर्यात बृद्धि, नेपालको आर्थिक सम्बृद्धि’ मूल नारा राखेर साधारण सभा सुरु गरेको नेपाल पश्मिना उद्योग संघलाई निर्यात भन्दा पनि उत्पादनमा जोड दिन अनुरोध गरे । उनले उद्योगीहरुले कारोबार भएको सबै हिसाब सरकारलाई नदेखाउने बताए । सरकारले उद्योगीहरुको कुरा सुने पछि उद्योगीहरुले पनि सरकारको कुरा सुनु पर्ने बताए । उद्योगीहरुले श्रमिकहरुकै कारणले आफु उद्योगी भएको आत्मसाथ गर्नु पर्ने बताए । नेपालको उद्योग क्षेत्रमा ७० प्रतिशतभन्दा धेरै निजी क्षेत्रको लगानी रहेकाले सरकार र निजी क्षेत्र मिलेर देशलाई आर्थिक सम्बृद्धिमा लानु पर्ने यादवले बताए । नेपाल उद्योग वाणिज्य महासंघका उपाध्यक्ष चन्द्र ढकालले सरकारले निजी क्षेत्रलाई दोस्रो दर्जाको रुपमा हेरिरहेको बताए । सरकारले निजी क्षेत्रसँग सहकार्य गरेर मात्रै देशमा आर्थिक सम्बृद्धि आउने बताए । नेपाल पश्मिना उद्योग संघका अध्यक्ष दुर्गाविक्रम थापाले नेपालको पश्मिना भनेर नक्कली पश्मिना बजारमा आएकोले पश्मिना ओझेलमा परेको बताए । नेपालबाट कूल ८५ अर्बको सामान निर्यात हुनेमा ३ अर्ब पश्मिना नै निर्यात हुने गरेको थापाले बताए ।
नबिल इन्भेष्टमेन्ट ब्यालेन्स फण्ड २ मा पहिलो दिनमै २३ करोडको आवेदन
काठमाडौं । नबिल इन्भेष्टमेन्ट ब्यालेन्स फण्ड २ मा पहिलो दिन मै २३ करोड रुपैयाँ बराबरको आवेदन परेको छ । नबिल बैंकको सहायक कम्पनी नबिल इन्भेष्टमेन्ट बैंकिंग लिमिटेड-नबिल इन्भेष्टले बिहीबारदेखि सार्वजनिक गरेको इकाईमा मात्र एक दिनमा सो मात्राको आवेदन परेको हो । नबिल इन्भेष्टका प्रमुख कार्यकारी अधिकृत सबिर बाँदे श्रेष्ठका अनुसार बिहीबार एक दिनमा ४ हजार ३६२ जनाले कूल २३ करोड रुपैयाँ बराबरको माग गरेका बताएका छन् । नबिल इन्भेष्टले वैशाख ५ गते अर्थात बिहीबारदेखि १२ करोड इकाई सर्वसाधारणका लागि निष्काशन गरिरहेको छ । इन्भेष्टले आफ्नो तेश्रो योजना अन्तर्गत प्रतिइकाई १० रुपैयाँ अंकित दरमा एक अर्ब २० करोड रुपैयाँ बराबरको फण्ड बिक्री गरिरहेको छ । इच्छुक लगानीकर्ता(व्यक्ति तथा संस्था)ले यस योजनामा न्युनतम एक हजारदेखि १२ करोड रुपैयाँसम्म लगानी गर्न सक्नेछन् । लगानीकर्ताले छिटोमा वैशाख ९ गते भित्र आवेदन दिन सक्नेछन् । लगानीकर्ताहरुले अन्य धितोपत्र बिक्री गरेजस्तै गरी आफ्नो सी आश्वा खाता रहेको बैंक वा मेरो सेयरमा लगइन गरी अनलाईन आवेदन गर्न सक्ने छन् । यो एक बन्दमुखी योजना हो जसको आकार एक अर्ब २० करोड रुपैयाँ रहेको छ । जसको अवधि १० वर्षको रहेको छ ।नबिल इन्भेष्टमेण्ट बैंकिंगले यस अघि नबिल ब्यालेन्स फण्ड १ र नबिल इक्विटी फण्ड सञ्चालनमा ल्याइसकेको छ । नबिल ब्यालेन्स फण्ड २ को मूख्य उद्देश्य प्रचलित सामूहिक लगानी कोष नियमावली एवं निर्दे्शिकाको अधिनमा रही इकाई बिक्रीबाट उठेको वा संकलन भएको रकमलाई विविध क्षेत्र र उपकरणहरुमा जोखिम न्युनीकरण गर्दै लगानी गरी सोबाट आर्जन भएको मुनाफा इकाई धनीहरुलाई वितरण गर्नु रहेको संस्थाले जनाएको छ ।
बस बिसौनी बनाउन सिटिजन्स बैंकले गर्यो सहयोग
काठमाडौँ । सिटिजन्स बैंक इन्टरनेसनल लिमिटेडले सैंबु आवास क्षेत्र उपभोक्ता समितिलाई आवास क्षेत्रमा बस बिसौनी निर्माण गर्न आर्थिक सहयोग प्रदान गरेको छ । शुक्रबार एक कार्यक्रमबीच यस बैंकका प्रमुख कार्यकारी अधिकृत गणेशराज पोखरेल तथा समितिका अध्यक्ष विवेक कार्कीले संयुक्त रूपमा उक्त बस बिसौनीको उद्घाटन गरेका हुन् । उक्त क्षेत्रमा बसोवास गर्ने नागरिकलाई सहज हुने विश्वास बैंकले लिएको छ । सो कार्यक्रममा बोल्दै बैंकका प्रमुख कार्यकारी अधिकृत पोखरेलले बैंकले स्थापनाकाल देखिनै सामाजिक रूपान्तरणका लागि कार्य गर्ने संस्थालाई आर्थिक सहयोग उपलब्ध गराउँदै आएको जानकारी गराए । समितिका अध्यक्ष कार्कीले बैंकले गरेको सहयोग प्रति आभार व्यक्त गर्दै बैंकको आर्थिक सहयोगमा निर्माण हुने बस बिसौनीबाट उक्त क्षेत्रका स्थानीयवासी लाभान्वित हुने विश्वास व्यक्त गरे ।
बक्यौता रकम नतिर्दै नयाँ विमान दर्ता, ‘पदाधिकारीलाई जिम्मेवार बनाई कारवाही गर्नुपर्छ’
काठमाडौं । नेपाल नागरिक उड्डयन प्राधिकरण(क्यान) का कार्यकारी निर्देशकले नियम विपरित नयाँ विमान दर्ता गरेको आरोप लागेको छ । नेपाल नागरिक उड्डयन प्राधिकरणलाई तिर्नुपर्ने रकम बक्यौता हुँदाहुँदै सम्बन्धित कम्पनीले ल्याएका नयाँ जहाजहरु कार्यकारी निर्देशकले दर्ता गरिदिएको आरोप संवैधानिक निकायले लगाएको हो । महालेखा परीक्षकको कार्यालयका अनुसार २०७४/७५ मा दर्ता भएका नयाँ जहाजहरुमध्ये ७ ओटा कम्पनीले सरकार वा प्राधिकरणलाई करिब ३ करोड ५० लाख लाख भन्दा बढी रकम तिर्न बाँकी रहेको अवस्था थियो । नेपाल नागरिक उड्डयन नियमावली २०५८ को नियम ८ ले त्यसरी बक्यौता हुँदाहुँदै नयाँ यान दर्ता गर्न नमिल्ने व्यवस्था गरे पनि जिम्मेवार पदाधिकारीले नियमको परिपालना नगरेको भन्दै सोही पदाधिकारीलाई जिम्मेवार बनाई उक्त रकम असुल उपर गर्न भनेको हो । नियमावलीले पदाधिकारी भन्नाले यान दर्ताको जिम्मेवारी महानिर्देशकलाई तोकेकोले महालेखाले तत्कालीन महानिर्देशकलाई नै जिम्मेवार बनाउने आशय महालेखाले व्यक्त गरेको हो । प्राधिकरणले भने प्रतिवेदनमा उल्लेखित धेरैजसो कम्पनीहरुको बक्यौता उठिसकेको र सो रकम ठूलो नभएको जनाएको छ । ‘एयरलाइन्स कम्पनीहरुले प्राधिकरणलाई करोडौं शुल्क बुझाउँछन्, बुझाइरहेका छन् । ७ ओटा विमान कम्पनीको साढे ३ करोड बक्यौता भनिएको छ, त्यो ठूलो रकम होइन, त्यसमाथि धेरैजसोले त्यो रकम तिरिसके । महालेखाले कमेन्ट गर्नु स्वाभाविक होला, तर क्यानको लागि यो ठूलो विषय होइन ।’-क्यानका उप महानिर्देशक राजन पोखरेलले विकासन्यूजसँग भने । महालेखाको प्रतिवेदनमा सीता, तारा, बुद्ध, डायनेष्टि, यति, श्री र समिट एयरलाइन्सले १ लाख ८१ हजार रुपैयाँदेखि १ करोड ८८ लाख रुपैयाँसम्म बक्यौता बाँकी रहेको अवस्थामा नयाँ यान दर्ता गरिदिएको उल्लेख गरिएको छ । त्यसमा सबैभन्दा बढी बुद्ध र सबैभन्दा कम डाइनेष्टिको बक्यौता रहेको उल्लेख छ । सञ्चालनमा रहेका एयरलाइन्सहरुको रकम निरन्तर क्यानलाई गैरहेकाले २-३ करोड सम्मको बक्यौता रकम ठूलो मान्न नहुने वायु सेवा सञ्चालक संघका प्रवक्ता घनश्यामराज आचार्यले बताए ।
देवः विकास बैंकले साढे ५ प्रतिशत बोनस दिने
काठमाडौं । देवः विकास बैंक लिमिटेडले सेयरधनीलाई ५.५ प्रतिशत बोनस सेयर दिने भएको छ । विकास बैंकले सेयरधनीलाई हालको चुक्ता पुँजीको सो मात्रा बोनस सेयर वितरण गर्ने प्रस्ताव गरेको हो । उक्त प्रस्ताव हालै बसेको विकास बैंक सञ्चालक समितिको बैठकले गरेको हो । बैठकको निर्णयलाई नेपाल राष्ट्र बैंकले स्वीकृति तथा संस्थाको आगामी वार्षिक साधारणसभाले पारित गर्नुपर्ने छ । हाल बैंकको चुक्ता पुँजी २ अर्ब ५३ करोड रुपैयाँ रहेको छ । ५.५ प्रतिशत बोनस सेयरपछि विकास बैंकको चुक्ता पुँजी २ अर्ब ६७ करोड ३० लाख रुपैयाँ पुग्ने छ । पछिल्लो समय संस्थाको सेयर मूल्य प्रतिकित्ता १२९ रुपैयाँ रहेको छ ।
पञ्चकन्या ग्रुपले १७५ जनालाई दियो प्लम्बिङ तालिम
काठमाडौँ । पञ्चकन्या ग्रुपद्वारा सेकीसुई, जापान र स्टारलाईन ईन्टरप्राइजेज, भारतको सहकार्यमा २ दिने विषेश प्लम्बिङ तालिम विहीवार सम्पन्न भएको हो । उक्त तालिममा १७५ जना सहभागी भएको र त्यसमा ४ जना महिलाले समेत संलग्नता जनाएका थिए । नेपालमा यस किसिमको तालिमदिने पहिलो निजी कम्पनी पञ्चकन्या ग्रुपले सर्वप्रथम प्रारम्भिक प्लम्बिङ तालिम दिइएकोे र यस कम्पनीले जापानको प्रख्यात कम्पनी सेकीसुइ र स्टारलाईन ईन्टरप्राइजेज, भारतका दक्ष, अनुभवी तथा प्रोफेशनल प्रशिक्षकद्वारा सहभागीहरुलाई प्रशिक्षण दिएको थियो । देशका बेरोजगार युवायुवतीहरुलाई सिपमुलक बनाएर आफ्नै देशमा आम्दानी गर्नको लागि वातावरण सिर्जना गर्नु तालिमको उद्देश्य रहेको कम्पनीले जनाएको छ ।
