जुकरबर्गलाई फेसबुकबाट हटाउने प्रयास विफल, अध्यक्ष र प्रमुख कार्यकारी अधिकृत दुबै जिम्मेवारी
सान फ्रान्सिस्को । मार्क जुकरबर्गलाई फेसबुकको अध्यक्षमा पुनः चयन गरिएको छ । यससँग फेसबुकका कतिपय लगानीकर्ताले उनलाई फेसबुक सञ्चालक समितिको अध्यक्ष र प्रमुख कार्यकारी पदमा रहँदा यसका गतिविधिलाई हेर्न समस्या भएको र यसका कारण फेसबुकको साखमा समस्या आउनसक्ने विचार राख्दै अध्यक्ष पद छाड्न सुझाब दिएका थिए । फेसबुकको वार्षिक साधारणसभामा गत बिहीवार भएको थियो । साधारण सभाल जुकरबर्ग प्रमुख कार्यकारी अधिकृत तथा सञ्चालक समितिका अध्यक्ष दुवै रहिरहने गरी अनुमोदन गरेको हो । फेसबुकमा जुकरबर्गको ६० प्रतिशत शेयर छ र उनले मतदानमा आफैँले आफूविरुद्ध मत हालेको भए मात्रै हार्ने सम्भावना रहेको थियो । साधारणसभाको परिणामले जुकरबर्ग थप समय पनि दुबै जिम्मेवारी सम्हाल्न तयार रहेको देखिएको छ । जकर्बर्गलाई अध्यक्षबाट हटाउने खोज्ने लगानीकर्ताहरूमध्येका एक ७० लाख डलर बराबरको शेयर भएको ट्रिलियम एसेट म्यानेजमेन्ट पनि हो । “संसारको एउटा विशाल कम्पनीमा अहिले जुकरर्बर्गले दुईवटा महत्वपूर्ण पद ओगट्ने भएका छन् । यदिे प्रमुख कार्यकारी अधिकृतको भूमिकामा केन्द्रित भएर अरूलाई स्वतन्त्रतापूर्वक सञ्चालक समितिको अध्यक्षता गर्न दिए त्यो धेरै राम्रो स्थिति हुन्छ,“ ट्रिलियमका वरिष्ठ उपाध्यक्ष जोनस क्रोनले भने । तर जुकरबर्गले गत अप्रिलमा आफ्नो नेतृत्वको बचाउ गर्दै भनेका थिए,“हामीले त्रुटिबाट सिकेका छौँ कि छैनौँ त्यसबाट मानिसहरूले हामीलाई उत्तरदायी बनाउनुपर्छ भन्ने मलाई लाग्छ।” उनले साधारण सभापछि संछिप्त प्रतिक्रिया दिँदै भने “अबका दिनमा फेसबुकले आफ्ना प्रयोगकर्ताहरूको तथ्याङ्कलाई थप गोप्य बनाउने प्रयास गर्नेछ ।” एजेन्सी
पबी गुरुङले बनाईन १ लाख अनुहारलाई सुन्दर, दक्षिण कोरियाकाे उपचार पद्धतिक
काठमाडाैं । नेपालमा छाला रोगको अत्याधुनिक कस्मोटोलोजी उपचार पद्धति दक्षिण कोरियाबाट नेपाल भित्रयाउने पहिलो महिला बनेकी छिन, पबी गुरुङ । त्यसो त नेपालमा डरमाटोलोजी विधिबाट धेरै अघि देखि छाला रोग उपचार हुँदै आएको छ । तर अत्याधुनिक कस्मोटोलोजी उपचार प्रक्रियाबाट अनुहारको चांया,पोतो,दाद त्यस्तै बढ्दो उमेर तथा आमा बनी सकेका महिलाका अनुहारमा देखिने दाग लेजर थेरापी प्रयोग गरी सजिलै हटाउने उपचार शैली पबीले शुरुवात गर्न सफल भएकी हुन् । लेजर थेरापीलाई उपचार प्रक्रिया मध्ये विश्वमा उत्कृष्ट र सुरक्षित मानिन्छ । सन २००३ मा दक्षिण कोरियाका प्रसिद्ध मेडिकल कलेज चाउ भीउबाट दुई वर्षे कस्मोटोलोजी उपचारका शैधान्तीक अध्ययन र प्रयोगात्मक तालिम लिएकी छिन् । त्यस पछि सन् २००६ देखी नेपालमा कोरियन स्किन केयर पार्लर सञ्चालन गरी हाल सम्म करिब १ लाख अनुहारलाई झन सुन्दर बनाउन सफल भएको अनको दाबी छ । सक्रिय र सृजनशील कार्यलाई सधैँ पछयाउने बानीले गर्दा उनको पार्लरमा महिलाहरूको लामो लाइन लाग्ने गर्दछ । जस कारण आज सम्म पार्लर चलाउन विज्ञापनको सहारा लिनु परेको छैन । विशेष गरी याहां डण्डीफोर, कम्बीनेशन केयर, पोर्स केयर र स्किन एलर्जी जस्ता रोगको सफल उपचार हुने गर्दछ । पबीका अनुसार अनुहारको छालामा पानीको मात्रा १० देखि २० प्रतिशत त्यस्तै लिपिङ नामक तत्व ११ प्रतिशत हुन जरुरी छ , यसबाट छाला सधैँ चम्किलो र उज्यालो देखिन गर्दछ । तर यदि नेचुरल मोस्चराईजर फयाकटर ३१ प्रतिशत भन्दा कम भएमा छाला चाउरी पर्दछ । जसलाई कस्मोटोलोजी उपचारबाट हेरचाह गरी रहर लाग्दो अनुहारमा फर्काउन सहयोग पुग्छ । उपचारमा प्रयोग गरिने सौन्दर्य प्रोड्कटस विश्व स्वास्थ्य सगंठनले गुणस्तर स्वीकृत गरेका उत्पादन मात्र प्रयोग गरिने भएकोले अन्य साइड इफेक्ट नहुने उनले दाबी गरेकी छिन् । छालामा विभिन्न समस्या देखिए प्राय सहरी महिला इन्टरनेट, युट्युब र सामाजिक सञ्चालमा देखिाइएका व्युटि प्रोडक्टस प्रयोग गर्दछन् । त्यस्ता उत्पादनले अनुहारको बाहिरी छाला फ्याँकी दिने गर्दछ । अनुहारको भित्रबाट पलाउने नरम छाला पूर्ण विकास हुनको लागि २८ दिन लाग्दछ । त्यस क्रममा घामको कडा किरणले त्यो कलिलो छालालाई असर पु¥याईदिने गर्दछ , फलस्वरुप अनुहार कुरूप देखिन्छ । त्यस कारण व्युटि प्रोडकट प्रयोग गर्दा प्रयोगशालामा गुणस्तर प्रमाणीकरण गरिएको वा विश्व स्वास्थ्य सगठनले समर्थन गरेका उत्पादन प्रयोग गर्न उनले सुझाएकी छिन् ।
एकदिनमै १५०० ले बढ्यो सुनको मूल्य
काठमाडौं । शुक्रबार घरेलु बजारमा प्रतितोला सुनको मूल्य एक हजार पाँच सय रुपैयाँले बढेको छ । बिहीबार ५९ हजार सात सयका कारोबार भएको प्रतितोला सुन शुक्रबार बढेर ६० हजार सात सय रुपैयाँ पुगेको हो । सरकारले आर्थिक विधेयक-२०७६ मार्फत भन्सार मूल्य बढाएको, अन्तर्राष्ट्रिय बजारमा सुनको मूल्य बढेकाका कारण त्यसको असर घरेलु बजारमा परेको नेपाल सुनचाँदी व्यवसायी महासंघका पूर्व अध्यक्ष तेजरत्न शाक्यले बताए । नेपाली रुपैयाँको तुलनामा भारतीय रुपैयाँ कमजोर हुँदा अमेरिकी करेन्सीको दर बढेर एक सय १२ रुपैयाँ पुगेको छ । यसले पनि सुनको मूल्य बढाउन सघाएको उनले बताए । ‘साथै आगामी जुन १० देखि मेक्सिकोबाट अमेरिका आयात हुने सामानमा थप पाँच प्रतिशत भन्सार महसुल बढ्ने निर्णय भएको छ । यसको असर अन्तर्राष्ट्रिय बजारमा देखिन थालेको छ,’ उनले भने ‘५९ हजारको हाराहारीमा रहेको प्रतितोला सुनको मूल्य अब ६१ हजारमा जाने सम्भावना बढेको छ ।’ सरकारले ल्याएको नयाँ व्यवस्थाअनुसार प्रतितोला सुनमा नौ सय ६२ रुपैयाँले भन्सार महसुल बढाएर पाँच हजार आठ सय ३२ रुपैयाँ पुर्याएको छ । यस अघि प्रतितोला सुनमा चार हजार नौ सय भन्सार महसुल लाग्दै आएको थियो । ‘प्रतिदश १० ग्राम सुनमा आठ सय रुपैयाँले भन्सार महसुल बढेको छ,’ उनले भने ‘हामीले १० ग्राम सुनमा एक हजार रुपैयाँ बढाउन र नेपालबाट भारतमा अवैधानिक तवरबाट जाने सुनको ब्यालमार्केट रोक्न भन्सार महसुल बढाउन सुझाव दिएको थियौ । ’ विदेशबाट नेपाल फर्कदा विना महसुल ५० ग्राम सुन ल्याउन पाउने व्यवस्था छ भने त्यसपछिको ५० ग्राम ६ हजार दुई सय भन्सार महसुल तिर्नुपर्छ । अझ बढी सुन ल्याएमा अर्थात त्यसपछि ५० ग्राम सात हजार दुई सय भन्सार महसुल तिर्नु पर्ने नयाँ व्यवस्था सरकारले गरेको छ । अन्तर्राष्ट्रिय बजारमा शुक्रबार प्रतिऔंस सुनको मूल्य १४ डलर डलरले बढेर शुक्रबार एक हजार दुई सय ९२ डलरमा कारोबार भएको छ । यो मूल्य बढेर एक हजार तीन सयसम्म पुग्ने अनुमान पूर्व अध्यक्ष शाक्यले बताए । नेपालमा वार्षिक साढे सात सय किलो सुन खपत हुने गरेको छ । २०५५ सालमा एक हजार पाँच सय किलो सुन खपत हुने गरेमा सरकारले नियन्त्रकारी नीति लिएपछि वार्षिक कारोबार ६ सय किलोसम्म झरेको शाक्यले बताए । हाल दैनिक नेपाली बजारमा ३० देखि ३५ किलो सुन खपत हुने गरेको छ । संसारका चर्चित सुन बजारमध्ये चीन र भारतमा सबैभन्दा बढी सुन खपत हुने गरेको छ । भारतमा वार्षिक १२ सय टन सुनको कारोबार हुन्छ । वैधानिक च्यानलमा चार सय भित्र्याउने व्यवस्था सरकारले मिलाएको छ ।
मन्त्रीज्यू ! टेबुलमा फाइल कति दिन राख्न पाइन्छ ?
काठमाडौं । शुक्रबार संघीय संसदको विकास तथा प्रविधि समितिको बैठकमा निम्तालु थिए, भौतिक पूर्वाधार मन्त्री रघुबिर महासेठ, सचिव देवेन्द्र कार्की, सडक विभागका महानिर्देशक लगायत । पुष्पलाल(मध्य पहाडी) राजमार्ग र हुलाकी राजमार्गमा रुग्ण अवस्थामा रहेका पुलहरु र सार्वजनिक खरिद नियमावलीमा गरिएको संसोधनबारे छलफलको कार्यसूची थियो । सडक विभागका महानिर्देशक केशब शर्माले दुई आयोजनाका रुग्ण पुलको विवरण सुनाए, त्यसपछि सुरु भयो सांसदहरुको जिज्ञासा । त्यस लगत्तै विकास तथा प्रविधि समिति सभापति कल्याणी खड्काले प्रश्न गरिन्–‘मन्त्रीज्यू, आज हामीलाई जान्न मन छ, एउटा फाइल मन्त्री वा कर्मचारीहरुको टेबुलमा कति समयसम्म राख्न मिल्छ, कति समयभित्र टेबुलमा आईपुगेका फाइलहरु माथी निर्णय हुन्छ, त्यसको केहि न केहि कानुनी वा नितिगत व्यवस्था त होला नी ? सभापति खड्काले यस्तो प्रश्न गरेपछि भौतिक पूर्वाधार मन्त्री महासेठ अकमकाए । महासेठले केहि बोल्न खोज्दै गर्दा सभापति खड्का फेरि बोलिन् । उनले अघि थपिन–‘एउटा फाइल मन्त्री, कर्मचारीको टेबुलमा पुगेपछि कति समयभित्र हुन्छ वा हुन्नको जवाफ दिनुपर्ने हो ? हुन्छ भने हुन्छ भन्ने नहुने भए त्यसको कारणसहित फर्काउन कति समय चाहिन्छ, त्यो भन्नु पर्यो ।’ उनले अझै अघि बढेर भनिन–‘एउटा फाइल अड्काएर महिनौं, वर्षाैसम्म हुन्छ पनि नभन्ने हुन्न पनि नभन्ने हाम्रो प्रवृत्ति पनि विकासका लागि बाधक नै हो, आज हामीलाई यसको अन्त्य कहिले हुन्छ भन्ने जवाफ चाहिएको छ ।’ सभापतिको प्रश्न सुनेपछि मन्त्रीले जवाफ दिन सुरु गरे । तर लामो समयसम्म यो प्रशंगमा प्रवेश नै गरेनन् । खड्काले फेरि बिचमै आफ्नो प्रश्न सम्झाइन् । तर, मन्त्रीले ‘कुनै पनि फाइल एक दिन पनि अड्काउन पाइँदैन र अड्काउने गरिएको छैन’ मात्रै भने । बैठकमा सांसद जिपछिरिङ लामाले शक्तिशाली छानविन समिति बनाएर ठेक्का पट्टामा भैरहेका ढिलासुस्ति र अनियमितताको छानविन गर्नुपर्ने माग गरे । उनले निर्माण व्यवसायीलाई मात्रै दोष दिएर सरकार र सरकारी कर्मचारीले आफुलाई दुधले नुहाएको सावित गर्न नसक्ने बताए । ‘प्रधानमन्त्री कार्यालय, विकास समिति, अख्तियार, भौतिक मन्त्रालय, निर्माण व्यवसायी सहभागी शक्तिशाली छानविन समिति गठन गरेर अलपत्र परेका ठेक्काहरुको अध्ययन गरौं, जे निचोड निस्कन्छ त्यसकै आधारमा सबै दोषीलाई कारवाही गरौं’, लामाले भने । उनले विकास निर्माणमा ठेकेदारहरु दोषी भएपनि सरकारी कर्मचारी पनि दोष मुक्त भने नभएको दावी गरे । सांसद गणेशकुमार पहाडीले आयोजना पूर्व तयारीको काम नगरि ठेक्का लगाउँदा ठेकेदार र कर्मचारी दुबैले आयोजना अलपत्र पारेको बताए । अर्का सांसद यज्ञराज सुनुवारले पनि निर्माण व्यवसायीलाई कामचोर बनाउनुमा सरकारी संयन्त्रहरुको पनि भूमिका रहेको आरोप लगाए । बैठकमा मध्य पहाडी राजमार्गका १४ वटा पुलहरुको ठेक्का रुग्ण अवस्थामा पुगेको र हुलाकी राजमार्गका १० वटा पुलका ठेक्का रुग्ण अवस्थामा पुगेको जानकारी गराईएको थियो । समितिले रुग्ण अवस्थामा पुगेका ठेक्काहरुको कार्य सम्पादन योजना तयार पार्न, हुलाकी र मध्य पहाडी सडकको बार्षिक कार्ययोजना चालु आर्थिक बर्षभित्रै तयार पार्न, हिमाल, पहाड र तराईमा निर्माण हुने पुल तथा सडकहरुमा मौसम अनुकुल बनाउन, सोही अनुसारको मापदण्ड र निर्माण सामग्रीको उपयोग गर्न, मध्य पहाडी राजमार्गको राइट अफ वे चालु आव भित्रै एकिन गर्न, सार्वजनिक खरिद नियमावलीको संसोधनपछि तोडिने ठेक्काहरुको कार्यान्वयन योजना बनाउन निर्देशन दिएको छ ।
तमिलनाडूकी निर्मला सीतारमण भारतको अर्थमन्त्रीमा नियुक्त
काठमाडौँ । नयाँ कार्यकालका लागि प्रधानमन्त्रीको सपथ लिएका भारतीय प्रधानमन्त्री नरेन्द्र मोदीले अर्थमन्त्रीका रुपमा निर्मला सीतारमणलाई नियुक्त गरेका छन् । भारतीय जनता पार्टीकी राष्ट्रिय प्रवक्ता सीतारमण यसअघि रक्षामन्त्री रहेकी थिइन् । उनी सन् २०१७ सेप्टेम्बरमा रक्षामन्त्रीमा नियुक्त भएकी थिइन् । रक्षामन्त्री हुनु अघि उनले भारतको बाणिज्य तथा उद्योग तथा बित्त तथा कर्पोरेट मामिला मन्त्री पद सम्हालेकी थिइन् । कहाँकी हुन् सीतारमण ? तमिलनाडुकी सीतारमणले भारत यूरोप टेक्सटाइल ब्यापारमा पिएचडी गरेकी छिन् भने इन्टरनेशनल रिलेशनमा एमफिल समेत गरेकी छिन् । निर्मलाको जन्म तमिलनाडूको एक सामान्य परिवारमा सन् १९५९ अगस्ट १८ तारिखमा भएको थियो । बुबा रेलवेमा जागिरे थिए । पढाईका अवधिमा उनले धेरै ठाउँमा काम पनि गरिन् । पतिसँगै लन्डन पुगेकी उनले त्यहाँ घरको सजावटको सामान बिक्री गर्ने पसलमा सेल्स गर्लका रुपमा काम गरिन् । उनले लन्डनमा प्राइम बाटरहाउस नामक कम्पनीमा सिनियर म्यानेजरका रुपमा पनि काम गरिन् । केही समय बीबीसी विश्वसेवामा समेत काम गरिन् र पछि उनी भारत फर्केकी थिइन् । जेएनयूमा पढाईका क्रममा निर्मला र डा. परकाला प्रभाकरबीच प्रेम भएको थियो, पछि दुबै जनाले विवाह गरे । २००६ देखि भाजपामा आवद्ध सन् २००६ मा भारतीय जनता पार्टीमा आबद्ध भएकी उनी सन् २००३ देखि २००५ सम्म राष्ट्रिय महिला आयोगको सदस्य थिइन् ।
योगदानमा आधारित पेन्सनले कर्मचारीको मनोबल गिराउँछ
काठमाडौं । निजामति कर्मचारी कूल ८० हजार हो । यसमा अधिकृत करिब १४ हजार छन् । प्रशासनको मियो सेवा भनेको निजामति हो । यो सेवाले नै मुलुक हॉक्ने हो मेरूदण्ड बनेर, जसका आधारमा अन्य कर्मचारी सेवाहरू प्रभावकारी ढंगमा नारिने हो । यो सेवा बेस्ट अफ द बेस्ट जनशक्तिले लैस हुनैपर्छ । यस सेवामा आउने जनशक्ति बेस्ट ब्रेन हुनैपर्छ जसलाई आधुनिक प्रविधि , शिक्षा , व्यावस्थापन, दह्रो देशभक्ति, स्वच्छ चरित्रवान, ईमान र जागरूकताका दृष्टिले निरन्तर अपडेटेड र विश्वका समकालिन कुशल प्रशासकहरूसंग नजरमा नजर जुधाएर ससम्मान आत्मविश्वास र गौरव गर्दै , प्रतिस्पर्धा गर्दै , मुलुकमा सुशासन र स्थीर शासन दिन सक्षम भैरहने वातावरण र लगानी राज्यले गर्नै पर्छ । यसलाई सुविधासम्पन्न बनाएर एलिट सेवा बनाउन सक्नुपर्छ । अन्य सरकारी सेवा सेना १ लाख, प्रहरी १ लाख, शिक्षक १.५ लाख, संस्थान ३० हजार,स्थानीय निकाय न.पा गा.पा, जिसस ३० हजार, अस्थायी करार २५ हजार कर्मचारी छन् जसलाई नार्ने काम निजामतिले मियो बनेर गर्नुपर्छ । नेपालमा मध्यम वा निम्न वर्गका होनहार युवावर्गका नेपाल भित्रै बस्न वा टिकिरहनका निम्ति सीमित भए पनि एक निजामति सेवा क्षेत्र आकर्षणको आधार वा अवसर रहदै आएको हो । भलै यसमा पनि विगत केही समयदेखि निरन्तर ह्रास देखिदै आएको छ । निजामति आकर्षणको मुल कारण पेन्सन हो , दीर्घकालिन लाईफटाईम रोजगारीको लाभ हो । तलब कै लागि निजामति सेवा राम्रो हैन तर सेवानिवृत्ति पछि जीवनपर्यन्त र शेष पछि दम्पत्ति सदस्यले पनि भरणपोषण वापत आधा पेन्सन पाउनु हो । तर वर्तमान सरकारले यसको भ्यालू बुझेन, होस गुमाएर पेन्सन हटाउने निर्णय गर्न पुग्यो, अझ करारको तिकडममा लाग्न थाल्यो । मुलुकको कर्मचारीतन्त्र अब झन् तन्नम बन्ने प्रवल लक्षण हुन यी। तुरून्त यो पेन्सन र करारको भूत उत्रनुपर्छ, पेन्सन खारेजीको निर्णय फिर्ता लिनुपर्छ, पेन्सनको बैकल्पिक दिगो श्रोत पहिचान गर्नुपर्छ। क्षणिक अल्लारे तर्कको पछि लागेर मुलुक ध्वस्त पारिनु हुदैन। कुराजनीतिले त्यसै तन्नम् पारेको मुलुकलाई आर्यघाटमा पुर्याउन सक्ने यो निर्णय तुरून्त फिर्ता लिएर मुलुक जोगाउनु पर्छ । छिमेकी र सार्क मित्र राष्ट्रहरू भुटान, भारत ,बंगलादेश, श्रीलंका ,पाकिस्तान, अफगानिस्तान र संसदीय व्यवस्थाको लामो ईतिहॉस भएका अन्य मुलुकको पेन्सन प्रणाली अध्ययन पनि गर्नुपर्छ, जिस्कनु हुदैन । मुलुकलाई मुलुकी प्रशासनको मेरूदण्ड निजामति कर्मचारी घॉडो भएको र विश्व समुदाय र नेतालाई हामीलाई यो मुलुक घॉडो भएको जस्तो संदेश निरन्तर जानबाट रोकेर लज्जाशरणम् नहोऔं ।
ललितपुर उद्योग वाणिज्य संघले बाँढ्यो छात्रवृत्ति
काठमाडौँ । ललितपुर उद्योग वाणिज्य संघले वार्षिक रुपमा सरकारी विद्यालयका जेहेन्दार विद्यार्थीहरुलाई प्रदान गरिंदै आएको छात्रवृत्ति शुक्रबार एक समारोहबीच वितरण गरेको छ । विभिन्न विद्यालयका १२ जना विधार्थीलाई छात्रबृत्ति वितरण गर्दै ललितपुर उद्योग वाणिज्य संघका अध्यक्ष कृष्णलाल महर्जनले सबसंघले आफ्नो सामाजिक दायित्व निर्वाह गर्ने क्रममा शैक्षिक क्षेत्रको विकासको लागि सानो लगानी गरेको बताए । कास सदस्य एवम् व्यावसायिक उत्तरदायित्व तथा छात्रवृत्ति समितिका संयोजक राजेन्द्र कुमार श्रेष्ठले विद्यार्थीहरुले यसलाई उत्प्रेरणाको श्रोतको रुपमा ग्रहण गरी भविष्यमा आफ्नो शैक्षिक स्तर अझ उकास्नु पर्ने बताए । उनु हुंदै छात्रवृत्ति ग्रहण गर्नु सबै विद्याथीहरुलाई बधाई समेत दिए ।
लोप भए उपत्यकाका ४० वटा पोखरी, संरक्षण गर्ने खानेपानी मन्त्रीको उद्घोष
काठमाडौं । खानेपानी मन्त्री बिना मगरले उपत्यका भित्र रहेका ताल तलैया, पोखरी र ढुंगेधाराको संरक्षण, सम्बर्द्धन र सौर्न्दयीकरणमा योजना बनाएर अघि बढिने बताएकी छिन् । काठमाडौं उपत्यका खानेपानी व्यवस्थापन बोर्ड (भ्याली बोर्ड) द्वारा प्रकाशित भएको काठमाडौं उपत्यका भित्रका पुराना ढुङगे धारा तथा पोखरीहरुको लगत नक्साङकन सम्बन्धि पुस्तकको बिमोचन गर्दै खानेपानी मन्त्री मगरले नास हुँदै गइरहेको पोखरी र ढुंगेधाराको संरक्षण र सम्बर्द्धनमा योजनासहित अघि बढिने बताएकी हुन् । कार्यक्रमलाई सम्बोधन गर्दै उनले भनिन्–आधुनिकताले हाम्रो प्राचीन सभ्यता झल्काउने कलात्मक ढुंगेधारा र पोखरीहरु मासिदै गैरहेका छन् । सहरीकरणका कारण हाम्रो जीवन्त कला, संस्कृति लोप भएका छन् । अब यसलाई सम्भाव्यता अध्ययन गरेर यसको संरक्षणमा जोड दिनु आवश्यक छ । ढुंगेधारा र पोखरीको संरक्षण र सौन्दर्यीकरण गरेर पर्यटकहरुलाई समेत आकर्षित गर्न सकिने मन्त्री मगरको भनाइ छ । काठमाडौं उपत्यका भित्र रहेका ढुंगेधारा र पोखरीहरुको बारेमा लगत तथ्यांक संकलन गरि पहिलोपटक यस्तो पुस्तक तयार भएको हो । काठमाडौं उपत्यका भित्रका १० वटा नगरपालिका क्षेत्र भित्र रहेका ढुंगेधारा तथा पोखरीहरुको स्थलगत रूपमा अध्ययन तथा अनुसन्धान गरि सो को विस्तृत लगत संकलन गरी पुस्तक तयार गरिएको छ । जसमा उपत्यका भित्र रहेका २ सय ३३ पोखरीहरु मध्ये स्थलगत रूपमा भेटिएका पोखरीको संख्या १ सय ९३ रहेको पुस्तकमा उल्लेख छ । त्यस्तै ४० वटा पोखरीहरु लोप भएका छन् । यसैगरी उपत्यका भित्र अध्ययनका क्रममा ५ सय ७३ ढुंगेधाराहरु संकलित गरिएकोमा स्थलगत रूपमा भेटिएका ढुंगेधाराहरुको संख्या ४ सय ७९ वटा, मासिएको ढुंगेधाराको संख्या ५२ वटा र पत्ता नलागेको ढुंगेधाराको संख्या ४२ वटा रहेका छन् । १० वटा नगरपालिका क्षेत्र भित्र रहेका ४ सय ७९ ढुंगेधारा मध्ये अध्ययनको क्रममा १ सय ७१ वटा ढुंगेधारामा मात्र पानी बगेको पाइएको अध्ययनले देखाएको छ ।
