दश बर्ष भयो, बैंकबाट निक्षेपकर्ता खाली फर्कनुपरेको छैन : अर्थमन्त्री
काठमाडौं । अर्थमन्त्री युवराज खतिवडाले आफू नेपाल राष्ट्र बैंकको गभर्नर हुँदा ल्याएको वित्तीय क्षेत्रको सुधारले बैंकिङ क्षेत्रप्रतिको विश्वसनीयता र प्रभावकारिता वृद्धि हुँदै गएको दाबी गरेका छन् । नेपाल धितोपत्र बोर्डले आयोजना गरेको ‘एशिया प्यासिफिक क्षेत्रमा वित्तीय ग्राहकहरुको संरक्षण र शिक्षा’ विषयक कार्यक्रममा अर्थमन्त्री खतिवडाले बैंकिङ क्षेत्रमा सुरु गरिएको निक्षेपको बीमा कार्यक्रमबाट २ करोड ५० लाख निक्षेपकर्ताहरुले सुरक्षाको प्रत्याभुति पाएको दाबी गरेको भन्दै बैंकिङ क्षेत्रमा ल्याएको गुणात्मक सुधारका कारण बैंकिङ क्षेत्रप्रतिको विश्वसनीयता वृद्धि हुँदै गएको बताएका हुन् । उनले आफ्नो कार्यत्रकालमै संस्थागत सामाजिक उत्तरदायित्व, संस्थागत सुशासन लगायतका विषयहरु विद्यालयको पाठ्यक्रमै समावेश गर्ने प्रयास गरेको समेत बताए । बैंकिङ क्षेत्रमा यस्तो सुधारका बाबजुद अझै पनि यो लगायत बीमा, मर्चेन्ट बैंकर, ब्रोकर तथा अन्य गैरबैंकिङ वित्तीय संस्थाहरु अन्तराष्ट्रिय स्तरको र आधुनिक प्रविधिमैत्री हुन नसकेको र वित्तीय पहुँच बढ्दै गए पनि जनतामा वित्तीय ज्ञानभने अपेक्षाअनुरुप नबढेको समेत उनले भनाई थियो । कुन बैंक सुरक्षित छ, कुन बीमा कम्पनी बढी लाभदायक छ भन्ने ज्ञान अझैपनि वित्तीय क्षेत्रका अधिकांश ग्राहकसँग नभएको भन्दै अर्थमन्त्री खतिवडाले त्यसैकारण बजार विवेकशील ढंगबाट चल्न नसकेको बताए । आजकल हुने अधिकांश वित्तीय अपराधहरु र कानूनका उल्लंघनका घटनाहरु जानबुझ भन्दा पनि अज्ञानताकै कारण हुने गरेको समेत उनकाे भनाइ थियाे । जाेखिम नहुन्जेल आफू लाभ लिने र जाेखिम हुँदा सरकारलाई दाेष दिने प्रवृति ठीक नभएकाे पनि उनले बताए । ‘कुनै बैंक डुब्यो भने हामी केन्द्रीय बैंकमा गएर धर्नामा बस्छौं बैंकबाट लिने फाइदा भने हामी एक्लै खल्तीमा हाल्छौं, हाम्रो वित्तीय साक्षरता त्यही हो ।’ उनले भने – ‘जनतामा रहेको यस्तै अल्पज्ञान र विवेकशील व्यवहारको कारणले विभिन्न क्षेत्रमा सरकार र नियामकको हस्तक्षेपको आवश्यकता परेको हो ।’ उनले बजार आफैं चल्छ भन्ने मान्यतालाई २००८ को मन्दीले गलत स्थापित गरेको भन्दै बजारमा उपभोक्ताहरुले विवेकशील ढंगबाट व्यवहार गर्छन भन्ने सिद्धान्त गलत साबित भइसकेको दाबी गरे । अर्थमन्त्री खतिवडाले विश्वमा भित्रदै गएको नयाँ प्रविधिहरु नियामकको लागि थप चुनौती बन्दै गएको भन्दै नियामकहरु त्यस्तो प्रविधिप्रति जागरुक रहनु आवश्यक रहेको समेत बताए । आफू २५ वर्षसम्म नेपाल राष्ट्र बैंकमा बसे पनि क्लाउड सिस्टम के हो, यसले कसरी काम गर्छ भन्ने थाहा नभएको भन्दै यस्तो अवस्था आफूमात्र नभएर अधिकांशको रहेको समेत उनले बताए । सो कार्यक्रममा नेपाल धितोपत्र बोर्डका अध्यक्ष रेवतबहादुर कार्कीले सरकारले हाल वित्तीय साक्षरता रणनीति बनाइरहेको भन्दै यसलाई बोर्डले आफ्नो पक्षबाट सक्दा कार्यन्वयन गर्दैजाने प्रतिवद्धता समेत व्यक्त गरे । उनले हाल सेबोनले राष्ट्रव्यापी मिडिया तालिम तथा अन्तरक्र्रिया कार्यक्रम गरेको र यसले मिडियाकर्मीको माध्यमद्वारा वित्तीय जागरणमा सकारात्मक प्रभाव पर्दै गएको भन्दै उनले वित्तीय उपभोक्ताको शिक्षा र संरक्षण नै आफूहरुको अन्तिम लक्ष्य भएको समेत बताए । नेपाल धितोपत्र बोर्ड र आर्थिक सहकार्य र विकास संगठन (ओईसीडी) को सहकार्यमा भएको उक्त अन्तर्राष्ट्रिय सम्मेलनमा मंगलबार र बुधबार काठमाडौंमा चल्नेछ जसमा ग्राहकको संरक्षण र शिक्षाका विषयमा करिब २० जना भन्दा बढी विज्ञहरुले आफ्नो प्रस्तुति दिने कार्यक्रम छ ।
पाल्पामा ५०० ज्येष्ठ नागरिक सम्मानित, खुशीले दङ्ग भए वृद्धहरु
काठमाडौं । रम्भा गाउँपालिका पाल्पाका ज्येष्ठ नागरिक सम्मान पाएपछि दङ्ग छन् । गाउँपालिकाले गाउँपालिकाभरिका करिब ५०० ज्येष्ठ नागरिकलाई सम्मान गरेको छ । पाँच वडा रहेको गाउँपालिकाका पाँचै वडाका नागरिकलाई मिठा खानेकुरा, फलफूल न्यानो कपडालगायत नगदले सम्मान गरिएको गाउँपालिकाका अध्यक्ष विष्णुप्रसाद भण्डारीले बताए । कतिपयले घरपरिवारले समेत उमेर ढल्कँदै गएपछि माया, सम्मान नगरेका बेला गाउँपालिकाले गरेको सम्मानले आफूहरुलाई जीवन जिउन थप हौसला मिलेको बताएका छन् । रम्भा गाउँपालिका–२ का ज्येष्ठ नागरिक तुलवीर सिंजापतिले गाउँपालिकाले आफूहरुलाई निकै माया गरेको अनुभव सुनाए । “उनले उमेर ढल्कँदै गएका वृद्धवृद्धालाई स्याहार्नको दुःखले वृद्धाश्रम लैजाने गरेको सुनेको थिएँ, मलाई त उल्टै स्थानीय सरकारले सम्मान गर्यो निकै खुशी लागेको छ ।” उनी भन्छन्, “सरकारले वृद्धभत्ता पनि बढायो, कसैले नहेरे पनि आफैं स्वरोजगार भएझैँ लागेको छ ।” गाउँपालिका–२ मा ७५ वर्षमाथिका ९३ वृद्धवृद्धालाई नगद तथा ब्ल्याङ्केट वितरण गरिएको छ । गाउँपालिकाले ज्येष्ठ नागरिकको स्वास्थ्य परीक्षण, बीमा तथा परिचयपत्र वितरण गर्न लागेको वडाध्यक्ष उमानसिंह सारुले जानकारी दिएका छन् । रासस
प्रविधि मैत्री बन्दै बीमा समिति, एकिकृत सफ्टवेयरबाट यसरी हुन्छ काम
काठमाडौ । डिजिटल मोनिटरिङ (प्रविधि मैत्री निरीक्षण)मा पछाडि पर्दै आएको बीमा समितिले एकिकृत सफ्टवेयर सञ्चालनमा ल्याउने भएको छ । बीमा समितिले समग्र बीमा क्षेत्रलाई प्रविधि मैत्री बनाउने उद्देश्यले एकिकृत सफ्टवेयर प्रणाली सञ्चालन गर्ने भएको हो । बीमा समितिले एकिकृत सफ्टवेयरको लागि ३५ दिने टेन्डर समेत आह्वान गरेको छ । समितिले आइतबार टेण्डर निकालेको हो । टेण्डर भर्नेहरुको छनोट प्रक्रिया सकिए लगत्तै आर्थिक आर्थिक व्यवस्थापनमा जुटने बीमा समितिले जनाएको छ । एकीकृत सफ्टवेयरका लागि असार १६ गते टेण्डर आह्वान गरिएको हो । सो टेण्डरका लागि फारम बुझाउने अन्तिम मिति साउन १५ गते मध्यान्हको १२ बजेसम्म रहेको छ । यस्तै, प्रस्ताव खोल्ने मिति आगामी साउन १५ गते दिउँसोको २ बजे रहेको छ । बीमा समितिका निर्देशक राजुरमण पौडेलले भने–समयको माग अनुसार हामीले चल्न जरुरी छ र सोही अनुसार काम गर्न हामीले एकिकृत सफ्टवेयर सञ्चालनमा ल्याउने भएका हौँ ।’ बीमा क्षेत्रमा चालिएको प्रविधि मैत्री कदम ऐतिहासिक हुने उनले बताए । बीमा समितिले अबको दिनमा प्रविधि मैत्री हुन आवश्यक रहेकोमा जोड दिएको छ । बीमा समितिका एक कर्मचारीले पहिले आफूहरुले बिएसआईबी डट ओआरजी डट एनपी बाट काम गर्दै आएको तर पछिल्लो समय बीमा समितिमा एनआईबी डट जिओभि डट एनपी रहेको बताए । पहिले प्रयोग भई रहेको वेव साईटका लागि समितिले मासिक रुपमा २० हजार रुपैयाँ खर्चनु पथ्र्यो । तर, अहिले भने त्यसका लागि शुल्क लाग्दैन । सोही कारणपनि बीमा समितिमा २ लाख ४० हजार रुपैयाँ बचत भएको छ । समितिले नयाँ वेव साईटको सुरुवातमा ल्याएको ८ महिना भएको छ । प्रविधिमा पछाडि थियो बीमा समिति बीमा समितिमा सफ्टवेयरहरु भएको तर एकिकृत नभएकाले तथ्याङ्क संकलनमा ढिलाई भईरहेको थियो । बीमा समिति अनलाईन रिपोर्डिङमा अगाडि आउन सकेको थिएन । एजेन्ट तथा सर्भेयरको डाटाहरु अनलाईन प्रणालीमा थिएन । अभिकर्ता कार्ड वितरण प्रक्रिया अनलाइनमा उपलब्ध थिएन । बीमा समितिको हालसम्म पनि मोवाइल एप्स छैन । यस्ता कुराहरु सुधार गर्नु पर्ने आवश्यकता महशुस भइरहेको छ । एकिकृत सफ्टवेयरबाट के फाइदा हुन्छ ? एकिकृत सफ्टवेयर मार्फत बीमा कम्पनीहरुको तथ्याङ्कबारे जानकारी लिन सहज हुन्छ । साथै कम्पनीको बर्तमान अवस्थाबारे थाहा पाउन सहज हुन्छ । व्यापार व्यवसायको बिस्तारमा पनि यो सहयोगी हुने समितिको दाबी छ । के हो आईआरएमआईएस सफ्टवेयर ? एकिकृत सफ्टवेयरलाई ‘आईआरएमआईएस’ नामले चिन्न सकिन्छ । त्यसको पूरा रुप भने ईन्स्योरेन्स रेगुलेटरी म्यानेजमेन्ट इन्फरमेसन सेन्टर हुन्छ । यस्तो हुन्छ आइआरएमआइएस भित्र लेखा, मानव संसाधान, इजाजत, स्थलगत उजुरी व्यवस्थापन, कृषी तथा लघु बीमा, पुनर्बीमा लेखको प्रोडक्टहरुको बीमा सम्बन्धी सम्पूर्ण तथ्याङ्क व्यवस्थापन गर्न मिल्छ । एमआईएस रिपोर्ट विथ ग्राफिक्सले के गर्छ ? – बीमा कम्पनीले बीमा समितिलाई रिर्पोटिङ् गर्ने । – बार डाउग्रम अटोमेटिक रुपमा आउने । – पहिले कम्पनीले आफ्नो तथ्याङ्क चढाएपछि बार डायग्राम सिस्टमले नै बनाउने गर्छ । मोबाइल एप्स मोबाइल एप्स मार्फत आवश्यक सूचनाहरु दिन प्रयोग गरिन्छ । सो एप्स चलाउँदा बीमा क्षेत्रमा सूचना प्रवाहमा सहज हुन्छ । सर्भर हालसम्म बीमा समितिको आफ्नो सर्भर छैन । तथ्याङ्क भण्डारणमा सर्भर महत्वपूर्ण मानिन्छ । बीमा समितिले आफ्नो काम पेपरलेस बनाउन समेत मद्दत गर्छ ।
हिमाली टोल विकास संस्था भरतपुरलाई कृषि बिकास बैंकले दियो ५० थान डस्टबीन
काठमाडौँ । कृषि विकास बैंकले चितवन भरतपुर स्थित हिमाली टोल बिकास संस्थालाई ५० थान डस्टवीन र होडिङ्ग वोर्ड हस्तान्तरण गरेको छ । संस्थाका अध्यक्ष शोभाष चन्द्रको अध्यक्षततामा सम्पन्न कार्यक्रममा भरतपुर महानगरपालिका वडा नं. १० हिमाली टोल विकास संस्थालाई सामाजिक सामुदायिक कार्यक्रम अन्र्तगत सहयोग गरिएको हो । बैंक सञ्चालक समितिका सदस्य संजिव पौडेलको प्रमुख आतिथ्यमा सम्पन्न कार्यक्रममा भरतपुर शाखाका प्रबन्धक काँशिराज कँडेल र कार्यक्रमका प्रमुख पौडेलले संयूक्त रुपमा हस्तान्तरण गरेका हुन् । उक्त कार्यक्रममा बैंक पूर्व शाखा प्रवन्धक प्रदीपकुमार पोखरेल, डा. जीवनकुमार श्रेष्ठ, समितिका सल्लाहकार डा. हरिहर पोख्रेल, चन्द्रप्रसाद सिग्देल, भानुप्रसाद उपाध्याय, प्रेमप्रसाद सुवेदी, खड्गबहादुर श्रेष्ठ, शिवप्रसाद शर्मा, आमा समूहका अध्यक्ष नारायणी लम्सालले कृषि विकास बैंक लि. पुर्याएको योगदान कदर गर्दै कृषि विकास बैंक लि.को प्रगतिको कामना गरे ।
डेङ्गु सार्ने लामखुट्टेका लार्भा नष्ट गर्ने अभियान, स्थानीयलाई सावधानी अपनाउन सुझाव
काठमाडौं । कञ्चनपुरका सात नगरपालिकामा डेङ्गु सार्ने लामखुट्टेका लार्भा खोजी गरी नष्ट गरिने अभियान सञ्चालन हुने भएको छ । एडिस जातको पोथी लामखुट्टेको टोकाइबाट हुने डेङ्गुको भाइरस नियन्त्रण गर्नका लागि अभियान सञ्चालन हुन लागेको हो । दुई दिनभित्रै शुक्लाफाँटा, वेदकोट, कृष्णपुर, भीमदत्त, महाकाली, बेलौरी र पुनर्वास नगरपालिकाका शहरी र शहरोन्मुख क्षेत्रमा लार्भा खोजी गरी नष्ट गर्ने अभियान सञ्चालन हुने सुदूरपश्चिम प्रदेश स्वास्थ्य निर्देशनालयका भेक्टर कन्ट्रोल निरीक्षक हेमराज जोशीले बताएका छन् । “डेङ्गुको भाइरस सार्ने लामखुट्टेका लार्भा नियन्त्रण गर्न सातै नगरपालिकामा महिला स्वास्थ्य स्वयंसेविका र स्वास्थ्यकर्मीको टोलीले घरघरमा पुगेर लामखुट्टेले फुल पार्ने ठाउँ पानीट्याङ्की, गाग्रो, दहीको कतारो, बाल्टिन तथा ड्रम, गमला, टायरको पानी फाल्ने र पानी जम्ने खाल्डाखुल्डी पुर्नेलगायतका कार्य गर्नेछ”, उनले भने । स्थानीय बासिन्दालाई डेङ्गुको भाइरस रोकथामका लागि अपनाउनुपर्ने सावधानीबारे जानकारी दिने कार्यसमेत हुने उनले बताए । डेङ्गुको भाइरस सार्ने लामखुट्टेले दिउँसोपख मात्रै टोक्ने भएकाले यसबाट बच्नका लागि पूरै शरीर ढाक्ने गरी कपडा लगाउने, मलमको प्रयोग गर्ने, राति र दिउँसो झुलभित्र सुत्ने, पानी जम्ने भाँडाकुँडाको पानी फाल्ने, खाल्डाखुल्डीमा पानी जम्न नदिने र झ्यालढोकामा जालीको प्रयोग गर्नुपर्ने स्वास्थ्यकर्मी माधवानन्द भट्टले बताएका छन् । देशका विभिन्न भागमा डेङ्गु ज्वरोको प्रकोप बढ्नसक्ने भएकाले सबैले सचेत हुनुपर्ने उनको सुझाव छ । स्वास्थ्यकर्मी हरि नाथका अनुसार डेङ्गु भएमा एक्कासी तीनदेखि पाँच दिनसम्म ज्वरो आउने, बेस्सरी टाउको दुख्ने, आँखाको गेडी दुख्ने, शरीरमा डाबर आउने, अरुचि हुने, जोर्नी तथा मांसपेशी दुख्ने, पेट तथा आन्द्रामा गडबडी हुनेलगायतका लक्षण देखा पर्छन् । यसैगरी, केही बिरामीमा शुरुमै शरीरभरि खटिरा आउने, ज्वरो आइरहेका बेला नाक तथा गिजाबाट रक्तश्राव हुने, छालामुनि रक्तश्राव हुनेलगायतका लक्षण देखा पर्न सक्छन् । डेङ्गु ज्वरो भाइरसको कारणबाट लाग्ने भएकाले यसको कुनै किसिमको विशेष उपचार र खोप छैन । बिरामीमा देखिएको लक्षणका आधारमा उपचार हुने गरेको छ । ज्वरो घटाउन सिटामोल र प्रशस्तरूपमा झोल पदार्थ पिउन बिरामीलाई लगाइने शुक्लाफाँटा नगरपालिकाका स्वास्थ्य शाखा प्रमुख तीर्थराज भट्टले बताए । डेङ्गुको लक्षण देखापरे तुरुन्त अस्पतालमा भर्ना गरी उपचार गराउनुपर्ने उनको सुझाव छ । सुदूरपश्चिम प्रदेशमा यस वर्षको अहिलेसम्म कुनै पनि डेङ्गुका बिरामी फेला परेका छैनन् । डेङ्गुको भाइरस सर्न नदिन लार्भा नष्ट गर्ने अभियानसँगै सचेतनाका कार्यक्रमसमेत सञ्चालन हुने बताइएको छ । सुदूरपश्चिम प्रदेश स्वास्थ्य निर्देशनालयले राखेको तथ्याङ्कअनुसार सन् २०१७ मा डेङ्गुका एक बिरामी फेला परेका थिए । सन् २०१८ मा सात बिरामीमा डेङ्गुको भाइरस सङ्क्रमण भएको पाइएको थियो । डेङ्गुको सङ्क्रमण भएका सबै भारतमा काम गरेर फर्केका व्यक्ति थिए । रासस
बस र ट्रक एकापसमा ठोक्किँदा एकको मृत्यु, ६ घाइते
काठमाडौं । पूर्वपश्चिम राजमार्गअन्तर्गत सर्लाहीको लालबन्दीमा बस र ट्रक एकापसमा ठोक्किँदा एकको मृत्यु भएको छ भने छ घाइते भएका छन् । मंगलबार बिहान ३ः४० बजे लालबन्दी नगरपालिका–१७ फुलजोर पुलस्थित बा३ख २०५४ नंको बस र ना५ख ७७९५ नंको ट्रक आपसमा ठोक्किँदा बसका चालक ईश्वरपुर नगरपालिका–१२ घारीबथानका २४ वर्षीय माधव लायोको घटनास्थलमै मृत्यु भएको प्रहरीले जनाएको छ । सर्पले टोकेको बिरामीलाई घारीबथानबाट बसमा राखेर लालबन्दीतर्फ जाँदै गरेको अवस्थामा पश्चिमबाट पूर्वतर्फ जाँदै गरेको ट्रक एकापसमा ठोक्किँदा बसमा सवार तीन र ट्रकका चालकसहित तीन गरी छ घाइते भएको जिल्ला प्रहरी कार्यालय सर्लाहीले जनाएको छ । दुर्घटनापछि अबरुद्ध भएको राजमार्गलाई प्रहरीले खुलाएको छ । घाइते हुनेमा ट्रक चालक मकवानपुर जिल्ला थाहा नगरपालिका–११ का रञ्जित ठोकर, त्यहीका प्रताप ठोकर, रोहित लामा, सर्लाही ईश्वरपुर नपा–१२ घारीबथानका ध्रुवप्रसाद घिमिरे, गोपाल घिमिरे र सुजन घिमिरे छन् । घाइतेको लालबन्दीका विभिन्न अस्पतालमा उपचार भइरहेको छ । रासस
प्रदेश नं ३ का स्थानीय तहले बाँडफाँड गरेनन् राजश्व, १३ वटै जिल्लामा अनुगमन शुरु
काठमाडौं । चालू आर्थिक वर्षको करिब अन्त्यसम्म आइपुग्दा पनि प्रदेश नं ३ का १०० बढी स्थानीय तहले नदीजन्य पदार्थको राजश्व बाँडफाँड गरेका छैनन् । राजश्व बाँडफाँड नभएपछि प्रदेशसभाअन्तर्गतको लेखा समितिले उपसमिति बनाएर स्थानीय तहमा स्थलगतरूपमा अनुगमन गर्न पठाएको छ । उपसमितिले प्रदेशका १३ वटै जिल्लाका स्थानीय तहमा अनुगमन गरी प्रदेश सञ्चित खातामा राजश्व जम्मा गराउन मंगलबारबाट स्थलगत अनुगमनमा निस्केको छ । उपसमिति संयोजक रत्न ढकालले स्थानीय तहमा नदीजन्य पदार्थ (ढुङ्गा, गिट्टी, बालुवा) को बोलपत्रमार्फत बिक्री गरिएको आम्दानीको ४० प्रतिशत प्रदेशको सञ्चित खातामा जम्मा नभएपछि स्थलगत अनुगमनमा निस्किएको बताए । उनले भने, “आज काभ्रेपलाञ्चोक जिल्लाबाट अनुगमन थालेका छौँ ।” उपसमितिले स्थलगतरूपमा नदीजन्य पदार्थको उत्खनन तथा राजश्व सङ्कलनको अवस्थाबारे अनुगमन गर्नेछ । ढकालको संयोजकत्व गठित समितिमा प्रदेशसभा सदस्य दीपक निरौला, सन्त प्रजा, रीता माझी र रमेश पौडेल रहेका छन् । प्रदेश आर्थिक ऐनमा नदीजन्य पदार्थ, मनोरञ्जन कर तथा विज्ञापनको कर स्थानीय तहले आफैँ उठाई प्रत्येक महिना बाँडफाँड गरी प्रदेश सञ्चित कोषमा जम्मा गर्नुपर्ने र त्यसको विवरण पठाउनुपर्ने व्यवस्था भए पनि स्थानीय तहले हालसम्म त्यसको पालना नगर्दा प्रदेश सरकारको लक्ष्य पूरा नभएको हो । प्रदेश सरकारले रोयल्टीसहित चालू आर्थिक वर्षमा ११९ स्थानीय तहबाट रु नौ अर्ब ३३ करोड राजश्व सङ्कलन गर्ने लक्ष्य लिएको प्रदेशसभा सदस्य दीपक निरौलाले जानकारी दिएका छन् । उनले स्थानीय तहमा अधिक मात्रामा राजश्व सङ्कलन भए पनि प्रदेश सरकारको सञ्चित कोषमा हालसम्म राजश्व दाखिला नभएको, स्थानीय तहमा नदीजन्य पदार्थ उत्खननका नाममा व्यापकरूपमा दोहन गरिएको तथा अनियमितता भएको गुनासो आएपछि प्रदेशसभा सदस्य अनुगमनमा निस्किएको बताए । “स्थानीय तहले प्रदेश सरकारको परिपत्र पनि बेवास्ता गरेपछि अनुगमन गर्नैपर्यो”, उनले भने । आर्थिक ऐनमा नदीजन्य पदार्थ मनोरञ्जन तथा विज्ञापनको करमध्ये ६० प्रतिशत स्थानीय तह आफैँले सञ्चित कोषमा राखी ४० प्रतिशत प्रदेश सरकारको सञ्चित कोषमा जम्मा गर्नुपर्ने नीति उल्लेख छ । चालू आर्थिक वर्षको ११ महिनामा १० जिल्लाका १० स्थानीय तहले मात्रै प्रदेश सञ्चित कोषमा राजश्व दाखिला गरेको उपसमिति संयोजक ढकालले जानकारी दिएका हुन् । ती स्थानीय तहबाट १२ करोड ४३ लाख ५१ हजार ७१२ रुपैयाँ ६० पैसा राजश्व प्रदेश सञ्चित कोषमा दाखिला भएको छ । “असार महिनामा सबै जिल्लामा अनुगमन नसकिए साउनमा पनि गर्नेछौँ”, ढकालले भने। चालू आर्थिक वर्षको शुरुआतमै अर्थात् गतसाल साउन २२ गते प्रदेशका सबै स्थानीय तहलाई जिल्लास्थित समन्वय समितिमार्फत परिपत्र गरी प्रदेश आर्थिक ऐनमा भएका व्यवस्थाबारे जानकारी गराउँदै सङ्कलित राजश्व रकम मासिक रूपमा बाँडफाँड गरी प्रदेश सञ्चित कोषमा जम्मा गर्न र त्यसको विवरण पठाउन निर्देशन दिइएको थियो । काभ्रेपलाञ्चोकका समन्वय अधिकारी सच्युतराज उप्रेतीले जिल्लाका सबै स्थानीय तहमा प्रदेशको पत्र पुर्याएको जिकिर गरेका छन् । काभ्रेपलाञ्चोकको पनौती नगरपालिकाका प्रमुख भीम न्यौपानेले राजश्व बाँडफाँडसम्बन्धी प्रदेशबाट कुनै पनि पत्र नआएको बताउँदै भने, “अहिलेसम्म हामीले पत्र पाएका छैनौँ, कसरी जम्मा गर्ने भन्नेबारे पनि थाहा छैन ।” उनले स्थानीय तहमा नदीजन्य पदार्थबाट सङ्कलित राजश्व प्रदेश सरकारलाई बुझाउनुपर्छ भन्ने विषयमा आफूलाई जानकारी नभएको बताए । रासस
प्रदेश सरकारका २ मुख्यमन्त्री एकै दिन विदेश उडे, राई अमेरिका, पोखरेल चीन
काठमाडौँ । सोमबार एकै दिन २ वटा प्रदेशका मुख्यमन्त्री विदेश उडेका छन् । प्रदेश १ का मुख्यमन्त्री शेरधन राई अमेरिका र प्रदेश ५ का मुख्यमन्त्री शंकर पोखरेल चीन उडेका हुन् । मुख्यमन्त्री राई अमेरिकामा नेपालीहरुको कार्यक्रममा हुँदैछन् भने अर्का मुख्यमन्त्री पोखरेल चिनियाँ कम्युनिष्ट पार्टी अन्तरराष्ट्रिय विभागको निमन्त्रणामा छेन्दु प्रस्थान गरेका हुन् । अमेरिकाको बाल्टिमोरमा यही असार २० देखि २२ गतेसम्म हुन लागेको नेपाली राष्ट्रिय सम्मेलनको प्रमुख अतिथिका रुपमा मुख्यमन्त्री राई सोमार साँझ अमेरिका प्रस्थान गरेको उनका प्रेस सल्लाहकार ध्रुव सुवेदीले जानकारी दिए । प्रदेश सरकारको सिफारिस र सङ्घीय सरकारको स्वीकृति बमोजिम मुख्यमन्त्री राई अमेरिका प्रस्थान गरेका हुन् । अमेरिकाको उक्त कार्यक्रममा उनले गैरआवासीय नेपालीलाई सम्बोधन गर्ने कार्यक्रम छ । उक्त कार्यक्रममा उनले प्रदेश नं १ को विकास प्रक्रियाका बारेमा सम्बोधन गर्नुका साथै गैरआवासीय नेपालीहरुको भूमिकाको विषयमा समेत धारणा राख्नेछन् । नीति कार्यक्रम र बजेटमा प्रदेश सरकारले लगानी सम्मेलन गर्ने जनाएको छ । उक्त लगानी सम्मेलनबारे पनि मुख्यमन्त्री राईले अमेरिकामा रहेका नेपालीहरुसँग छलफल गर्नेछन् । यसअघि यो कार्यक्रममा भाग लिन नेपालका विशिष्ट व्यक्ति सहभागी भइसकेका छन् । सम्मेलनको आयोजना एशोसियशन अफ नेप्लिज इन दि अमेरिका, एशोसियशन अफ नेप्लिज इन मिड वेस्ट अमेरिका, अन्तर्राष्ट्रिय साहित्य समाज र बाल्टिमोर एशोसियशन अफ नेप्लिज इन अमेरिकाले संयुक्त रुपमा गरेका हुन् । प्रदेश ५ का मुख्यमन्त्री चीन प्रस्थान यता, प्रदेश नं ५ का मुख्यमन्त्री पोखरेल सहितको एक प्रतिनिधिमण्डल मित्रराष्ट्र चीनको भ्रमणका लागि सोमाबार नै त्यसतर्फ प्रस्थान गरेकोे छ । चिनियाँ कम्युनिष्ट पार्टी अन्तरराष्ट्रिय विभागको निमन्त्रणामा उनीसहितको सो टोली चीनको छेन्दु प्रस्थान गरेको हो । मुख्यमन्त्रीको भ्रमण दलमा गण्डकी प्रदेशका प्रमुख सचेतक मायानाथ अधिकारी, प्रदेश नं ५ सचेतक पार्वती पुन, प्रदेशसभा सदस्य हरि रिजाल, प्रदेश ३ का प्रदेशसभा सदस्य राजेश शाक्य, प्रतिनिधिसभा सदस्य नवराज रावत, घोराही उपमहानगरपालिकाका प्रमुख नरुलाल चौधरी, ठाकुरबाबा नगरपालिकाका प्रमुख घननारायण श्रेष्ठ, युवा सङ्गठनका अध्यक्ष रामप्रसाद सापकोटा, अखिलका अध्यक्ष ऐन महर संविधानसभा सदस्य ऋषि पोखरेल, नेकपा भोजपुर जिल्ला अध्यक्ष प्रेमकुमार राई, मुख्यमन्त्रीका प्रेस सल्लाहकार शेरबहादुर केसी तथा स्वकीय सचिव तिरनराज गौतम, युवा नेता शिवराम यादव, सुमित्रा विसी, रणबहादुर चन्द, मञ्जुदेवी साह, पत्रकार मोहन बास्तोला र देविका घर्ती छन् । भ्रमणका क्रममा चीनको सिचुवान प्रान्त र प्रदेश ५ बीच भगिनी सम्बन्ध कायम गर्नेबारेमा समझदारी गरिने जनाइएको छ । त्यसैगरी सिचुवान प्रान्तको याआन नगर र घोराही उपमहानगरपालिका तथा गोइजाउ प्रान्तको लियुयान्सु नगर र ठाकुरबाबा नगरपालिकाबीच पनि भगिनी सम्बन्ध कायम गर्नेबारे समझदारी हुनेछ । सो टोली असार २५ गते स्वदेश फर्किने जनाइएको छ ।
