हकप्रदकाे निर्णयपछि नेपाल रिको सेयर १५ प्रतिशतले बढ्यो
काठमाडौं । नेपाल पुनर्बीमा कम्पनीको सेयर मूल्यमा बुधबार (आज) उच्च वृद्धि भएको छ । नेपाल सरकारले मंगलबार (हिजो) कम्पनीमा थप हकप्रद सेयर लगानी गर्ने निर्णय गरेसँगै दोस्रो बजारमा कम्पनीको सेयर मूल्यमा सकारात्मक सर्किट लागेको हो । बुधबार ८४१ रुपैयाँ ५० पैसामा कारोबार खुलेको कम्पनीको सेयर मूल्य १ बजेर ३६ मिनेटसम्ममा ९२१ रुपैयाँ ७० पैसा पुगेको हो । अघिल्लो दिन अर्थात मंगलबार अन्तिम कारोबार मूल्य ८०१ रुपैयाँ ५० पैसा का आधारमा कम्पनीको सेयर मूल्य १२०.२० पैसा अर्थात १५ प्रतिशतले बढेको छ । कम्पनीको हालको बजार स्थितिअनुसार खरिदकर्ताहरूको मात्र अत्यधिक चाप देखिएको छ भने बिक्रीतर्फ शून्य अर्डर रहेको छ । कम्पनीको मार्केट डेप्थ विवरणअनुसार लगानीकर्ताहरू उच्च दरमा सेयर खरिद गर्न तम्सिएका छन् तर बिक्रीकर्ताहरूले सेयर बेच्न नचाहँदा बजारमा माग मात्र उच्च देखिएको छ । जसमध्ये सबैभन्दा उच्च दर ९२१.७० रुपैयाँमा मात्रै २६५ वटा छुट्टाछुट्टै अर्डरमार्फत १ लाख ७७४ कित्ता सेयर खरिदको माग गरेको देखिन्छ । कुल १ लान ३५ हजथार ३८१ कित्ता सेयर खरिदका लागि अर्डरहरू कामय भएका छन् । मंगलबार बसेको मन्त्रिपरिषद् बैठकले नेपाल पुनर्बीमा कम्पनीमा सरकारको थप हकप्रद सेयर लगानी गर्न सहमति गरेको थियो । सरकारको निर्णयसँगै कम्पनीमा सरकारी लगानी थपिने प्रक्रिया अघि बढ्ने भएपछि लगानीकर्ताले यसलाई सकारात्मक रूपमा लिएको देखिन्छ । यसको प्रभाव बुधबारको कारोबारमा देखिएको हो । नेपाल पुनर्बीमा कम्पनीमा संस्थापक समूहको ८४ प्रतिशत र सर्वसाधारण समूहको १६ प्रतिशत सेयर स्वामित्व छ । कम्पनीको कुल १३ करोड ४२ लाख २१ हजार ८७१ कित्ता सेयरमध्ये ११ करोड २७ लाख ४६ हजार ३७२ कित्ता संस्थापक र २ करोड १४ लाख ७५ हजार ४९९ कित्ता सर्वसाधारण समूहको छ । नियामक निकाय नेपाल बीमा प्राधिकरणले पुनर्बीमा कम्पनीको न्यूनतम चुक्ता पुँजी २० अर्ब रुपैयाँ तोकेको छ । हाल नेपाल पुनर्बीमा कम्पनीको चुक्ता पुँजी १३ अर्ब ४२ करोड रुपैयाँ छ । तोकिएको पुँजी पुर्याउन कम्पनीले करिब ५० प्रतिशत हकप्रद सेयर जारी गर्नुपर्नेछ ।
कारागारबाट रिहा हुँदै टोपबहादुर रायमाझी
काठमाडौं । नक्कली भुटानी शरणार्थी प्रकरणमा दोषी ठहर भई चार वर्ष कैद सजाय सुनाइएका पूर्वउपप्रधानमन्त्री तथा नेकपा एमालेका नेता टोपबहादुर रायमाझी ज्येष्ठ नागरिक सुविधाअन्तर्गत कैद छुट पाएर रिहा हुने भएका छन्। काठमाडौं जिल्ला अदालतले कैद छुटसहित रिहा गर्न पत्र पठाएपछि डिल्लीबजार कारागारले उनलाई कात्तिक २६ गते मुक्त गर्ने तयारी गरेको हो । डिल्लीबजार कारागारका जेलर विक्रम पाण्डेका अनुसार रायमाझीले ज्येष्ठ नागरिक सुविधाअन्तर्गत बाँकी कैद मिनाहाका लागि काठमाडौं जिल्ला अदालतमा निवेदन दिएका थिए । उक्त निवेदनमाथि सुनुवाइ गर्दै अदालतले रिहा गर्न पत्र पठाएको हो । ‘उहाँले ज्येष्ठ नागरिक सुविधाअन्तर्गत कैद छुटका लागि निवेदन दिनुभएको थियो। अदालतले रिहा गर्न भन्दै पत्र पठाएको छ। कात्तिक २६ गते छोड्ने भन्ने छ,’ उनले भने । ज्येष्ठ नागरिकसम्बन्धी ऐन, २०६३ को दफा १२ अनुसार ६५ वर्ष उमेर पूरा भई ७० वर्ष ननाघेका कैदीलाई उमेर र कसुरको प्रकृतिअनुसार २५ प्रतिशतसम्म कैद छुट दिन सकिने व्यवस्था छ । सोही कानुनी व्यवस्थाअनुसार रायमाझीले चार वर्षको कैद सजायमा २५ प्रतिशत अर्थात् एक वर्ष छुट पाएका हुन् । रायमाझीले २०८३ कात्तिक २५ गते ६५ वर्ष उमेर पूरा गर्नेछन् । कैद छुटपछि उनको कायम हुने सजाय अवधि तीन वर्ष हुन्छ । उनी २०८० वैशाख २० गतेदेखि नै थुनामा रहेकाले तीन वर्षको कैद अवधि पूरा गरिसकेका छन् । काठमाडौं जिल्ला अदालतले रायमाझीलाई ४० हजार रुपैयाँ जरिवाना र पीडित राहत कोषमा १ हजार ६०० रुपैयाँ क्षतिपूर्ति शुल्कसमेत बुझाउनुपर्ने फैसला गरेको थियो । जरिवाना नबुझाएबापत हुन सक्ने थप कैद अवधिसमेत उनले बिताइसकेको थुनावधिबाट मिलान हुने गरी अदालतले कैद गणना गरेको छ । नक्कली भुटानी शरणार्थी प्रकरणमा पक्राउ परेका रायमाझीलाई काठमाडौं जिल्ला अदालतका न्यायाधीश तेजबहादुर खड्काको इजलासले २०८३ असार ३० गते चार वर्ष कैद र ४० हजार रुपैयाँ जरिवानाको सजाय सुनाएको थियो । नेपाली नागरिकलाई नक्कली भुटानी शरणार्थी बनाएर अमेरिका पठाउने भन्दै रकम असुली गरिएको प्रकरणमा रायमाझीमाथि ठगी, संगठित अपराध, राज्यविरुद्धको कसुरलगायत अभियोग लगाइएको थियो । उनी तत्कालीन समयमा एमालेका प्रभावशाली नेता तथा पूर्वउपप्रधानमन्त्रीसमेत थिए ।
प्रधानमन्त्री बालेन र भारतीय विदेश सचिवबीच भोलि भेटवार्ता, भारत भ्रमणको मिति तय हुने
काठमाडौं । प्रधानमन्त्री बालेन्द्र शाह (बालेन) र भारतीय विदेश सचिव विक्रम मिस्रीबीच भेटवार्ता हुने भएकाे छ । प्रधानमन्त्रीका प्रेस विज्ञ दीपा दाहालका अनुसार उनीहरूबीच बिहीबार (भाेलि) भेटवार्ता हुन लागेको हो । उनले भोलि कुन समयमा भेटघाट हुने भनेर समय तय भइनसकेको जानकारी दिइन् । मिस्री दुई दिने औपचारिक भ्रमणका लागि बुधवार काठमाडौं आइपुगेका हुन् । यसअघि प्रधानमन्त्री बालेनले भारत र चीन दुवै देशका राजदूतहरूसँग वान टु वान भेटवार्ता गरिसकेका छन् । मिस्रीको नेपाल भ्रमणलाई प्रधानमन्त्री बालेनको प्रस्तावित भारत भ्रमणको तयारीको रूपमा हेरिएको छ । प्रधानमन्त्री बालेनले नोभेम्बरको अन्तिमतिर भारत भ्रमण गर्ने तयारी भइरहेको छ । भारतीय प्रधानमन्त्री नरेन्द्र मोदीको निमन्त्रणामा हुन लागेको बालेनको पहिलो औपचारिक द्विपक्षीय विदेश भ्रमण हुनेछ ।
लोकेश बम अर्थात् विस्फोटक ब्याटर
काठमाडौं । त्रिवि क्रिकेट मैदानमा दर्शकको हुटिङ चर्किन थाल्छ । दर्शकदीर्घाबाट ‘लोकेश... लोकेश...’ को आवाज सुनिन्छ । उनी ब्याटिङका लागि मैदान प्रवेश गर्दा होस् वा क्रिजमा जमेर बललाई बाउन्ड्री कटाउँदा, दर्शकको उत्साह झन् बढ्छ । उनले प्रहार गर्ने प्रत्येक चौका र छक्कासँगै मैदानको माहोल तातिन्छ । नेपाल प्रिमियर लिग (एनपीएल) मा लोकेश बमको ब्याटिङले सिर्जना गर्ने आकर्षण यस्तै छ । उनी मैदानमा आउँदा दर्शकले रनको अपेक्षा गर्छन् । बल ब्याटमा जोडिएपछि त्यो अपेक्षा हुटिङमा बदलिन्छ । आक्रामक ब्याटिङ, लामो छक्का र छोटो समयमा खेलको गति बदल्न सक्ने क्षमता नै लोकेशको परिचय बनेको छ । विराटनगर किंग्सबाट एनपीएलको तेस्रो संस्करण खेलिरहेका लोकेशले आफ्नो यही परिचयलाई ब्याटिङबाट पुष्टि गरिरहेका छन् । प्रतियोगिताका सुरुवाती चार खेलमा उनले १८८ रन बनाएका छन् । ८७ रन उनको सर्वाधिक व्यक्तिगत स्कोर हो । ४७.२५ को औसत र १६४.३५ को स्ट्राइक रेटमा ब्याटिङ गरेका उनले दुई अर्धशतक बनाइसकेका छन् । यस अवधिमा ११ चौका र १६ छक्का प्रहार गरेका उनले कुल २७ बाउन्ड्री हानेका छन् । लोकेशको ब्याटिङमा एउटा विशेषता छ, उनी क्रिजमा धेरै समय बिताएर रन जोड्नेभन्दा उपलब्ध बललाई अधिकतम उपयोग गर्न खोज्छन् । बलको लाइन र लम्बाइ पहिचान गरेर प्रहार गर्ने उनको शैलीले विपक्षी बलरलाई दबाबमा पार्छ । विशेषगरी आक्रामक ब्याटिङ आवश्यक पर्ने अवस्थामा उनी टोलीका लागि महत्वपूर्ण खेलाडी बन्दै गएका छन् । डोटीबाट राष्ट्रिय टोलीसम्म लोकेश बमको जन्म सन् २००० अगस्ट १३ मा सुदूरपश्चिम प्रदेशको डोटी जिल्लामा भएको हो । दायाँहाते ब्याटर तथा विकेटकिपरका रूपमा खेल्ने उनी नेपाली राष्ट्रिय टोलीका सदस्य हुन् । घरेलु क्रिकेटबाट आफ्नो यात्रा सुरु गरेका लोकेशले उमेर समूह, राष्ट्रिय टोली र फ्रेन्चाइज क्रिकेटसम्मको यात्रा तय गरेका छन् । उनले सुदूरपश्चिम प्रदेश, त्रिभुवन आर्मी क्लब, नेपाल एपीएफ क्लब र विराटनगर किंग्सलगायत टोलीबाट क्रिकेट खेलेका छन् । घरेलु प्रतियोगितामा देखाएको प्रदर्शनकै आधारमा उनले राष्ट्रिय टोलीमा स्थान बनाएका हुन् । नेपालका लागि उनको टी–२० अन्तर्राष्ट्रिय क्रिकेटमा पदार्पण १२ फेब्रुअरी २०२२ मा संयुक्त अरब इमिरेट्स (यूएई) विरुद्ध भएको थियो । ओमानको अल अमेरातमा भएको उक्त खेलपछि उनी राष्ट्रिय टोलीको टी–२० संरचनामा समेटिँदै आएका छन् । टी-२० मा ७३६ रन, अन्तर्राष्ट्रिय क्रिकेटमा ३२१ लोकेशको टी-२० क्रिकेट करिअर हेर्दा उनको ब्याटिङमा आक्रामकता र रन बनाउने क्षमता देखिन्छ । उपलब्ध तथ्यांकअनुसार उनले टी-२० क्रिकेटका ४१ खेलमा ७३६ रन बनाएका छन् । उनको उच्चतम स्कोर १०६ रन हो । २६.२९ को औसत र १५२.३८ को स्ट्राइक रेटमा खेलेका उनले एक शतक र दुई अर्धशतक बनाएका छन् । यस क्रममा ५६ चौका र ५३ छक्का प्रहार गरेका छन् । अन्तर्राष्ट्रिय टी-२० मा भने उनले २७ खेलबाट ३२१ रन बनाएका छन् । २१.४० को औसत र १५७.३५ को स्ट्राइक रेट उनको अन्तर्राष्ट्रिय ब्याटिङ तथ्यांक हो । यस क्रममा उनले एक अर्धशतक बनाएका छन् । उनको सर्वाधिक स्कोर अविजित ५२ रन हो । लोकेशको करिअरमा १०६ रनको शतकीय इनिङ्स महत्वपूर्ण उपलब्धि हो । उनले नेपाल ए टोलीबाट आयरल्यान्ड वुल्भ्सविरुद्ध सन् २०२४ मा ५६ बलमा १०६ रन बनाएका थिए । उक्त इनिङ्सले उनको आक्रामक ब्याटिङ क्षमता मात्र होइन, आवश्यक पर्दा लामो इनिङ्स खेल्न सक्ने क्षमता पनि देखाएको थियो । उनले घरेलु टी-२० क्रिकेटमा अहिलेसम्म १५ खेलबाट ४६५ रन बनाएका छन् । यसक्रममा एक शतक र दुई अर्धशतक बनाएका छन् । घरेलु टी-२० मा उनको औसत ३३.२१ र स्ट्राइक रेट १४५.७७ छ । यसले अन्तर्राष्ट्रिय क्रिकेटको तुलनामा घरेलु प्रतियोगितामा उनी अझ प्रभावकारी रूपमा रन बनाउन सफल भएको देखाउँछ । एनपीएलमा निरन्तर प्रभाव एनपीएलमा पनि लोकेशको प्रदर्शन क्रमशः प्रभावकारी हुँदै गएको छ । सन् २०२४ मा विराटनगर किंग्सबाट खेलेका उनले लुम्बिनी लायन्सविरुद्ध ४७ बलमा ७१ रन बनाएका थिए । सन् २०२५ को एनपीएलमा पोखरा एभेन्जर्सविरुद्ध ४८ बलमा ७२ रन बनाए । सन् २०२६ को संस्करणमा भने कर्णाली याक्सविरुद्ध ५२ बलमा ८७ रन बनाएका छन् । यस संस्करणमा कर्णालीविरुद्ध ८७ रन बनाएका उनले सुदूरपश्चिमविरुद्ध १० बलमा २५ रन र जनकपुरविरुद्ध ४० बलमा ५० रन बनाए । चितवनविरुद्धको पहिलो खेलमा १४ बलमा २६ रन बनाएका थिए । यी फरक इनिङ्सले उनी परिस्थितिअनुसार आफ्नो ब्याटिङ शैली बदल्न सक्ने खेलाडी रहेको देखाउँछन् । आवश्यक पर्दा लामो समय क्रिजमा टिकेर रन बनाउन सक्छन् भने अन्तिम ओभरतिर तीव्र गतिमा रन जोड्ने भूमिका पनि निर्वाह गर्न सक्छन् । उनी चार खेल खेल्दासम्म एनपीएलमा सबैभन्दा बढी रन बनाउने खेलाडीमात्रै बनेका छैनन्, सबैभन्दा बढी बाउन्ड्री प्रहार गर्ने, एकै गेममा बढी स्कोर बनाउने र बढी अर्धशतक प्रहार गर्ने खेलाडीका रुपमा चिनिएका छन् । आक्रामकता नै पहिचान लोकेश दायाँहाते ब्याटर हुन् । उनी विकेटकिपिङ पनि गर्छन् । उनको ब्याटिङको मुख्य विशेषता आक्रामकता हो । टी-२० क्रिकेटमा कम बलमा धेरै रन बनाउनु महत्वपूर्ण हुन्छ । त्यसका लागि उनी चौका र छक्कालाई प्राथमिकता दिने गर्छन् । उनको करिअरको स्ट्राइक रेटले पनि यही कुरा देखाउँछ । समग्र टी–२० मा १५२.३८ र अन्तर्राष्ट्रिय टी–२० मा १५७.३५ को स्ट्राइक रेटमा ब्याटिङ गर्नु उनको आक्रामक शैलीको प्रमाण हो । ५३ छक्काको तथ्यांकले पनि बललाई सीमापारि पु¥याउने क्षमताको संकेत गर्छ । अर्को महत्वपूर्ण पक्ष उनको विकेटकिपिङ क्षमता हो । ब्याटिङसँगै विकेटपछाडिको जिम्मेवारी पनि पूरा गर्न सक्ने भएकाले टोलीले उनलाई दोहोरो भूमिकामा उपयोग गर्न सक्छ । टी-२० क्रिकेटमा यस्तो खेलाडी टोलीका लागि उपयोगी हुन्छन् । एनपीएलमा विराटनगर किंग्सका लागि लोकेशको भूमिका महत्वपूर्ण देखिएको छ । टोलीमा आन्द्रे रसेलजस्ता विस्फोटक ब्याटर रहे पनि नेपाली खेलाडीबाट ठूलो योगदान आउनु टोलीका लागि सकारात्मक पक्ष हो । लोकेशले ब्याटिङमा देखाएको प्रदर्शनले विराटनगरको मध्यक्रमलाई थप बलियो बनाएको छ । तर, आक्रामक ब्याटिङ उनको बलियो पक्ष भए पनि त्यसलाई निरन्तर प्रदर्शनमा बदल्नु चुनौती छ । अन्तर्राष्ट्रिय टी–२० मा २७ खेलबाट ३२१ रन र २१.४० को औसत छ । घरेलु क्रिकेटमा शतक बनाइसकेका उनले अन्तर्राष्ट्रिय स्तरमा पनि नियमित रूपमा ठूलो इनिङ्स खेल्न सक्ने क्षमता विकास गर्नुपर्ने देखिन्छ । लोकेशको ब्याटिङमा दर्शकले खोज्ने कुरा रन मात्रै होइन, मनोरञ्जन पनि हो । उनी क्रिजमा हुँदा दर्शकले चौका र छक्काको अपेक्षा गर्छन् । उनको ब्याटबाट बल उड्दा मैदानमा हुटिङ गुञ्जिन्छ । यही आक्रामक शैली र दर्शकसँग जोडिने खेलले लोकेशलाई एनपीएलका आकर्षक नेपाली खेलाडीमध्ये एक बनाएको छ । डोटीबाट क्रिकेट यात्रा सुरु गरेका लोकेशका लागि अबको लक्ष्य आफ्नो यही क्षमतालाई राष्ट्रिय तथा अन्तर्राष्ट्रिय क्रिकेटमा निरन्तरता दिनु हो । दर्शकको हुटिङलाई रनमा बदल्दै नेपाली क्रिकेटमा आफ्नो पहिचान अझ बलियो बनाउने अवसर उनका सामु छ ।
आज दिउँसो १ बजे मन्त्रिपरिषद् बैठक बस्दै
काठमाडौं । प्रधानमन्त्री तथा मन्त्रिपरिषद्को कार्यालय, सिंहदरबारमा आज बुधबार मन्त्रिपरिषद्को बैठक बस्ने भएको छ । बैठक दिउँसो १ बजे बस्ने तय भएको हो । बैठकमा सरकारका नियमित कामकारबाही तथा समसामयिक विषयमा छलफल हुने अपेक्षा गरिएको छ ।
बझाङमा जीप दुर्घटना हुँदा दुई जनाको घटनास्थलमै मृत्यु, ६ जना घाइते
काठमाडौं । बझाङमा जीप दुर्घटना हुँदा दुई जनाको घटनास्थलमै मृत्यु भएको भने छ जना घाइते भएका छन् । दुर्घटनामा परी केदारस्युँ गाउँपालिका ७ का गोपाल धामी र पवित्रा धामीको मृत्यु भएको छ । घाइते हुनेहरूमा केदारस्युँ गाउँपालिका– ७ का ४५ वर्षीय प्रेमबहादुर धामी, ३२ वर्षीय रमेश धामी, २६ वर्षीय रमेश धामी, २२ वर्षीया रेखा धामी, ४२ वर्षीया शारदा धामी जाग्री र ४२ वर्षीय रामकुमार जाग्री रहेका छन् । उनीहरूको जिल्ला अस्पताल, बझाङमा उपचार भइरहेको छ । केदारस्युँ गाउँपालिका– ७, भामचौरनजकि बागथलातर्फ गइरहेको से ००१ च ४३७६ नम्बरको जीप बुधबार (आज) बिहान दुर्घटनामा परेको हो । जीपमा चालकसहित १२ जना रहेका थिए । जीपको ब्रेक फेल भई सडकबाट करिब १०० मिटर तल खसी दुर्घटना भएको जिल्ला प्रहरी कार्यालय, बझाङले जनाएको छ ।
एनआईसी एशियाले ७ अर्ब ४५ करोडको हकप्रद सेयर जारी गर्ने
काठमाडौं । नेपाल धितोपत्र बोर्ड (सेबोन) ले एनआईसी एशिया बैंकलाई ५० प्रतिशत हकप्रद सेयर निष्कासन गर्न पूर्वस्वीकृति दिएको छ । बोर्डले आर्थिक वर्ष २०८३/८४ अन्तर्गत कात्तिक १७ गते बैंकको हकप्रद सेयर निष्कासन प्रस्ताव स्वीकृत गरेको हो । स्वीकृतिअनुसार बैंकले हाल कायम २ कित्ता सेयर बराबर नयाँ १ कित्ता सेयर अर्थात् १ः०.५० अनुपातमा हकप्रद सेयर जारी गर्नेछ । बैंकले प्रतिकित्ता १०० रुपैयाँ अंकित मूल्यका कुल ७ करोड ४५ लाख ८७ हजार ८३५ कित्ता हकप्रद सेयर निष्कासन गर्नेछ । यसबाट बैंकले ७ अर्ब ४५ करोड ८७ लाख ३५ हजार रुपैयाँ पुँजी जुटाउनेछ । हकप्रद सेयर निष्कासन तथा बिक्री प्रबन्धकको जिम्मेवारी एनआईएमबी एस क्यापिटलले पाएको छ । सेबोनको स्वीकृतिपछि औपचारिक पत्र प्राप्त भएलगत्तै बैंकले सेयर निष्कासन मिति, बुक क्लोज तथा आवेदन प्रक्रियासम्बन्धी विस्तृत विवरण सार्वजनिक गर्नेछ । हकप्रद सेयर निष्कासनपछि बैंकको चुक्ता पुँजी थप वृद्धि हुनेछ ।
चुनावी नतिजाले अमेरिकी जनताको स्पष्ट सन्देश देखियो : ओबामा
काठमाडौं । अमेरिकी कांग्रेसका दुवै सदनमा डेमोक्रेटिक पार्टीले बहुमत हासिल गर्ने सम्भावना बढ्दै गएपछि पूर्वराष्ट्रपति एवं डेमोक्रेटिक पार्टीका नेता बाराक ओबामाले प्रतिक्रिया दिएका छन् । ओबामाले सामाजिक सञ्जाल एक्समा लेख्दै अमेरिकी जनताले स्पष्ट सन्देश दिएको बताएका छन् । उनका अनुसार अमेरिकी जनता विभाजनकारी राजनीतिभन्दा एकतामा जोड दिने राजनीति चाहन्छन् । उनीहरू आफ्ना समस्याको ठोस समाधान दिन सक्ने नेता चाहन्छन् । उनले चुनावी नतिजा देशका विभिन्न भागबाट प्रतिस्पर्धा गरेका उत्कृष्ट उम्मेदवारका कारण सम्भव भएको बताएका छन् । यसमा यसअघि जित्ने सम्भावना निकै कम मानिएका क्षेत्रका उम्मेदवारसमेत रहेको उनले उल्लेख गरेका छन् । ओबामाले ती उम्मेदवारहरू फरक–फरक पृष्ठभूमि र राजनीतिक विचारधाराबाट आए पनि साझा मूल्य, जनसेवाप्रतिको विश्वास र आफ्ना निर्वाचन क्षेत्रका जनतालाई प्राथमिकता दिने प्रतिबद्धताले एकजुट भएको बताएका छन् । त्यस्तै, उनले निर्वाचन प्रक्रिया सफल बनाउन सहयोग गर्ने दुवै पार्टीका हजारौं निर्वाचन अधिकारी र स्वयंसेवकप्रति आभार व्यक्त गरेका छन् । उनीहरूले लोकतन्त्रको महत्त्वपूर्ण जिम्मेवारी जिम्मेवारीपूर्वक पूरा गरेको ओबामाको भनाइ छ । ओबामाले वर्तमान प्रशासनको कार्यकाल अझै दुई वर्ष बाँकी रहेको उल्लेख गर्दै अब आफूहरूको जिम्मेवारी थप सक्रिय भएर काम गर्नु रहेको बताएका छन् । उनले आफूहरूसँग अधिकार रहेको ठाउँमा परिवर्तन ल्याउने, आगामी दिनमा हुन सक्ने क्षति रोक्ने र भविष्यका लागि बलियो आधार तयार गर्ने काममा जुट्नुपर्ने बताएका छन् । यसअघि अमेरिकी राष्ट्रपति डोनाल्ड ट्रम्पले पनि मध्यावधि निर्वाचनको नतिजा स्वीकार गर्ने बताएका थिए । रिपब्लिकनलाई ठूलो धक्का, ट्रम्पमाथि हारको दोष
